Tertulia: Trenta años de Bable nes Escueles

Resumen de la tertulia del 26 de xineru de 2010


Trenta años de Bable nes Escueles


Na que participaron

Pablo Xuan Manzano
Maestru y presidente del coleutivu "Llingua y Enseñanza". Miembru de númberu de l'Academia de la Llingua Asturiana.

Xosé María García "Llábana"
Maestru d'asturianu. Participante na esperiencia de les escueles pilotu nel Colexu Públicu Evaristo Valle de Xixón.

Faciéndose cargu la presentación Iris Díaz


Iris Díaz
Lo primero, disculpar la presencia d’Urbano Rodríguez, invitáu como maestru y fundador de Conceyu Bable-Xixón, que m’avisó que taba con gripe y nun va poder venir. La verdá ye que ye una pena porque foi ún de los fundadores de Conceyu Bable nel conceyu de Xixón y podría cuntar coses bien interesantes de cómo foi l’entamu equí. Y tamién foi munchos años direutor del colexu Jacinto Benavente, que foi un centru de referencia no que se refier al asturianu nes escueles.

Pero tán equí Pablo Xuan Manzano, que ye maestru, bueno, xubiláu hai pocu, presidente del colectivu Llingua y Educación y académicu de númberu de l’Academia de la Llingua, y munches más coses que podrá cuntanos él más p’alantre.

Y cuntamos tamién con Xosé María García, “Llábana”, que ye como lu conoz tol mundu, que ye maestru d’asturianu y participó nes escueles pilotu qu’entamaron cola asignatura d’asturianu, concretamente nel colexu Evaristo Valle de Xixón.

Como ye una tertulia que facemos en Xixón, siempre lo centramos un poco equí, nel conceyu, aunque seyan temes más o menos xenerales.

Y teníemos muncha gana de facer esta tertulia porque queríemos saber cómo foi l’entamu de la escolarización de llingua asturiana nes escueles, nun solamente dende’l puntu de vista prácticu, del que tamién falaremos, sinón tamién por qué foi una vindicación tan importante dende´l principiu del movimientu de vindicación llingüística el que tuviera na escuela.

Podemos da-yos pasu y que nos cuenten un poco cómo entamó esto y por qué se vio la necesidá de plantegar l’asignatura, por exemplu.

Pablo Xuan Manzano
Sí, vamos ver, l’Estatutu d’Autonomía d’Asturies contempla que la llingua debe ser llevada a la enseñanza, respetando les variantes y demás. Entós, dende l’Academia, yo d’aquella yá yera miembru l’Academia, yera miembru correspondiente, lo primero que ficimos fue facer unos cursos de perfeccionamientu pal profesoráu. Ficímoslos nel añu 82, 83 y 84. Primero ficímoslos na Universidá d’Uviéu, y llueu yá pasamos a la Puela d’Ayande y al parador del Brañilín en Payares. Bueno, llueu pasamos a Llanes y seguimos faciendo cursos, tamos falando de va más de trenta años.

Y una vegada que teníemos yá profesoráu, podríemos decir que capacitáu, plantegamos al gobiernu asturianu la necesidá de cumplir col Estatutu. Tuvimos una serie de xuntes col Conseyeru d’Educación, que yera Manolo de la Cera y col Presidente, que yera Pedro de Silva y colos inspectores, y bono, poco a poco fuimos, con bastante dificultá, porque, concretamente per parte d’Educación había munchu recelu, decíen qu’esto nun diba a dengún sitiu, que nun diba tener éxitu, que la cosa diba dir mal…

Pero fuimos p’alantre con ello, siempre col apoyu de… siempre digo que nunca tuvimos un Presidente como Pedro de Silva, un conseyeru como Manolo de la Cera y un emprenteru como la Mercantil de Xixón. Y d’aquella yeren ‘malos’. Yeren malos pero foron los meyores. D’aquella tábemos tol día engarrándonos con ellos, pero foron los que dieron la cara, los que lo metieron, podemos dicir.

Y nel añu 84 hubo una serie negociaciones col Conseyeru Cultura y con Educación, y decidimos que diba haber seis centros pilotos pal añu 84-85, que diben ser atendíos por maestros, que diben entamar en terceru, namás qu’en terceru, cola idega de dir a terceru y a cuartu pal añu siguiente, y asina hasta acabar la escolarización en Primaria.

Y bono, buscamos maestros con cierta dificultá, yo alcuérdome que’l Llábana fue p’allá’l primer día, tábamos na Conseyería, y díxonos, contáis conmigo, yo nun sé si me queréis o non, pero contáis conmigo.

Buscamos seis, non, ocho maestros, que atendíen a los seis centros. Los centros yeren en Blimea, ellí tábamos Gemma y yo, l’Evaristo Valle, que había otros dos maestros, y llueu yá yeren centros d’un maestru, el Valliniello, n’Avilés, el Reconquista en Cangues d’Onís, l’Ubanca en Cangas del Narcea y el de Mieres.

Y entamamos la escolarización en terceru. Esto yera una cosa estraña, porque lo normal yera entamar en párbulos, n’Infantil. Pero ellos decidieron que fora en terceru, nun sé por qué motivu.

Llevámoslo alantre, hubo una valoración, consideróse que la valoración yera mui positiva, y al añu siguiente aumentáronse a cuatro centros pilotos más, en L’Entregu, en Llaranes, n’Avilés, en Samartín en Sotrondio y en Priedras Blancas. Y llueu ya s’ufiertó al restu de centros que podíen entamar a dar clase en terceru, ensin ser centros pilotos, y ellí entamaron munchísimos centros. El tercer añu ya yéremos sesenta centros.

