Resumen de la tertulia del 30 d’ochobre de 2012 fechu na Sidrería Casa Ana de El Serrallo, Sotrondio, Samartin del Rei Aurelio
¿Qué fai un país como Asturies nun sitiu como ésti?
El debate sobre'l modelu d'estáu
Na que participaron
· Pablo Pérez
Conceyal de Noreña por Conceyu Abiertu
· Manuel Benayas
Voceru de Compromisu pol Nalón
Presentador
Tamos güei equí pa falar sobre’l modelu d’estáu nesta tertulia qu’entitulamos “¿Qué fai un país como Asturies nun sitiu como esti?” venceyao al procesu que se ta dando nel País Vascu y Cataluña que fai prever qu'a mediu plazu farase dalgún tipu de modificación del modelu territorial del Estáu Español.
Pa falar de les distintes posibilidaes dientro del nacionalismu y l’asturianismu y analizar cómo pueden afeutar estos cambios a los intereses d’Asturies, contamos con Pablo Pérez, que ye conceyal en Noreña de Conceyu Abiertu y con Manolo Banayas, voceru de Compromisu por Asturies del Nalón.
Pa introducir el tema, como imaxino que la mayoría sabéis, cuando entamó la transición, a Asturies punxéronla como una comunidá de lo que se nomó como de vía llenta, que determinó muncho’l desendolcu de les sos instituciones polítiques, frente, por exemplu, al modelu del País Vascu, que foi un modelu foral que yera’l so modelu históricu, que se respetó nel procesu de transición y que-y da, básicamente, lo que se noma’l cupu vascu, pol qu’ellos recalden los impuestos y pasen al Estáu les perres pa compensar los servicios prestaos y la so parte de solidaridá. Tamién taben otres comunidaes, que se denomaron de vía rápida, que foron Galicia y Cataluña, que yeren les que teníen aprobaos, o a piques d’aprobar, na segunda república, los sos estatutos d’autonomía, que cortó’l golpe d’estáu franquista. Y llueu taba Andalucía, que nun tenía eso fecho na segunda república, pero teníen los trámites aprobaos pa llegar a ser autonomía.
A partir d’ehí entamó tol procesu autonómicu y la frase del ‘café pa toos’ qu’alcuñó Guerra pa llevar el modelu autonómicu a lo que ye tol territoriu del Estáu Español.
Anguaño paez qu'en Cataluña y en Euskadi tan plantegándose un cambiu d’esi modelu y ta por ver cómo podría encaxar ehí Asturies o cuales son les opciones que tien en tou esi procesu políticu que tamos viviendo.
Y déxo-y ya la palabra a Pablo, por exemplu.
Bono, pola nuestra parte lo que queremos ye resaltar que somos soberanistes. Entendemos qu’Asturies ye una nación. Entendemos qu'a Asturies, como nación, asísten-y unos derechos, ente ellos el d’autodetermín, que ye básicu.
Entós, partiendo d’esi fechu que nun voi entrar a xustificar nin en términos hestóricos nin n’otros, paez que l’estatutu d’autonomía d’Asturies taba nun caxón y nun se llegó a tramitar, como-y pasó a otres comunidaes qu’agora son comunidaes hestóriques. El nuestru estatutu, en vez de tar enriba la mesa, taba nel caxón, y eso fizo como digo, que nun entráramos como nacionalidá hestórica, que la nuestra llingua nun seya oficial, que nun se nos reconoza la nuestra realidá nacional.
Y esto nun ye casual.
En Conceyu Abiertu lo que pretendemos ye, en primer llugar, algamar el derechu al autodetermín, pero somos conscientes tamién de que nun ye sólo cuestión que se garantice un derechu por escritu. Aparte de garantizar un derechu por escritu, hai toa una maquinaria nacionalista española que lo que pretende ye siguir calteniendo’l control sobre les… podemos llamales tranquilamente colonies, y eso nun va ser fácil de frañar, nin por parte d’Asturies, nin por parte de Cataluña.
En Cataluña podría dicise que quiciavis xunten la motivación ideolóxica cola motivación prágmática. Ye dicir, hai xente que ye catalana, sabe que Cataluña ye una nación, que-y asisten unos derechos y va reivindicalos. Pero hai xente que se siente catalana en sin unes aspiraciones máximes de reconocimientu como estáu pero camienta, d’una forma pragmática que ye más conveniente separtase d’España, y entós la conclusión puede venir tamién por esa vía pragmática, d’esponer les contradicciones que tien el modelu español en cuanto a falta de democracia, en cuanto a corrupción política, en cuanto a que'l propiu modelu ta agotáu, y cuando la xente pescancie qu’esa ye la torga fundamental, vendrá muncha más xente a comprender la independencia y nun sólo ya pola xustificación hestórica.
Manuel Benayas
Bono, evidentemente yo nun falo en nome de Compromisu, Compromisu ye mui plural y esisten corrientes y tendencies nel so sen. Pela mi parte formo parte d’una corriente, digamos, federalista.
El problema de falar d’un estáu federalista ye complexo porque, ente otres coses, hai múltiples interpretaciones de lo que ye’l federalismu. Cola llinia que más m'identifico ye con aquel sistema que naz del frutu del llibre alcuerdu ente partes iguales.
Un llibre alcuerdu ente partes iguales que supón la garantía de les partes constitutives, ye dicir, tanto de la parte de los estaos o comunidaes autónomes, o como quiera que quieran llamase, federaos, como del estáu federal.
