Tertulia: Fútbol. Ociu y negociu

Resumen de la tertulia del 13 de marzu de 2013

Fútbol

Ociu y negociu.

Na que participaron

· David Artime

Escritor, autor de La Bufanda, Premiu Narraciones Trabe 2009

· Íñigo Arza

Directivu del Unión Club Ciares y autor del blogue Los ideales del gol

· Miguel Fernandi

Comentarista deportivu

Presentador

Tamos como siempre na Tertulia Pachín de Melás, esta vez con ánimu de falar de fútbol.

Tenemos como invitaos nesta ocasión a Miguel Fernandi, que ye comentarista deportivu, mui conociu peles ondes radiofóniques, a Íñigo Arza que ta dientro del mundu del fútbol base, ye ditectivu del Club del Ciares, y amás lleva un blogue con opiniones y comentarios mui interesantes, Los ideales del gol, y a David Artime, que ye periodista y escritor, y bien conocíu pol so llibru La Bufanda, Premiu Narraciones Trabe 2009.

Y pa introducir un pocu'l tema topéme con esti artículu del X Congresu d’Historia del Deporte, que s’entitula Fútbol ymanipulación social, escritu por Santiago Flores Álvarez-Ossorio. Son siete folios que nun tienen desperdiciu, pero voi espuntar equí sólo un poco de la introducción y de les conclusiones que camiento que podíen ser un poco inspiración pa la tertulia.

Nun obstante, ya sabéis que nesta tertulia, tanto’l tema como la participación ye absolutamente abierta y en absolutu tenemos dengún interés en dirixir nin orientar la tertulia en dengún aspeutu.

El fútbol ye pa dalgunos un xuegu y pa otros una forma de vida. Hai quien lo usa como negociu o lu sigue como ideoloxía. Llega a considerase una pasión ya inclusive representa una relixón. Forma parte del mundu actual, de la sociedá de mases que tolo envuelve. Ta presente en cualesquier parte del mundu y tres él hai intereses ocultos. Unos pocos utilícenlu como preséu de poder. Un poder pa facer dineru, controlar y manipular.Los aficionaos somos mudos testigos d'esti espectáculu. El fútbol ye un negociu que xenera grandes beneficios. Por eso tantes empreses métense nél. Los valores deportivos fueron sustituyíos por criterios mercantiles y los xugadores son productos pa comerciar. Los futbolistes son una especie de gladiadores que se dediquen a entretener al pueblu. L'aficionáu ye un simple espectador ensin posibilidá real de respuesta.
Porque a una persona puede gusta-y esti deporte, pero namás se-y dexa opinar en ciertos niveles. Un siguidor nunca va poder entrar na Fifa y dici-y a Joseph Blatter lo que piensa de la so xestión. Nel fútbol nun hai igualdá de condiciones. Preséntase como un xuegu integrador, toos xuníos por unos colores y detrás hai un señores enllenándose los bolsos. L'aficionáu ye'l que sufre cada domingu col equipu. Si baxa de categoría, los mercenarios xugadores van dir a otru club y van cobrar el sueldu axustáu. El descensu carezlu l'aficionáu y aquel xugador que sienta los colores. L'empresariu xestiona'l club como una empresa, por eso namás-y esmolez la perdida d'ingresos. Nesti deporte manéxase enforma dineru y produzse malversación de fondos. Los clubes faen les operaciones en paraísos fiscales y engañen a facienda pa pagar menos impuestos. ¿Qué pasa si un ciudadanu realiza les sos operaciones nun paraísu fiscal y engaña a Facienda? Cuando se dan cuenta del fraude, el ciudadanu ye puestu en disposición xudicial.Munchu presidentes de clubes malversen miles de millones y nun van a la cárcel. Axústase con ellos y búscase un alcuerdu beneficiosu pa dambes partes. Porque'l fútbol interesa al Gobiernu y nun va xulgar a los señores qu'entamen l'espectáculu qu'entretien a la población. Tamién puede comentase l'usu políticu. Si los emperadores romanos falaben de pan y circu, equí asocede daqué asemeyao. L'oxetivu ye que la xente tea pendiente del partíu, non que tenga tiempu pa cavilgar sobre los acontecimientos d'actualidá. Ocúltase o tracamundiase la realidá con ayuda de los medios de comunicación y un ciudadanu atopa ante sí con una realidá construyida pelos medios. El fútbol ye un axente de la sociedá de mases. El mundu diríxese a la globalización y con esti xuegu ta produciéndose una especie de “gol-balización”. El balón llévase a toes partes, hai goles en cualquier rincón de l'aldega global. Un aficionáu puede querer esfrutar del fútbol d'otros llugares, pero ¿por qué nun decide él sí quier fútbol o non nesi momentu y nesi espaciu? El deporte tien una gran repercusión social y podría utilizase pa faer bones obres, pa construyir una sociedá plural con unos valores éticos de solidaridá, compañerismu ya igualdá de condiciones pa toos. Entámense partíos benéficos, dellos deportistes son embaxadores d'Unicef, hai quien, como Weah, llucha pola paz nel so país o fai llabores sociales. Si tolos axentes que conformen el fútbol collaboraren pol bien de la sociedá, ayudaríen a faer un mundu meyor.

Y con esto, en sin más, la tertulia queda abierta. ¿Quién quier entamar?

Miguel Fernandi

Sentíate lleer esti documentu y camiento que podíamos firmalu cualquiera de los que tamos equí. Efeutivamente, hai una gran diferencia entre lo que ye l’aficionau al fútbol y tolo que se mueve alredor, inclusu dientro de los mesmos equipos de fútbol. Tien muncha razón l’artículu cuando diz que nun equipu base de categoría, quien realmente lo sufre son los aficionaos. Siempre se diz eso de que “pasen los presidentes, pasen los xugadores, pasa tol mundu, pero l’afición siempre queda”. Ye una realidá.

Esto del fútbol y un tema tan estensu qu'igual podíemos tar equí hasta’l fin de selmana y nun se nin por onde entamar.

El conceptu de fútbol creo que toos coincidiremos en que camudó, camudó pa peor, y nótolo sobremanera nos pueblos, ta perdiéndose’l conceptu de dir a ver l’equipu del pueblu, salvo esceiciones. Agora mesmo, por ceñinos equí en Asturies, el conceptu de fútbol ye ser del Sporting o del Uviéu y ser del Madrid o del Barça, y tolo demás ye secundario.

Quiciavis una de les causes ye la repercusión social que tien el fútbol, y una parte de la culpa tenémoslo los medios de comunicación, qu’enfocamos a lo que más vende, y lo que más vende agora mesmo ye, nesti país, son esos cuatro equipos, por suerte o por desgracia.

Y cambió tamién por un aspeutu social importante, si miramos entraes a campos de segunda B y tercera en Asturies hai quince o vente años, veríamos como en Mieres o en La Felguera, por exemplu, diba muncha mas xente al fútbol, en Mieres podía haber una media de tres mil o cuatro mil persones y en Llangreu taríamos lo mesmo. Quiciavis yera porque daquella’l fútbol yera la única alternativa d’ociu qu’había, lo que se podía facer el domingu pola tarde yera dir a ver al equipu del pueblu, y agora tenemos munches más opciones, primero futboleres televisaes, “pa que voi pagar diez o quince euros pa ver al Caudal o al Marino, o al Unión Popular de Llangreu o al Avilés, si puedo ver en casa cualquier partíu de cualquier lliga del mundu”. Y amás, hai munches más alternatives d’ociu, nun sé, los centros comerciales y tou esti tipu d’hestories.

Y el mesmu conceutu de fútbol cambió, lo de la identificación colos colores, el dir a ver l'equipu del pueblu y demás coses va tresformándose escontra esi modelu de fútbol-negociu, d’adoración a determinaos futbolistes y a determinaos equipos y tou esi tipu de coses que yo ye lo que veo con más pena.

David Artime

Suscribo totalmente lo que tas diciendo.

Miguel Fernandi

Anque yo seya del Marino de Lluanco y tu del Candás.

David Artime

Y del Sporting y del Uviéu.

Bono, nun sé si a estes altures de la película s’atreva alguien a negar que'l fútbol seya un negociu. La verdá ye que cada día que pasa ye más negociu, cada día que pasa ye menos deporte, y si se caltién la dinámica actual, va llegar el momentu que’l fútbol en España va ser como la NBA nos Estaos Xuníos, onde les lligues son empreses multinacionales y los equipos son franquicies que se compren y que se venden. Esi ye’l derroteru que ta tomando la situación.

¿Por qué causes pasa esto? En primer llugar ta’l tema básicu de los derechos televisivos. A principios de los años noventa nacen les plataformes privaes de televisión, naz el conceutu de batalla pola audiencia, antes teníamos la uno y la dos, aquel terrible monopoliu que tanto criticaron los lliberales, y que na mio opinión, antes la televisión n’abiertu yera muncho meyor antes qu’agora, y eso xeneró una batalla por audiencies que ye una batalla económica polos derechos televisivos, que ye onde ta tol cogoyu.

Aparte, nel añu noventa y dos, pasa lo de la conversión de los equipos de fútbol en sociedaes anónimes, una medida que se fizo pa intentar paliar les deldes qu’acumulaben ya dende los años ochenta, y que sirvió al final pa que s’acumularen tovía más pola propia estructura competitiva y de fichaxes que tan llevando los clubes.

Y esos dos factores cambiaron dafechu'l conceutu de fútbol que se venía desendolcando en España y en Asturies dende mediaos de los años cincuenta y sobre tou dende los setenta y los ochenta, que fue onde tuvo más puxu’l conceutu de fútbol popular y derivó a la situación actual na qu'hai una lliga de fútbol multimillonaria con una supremacía total y absoluta de dos equipos, el Madrid y el Barcelona, y el restu, cada día que pasa interesa menos, y onde, como diz Burilo [Miguel Fernandi], los equipos de barriu y de pueblu tan, pocu a pocu, esapaeciendo.

Yo soi sociu del Candás, y nel Candás, hai unos años había una media entrada de cuatrocientes persones y güei, si vamos cientu cincuenta, podemos danos con un cantu nos dientes.

Los medios de comunicación tienen una parte importante de la culpa, el fútbol ya ye, por si, un espectáculu qu’atrae muncha atención social, y los medios de comunicación, ye nidio, lluchen por esa audiencia, la llucha por esa audiencia fai que sólo se fixen nos equipos de fútbol que más interesen, que son, a nivel del Estáu, el Madrid y el Barça, y esa atención de los medios de comunicación nesos dos equipos xenera tovía mayor interés hacia ellos y mayor desinterés hacia’l restu, colo que ye como una burbuya que va creciendo.

Y la situación cada día ye peor, pasóse d’una afición militante que diba al campu nos años ochenta al aficionau televisivu que lo que quier ye tener en casa una plataforma que-y ponga tolos partíos pa quedar en casa, colo qu'esapaez el conceutu de fútbol como espectáculu social y lligau a les clases más populares.

