Tertulia: Educación pública asturiana: crisis económica o cambiu de modelu


Resumen de la tertulia del 13 de xunetu de 2012


Educación pública asturiana. 
Crisis económica o cambiu de modelu


Na que participaron

Beatriz Quirós
 Presidenta de la Xunta de Personal Docente de Centros non universitarios d'Asturies y vocera del sindicatu SUATEA

Luis Fernández
 Movimientu Social pola Escuela Pública d'Asturies (MSEPA)

José Ramón Matilla
 Asamblea del Profesoráu Interín del Principau d'Asturies

Presentó: Iris Díaz



Iris Díaz
Na Tertulia ‘Pachín de Melás’ intentamos que los temes que se traten seyan d’actualidá y suelen ser temes relacionaos con aquelles coses que nun suelen salir a la lluz púbica, y nesti casu la educación ta de total actualidá, podemos dicir que los acontecimientos viniéronnos enriba.
Presento brevemente a les tres persones invitáes coles que cuntamos. Son Beatriz Quirós, Presidenta de la Xunta de Personal Docente de Centros non universitarios d'Asturies y vocera del sindicatu SUATEA, Luis Fernández del Movimientu pola Educación Pública, y diba venir Mer Mediavilla pero nun se-y arregló y ta con nosotros José Ramón Matilla, de l’Asamblea d’Interinos.
Entós bono, entamar si-vos paez nel orde que queráis.

Beatriz Quirós
Como decís mui bien, el tema ta de candente actualidá, y cada día más, porque tamos asistiendo a un intentu de desmantelamientu de la enseñanza pública, daqué que llevamos denunciando munchos de los que tamos equí dende ya va munchos años.
Lo que ta ocurriendo nesti momentu nun ye que seya una casualidá, nin que seya debío a la llamada crisis que tamos sufriendo, sinon que podemos considerar qu’esiste una fueya de ruta que va a la gueta de la privatización del sistema educativu, que va a la gueta de la mercantilización de la enseñanza pública y que va a la gueta, en definitiva, d’abrir un nichu de mercáu de primer orde nun de los pocos seutores que tovía quedaben en sin privatizar.
Ya asistimos a la privatización del agua, de la lluz, del gas, de too. Ya nun queden prauticamente nichos de negociu, y un de los que queden, y mui importante, ye la educación.
Por tanto too aquello a lo que venimos asistiendo nos últimos años va empobinao escontra una idega nidia que ye la d’acabar cola enseñanza pública tal y como la conocemos, establecer un sistema dual d’enseñanza nel que se reserve pa les élites un tipu d’enseñanza de pagu, que puede coincidir o non, nun futuru, colo que güei son centros concertaos, o colos centros privaos, y por otra parte desmantelar la enseñanza pública, elliminando los recursos colos qu’agora ta funcionando, y convertila nuna enseñanza, nun voi decir de segundu orden, si non de quintu orden, depauperizándola.

Y el gobiernu y el ministru que tenemos agora mesmo creo que son lo más nefasto que puede esistir. El ministru ye una persona que, a pesar de nun ser especialista n’educación, sí que ye un especialista en marketing, en saber vender les polítiques perverses que ta llevando a cabu.
Usen subterfuxos como que “va siguir avanzándose na búsqueda de la excelencia”, qu’”hai que primar la cultura del escuerciu”… pero llamentablemente, esti tipu de custiones que plantega’l ministru nun son nueves, nin vienen col PP, esto venimos heredándolo ya de tolos gobiernos anteriores que, en mayor o menos medida, foron implantando ya estes llinies de privatización y de mertantilización al traviés de les distintes lleis educatives.
Sería mui llargo d’entrar nello agora, pero hai que tener claro qu’hai un proyeutu que pasa pola destrucción de la escuela pública.

