Tertulia: Carreres d'obstáculos. Discapacidá ya igualdá

Resumen de la tertulia del xueves 17 d'avientu de 2009

Carreres d'obstáculos. Discapacidá ya igualdá

Participaron

• Ignacio Baizán
      Asociación APTA. Asociación de Padres y Tutores de Antiguos Alumnos del Sanatorio Marítimo
• Enrique Fernández Garrido
      Grupo INICIATIVAS, Fundación FAVIDA y Federación de Centros Especiales d’Empleo FECEPAS
• Juan José Maté
      Asociación Nora d’apoyu a persones con parálisis cerebral y/o discapacidad psíquica. La Pola Siero
• Felipe Orviz y Carmen Alonso
      Fundación ALPE Acondroplasia



Presentador
Tamos na tertulia cultural Pachín de Melás y la idega de güei ye falar del tema ampliu y diversu de la discapacidá. Entitulámoslu: “Carreres d’obstáculos. Discapacidá ya Igualdá” y tenemos como invitaos y conocedores más a fondu del tema a Ignacio Baizán que ye coordinador de la asociación APTA -Asociación de Padres y Tutores de Antiguos Alumnos del Sanatorio Marítimo-. A Enrique Fernández Garrido, consultor social que tien amplia experiencia nesti mundo de la discapacidá y al que ya conocí hai munchos años, de cuando taba nel centru Ángel de la Guarda, ye patronu de la Fundación Asturiana pal Apoyu a la VIda Autónoma (Fundacion FAVIDA), tamién participa na Federación de Centros Especiales d’Empleo del Principáu d’Asturies (FECEPAS) y bueno, nun sigo, llueu, si te paez, ya nos fales de lo que lleves fecho y tas faciendo. Tamíen tenemos a Juan José Maté de l’Asociación NORA de La Pola, que lleva trabayando bastante tiempo alrodiu l’apoyu a les persones con parálisis cerebral y discapacidad psíquica. Y a Felipe Orviz y Carmen Alonso, de la Fundación ALPE de, nun sé pero’l nome resúltame difícil de dicir, d’Acondroplasia.

Y sin más, alantre, a lo meyor podíemos entamar con una pequeña intervención de cada invitáu y a partir d’ehí, según lo que vaya surdiendo, participamos toos llibremente.
Enrique Fernández Garrido
Si queréis, puedo entamar comentando un poco lo que ye’l tema de la discapacidá y l’amplitú de lo que afecta. Cuando se fala de discapacidá tamos falando de munches coses, tamos falando de temes sociales, pero tamién tamos falando de temes sanitarios, d’educación, de formación y empleo, tamos falando d’urbanismu, claro, tamos falando de cantidá de temes qu’a fin de cuentes redúcense a una cosa, que la discapacidá en realidá ye lo que produz l’entornu, la sociedá, les circunstancies ayenes a la persona que fai qu’esa persona tenga dificultaes.

Esa ye un poco la cuestión pa centrase, y entós, a partir d’ehí, podemos entamar a falar de caúna d’eses coses onde hai dificultaes pa desarrollase les persones y equí tamos unos cuantos que lo tamos viviendo tolos díes.
Y por entamar per algún sitiu, propongo facélo polos temes de la dependencia, qu’agora mesmo tan de moda, ye lo que-y toca a un pais civilizáu y avanzáu, atender a les persones que más necesidáes tienen d’atención, d’ayudes directes na so vida diaria y ehí, lo que quería comentavos p’arrancar yera’l tema de lo que supón la crisis económica y tolo que ta derivándose agora d’una llei tan ampliamente deseada que tamos viendo que, bono, va medio resolver los problemes.

Con esti asuntu de la crisis económica, quería facer ver lo importante que ye pa una sociedá que’l sector económicu funcione, qu’haiga actividá, que se recauden impuestos, que se redistribuya bien, y realmente la discapacidá ye un de los sectores que más ampliamente se beneficien de que l’actividá económica vaya bien.
Hai unos años n’un congresu qu’hubo’n Tenerife sobre la dependencia precísamente, recuerdo a una moza que venía de Noruega que nos falaba que tenía una prestación pública, nel 2002, de 3.000 euros al mes. Y claro, ehí ya se puede falar d’actuar activamente énte temes como puede ser la discapacidá.
Y nel otru llau de la balanza pienses lo que se fai por exemplu nos paises d’África, n’América Llatina…
Y nel casu nuestru ¿onde tamos?. Bono, yá tamos meyor que nel 2002, pero necesítense munches coses.
Por eso creo que’l tema de la economía ye mui importante, pienso que toda persona con discapacidá debería tener un manual económicu pa que les coses fuesen bien feches.
Juan José Maté
Sobre esi aspectu, nun se si lleísteis en La Nueva España, na páxina de Siero, un artículu sobre les ayudes que dan a les asociaciones. Nós en Siero somos la Cruz Roxa, Cáritas, l’Asociación Cébrano que ye de parálisis cerebral sobrevenida, otra asociación más que nun conozo y llueu l’Asociación Nora y rebáxenos un 15 por cientu. Tenemos un conveniu col Ayuntamientu Sieru que nos da una partida presupuestaria cola que podemos financiar a les terapeutes y demás. Esti añu pasáu ya nos rebaxó un 15 por cientu y ya ponía ehí que pal añu que vien otru 15 por cientu.