Toos, llibremente y en condiciones d’igualdá, deciden un repartu del poder, unes atribuciones y unes competencies a esos estaos federaos por un llau y por otru llau, l’estáu federal recibe una serie de competencies comunes a toes elles.
Dicho esto entramos nun tema que ta enriba de la mesa y que tien que ver con ciertes propuestes vinculaes al tema catalán, como lo d’un estáu federal simétricu o asimétricu, o si ye factible o non. Resulta penoso escuchar a xente dicir que l’estáu asimétricu ye daqué que nin siquier puede plantegase, cuando la realidá ye qu’eso ya esiste. Por exemplu l’estáu de Canadá ye un estáu asimétricu porque recueye pa particularidá y la peculiaridá d’un estáu como Quebec, y ta reguláu de forma diferente al restu de los otros estaos que formen parte de la federación.
Curiosamente munchos de los que critiquen la posibilidá d’esi estáu asimétricu son defensores d’un modelu como ye’l del estáu autonómicu español que ye precisamente un estáu asimétricu, hai que dicilo, porque nun recueye los mesmos derechos nin les mesmes condiciones pa toos.
Camiento amás qu’eso nun ye nin bono nin malo, si non que respuende a unes realidaes concretes en cada sitiu.
Creo tamién que’l federalismu nun ye contrariu al drechu d’autodetermín. Parto de la base de qu’esti ye un contratu sofitau na llibre voluntá de tolos que formen parte d'él.
Ta la discusión de si'l federalismu puede construyise d’arriba a abaxu o d’abaxu a arriba. El procesu federal ideal ye aquel que naz d’abaxu a arriba. Sigo a Pi i Margall diciendo que’l procesu federal va dende l’individuu hasta l’estáu federal. Y por otru llau esi derechu a l’autodetermín nun entra en dengún momentu en confrontación colo que debe ser un modelu federal basáu nestos criterios.
Y, pa nun estendeme muncho, respeutu a la situación actual, hai daqué que se vien diciendo y que sólo puede caltenese dende’l puntu de vista del fraude políticu, ye lo de que l’estáu autonómicu ye l’estáu federal. Eso sólo puede dicilo daquien qu’ignore realmente lo que ye un estáu federal o tenga mui mala fe.
Un estáu autonómicu nun va ser nunca un estáu federal porque toles so competencies son emanaes del estáu central, de tal manera que, como tamos viendo n’actualidá, l’estáu central arróbase la capacidá política pa interferir no que seríen les competencies transferíes al restu les comunidaes.
Y p’acabar dicir que’l federalismu nun ye daqué ayeno al estáu español, nin ayeno en particular a la historia de la izquierda. Ya cuando l’asamblea constituyente de la primera república púnxose enriba la mesa’l primer proyeutu de constitución de la república federal. Un proyeutu de constitución, hai de dicilo too, qu'a lo meyor dexara muncho que desear en delles coses, pero n’otres yera tremendamente progresista y determinaba nidiamente cuestiones qu’agora mesmo tan en discusión, como’l drechu de les comunidaes autónomes a disponer de facienda propia.
Podemos falar de too ello agora, pero camiento que p’Asturies l’estáu federal, pal grau de conciencia qu’esiste equí alrodiu de la so pluralidá identitaria, puede ser una salida que concrete y amarre d’una manera clara y espresa les competencies qu’una nación como la nuesa puede desarrollar. Y güei tamos asistiendo, por desgracia, a tolo contrario, al pasu que vamos, tenemos una autonomía descafeinada, en sin práuticamente competencies y, coles poques que tenga, d’un tercer o cuartu nivel.
Presentador
Agora, cola crisis económica tan produciéndose dos fenómenos paralelos, por un llau, ta acentuándose, principalmente en Cataluña y nel País Vascu un sentimientu nacionalista, y de buscar unes formes nueves de rellación col Estáu Español, y por otru, un ataque visceral a lo que ye l’estáu autonómicu, tentando de quitar competencies, de buscar otros modelos munchísimo más centralizaos, como tan pidiendo esplícitamente UPyD y otres organizaciones, lo qu’hasta hai pocu paecía que yera tabú.
Ya sabéis que salieron encuestes del CIS, quiciavis daqué falseaes o malinterpretaes, pero que dicen que ta viéndose un mayor sentimientu escontra’l centralismu mientres que n’otros sitios ye tolo contrario. ¿Tenéis alguna idega de cómo esta crisis económica ta afeutando al casu concretu d’Asturies?
Bono, en primer llugar aclarar que tampoco toi falando en nome de, nin como portavoz de Conceyu Abiertu, y anque delles veces uso’l ‘nosotros’ por vezu, toi equí a títulu personal.
Y en referencia a la entruga de cómo afeuta la crisis n’Asturies, camiento que ye un país que lleva en crisis munchos, munchos años. Puede dicise que yo ya nací en crisis, nací nos ochenta y ye lo que conocí. Conocí cómo diben cerrando les ganaderíes, la pesca, la mina… cerraba too dafechu. Y esa crisis da la sensación de que nun ye sólo económica, ye tamién política. La crisis de confianza nos partíos políticos, qu’entiendo amás que tien que ser asina, pues ye’l resultau del fraude que son, igual que los grandes sindicatos, ye como un pieslle, los axentes que deberíen poder arbitrar nesta situación tan compraos, y d’ehí la desconfianza, “entós pa qué vamos participar en política””pa qué falar d’asuntos políticos”… Eso ye crisis. Eso ye la crisis total.