Y tamién hai una cosa que ye mui interesante y de la que tomé conciencia a raíz d’un artículu que lleí nel blogue d'Íñigo sol informe Taylor, Hillsborough, o la desproletarización del fútbol, yo conocía les consecuencies del informe Taylor, en Hillsborough, Sheffield, el Nottingham y el Liverpool disputándose les semifinales de la Copa d'Inglaterra, por un descontrol na venta d’entraes y nes medides de seguridá, entró muncho más xente de lo que cabía y morrieron estrapallaes noventa y seis persones. Hai una teoría que yo suscribo, que ye que'l gobiernu de Thatcher y los que manexaben el cotarru del fútbol d’aquella, utilizaron eso como escusa pa entamar a impulsar un modelu de fútbol, entre comines, “modernu”, un modelu de fútbol nel que los estadios tienen toles llocalidaes d’asientu, munchísimo más cares de lo que yera hasta entós, onde se criminaliza al aficionau más impulsivu, al que va a animar, al que va ponese de pie, y onde tan tresformándose los estadios no que son pistes de tenis práuticamente, cada día que pasa aseméyase más a un partíu de tenis o a una competición de golf que lo que yera’l fútbol de los años setenta u ochenta, que tenía un conceutu munchísimo más popular.

Íñigo Arza

Bono, aparte de tar d’alcuerdu colos dos, voi a defender un poco'l fútbol. En Asturies hai cientos d’equipos de fútbol, y que seyan negocios, sociedaes deportives, tan l’Uviéu, el Sporting y l’Avilés, el restu son sociedaes en sin ánimu de llucro. Asina que ye un poco trampa dicir que'l fútbol ye un negociu. Anque yo tamién lo digo, hai que saber que ta cayéndose un poco na trampa. La mayoría d’equipos llévense altruistamente, la xente nun gana dineru y eso quería defendelo en primer llugar.

Y dempués, analizando’l por qué agora s’anima a los equipos más importantes, tanto en Asturies como en toa España, a min préstame compáralo cola política. Na política, agora y dende hai bastantes años, básicamente hai dos partíos, pero nos setenta teníes a la LCR con miles y miles de votos, el MC… nun sé, infinidá de partíos, y lo mesmo que nel fútbol, fue adulces focalizándose en dos partíos por razones bastante asemeyaes, pola pérdida de cultura política, porque apostamos a caballu ganador, perdemos la perspectiva, los matices y ta tamién el focu mediáticu. Antes podíes lleer nun periódicu al representante de la lliga de nun se qué y yeres a sentite representau, dábes-y el to apoyu, pero agora eso ye imposible, igual que ye imposible lleer noticies del Candás, o del Marino o del Ciares o de cualquier otru equipu.

¿Cómo vas ser d’un equipu si nun existe? Lo que nun sal nos medios, güei en día, nun existe.

Y por últimu, pa min, el problema de fondu ye una palabra que ta agora de moda na izquierda, ye la hexemonía. La hexemonía agora ye capitalista dafechu y entós el fútbol ye exautamente igual, ya nun se puede animar de pié, hai que tar sentaos, les entraes agora tienen que ser cares porque si non va’l populachu, y lo que tienen que dir son families de bien a ver el partíu, comer unes palomites, unes pipes, mercar un par de bufandes… y coses asina, la cerveza nun se puede vender tampoco porque embrutez y xenera violencia.

La hexemonía qu’había anantes, que yera obrera totalmente, onde veíes el partíu de pié, y sí, había violencia, porque yera una carauterística típica del obrerismu, había malos modos, coses, en fin, podemos dicir qu'un poco fuera de llugar vistes dende la perspeutiva de güei, pero tamién había honradez, había honestidá…

Nel artículu que tengo nel blogue, Enaxenación Cultural, comentaba qu’anantes dibes al campu, y cuando había una patada, la xente aplaudía, bono, seguramente que taba mal, pero la xente daba una ovación, y llueu l’otru llevantábase y como si nada. Pero agora, vamos, si se-y pega a daquien un emburrión, cae al suelu como si lu mataren.

Ye un cambiu de valores, d’unos valores obreristes a unos valores totalmente capitalistes nos que casi val too. Hai que ganar, y como hai que ganar, val facer trampes, val, nuna espresión machista, porque’l fútbol ye bastante machista, ‘xugar como paisanos’.

En Inglaterra si faes eso, caíte una pitada por tirate al suelu, por perder tiempu, por cualquier cosa, pero equí eso considérase picardía. Hai trenta años eso nun yera asina, hai trenta años, si ún tenía fama de piscineru, vamos, eso yera lo peor que te podía pasar.

Y estes tres coses son les que favorecieron esti cambiu de tendencia, el de pasar de puxar pol equipu del to barriu, de tar arguyosu de fulanu, que yera’l delanteru y trabayaba na fábrica d'equí al llau y ye vecín míu y salía cola mio hermana, al peinau del otru que vien de Portugal o d’Arxentina, lo mesmo da.

Pa min, con esti cambiu d’hexemonía, comiéronnos la tostada dafechu, y el resultau ye’l bi-equipismu que tenemos en España.

Miguel Fernandi

Enllazando colo que dices y lo que comentaba’l Roxu [David Artime], de qu’esto diba ser una franquicia, véndense y cómprense los clubes, y de xuru que dientru de diez años al Sporting de Xixón podrá compralu un empresariu d’Alicante, y a partir d’ehí, na próxima temporada’l Sporting será un equipu d’Alicante, y tou esti tipu d’histories.

Pero tamién hai otra hestoria, antes la xente, como decíes tu, identificábase colos equipos tamién porque había muncha xente del llugar xugando nesos equipos, el Sporting yera de Xixón porque’l noventa por cientu de los so futbolistes yera de Xixón, y l’Uviéu igual, y esa ye una tendencia que se perdió, y agora, seguramente polos problemes económicos que pasen los equipos de segunda y tercera categoría, tan tornando a facelo, el casu del Candás, por exemplu, onde cada vegada hai más xente del pueblu, pero nun sé por qué, eso nun acaba d’enganchar tampoco a l'afición.

Bono, el casu del Ciares ye la esceición, l'islote en tolo que tamos viendo. Ellí la xente tornó al fútbol, ganó adeutos, mientres que’l restu equipos de la so categoría ta perdiéndolos. Esa ye tamién una historia a analizar, que, ante la falta de recursos del fútbol modestu, quitando’l Sporting y l’Uviéu, qu’equí son los que mueven el cotarru, y quiciavis tamién l’Avilés, que tien tamién la so repercusión, el restu de los equipos de segunda y de tercera tan apostando por asturianizar les plantilles, inclusu xugando con xente del conceyu, pero nun acaben d’enganchar, tal vez polo que falábamos anantes, de qu’agora hai más alternatives d’ociu, inclusu col propiu fútbol, nun sé “¿a qué hora xuega'l Mosconia de Grau?..., pues ye a esa hora echen al Liverpool pola tele y dempués engancho col Celta-Real Sociedad”, partidazu esi de gran interés en Asturies…

Nun sé, puede que’l fútbol de los clubes modestos te abocau a esapaecer, ye que nun hai relevu pa los direutivos.

Íñigo Arza

Agora que dices lo de la tele, una cosa que me presta de la tertulia de güei ye que ta  la xugando'l Málaga agora mesmo, lo que me paez xenial, una tertulia de fútbol mientres hai un partíu de Champions League.

Presentador

Pues tenemos que confesar qu’en principiu la tertulia diba ser ayer martes, pero como xugaba’l Barça, cambiámoslo.

Miguel Fernandi

Claro, ye que'l Málaga nun ye nin el Barça nin el Madrid, nin el Sporting nin l’Uviéu.

Pero tornando a lo de que tan quedando sin direutivos la gran mayoría de los clubes asturianos, eso ye un problema, más que nada porque anque digas, “bono, pues si nun salen a combatir en tercera o en preferente, qué más da”, pero ye que detrás hai una base. Los clubes faen una llabor social colos neños. Los padres suelen apuntar a los sos fíos a fútbol o a baloncestu, o a balonmanu, esto engloba a tol deporte, pero al quedar los clubes sin direutivos, eso faise un problema.

David Artime

A min paezme que, a nivel de tercera división, el desinterés ye total, salvando mui honraes esceiciones, como la del Ciares, por exemplu, la situación ye brutal.

Yo toi viviéndolo nel Candás en vivo y en direuto. De cuatro años pa equí, y xugando cola xente del pueblu, el Candás ta na tercera división, que ye la élite a la que puede aspirar el Candás, porque a segunda nun va subir nunca, y hai partíos nos que ta xugando con seis xugadores de Candás y nun va nin dios. Home, pues dicir, “ye que lo qu’interesa son los resultaos”, bono, na primera división sí, lo que-y interesa a la xente son los resultaos, a l'afición del Sporting, polo xeneral, nun-y importa que'l Sporting xuegue con xugadores asturianos o andaluces, lo que quier ye subir a primera, pero ye qu'a nivel de tercera, nin eso.

Miguel Fernandi

Nun se mira ya nin la fueya deportiva que daben nos chigres los domingos.

Un asistente

Eso que comentais de Candás, de Mieres…, aparte de tolo que comentáis, nun puede tar un poco venceyao a que los propios pueblos pierden mocedá, tienen menos población…

David Artime

Non, nun creyo, de fechu, nun sé hasta qué puntu Candás perdió población nos últimos años.

Íñigo Arza

Camiento que si faes una gráfica cola asistencia al campu y el númberu de camisetes del Barça y del Madrid que se ven en Candás, ves ya dafechu cual ye’l problema

Miguel Fernandi

O mesmamente socios del Sporting que pueda haber en cualquier conceyu d’Asturies y socios del equipu del conceyu.

Toi xuru que na mayoría de los conceyos, sobre too na zona centru, debe haber más socios del Sporting, y digo’l Sporting porque ye l’equipu que ta en segunda división agora, que socios del conceyu.

Íñigo Arza

Col Sporting y l’Uviéu, dende’l 2003, hubo un trasvase de xente uvieísta al Sporting… vamos, p’analizar.

Miguel Fernandi

Igual ye por conceutu esi de que “yo soi del Uviéu de tola vida, pero como’l Sporting ta en primera y van xugar el Barça y el Madrid nel Molinón, faigome sociu”.

Íñigo Arza

Toi fartu ver camisetes del Sporting por Uviéu.

Miguel Fernandi

Y amás el Sportig fízolo mui bien, porque va dar entraes polos colexos y tal, y pa un guah.e ye muncho más goloso dir a ver l’equipu.

Íñigo Arza

Si-y pasara al Uviéu lo del Sporting, habría que velo.

Miguel Fernandi

Non, al revés nun se daría’l casu. Hai muncho más identificación col equipu en Xixón qu'en Uviéu. A nivel xeneral, en Xixón, la xente que nun ye futbolera, siente al Sporting igual, o quier que'l Sporting gane. Y en Uviéu ye diferente, la xente que ye del Uviéu, ye del so equipu cerrao, pero la xente que pasa del fútbol, non.

Bono, igual agora, col tema de l’ampliación de capital, sacóse un pocu más el pechu coles aportaciones populares y demás, pero yo, en sin vivir en Uviéu, siempre tuvi la impresión de qu’ellí, la xente que pasa del fútbol, pasa del fútbol, nun tien identificación col equipu de la ciudá.

Un asistente

A min gústame’l fútbol, fui sociu del Sporting un par d’años, pero tamién repátiame’l fútbol, y desplícome, ye pola persimividá que tien el fútbol. Ye la persimividá cuando’l Sporting recibe dos mil millones porque-y los pon l’ayuntamientu enriba la mesa, o cuando apaez el señor Carlos Slim o un especulador o lo que seya y nun pasa nada, nun hai crítica, como si vienen les perres del diañu, de quien seya.

Y aparte tamién, la permisividá que tien el mundu del fútbol coles medides de seguridá.

