Tertulia: Pidimos la palabra. Igualdá, derechos y orientación sexual

Resumen de la tertulia del 1 de marzu de 2011



Pidimos la palabra.
Igualdá, derechos y condición sexual



Na que participaron

Mané Fernández
Coordinador Xeneral de XEGA (Colectivu asturianu de lesbianes, gais, transexuales y bisexuales)

Tino Brugos
Grupu d'educación de XEGA

Isabel Solís
TríbadAS. Área de lesbianes y bisexuales de XEGA



Presentador
Vamos a entamar cola tertulia que ye ‘Pidimos la palabra. Igualdá, derechos y condición sexual’, y la idega ye conocer un poco lo que ye’l movimientu de reivindicación de la llibertá sexual n’Asturies, la so problemática, los sos oxetivos, los llogros, los fracasos y les espectatives pal futuru. Pa ello contamos con Mané Fernández y con Tino Brugos, que son de XEGA, que creo que ye la organización hexemónica del movimientu gai y lésbicu n’Asturies.


Mané Fernández
Hexemónica non, ye que nun hai otra. A nosotros prestaríanos tener una oposición.


Presentador
Sí, realmente ye asina, nun hai otra.

Ya incorpórase tamién como invitada improvisada, Isabel Solís, qu’esperamos que nos comente coses de TríbadAS, el colleutivu de llesbianes de XEGA, aportando asina’l so particular puntu de vista.


Tino Brugos
Nosotros falamos de la diferencialidá asturiana pa referinos a lo gai-lésbico. ¿ónde ta la diferencialidá?.
Un primer elementu que nos llama muncho l’atención ye lo qu’ocurrió nel senu de la sociedá asturiana, pa que, en tolo que fue’l periodu de la Transición, que fue un momentu en qu’Asturies yera uno de los referentes más significativos a nivel estatal en cuanto a vanguardies en sentíu ampliu, ya incluso de lluches y de movimientos sociales que taben na cai y que reivindicaben coses, equí nun surdió nada. Cuando hai una primera esplosión hacia l’añu setenta y seis o setenta y ocho, en que si miramos ónde s'axuntaba xente, les coses que s’editaben d’aquella, los colectivos que formaben lo que fue la primera coordinación estatal, vemos qu’había un colectivu gai en Ávila, otru en Albacete… podríamos dicir qu’había una presencia prácticamente en tol estáu, y en sin embargu, nun tuvo presente Asturies naquella coyuntura.
Ye probable qu’un sector importante de xente que movía coses tuviera n’otres xeres, nuna coyuntura na que too taba a nivel de cai.
Pero llueu, cuando apaez la ‘resaca’, por dicilo asina, tampoco apaez nada. Nos setenta nun hai nada. Entramos na década de los ochenta y nun hai nada. Y hai qu’esperar al añu noventa y dos pa qu'apaeza un colectivu, y además con un pretestu que nun tien nada que ver con tolo que son les reivindicaciones gai-lésbiques y les transexuales y bisexuales que van llegar depués.
Y fíxate’l pretestu, nós entamamos cola conmemoración del quintu centenariu de la llegada de los europeos al continente americanu, y salió un artículu d’Eduardo Galeano diciendo que lo que se diba a conmemorar yera l’aniciu d’una espansión colonizadora onde les comunidaes indíxenes diben a sufrir… y ente otres coses, espuntaba qu’habría que denunciar qu’aquello fue l’aniciu que marcaba la opresión sexual de les comunidaes indíxenes, y facía una referencia a les práctiques homosexuales.
Y unos cuantos que tábamos naquella época mui ‘agazapaos’, mui ‘armariaos’, dientru’l movimientu de solidaridá, planteámonos facer un trabayu, y plasmóse nun artículu so lo que yeren les práctiques sexuales de les poblaciones indíxenes americanes tal y como lo recoyíen los cronistes de los conquistadores.
Y ves que Colón tenía curiosidá sol tema, Hernán Cortés comenta coses, el guamán Poma de Ayala tamién comenta coses, y ves que, ¡anda!, yera un tema que-yos interesaba…, pa condenalu.
Y esi testu que ficimos salió publicau en varies revistes de colectivos a nivel del estáu. Salió en catalán, en euskera, salió na revista del colectivu gai qu’había en Madrid… y nun momentu determináu, vímonos dando charres del tema, pero, y nun dexa de ser curioso, nun yéramos activistes LGTB [Lesbianes, Gais, Transexuales y Bisexuales], y claro, plantéennos que ¿cómo ye que nun hai nada n’Asturies?... Y vímonos obligaos a entrar na dinámica y facer algo n’Asturies.
Y ye entós cuando se ruempe esa especificidá asturiana.