Y lo que ye indignante ye que ellos siguen el mismu criteriu pa toles asociaciones, tanto pa la de “los amigos del carbayu”, como pal Club Siero, como pa l’Asociación Nora.
Y la llabor que tamos faciendo nós ye d’integración y d’apoyu a les persones con discapacidá. Propunximos-y al alcalde que respetase pa estes asociaciones el presupuestu que tenía'l conveniu, y dixo que non, que venía aprobao nun plenu, y que yera pa toos igual.

Y eso ye lo que veo, que nun ye lo mesmo una asociación que fai delles actividaes culturales, que lo que tamos faciendo nosotros: fisioterapeutes, terapia ocupacional pa los chavales. . ., dando unos servicios que’l Ayuntamientu nun da, nin da la Sanidá, y ye por eso que se creó l’Asociación.
Y si empiecen a recortar por tolos llaos, al final ¿qué faes? Pues suprimir. Tienes que suprimir sueldos, suprimir hores, terapies, actividaes…

Ignacio Baizán
Nesi sentíu ye paradóxicu’l fechu de qu'hai una contradicción ente lo que ye la realidá de les asociaciones. L’Alministración por un llau, si falamos de temes económicos, rebaxa los convenios de partíes presupuestaries y afuega, pero por otru, interesa-y mantener a les asociaciones o a les entidaes que nun son públiques.

Esto ye un serviciu públicu qu'agora yá vien recoyíu como un drechu a través de la llei de depencencia, y nosotros tamos prestándolu n’unes condiciones a años lluz de los centros de titularidá pública, nos que ves la ratio de personal, o los fondos y medios colos que se cuenta.

Por embargu, l’Alministración, como bona xestora que ye, interésa-y más lo que ye la subcontrata que crear centros de titularidá pública, porque éstos conlleven una serie de gastos fixos, una serie de trabayadores al traviés del funcionariáu, y demás. Mientres que pa lo priváo, como bien diz Juan José, dante unes perres y arréglate con eso.
Pero ye curioso amás qu'agora salen normatives d’acreditación nes que desixen unos niveles de calidá, que por supuestu, creo que toos queremos la másima calidá pa los usuarios qu’atendemos, y sin embargu veste afogáu per otru llau coles ayudes.

Juan José Maté
Sí, sí, veste afogáu. Nós tolos años tenemos que pedir una llínia créditu porque nun llegues a fin d’añu. Y tienes que mantenélo porque, claro, los chavales necesítenlo.

Ignacio Baizán
Polo que veo, na vuestra Asociación dependéis únicamente de l’aportación municipal, ¿nun tenéis fondos de la Conseyería?

Juan José Maté
Non, solicitamos cuando salen les ayudes, presentamos unos proyectos pa caltenimientu y eso, pero l’únicu conveniu que hai ye col Ayuntamientu. Llueu tenemos colaboraciones puntuales, de Caxastur a lo meyor, un programa que presentamos a Caja Madrid… llueu les cuotes de los socios y lo que vas sacando per ehí, como vender pan nos güevos pintos, que nos da bollos ún que tién una panaderia....



Enrique Fernández Garrido
La llei de dependencia lo que fizo fue poner en primer planu los temes de la discapacidá. Sacalo a la cai. Ayudó ehí muncho’l sector de mayores, qu’emburrió por esti tema y ye un colectivu mui ampliu. Cosa que hai unos años, bono. . . tabes ehí. Agora ya pasa a yer ya un derechu, y como derechu que ye, puedes entamar a esixílu.
Lo que pasa ye qu’esto lleva unos desarrollos nel tiempu que tovía nun tan cubiertos. Entos entre que te reconocen y non, situaciones alministratives, papel p’aquí, papel p’allá…

Ignacio Baizán
Sí, y crea tamién unos desaxustes a nivel de los propios afectaos. A nosotros nel nuestru centru ta pasándonos que les places ocupacionales, que llevamos 20 años con places per parte l’Ayuntamientu y 10 años per parte la Conseyería, lleva un par de años diciendo la Conseyería que informemos a les families pa solicitar la valoración de la llei de dependencia y ver que ayudes van percibir los chavales y resulta qu'a aquellos chavales que los valoren, les ayudes que-yos dan, llámennos los padres diciendonos que cómo ye esto, que-yos dan el mesmu recursu que yá llevaben disfrutando hai cuatro años, la plaza nel centru ocupacional.
Porque la xente piensa que la llei de dependencia pa suponer qu'amás de la plaza van da-yos 600 euros al mes y llueu nun se qué servicios, y ye tolo contrario.
Al menos nel nuestru centru, el comedor, que venía siendo gratuítu van tener que pagalu porque hai un co-pagu pola prestación de servicios que conlleva la llei. Agora’l costu del comedor va suponer un coste de 40 euros al mes pa les families. Y claro, yo llamo a la Conseyería y yá-yos digo que se preparen cuando-yos pida los 40 euros a los que tengo equí, que igual lleven dos o tres años ensin pagar comedor.

Felipe Orviz
Bueno, a mi paezme peligroso xuntar dependencia con discapacidá, son coses diferentes. Ún puede ser dependiente y tener discapacidá o non, como puede ser la xente mayor. Además a mi gústame llamala llei d’independencia.