Por exemplu, un partíu de la NBA ye animadísimu, la xente canta, bailla, lleva carteles na tiesta… ¿por qué esos niveles de seguridá xunto con ‘modernidá’ por llámalo asina, nun pueden dase nel fútbol?

En fin, que nun sé hasta qué puntu nel mundu del fútbol pueden permitise coses qu'en otros llaos nun se permiten. Al fútbol permítese-y too.

David Artime

Bono, un abonu pa la NBA nun sé si cuesta tres mil euros o más, nunca tuve nun partíu de la NBA pero, pero polo que veo pola tele, el so modelu nun me gustaría que s’importase pa los partíos de fútbol equí.

Con respeutu al tema de la seguridá y la violencia, yo nun pueo ver un partíu de fútbol sentáu.

Miguel Fernandi

Yo, agora que nun voi a la grada porque toi nes cabines de prensa, anque tengan asientos, ye verdá que tampoco puedo ver un partíu sentáu. Nun puedo.

David Artime

Y otro. Alcuérdome d'un de los partíos que fui a ver de la selección asturiana onde nun hubo animación. Too yera xente sentada. Nun había eso que se conoz como ‘peñistes’o ‘tribuneros’. L’espectáculu yera probísimu, daba pena ver aquello.

Si a un partíu-y quites el fondu de la grada animando, pierde la de dios, dexa de ser un espectáculu social.

Y por otru llau, respeutu a les midíes de seguridá y la violencia, eso hai qu’entamar a desmitificalo de la lliga española. Los niveles de violencia qu’hai nel fútbol n’España son mínimos comparaos con otros países d’Europa.

Hai que tener en cuenta que, dende los años noventa, fallecíos en acontecimientos deportivos , hubo cuatro, y d’esos cuatro, ún nun fue por un sucesu violentu, si non porque, nun sé si vos alcordais, fue’l guah.e aquel que morrió en Sarriá por una bengala, porque s’enquivocaron de bengales y dienron-yos de les que se-yos da a los barcos, que salen disparaes, y esa clavose-y nel pechu.

Y hai un apuñalau, tamién en Sarriá, del Espanyol, ta'l casu de Aitor Zabaleta, y tamién el d’un paisanu que morrió nun partíu de Copa, del Deportivu de La Coruña contra'l Compostela.

Esos casos nun dexen de ser tráxicos, y evidentemente, por supuestu que requieren unes midíes de seguridá como prevención, pero aparte d’eso, los acontecimientos violentos que se dan nos campos de fútbol, onde se xuega de forma rutinaria tolos fines de selmana, en España son mínimos. Hai muncha más violencia nuna zona de copes en cualquier ciudá que nos campos de fútbol.

Y, por otru llau, si hubiera un verdaderu interés de les direutives y de les autoridaes alministratives y les fuerces policiales en atayalo, eso córtase facilísimamente. Si a min me pones agora mesmo al frente de la brigada d’información en Xixón, sé decite onde hai que ponese y a quien hai que vixilar. Lo que pasa ye que la brigada d’información ta más ocupada en dir a les manifestaciones de la CSI y en denunciar a la xente por poner pegatines.

Íñigo Arza

Lo que pasa ye que la trampa rescampla, porque hai sanciones “exemplares”, entre comines, a miembros de grupos ultres a tar ocho meses en sin entrar nun campu fútbol, y entren igual, y si non, van a otru campu.

David Artime

En Inglaterra les medides de seguridá incrementáronse la de dios. Hai cuatro años fui a ver al West Ham contra l’Everton, y la verdá ye que nun los dexen nin movese práuticamente. Anantes y dempués del partiu calculo qu’había una filera de mediu kilómetru de policíes, dende la parada del metro de West Ham hasta l’estadiu.

Ellí les medíes de seguridá incrementáronse abondo dende los años ochenta, y la violencia baxó muncho.

Íñigo Arza

Pero equí los sucesos violentos d’aquellos años, y de los noventa tamién, puedes contalos. Son mínimos.

Y munches veces son de rivalidaes polítiques, más que futbolístiques.

Esto pa min ye como na política y na sociedá en xeneral. Tienes que poner nun llau la llibertá y en otru la seguridá.

Y en Inglaterra la seguridá ta arriba del too. Nun hai espaciu pa la violencia porque ye imposible, pero tampoco l'hai pa divertite, pa ponete de pie y saltar, nun hai espaciu pa nada. Pasaron d’un estremu nel que valía absolutamente too a otru nel que, vamos, tienes que tar sentau nel asientu, puedes dir a consumir y dar un paseu como cliente que yes en vez de sociu na más y nun puedes tomar nin una cerveza, porque nin se puede de manera llegal.

Y esa ye la cuestión. Si sacrifiques tola llibertá por tar más seguru acabes como ta pasando agora colos aviones nos Estaos Xuníos, onde te faen ventisiete mil controles y faente sentir humilladísimu.

Un asistente

A min paezme que'l fútbol nun ye tanto violencia sí, violencia non, que ye de lo que tais falando, si non que ye un tema d’impunidá.

Vióse mui claro en Xixón colos aficionaos del Xénova o del Sporting. Fagan lo que fagan, nun-yos pasa nada.

Lo de Xénova fue vergoñoso, nun-yos interesaba, notóse. Nun investigaron, y claro, cuando nun investigues nun vas topar culpables. Lo que ficieron fue da-yos “l’indultu”, por decilo asina.

Íñigo Arza

Pero eso en realidá nin tien que ver col fútbol. El fechu de que nun-los detengan nun tien que ver col fútbol, tien que ver con tres cuestiones de cálter políticu.

Si yes del Sporting y sales a la cai y-y partes la cara a ún, de xuro que te comes un marrón, pero si tienes determinaes idees y determinaos contautos per ende, que polo demás son bien conocíos, bono, igual te llibres.

Miguel Fernandi

Ye muncho más fácil que te pongan una multa de tres mil euros por fumar un porro nun campu fútbol, o por meter una llata cerveza.

La llei antiviolencia ta fecha pa castigar a cualquier seguidor. Ye más, mañana vamos al fútbol tu y yo y enfadámonos polo que seya y péguesme un puñetazu y la multa será de tres mil euros, mientres que si ye afuera, a la puerta del estadiu, la multa será de trenta.

Pero incrementaronse les medíes represives, pero camiento que nun consiguieron atayar los problemes que teníen qu’atayar. Hai determinaos elementos dientro del fútbol que tan como tan, pero nun ye pa criminalizar a los grupos d’animación nin muncho menos.

Soi un gran defensor d’ellos salvo cuando hai ciertes actitudes que nun se pueden permitir y más cuando se faen en grades d’animación, que son más barates, y col beneplácitu de direutives, como cuando se faen apoloxíes de determinaes coses. Y eso pasa en Xixón, mesmamente.

Anque esi nun ye’l problema mayor que tien el fútbol agora mesmo.

Íñigo Arza

La violencia nunca ye agradable, evidentemente, pero ehí hai qu’analizar si hai un problema de verdá d’orde públicu, o si s'utilizó un problema que nun yera mui grande pa recortar llibertaes y pa convertinos d’aficionaos a clientes, y pasar al fútbol a que seya un espectáculu casi familiar.

La imaxe perfeuta sería ver a una familia yendo al fútbol, comprando una bufanda, sentándose, viendo’l partíu y diendo pa casa otra vegada.

Miguel Fernandi

Si vos alcordáis d’un anunciu que nun sé si yera de Gol tv y que se veía a un rapacín diciendo, “voi al fútbol tolos fines de selmana con mi padre...” mientres taba poniendo la bufanda en casa y contestaba-y el pa, “non, a partir d'agora vamos quedar en casa y ver tolos partíos pola tele como si tuviéramos nel campu”. O seya, que nun fai falta dir al fútbol porque agora pagues, nun sé lo que val, vente euros al mes y ves tolos partíos. Eso sí, nunos horarios horrorosos polos derechos de televisión, porque antes el fútbol siempre yera los domingos a les cincu, pero agora saber cuando va xugar dientro de dos meses el Sporting o'l que seya, ye imposible.

Porque agora los equipos de fútbol viven de los ingresos publicitarios de les televisiones, poro’l partíu más guapu del añu pónentelu un vienres o un llunes. Agora mesmo ta’l fútbol  secuestrau.

El problema de los derechos televisivos ye de Gol tv, que tien un únicu canal pa ocho partíos que ye los que son de la xornada, polo que va separtándolos. Si hubiera'l sistema qu’había antes de ‘pay per view’ onde comprabes el partíu por diferentes canales, podíen xugase toos a la mesma hora, menos un par de partíos que se movíen, el del sábadu de la dos y el del domingu del canal plus.

Una asistente

Al aficionau, entós, tan poniéndo-ylo mui complicao. Va a haber aficionaos que van dexar de facese socios, porque nun pueden dir al fútbol. Hai que tener una moral pa seguir a un equipu…, inclusu a los grandes.

Miguel Fernandi

Claro, si te ponen al Sporting a les cuatro, al al Barça a les seis y el sábadu a les cincu de la tarde al Madrid y a les doce al Uviéu, tas fastidiau, porque entres en competencia con toos.

David Artime

Ye que l'aficionau, l’aficionau de siempre que diba’l campu, dexó d’interesar. Ye una figura que, a nivel de primera división, nun importa.

Agora mesmu, pa los magnates que controlen el fútbol, como si xueguen a puerta cerrada. La cuestión ye los derechos televisivos.

Como si la final de la Champions se xuega en Veriña, pa ellos tan los once xugadores, l’árbitru, piesllen les puertes y a correr. Lo único que-yos importa son los derechos televisivos.

Por eso hai partíos un domingu a les doce de la mañana o un llunes a les nueve, o un vienres a les ocho. L’últimu derbi vascu que se xugó en San Mamés, xugose de vienres, de vienres, cuando eso ye un acontecimientu históricu en Bilbao.

Una asistente

Falamos d’impunidá de la xente qu’entra a un partíu de fútbol, pero tamién, tela cola impunidá que tienen los equipos a nivel de financiación. Nun solo los patrocinadores, que munches veces da igual quien seya, independientemente que seyan corruptos o non, y de cómo consiguiera les perres, si non tamién, lo de pagar a la seguridá social, si paguen impuestos…

Miguel Fernandi

Nun va cerrar denguna empresa llamada Sociedá Anónima Deportiva na vida. Imaxino qu'esto acabará españando algún día, pero vamos ver, tú debes diez mil millones de pesetes y entres en concursu d'acreedores, y ellí llegues a un alcuerdu colos acreedores y quedes en paga-yos la mitá a venti años, y cuando pasen los venti años y nun lo pagasti, van volver a renegociar, porque tol mundu va querer cobrar al final.

Otra asistente

Pero si l'acreedor ye una empresa y llega a un alcuerdu col concursu, si tien qu'esperar, qu'espere, pero ye que la seguridá social...

Miguel Fernandi

Pero tenemos otru problema colos acreedores. Si hai un acreedor que denuncia l'incumplimientu, entós, automáticamente esa denuncia lleva a la disolución d'esa Sociedá Anónima Deportiva. Pero'l problema que que si, por exemplu, esi acreedor ye un vendedor de torniellos, tola xente que ye forofa d'esi equipu, va dir a estrozar la ferretería.

Y lo de la seguridá social y facienda tamos no mesmo. Qué más da qu'haya embargos, si dempués los clubes tienen manera de recaldar por otru llau. Toos conocemos clubes que tienen embargaes les taquielles, pero cóbrenles d'otra manera.