Agora ta acentuada pola crisis económica. En momentos de crisis económica suel suceder que la cultura, el mediu ambiente, los derechos nacionales queden al marxe, y sueles escuchar: “non, lo que se necesita ye trabayu”, “ye qu’hai que comer”, y ye verdá, ye evidente, les necesidaes básiques tienen que tar satisfeches pa poder sentanos a falar d’otres cuestiones. Pero ye que qu’unes nacen a partir d’otres. Un pueblu que nun ta organizáu, que tien unos representantes que son mercenarios de la política, nun puede dar un bon resultau. La única forma de sobrevivir a esta crisis ye cambiar la mentalidá y fabricar nueves formes de participación política, y nun me refiero a los partíos políticos si non a una participación política nel sentíu más ampliu, el movimientu social, asambleariu… los que participen nes instituciones y tamién los que tan fuera.
Fai falta esa reactivación, pero la necesidá obliga y la única forma de poder ye xuntos.
Ehí ta’l fenómenu de los comedores económicos, por exemplu, hai más xente que lo necesita, eso vese, pero tamién hai más voluntariau, y la xente va estableciendo unos llazos de cercanía, va conociéndose, y como comentaba enantes Benayas, dir d’abaxu hacia arriba, y con esperiencies concretes.
Esto desvía un pocu les respuestes fáciles a eso de que “independencia pa qué si lo que necesitamos ye comer”, y por otra establez una collaboración entre persones pa llegar a lo que camiento que ye la conclusión direuta: necesitamos soberanía y necesitamos renovar el conceutu de los políticos, cambiándolos por xente na que sí se pueda confiar.
Comparto en gran medida lo que diz Pablo, pero quiero apuntar que realmente sí que ta poniendo la crisis enriba la mesa múltiples elementos d’acción política. La derecha, lliderada pol PP y pol gobiernu de Rajoy llanza una ofensiva ideolóxica basándose na crisis y toca aspeutos de regulación llaboral, aspeutos sociales, relixosos y tolo que ye la parafernalia de la derecha, el so programa políticu de base. Y dientro d’esi programa políticu ta’l tema de la ordenación del estáu. Ellos nunca tuvieron a gustu nin siquier coles autonomíes.
Los que nos tocó vivir los primeros años de la transición recordamos bien claro lo que yera’l centralismu, el desastre que yera’l centralismu como elementu de xestión del estáu. En Madrid decidíase sobre coses de les que nun teníen nin remota idega y yeren braeres barbaridaes. Nesi sentíu, les ventaxes d’un estáu federal, o inclusu un estáu autonómicu, son infinitamente mayores pa la eficacia de les medíes que s’apreben que les del estáu centraliegu.
Nun fai falta dir a Roma pa decatase de les razones poles que los estaos más modernos se decanten por una estructura federal. Ye nidio que lo d'ún xestiónalo meyor dende ún mesmu que dende fuera.
Pero güei la derecha punxo nel candeleru'l pocu estáu descentralizau que tenemos.
Y nel casu d’Asturies toconos un gobiernu que nunca miró muncho pa lo propio y siempre fue más bien unes sucursales de los partíos centraliegos, plegaos dafechu a les directrices y posiciones que vienen de Madrid. Eso vese por exemplu nel cierre de la minería. Cuando s’entamaba a dar los primeros golpes a los planes de cierre de la minería, a los primeros incumplimientos, les agrupaciones del PSOE, equí n’Asturies, callaben la boca o asentíen. Y agora tamos cola papeleta al revés, mientres el PP prometía l’oru y el moru, agora que gobiernen volviéronse les tornes. En definitiva tamos ante partíos que respuenden a les mesmes característiques, dependen de Madrid y van facer lo que-yos manden en Madrid. Sobra-yos hasta’l pocu autogobiernu del que disponemos.
Polo que’l peligru d’involución del estáu autonómicu, salvo naquelles zones onde’l pesu del nacionalismu y les demandes d’autogobiernu de la sociedá tienen un pesu mui importante, ye una amenaza que ta viendose ya.
Recórtase en tolos ámbitos, dende les autonomíes a les entidaes municipales. Lo que se busca ye centralizar el poder otra vuelta. Y centralizar el poder ye lo más reaccionario que puede facese.
Un asistente
Yo creo que nestos momentos, en plena crisis o estafa que tamos viviendo, ye importante considerar eso de “¿independentismu pa qué?”
En Cataluña ta plantegándose nestos momentos un discursu independentista mayoritariu, pero un discursu independentista relativu, con una cesión de soberanía, en realidá ye conseguir la independencia d’España pero cediendo soberanía a Alemaña concretamente o a les instituciones europees colo que camiento que nun s'avanza realmente no que ye conseguir el derechu del pueblu a decidir.
Creo que la soberanía ye la pallabra que más puede definir a tolo que ye’l movimientu reivindicativu asturianista o nacionalista, que ye considerar a Asturies como suxetu políticu con derechu a decidir. Dientru del derechu a decidir ta’l decidir qué queremos ser, cómo nos queremos rellacionar colos demás y, a partir d’ehí, bono, lo que seya, puede ser la independencia, puede ser la confederación… Pero hai que partir de que’l derechu a decidir ye prioritariu.
Pero definise como independentista nesti momentu, nun entiendo por qué, nin pa qué. Desplícome, nestos momentos, en Euskadi o en Cataluña, polo que conozo, persones que nunca se consideraren independentistes, güei declárense independentistes porque quieren decidir y nun quieren rellacionase cola España cañí d’esti momentu. Non dende un puntu de vista identitariu. En Cataluña dizse que cada vez que fala un centraliegu, un españolista d’estos, lo que fai ye fabricar independentistes. Y eso ye porque nun quieren rellacionase con otros d’otra comunidá colos que nun tienen en común absolutamente nada dientro del so discursu.