Bono, entamamos, el coordinador de la escorarización yera yo. Reuníamonos n’Academia tolos sábados. Nun teníamos testos nin teníemos ná. Yera too a base fotocopies. Llevábamosles, intercambiábamosles, esplicábamosnos cómo lo facíamos, comentábamos esperiencies…

Llueu yá fue apareciendo dalgún llibru, apaeció “Reciella”, apaeció’l “Diccionariu Básicu de la Llingua Asturiana”, que tovía ta per ehí, nun hubo tovía ningún repuestu pa ello, apaeció “Adulces”.

Había un llibru pal grau superior, “Reciella”, ún pal grau mediu, que yera “Adulces”, y bono, yera lo qu’había.
Xosé María García “Llábana
Dempués de que Pablo cuntó un poco la hestoria l’entamu, quería añadir que si se llegó una escolarización del asturianu foi por presión popular por Conceyu Bable precisamente. Presionóse muncho, llogróse que en Xixón hubiera una manifestación potente en defensa de la escolarización del asturiano, d’aquella col eslogan de “Bable nes Escueles”.

Y voi falar un pocu del procesu en Xixón. Equí foi un colexu, l’Evaristo Valle. Yo camiento que foi un colexu un poco especial. Yo creo que la Conseyería quería qu’hubiere un centru n’una villa importante como ye Xixón. Pero, igual que nos demás llaos, la escolarización fue con un consensu importante nel claustru de mayestros y les APAs, en Xixón nun fue asina, precísamente porque tenía qu’haber un centru en Xixón, y fue un poco forzada. Fue pedío por un pá, precisamente fue’l que fundó El Garrapiellu, Lobeto. Un pá solu. ¿Y qué pasó cuando lleguemos al colexu?, pues que teníemos a los mayestros en contra y a les APA en contra. Y si nos otros centros piloto había unos porcentaxes d’un 70 o un 80 por cientu o más d’escolinos que diben a asturianu…

Equí voi facer un paréntesis: cuando Porrón, l’inspector xefe dicía, bah, eso nun tien denguna importancia, total nun va dir nadie.

En cambiu, nel Evaristo Valle entamemos nun 30 por cientu, y veíennos como algo estraño ellí, una cosa sorrealista, y entrugaben, decíen faltosaes, habíalos que taben a la escontra y corríen materia… pero bono, poco a poco fuimos encarrilando l’asignatura, apoyónos la Conseyería igual qu’apoyó a tolos centros piloto, con actividaes culturales, de teatru, de música, dempués cola Selmana les Lletres…Y entós l’asturianu fue garrando prestixu nel colexu, y pasemos, en tres años d’esi 35 por cientu a un 80 por cientu d’escolinos. Amás yera’l colexu onde más escolinos había, d’aquella había 1.200, por eso tábemos dos mayestros ellí.

Y bueno, llogremos ponenos bien, igual que los otros centros piloto. Y como decía Pablo, nesos años yá se fue xeneralizando la escolarización a otros centros, en terceru de Primaria.

Y ¿por qué non n’Infantil?, que seguimos tovía col mesmu problema. Seguimos tovía col mesmu problema porque pa mi, l’espíritu de la Conseyería d’antes y d’agora ye facer de la escolarización algo folklorista, que se dea unos años, que los neños aprendan a decir ‘ye’ y ‘facer’ y cuatro cosines, y namás.

Porque yo depués fui mayestru en Vega, y yera de los pocos centros onde entamamos n’Infantil, y el cambiu ye impresionante. Ye que los neños tienen que tener una escolarización n’asturianu dende Infantil, porque los aportes que traen de la casa piérdenlos, en tantu que, si hai asturianu, ye un refuerzu. Los nenos de cincu años yá falen que mete mieu n’asturianu.

Y eso nun lo quieren, y nun quieren que lo haya tampoco na Secundaria, nin en Bachiller. Pónenlo mui difícil. Hai que ser casi un militante pa dir a clases d’asturianu en Secundaria y en Bachiller.

Había una cosa que me dio un resultáu impresionante na escuela, fue’l güertu escolar.

¿Qué pasaba? Que solo diben al güertu escolar los neños que yeren d’asturianu, los otros nun podíen dir. Ellos queríen dir, y los pás tamién queríen, porque munchos proceden de la zona rural. Y entós apuntábense munchos. Ye más, en Vega, tábamos al cien por cien, y aquello fue perfeccionándose y teníemos Aula la Ñatura. Y diben toos a asturianu.

Iris Díaz
Pero ye que lo de Vega yera güertu y yeren pites y de too.
Xosé María García “Llábana
Sí, Aula la Ñatura. Y eso fizo que muncha xente s’apuntare a llingua. Bueno aparte de les actividaes culturales qu’había.


Y así entamemos.

Una cosa importante fue la valoración de los centros pilotu al final. Porque depués de seis años d’esperiencia, cuando los neños qu’entamaron en terceru llegaron a octavu d’EXB fízose una valoración. La Conseyería fizo un despliegue de pedagogos, de psicólogos y de nun sé que más y fizo un estudiu.

Facíen la siguiente comparación, comparaben por exemplu, un centru de Xixón, l’Evaristo Valle, comparábenlu col Asturias, que yera un centru que taba próximu, y con característiques paecíes. Y valoraben si los centros onde taben escolarizaos n’asturianu teníen retrasos, valoraben si sabíen menos de matemátiques, si sabíen menos en llingua castellana… claro teníen menos hores, si había 25 hores y teníen dos pa llingua, teníen menos pa otres coses. Y el resultáu final fue los neños que diben a asturianu nun perdíen ná, nin en matemátiques nin en llingua castellana, nin en xeografía, nin en ná. Pero había una cosa que los diferenciaba, que taben muncho más esmolecíos pol tema d’Asturies en xeneral, de la cultura, de los problemes del trabayu… claro normal, conocíen más a Asturies.

Eso, el partíu que gobernaba d’aquella, que yera’l partíu socialista, guardólo nun caxón. Nunca salió a la lluz esi informe.