Dende llueu, ye una absoluta vergoña. Y tamién ye una vergoña lo de les aportaciones de les alministraciones públiques a los equipos de fútbol. Entiendo que los equipos de fútbol son un referente pa les ciudaes, dan una imaxe promocional importante, pero nun puede pasar lo que pasó en Uviéu, que teniendo un delincuente al frente del equipu, qu'agora ta en busca y captura, que ye Alberto González, l'Ayuntamientu d'Uviéu dioi dieciseis millones d'euros, y tando l'equipu en segunda b y tercera, y l'equipu tien un pufu increyible que tuvo que salvalu l'afición poniendo del bolsu, y esi ye otru debate, cómo en quince díes la xente axunta dos millones d'euros, y dempués, faen falta mil euros pa evitar un desahuciu y nun somos quien a facelo. Pero hai una impunidá terrible, pasa a cualquier otra empresa que nun seya de fútbol, porque tamos falando d'empreses, nesti casu sociedaes anónimes deportives, y ya la hubieran obligao a cerrar.

Una asistente

Basta comparar el fútbol con otros deportes o con cualquier otru tipu d'espresión cultural. En otros deportes eso nun pasa. A min puede gustame'l fútbol y puedo animar al Sporting o al Ciares, pero la sensación de que'l fútbol pagámoslu entre toos..., cuando l'Ayuntamientu de Xixón fizo aquel arreglu con Mareo...

Íñigo Arza

L'Ayuntamientu, agora mesmo, tien en propiedá El Molinón y Mareo, que nun sé cuantos millones val eso, pero pal Ayuntamientu val cero, porque nun los puede usar, o puede pero nun los usa. Ye absurdo.

Y el meyor exemplu ye cuando'l Real Madrid fichó por Ronaldo. Esi fichaxe pagámoslu entre toos, Florentino, el presidente del Madrid, pidió un créditu a Caxa Madrid, y llueu Caxa Madrid acabó siendo Bankia y la deuda de Bankia acabamos pagándola toos, o seya qu'a Ronaldo, igual la metá o más acabamos pagándolu tolos ciudadanos, y nun pasó nada.

Un asistente

Cristiano Ronaldo fueron noventa y cuatro millones d'euros. Alcuérdome que cuando'l Madrid fichó a Mijatovic, fueron mil millones de pesetes d'aquella, y aquello ya fue la de dios. O seya, el descontrol ye tan grande porque'l negociu ye mui grande. Y eso a min xenérame rechazu, y eso que fui sociu del Sporting, de la mesma manera que nun ye igual lo del Ciares, o cuando diba a ver al Pravianu de guah.e, ehí ya ves otru ambientín, y sobre too nel fútbol base ye fundamental que los chavales tengan la noción de facer deporte. El deporte ye pasalo bien, saber organizase, aprender tar con otra xente, cumplir unes normes.

Pero tamién ¿por qué hai tanta presión pa que los guah.es xueguen al fútbol?¿por qué toos tienen que ser futbolistes? Claro, ye lo que sal pola tele, neso'l fútbol nun tien la culpa, pero ye asina.

David Artime

Ye que la transcendencia social, la importancia del fútbol ye tan grande que güei, a los xestores políticos nun-yos queda otru remediu que permitir esi control. ¿Quién s’atreve, por exemplu, a cargase al Sporting? Y eso ye lo más escandaloso.

Una asistente

¿Y por qué’l fútbol tien esi poder tan descomanau?¿Por qué la ciudadanía nun ta criticando a diario qu’esa xente nun ta pagando impuestos?¿O, por qué tengo que pagar el fichaxe de Cristiano Ronaldo? Eso ye lo que me paez escandaloso.

David Artime

Al poco de presentar el llibru, La Bufanda, convidáronme a tomar parte de la tertulia del portal sportinguista, y salió’l tema de la recalificación de Mareo, y toos ellí apoyaben que l’Ayuntamientu ficiera aquella operación, toos, y de forma incondicional. “Nun queda otru remediu” dicíen, “nun puedes permitir qu'esapaeza’l Sporting”.

Yo soi Sportinguista y non lo apoyo. Camiento que si tien qu’esapaecer, qu’esapaeza, y si tien que baxar a tercera, como l’Uviéu, que baxe.

Pero la verdá ye qu’ellí nun m’atreví a abrir la boca, quería salir d’ehí con vida, porque había una visceralidá que cualquiera s’atrevía nin a gorgutar.

Un asistente

L’argumentu de que Xixón puede prescindir de cuatro millones d’euros, güei ye difícil de defender, anque hai quien lo faiga, pero vese como lóxico lo de que “pa Xixón, económicamente, ye mui importante”.

David Artime

Nun sé hasta qué puntu ye importante, en primera tovía, pero en segunda, si te pones a contabilizar l’asistencia d'aficionaos y visitantes nuna temporada de segunda en Xixón, ye de risa. Nun xenera práuticamente beneficios, eso ye una milonga.

Lo que pasa ye que tomar midíes polítiques ye impopular. Hai una delda de seiscientos cincuenta y dos millones d’euros con facienda y va a siguir creciendo. Pretenden atayalo poniendo eso de que los equipos con delda nun van poder fichar, pero ya verás como tienen dalguna falcatrúa llegal pa evitalo.

Ehí nun va meter mano nin dios hasta que la burbuya españe por dalgún llau, si españa, qu'a lo meyor nin españa.

Esi sí, si’l Candás o'l Pravianu, o'l Titánicu de Llaviana tuvieren deldes con facienda, dígote yo qu’ehí metíen-yos mano hasta atrás de xuro.

Íñigo Arza

L’escándalu ye lo de la financiación, vamos, como tamos grabando, habrá que dicir ‘presuntamente’, pero hai cada cosa por ehí de blanqueo de dineru. ¿Por qué naide diz “a ver, d'onde sacaste esos cincuenta millones d’euros”?

Hai un casu espectacular, el Zaragoza tien un porteru que se llama Roberto, ficháronlu de Portugal hai un par d’años y non lu conocía naide, pues pagaron diez millones d’euros. ¿Por qué nun entra facienda a investigar esa operación?

Miguel Fernandi

Agora que falamos de financiación, otru casu vien distintu, asturianu, fue’l del Caudal. Nun sé si vos alcordais de les lloteríes familiares, una especie de bingos que se facíen los vienres pela nueche ente los aficionaos pa sacar un pocu de perres, me paez qu’apostaben el cartón a doscientes pesetes, y por eso la direutiva del Caudal tuvo metida nun follón impresionante. Tuvieron que retirar les lloteríes familiares tolos cubes de fútbol asturianu, que yeren una fonte de financiación, y amás yeres los propios socios los que pagaben y xugaben.

Un asistente

Alcuérdome de la época bona del Deportivu, onde yera evidente d'onde salíen les perres, y ellí naide quiso investigar nada. Y de fechu, cuando de metió caña y cayó esa ‘presunta’ fonte de financiación, el Deportivu fue a tomar pol sacu. Eso ye auténtica tolerancia social.

Y cuando a Michel Salgado-y queríen meter nun sé cuantos partíos por rompe-y la pierna a Juninho, hubo más manifestaciones que pa una reconversión qu’hubo en Citroën.

Miguel Fernandi

Home, lo que ye evidente ye que'l fútbol ye l’acontecimientu social que más xente aconceya nuna ciudá. Quitando dalgún macroconciertu, lo más son les entraes a los campos de fútbol. Y eso qu’agora baxó la venta d’entraes.

Íñigo Arza

Sí, sí. Ye que si val catorce mil a ver al Alcorcón, pongo por casu, a una manifestación van mil quinientos.

Pero pa min, eso ye más problema de los medios que del fútbol. Los medios tendríen que poner el focu más en otru sitiu.

Un asistente

Pero date cuenta de que si ves un telediariu, quitando la cuatro, qu’eso ya ye desaxerao, son venti minutos sólo de fútbol. Y amás nun ye información, son too pih.aes con videos y músiques de fondu y efeutos y tal…, y sólo del Barça y el Madrid.

Equí ye bien interesante parase a pensar sol usu de los gobiernos y los poderes interesaos en enterrate la cabeza en fútbol como anestesia social y como válvula d’escape d’otres situaciones. ¿Y qué premeditación hai nello? Porque eso nun ye casual.

Güeyu, y la xente asúmelo y quierlo ¿eh?.

Íñigo Arza

Esi ye otru filón del que falar. Y cola selección española y el mundial y la eurocopa hai otru filón. Vamos, tres competiciones, eurocopa, mundial, eurocopa, en seis años, pues esos seis años ficieron más por normalizar la bandera d’España que cuarenta de transición.

Miguel Fernandi

Tengo la teoría de que la bandera d’España quedó nun equipu de fútbol, el de la selección. “Soi del España”

Un asistente

Igual que la bandera d’Asturies ye la de Fernando Alonso.

Una asistente

Ye curioso, porque cuando España ganó'l mundial, acabose la crisis, acabose too. Yéramos lo máximo.

Miguel Fernandi

Pero los ciclos acábense. Y cuando la selección española torne a ser lo que fue siempre, una selección que nun ganaba nada, la xente volverá a renegar de ella, d’España y de lo que faiga falta.

Y como ya va siendo la hora, quiero comentar, como “últimes reflexones”, que cuando se diz que te gusta'l fútbol, en realidá lo que ye ye qu'a la xente-y gusta un equipu. Yo mañana toi en casa y tengo la tarifa esa que veo tolos partíos, y xuega, nun sé, el Llevante contra l’Almería y nun lo veo. Al final, si nun xuega'l Marino, o l’Uviéu o’l Sporting u otros por cercanía nun me pongo.

Y el conceutu de futboleru, pa min ye que tengas amor por unos colores, pol equipu del to pueblu o por otru representativu, porque nel fútbol la monogamia nun esiste. La monogamia ye lo que tienes que tener una moza na más ¿non?, bobo, pues nel fútbol puedes tener dos, l’equipu del conceyu y otru, y algún más pol que puedes tener simpatíes.

Y asina ye pa la mayoría de la xente, y el modelu esi que tanto faen les plataformes televisives de poner diez horarios porque la xente quier ver tolos partíos ye mentira, eso camiento que ta acabando col fútbol. Y nun ye porque trabaye nuna emisora de radio, pero yera muncho más guapo lo del perfil d’aficionau cuando coincidíen varios partíos a la vez, porque facía que siguieres al tuyu, pero tando pendiente de los demás.

Asina tamos diendo a acabar rechazando’l fútbol, inclusu los propios aficionaos a los que nos gusten determinaos equipos.

Íñigo Arza

Yo p’acabar quiero ser un pocu positivu y comentar que, últimamente ta habiendo iniciatives bastante guapes. Nel Sporting, pa democratizar el club, nel Uviéu, nel Ciares, col so proyeutu bien interesante, nel Llangreu tamién tan faciendo por movese. Ta cambiando un pocu l’asuntu.

Llueu amás tan cambiando, anantes daben barra llibre coles deldes públiques, igual que l’estau, y agora non pueden, home, porque necesiten esi dineru, non por ideales. Entós esta crisis igual favorez qu’haya un seguimientu d’esi dineru, y se sepa d'onde vien, y se cobren impuestos y funcione como cualquier otra actividá económica.

David Artime

Pela mio parte soi bastante más pesimista. Paezme que ya acabaron col fútbol, que ya se perdió’l conceutu de fútbol popular qu’había, y cuando tenga fíos, voi facer tolo posible porque nun-yos guste.