Pero a día de güei, venti años depués, siguimos viendo coses mui específiques.
Por exemplu, ¿qué ocurre na sociedá asturiana, onde, a día de güei, tiénense fecho avances notables nel ámbitu de la normalización y nel ámbitu de la visibilidá, pa que tengamos un llastre qu’impidió que cualquiera de les persones que fuimos ocupando’l cargu de coordinación del colectivu siempre foron xente de fuera?
Nun hubo asturianos o asturianes que s’atrevieren a aparecer públicamente como coordinador o coordinadora del colectivu XEGA.
Hubo xente de Cantabria, dos, xente de Llión, ún, xente d’Extremadura, ún, un orixinariu de Chile, vamos, fáltanos algún esotismu africanu o asiáticu, pero sigue en sin haber xente nativa, por dicilo asina.
Hai xente na directiva, pero siempre nun segundu planu, siempre en sin tener que ver con cuestiones relacionaes cola visibilidá.
Nós creyemos qu’ehí hai un llastre idiolóxicu, básicamente, de temor a afrontar determinaes coses que, probablemente les xeneraciones nueves vayan frañendo.

Y llueu, habría otru elementu d’especificidá que ye que, val, nun hai xente organizada, pero les vanguardies sociales y polítiques que tienen una preocupación pola tema, sí pueden afalar el debate y la visibilidá, pero lo que nos llama l’atención ye que, bono, nosotros nun esperamos nada pola parte de les organizaciones que tienen una definición idiolóxica de centru, centru-derecha o derecha, d’ehí nun va a surdir nada, pero ¿ónde ta la izquierda social?
Ves qu’aquelles organizaciones o colectivos que tienen incorporao, anque seya namás por citalo, nel so programa, tolo que tien que ver colo gai-lésbico, nun dexa de ser daqué aneudótico.
Creo recordar, porque ye de xusticia, que la primera organización que fala d’esto ye’l Conceyu Nacionalista Astur, pa unes elecciones parciales qu’hubo al senáu. Alcuérdome de facer un trabayu pa la revista Asturias Semanal y hubo munchu debate, con cartes que se mandaron y demás.
Llueu había delles organizaciones digamos de la estrema izquierda de la época que lo tiníen teorizáo, pero la práctica dientro de lo que sería la base social gai-lésbica, nun esistió durante tou aquel periodu.
Y güei tovía ye complicao. Creo que tamos frañendo lo último. Tamos ya por fin falando pa firmar convenios con organizaciones sindicales, que ye complicao, porque, claro, dicen, “el movimientu obreru nun ta pa esto”. Pero intentamos convencelos y agora paez que ya entamen a ver qu’ente la clase trabayadora, nosotros somos tamién clase trabayadora, y que nel puestu de trabayu pasen coses, hai discriminaciones, y que defender los intereses los intereses de los trabayadores ye tamién defender los intereses de los que, dientro del mundu del trabayu, tienen una orientación o una identidá sexual diferenciada.

Bono, esto por centrar daqué’l tema, pero podría facese un estudiu sociolóxicu qu’analizara por qué n’Asturies nun hubo nada hasta tan tarde. Nosotros nun tenemos cerraes les respuestes, nun sabemos.


Un asistente
Tal vez porque Asturies tampoco fue un sitiu especialmente represivu, o que se llimiten especialmente los derechos.
Porque sí, sorprende un poco la contradicción ante una falta d’organización, que n’otros sitios sí que fue llogrando éxitos, que paez qu’equí se tienen algamao en sin la necesidá s’esa organización, y será por eso polo que, a lo meyor, seyáis más febles nel aspeutu organizativu.