Luis Fernández 
A la pregunta que se facía nel títulu de la tertulia sobre si había un cambiu de modelu o non, de mano ún camienta que la rempuesta fácil ye dicir que sí, qu’hai un intentu de cambiu de modelu, y Beatriz tuvo intentando plantegar un poco esi esquema.
Pero, la verdá ye que me cuesta trabayu afirmar eso, porqu’eso significaría qu’el ministru d’educación tien un modelu educativu, y a eso resístome.
Otra cosa ye que dicir qu’hai un modelu d’alministración de la educación, que ye diferente. Quiciavis hai que distinguir dos estayes na educación bien diferentes: cómo se va a facer la educación y cómo se va alministrar esa educación.
En cuanto a l’alministración ta claro, lo que se quier facer ye privatizar y convertir a la caridá la enseñanza pública.
Pero hai que pensar si realmente hai un modelu detrás. Lleendo la propuesta pa la reforma, la verdá ye qu’escandaliza. Lo primero que se nota ye qu’el qu’escribe sabe d’educación lo qu’un tertulianu, d’esos que salen na tele, de fútbol, pero cuando rasques un poco lo qu’hai debaxu, ye mui grave.
Pa entamar, ente los principios, establez un principiu d’igualdá d’oportunidaes que ye mui discutible, pero, eso sí, dexa claro qu’esa ‘igualdá d’oportunidaes’ va llegar sólo hasta la etapa obligatoria, a partir de la etapa obligatoria el señor ministru d’educación nun quier haya igualdá d’oportunidaes, quier que los de so vayan a les universidaes y los demás al carayu.
Y el segundu principiu ye absolutamente escansalosu pa daquien que tenga un mínimu d’idega de pedagoxía: ”tolos estudiantes tienen talentu”. Esti señor xúnese a los que creyen que los alumnos nacen llistos o tontos y que la misión de la escuela ye separtalos. Diz el testu: “pero la naturaleza d’esti talentu difier ente ellos”, lo que digo, hai llistos y tontos, “y el sistema educativu debe ufiertar les trayeutories más adecuaes pa les sos fortaleces, pa que puedan realizar les sos aspiraciones ya ingresar con ésitu nel mercáu de trabayu”. Ye dicir, “qu’el sistema educativu ye un sistema de palanques qu’empobina a la xente allá onde puede dir nel so estáu natural”.

Eso defendíalo Carlos Conde allá na escuela de mines hai un montón d’años, pero claro, Carlos Conde ta bien xubiláu ya, pertenez a la época de los dinosaurios de la educación. Qu’esti ministru afirme esto como los sos principios sería suficiente pa pidir que, vamos, que lu deportasen.

Ya digo, los principios son ya d’escandalu, pero cuando sigue ún lleendo l’escándalu xorrez. Parte ya de que los estudiantes nacen llistos y tontos, y nun sólo biolóxicamente, pues llueu ya dexará ver los aspeutos sociales. Los que, por razones sociales nun pueden estudiar, hai que da-yos una vía muerta, tienen mui claro que la sociedá ye una sociedá de castes y hai que facer un sistema pa que cada casta vaya pol so camín.

¿Failo él voluntariamente?¿Tien esi modelu interior realmente? Yo creo que non, que ye demasiao inorante pa tener esi modelu. Lo que ocurre ye lo que-y pasa a tolos inorantes, que debaxu tien el fascista, el reaccionariu, y sal-y cuando nun se da cuenta.

José Ramón Matilla
Nesti desmantelamientu de los servicios públicos que tamos viendo, la sanidá, les pensiones… la educación ye una parte d’ello. Nel modelu neolliberal, aprovechando la estafa económica, apaez una supuesta reforma de la educación, pero detrás tien un modelu ideolóxicu. Como decía Beatriz, la educación venla como un negociu. Esta xente vien a facer negocios. La educación qu’ellos planteguen nun ye más barata, anque nos lo venden como más barato. Vienen a ganar dineru y non a desencolcar un serviciu públicu. Busquen beneficios, y traspasar capital públicu a empreses privaes.

Y ehí, la escuela como ellementu de nivelación social entama a frañer y empiecen a vese eses deficiencies que comentaba Luis, mientres que se contenta a les élites, que van tener una educación de calidá porque van poder pagásela, o porque-yos la vamos a pagar toos. Y, por otru llau, van quedar un pelotón de descolgaos que ya tamos viendo coles últimes medíes.

Con esti recorte de beques qu’hubo, la universidá va quedar pa xente pudiente económicamente o pa xente superdotada.
Ya lo tamos viendo, plantególo Esperanza Aguirre en Madrid y fízose tamién en Cataluña, quieren cobrar, como, nes etapes d’enseñanza que nun son obligatories, como la infantil, la formación profesional o el bachiller. En Cataluña la generalitat va cobrar esti añu trescientos sesenta euros por cada cursu de los ciclos formativos de grau superior. Ye talmente una privatización.

Y hai una ideoloxía, una ideoloxía conservadora qu’anula’l pensamientu críticu, qu’anula la capacidá de la xente, que ta na llinia del informe Pisa y toes eses mandangues sacaes de la OCDE y que busca tener una man d’obra barata, que cueste mui poco dineru formala y que nun seya crítica.