Y nun se xeneralizó la experiencia, porque taba previsto que lo de los centros piloto yera pa xeneralizalo a tolos centros d’Asturies, públicos y concertaos. Y eso tovía güei nun se fizo después de tantos años. Porque na concertada nun hai, na pública hai sitios onde nin siquiera s’ufierta, n’Infantil ná, en Secundaria y Bachiller yá ves como ta…

Iris Díaz
Si vos paez, podíamos comentar cómo fue lo de la formación de los maestros. Estos maestros qu’entamaron, ¿yera por militancia?
Pablo Xuan Manzano
El primer añu, los primeros maestros yeren amigos nuestros, y bono, sí, yeren militantes. Ellí tábamos fundamentalmente Árias y yo, que yéramos los que los conocíamos, y fue una cosa de boca a boca. Ficimos el cursu n’Uviéu y en La Puela Ayande, y llueu pasamos al Brañilín, creo, bono, yá van trenta años.

De mano yéremos venticinco, y fueron muncho meyor que los d’agora. Nun pola calidá, sinón pola militancia. Y taben tamién Ramón d’Andrés, taba Ana Cano… el profesoráu yera básicamente’l mesmu qu’hai agora. Bono, yo yá me retiré, y Riaño ya ta dexándolo, y Arias tamién, y Ana tamién, pero agora ta Iris, y ta Pablo Medina.

Y yera l’Academia la que daba la titulación, los cursos de l’Academia equivalíen a los cursos de la Universidá güei. Y llueu los cursos pasaren a la Universidá, que yera una de les reivindicaciones de l’Academia, onde deben tar.

Actualmente hai unos 3.000 maestros que tienen la titulación n’Asturies.

Xosé María García “Llábana
Nosotros, cuando entamamos, nun yéremos especialistes en llingua asturiana, porque teníemos dos cursos namás. Tábamos en segundu y hubo qu’entamar, pero faltaba un cursu.

Pablo Xuan Manzano
Sí, y agora son tres cursos tamién. Lo que pasa qu’agora, al haber un esamen d’aniciu, pues pasar al segundu ensin necesidá de facer el primeru.

Iris Díaz
Y d’esa xente qu’entamó, ¿siguen munchos n’activu como maestros d’asturianu o pasaron a otres especialidaes?

Pablo Xuan Manzano
La mayoría de la xente que tábamos yéramos propietarios definitivos, eso fue mui importante, tapaba munches boques. O dábamos clase d’asturianu o de matemátiques o lo que seya.

Güei ya tamos toos retiraos, yá van trenta años, yá nos pasó l’arroz.

Iris Díaz
Falásteis de les les escueles, de les APAs, de la Conseyería, …y los neños, ¿cómo lo vivíen?
Xosé María García “Llábana
Los neños… había de too, depende’l sitiu. Por exemplu l’Evaristo Valle yera la zona más castellanizada, onde había neños de procedencia d’otros llaos del Estáu y tamién neños asturianos. Pero la acoyida fue importante.

Una cosa que pasaba ye que na EXB algamábase los catorce años y había neños, que yá yeren rapazos, que yá diben teniendo concencia de defensa de la llingua y de la cultura asturiana. Y hai yá algunos que son güei mayestros d’asturianu.

Y en xeneral, los neños mui bien. Pa mi yera muncho más importante que los neños lo pasaren bien y que tuvieren un recuerdu d’Asturies y de la llingua más que supieren coses gramaticales.

Un asistente
¿Y los pas?

Xosé María García “Llábana
Bueno, los pas que los mandaben yera porque teníen ciertu enfotu. Porque si nun hubiese sío polos pas, esto hubiere dío p’atrás porque yeren los que decidíen.

Alcuérdome agora de cuando nel Evaristo Valle, que los pas taben a la escontra, el presidente de los APAs apellidábase Cándano, y yera un enemigu mortal del asturianu nun entamu. Y entós decía-y yo, pero bono, apellidándote Cándano, ¿cómo dices eses coses? ¿tú sabes lo que ye cándano? Y diz él, pues non. Pues un cándanu ye un cañu secu d’un árbol. Y poco a poco, terminó siendo un militante.

Lo mesmo que los mayestros. Hubo mayestros que primero taben a la escontra y dempués diben a les manifestaciones. ¿Por qué? Porque desconocíen el tema.

El gran problema que tenemos n’Asturies ye’l desconocimientu d’Asturies. Y ye como una ma, el que nun conoz a la ma, nun pue querela.

Y nun conocemos Asturies porque nun mos eduquen na conocencia d’Asturies.

Y por eso pasó lo que pasó na valoración de los centros piloto, que los neños escolarizaos n’asturianu, como conocíen coses d’Asturies, teníen más sensibilidá y apreciaben más les coses d’Asturies que los otros.

Pablo Xuan Manzano
Lo fundamental d’aquella fueron los maestros, que fueron auténticos militantes aparte de ser buenos maestros. Partimos con xente que teníen yá les oposiciones, y yeren xente que los llamabes los sábados y taben ehí tola mañana y lo que seya.

Con ellos, la xente que taba a la escontra, y había muncha xente que taba a la escontra, nun teníen argumentos. Decíen, bueno, a estos habrá que dexalos. Y salió alantre.

De tar nun centru onde la mayoría de la xente nun quería, nun quería porque nun sabía, los maestros, aparte de dar clase, teníen que dar otra clase a los pas, y actividaes colos guah.es que pudieran facer en casa.

Y llueu teníemos la esperiencia de Galicia. En Galicia entamaron mui mal la escolarización, entamaron a dar clases de gramática y la xente respondió a la escontra d’ello. Y nosotros aprendimos d’ellos, y vimos que la gramática yera importante, pero nun yera lo más importante. Había munches más coses que dar, había que meter la cultura asturiana pel medio, y los llibros yá se ficieron con esa idega, y per ehí fueron los tiros, y yo creo que l’éxitu la escolarización fue per parte d’ello.