Tino Brugos
Non, nosotros febles tampoco somos, equí, durante munchos años, nes reuniones que facemos, podemos alcontranos con venti o trenta persones, y eso, pa quienes conozan la realidá sociolóxica, saben qu’eso ye falar de mases.
Y por exemplu, cuando trabayamos nel Conseyu de la Mocedá, almírense porque tenemos ocho o diez persones que s’axunten, porque ye que les asociaciones tan vacíes.
Nós, nesi sentíu, siempre tuvimos xente. Y además podemos presumir de que, nos últimos años, tenemos un relevu xoven que ta presente en mogollón de coses, como nes charres que damos nos centros educativos, nes xuntes de la Federación Estatal…


Mané Fernández
Ya, pero ye lo que dicimos siempre, el problema de los xóvenes ye que caduquen, hai que renovalo permanentemente.
Yo creo que, con respeutu a los xóvenes, ye onde más movimientu se ve. Y tan trabayando bien nel colectivu nesti momentu.
Somos de los pocos colectivos onde hai un grupu de xóvenes bisexuales, que ye ún de los ámbitos que ta entamando a dinamizase agora. Hai delles encuestes, empiecen a salir los primeros estudios y el nuestru colectivu ta ehí y de manera potente. A nivel estatal ye un de los colectivos que más ta trabayando. Tan xenerando un discursu y tan teniéndolos en cuenta.


Una asistente
Paezme que dende fuera, la sensación que da XEGA ye que ye una organización mui representativa. Vese qu’hai muncha xente alredor, muncha xente colaborando… cada vez que convocais algo, ehí tan. Diría casi que sois una organización hexemónica. Y eso ye una cualidá en positivo. Digamos que sois una organización lo bastante abierta, lo bastante integradora, pa que puedan tar dientro corrientes qu’a lo meyor n’otru sitiu nun podríen.
Pero nun veo una esplicación pa que los que vienen dando la cara seyan siempre xente de fuera. Igual en comunidaes con un nivel poblacional como ésti…, porque nun somos mui grandes… nun sé si n'otros sitios con un nivel de población asemeyáu, el que tira ye precisamente'l que vien de fuera porque-y resulta más fácil…


Tino Brugos
Sí, ye un fenómenu que llamamos l’esiliu gai-lésbicu. Hasta hai cuatru díes, na xeneración que yo más o menos puedo representar, o afrontabes vivir con tolos elementos en contra o poníes unos cuantos kilómetros de pol mediu.
Entós, el fenómenu del esiliu ye una cosa mui frecuente en xente de cuarenta p’arriba. Vemos que los d’Albacete diben a Toledo, que los de Toledo averábense a Madrid, los de Málaga a Sevilla… y equí, hai años, recuerdo que la xente d’Uviéu salía por Xixón y los de Xixón diben a Uviéu pa que nun los viera naide.
Eso ye l’esiliu. Y en comunidaes pequeñes eso ta ehí.
Si hai una ciudá grande, el fenómenu gai-lésbicu ye un fenómenu urbanu. Son nes ciudaes grandes onde puede apaicer una pequeña comunidá LGTB, como Chueca o chuequines más pequeñes. Y eses ciudaes, Bilbao, Barcelona, Sevilla, Valencia, atrai lo que ye de los alredores, pero cuando quedes a la intemperie, entos hai lo qu’hai.
Y nesos grupos, sí ye verdá que suele haber xente d’al llau.
Pero esi fenómenu, que nun ye sólo d’equí nin muncho menos, creo qu’hai que medilu como llastre, como daqué que funciona mal tovía.
Que la xente nun seya capaz de dicir “bono, tengo lo que tengo detrás de min, que ye la mio familia, la mio retaguardia afectiva… nun hai dengún problema, saben lo que soi, tiénenme integráu…” non, la xente tovía, nesa época, marchaba fuera.
Y equí siempre hubo xente na dirección que yera asturiana, pero non en cuestiones de visibilidá, quedaben siempre nun segundu planu.
Y yo creo que lo que ta pasando colos xóvenes ye que los xóvenes vienen cola familia, tienen a la madre o al padre detrás. Esi ye’l cambiu.


Una asistente
Claro, ye qu’antes, nesti sitiu, que nun ye otro qu’un pueblu onde se conoz tol mundu, yera difícil, porque nun t’esponíes tu namás, ye qu’esponíes a tola to familia, a los amigos… y lo que podíes pasar tu mal, sabíes que-y lo traspasabes a la familia, y entós, yera más fácil poner tierra de por medio y comíeste’l marrón tu solu.