A pesar que qu’hai iniciatives mui positives, como comenta Íñigo, creo que van seguir siendo minoritaries, básicamente porque toos vosotros vos relacionais con aficionaos al fútbol y seguramente nun percibís el más mínimu atisbu de concienciación con respeutu a esti tema. La xente ta encantada cola situación actual y camiento qu’eso va siguir ‘in crescendo’.

Creo qu’España, a nivel futbolísticu, ye un país tercermundista, nel sentíu de que tienen la meyor lliga del mundu pero acaparada exclusivamente por dos equipos, el Madrid y el Barça, esa ye una situación que pasa en paises como Escocia, -Celtic, Rangers-, como Croacia, -Dinamo de Zagreb, Hajduk Split-, como Serbia, -Partizán, Estrella Roxa-.

Eso nun pasa ya nin en Arxentina, nin en Arxentina, nin en Brasil, nin en Alemaña, nin en Francia, nin en Italia, nin en Inglaterra, paises onde hai tradicción futbolística.

Nun sé a onde va conducir esto, nin si va españar algún día, nin si van a acabar creando una lliga simplemente Barça-Madrid, o la gran lliga europea, onde xugarán sólo’l Barça, el Madrid, el Milán, el Bayern y el Mánchester.

Tertulia: Fracking. Rompiendo Asturies dende dientro

Resumen de la tertulia del 18 d’avientu de 2012

Fracking.

Rompiendo Asturies dende dientro

Na que participaron

· Paco Ramos

Ecoloxistes n’Aición d’Asturies

· Félix Méjica

Plataforma Asturiana Anti-Fracking

Presentó Tino Fernández

Tino Fernández

Vamos a entamar cola Tertulia Pachín de Melás, como novedá, anque ya lo ficimos alguna vez más, sacámosla de Xixón y güei vinimos a Siero onde hai munchu interés en falar del fracking.

Tenemos dos invitaos que son Paco Ramos, d’Ecoloxistes n’Aición, y Félix Méjica, de la Plataforma Anti-Fracking, y bono, yo soi Tino Fernandez, portavoz de la estaya de Sostenibilidá de Compromisu por Asturies.

Y ya sabéis qu'en principiu falarán los ponentes del tema y como ye una tertulia abierta dafechu, cualquiera puede participar, cualquiera puede entrugar y cualquiera puede esponer la so opinión.

Paco, como esto ye daqué más novedoso qu’otres veces, si quies entamar faciendo una pequeña introducción, porque si faláramos de llinies d’alta tensión, más o menos toos sabríamos de qué van, pero esto del fracking ye una menacia al mediu ambiente qu’aportó más recientemente equí a Asturies.

Paco Ramos

Hola, bones tardes a toes y a toos, esto ye una tertulia, asina que nun voi enrollame como nuna charla. Prodríamos entamar diciendo qu’hai como tres partes diferentes.

Una parte ye la xeneral ya ideolóxica, que va ser la qu’introduciré primero, la segunda parte ye’l tema teunolóxicu, describir como ye’l métodu, qu’equí tien menos interés y meyor lo dexo y sólo respuendo a lo que m’entrugueis, y la última parte son les lluches sociales qu’hai por tol Estáu y por toa Europa y por tol Mundu con esti asuntu y eso meyor ya-y lo paso a Félix pa que vos lo cuente.

El fracking, el frayamientu hidráulicu o la resquiebra hidráulica, pa que nos entendamos, en realidá, pa la xente que llevamos ya munchu tiempu trabayando cola enerxía, tampoco ye una novedá ideolóxica, forma parte de la mesma dinámica. Tenemos una sociedá que ye enerxo-adicta, una adicción que nun tien llímites, sobre tou en cuantu a la dependencia de los hidrocarburos, y eso'l suministrador sábelo ya fai tolo posible por convencenos de que nun nos van faltar más dosis por muncho que-y pidamos.

Y nun momentu en que cada vez ye más difícil dir a suministros de combustibles fósiles fáciles, porque vamos acabándolos, pasa como cola pesca, hai que dir pescar cada vez más lloñe, más fondo y con barcos más grandes, pues equí igual. Lo que se trata agora ye de dai un avance a les fontes de combustibles fósiles, que son menos rentables porque tan más fondes, porque son más pequeñes, porque son menos productives, porque la roca ye menos porosa o porque ye menos permeable. Pero detrás ta la mesma ideoloxía, esprimir el planeta hasta la última gota de combustible siempre que’l balance entre lo que cuesta y lo que cobren por ello seya rentable. Cuando falamos de combustibles non-convencionales, la convencionalidá dala la teunoloxía y el preciu, pero'l fondu ye exactamente’l mesmu.

Nos últimos años hubo un avance teunolóxicu na perforación horizontal, ya puedes manexar la cabeza de perforación con un joy-stick como quieras, baxes lo que te da la gana y llueu tuerces siguiendo la formación de roca por onde te de la gana. Y llueu ta lo del frayamientu hidráulicu que ya lo contaremos con más detalle.

La clave ye qu’esi combustible, qu’en principiu yera marxinal, agora por razones de preciu y d’abaratamientu de la producción ta faciéndose más convencional y ta esplotándose ya dende hai tiempu nos Estaos Xuníos, ellí ta agotándose ya'l negociu y necesiten más dineru pa cubrir los gastos polo que dan el saltu al esterior, van dir a Europa si pueden, tan faciéndolo en Sudáfrica, y tan intentándolo tamién en Asia y en Sudamérica.

Pal casu concretu d’Asturies hai ya tiempu que bien sabiéndose qu’esto taba enriba la mesa, anque de manera indireuta, porque cuando de fala de buscar gas con frayamientu hidráulicu, en dengún sitiu del proyeutu se diz que va ser con frayamientu hidráulicu, de fechu nin siquier dicen que va ser gas nin petróleu, son solicitudes xenériques pa que la competencia sepa qu'otra empresa tien derechu sobre esi sitiu onde se va esplotar, pero nun entren al detalle de lo que van facer, pero nosotros sabemos qu'en delles condiciones eso sería indispensable.

Como sabéis en Asturies, hai unos años, hubo una apuesta que tien que ver coles campañes d’Hunosa pola diversificación, col tema de la captura de carbonu que va lligao cola gueta de metanu nes vetes de carbón y eso, entre otres coses ye fracking, porque’ l frayamientu hidráulicu puede ser en capes de roca madre como en pizarra, pero tamién puede ser en vetes de carbón, ye tolo mesmo, utiliza la mesma teunoloxía con pequeñes diferencies.

D’esos permisos había ún en Campumanes, otru en Lieres, otru en Mieres, otru en Morcín, otru en Granda, en Xixón, y en Villaviciosa. Los primeros fueron abandonaos toos porque nun-y víen viabilidá, abandonose Mieres, Campumanes y Llaviana, y quedaben el de Villaviciosa, que tamién fracasó, pero la empresa, en vez d’abandonar como les otres, pidió un cambiu de proyectu y un permisu pa facer una prueba pa ver si seguia o abandonaba, que ye’l famosu pozu de Viñón.  L’otru, el de Xixón, ta en fase inicial, y el siguiente sería’l de Morcín, nel que nun sabemos mui bien qué tan faciendo, habrá que buscar documentación porque tola investigación ta faciéndola Hunosa dientro’l pozu Monsacru, ye dicir, dientro’l pozu Monsacru va viendo si hai metanu nel fondu la mina, si hai metanu nes galeríes abandonaes, si hai metanu nes vetes de carbón o si hai metanu absorvíu nel propiu mineral, pero nun sabemos si tuvieron faciendo fracking o non.

Y agora esto ta estendiéndose por tola península ibérica y, anque tan abandonándose munchos proyeutos, tan presentándose otros nuevos al mesmu tiempu, como son los dos que cubren la zona de Villaviciosa y Ribesella.

Y nesa dinámica tamos, claro, ellos nun nos dicen que lo que quieren ye ganar dineru, si non que dicen que ye pol nuestru bien, que vamos tener combustible bono y barato y qu'además ye autóctonu, y que, como además el gas ye llimpiu, ayudaranos a lluchar contra’l cambiu climáticu.

Y estes coses, que son apoyaes, nun solo pol propiu seutor industrial, si non que ta tamién en dellos documentos sindicales, por exemplu, lleva unes contrapartíes ambientales que son bien conocíes, porque aprendemos del mal d’otros, como son les pésimes esperiencies de  los Estaos Xuníos y que foron p’alantre precisamente porque tola llexislación ambiental que se fizo, ya dende la época de Nixon, fue derogada pal gas de frayamientu hidráulicu pol vicepresidente Cheney, coles perres de Halliburton [corporación petrolera] que-y pagó la campaña eleutoral en época de Bush.

Y p’acabar esta introducción comentar que les plataformes en contra d’esto entamaron en Cantabria según diben avanzando los proyeutos y tamién en Vitoria-Gasteiz, porque ellí ya hubo prospecciones petrolíferes y tratábase d’activar un pozu esistentes, y a partir d’ehí fueron creándose más plataformes por casi tol estáu.

La primera xunta estatal fue en Burgos el día 15, y equí tamién surdió en Cabranes, Villaviciosa, y con xente d’otros sitios, la Plataforma d’Asturies, onde tan fundamentalmente esplicando’l problema a la xente afectada y a los políticos de los ayuntamientos y municipios pa que s’enteren de lo qu’hai, porque la mayoría desconocíalo dafechu.

Félix Méjica

Pola mio parte nun tengo muncho más que contar, nosotros equí tábamos un poco ‘peces’, conocíamos la esperiencia d’otres zones, pero en cuantes que vimos qu’había un proyeutu en Villaviciosa, cerca de Cabranes y qu’afeuta a la principal arteria de comunicación nuestra y ta nuna zona de munchu interés, tanto cultural como paisaxísticu, pues movilizámonos. Aprovechamos la esperiencia que teníamos d'hai catorce años d’una cantera que queríen poner elli mui cerca tamién, subiendo pa Santa Olaya, y aprovechamos l’asociación que teniamos fecho contra les canteres y cambiamos los estatutos y delles otres coses, y entamamos a furrular con esa mesma asociación. Y amás, movímonos tamién con otres asociaciones, de turismu rural, d’artesanos y otra xente más qu’aconceyamos.

Invitamos a Paco, que sabíamos que taba metíu nel tema, a danos la primer charla. Nesa mesma charla vino xente de Villaviciosa, de l’Asociación de Vecinos, de Cubera, que son les que mueven más xente, tamién los Amigos del Paisaxe… y ellí nació l‘embrión de la Plataforma, qu'al principiu yera una asambleya abierta y creo que fue’l cincu de payares, cuando se formó la Plataforma Asturiana y  la ficimos un pocu más amplia, con xente de Xixón, de les Cuenques, inclusu de Candás y otres zones.

Y asina tamos funcionando, con xente de varios conceyos, anque tovía seya poca, pero que va buscando implicaciones nel asociacionismu de les zones, y vamos falando tamién colos ayuntamientos pa que vayan saliendo mociones en contra del fracking.

El vienres tuvimos la tercer xunta de la Plataforma, que la ficimos en Nava, precisamente porque ye tamién zona afeutada por esti proyeutu, va llegar hasta Nava y Sariegu, y tuvimos d’invitau al alcalde de Nava, y presentose la moción. Güei dixéronnos que salió aprobada por mayoría absoluta.

Equí en La Pola tamién se presentó y tamién salió aprobada y asina vamos, pocu a pocu, implicando a los ayuntamientos y a los políticos. Esi ye’l trabayu que tenemos agora mesmo na Plataforma amás de coordinanos coles otres plataformes qu’hai montaes a nivel del Estáu.