Y tamién busquen una reforma del profesorau que te al serviciu d’esa ideoloxía, y polo tanto, hai una precarización, y equí ye onde intervenimos nosotros, los de l’asamblea d’interinos, porque somos el seutor más precarizáu dientro’l profesorau.
Esa precarización vémosla en varios aspeutos, por exemplu nel casu d’Asturies, nos últimos años, y nun sólo nesti gobiernu, si non tamién nel anterior, cortaron un montón de places y hubo un montón de despidos.
Y con esta última reforma de los cuatrocientos noventa y ocho millones que tuvieron que recortar implica la espulsión de cuatrocientes persones del sistema educativu, cuatrocientos profesionales que se van a la cai.
Y derechos llaborales que tardaron munchos años n’algamase, perdiéronse. Por exemplu nun se va pagar el branu a los que vayan a trabayar…
Tan apaeciendo lo que yo llamo, los xornaleros de la enseñanza, inclusu en delles comunidaes ta trabayándose casi que a peonaes. Faen contratos por hores, ya nun ye nin por media xornada, nin por un terciu de xornada, si non que ye por hores.
Y el gobiernu del PSOE, equí n’Asturies, tien bastante responsabilidá. Ye’l brazu executor de too esto que ta pasando.
Inclusu la conseyera entamó con un llinguaxe pero alguien-y llamó la atención y cambió, y ya nun yeren despidos sinon ‘finalizaciones de contratu’, y ye’l mesmu discursu qu’utiliza Esperanza Aguirre y el señor Wert en dellos momentos. Ta como mimetizándose la problemática.

Vemos cómo la situación de los interinos ye cada vez más precaria. Sufrimos les baxaes de sueldu que nos fizo Zapatero, como los funcionarios, tuvimos los despidos, esti añu nun vamos a cobrar el branu y, el cursu que vien, los que trabayen, nun tendrán tampoco la paga de navidá, como tolos profesores.
Y amás, con un agraviu comparativu, los profesores de relixón, que paez ser que pasen a ser llaborales, veremos si-yos van a pagar el branu, porque ya sería escandaloso que nosotros nun lu cobremos y una xente que va vender ideoloxía, ideoloxía relixosa, vaya a cobralu.

Beatriz Quirós
Al filu de lo que ta comentando José Ramón Matilla, de la asamblea d’interinos, hai que dicir que al final d’esti cursu muncha xente diose cuenta de qué yera lo que diba a ocurrir y naide se podía llamar a engañu de lo que güei, que ye vienres 13, diba aprobase nel conseyu de ministros.
Eso teníamoslo claro, y sabíamos amás que, a los recortes que s’anunciaron nel so momentu, van anunciase nuevos recortes. Y la conseyera, qu’en teoría diba axuntase coles organizaciones sindicales esta selmana, ya lo aplazó.

Quiero decir con eso que lo que vimos hasta agora va quedar pálido al llau de lo que se nos avecina, y ye verdá que dende SUATEA llevamos siendo un poco agoreros nesi sentíu, si llees los escritos nuestros d’hai cincu, seis, siete años ehí lo tienes. Llamábennos esaxeraos, pero llamentablemente estos fechos tan dándonos la razón. Nun ye frutu de denguna casualidá nin de denguna crisis, equí de lo que se trata, tanto na enseñanza como nel restu los servicios públicos, ye de desmantelar los derechos de los trabayadores, los derechos del estáu del bientar y pasar de los rapacinos absoluta y totalmente.
Sabemos que nesti país hai dos millones de neños por debaxu del nivel del umbral de la probeza, y eso a nadie-y importa. El gobiernu pasa de too.

Luis Fernández
Sí que s’esmolez, los programes de cualificación profesional de dos años son “p’aquellos alumnos con dificultaes o situación económica desfavorable”.
A los probes hai que ponelos a facer FP como na llei del cincuenta y cinco.
Cuando se ficieron les Llaborales yeren pa los fíos de los trabayadores, que yeren los únicos que teníen que facer FP, fueren llistos o tontos, que pa eso yeren probes.

Yo equí voi facer un poco de “pepito grillo”, porque tais preocupaos pola organización de la educación, pero ye qu’el sustratu de modelu qu’hai debaxo ye pa escandalizar.
Antes fui bastante duru col ministru, anque nun sé si lo bastante, porque dixe que yera un inorante, pero ye que, tornando a los oxetivos, primeru: “reducir la tasa d’abandonu”, lo que va facer va ser echálos antes, va llevalos a unos “programes de cualificación profesional” que diz claramente que nun tienen dengún intentu de recuperar la ESO, que sólo ye pa “formar pal emplegu”. ¿Ye asina como se va reducir la tasa?

José Ramón Matilla
Claro, pa baxar les estadístiques y pa tener man d’obra barata.