Y llueu había munchu apoyu per parte la televisión rexonal. Taba Próspero, taba Paco Abril, que d’aquella facía dos programes toles selmanes. Y yera una cosa nueva, nun taba tan politizao como agora. Y bueno, facíemos munches coses que salíen al esterior.

Tábamos pendientes de los guah.es tol día, y el sábadu y el domingu. Díbamos al partíu del Sporting el domingu.

La mayoría de les actividaes estraescolares que se facíen nel colexu partíen de nosotros.

Y eso, claro, nótase, y favoreció muncho la escolarización.

D’aquella, en tantos por cientu, había más escolinos qu’agora. Na Cuenca diben toos, el cien por cien, y en Xixón, qu’entamaron col treinta y cincu por cientu, enseguida pasaron al sesenta o al setenta.

Xosé María García “Llábana
Al ochenta, al ochenta llegamos en tres años.

Iris Díaz
¿Y agora a lo meyor nun ye tan grande’l tantu por cientu?

Pablo Xuan Manzano
Bueno, home, llueu les coses cambien. Agora mandes a un maestru dir un domingo al partíu del Sporting y dizte que vaya’l padre y la madre. Y yo nun digo que nun tengan razón. Tendránla.

A midida que’l procesu fue faciéndose más grande. Agora ye la de dios, hai veintipicu mil guah.es. Piérdeste ya.

Un asistente
Había tamién un procesu d’interrelación. El maestru, a la vez qu’enseñaba, aprendía tamién. Yera nuevo pa toos. Pa los escolinos, y tamién pa los maestros. Yera curioso. Yera un procesu que repercutía tamién en ti n’alguna manera. Interrelacionabes colos alumnos. Y a veces enseñábente coses a ti. Palabres y espresiones que tu igual nun conocíes. Hubo un enriquecimientu mútuu.
Pablo Xuan Manzano
Yo alcuérdome que nos CPRs, los Centros de Profesores, el profesor d’asturianu yera’l coordinador de nun se qué y taba lliberáu. Y yo tenía cientu y picu maestros faciendo cursos y cursillos y actividaes.

Yéramos menos, ye verdá, pero taba la cosa muncho más movida. Yéramos más militantes.

Agora normalmente’l maestru d’asturianu va dar clase con tola bona voluntá, y mui bien y tal, pero bueno, va dar clase y acabóse.

Xosé María García “Llábana”
Bueno, habrá de too.

Pablo Xuan Manzano
Si, si, hai de too, dende llueu.

Una asistente
Da la sensación de qu’agora ye xusto lo contrario. Antes taben dando clase porque taben concienciaos, pero muncha xente que ta agora dando clase nun tien más interés que´l tar trabayando de algo. Ye un trabayu más, ye una asignatura más. Salvo honroses escepciones, que les hai.

Esi plus que decíeis qu’hai que tener, que ye’l qu’aportaba coses, yo creo qu’agora ta perdiéndose.

Pablo Xuan Manzano
Si, ta perdiéndose, ta perdiéndose, y ye normal que se tea perdiendo. Lo normal ye lo que pasa agora.

La mesma asistente
Ye lo normal, pero da pena. Oyes que la maestra diz que… nun se qué, y a veces son unes barbaridaes…

Un asistente
Ye verdá. Por exemplu, na escuela El Rei Pelayu, en terceru podía escoyese ente asturianu o cultura asturiana, yera por ciclos, y en sesto podíes volver a escoyer. Y yo garré cultura asturiana porque la clase d’asturianu yera un absolutu cachondéu. Pero non porque ficieren actividaes y xugaren a la media naranxa, que yera lo que daben en telecincu, yera la profesora la que claramente pasaba de too. Y la fama de l’asignatura yera esa, una maría, un cachondéu, facer el pih.o lliteral.

Tien qu’haber un puntu intermediu. ¿por qué’l profe d’asturianu va ser el que trabaye tres veces más? Pero d’ehí a que’l profe d’asturianu nun tenga’l mas mínimu sentimientu de cercanía, o de tener claro ciertes idees que debería tener, eso ye demoledor.

Porque búscase que nun haya sólo falantes, sinón xente concienciao. Xente que perciba que lo que fala non solo ye una forma de comunicación, sinon algo que pertenez a toos, al pais.

Pablo Xuan Manzano
La fama que tien l’asturianu en munchos sitios ye la de que ye una maría. Apruébase seguro. Porque lo que nun puedes facer ye dir suspendiendo a los guah.es. Pero al mesmu tiempu nun pues dexar que aquello seya una comedia. Hai que buscar ehí l’equilibriu. Pero eso pasa en toles asignatures.

Una asistente
A mi comentáronme qu’había profesores d’asturianu que dicíen en clase que yera un dialectu. Eso hai que cuidalo.

Un asistente
Si hubiera inspecciones. Ye como si dices lo del creacionismu en clase de ciencies.

Xosé María García “Llábana
Una cosa importante que se facía aquellos años yeren los cursos de Perlora. Cada dos o tres meses. Claro, yera porque había muncha militancia tamién, porque igual si lo faes agora nun va a lo meyor nadie. Pasábemos un fin de selmana ellí falando d’esperiencies. Igual yéremos cien maestros ellí. Y venía xente tamién de Cataluña, de Galicia, d’otros llaos a cuntar lo de so.

Había más o menos una normalización de cómo trabayar, y de cara a meyorase.

Yera mui positiva aquella esperiencia, y pasábamoslo mui bien.
Un asistente
D’aquella los profesores asumíais que tábeis participando en dalgo mui importante pal futuru l’idioma.