Tino Fernández

Bono, si cualquiera quier falar, nun tien más que facelo. Si me permitís, voi facer yo una preguntina antes.

Hasta agora paez que los defensores del fracking tan esapaecíos, nun se topa fácilmente información de les empreses que tan a favor d’esto, en sin embargo, camiento que yera bono esplicar a la xente cual ye’l riesgu mediuambiental que trai ésto. Paez que lo único que se ruxe ye lo de ‘fractura hidráulica’, que suena a que se mete agua y va salir gas. ¿Por qué ye eso peligroso?¿Cual ye’l riesgu de meter agua y sacar gas?¿Por qué ye malo eso?

Paco Ramos

Nel dípticu que vos pasé cuentase un puquiñín la cuestión.

Convien saber qu'en estracción de gas y de petróleu, siempre s’intenta sacalo como se pueda, la historia de la estracción de gas y de petróleu podemos siguila nel cine, al principiu'l petróleu salía solu, y víamoslo nes películes de James Dean, James Dean facía un furacu y salía ellí’l petróleu solu.

Cuando esi ya salió, llueu hai que sacar el que nun sal solu, y entós bombease, y ye cuando vemos ya a los caballinos de metal, que tan consumiendo combustible pa bombear y sacar más combustible, nel primer petróleu nun gastábamos casi nada nello, l’unu por cientu, nel segundu ya yera’l tres por cientu. Y dempués, cuando’l petróleu entama a nun salir, complícase. Cuando nun tien presión, nun hai problema, metemos agua, aumentamos la presión, y sal el petróleu pol otru llau, como una xeringa. Cuando nun tenemos agua pero al llau hai depósitos de dióxidu de carbonu natural, como pasa en dellos llugares, pues sácase’l CO₂ d’un sitiu y métese onde ta’l petróleu y púxase, y sal tamién pol otru llau. Ye dicir, vamos siempre buscando que la producción y la máquina nun pare.

Baxo tierra nun hai furacos con petróleu, o seya, depósitos de gas, petróleu y agua, nun existen, nin tampocu hai ríos subterraneos nin nada de nada. Baxo tierra lo qu'hai ye roca más o menos porosa, como piedra arenisca o piedra caliza y polos poros puede haber agua y gas. Entós, si la roca ye mui porosa y tien forma de cúpula, y por arriba tien una arciella que nun dexa que salga l’agua y el gas, si pinches arriba, el gas sal pol furaquín. Pero hai sitios onde la roca ta tan compacta que’l gas nun se mueve, y amás ta tan horizontal que nun hai quien la saque d’ehí por muncho que fagas furaquinos verticales. Entós de lo que se trata ye de dir en vertical a onde ta la capa esa, perfóresla y llueu xires en horizontal. Asina toques muncha más roca y muncho más gas. Pero imaxina-vos como tamos, baxamos unu o dos kilómetros y llueu fuimos en horizontal unu o dos kilómetros. Lo siguiente que tenemos que facer ye que’l gas salga, pa eso métese una baniella de metal llarga enllena de cargues esplosives que llueu dispárase lléctricamente faciendo un chorru de fueu que perfora’l propiu pozu y la roca que ta alredor. Lo siguiente ye facer qu’eso seya más grande, y pa eso métese un chorru d’agua a presión de forma qu’entre polos furacos y vaya a la roca. Pensai que si tamos a tres mil metros de profundidá, la presión ye de trescientes veces l´atmosférica, polo tanto esi agua va a cuatrocientes o quinientes atmósferes de presión más, entós eso va abriendo les grietes, a agora lo qu'hai que procurar ye que nun se cierren, pa que nun se cierren, nel agua metemos un cincu por cientu d'arena, entós eso llénase too d’arena hasta el final, l’arena va entrando poles grietes, y cuando la roca intenta cerrase, nun puede, pero l’arena sí que dexa pasar el gas.

Y pa que too eso funcione, el pozu nun s’estropee, l’arena corra, l’arciella nun se colapse, etc., añádense los productos químicos que más convengan, munchos son marques comerciales que nun sabíemos nin lo que yeren, pero, anque ellos nun lo digan, hai llaboratorios independientes que se dedicaron a estudialo y hai vos traigo una fueya con una llista de productos tóxicos que se metes por ehí baxu [pinchar na tabla].

Direis vosotros, “pero, claro, son tóxicos, pero en mui poca proporción”, nun pozu normal pueden tar utilizándose venti millones de llitros d’agua, que tampoco son munchos, son venti mil metros cúbicos, pero, por poco que s'eche al tantu por cientu, tenemos un montón de kilos de productos tóxicos que se meten ehí, y que llueu retornen col agua y col gas.

¿Cuantu llíquidu retorna? Entre’l quince y l'ochenta y cincu por cientu, o seya, o casi nada, o casi too.

Si nun sal casi nada, pues ehí tenemos casi venti millones de llitros cargaos de productos tóxicos que se van pol subsuelu por onde puedan.

Y si retornen pa fuera entós hai qu’echalos en algún sitiu, polo qu'al llau de la esplotación tendremos una balsa enllena de llíquidu tóxicu que normalmente se ventila pa evaporalu.

Colo qu'hai un problema de contaminación del agua superficial y otru del agua subterránea.

Pero hai munchos otros más. Evidentemente esos cambios de presión producen movimientos sísmicos que, si hai dalguna falla cerca pueden dar llugar a movimientos sísmicos de superficie.

Otra cosa ye qu’estos pozos son mui poco productivos y pa enriba tienen un problema, en cuantes qu’entames a facer la perforación, el frayamientu y la inducción, sal en gas mui rápidu, pero igual de rápidu decai, y al añu igual baxó la producción al setenta y cincu por cientu, polo qu’entós hai que facer munchos pozos, nun val facer un pozu na cúpula de la producción y que salga tol gas, si non qu'en cuantes empieza a baxar la producción, otru pozu, y cuando baxa otra vegada, otru pozu nuevu. Falamos de decenes, cientos y miles de pozos hasta ocupar un montón de superficie. Y claro, esos pozos, amás, tienen que tener accesu, hai que face-yos pistes o carreteres pa caún d’ellos, y llevar camiones col agua, camiones cola arena, camiones colos productos químicos, camiones col mezclador, camiones col compresor, primero col perforador y dempués colos tapones y llueu al siguiente pozu y al otru y al otru. Falamos de miles de camiones por caúna de les esplotaciones, colo que tas convirtiendo esa zona, más o menos rural, nuna actividá industrial, con tolos problemes  de contaminación lligaos a la mesma. A parte de los propios del gas, porque evapórense col gas productos qu’ellos nun quieren.

Colo cual tenemos, contaminación del aire y contaminación del suelu, contaminación por ruiu y pol movimientu de vehículos, efeutos sol subsuelu, movimientos sísmicos.

Y  tamién, toa esa agua que metimos a tres mil metros de fondu combínase químicamente con tolo que puede haber nel subsuelu, por exemplu na zona de Villaviciosa ye conoció d’investigaciones qu’hai un altu nivel d’uraniu, por tanto, si movilices l’uraniu, ésti tornará col agua, o tamién el radón, que ye un gas que suel tar apareyáu, si lu sacamos, va dir pa les cases.

Tou esti tipu de cuestiones tan ehí, na lletra pequeña.

Y la otra ufierta ye tamién falsa. La ufierta de qu'esti gas va lliberanos de los problemes del cambiu climáticu porque ye menos emisor de gases d’efeutu invernaderu ye básicamente un cuentu. Europa nun va tar llibre d’importar cantidaes masives de gas natural por muncho qu’afuraquemos por toa Europa. Como muncho, podemos consiguir al cabu los años un díxitu, o seya, disminuir la dependencia nun dos o un tres o un cuatru por cientu, pero vamos siguir dependiendo de los combustibles fósiles mientres nun cambiemos a otru tipu de modelu enerxéticu, lo que ye la base de la discusión a la cual, evidentemente, nun quieren dir a parar. Ellos prefieren falar de la ufierta, y nunca discutir soles necesidaes y la demanda.

Un asistente

Por facer d’abogáu del diablu ¿toos estos prexuicios sedríen menores si’l fracking fuere nes mines?

Paco Ramos

Una cosa nun tien nada que ver cola otra. La estracción de gas nun tien nada que ver cola minería, son dos teunoloxíes diferentes dafechu.

Equí búscase gas y petróleu porque se sabe qu’hai, pol xurásicu y el cretácicu, y fízose na plataforma continental. En Asturies tase a la gueta de gas y petróleu dende 1906, inclusu en vetes de carbón. A Patac y a Felgueroso ya-yos quemó'l mecheru de Caldones por buscar gas metanu en vetes de carbón. Pero eso nun tien nada que ver cola minería, si non que na mesma formación, en vez de sacar el carbón, saques el grisú, que ye’l metanu de la minería.

Lo que ye interesante ye ver a qué tamos a favor y a qué tamos en contra si vos dixera que la minería de carbón ye fracking. ¿Acasu nun baxamos n’horizontal y llueu en vertical y ponemos esplosivos y el metanu sal a la superficie y prodúcense movimientos sísmicos, y xenera contaminación afuera y llueu quemamos el combustible?¿Y nun se consumen tamién cantidaes inxentes d’agua?

Ye otra forma diferente de facer frayamientu, hidráulicu y non hidráulicu.

Esti ye un tema interesante de discusión. Lo que sí ye verdá ye qu’hai un saltu cualitativu ente la esplotación de gas natural, digamos convencional, a esti tipu de teunoloxía, precisamente pola so baxa productividá y pola cantidá de problemes asociaos bien diferentes a una esplotación de gas natural convencional.

Una asistente

Tengo un par de preguntes, ¿l’agua que s’utiliza pal carbón tamién tien productos tóxicos?

Y la otra ye que sí, Siero paez que ta afeutáu, pero paez qu’en Mieres paez qu’abandonaron el proyeutu inicial, ¿non?

Paco Ramos

Non, na minería del carbón nun s’empleguen tóxicos. Na minería, orixinariamente y fundamentalmente utilízase la mayor parte del agua pa los llavaderos de carbón. Anantes emplegábase pa ello cantidaes inxentes, pero agora va por circuitu cerrau ya evítase tamién el polvu. Ye diferente.

Y respeutu a la otra entruga, los permisos d’esplotación son mui grandes, abarquen miles d’hectaries, polo que’l permisu de Villaviciosa ye mui probable que toque varios conceyos, tolos d’alredor, eso sólo’l conceyu de Villaviciosa.

De fechu too esto tien un procesu alministrativu y tamos interviniendo nél de la meyor manera que podemos. Pa que vos fagais una idega, estos trámites nun tienen nada que ver nin colo ambiental nin cola xente. Tan sólo orientaos a ‘pulir’ la competencia y a coyer el meyor postor.

Nel de Villaviciosa, por exemplu, si-y dan ochenta mil hectaries a una empresa figurante de Gas Natural Fenosa, cenciellamente publícase nel BOPA por si hai dalguna otra empresa, Hunosa, por exemplu, o quien fuera que dixera “non, non, yo tengo derechos de permisos previos equí y ella nun puede entrar”, o bien, “mira, ofrézcome a facer yo’l proyeutu, y en vez de pagate a tanto la hectárea pol primer añu, págote más”.