Luis Fernández
Eso ya demuestra una cierta inorancia, pero un individuu que puede decir que de les optatives de tercero de la ESO ta matemátiques d’iniciación pa la FP o pal bachilleratu. O seya, esti creye qu’hai matemátiques de bachilleratu y matemátiques de FP. Ye un inorante absolutu.
Vamos, un individuu que tien que mover una máquina de control numéricu, o que tien que facer circuitos ellectrónicos tien que saber les mesmes matemátiques que alguien que va facer filosofía.
Creye que, a toes les formaciones profesionales básta-yos con sumar, restar, multiplicar y dividir. Y que toos los que faen bachilleratu tienen que saber integrar y derivar.
Y a esi señor tenémoslu de ministru d’educación.

Y ya nun falemos de lo ideolóxico, porque esto de “por situación económica desfavorable”… ta claro que les beques son pa los llistos, nun pa los probes. Los probes que se h.odan, que vayan a facer FP.
Eso ya nun ye nin la llei del setenta. Pa la llei del setenta ya se dixo “somos probes los que vamos a FP y los fíos de los ricos van a la universidá, vamos a cambialo, los que faen mal la EXB que vayan a la FP y los que la faen bien que vayan al bachiller”, y a la FP fastidiaronla, pero polo menos yera una opción illustrada. La llei del setenta frenti a esti señor ye una opción illustrada. Tamos retrotrayéndonos a antes.

Vamos, esta propuesta ideolóxica podría facese pa una escuela pública samaritana que quisiese formar a toos asina, de fechu, les universidaes llaborales yeren un intentu samaritanu de formar con estos principios, pero ye qu’equí non, nin samaritanismu siquiera. La escuela pública equí va ser un serviciu de beneficencia pa los inmigrantes, pa los de la patera.

José Ramón Matilla
Como va quedar la sanidá y como van quedar un montón de coses. Ya lo tamos viendo con esta quita que ficieron ayeri. Ta nidio.

Un asistente
Quiero facevos una entruga en xeneral. Llevo quince años na docencia, soi afiliau de SUATEA, debo ser de los poquísimos que ta en SUATEA y na enseñanza concertada, un casu estrañu pero equí toi, y nun m’echaron nin de SUATEA nin de la concertada, por agora voi bien.

Dende que s’aprobó la LOGSE creyo qu’entamó un cambiu de modelu educativu que fue paulatinamente yendo a pior en cuanto a la enseñanza pero nun tanto en cuanto a los medios que se-y dieron, pero agora tamos viendo un modelu que va pa baxo en cuanto a la enseñanza y en cuanto a los medios.
Eso, que pa min ye la base del estáu del bientar, nel sentíu de qu’el que nun se puede educar nun puede competir col que ta educáu, ¿cómo creyéis que va influyir ente los trabayadores d’equí a un plazu?

Beatriz Quirós
Mira, lo qu’intenten esti tipu de reformes y les que vienen catapultaes dende Europa, pol Bancu Muncial, pola OCDE y pol Fondu Monetariu Internacional, que son la troika que ya nos ta interviniendo, porque son esos mesmos, ye tener unos trabayadores que sepan na más que les cuatro regles y que sepan desenvolvese n’inglés. Decía Nico Hirtt en ‘Los nuevos amos de la escuela’ [Nico Hirtt, Los nuevos amos de la escuela.  El negocio de la enseñanza,  Madrid, Minor Network, D.L. 2003, traducción de Beatriz Quirós] qu’el inglés que necesitaben los guah.es ye na más que pa qu’el que trabayara en una cafetería pudiera entruga-y al veceru si quier la cerveza con gaseosa, o el café “with milk”.
Entós tolo qu’introduxeron sobre competencies básiques, que alcordaréis-vos que metienon de rondón, casi qu’en sin protestes, creo que les úniques protestes fueron les nuestres, y en sin debate, y qu’el profesoráu tragó ciegamente y ta aplicándoles, ya encierra’l conceptu de lo que quieren que seya la persona que se ta educando.
Y esa persona solamente necesita eses cuatro regles pa salir p’alantre, porque a la élite ya la formen ellos onde la tengan que formar.
Y entós les consecuencies pal futuru son nefastes pa los trabayadores, y xúnense a los elementos que la reforma llaboral tien venceyaos a esta cuestión.
De lo que te trata ye de facer trabayadores sumisos, acríticos y con una formación al llímite.