Xosé María García “Llábana
Pero hai que tener en cuenta que los primeros qu’entamemos yéremos mui miraos col deu. Y había que ser mui valiente pa decir, ¡voi ser mayestru d’asturianu, cuando teníamos a tou dios a la escontra!. Y ye polo que d’aquella salíen los verdaderos lluchadores, los verdaderos militantes.

Güei yá se mira dende otru puntu de vista. Como yá ta llograo qu’hai una escolarización…

Agora la xente fai’l cursu d’asturianu pa dar clase d’asturianu, como d’inglés o como d’otra cosa cualquiera.

Un asistente
De lo que tas comentando, yo fice los cursos esti añu, y de los sesenta y cincu que yéramos, militantes y que tengan concencia de lo que ye l’asturianu, debíamos ser seis o siete.

Pablo Xuan Manzano
Pero ye igual si quedaren les coses clares. Eso ye la normalidá.

El mesmu asistente
Pero eso nótase nel ambiente de clase. Y nel interés que ponen. Que será l’interés que vayan poner en cuanto tengan el títulu y obtengan eses places. Van pasar d’ello.

Una asistente
Pero ye qu’eso ye asina a tolos ámbitos de la enseñanza. Pero pienso qu’eso ye la normalización. Lo mesmo que, y ye una cosa bien positiva, los neños estranxeros van a clase d’asturianu como un mediu de culturización y d’integración. Esto, hai años yera impensable. Y eso ye mui importante.

Iris Díaz
Bueno, ta claro que la escolarización entamó, entamó bien, gracies al esfuerzu básicamente de toos estos maestros que tais comentanto. Pero ¿cómo hai que plantegalo agora? ¿qué midíes habría que tomar?

Porque yo creo que los maestros nun teníen que ser militantes, si lo son meyor, lo que tienen ye que ser profesionales. Y el problema ye qu’agora hai una falta de profesionalidá grande. Entós, ¿cómo se podría dar esi saltu a que se dignifique l’asignatura?

Pablo Xuan Manzano
Bueno, eso ya depende de vosotros.

Pero yo creo que ye fundamental qu’haya un seguimientu, que nun lu hai, per parte la inspección. Eso ye fundamental. Si nun hai un seguimientu en condiciones, caún fai lo que-y da la gana. Y a nun ser que mates a un guah.e o algo, nun pasa ná. Una inspección con enfotu, claro, porque si la inspección ye pa destruir más…

La xente, normalmente, ta preparada pa dar clases, vamos, como ta preparada de cualquier otra asignatura. Fai una carrera, na Universidá llueu fai unos cursos qu’esixen ciertu sacrificiu. Nun ye una broma. Vamos, saben muncho más los especialistes d’agora que los d’antes. El problema ye que los d’antes yeren militantes y los d’agora non. Entós, lo qu’hai que facer ye un seguimientu seriu.

Xosé María García “Llábana
Y lo que dixe antes, la escolarización tien que ser un procesu qu’entame n’Infantil de tres años o en maternales, tien que siguir pola Primaria, la Secundaria y el Bachiller.

De momentu, que nun tenemos oficialidá, tendrá que ser según la llei d’usu y según l’estatutu autonomía, de forma voluntaria. Con alguna opción como ye agora, o llingua o cultura asturiana, pero en tolos niveles.

Y eso ye mui importante pa la escolarización, porque lo que pretenden estos elementos que nos gobiernen, precisamente ye que se transforme nuna cosa folklórica, qu’haya unos cursos namás en Primaria pa que sepan decir ‘ye’ y ‘facer’ y cuatro cosines, y eso non, nun ye un procesu educativu nin seriu, nin responsable. Y faenlo asina adrede. Ta clarísimo. En Vega, que teníemos escolarizao al cien por cien d’Infantil de tres años, pues agora lleven dos años que yá nun manden maestru, y tán aguantando ellí unes maestres por ello, como pueden. Pero claro, la voluntariedá acaba en dos díis. Quieren esanicialo dafechu.

Precisamente la escolarización d’asturianu, y de cualquier llingua materna, ye precisamente nos cursos baxos. Porque si un neñu vien de casa diciendo ‘mama’, y ‘papa’, y ‘güelu’, y ‘paxarín’, y vien la maestra de turnu diciendo ‘mamá’ y ‘pajarito’ y eso, el neñu, pues claro, date cuenta’l golpe que lleva, como’l que llevé yo cuando yera pequeñu. Lo que ye que yo, bueno, fui a recuperame un poco, pero muncha xente ya nun se recuperó na vida.

Y por eso ye polo qu’hai que lluchar enforma.

Pablo Xuan Manzano
Otra posible solución ye que sea obligatorio. Aunque ye más complicao. Eso nun tien que ver col estatutu autonomía. Ye una asignatura más pa toos.

Iris Díaz
Ye más, podría ser llingua vehicular de dalguna de les asignatures.

Xosé María García “Llábana
Hai munchos años los sindicatos propunxeron una inmersión llingüística en Conocimientu del Mediu en seis centros. Pero fízose ensin una lexislación, ensin una manera de llevalo… y eso fue una farolada. Dixeron, bueno, pues facelo, pero ¿cómo lo vamos facer? Como yera una cosa que yera voluntaria, tenía que vese cómo facelo y la formación d’un profesor y un montón de coses. Y aquello fue un desastre total. Fue impresentable. Nun se llevó a efeutu.

Pablo Xuan Manzano
Yera una bona idea, pero nun dieron los medios, y nun se pudo llevar a cabu.

Un asistente
Yo cro que’l gran problema de la escolarización n’Asturies fue que fue un éxitu siempre. La mayoría de les coses que se ficieron fueron un éxitu. Y agora dame la sensación que’l gobiernu, agora, lo que intenta ye facer proyeutos pa fracasar.

Ye evidente que si nun se faen ferramientes, si se monten desastres, va ser un fracasu. Pero eso ehí y en cualquier otra asignatura.