Enantes de nada, creo que’l mundu de la discapacidá ye’l sector más escluíu y que menos tien avanzao na sociedá democrática y de derechos na que vivimos. Y gran culpa vien del movimientu asociativu y de la sociedá civil. Siempre digo que toles lluches sociales y tolos avances d’esti pais ficiéronse gracies a la movilización, el compromisu y el sacrificiu, y n’España hai cuatro millones de persones con discapacidá, y si sumamos persones más averaes, padres, pareyes, fios, podemos llegar a falar de quince millones de persones, y si se fai una manifestación, que nunca vi una manifestación de persones pola discapacidá, por exemplu en Madrid un día, les coses cambiaríen.

Partimos d’un movimientu social onde, los que tamos, siempre falamos de lo nuestro y tenemos qu’empezar a falar colectivo. Y pa solucionar el problema qu'hai, y el problema qu'hai ye una falta de llibertá y de ciudadanía na más, si realmente les persones con discapacidá son persones con derechos, yá nun faría falta qu’hubiere asociaciones de padres que s’involucren y que tengan que dexar el so trabayu pa que se presten servicios, nin qu’haya centros especiales d’emplegu nin coses d’esi tipu.
Creo que a la xente con discapacidá fáltanos esi impulsu reivindicativu y de compromisu, y creo que teníemos d’empezar per ehí.
Hai que entamar a reivindicar y a esixir los nuestros derechos.

Enrique Fernández Garrido
Yá, pero equí siempre hai un choque entre colectivos, alcuérdate, falando por exemplu del tema de accesibilidá, agora ya non, porque la sociedá avanzó bastante, pero hai unos años chocabes con determinaos colectivos profesionales como’l de la construcción, arquitectos, la xente que creía que’l peldañu tenía que facese porque yera obligación divina…

Juan José Maté
Y tovía sigue chocando, que ta la plaza d’abastos de La Pola Siero…

Enrique Fernández Garrido
Si, si, tovía sigue pasando, pero imaxináivos hai diez años. Ye cuestión de dir avanzando. La situación de les persones con discapacidá, tanto a nivel individual como colectivu ye difícil y, lo que tabes diciendo antes, hai que reivindicar esi derechu, y la otra persona tien qu’entender que hai que ceder, o seya, que lo de so, el peldañu, nun ye un derechu, sinon que’l derechu ye que tienen que reconocer a les otres persones y non poner el peldañu.
Ye un cambiu de conceutu que tien que dir variando. Comentabes que tien que ser a través de la movilización y la reivindicación, y nun cabe duda, ye evidente, per ehí tien que pasar, y pol convencimientu la xente.

Felipe Orvíz
A mí dame vergoña, como ciudadanu d’esti pais, dígolo claramente, que se prohiba fumar nos bares y que nun s’obligue a los bares a facelos accesibles.

Carmen Alonso
Pa que l’accesibilidá seya pa tolos ciudadanos, habría de facese pensando nos neños. Faciendo una ciudá accesible pa los neños, sería una ciudá accesible pa tol mundu.
Pero nos baños, hai baños pa homes, baños pa muyeres y baños pa lo que yo siempre llamo’l tercer sexu, porque les persones con discapacidá son el tercer sexu ¿non?, cuando sería munchísimo más fácil facer un bañu pa toos, o incluso, si ye que hai que facer ín pa homes y otru pa muyeres, faelos yá accesibles. Pero, non, seguimos tovía faciendo la esclusión en coses que pueden paecer poco importantes.

Felipe Orviz
Si, paez que ye un bañu pal tercer sexu, que polo xeneral suel tar pieslláu y tienes que pedir la llave, etcétera, etcétera.

Carmen Alonso
Nel tema de la llei de dependencia, paez que se fizo al principiu pa les persones mayores y llueu, con un poco de presión, metióse a les persones con discapacidá.
Al principiu hubo una llucha, amás mui grande, que costó munchisimu trabayu, pa qu’entrasen los neños, porque paecía que nun había posibilidá de que pudieren entrar los neños de 0 a 3. Decíen, “non, ye que tolos neños son dependientes”, pero un neñu, que entre comilles naz “normal” nun tien les mesmes necesidaes qu'un neñu que naz “diferente”, y n’esa diferencia tá que suel tenese que dexar de trabayar o trabayar menos hores, porque tienes que facer tol cómputu d’hestories que’l to fiu te pide.

Hai qu'empezar a decir la cantidá de coses que tán mal, y ye a través de la llei de dependencia onde podemos empezar a pelear. ¿Por qué’l movimientu asociativu de persones y de families tien que tar peleando siempre y sufrir la cantidá de coses que nun cumple’l Estáu?

Enrique Fernández Garrido
Por eso ye tan importante que les persones con discapacidá ten organizáes n’asociaciones, precisamente por eso, porque nun hai que confiar que’l Estáu resuelva los problemas, porque ya demostró que los resuelve mal.