Y nesti puntu, tol que se sienta perxudicau, puede reclamar. Bien, pues nosotros sentímonos perxudicaos y reclamamos. Y facémoslo sobre too p’adelantanos al poder, al poder que tienen dos lleis, la llei de mines y la llei d’hidrocarburos, son lleis del añu setenta y nueve, anque tan modificaes, de cuando la gran crisis enerxética, onde, evidentemente, los estaos lo que dicíen yera “si atopes petróleu, sácalu”, en sin que nada si naide s’oponga.

Entós, pa prevenir eso y poder esixir que fagan estudios d’impactu ambiental y etcétera, ye polo que tamos movilizándonos dende’l principiu. Pa que llueu nun tengan derechos alquiríos y colos mesmos medios que tienen ellos.

Estos pozos son tan poco productivos que nin con venti, trenta o cuarenta pozos, funcionando un detrás d’otru en tres años, llegaríen a producir los quinientos mil metros cúbicos de gas diariu qu’esixe la llei pa facer estudiu d’impactu ambiental, porque d’aquella, les lleis de mediu ambiente nun taben preparaes pa toa esta historia.

El parllamentu europeu tien un informe onde diz que casi dengún tema ambiental rellacionau con esta teunoloxía ta contemplau, y debería facese.

Una asistente

Bono, ya varios países d’Europa lo prohiben espresamente ¿non?

Paco Ramos

En Europa hai dos modelos claramente diferentes, ún sigue’l modelu francés, anque nun por Francia, si non pola xente d’ellí, miles de persones del sudeste francés, que, por ciertu, tienen petróleu ellí y por eso nun hubo nunca conflictu social, pero por esto echáronse a la cai diciendo que por esti impactu teunolóxicu nun pasaben. Y a partir d’esa movilización el parllamentu francés aprobó una llei impidiendo’l frayamientu hidráulicu, inclusu pa los proyeutos que ya taben en marcha.

Pero ellí tamién tuvieron el mesmu problema que nosotros, porque taben el ministru d’industria y la ministra de mediu ambiente sentaos na mesma mesa y diciendo que nun se puede prohibir buscar gas y petróleu porque les lleis vixentes permitenlo, pero llueu dicen qu’esa teunoloxía nun van permitila pa la so esplotación.

A lo que dellos tienen mieu ye qu’eso nun seya definitivo y que seya una forma de desmovilizar, lo que ye posible, pero bono, meyor eso que nada.

Pero n’Alemaña hai tres díes el parllamentu aprobó, col votu de la CDU, los d’Anxela Merkel, que sí, qu’aceuten el frayamientu hidráulicu, y na Gran Bretaña, que lo teníen paralizao por problemes de movimientos sísmicos, tornaron a activalo.

Y tamién ta Polonia, que ye’l país que más apuesta por esta teunoloxía por tres razones fundamentales, primero, porque ya tien gas que tan esplotando, asina que sería, cenciellamente, avanzar na teunoloxía dientro les esplotaciones, segundo, porque ellí la pallabra dependencia del gas rusu-Putin ye una llave qu’abre práuticamente cualquier cosa, y la tercera, la corrupción, tolos que dirixíen el departamentu de mediu ambiente y xeoloxía que yeren los que xestionaben estos permisos, tan nestos momentos en prisión, porque vendieron, entregaron, regalaron esos permisos a les empreses d’esplotación del gas, y agora retomáronlo dende’l principiu otra vegada.

Un asistente

Ya que faes referencia a les alministraciones, equí ¿Quién sería´l responsable de dar esos permisos?¿L’alministración central?¿L’autonomía podría paralo?¿Los ayuntamientos pueden facer daqué?

Paco Ramos

Eso ye una cuestión bien interesante, y les propies empreses del gas tienenlo calao.

Nos Estaos Xuníos, que ye onde más medra esto, el propietariu del suelu ye’l propietariu del subsuelu, y polo tanto ellí ponen munchu dineru enriba la mesa pa dir comprando a los campesinos, a los propietarios de les tierres los derechos pa pasar pol subsuelu.

Pero en España ye diferente, equí les empreses van poniendo tamién dineru vía ayuntamientos, vía proyeutos… porque si non la xente nun va pasar por esa historia, porque ellos nun van cobrar un duru por muncho que tengan finques por enriba.

¿Y quien lo tramita? Si'l permisu ta dientro una comunidá autónoma, ye la conseyería d’industria d’esa comunidá autónoma. Si'l permisu pilla a más d’una comunidá autónoma, como'l que pilla a Burgos y Cantabria, los permisos son estatales.

Los dos últimos permisos que cincaben a Asturies, como pillen parte de la costa, o seya, de la plataforma continental, tramítalos direutamente’l ministeriu d’industria. Pero eso nun quier dicir que vayan a facer nada nel mar, hai compañíes que se tienen metío un metru nel mar sólo pa llibrase de la comunidá autónoma, y otres que se metieron un metru dientro d’otra comunidá autónoma pa llibrase de les comunidaes autónomes. Ye una estratexa.

Y la contraria tamién se da. Hai permisos partíos en dos, por exemplu, un rectángulu partíu pol mediu de forma irregular pa tramitalo ente les comunidaes en sin qu’intervenga l’estáu. Depende de cómo-yos vaya meyor.

Un asistente

¿Y los Ayuntamientos tienen alguna capacidá pa entrar neso?

Paco Ramos

Los ayuntamientos, cola nueva llei de prevención y control integrau de contaminación, sólo pueden intervenir previamente pa dicir si´l suelu ye aptu o nun ye aptu pala esplotación, pero dempués que ya ta too tramitao, l’ayuntamientu ya nun puede alegar por razones ambientales.

¿Pero qué ye lo que tamos viendo? Que nun ye igual qu’un ayuntamientu te a favor qu'a la contra, por mui poca que seya la capacidá que tenga.

L’Ayuntamientu de Vitoria-Gasteiz, que coincidió cuando Vitoria-Gasteiz yera ciudá verde europea, opúnxose de frente y paró los proyeutos, que por ciertu yeren los que más avanzaos taben. Vitoria-Gasteiz dixo simplemente, “nesti llugar nun se cumplen les condiciones, y por tanto nun voi dar la llicencia municipal”, güeyu, siempre tienen que ser denegaciones razonaes, nun val dicir “non, porque equí nun quiero”.

Y otros que tan poniéndose en contra nestos casos son les confederaciones hidrográfiques. Tan reconociendo que tolo que tien que ver col usu y vertíu del agua tien que tener un permisu.

Como sabéis, nel permisu de Viñón, una de les baces fuertes que tenemos ye que la Condeferación Hidrográfica del Cantábricu dixo que non, que nun se puede facer un sondeu a la oriella d’esi ríu.

Una asistente

Por ciertu, güei esti tema falábase nel congresu. La Chunta Aragonesista plantegó esto porque tamién tan en Aragón.

Paco Ramos

Sí, plantegolo, pero yera un documentu consensuau ente tola izquierda plural.

Estes coses nosotros plantegamos qu’había que faceles en toles partes, nos ayuntamientos, nel Principáu...

Nosotros ya hai tiempu que-yos mandamos una carta a los ventricuatru conceyos que naquel momentu taben afeutaos, tamién al gobiernu del Principáu, de cuando taba Cascos, y agora reiterarémoslo. Queremos que se pronuncien. Hasta agora en Asturies, nun sabemos si tan a favor o en contra. Sabrémoslo si conceden o anulen el permisu de Viñón.

Tino Fernández

Una cosa de les que menos se faló del fracking ye lo de los componentes químicos que s’utilicen pa disolver les roques. Hai estudios sobre la contaminación acuífera por fracking, sobre too nos Estaos Xuníos.

Sábese, por exemplu, utilicen cianuru como disolvente de les roques.

¿Puedes comentanos daqué sobre esti fechu?

Paco Ramos

Vamos ver, la mayor parte de los axentes químicos que s’usen nun son tanto pa disolver les roques, si non más bien pa meyorar los procesos, pa meyorar los mecanismos, protexer l’aceru, faer d’anticorrosivos, pa que fluya meyor l’arena ya un montón de coses más. Tengo equí una llista [pinchar nes imáxenes]del propiu informe de la Xunión Europea, pero nun soi a decivoslos, deben ser tan malos los productos que son impronunciables.

La doctora Theo Colborn, qu’escribió “Nuestru futuru robáu”, lleva un montón d’años trabayando de contaminación química por alteradores endocrinos, eso que llamen mal traducido disruptores, y gracies a ella ya tenemos disponible una fueya excel con seiscientos productos emplegaos nel frayamientu hidráulicu cola so clasificación, en qué parte intervien caun, los sos daños a llargu, la so persistencia, etcétera, o seya que la contaminación química y los efeutos sobre los acuíferos y sobre la salú de caun d’esos productos ya la conocemos bien. Otra cosa ye que nun sepamos nun pozu concretu qué productos concretos van a utilizar, pero la llista d’amenaces ye bien conocía.


Y otra cuestión ye si se tien probao qu’hai daños. Como dixe, onde más estudiao ta ye nos Estaos Xuníos, y ellí toles lleis de protección del agua, del agua potable, de la calidá del aire, d’análisis de riesgos, etcétera, foron derogaes pal frayamientu hidráulicu, y amás elliminose’l control federal, ye dicir, elliminose a l’axencia de mediu ambiente, polo que quedó too en manes de los estaos, asina que quien fai estos estudios d’epidemioloxía y control ambiental y demás coses ta fuera, pero agora va metese y comprométese a facer un informe.

Ya tenemos el primeru que ye l’informe Pavillion, [Investigation of Ground Water Contamination near Pavillion, Wyoming], en Pensilvania, onde se dieron contaminaciones de pozos. Esi informe ta publicau y toos podemos lleeu, y onde se demostró contaminación química por varios productos y sobre too contaminación por gas metanu de les propies esplotaciones. Lo que ficieron fue tomar muestres de tolos pozos d’agua, porque equí tamos
avezaos al agua canalizada, tol mundu tien agua de la traída, pero ellí non, ellí caún tien el so propiu pozu, colo que les contaminaciones son mui individualizaes. Cuando llega una contaminación a una finca lo que fai la empresa ye, primero negalo y dempués pagar pol silenciu y el compromisu de nun contalo. Pero con esti estudiu ya se sabe quien ta contaminau por químicos y por metanu, anque la empresa diz que ye gas metanu natural, de les bacteries que lu xeneren el suelu, el siguiente pasu ye retrucar a eso, separar claramente por isótopos cual gas ye metanu natural, metaxénicu, de bacteries, y cual gas ye termoxénicu y lleva ehí munchu tiempu, y demostrose que tol gas ye termoxénicu, y la contaminación por gas metanu que se ve que sal pol grifu ye producía por ellos, y amás col nome y apellíos de la empresa que ta trabayando ehí, que ye la que los contaminó.

Y tamién tenemos ya epidemioloxía en calidá del aire. Cual ye l’índice d’enfermedaes relacionaes, pulmonares, cáncer…, colos que tan mas cerca de los pocos, colos que tan más lloñe…

Hai un añu había poca información d’esto, pero agora hai bastante. De fechu, nel parlamentu europeu intentose aprobar la prohibición equí del frayamientu hidráulicu, anque la política enerxética ye decisión de cada país, pero asina y too, más de doscientos eurodiputaos votaron a favor de la prohibición, anque’l votu mayoritariu de la derecha europea fizo que nun s’aprobara.

Pero sí que s’aprobó'l documentu de mediu ambiente y salú onde se recueyen toos estos problemes, al mesmu tiempu que, separtadamente, relaxóse muncho toa esta propaganda a favor del gas y de la independencia enerxética.