Si cada esperiencia que se fai ye un éxitu, ellos tán col enfotu de que seya un fracasu. Nun pueden asumir que seya un éxitu porque ye contrario a tola so política oficial.

Quieren que naide quiera asturianu, pero cada vez que se fai algo, coño, que la xente va, que la xente quier l’asturianu, y eso ye contrario a la llinia argumental de la FSA [Federación Socialista Asturiana] n’Asturies, que ye que l’asturianu nun esiste, que’l asturianu nun ye una realidá, que l’asturianu ye dalgo que tan inventando ciertes persones. Pero sal en prensa que’l noventa por cientu de la escuela rural quier asturianu.

Y eso ye un problema pa ellos, eso mánca-yos, y claro, eso nun lo van permitir. Yo téngolo claro. Ellos van tar faciendo esperimentos d’estos, y cuanto más raros y enrevesaos meyor.

Y van seguir, porque creo que, ente comines, vosotros fuisteis una mui “mala” esperiencia. Porque salió bien.

Y eso yá ye un problema políticu, nun ye un problema d’educación.

Otru asistente
Si, si, eso ye un problema políticu pa ellos. Y por eso’l Principáu, la FSA, nunca va permitir que se xenere un corpus de maestros d’asturianu, que lu hai, organizáu, que defienda los sos derechos. Y nun va permitir que se creen tolos años una serie de xeneraciones moces que salgan con una visión muncho más positiva sobre l’idioma, non diglósica. Porque col tiempu eso acaba xenerando un tantu por cientu de la población favoratible.

Pablo Xuan Manzano
Esi fue’l problema, que dalgo xeneróse, como salió na valoración de los centros piloto.

Iris Díaz
Rebobinando un poquitín, lo que falábemos de los maestros, hai un problema agora mui grande que ta rellacionáu colo que comentaba Pablo Xuan, antes yéreis toos maestros con plaza que depués dábais asturianu, pero agora la mayoría de maestros dando clase son interinos. Esos maestros nun tuvieron que pasar per una oposición pa dar clase d’asturianu. Ye verdá que la so formación sería equiparable a la d’un maestru de matemáriques, pero yo, si quiero ser maestra de Primaria y dar matemátiques, tengo qu’enfrentame a un temariu de matemátiques, y ye ehí onde ta’l filtru. Entós, dende’l mio puntu de vista, hasta que nun haya unes oposiciones pa maestru d’asturianu nun va haber nada que facer. Y por dos sentíos, en primer llugar, porque tas faciendo que’l que pase esi filtru, sepas polo menos que tien cierta calidá a la hora de dar clase, porque tien que pasar un temariu y, sinón, van suspendelu. Y per otru llau ta un fechu, tamién mui importante. Yo como interina enfréntome a un problema que ye’l fechu que, por exemplu, nel cole que tuve l’añu pasáu, la maestra, al paecer, yera un desastre, y baxó la matrícula. Llueu llega ún que ye más o menos normal y xube la matrícula, y al añu siguiente otru diferente. Mientres que si saques plaza, aunque tengas concursu de treslláu, sabes que nel cole va haber esi maestru d’asturianu, ye un referente.

Porque claro, hai maestros d’asturianu que yo, si fuera madre, nun los llevaría.

Y eso ye una cosa fundamental.

Y tamién yera bono considerar el fechu qu’incluso oposiciones d’otres especialidaes, de música, d’educación física… tuvieren que tener una pequeña prueba de conocencia d’un mínimu de conocimientu d’asturianu, como pasa en cantidá de comunidaes. Eso yá te da una seguridá de que’l maestru que va dir a Teverga, nun va tener un conocimientu perfondu, pero nun-y va sonar a chino.

Un asistente
Colo de Teverga, contábenme una vez qu’un rapaz que taba dando clase en Teverga tenía una compañera que yera de Valladolid o de nun se ónde, y llegó diciéndo-y, oye, fice los tests estos que nos mandaron p’aptitudes, y sálenme toos tontos, y nun hai por ónde garralo, que de trenta me salgan dos, normal, pero toos… Y él miró los tests y claro, too yera, ‘señala’l rastrillo’, y coses asina, o preguntes con estructures gramaticales como …’habiendo cogido’.. o nun se qué. Y claro, si ya-yos costaba la pregunta, si encima aquello, nun-y cuadra. Y el rapaz cambió-y l’esamen, en castellán, pero buscando estructures un poco más amables, y cambió la cosa dafechu.

Si un maestru nun tien en cuenta la cuestión llingüística a la hora d’enseñar y valorar, aunque la clase seya’n castellán, puede echar por tierra’l futuru de munchos crios. Puedes fundí-y la educación.

Xosé María García “Llábana
Eso pasa colos médicos y los enfermeros tamién. Cuenta Ambás d’un médicu que dixo qu’un paciente taba diliriando, cuando lo que taba yera falando-y na fala d’él.

Un asistente
Yo vengo de la concertada, de curas, y ellí’l tema ye horrible. Porque yá nun ye que nun se faga nada a favor, ye que la educación ye a la escontra. Directamente a la escontra. Bueno, cuando salió lo de los cinco duros de multa que poníen nun colexu de monxes por falar n’asturianu… ye verdá. Si fales asturiano ríense de ti. Y nun digo falar, val con decir dalguna pallabra. Eso ye mui gordo. Y nun se ta por facer nada con eso.

Yo estudié nun colexu de Xixón, y ellí entraben mozos y moces en Primeru de BUP, y si entraben un puquitín tal, el primer añu ‘socializábenlos’. Y eso nun ye oculto. Una inspección nun puede permitir que se adoctrine a la escontra.

Pablo Xuan Manzano
Yo creo que la enseñanza concertada, que ye’l casu que dices, si la ufierta igual que los demás centros y paguen al profesor… qué más da la concertada que la pública. Ye igual.