Carmen Alonso
Pero nun tenemos qu’escaecer que quien tien que prestar los servicios ye l’Estáu, y puede ser el movimientu asociativu el que tien que mirar si se fai bien.
Igual que tenemos el derechu de dir al mélicu o dir a la escuela, que falando de discapacidá, sería la escuela inclusiva, que ta na LOE, pero nun hai inclusión total en realidá, dizse que puedes dir a la escuela que quieras, pero si yes motóricu has dir a los centros motóricos que te correspuenden, que resulta que queden en casa dios, y resulta que hai que facer nunsecuantos kilómetros, pero'l to fiu, onde ta faciendo’l grupu d’amigos ye onde vive, colos sos collacios nel barriu.
Creo qu'hai que tener mui claro qu’esto que se fai nun ye lo que queremos.

¿Y quien nos educa a los padres cuando naz un fiu “diferente”? Si prácticamente casi tenemos que contratar a inspectores pa que nos digan a ónde tenemos que dir.

Felipe Orviz
Facemos mención al estáu, pero ye que la discapacidá ye la única llabor social pública que la exerce una empresa privada. La ONCE lleva esa xestión dende hai 30 años. Y otru exemplu son los centros especiales d’emplegu. Si la base ye que la xente con discapacidá puede acceder a una empresa ordinaria, porque la llei obliga a que una empresa con más de 50 trabayadores tien que tener el dos por cientu xente con discapacidá, el movimientu asociativu tien pactao midíes alternatives pa que les empreses incumplan esa llei, lo que nunca entendí, pero bueno, entós, si una empresa puede axuntáse a les medíes alternatives contratando o financiando servicios, ya nun cumple cola so obligación llegal.
Los centros especiales d’emplegu tuvieron una actuación mui importante nel so día y pa un tipu de discapacidá mui concretu ye un instrumentu útil xunto al emplegu con apoyu. Per otra parte en cuanto a relaciones sindicales y de llibertá de formación y salariales hai una discriminación salarial mui importante.

Ignacio Baizán
De toes maneres nel mundu de la discapacidá hai qu’establecer categoríes, la realidá impónteles. Nun ye lo mesmo un discapacitáu físicu que un psíquicu qu’un sensorial.
El mundu del centru especial d’emplegu nun lu conozo, aunque APTA tien un centru, nun me toca porque tien una razón xurídica propia y yo llevo lo que son ocupacionales y residencia, pero aun así si que sé que la llei fálate de los centros especiales d’emplegu como un trampolín a la integración al mercáu llaboral.
La especiencia que tenemos nel centru nuestru ye que los rapazos que foron al mercáu llaboral normalizáu tuvieron que tornar al centru especial d’emplegu porque nun pudieron adaptase por diferentes circunstancies.
Nun tenemos qu’escaecer que vivimos nun mundo mui competitivu y nel que unos cómense a los otros.
Entiéndese que nuna cadena de montaxe, por exemplu, una persona a la que-y falte un órganu, por exemplu puede manipulativamente ya intelectualmente funcionar exactamente igual qu’un operariu que nun tenga ningún tipu de discapacidá pero, sin embargu, dende la nuestra experiencia, vemos que nel saltu al empleo ordinariu siempre son los chavales los que nos piden tornar a ingresar otra vez.

Los centros especiales d’emplegu, pola so propia constitución, d’alcuerdu, integren llaboralmente a les persones, pero dende’l mio puntu vista, la mayor ventaxa ye l’aspeutu social, y esa llabor social tien que tar fiscalizada polos poderes públicos.
Considero que l’alministración, igual que mira por otru tipu de recursos d’atención social, como pueden ser centros ocupacionales o centros residenciales o centros de día o escueles-taller y demás, tendría que metese también más n’estes actuaciones, que nun dexen de ser iniciatives privaes, porque tienen que ser empreses y competitives y ofrecer los sos productos en igualdá, porque tá claro que cuando vas vender un productu, seya d’un centru especial d’emplegu o seya normal, acabóse’l tiempo esi nel que se decía “oye, cómprame a mi porque los guah.es son discapacitaos y trabayen maravillosamente bien, faime esi favor” Eso acabóse ya, los centros especiales d’emplegu compiten contra otros proveedores n’igualdá de condiciones.
Por embargu, los centros especiales d’emplegu ofrecen una acción social que ye evidentísima y nun hai qu'olvidar que reciben una serie d’ayudes importantes por parte l’estáu y por tanto l’alministración pública debería tener voz y votu na xestión d’esos recursos.

Y respeutu a lo que comentabes de la accesibilidá, quería matizar que los servicios sociales que se presten a les persones con discapacidá tienen evolucionao munchísimo nel nuestru país nos últimos 25 o 30 años.
Toos nos alcordamos del tontu’l pueblu, que yera una persona con discapacidá, eso, gracies a Dios tien esapaecío prácticamente. Por embargu l’accesibilidá véola siempre como la rémora de la dependencia, porque incluso los edificios nuevos que se faen, como decíes, efectivamente, ye que son parches, o seya, un edificio accesible ye accesible porque na cai d’atrás ponen una rampa, y la puerta ta piesllada y tienes que dir a falar col conserxe.

Carmen Alonso
Nosotros, cuando facemos delles xornaes, tamos falando de persones con enanismo, pides una habitación adaptada, y nun la pueden utilizar, porque ye que sí, ta adaptada, pero’l cosu la ducha ta’n casa Dios, déxente un banquetu pa que se suban, enfin, coses que … haber. Parto de la base que sí, nesti país avanzóse munchísimo, pero eso ye historia. Agora tamos nel añu 2009, acabándolu.