Un asistente

Camiento qu’esta información, la denuncia  y la llucha ye necesaria, pero nun ye suficiente, ye’l modelu de sociedá en que vivimos, con una producción mui agresiva pa col mediu ambiente, con un materialismu bestial… y nun ye solo’l tema del gas y d’otros recursos, el cobre, l’aluminiu… cada día tenemos más evidencies de que’l planeta ta agotándose. Y tenemos qu’entamar a cuestionar el modelu de sociedá.

Y, por exemplu, tamos en La Pola y, agora mesmu tenemos el debate de la zona azul p’aparcar los coches, y había qu’aprovechar esa coyuntura pa ver cómo reducir el coche. Y, al traviés del aforru enerxéticu llegar a un modelu de producción y consumu que seya sostenible, que seya habitable, que seya vivible y llegar a plantegar realmente otru estilu de vida onde haiga bicicletes, onde haiga burros, caballos, onde la xente pasee pola cai tranquilamente.

Y esi modelu ye’l qu’hai que dir plantegándolu a la vez qu’esa denuncia y esa resistencia, porque’l modelu actual nun sirve, y hai que ver alternatives, y eso nun ye fácil, porque sabemos que somos una minoría, pero agora tenemos muncha información, tenemos más información que nunca y hai muncha xente que lleva tiempu trabayando nesto y ta aportándonos cantidá de coses.

Pienso yo qu’esi debate ye mui necesariu, y que llegue a tol mundu, y a les organizaciones d’izquierdes y de dereches, y que s’aprovechen tolos medios de comunicación.

Tino Fernández

Eso, si me permites, coméntote que ye curioso porque ye casi una constante nes tertulies que vamos faciendo, tenemos dalguna sol decrecimientu, sola bicicleta, sola agricultura ecolóxica… y ye un tema recurrente, siempre se comenta “oi, ¿y nun sería menester cambiar l’estilu de vida?”.

Paez que nun somos tan pocos los qu’opinamos eso.

Félix Méjica

Tornando a la parte qu’afeuta al tema concretu del fracking, la Plataforma, polo menos en gran parte o casi la totalidá de los qu’asistimos a les reuniones, nun ye que temos en contra del fracking en Asturies sólo, si non que nun tamos d’alcuerdu que se faga tampoco nel restu de les zones d’España nin nel restu de les zones del mundu, porque si’l problema ye malo pa nosotros, ye malo pal restu de les zones del mundu.

Y eso enllaza colo que dices en rellación a que tenemos que cuestionar el que si nun queremos que se faga, nin equí, nin en otres zones, tenemos que reducir el volumen de consumu de gas, de carbón, de petróleu y de too, y anque nun lo podamos facer dafechu, sí podemos dir xenerando una conciencia y una cultura de qu'hai que dir baxando’l pistón, y tócanos a toos collaborar un pocu en crear esa conciencia.

Paco Ramos

El problema ye que si vamos a esa reducción pola crisis, pero nun creyemos que ye tamién necesario sin la crisis, tamos agravando’l problema, porque pa salir de la crisis tornamos a apostar polo mesmo polo qu’entramos, ye dicir, hai que construyir más, hai que producir más.

Y respeutu a la cuestión de los llímites, porque efeutivamente, esisten llímites, si esta forma de vida nun ye xeneralizable, nin pa toles poblaciones actuales, nin pa les xeneraciones futures, esti discursu de los llímites nun ta asumíu, por supuestu pola derecha, pero tampocu pola izquierda. La izquierda reparte distinto pero ye productivista, sigue cola mentalidá de cuando la industrialización, colo de la clase obrera pal beneficiu de la humanidá. Y esto vese en munchos proyeutos, anque ye verdá que nun son tolos partíos. Por exemplu de cuando’l proyeutu del Musel, viose que fue apoyáu por una parte grande de la izquierda y de la derecha asturiana, con delles esceiciones clares y reconocíes. Y una cosa mui curiosa, esa mesma izquierda que sofitó'l puertu del Musel pa convertilu nel mayor centru de distribución de carbón d’Europa, el mayor centru d’entrada y salida de carbones d’Europa, agora rásgase les vestidures porque vien un barcu con carbón de Colombia pa vender a los holandeses, “tío, ye que pa eso se fizo’l puertu, pa eso s'amplió”.

Un asistente

¿Nun creyes que, a llargu plazu, nun puede influyir l’aprovechamientu d’otru tipu d’enerxíes como la eólica, la solar, les marees, o inclusu, como se llegó a falar, d’otru tipu d’esplotación del átomu más llimpiu o menos dañín, como por exemplu, l’átomu d’hidróxenu?

Paco Ramos

Vamos poner los númberos enriba la mesa, esto ye lo que producimos, esto ye lo que necesitamos, esto ye lo que podemos aforrar, quiciavis un trenta por cientu sería bastante fácil, y pa cubrilo podemos entamar por renovables y demás. Eso tenémoslo calculao ya y por escrito, ¿Cuál ye la realidá cola que nos topamos?

La realidá ye qu’esti país, igual que tuvo una burbuya inmobiliaria, tuvo una burbuya de centrales de gas de ciclu combinau, que ta na ruina porque se pasaron de frenada y nun tan produciendo más del venti cincu por cientu de les que se ficieron.

Por otra parte hai un montón de pasta derivada d’un falsu decretu del carbón, que ye una auténtica vergoña, qu'a parte d'ayudar menos de la mitá de lo que se prevía al carbón nacional, lo que fizo fue que se punxeran les centrales de carbón a funcionar cuando taben bien paradines y se doblara la producción, pero con carbón importao.

O seya, ficimos un pan con unes tortes, les centrales de gas nun funcionen, asina que lo que dicen ye “la única forma de que’l gas salga de la crisis ye que nun entre otra enerxía nueva”, colo que’l siguiente pasu fue anular toles primes del carbón y amás esti país nun va tener enerxíes nueves renovables nuna década pa que’l gas se salve.

Resultau: más de venti mil emplegos perdíos en renovables nesti país. Y nun lo tenemos tan lloñe, ehí tenemos tolo que tien que ver cola eólica d’Avilés o cola eólica d’Aceralia, tolo que tien que ver cola enerxía solar en Mieres en Acersa, tolo que tien que ver colos cilindros parabólicos en L.lena, en Rioglas, etcétera.

Son emplegos que van dir a la cai y que nun van tornar.

Y estes teunoloxíes, amás, abarataben muncho los costes. Güei ya val lo mesmo poner enerxía fotovoltaica en casa que lo que cuesta la lluz. Ye dicir, si pudieramos ponela y nun poner la lluz, nun tendríamos pérdides económiques. Pero too eso ta parao porque ganó’l gas, que dexó de competir col carbón y prefier competir coles renovables.

Y lo de la fusión nuclear tien un problema que ye la constante K=50, tes nel añu que tes, siempre falten cincuenta años pa que pueda funcionar. Ye un chiste, pero ye asina.

Un asistente

Camiento ye más bien por razones polítiques. El poder nunca cambia de manes, sigue siempre en manes de los mesmos. Nesti casu son cincu les compañíes que lo tienen too, Eon, Iberdrola y toes eses.

Tino Fernández

Por comentar un poco los errores políticos. Llevamos construyendo un sistema enerxéticu dende antes de la muerte de Franco a base de desastre políticu tras desastre políticu. Cuando se subvencionó, subvencionose mal, y lo que se permitió fue que cierta xente se forrase con esi dineru. Cuando s’apostó pol gas, y toi xuru que munchos de los que tamos equí apostamos pol gas como medida transitoria en 1990, pero como alternativa al carbón. O seya, “quítesme ésta de carbón y concédesme la mesma potencia en gas y asina contamino muncho menos”, pero lo que nun tenía xacíu yera caltenelo too y qu'entrara la eólica, porque pola solar nun s’apostó, con escuses como la que qu’Asturies tien pocu sol, porque tien munchu más aprovechamientu Alemaña cola enerxía solar qu’España toa como conxuntu, y de xuru que n’Asturies tenemos más sol de media qu'en Alemaña.

Asina que les apuestes, políticamente, ficiéronse mui mal. Y dende siempre, dende'l sesenta y nueve o'l setenta lleva intentando facese un plan nacional de la enerxía que nin ye a cumplise. Dicen “vamos aforrar un trenta y ochu por cientu d’enerxía”, y gastamos un quince más. Y pal siguiente dicen “vamos a aforrar un trenta”… esto nun tien nin pies nin cabeza.

Un asistente

Pero nun ye sólo España, en Europa la socialdemocracia y la derecha apostaron por un modelu enerxéticu mui asemeyau. Y los que controlen en Francia, por exemplu, casi son los mesmos que los que controlen equí. Son primos hermanos.

Paco Ramos

Bono, sí y non. Hai enormes diferencies ente países. Por exemplu'l modelu de renovables alemán ye mui diferente del modelu de renovables español. El modelu de renovables alemán ye un modelu popular, de cooperatives, y el d’España non.

Y Dinamarca ye otra cosa tamién.

Y equí podíemos llegar a facelo. Hai delles esperiencies, pero necesítente años de concienciación. Eso ye lo más difícil.

Un asistente

Por exemplu yo produzco 57 kilowatios al día en dos metros cuadraos.

Esto llevo diciéndolo va tiempu y pa munches coses. Camiento qu'en ver de querer que cambien les coses dende arriba, tenemos qu’empezar a cambiales nosotros dende abaxu.

Por exemplu, aprovechando esta crisis, porque nun hai más remediu que tirase a aforrar enerxía, porque la enerxía van ponela les multinacionales a unos precios que válgame dios.

Paco Ramos

Si nun te la ponen les multinacionales, póntela’l tu gobiernu.

En España, en tola época d’Aznar, Piqué y Rato tuvo baxándose’l preciu de la lletricidá cuando l’IPC [Índiz de Precios al Consumu, mide la evolución de los precios de los bienes y servicios representativos de los gastos de consumu de los llares d'una rexón] subía durante un montón de tiempu por acuerdos que nun vienen a cuentu equí. La base del déficit de tarifa, aparte de porque ta mal calculao, fue por eso, porque s’utilizó pa tener a la xente contenta, pa favorecer el consumu y pa controlar esi mesmu IPC.

El problema fue que dempués, dengún gobiernu s’atrevió a tornalo a como taba, y agora ya ye imposible.

Tino Fernández

Cuando falamos d’errores políticos, siempre defendí que la enerxía tenía que subir de preciu. Precisamente pa qu'hubiera un consumu mas baxu y se racionalizare. Lo que nun tien xacíu dengún ye que se faga agora, en plena crisis, cuando’l consumu ya cayendo. Tan riyéndose de nosotros.

Bono, ¿teneis alguna cosa más que comentar? Solemos llimitar la tertulia a una hora pa que nun se faga mui pesao al subila llueu al blogue, asina que si nun hai más, da-yos les gracies a los invitaos por tar equí güei con nosotros esplicándonos esti montón de coses y a tolos que vinisteis por tar con nosotros.

Paco Ramos

Una última cosina si me dexais. Si hai daquien que quiera afondar nesto, a pesar de la rapidez cola que lu ficimos, camiento que como compendiu de tolo enerxético, dende lo global hasta lo particular y concreto ta esti llibru que sacamos hai bien poco, en ochobre del añu pasau : Agrietando el Futuro. La amenaza de la fracturahidráulica en la era del cambio climático.