Luis Fernández
Nun-vos engañeis, el mercáu de trabayu nun quier man d’obra especializada pa nada. Lo que quieren ye carne de cañón. El mercáu de trabayu tien más mano de obra de la que necesita. L’automatización tien mandao al carah.o a un montón de xente. Agora lo que se necesita ye un conxuntu mui reducíu de trabayadores d’élite y basura que se autodestruya.
Ya nun valen pa nada los trabayadores que nun rinden nada, les carretilles ya anden soles, ya nun fai falta xente que puxe pola carretilla. Esto ye’l principiu del fin.

El problema de la sociedá capitalista ye que llegó a una situación na que necesita mui poca mano d’obra y mui tecnificada. Ya nun faen falta les matemátiques na FP, el calderu de la basura ya ye automáticu, y lleva cámares de televisión incorporaes.
Tan contándonos una milonga diciendo que lo que van conseguir con esto ye que la xente se coloque meyor… se coloque nos protíbulos, se coloque de sicarios… porque nun pueden colocase na industria que vien. La industria que vien necesita xente muncho más capacitada.

Esto cuando se contó nel añu cincuenta y cincu, cuando yera l’autarquía y España tenía que facéselo todo, pues claro, formábense técnicos dende un nivel mui baxu y resultaben útiles, y ellos foron el soporte de la industria de los años sesenta.
Pero eso, pa la industria del sieglu XXI nun sirve. Si agora los coches móntenlos robots, y lo que se necesita ye un invividuu que supervise, entienda y trate psicolóxicamente a los robots, y a esi nun lu saques faciendo una FP.
Ye un modelu deleznable. Esti individuu ta proponiendo formar a los obreros de los años trenta, que nun sirven pa los años trenta del sieglu XXI.
Yo soi torneru, y el tornu que yo manexé asemeyábase muncho al que manexó to padre, pero ye que si vas ver agora un tornu, paez una nave espacial, tien una consola d’entrada, botones…, a esi que nun sabe lleer malpenes, a esi que nun se-y enseñó matemátiques, ¿vas ponelu ellí?
Y antes podíes sacar al menos les forgaxes con una carretiella, pero agora les forgaxes sácales un robot.

Un asistente
Soi de ciencies sociales, de lletres, y una de les coses que veo nel modelu ye qu’hai una marxinación de les persones qu’estudiamos coses que nun tienen una aplicación direuta.
Paez que ye pecao estudiar daqué colo que nun puedas salir al mercáu a producir.
Pero claro, ye lo que tais contando, tan por quitar tolo que ye pensamientu críticu, quitar la capacidá de poder discutir al que manda y xenerar alternatives.
Ye que les matemátiques nun so son too.

Luis Fernández
Pero eso ye pol modelu d’esti inorante. Un individuu que diz que la lletura ye una asignatura equivalente a les matemátiques ye un patán. Equí lo teneis, “asignatures: matemátiques, lletura, y restu d’asignatures…” ¿qué ye, que la lletura ye una asignatura?¿ye que los de matemátiques, los de ciencies, nun lleen?
Pero ye que si mires la organización empresarial del sieglu XXI, lo que se ta pidiendo ye xente que sepa filosofía, que sepa psicoloxía.
Nun digo qu’haya que dexase llevar sólo pol mercáu productivu, pero ye que, agora, los grandes negocios son los mercaos culturales.
Eso de que sepan lletura y matemátiques yera cuando los albañiles diben a estudiar pela nueche y deprendíen a lleer y a sumar y restar, lo de los años cuarenta del sieglu pasau.
Esti individuu ye un fósil de la política.

Beatriz Quirós
Él, cola reforma que tenemos agora mesmo enriba la mesa, lo que ta faciendo ye reforzar solamente les materies instrumentales, el restu, música, filosofía, debuxu, un segundu idioma… nada, ¿por qué? porque solo-y interesa aprobar PISA [Informe del Programa Internacional pala Evaluación d’Estudiantes o Informe PISA poles so sigles n’inglés (Program for International Student Assessment) y en francés (Programme International pour le Suivi des Acquis des élèves) sofítase nel análisis del rendimientu d’estudiantes a partir d’unos exámenes mundiales que se faen cada tres años y que tienen como fin la valoración internacional de los alumnos], anque PISA delles veces fai evaluaciones sobre otru tipu de competencies.