Ignacio Baizán
Y ¿quién fai les normatives de discapacidá? Porque a mi prestaríame que me preguntaren, y lo mesmo pal vuestru sector. Y d'otra manera ves la normativa y, lo que dices, ves un hotel que diz que ye accesible y sin embargu nun ye accesible’n relación a la acondroplasia. Entos, ¿consultó alguien a la hora de facer la normativa d’un hotel, que ye un serviciu públicu al que tenía que poder acceder xente desde ciega hasta con pérdida auditiva…, lo que seya.

¿Qué ye la accesibilidá? La accesibilidá tien que ser una normalización total del fechu diferencial, porque toos somos diferentes, toos tenemos les nuestres propies circunstancies.

Carmen Alonso
Échase'n falta tamién esto nos medios de comunicación.
Los medios de comunicación son los que mueven un país y nun hai campañes d’información.
Porque conocer ye respetar. Y el principiu ye esi, la normalización, toos iguales toos diferentes.

Hai qu’empezar a reivindicar, más agora cola crisis económica na que tamos.
Cola nueva llei de xubilación, puede xubilase a les persones con discapacidá a los 57 años, pero cuidao, diz que se xubilen porque van morrer primero, cuando nesti país solamente trabayen setecientes mil persones con discapacidá, y encima tienen que xustificalo asina.

Felipe Orvíz
Nun ye por ser pesimista, soi mui concretu no que digo, pero ¿qué más da que reivindiquemos equí o que vayamos al ayuntamiento Xixón esixendo que los técnicos municipales estudien y fagan accesibilidá, si llueu, los establecimientos nun cumplen la normativa.
Yo nun creo que nun hai dengún alcalde ni ayuntamiento que nun tenga recibío algún premiu del movimientu asociativu de la discapacidá solo por cumplir la normativa. Eso ye peligroso.

Yo creo que pa empezar a cambiar les coses ye, la propia xente con discapacidá, la que tien qu’empezar a reivindicar.
Sólo’l cuatru por cientu de les persones con discapacidá tan asociaes, y hai unos “entes”, como de poder, que representen a toos, y tenemos que empezar a decir que “oye, nel mio nome nun me representes, yo digo lo que pienso yo y los mio principios son estos”.

Y llueu fai falta una campaña de sensibilización, ye que nadie ta esentu de tener una discapacidá’l día de mañana, un accidente de coche, tener un fiu con acondroplasia, lo que seya.
Ye asumir un compromisu como ciudadanu de nun poder vivir con un colectivu que seya escluyíu, seyan gays, seyan muyeres, seyan inmigrantes o seyan xente con discapacidá.
Ye un problema de la sociedá nel so conxuntu.

Juan José Maté
Ye mui difícil convencer a la sociedá de que preste esi apoyu a la discapacidá. Véolo mui difícil. Por exemplu, tolos 3 d’avientu facemos una campaña y ponemos na Pola un puestu pa captar socios y sacar unes perres, y la xente párase y diz, “¿qué dais?, ¿qué regalais?”, y ná, decimos quienes somos, que somos d’equí de la Pola, lo que facemos…, y na, dícennos…, “non, non, nun m’interesa”.

Si saliéremos na tele a lo meyor sí, pero ye que como tampoco tenemos accesu… nin la TPA, que-yos mandamos una carta cuando’l día de la discapacidá. Nada.
El sábadu esti que hubo nel mercáu d’abastos una competición memorial d’escalada o nun se qué, allí tuvo la TPA tola tarde grabando’n direutu.
Yo creo que ye imposible lluchar contra eso. Tamos como tirando la toalla.

Y nel tema d’accesibilidá, lo mesmo, cuando llegues a ver un edificiu ya tá too fecho, lleis sobren, pero ¿con quién pelees?. Falo de la plaza abastos, fuése allí, peleóse, lluchóse pola accesibilidá, y nun ficieron ná.
¿Qué ficieron después? Facer un serviciu de minusválidos, que nun lu había. Diven a inaugurar la plaza en sin serviciu minusválidos. Y llueu, tol contornu alredor tien escalones, y… claro…, nun los dibes quitar.
Dicen, “nun ye que hai dos entraes que son accesibles, les otres dos non”. Pero claro, tienes que bordiar tola plaza pa poder entrar.

Enrique Fernández Garrido
El problema de la accesibilidá ye que va xuníu a un plan estatal, y el plan estatal diz que hai tiempu hasta’l 1012 p’acondicionar tolo que ye obra antigua.

Ignacio Baizán
Yo creo que hai un problema, nun de desconocimientu de la llei, sinon de que los arquitectos viven n’otra dimensión completamente diferente.
Y nun fai falta falar de discapacidá, mesmamente nel edificiu Calatrava, creo que se quexaron tolos sindicatos poles escaleres d’incendios, porque si hubiere un incendiu diben baxar más bien rodando poles escaleres, que creo que yeren así, como’l picu Urriellu. Nun sé qué ficieron llueu pa solucionalo. Ellí lo que primaba yera lo del edificiu singular.

Una asistente
Hai tamién la sensación de que facer un edificiu accesible sal tres veces más caro, pero non, ye que-yos cuesta a los arquitectos adaptase, porque supón un cambiu a lo que ye la construcción tradicional.