Ye porque nun-yos paguen al profesor. Cuando tuve na Conseyería, vilo. Nun dan asturianu porque nun-yos lu paguen.

Yo alcuérdome de cuando hai trenta años qu’había clases d’asturianu nel colexu les monxes de L’Entregu, nel colexu les monxes de Sotrondio, nel colexu La Salle. En tolos que yo controlaba, mas o menos, daben clase d’asturianu. Y pagáben-yos. Había una especie de conveniu con ellos. Y teníen tantos alumnos como teníen na pública.

Vamos, yo visitaba centros, fui al Loyola, fui a… y decíen, vamos, si nos lo paguen, metémoslo agora mesmo.

Xosé María García “Llábana
¿Y por qué-yos lo tienen que pagar?

Pablo Xuan Manzano
Si, porque son concertaos y paguen-yos profesores.

Un asistente
A mi prestaríame que ficiereis una valoración de los discos de Xentiquina de Nacho Fonseca, que vienen saliendo tamién dende hai munchos años, si valieron pa los escolinos, si pagó la pena.

Iris Díaz
D’eso prestábame a mi comentar una cosa que me pasó nel colexu Vega. Fui a una charra colos neños, esos neños que yá yeren los fíos de los compañeros míos, pues había una cantidá de nomes n’asturianu que nun paecía normal. Enoles, Olayes, Xuanes… munchísimos. Y eso fue’l colexu, nun lo esplico d’otra manera.

Pablo Xuan Manzano
Ta claro que prende. Los guah.es d’agora nun son igual qu’hai veinte años. Tienen una conciencia distinta.

Xosé María García “Llábana
Y l’aportación de Nacho Fonseca fue mui importante, en cuanto que los cancios de Nacho Fonseca, como nosotros teníamos mui pocu material y Nacho ya había entamao con Seliquín, cola moto Pachín y aquellos cantares, pues utilizábense nel aula.

Pablo Xuan Manzano
Si home si, eso fue mui importante. Y llueu facíes l’asignatura muncho más prestosa a los neños. Fue fundamental.

Un asistente
Hai otru detalle. De la xeneración d’aquella a la qu’hai agora, la mocedá nun ye igual. Sobre la mocedá d’agora hai muncha mas presión cultural. La so cultura del ociu ye totalmente diferente a la que tenía un guah.e del 88. Ye distinta tamién la presión económica a que consuma ciertes coses, y agora vívese tamién más concentraos en ciudaes. Agora la mocedá tien munchos más canales de televisión, muncho más accesu a música de tolos palos.

Pablo Xuan Manzano
Preba d’ello ye que cada vez se fala menos.

Iris Díaz
Aprovechando l’asistencia a esta tertulia de dalguna de les persones que pertenecieron tamién al primer grupu de Conceyu Bable – Xixón, prestaríame que nos comentaren cómo fue que se plantegó la necesidá de que’l lema de la primer manifestación fuera “Bable nes escueles”.

Un asistente
L’únicu futuru que tenía la llingua, si tenía dalgún, yera que s’enseñara nes escueles y la necesidá de crear una Academia. Lo demás yera too folklore. Esa yera la base de la que tenía que partir too. La idea yera qu’había que facer por deprender una llingua na que nun tábamos escolarizaos dengún. Y por eso yá na primera manifestación yera l’Estatutu Autonomía, que yera mui importante naquel momentu, porque queríen dexanos de llau gallegos, vascos y catalanes, que d’aquella nun taba claro lo del Estatutu, y Bable nes escueles.

Otru asistente
Pues aquel movimientu algamó la victoria. El movimientu asturianista consigue la victoria. Créase la Academia y consiguióse lo del Bable nes escueles.

L’asistente de antes
Sí, pa les espectatives d’aquella consiguiosé. Incluso hubo unos años en que paecía que la cosa diba p’alantre, pero ehí hubo unos enemigos mui poderosos a la escontra.

Incluso recuerdo que’l PSOE decía, si, Bable nes escueles, pero bueno… el bable oficial pal añu 2.000 ¿eh?.

Y paecíanos… ¡meca, non, home, non! ¿pal añu 2.000?

¡Yá nos hubiera vagao l’añu 2.000! … l’añu 2.000… ¡firmao!

Agora ya nun dan fecha siquiera.


Ta claro que’l tema de la enseñanza ta recortau pol tema que nun ye oficial la llingua.

Una asistente
Pero tan importante como la oficialidá ye la continuidá. Como decía’l Llábana, una escolarización de principiu a fin, dende preescolar. Y entós el tema sería otru.

Ye qu’agora tamos xusto nel puntu pa que valga pa poco.

Iris Díaz
Pienso que, agora mesmo, nun se da porque, llegalmente, en contra lo que dicen de que los maestros nun pueden tener una oposición d’asturianu porque nun ye oficial, que ye mentira y ellos saben que ye mentira, qu’hai precedentes llegales, pero ye que nun quieren que haya maestros con plaza. Porque nel momentu que tengas un maestru con plaza d’asturianu, yá nun pues quitar l’asturianu.

Y lo que quieren ye que tea tol tiempu garrao con filos, baillando.

Cuanto peor salgan les esperiencies, pa ellos meyor. Y cuanto peor seyan los maestros, pa ellos meyor.

Pero bueno, tenemos que cerrar la tertulia. Quédame davos les gracies por tar equí. Siempre deprendemos muncho con estes tertulies. Y bueno, seguiremos lluchando por ello, los nuevos, día a día.

L'asturianu nel enseñu foi una mala esperiencia porque salió demasiao bien

Espublizao n' Asturies.com


L'asturianu nel enseñu foi una mala esperiencia; salió demasiao bien

Xineru 27, 2010 por D. Barreiro

La principal conclusión de la Tertulia Pachín de Melás celebrada ayeri [martes 26 de xineru de 2010] foi que la entrada del asturianu nel sistema educativu foi una mala esperiencia pa la FSA, salió demasiao bien y el Gobiernu asturianu nun va permitir que la xente salga del colexu con una actitú positiva haza la llingua.