Y hai otra cuestión, pal añu que vien van aumentase les hores de trabayu de los profesores, de toos, y eso va suponer que, nos centros educativos, onde hasta agora cada profesor, más o menos, impartía la so materia, pa la que ye especialista, agora esi profesor va vese obligáu a dar clases de ‘materies afines’.
¿Alcordais-vos d’aquel conceutu de ’materies afines’ d’antes pol que, por exemplu, el profe de llatín tenía que dar tamién francés, historia… lo que fuera, y el de matemátiques tenía que dar ciencies y lo que pintara?.
Y agora, colo que tenemos na secundaria pal añu que vien, vamos tornar a velo. Ya lo veréis en setiembre cuando nos den los horarios.
Esto ya pasó en Madrid y notros llugares onde la reforma fue más avanzada. Asina degrádase la calidá hasta onde ellos quieren y como de lo que se trata ye de recortar, queden les instrumentales, y lo demás, ¿pa qué lo queremos?¿pa qué queremos un alumnao que conoza idiomes? Non, non, idiomas non, inglés, güeyu, nun confundamos.

Ya lo dicía Berlusconi, les tres ies, ‘inglese’, ‘internete’, ‘impresa’. Ye qu’hai que fomentar l’espíritu emprendedor.
Ye dicir, tol mundo ta en paro, tolos comercios tan cerrando, pero lo que hai qu’enxertar nes nuestres escueles, nos nuestros colexos, ye ‘fomentar l’espíritu emprendedor’, porque nun veis que los paraos, como cobren munches perres, hai que quita-yos una parte de la paga pa que busquen más un trabayu, y asina, a los rapacinos, hai qu’inculca-yos esi espíritu de pequeños, porque, claro, ye por culpa d’esa falta d’espíritu emprendedor polo que nun hai trabayu nesti país.
Y eses tres ies de les que falaba Berlusconi, son la columna vertebral de la reforma educativa d’agora.

José Ramón Matilla
Y les competencies básiques de les que falábais anantes, en parte surden del ministerio de trabayu, nun del ministerio d’educación. Ye’l mercáu el que marca les pautes o el qu’interpreta cómo tienen que marcase les pautes, lo que ye bastante grave.

Y dende la perspectiva llaboral nuestra, de tol profesoráu, la precarización cada vegada va ser mayor, y nun va haber estamentu educativu que va salir llibre.
Voi contar una anécdota, nel mio centru, cuando hubo una fuelga indefinida d’interinos, que fue secundada por un grupu non mui numberosu de persones, pero que tuvo una repercusión mediática importante, ya incluso tuvo la propuesta de poner caxes de resistencia nos centros, había dos funcionarios que van pasales canutes, porque tan a trenta hores y son de plástica, d’eso que ‘nun val pa nada’ y quieren echar, pero d’aquella garraron la caxa y punxéronse a rise. Asina qu’ellos, que taben tan tranquilos  a ver agora, nun sé cómo van arreglase, a repartir les hores, o a les afines, o d’itinerantes polos centros. Los interinos, como tan en primera llinea, son los primeros que van cayer, los primeros que van cepillar, pero esa precarización va llegar a tolos estamentos de la enseñanza. En sin denguna misericordia. Y aparte diciendo que nun son despidos, que son ‘finalizaciones de contratu’.

Y otra cosa, ya que ta xente equí de la concertada. Nosotros nun tenemos dengún problema colos trabayadores de la concertada, eso vamos dexalo claro, tamos en contra de los conciertos, pero non de la xente que trabaya na concertada, pero tamos viendo un tipu de trabayador insolidariu, y, por exemplu, cuando en Madrid Esperanza Aguirre facía aquelles barbaridaes qu’entamaba a facer, escuchabes a trabayadores d’otros seutores allegrándose.

L’asistente de la concertada
Voi facer una puntualización a lo que dixe antes. Un trabayador del Mcdonalds nun ye un imperialista yanqui. Yo voi a trabayar y págenme, y ya tá.

José Ramón Matilla
Caro, igual qu’hai munchos de la púbica que caltienen plantegamientos retrógrados.

Un asistente
Toos coincidimos nun principiu xeneral, que los servicios públicos nun pueden ser un negociu. Y polo tanto, si nun pueden ser un negociu, nun puede haber una empresa que xestione los recursos públicos pa servicios tan fundamentales como la sanidá o la educación.

Y tengo una entruga. ¿Qué ye lo que ta pasando pa que dempués de tantos años de llucha, de muncha xente moviéndose, nun cuayara dengún tipu de rempuesta social na cai, previendo tolo que s’avisaba equí?
Y pa min, la rempuesta nun ta sólo na situación concreta pola que tamos pasando agora, si non en tola semiente plantada nestos últimos venti años, que foron, adulces, adocenando al personal y que pensaben que tolos problemes nun tenién que ver direutamente con ellos.