Un asistente
Van al mínimu, si faen un portal, van a un xiru de un metro cincuenta, y non coño, nun ye eso, ye que’l portal seya ampliu. Nun ye tan difícil. Na mio casa ye accesible, y ye una casa fecha va 112 años, y si yo fuera’l siella ruedes, entraría perfectamente, ye ancho…, l’ascensor ta a l’altura….
Hai otru problema, que ye de conciencia, de valores.

Felipe Orviz
Pero tampoco ye culpa de los arquitectos, que ellos nun tienen por qué tener sensibilidá nin ná, son profesionales y tienen una normativa y tienen qu’aplicar la llei y puntu. Y nun hai más.
Al igual que tienen una normativa de fumos y de soníu, y hasta que nun se cumple nun s’abre y ya tá.
Pero’l problema ye que se dexa abrir y además nadie diz ná…, y pa encima damos un premiu al alcalde.

Un asistente
Un de los problemes que tien too esto fue que la discapacidá quedó como algo del llar, en casa. La discapacidá nun ye público, ye algo que la familia tien que sufrir en silenciu y nun dar ruíu.
Y además nun me lo pongas delantre que ta mal. Y ye un problema que nun se quiera ver, que nun se quiera facer público. Tocóte y tocóte.
Alcuérdome de dos rapaces, nel pueblu, que taben en casa siempre, y nun salíen. Y tol mundu entendía porqué.
Y neso tamos tovía n’una batalla que queda muncho, muncho por lluchar.

Alcuérdome d’un par de coses, una ye d’hai munchu tiempu, d’un Eroski qu’había’n Bilbao, que tenía un problema col cambiu, yera tan grande que se quedaben les caxeres sin monedes o sin billetes, ya descubrieron que les persones que meyor facíen lo d’apurrir el cambiu yeren persones con síndrome de Down, meyor que les persones que nun lu teníen, porque pa elles yera un trabayu motivante, nun se despistaben, nunca se-yos escapaba una... pero tuvieron que dexalo porque a la xente nun-y prestába ver a persones con síndrome de Down.

Y güei, nun sé’n que ciudá asturiana, una persona declaró n’un xuiciu na cai, porque nun podía subir en siella ruedes. Ye vergoñoso. Que una persona declare asina nun ye almisible.

Enrique Fernández Garrido
De lo que que cuentes de lo d’Eroski, contrástotelo colos anuncios, por exemplu, de Repsol . El de la gasolinera. ¿Vístislu?. Esa situación creo que, socialmente, ya ta salvándose. ¿Que tovía non del tóo? Por supuestu. Pero nun tamos igual qu'hai diez años.
Yo ye qu'intento ser un poco positivu porque si non vamos salir d’equí toos llorando.

Ignacio Baizán
Ehí toi contigo. Sí cambió. Creo que tovía queda munchísimo. Por supuestu. Munchísimo. Sobre too por sacar la discapacidá a la cai.

Enrique Fernández Garrido
Y lo que contabes de tener que declarar na cai. Eso vese con tristeza. De que tovía nel añu 2.010 unes simples barreres impidan qu’una persona faiga lo mesmo que fai’l restu la xente…
Lo que ta claro ye que sí s’avanzó, y qu’esto nun se pué parar. Hai que siguir.

Un asistente
Antes dixisteis un pocu de pasada que la xente con dalgún problema físicu o mental diba´l mundu llaboral y llueu tornaba’l centru d’empleo. ¿Podéis aclarar un puquiñín con qué dificultaes reales s’atopa esa xente?

Enrique Fernández Garrido
Si me permitís, soi vicepresidente de la Federación de Centros Especiales d’Empleo del Principáu d’Asturies. Nun me peguéis ¿eh?. Y nel tema del empleo, lo que tenemos que tener toos claro ye que l’auténtica integración d’una persona ye l’empleo.
Sería fabuloso si consiguiésemos que toles persones con discapacidá nesti pais trabayasen. Ehí taba resueltu’l problema d’un plumazu.
Equí n’esti mundu de los centros especiales d’empleo vese la gran potencialidá humana y vese la gran miseria humana, y hai de too. Hai sitios onde yo saldría corriendo tamién. Pero lo que ye un poco lo más habitual nos centros especiales d’empleo ye que’l trabayador ta ehí, tá bien atendíu. Nun ye tar en casa, hai condiciones llaborales, tienen los sos problemes, el so estrés, pero tienen un entornu que, supuestamente, protéxete más.

Hai que facer una transición hasta que llogremos esi otru espaciu del empleo normal con estos centros. Por exemplu n’Asturies 1.800 persones trabayen ehí.
¿Y puede facese daqué agora mesmu pa meyorar esa situación? Non. Ye más, tenemos que acudir a los centros especiales d’empleo porque tal como ta la situación agora mesmo, lo que vamos facer ye perder l‘empleo que teníamos.
Ta cayendo l’empleo nos centros especiales d’empleo. Y del empleo ordinariu ya nin falo. Eso pa mi ya ye otru pasu que ta dándolu l’auténticu privilexáu nel mundu la discapacidá.

Entós claro, cuando la xente sal, llueu vuelve, porque cuando la situación se torna mal, el que primero lo sufre ye’l que tien más dificultaes.