Actualmente, nel tema catalán y vascu, camiento que l’independentismu tien un discursu neolliberal, fundamentalmente en Cataluña. Lo que quieren ye asumir lo que ye Europa con toles consecuencies, y tal como ye la Xunión Europea, col so lliberalismu, nel cual, dende un puntu de vista d’izquierdes, nun creo que s’avance demasiao.
Considero que’l términu soberanía, si nun va xuníu a lo que ye soberanía popular, soberanía alimentaria, soberanía enerxética, soberanía cultural, nun tien xacíu.
Los debates identitarios onde nun se cuestiona nin s’afonda nos mecanismos de control popular, de control dende abaxu, o seya, con democracia direuta… en fin, lo que nos definió siempre a la izquierda, tan vacíos.
Nel tema de la soberanía alimentaria, por exemplu, hai persones n’Asturies que nun s’identifiquen como nacionalistes y son más nacionalistes que los que nos identificamos como nacionalistes. Son xente que tan exenciendo soberanía realmente, que tan en redes de comerciu xustu, que tan creando coses.
Y ye importante, dientro la izquierda, qu’avancemos nun debate propiu, nuestru, de lo que ye la soberanía real, la soberanía popular, y salinos daqué del discursu neolliberalista catalán o español, onde en realidá son cúpules que no fondero nun cuestionen modelos nin económicos nin de participación.
Presentador
Garrando lo que tas falando, nel casu catalán, el que representaría al lliberalismu, que sería CiU, tuvo qu’apautase al carru del independentismu pola movilización popular que se dio na diada, en sin embargu esa movilización popular tendrá que llevar tamién a CiU a garantizar un bon resultáu ellectoral. Asina, lo qu’entamó siendo una desixencia popular, porque CiU nun taba moviéndose en términos independentistes, y de fechu Durán i Lleida ya ta intentando desmarcase porque s’alcuentra incómodu, nun impide caltener el modelu qu’impón Merkel de recortes sociales, y ta llevándolu a raxatabla. Paez una contradicción difícil d’entender, en principiu nun debería tener esi apoyu popular, pero esa esixencia popular tórnase en sofitu al que ta aplicando precisamente eso, más Europa, más euro, más recortes…
L’asistente d’antes
Esa dinámica, esi apuntase a la ola independentista, obligó tamién a les CUP a dir a les ellecciones, porque en principiu nun lo teníen pensao, pero nun-yos quedó más remediu, pa reivindicar lo que ye otru tipu de soberanía.
Y tamién obligó al Partíu Socialista Obreru Español a sacar del armariu’l so federalismu, que ye onde lu teníen escondíu.
De toes maneres lo que se dixo equí paezme interesantísimo y camiento que ye la clave de lo que tien que ser cualquier opción d’izquierdes de calter soberanista.
Pero nel fondu ye una cosa bien antigua, ta nel mesmu sen del movimientu obreru. Lenin ya se refería a esto con total claridá, espuntaba la necesidá de que la clase trabayadora de los países se rellacionen, primero dientro y llueu fuera. Y l’engarce ente eses identificaciones nacionales, identitaries y los interereses de clase nun representaben un problema, teníen que dir xuntos de la man.
Eso ye vital agora mesmo, porque si non estos movimientos, al final, bien na dirección del PP o bien poles víes nacionales propies de cada sitiu, serán llideraos por ellos p’arrimar l’ascua a la so sardina ideolóxica que ye’l neolliberalismu que ya conocemos toos, que ye lo que tenemos más lo que nos vien encima.
Eso ye la clave y equí entren más coses en xuegu, la necesidá de concentrar fuercies, de ser capaces de construyir alternatives potentes que puedan poner frenu a eses intenciones.
Y nesi sentíu tamién los movimientos emerxentes, sociales y políticos son mui importantes y hai que tar atentos y participar d’ellos.
Presentador
Vivimos nun país que ye Asturies y precisamente equí’l movimientu obreru fue pa lo contrario. Tanto’l partíu socialista como’l partíu comunista n’Asturies fueron enemigos abiertos de tolo que significaba identidá y cualquier otru aspeutu que se pudiera entender como soberanismu. Subrogó siempre los intereses asturianos a una supuesta clase obrera del estáu español. Alcordavos d’aquel famosu canciu de Víctor Manuel “mirai obreros del mundu…”, pero eso nun cuayó nuna mayor autoorganización dende Asturies, nin del movimientu obreru, nin de la izquierda.
Agora qu’hai poco que morrió Carrillo y tovía esti fin de selmana se tiraron les cenices…, ya sabéis que Carrillo consideraba que too eso d’Asturies y lo asturiano yera cuestión de burgueses, él mesmu decialo asina, abiertamente, en mil novecientos ochenta... nun sé, ¿cómo lo veis?