La tertulia, una iniciativa mensual d'UNA-Xixón, xiró sobre los 30 años del llema "Bable nes escueles" y cuntó cola participación de Pablo Xuan Manzano, maestru y presidente del coleutivu "Llingua y enseñanza"; y de Xosé María García "Llábana", maestru d'asturianu que formara parte del coleutivu de maestros qu'entamará a trabayar nes escueles pilotu, nesti casu nel C.P. Evaristo Valle de Xixón. Urbano Rodríguez, maestru y fundador de Conceyu Bable nel conceyu de Xixón, nun pudo tar a la fin por motivos personales.

Pablo Xuan Manzano foi una de les persones qu’entamó a dar les primeres clases d’asturianu y que s’ocupó de formar a los primeros maestros. Esplica la dificultá de los primeros tiempos, cuando se plantego al Principáu entamar col enseñu del asturianu. Manzano albidra que “enxamás nun tuvimos presidente como Pedro de Silva y conseyeru d’Educación como Fernández de la Cera, yeren malos, pero foron los que metieron l’asturianu nel sistema educativu”.

El profesor, yá retiráu, cuenta como l’Academia de la Llingua entamó en 1982 a formar a los primeros enseñantes al traviés de cursos pa qu’a la fin, en 1984, ocho maestros entamaran cola asignatura en seis centros pilotos. Manzano esplica que s’entamó en 3u d’Educación Primaria, cuando, según esclaria, lo lóxicu sería entamar per infantil. Sicasí, los dos ponentes de la tertulia afitaron qu’esto ye porque la Conseyería quier que la educación n’asturianu seya daqué simbólicu, “si nun entamen n’infantil, lo que traen de casa piérdese”.

Manzano esplica que l’entamu de la escolarización tuvo una valoración mui positiva, “dalgo que nun esperaben”, y auméntose la ufierta a otros centros. Recuerda como decidieron meter la llingua na escuela al traviés de la cultura, dexando que los neños falaren, “foi muncho más positivu qu’entamar a dar regles gramaticales”.

Xosé María García “Llábana” faló de la so esperiencia como profesor nel Evaristo Valle de Xixón, un colexu estremáu del restu, nuna gran ciudá y con un gran númberu d’escolinos, “la Conseyería quería qu’hubiera asturianu nun centru importante”. Llábana cuenta como nos otros centros hubo consensu nel claustru, mientres que nel Evaristo Valle namás lo pidió un profesor, “tando los maestros y los APAS a la contra”.

Sicasí, esplica como en tres años pasóse d’un 35% d’escolarizaos n’asturianu a un 80%, “que yera’l porcentaxe del restu de centros, pero equí nun colexu de 1.200 escolinos”. Tamién cuenta como’l presidente de l’APA yera d’aquella un enemigu de la llingua nes escueles y como güei, más de 25 años depués, ye un avezáu de les manifestaciones pro-oficialidá.

Pablo Manzano camienta que los primeros profesores d’asturianu foron los meyores, “polo menos los más comprometíos”. Faló de les primeres esperiencies, como s’aconceyaben tolos sábados na sede de l’ALLA ya intercambiaben fotocopies, “daquella nun había testos”. Recuerda como los primeros profesores d’asturianu foron los qu’entamaron a facer actividaes estraescolares, cosa qu’agora ta perdiéndose, “agora ser maestru d’asturianu ye una profesión más”. Llábana cuenta como nes primeres esperiencies había un doble trabayu; “dar clase de llingua a los escolinos y otra clase pa convencer a los padres”.

Anguaño, con 3.000 persones que tán titulaos pa dar clase d’asturianu, llegóse a una cierta profesionalización. Según Iris Díaz Trancho, maestra y presentadora de la tertulia, el perfil del profesor yá nun ye’l d’un militante, “cosa que nun ye mala, yá que se llegó a cierta normalidá”. Sicasí, señaló que tien qu’haber inspeiciones que controle que se da n’asignatura, “que s’algame la profesionalización dafechu”.

Llábana recuerda como al llegar los primeros escolinos d’asturianu a 8u, seis años depués del entamu de la esperiencia pilotu, la Conseyería fixo un despliegue importante pa facer una valoración, “saber si los escolinos d’asturianu teníen retrasu n’otres materies”. Pero según cuenta’l maestru descubrióse tolo contrariu, amás, señala, “los escolinos que diben a llingua teníen un mayor esmolecimientu pol propiu país, la so naturaleza, la so cultura o los problemes d’Asturies”.

Los tertulianos amuesen el so malestar porque la esperiencia pilotu quedóse neso, l’asturianu nun ta n’infantil, “la etapa más importante”, y nun ye llingua vehicular d’otres materies. Sicasí, Llábana faló de cómo fai más d’una década los sindicatos solicitaron que seis centros pilotu entamaren un procesu d’inmersión llingüística n’asturianu al traviés de l’asignatura de Conocimientu del Mediu, “pero nun había llexislación y el proyeutu quedo pa prau”.

Nel posterior alderique, fálose de cómo les nueves families inmigrantes apuntaben a los sos fíos a llingua como arreyu d’integración o de la necesidá de la convocatoria d’oposiciones, dalgo que según Iris Díaz Trancho nun quieren facer, “yá que nel momentu qu’un maestru tenga plaza, nun pues quitar l’asignatura del colexu”.

Sobre si la introducción del asturianu nel sistema educativu foi una bona esperiencia, Iris Díaz Trancho, qu’amás de profesora foi escolina d’asturianu, señala como los fíos de los primeros neños que dieron asturianu, anguaño tienen nomes como Enol, Xuacu, Lena o Catuxa.