Ignacio Baizán
Y llueu hai un componente de choque respeuto a lo que ye la convivencia cola xente en sin discapacidá. Porque a nivel intelectual lo que los chavales busquen ye sentise arropaos, sentise iguales a los sos compañeros.
Y creo que cuando salen al mundu normalizáu, la sociedá tovía nun tien evolucionao lo suficiente. Acéptase antes a un discapacitáu físicu que a un intelectual.
Esto recuéyelo mui bien l’anunciu esti de La Caixa, nun sé si tu tenéis visto, d’un chaval con discapacidá intelectual. Da la sensación de tar n’una empresa normalizada y decíalo, que aún así veíase como’l diferente.

Y al filu de lo que decíes de los supermercados, n’Alimerka sé que lleven años trabayando cola Asociación de Síndrome de Down n’Asturies y la xente recíbelo con muncha satisfacción.
Por exemplu, cerca mio casa, que tenemos un Alimerka, la neña que lleva lo del pan ye una neña con síndrome de Down y la xente va encantada a comprá-y el pan, ye un fenómeno coles vueltes y siempre te recibe con alegría.

Un asistente
Los exemplos que tais poniendo son de grandes empreses, pero yo creo qu’eso a la pyme nun-y llega.

Ignacio Baizán
Enrique podrá correxíme, pero les lleis tan ehí, y si se cumplieren, el dos por cientu de discapacidá nos centros con más de cincuenta empleaos, creo que nun esistiríen los centros especiales d’empleo. Eso sólo con facer cumplir la llei.

Felipe Orviz
La única estadística que nun hai nel EPA ye la que se refier a la discapacidá. ¿Por qué?
Nun hai datos de persones contrataes con discapacidá y de persones desempleaes.
Otru datu. Sólo l’un por ciento de persones con discapacidá llega a la universidá, vivimos na sociedá de la información y el cincuenta y seis por ciento ye xente analfabeta.
Eso dizlo la estadística.

Y los partíos políticos, ¿Por qué nun reivindiquen l’emplegu públicu? Hai miles de programes d’emplegu, bueno, si se cumpliese que’l siete por ciento del empleo públicu fuese pa persones con discapacidá, más de tres mil persones n’Asturies alcontraríen trabayu.
¿Y por qué les plataformes de persones con discapacidá nun esixen l’emplegu públicu?

Nun toi coles campañes estes de publicidá que dicís porque xeneren por baxo lo de la caridá cristiana. A una persona nun hai que teney solidaridá, ye una persona normal.
N’Hidroeléctrica apliquemos un programa d’emplegu con apoyu. Metiéronse persones con síndrome de Down y llevó un añu lo que se llamen adaptaciones, y agora son compañeros que tan integráos totalmente, son ún más y la xente nun los mira. Al principiu sí, too hai que decilo. Pero agora non. Y son impecables nel so trabayu.

Tamién digo que la discapacidá intelectual y psíquica y la discapacidá física son mundos totalmente diferentes, y si falo d’ayuda´l empleo ye pa l’intelectual y pa la psíquica.

Y un últimu exemplu, en Salamanca hubo un bar a onde fueron una xente con síndrome de Down y écharonlos. Al día siguiente los estudiantes y toles sociedaes organicemos una sentada a lo llardo d'una selmana que nuna hora n’aquel bar nun entraba nadie. Mil estudiantes sentaos allí delantre. Y agora en Salamanca nadie s’atreve a eso.

Una asistente
Nun quería qu’acabare la tertulia en sin falar un poco del tema educativu. Soi maestra y veo que’l tema de la normalización pasa por facelo normal dende la Escuela. Toi n’una escuela onde vienen neños con problemas motóricos y con problemas psíquicos y vese como una cosa normal.
Pero el tema de que seyan unes determinaes escueles, que se llamaben antiguamente d’integración, fai que namás que los seños que salgan d’eses escueles salgan con esa mentalidá.
Y como maestra, también pienso que nun hai que perder de vista ye que ta recortándose muncho’l personal especializau. Esti añu’l recorte que hubo’n especialistes en pedagoxía terapéutica y logopedes foi brutal. Y davos cuenta qu’un logopeda pué tratar tamién a un neñu, entre comines, “normal”.

Carmen Alonso
Nel tema de la escuela, tengo relación con toles escueles del territoriu español y con Iberoamérica porque tenemos una rede iberoamericana, y pasa lo que dices. Nel momentu qu’hai recortes, recorten el personal. Y efectivamente, la escuela ye la diversidá y tenemos qu’integrar a tol mundo. Ye’l principiu fundamental de normalización. Pero ye verdá que na escuela hai munchos problemes.

Juan José Maté
Sobre'l tema de la vida social de los chavales con discapacidá intelectual, quería comentar lo difícil que ye facer círculos d’amistaes. Nosotros n’asociación tenemos que tener club d’ocio onde van voluntarios, que son chavales sin discapacidá, pa salir colos chavales con discapacidá. Porque vamos, hai chavales que tienen 36 o 40 años o 30 años, que si nun salen con esos chavales del club d’ocio, tan en casa colos pas.