De toes maneres, nos primeros años de la transición, sí hubo un movimientu bastante potente de reivindicación d’autogobiernu, creo que ye gloriosa aquella foto de Tini Areces encabezando una manifestación en defensa del ‘bable’, aquello tenémoslo toos na mente. Pero sí, históricamente hai una concepción de la izquierda totalmente xacobina implantada n’Asturies, sobre too nos partíos mayoritarios d’izquierdes. Esa famosa entruga que, a mi personalmente me pon enfermu y que ya toi cansáu de discutir de que “¿cómo pue ser que siendo d’izquierdes seyas nacionalista o seyas soberanista o seyas federalista?”. Esa entruga ya m’aburre porque ye tan fácil de retrucar… nun esiste denguna contradicción, ya Lenín, en 1914, dexaba nidio la necesidá que tenía la clase trabayadora d’identificase con esti tipu de plantegamientos, como'l de defender el derechu d’autodetermín de los pueblos, y ye mui difícil de cambiar. Los que tuvimos militando en sindicatos mayoritarios, toi falando de Comisiones y UGT, vimos qu’esa idega ta mui instalada y ye mui complicao de cambiar, nun se ve la necesidá de venceyar estes reivindicaciones como daqué necesario, dícente siempre “pa qué vas defender eso cuando lo importante ye defender los derechos de los trabayadores” cuando ye daqué tan cenciello y visual como deci-yos, “oi, recuerda que Fidel diz siempre aquello de Patria Llibre o Muerte”.
Ye fundamental qu’estes cuestiones vayan de la man, vanos muncho nello, porque si non vamos de cabeza hacia un estáu centralista o lo que ye más factible, hacia un estáu similar al actual no administrativo, pero vacíu de conteníos.
Decien l’otru día los de la UPyD qu’ellos yeren hasta federalistes, pero claro, cuando vas ver los conteníos de les sos propuestes, sí, son federalistes, autonomistes, lo que seya, pero entames poles competencies y ves qu’educación fuera, que sanidá fuera, que xusticia fuera… y al final quédate una cadarma, pero en sin carne, en sin chicha.
Comentaba al principiu qu’hai munchos intereses en qu’Asturies nun xorrezca como nación, igual qu’otres zones que tan en situación similar, y nun ye casualidá lo que comentaba Benayas de qu’equí’l PCE y los movimientos obreros tuvieran una desvinculación total con Asturies, entós al facer una apuesta en común y veraz de cual ye la realidá, surden les conclusiones, pero si’l plantegamientu de base ye erróneu ye difícil que salga daqué coherente.
Tornando a la soberanía direuta, si toos tuvieramos claro que si Asturies ye una nación y nos asiste esti derechu, mañana salimos a la cai y pasao somos independientes. Ye la independencia a la brava, si tol mundu ye independiente, al final declaramos independiente’l territoriu. Pero esto nun ye asina de momentu, nun veo yo que comparta esta sensibilidá con otra xente.
Si nos metemos a rebatilo nos términos políticos qu’usen esos que digo que tienen unos intereses pa qu’Asturies nun xorrezca, muncho más allá de lo que nos dicen, lo que diz Durán i Lleida o l’otru, lo que dicen na tele, tamos perdiendo’l tiempu. Sabemos tolos que tamos equí que lo que dicen respuende a una dinámica electoralista de renuevu cada cuatro años y tan presos de la mecánica de ganar o perder votos.
Camiento que nosotros eso ya lo dexamos, esiste, pero tamos superándolo, el nuestru debate va más por ver cómo podemos articular movimientos que seyan de soberanía popular, coses como la soberanía alimentaria, el conceptu de decrecimientu… porque la raiz del problema ye que’l capitalismu ye un modelu agotáu, y entós, tratar de facer una independencia pa conseguir una España en piquiñino nun ye bono, nun ye bono pa naide. Y eso ye lo que puede tar pasando n’otres zones, que ten cerca d’un independentismu pa conseguir una España en piquiñino.
Y los españoles d’España tamién sienten que nun tienen derechu a decidir, tamién ven que los políticos d’ellos, anque tamién seyan españoles como ellos, nun los representen.
Eso compartímoslo toos.
Estos hai qu’articular esos movimientos donde la xente sí se sienta espresada, eso ye soberanía popular, y en cuanto haya un plantegamientu coherente de base compartíu por xente que nun te involucrada por temes electoralistes, porque claro, el tema del renuevu cada cuatro años paraliza a les organizaciones polítiques d’una forma absoluta, pero necesitamos, nun sé, un ‘ente’ nel que los esfuerzos de les formiguines consigamos que sí que valgan pa algo, porque agora mesmo’l capitalismu defiende l’individualismu y eso fue lo que fue calando y agora la xente atópase en sin referencies, les referencies de tola vida ya tan escaecíes, esto ya nun ye post-industrial, esto ya ye post-post-industrial, y nun tan apareciendo los elementos pa poder superar el problema.
Pero tar tan, tamos perdiéndonos colo que dicen les organizaciones polítiques los plantegamientos que tan faciendo nel parlamentu… sabemos qu’eso que dicen nun ye verdá. Si queremos una soberanía popular, exerzámosla, entamemos con cuestiones de soberanía alimentaria, con trabayu cooperativu… Facer entender a la xente lo del decrecimientu ye complicao, nun sé como s’arregló Milton Friedman, el tipu lliberalista económicu esi, pa facenos creer al restu de que la economía puede crecer infinitamente. Si escribes nel google “decrecimientu”, ponte “creo que lo escribiste mal”, y pon “de crecimientu”, sepártatelo, porque nin google lo entiende. Nun m’esplico cómo consiguió qu’eso seya asina, colo fácil que ye entender qu’esti ye un planeta cerráu y que nun se puede sostener un crecimientu infinitu de nada.
Entós, si se rompe esi paradigma, implica que tolos países ricos tendríamos que baxar a un nivel menor, pa que nel conxuntu pueda haber un nivel de vida aceptable y dignu pa toos.