Falando de ministros, tuvimos un ministru d’educación que tuvo un papel relevante nel deterioru del procesu de la reforma educativa, que ye’l señor Pertierra. Porque si hai daqué qu’achacar a los gobiernos socialistes, tanto de la comunidá autónoma como del estáu, ye’l so puxante interés por facer desapaicer tou tipu de participación ciudadana, tantu nel ámbitu d’asociaciones de vecinos como nel ámbitu popular, como nel ámbitu de los conseyos escolares, como na participación na xestión pública de los recursos públicos. Yera un naguar porque too s’institucionalizara y qu’el personal dixera “ya me lo resolverán”.
Güei tamos recoyendo’l pior frutu, el frutu más envelenáu d’esa política. El señor Pertierra, dempués de les crítiques que se ficieron a la configuración de los conseyos escolares, pegó-y’l primer viaxe. Llueu vinieron viaxes posteriores, y seliquino, los padres, los alumnos, los ciudadanos en xeneral, foros apartaos de la xestión, de la participación y de los procesos informativos.

Pa min, lo que pinta agora’l Wert y lo que pintaron los anteriores ye frutu y consecuencia de la escasa participación, el desinterés, la despreocupación y el camentar que alguien nos lo va a iguar, y nun nos lo va a iguar naide.
Y esa responsabilidá nun solo la tien el PP, si non que n’Asturies tienla’l tripartitu, porque tuvo papeles relevantes na carrera profesional. Nun porque agora te’l Wert, que ye un delincuente, evidentemente, nos vayamos a escaecer de les situaciones anteriores. Ye too una cadena.

Luis Fernández
Estos señores dexen bien claro la separación de funciones, les funciones executives pal equipu directivu, les consultives pal conseyu escolar.

Un asistente
Yo creo qu’agora pisose l’acelerador, pero’l camín ta taba triáu. Llevo tola vida viendo´t tratu que-y da el PSOE a los interinos y ye horripilante, y el tema llingüísticu ya ye una cosa d’ideoloxía. ¿Por qué nel asturianu nun se dan los pasos de verdá pa facelo como tien que ser? Porque saben que van dar cercanía a un tipu de cultura nel qu’ellos tan escluyíos, y ellí meto a muncha xente del PSOE, sobre tou na so élite. Y ye la mesma ideoloxía que la del PP, nunos casos más lliberal y notros menos.

Luis Fernández
Nun soi pesimista. Nun creyo que seya’l mesmu modelu el d’agora que’l denantes. Ye mui posible que les circunstancies exteriores sí seyan les que ya había pa los mesmos, y nun voi defender al PSOE agora, pero camiento que s’interpreten les mesmes coses con sentíos de culpabilidá diferentes, y faenlo con una obscenidá escandalosa, evidentemente porque pueden, pero nun solo porque pueden, si non porque nunca lo razonaron dende otru modelu, pa ellos ye lo natural. Ye natural que los fíos de los trabayadores seyan trabayadores, y que la universidá seya pa una élite. Claro, fue lo que mamaron ellos de los sos padres. Hubo un tiempu, un interregnu ehí nel que aguantaron, pero agora, cataplún, tenémoslos enriba.

Beatriz Quirós
Lo qu’hai que decir ye que la fueya de ruta taba marcada, taba marcada mui claramente na propia LOGSE [Llei Orgánica Xeneral del Sistema Educativu de 3 de ochobre de 1990]. Alcuérdome cuando en SUATEA convocamos la güelga contra la LOGSE que la xente mirábanos con una cara…, como si tuviéramos chiflaos. Pero na LOGSE calteníense ya munchísimos de los elementos que güei tamos careciendo. Por exemplu la nomada carrera profesional. Agora tenemos la evaluación esterna del profesorau y va contar pa munchísimes coses, ente otres pa cobrar un sueldu, o pa que te den un treslláu, pa munches coses. Y eso taba ya na LOGSE, lo que pasa ye qu’agora abriose’l melón.
Otru exemplu, el convertir les direcciones de los colexos n’empresarios, porque eso ye lo qu’hai detrás, introducir una xestión empresarial na escuela pública, taba ya na LOGSE.
El que se caltuvieran los conciertos educativos y el permitir a les patronales de los centros concertaos que impusieran el so ideariu y que pudieran escoyer a los profesores y seleccionar al alumnau dempués de tener que págalo toos nosotros colos nuestros impuestos, eso ta na LOGSE.
Y eso agora ya ta entrando na pública. En Cataluña agora los direutores escueyen a deu a los profes d’un llistáu d’interinos que tienen.
Y pa poder cobrar un complementu que se llama sexeniu, que como los trienios, y va por antiguedá más o menos, agora va depender d’una valoración que faga la dirección, colo que si tu tas faciendo asina cola cabeza y diciendo amén, cobraraslu, y si non, non.