Ignacio Baizán
Si, esi ye un camín que nos queda, más a llargu plazu, y sobre too nel ámbitu educativu. Pero eso va cola sensibilidá de la persona. Equí entra’l componente personal de sentite tu a gusto tando con xente con discapacidá. Y eso ye una cosa mui suxetiva que nun tien que ver nin cola formación nin cola capacidá o discapacidá que se tenga.

Juan José Maté
Ya, pero si nun tienes contauto con ellos, nun los conoces, nun puedes llegar a saber si tas a gusto o non.

Una asistente
Pero, lo que comentábemos, si tu, cuando fuiste a la escuela, lo viste na to clase… Cuento-vos la mio experiencia, nun como maestra, sinon d’alumna. Alcuérdome que na mio clase había neños con síndrome de Down…, había una neña con parálisis cerebral…, y vilo con cierta normalidá…. Y cuando llegues a la vida d’adulta eso val.

Un asistente
Ye eso al fin y al cabu. Ye normalizar. Vas a comprar el pan y ta ellí una persona con síndrome de Down. Alcuérdome nel institutu qu’había una profesora de dibuxu con acondroplasia, y en xeneral, si al principiu había alguna pih.ada, como’l chiste perdía gracia, dibes a clase, y si te suspendía “yera una cabrona” y si t’aprobaba pues “mui bien, vaya bien que s’enrolla”. Normalizábase nesi sentíu. Yera tan mala o tan bona como cualquiera.
Y eso normaliza dende’l puntu de vista visual y normaliza en cuestión de valores.
Y ye l’estau’l que tien esa responsabilidá de fomentar esa normalización y sobre too formar en valores. Qu’eso se considere igual que la solidaridá o la igualdá de xéneru.

Y al fin y al cabu hai lleis qu’obliguen a coses, sobre tou un gobiernu que se viende con una perspectiva d’izquierdes nun puede quedase a esperar a que la sociedá llegue. “Non, siéntolo, nin, esti edificio ye accesible porque tien que ser accesible”. Y dará problemas… pero si non, entos qué somos.

Juan José Maté
Val, pero hai temes que nun se pueden lexislar. ¿Sabes lo que nos cuesta conseguir voluntarios pal club d’ociu? Y son chavales que necesiten salir, necesiten dir a un pub a tomar algo, necesiten facer una cena, necesiten dir un día d’escursión, a la bolera…, too. Y colos pás, de sesenta y picu años, nun lo faen.

Ignacio Baizán
Nes actividades d’ociu ye donde veo más que hai mui poca integración real.
A los centros especiales d’empléu los chavales suelen dir bastante a gustu a trabayar, tan colos sos compañeros…
Pero nel ociu ye onde más ves realmente’l rechazu. Toi convencíu qu’esto que comentaba Felipe d’un pub de Salamanca, pasaría igual si fuese a cualquier bar de Xixón colos chavales de la mio residencia.

Eso creo que ye una cuestión educativa y a llargu plazu. Esa meta llograráse col pasu los años.
Tampoco hai que zarrar los güeyos y decir que toos somos iguales. Hai que ser xustos. Tenemos variedá y tien que facese en convivencia. Tenemos que aprender a convivir.

Había un casu d’una neña con discapacidá intelectual, que tenía 22 o 23 años, tenía una hermana un añu o dos más moza, y los fines de selmana salía cola hermana y les amigues, y yera una infeliz esa cria. Una auténtica infeliz que se dedicaba a beber copes pa intentar evadise. Y hasta que nun fizo’l so grupu d’amigos, colos que taba más cómoda, aunque igual facíen coses mas cencielles, nun tuvo bien.

Una asistente
Insisto muncho nel tema de la normalidá. L’hermanu la mio pareya ye paralíticu y va en siella ruedes, y cuando conocí a la mio sobrina, taba contándome una cosa y díxome “el mi tíu, non esti, el de ruedes…” y entós quedé ablucada. Pero agora, que llevamos más tiempo, ves la normalidá absoluta con que lo ve esa cria, que ya nació con ello. El problema teníalu yo. Ves que puede decise con total cariñu “mi tiu el de ruedes”.
El gran retu ta por ahí. Ver la discapacidá con normalidá.

Ignacio Baizán
Na mayoría de los casos lo qu’hai ye una herencia de patrones y de valores d’esos pas que tienen críos con discapacidá. Ellos nun tuvieron tan habituaos a ver esa discapacidá o a los movimientos asociativos o a la integración na escuela como tamos nós.
Toi convencíu que la xente qu'agora mesmo ye adolescente, con 14 o 15 años, el día que tengan un fíu con discapacidá, la vivencia que va tener esi críu va diferir años lluz de la xente d’hai 20 o 40 años.
Na sociedá tien cambiao munchísimo, hai una sensibilidá, pero lo que pasa ye que la inversión n’educación ye una inversión a llargu plazu.

Un asistente
Antes falábais de dineru, de normalización, pero creo que lo más difícil de too, porque ye lo que más tiempu lleva, ye la concienciación social. Porque ye lo más complexo.
El mio güelu, cuando vía una persona con discapacidá dicia “cómo s’atreven a sacala de casa”, a mio pa ya nun se-y pasa eso pola cabeza, y yo, nun solo nun lo veo normal, sinon que toi encantáu. Y son tres xeneraciones.

Juan José Maté
Y faltarán otres dos más