Agora mesmo veo munchu individualismu, hai que combatilu, y sería un elementu que, de nun dase, la xente tomaría un nacionalismu que nun tendría nada que ver cola izquierda, sedría nel sentíu de protexer lo mío, y en sin rellación cola solidaridá nin col internacionalismu. Entós hai que tener cuidáu y dase cuenta qu’hai que facer renuncies.
Anque tenemos la suerte de que precisamente la quiebra del capitalismu como sistema va a llevanos ya a esi decrecimientu.
Claro, el mi plantegamientu sería que planificáremos esi decrecimientu y que l’aterrizaxe fuere suave, pero va entregánoslu’l capitalismu, nun va ser por méritos de la izquierda, nun va ser pola renuncia voluntaria de lo que nun necesitemos, si non que va ser por ‘coyones’, falando en plata. El capitalismu quiebra dexando na cai a miles de persones y enriba aprovecha’l PP pa sacar el so programa de másimos y completar el negociu lliberalista, en sin sanidá, en sin derechos… nun desamparu total.
Tien qu’haber un cambiu de valores fonderu pa poder llegar a falar d’independencia y qu’eso valga pa daqué de verdá.
Presentador
Un momentu pa un poco d’autopublicidá de la tertulia. Ficimos ya una tertulia precísamente sobre crisis económica onde ya falamos precísamente de decrecimientu [Crisis escríbese con €] y ye curioso que dos tertulies, en principiu de temes diversos, coincidan nesa necesidá de tornar a la comunidá, de los llazos ente les persones, de crear redes dende abaxu.
Enllazando con eso, ya que paez que tamos llegando a una conclusión y les diferentes intervenciones van caminando escontra’l mesmu sen, bono, tengo posiblemente más preguntes que rempuestes, pero, por aportar algo al alderique, porque paezme que ye daqué que tenemos qu’aportar los que nos movemos nes soberanismu d’izquierdes n’Asturies, ante lo que ta pasando nel Estáu Español anguañu, sobre too coles pretensiones independentistes que tan surdiendo de Cataluña, de CiU, la pregunta ye, cómo vamos poder llegar a la sociedá asturiana o esplica-y a la sociedá asturiana, que la soberanía de la que tamos falando nosotros nun tien nada que ver con eso, que ye más bien lo que s’esplicaba anantes equí de soberanía popular, d’organización dende abaxu hacia arriba… cómo podemos facer pa que la xente entienda’l discursu que nosotros defendemos y que nun nos digan “non, si vosotros sois como los catalanes, lo que queréis ye la independencia por egoismu, pola independencia económica” y esti tipu de coses. Cómo conseguir que la sociedá, la mayoría social asturiana, que realmente ta un poco distante d’estos alderiques, nun caiga no fácil, que ye dicir, “non ye que tais siempre igual, como los catalanes” y tienden a comparanos, a tola xente que militamos nestes organizaciones polítiques soberanistes, con ellos, que queremos independizanos y nun somos nada solidarios nin internacionalistes, que ye l’argumentu que suelen usar dende la izquierda española.
Otru asistente
Ye qu’ equí n’Asturies hai una costra mui gorda, pero nel fondu esi sentimientu nacionalista asturianu esiste, pero tenemos tanta basura encima que nin nos damos cuenta d’ello, pero hai veces que lo escuches, y por exemplu, con esti tema de Cataluña, a min sorpréndeme que muncha xente que conozo nun-y dan gran importancia, dicen “bono, si quieren marchar que marchen”, y eso años atrás nun pasaba. Incluso xente qu’escribe nel periódicu de “La Nueva”, entama a espuntar qu’Asturies ye una nacionalidá más antigua que la catalana y apelen a un montón de sentimientos asturianos, pero llueu echen-y pestes a los catalanes por querer separtase d’España. Camiento que tenemos como un choque de trenes na tiesta, que realmente nun sabemos pa onde queremos tirar.
Saca-y a la xente’l sentimientu asturianu cuesta munchísimo, y sobre too equí, que nun tenemos un ideal nacionalista que venga de la derecha. En Cataluña y Euskadi esisten partíos nacionalistes de dereches y d'izquierdes, son dos formes distintes de velo, y eso equí nun lo tenemos, sólo tenemos la nuestra, y enriba, pa desgracia, ye na izquierda, onde ta la cosa más internacionalista que s’inventó, y entós, tornamos a lo mesmo, ¿cómo a un internacionalista-y espliques que puede ser tamién nacionalista?.
Ehí’l tema de la biodiversidá puede ser un buen exemplu. Paez qu’hai un alcuerdu internacional pol que tol mundu diz que la biodiversidá ye bona, polo que la defensa d’esa biodiversida puede ser un argumentu pa torgar esi “nacionalismu” que quier que toos seyamos robots y que toos seyamos iguales qu’un neoyorquín de trenta años. Non. Que’l neoyorquín seya d’una manera que yo seré d’otra y el de Lleón será d’otra.
Y otra cuestión que comentaste y que me paez mui importante ye lo que qu’hai un sentimientu d’asturianía n’Asturies que se funde’l misteriu. Eso ye verdá y nun lo puede negar naide. Pero tamién ye verdá que la costra que tien enriba ye enorme y a veces nin se ve. Pero habelu hailu y lo único qu’hai que facer ye frotar la costra, nun ye que seya una cuestión de necesitar fabricalu, qu’eso sí sería un problema. El sentimientu ta, y eso facilítamos muncho les coses, anque sin triunfalismu.