Eso viose ya cuando surdió lo de la carrera profesional, y equí hai que recordar a Valledor, que dimitió por esti asuntu, que paez que ya nadie s’alcuerda, pero nosotros sí nos alcordamos de cuando se plantegó por parte del PSOE ya Izquierda Unida l’introducir esi bodriu de la carrera profesional n’Asturies.
Y entós, a partir d’esi momentu, el profesorau ye sumisu a la dirección y el que nun lo seya que se prepare, porque hasta agora cobró tol mundu que firmó, pero d’equí p’alantre que se prepare.

Y tenemos una referencia, sabemos lo que pasó en Nueva York, porque’l modelu que tamos siguiendo ye’l modelu americanu. Y agora vamos falar de los güajes, que ye polo que tamos equí. A los güajes, en Nueva York, y n’Inglaterra tamién, sométenlos a unes evaluaciones y si nesa escuela nun llogren unos resultaos determinaos, al añu siguiente  reducen-y los fondos que se da a esa escuela, y si al añu siguiente nun obtienen unos bonos resultaos, reducen-y el profesorau y más coses, y al tercer añu con malos resultaos, que cómo nun los van tener si viven nel Bronx o notru barriu asemeyáu , despídese al profesorau, contrátase a xente en sin formación y finalmente piesllase la escuela.

Y equí entamen polos interinos, pa esti añu, pal cursu que vien, calculamos en SUATEA que se carguen novecientos puestos, novecientes families que nun van tener trabayu pal añu que vien.
Esto ye brutal, lo del PP nun tien nome, ye fascismu. Cuándo se vio que, nel parlamentu, anuncien que van recortar y decir “que se jodan” y aplaudir.
Tan imponiendo económicamente lo que nun se pudo conquistar d’otra manera.

José Ramón Matilla
Hai una precarización xeneralizada. Ye significativo lo de les medies xornaes, comparábalo yo a los xornaleros y les peonaes porque hai xente que, como los manden a determinaos sitios en determinaos momentos, nun ganen nin pa vivir, tienen que facelo en comuna porque nun-yos da ni pa pagar el alquiler.
Y otra cosa que se ta viendo venir ye la entrada del trabayu temporal, ya Esperanza Aguirre quiso abrir una vía colos profesores d’inglés nativos que, nun principiu, nun-y almitieron, pero acabará trayendo a profesores irlandeses a baxu coste.

Beatriz Quirós
Sí, ‘low cost’, tipu Ryan Air.

Iris Díaz
Tamos llegando a la hora que dura la tertulia, asina que-vos pediría una última reflexón ya pa terminar.

Beatriz Quirós
Tamos escaeciéndonos d’una cosa mui importante. L’alumnau más desfavorecíu ye’l que va sufrir les consecuencies de too esto. Y les families, que hai güah.es que nun tienen pa comer, que tan por baxo l’umbral de la probeza.
El sistema educativu que xugaba un papel compensatoriu pa intentar sacar a esos chavales p’alantre, pa que polo menos tuvieran el mesmu derechu a la educación que otru de una familia con medios, esos son los primeros que van a sufrir, y van sufrir d’una manera que nun tamos avezaos a ver.
Vamos vivir nos colexos y nos institutos una situación d’emerxencia social, y a ver si val como revulsivu pa los que nun caltuvieron hasta agora esa movilización social. Y dende equí quiero facer un homenaxe a esa xente que la intentó empezar y que nun tuvieron ecu abondo, pero que tuvieron les narices de ponese en fuelga indefinida, demostrando qu’hai persones dimpuestes a lluchar, y son un exemplu a seguir, ya digo, sobre too polos güah.es.

Luis Fernández
Tocóse ya lo que va ser la xestión y l’alministración, pero merez la pena, convenientemente vacunau, lleer estos papeles, tamos retrotrayéndonos más allá de la llei del setenta. Tornamos a la idega de que los que tienen dificultaes sociales hai de da-yos unos programes de capacitación profesional pa que vayan a un empleu qu’amás, como son unos inorantes, nun saben que ya nun esiste. Siguen creyendo que la formación profesional ye pa xente que nun sabe casi sumar y qu’hai unes matemátiques pa los de la FP. Eso ye , cenciellamente, un suicidiu.

José Ramón Matilla
Como conclusión pola mio parte, decir que la situación va a empeorar gravemente, un  montón de xente va a salir del sistema educativu y nun va a tornar, y calculo que, a partir de setiembre tornarán les movilizaciones.

Iris Díaz
Bono, munches gracies a toos por participar na tertulia, intentaremos subila pronto a la páxina web y, como paez, verémonos otra vuelta toos en setiembre, nes movilizaciones.