Un asistente
Sí, ye verdá, haber hailu, pero la xente en realidá nun sabe cómo espresalu. Incluso munchísima xente que se siente mui asturiana salta tovía con idegues de Pelayu y compañía, covadonguismu puru, tenemos un cacao… mesmamente como dicía Aznar cuando faló de la guerra d’Irak, qu’España tuvo ochocientos años soxuzgada al mundu musulmán y tal, y dempués ún va a Cuadonga y atopa la chapa que diz qu’equí nació España… digo yo, si equí nació España, ¿cómo pudo tar antes ochocientos años soxuzgada a los musulmanes?, o esistía antes de que llegaran los musulmanes o nació dempués cuando esa hipotética reconquista.
Otru asistente
Si hai una serie que diz qu’España nació hai tres mil años y nun pasa nada.
L’asistente d’antes
Y Rajoy, nos sos principios, falaba de trescientos años d’hestoria d’España. Bono, ceru arriba o ceru abaxu…
Bien, caún colos sos diferentes matices vemos la situación. El problema ye ¿qué facemos?
Pienso que la situación, agora mesmo, va polarizase, ya ta polarizándose y va polarizase tovía más ente los defensores d’un modelu que ye l’actual, el réxime de la transición política española. Un réxime que tien unes carauterístiques, dende una corrupción corrupción galopante, una izquierda, fundamentalmente'l PSOE, entregada en brazos del lliberalismu, por más que llueu trate de diferenciase con rasgos anticlericales, pero nun nos engañemos, la so política económica ye’l lliberalismu dende hai munchos años.
Entós ¿cómo podemos avanzar na confluencia de los movimientos sociales y políticos y la construcción d’un movimientu políticu que vaya más allá de denunciar dellos aspeutos o enfermedaes del sistema, como deshaucios y demás, y avanzar realmente nel xorrecimientu d’una alternativa política acordies a la situación d’Asturies?
Esta ye la entruga del millón, camiento que ye un tema que tendremos que dir madurando, queda tovía bastante camín por facer y pasa por situaciones como la que tamos viviendo güei equí, falando distendidamente de les coses, de cómo les vemos, y pienso que nun tamos tan lloñe unos d’otros. Tamos obligaos a ello, tamos obligaos a abrir esos calces de comunicación y ver sobre qué bases puede afitase esi futuru y necesariu movimientu políticu y social que seya capaz de planta-y cara con fuerza a tolo que nos vien sucediendo y a lo que se nos avecina, que nun ye ‘pecata mituta’.
Pablo Pérez
Ehí pondría yo un granín d’arena, una idega a lo que tas comentando, y sería trabayar al traviés de los fechos y nun tanto metenos nel falar y nel discursu. Los discursos apréndense de memoria y la xente salta con coses como covadonguismu y eso, son como ‘clics’ que tan na cabeza. Si nos metemos a falar de coses como independencia ya eso, la xente salta porque piensen automáticamente, ¡pun!, pero esos pensamientos automáticos pueden evitase faciendo coses.
Yo qué sé, vamos facer una agrupación de llectores nun conceyu o participar en l’alministración del presupuestu d’esi conceyu. Neses cuestiones la xente participa, failo, entiende por qué se fae, entiende que ye meyor pa ellos, participa, ehí la xente respuende. Pero ye que tenemos una carga, nun sé cómo dicilo, una carga intelectual de discursos estándar que son una torga grande a la hora d’esparder un mensaxe. En cuantes esi mensaxe llega a una persona, sal toa esa batería de coses que-yos metieron a calzador, oi, que son cuarenta años de franquismu nes escueles, igual tovía hai xente que cree que’l negru del colacao taba allegre cantando. Yera una visión completamente distorsionada, había coses na enciclopedia Álvarez que yeren brutales.
Entós tenemos que planteganos, nun tanto facer un discursu teóricu de a onde queremos llegar y etcétera, sinon facer una rede con aspeutos positivos concretos y a trabayalos. Y la xente, una vegada qu’entra nesi procesu, ya nun tien tanta contradicción porque evites esos clichés.
Ye dicir, reducir un poco'l tema dialécticu y centrase más nel pragmatismu.
Una pequeña reflexón que tampoco va a dengún llau. Camiento que’l nacionalismu español, el centralismu, ye más intelixente en delles coses que’l nacionalismu periféricu. Por exemplu, dexó unes transferencies en manes de les autonomíes, pero dexó la caxa única en manes del Estáu, la facienda, de manera que “tu tienes les transferencies pero yo cobro toes les perres”, y lo mesmo podemos falar del modelu de desarrollu, “voi date trabayu”, pero cómo, “bien, vas facer quince térmiques, una incineradora…, pero güeyu, toi dándote trabayu”.
Consiguieron dar la vuelta a la tortiella, tan faciéndolo realmente mal, pero tan usando'l llingüaxe de manera que la xente tenga esos clichés. Son mui llistos nel usu de los medios de comunicación. Van poniendo a la xente a la contra de lo que tais plantegando, a la contra de modelos muncho más participativos.
Otru asistente
Ye que tienen la sartén pol mangu, tienen los medios de comunicación, acabes de dicilo, son una máquina de manipular.
Pablo Pérez
¿Nun vos suena eso de “demócrates versus nacionalistes”? Son ultranacionalistes españoles y ellos autodenómense “demócrates”, mientres que’l restu son “nacionalistes”, o seya, nosotros somos nacionalistes y ellos son demóctrates.
Y hai xente qu’asume esa dualidá asina, que nun conciben que’l nacionalismu pueda ser democráticu. Ye una reducción al absurdu pero eso úsase.
Un asistente
A propósitu, venía escuchando radio nacional d’España sobre les inundaciones qu’hubo nun sé onde y diz el llocutor, “les bones noticies tenemos que buscales no deportivo, el Madrid metio-y cinco a unu al Deportivu”.
Otru asistente
Lo que pienso ye que tamos viviendo un momentu históricu no político nel cual les contradicciones del sistema son ya brutales. El momentu que vivimos agora ye un momentu de ruptura. Lo que nun se fixo na transición, la ruptura democrática, que yera polo que se naguaba. Entós nun se fizo la reforma esa nesa constitución que fue aprobada pero que l’exércitu taba por medio. Y tamos viviendo agora’l fracasu d’esi réxime de la transición y de la constitución del 78, agraváu con una crisis global del sistema capitalista
Y nesti contestu, ¿qué facemos el nacionalismu, l’asturianismu o'l soberanismu políticu? l’asturianismu políticu fracasau, porque fracasamos, -yo llevo cuarenta años, en tolos partíos qu’hubo na historia, porque participé en toos-, ¿cómo crecemos? ¿cual ye’l discursu que tenemos que tener nestos momentos? ¿cómo desarrollamos el nuestru proyectu? ¿cómo trabayamos? y ¿quiénes son los nuestros socios? ¿con quienes podemos dir?
Porque hasta hai bien poco creo que l’asturianismu políticu podía facer polítiques frentistes, porque podía haber xente del asturianismu políticu de más a la izquierda a menos a la izquierda, buscando conseguir cuotes de mayor autogobiernu, pero nel momentu nel que tamos agora, la contradicción ye tal entre’l neolliberalismu y la inmensa mayoría, qu’eses polítiques fracasaes, -fracasaes equí n’Asturies, nun fracasaes n’otros sitios-, tenemos que replantegánoslo too, el discursu, la forma de trabayar, la forma d’actuar, si queremos avanzar nel procesu de creación d’una nación con más derechos, más soberana en tolos sentíos.
Pienso que los movimientos sociales nesti momentu, tolo que se mueve equí n’Asturies, en sin sabelo, ye soberanista, y ta exerciendo nello, ta trabayando por ello, ta tirando por coses pequeñes, cercanes, de democracia direuta, de participación, movimientos transversales, horizontales, mediuambientales, de decrecimientu… crear redes, eso ye soberanismu.
Y el movimientu políticu nel que participamos los que tamos equí debería saber lleer el mensaxe que nos da la sociedá asturiana, polo menos la sociedá asturiana que llucha y que pelea, la que ta na cai, la que quier cambiar les coses, la que ya nun ye conformista, la que ya ye anticapitalista, antirréxime y antisistema.
Tenemos que cambiar el discursu, tenemos que cambiar les formes de trabayar, tenemos que ver quien son los nuestros aliaos, con quien podemos dir p’avanzar nun proyeutu d’una sociedá asturiana más soberana nel sentíu ampliu y total de la pallabra.
Les fórmules vieyes, les aliances que se podíen haber fecho nel pasáu, too eso cambió porque la situación política ta cambiando a una velocidá mui grande.
La crisis ye brutal y el cuestionamientu del sistema empieza a ser ya mui importante ente munchos seutores de la población. Y hai que cambiar les coses, inevitablemente, o llegar a una democracia más autoritaria, menos democrática o nada democrática, porque ya ye poco democrática, medio fascista.
Presentador
Llamento dicir que tenemos ya que cortar, nun sé si les persones convidaes a la tertulia queréis facer un pequeñu remate final.
Sí, camiento qu’en feches inmediates l’asturianismu, más allá de defender el federalismu o l’independentismu, nin siquiera’l soberanismu, vamos tar en necesidá de defender lo poco que tenemos. L’agresión ye tan brutal y de tal calao que ta too en xuegu, hasta l’escasu autogobiernu de que disponemos.
Y si queremos que’l tema identitariu tenga un futuru nesti país, pasa por venceyar esi plantegamientu cola necesidá de trabayar, de tar xunto a los movimientos sociales que tan ya configuraos o configurándose, que cuestionen esti modelu económicu y políticu actual, y ser capaces de crear alternatives polítiques que respuendan a los intereses d’esa mayoría social.
Si somos capaces de facer eso, camiento que realmente hai futuru pa que podamos tener una identidá propia y reconocida, pero si nun somos capaces, evidentemente serán otros sectores los que tomarán les riendes del movimientu que ta surdiendo.
Y too eso implica una responsabilidá grande pa tol mundu que tamos nesti movimientu.
Pablo Pérez
Pola mio parte, como conclusión, punximos de relieve que l’agotamientu del modelu capitalista ofrez una oportunidá pa que’l nacionalismu se recupere como ferramienta, nun como meta, sinon como ferramienta de trabayu, y al traviés de la participación nos movimientos sociales, de democracia direuta. Ye una bona forma d’abrise camín a lo que pudiera ser, y espero qu’algún día seya, una República Socialista y Asturiana.
Ye una oportunidá que tenemos y ye un retu mui grande.
Creo que podemos salir del túnel y podemos salir mui bien paraos, dempués de pasalo mal, si lo xestionamos, puede ser que sirva pa algo, y si non vamos acabar nun estáu fascista que quiero meyor nun pensar nello.
Presentador
Ya pa terminar, munches gracies a les persones convidaes a la tertulia, como sabéis ye la primera salida de la Tertulia Pachín de Melás fuera de Xixón, anque coles bufandes del Sporting qu’hai pol chigre, sentimonos como en casa., Y agradecer a Casa Ana y a San Martín, que nos dexó too mui afayaízo y bien, lo que nos fará, de xuro, salir más veces de Xixón pal futuru.