Isabel Solís
Ye que cuando salíes del armariu, sacabes tamién a la to familia. Y lo que nun momentu determináu podíes sufrir tu, la to familia tamien lo sufría.


Mané Fernández
Eso pensámoslo toos nun momentu determináu. Súfrolo yo, pero qu'a la mio familia que nun me la toquen.


Tino Brugos
Y tornando al fenómenu integrador, dellos de nosotros, que venimos de peinar munches canes, pensamos que si un colectivu quier tener una vocación, tien que vinculase a la xente que diz representar, o ser representativu del sector social col que t’identifiques. Entós, o faes por integrar xente con diferentes sensibilidaes o al final termines reducíu al to grupu de cuatro colegues.
Y creo que nesti tiempu ficimos bien en dir integrando. Tuvimos un grupu específicu de trabayu con xóvenes. Costó ‘l feminismu-lesbianismu, pola so dinámica específica, pero yo creo que’l grupu de lesbianes, que venía funcionando dende un añu antes de la fundación de XEGA con diversos altibaxos, agora ta consolidau y faciendo coses. Integramos un grupu cristianu, y eso fue complicao, porque paez como si nosotros tuviéramos una guerra frontal cola ilesia, pero non, lo que tenemos ye una guerra con determinada xerarquía de la ilesia qu’esparde un determináu discursu. Esi grupu cristianu, hai años yera poco menos que clandestín, porque aconceyábense nun día aparte, y la otra xente nun sabía quienes se reuníen… y al principiu hubo polémica, pero enseguida s’entendío que teníamos que contar con xente de dientro que ficiera un discursu favorable a nós, y el problema yera que, como taben dientro, esa xente nun podía vese, nun podíen aparecer, pero, nel tiempu qu’eso funcionó, los nuestros materiales, los nuestros documentos, taben ellaboraos por xente de dientro, utilizando, nel mesmu so llinguaxe, argumentos pa cuestionar los argumentos de la xerarquía.
Y ye verdá que nun primer momentu hubo xente que dixo que non, que nun podía haber equí un grupu cristianu, pero nosotros diximos que defendíamos a cualquiera que pueda tener un problema relacionau cola so orientación o cola so identidá sexual, independientemente d'onde se posicione.
Y nuna temporada salieron casos mui raros, salió un cura del armariu, salió un militar del armariu… y dellos dicíamos, “home, idiolóxicamente nun m’identifico pa nada colo que significa ser sacerdote, o colo que significa ser militar”, pero pescanciábamos que cuando lo qu’había yera dalgún nivel de discriminación, nosotros tábamos p’apoyar a esa xente.
Llogramos tamién, nos últimos años, tamién estabilizar un pequeñu núcleu de families…
Pero tamién hai que ser conscientes de qu’agrupamos a una parte ínfima de los colectivos, la mayor parte de la xente nun se siente vinculada, o identificada…


Mané Fernández
O nun ve la necesidá de qu’haya un colectivu.


Tino Brugos
O piensa que nosotros debemos de tar ehí pa cuando ellos tengan algún problema.
Pero’l colectivu fará lo que decida la xente, y cuanta más xente haya, más representarivu será.
Pero ye complicao que la xente se sienta identificada como pa participar.


Un asistente
Va unos meses que n’Inglaterra quiso facese una campaña con xugadores de la premier league, esos grandes iconos, diciendo, simplemente, que taben en contra la homofobia, pero tuvieron tanta presión qu’un xugador suicidóse.
¿Nun da la sensación de que, de manera interesada, ta aparentándose de que ta la cosa más avanzada de lo que rialmente s’avanzó?


Isabel Solís
La igualdá llegal sí s’algamó, pero pa la igualdá social falta muncho tovía.


Mané Fernández
Esa ye la pregunta ¿tenemos la mesma igualdá social que llegal?
Pero lo que tas diciendo ye verdá. Hai un porcentaxe mui altu del colectivu LGTB que piensa qu’esto ta parao y que nun va cambiar. Dicen que ya tenemos una igualdá de derechos y qu’esa igualdá de derechos tien que danos la igualdá social. Cuando nun ye asina.
Y lo que veo peor ye que piensen qu’esos derechos que tenemos son inamovibles, cuando nun se dan cuenta que, realmente, equí les coses pueden cambiar, y que podemos retroceder años y años. Y lo que vemos ye que si esos retrocesos lleguen a dase, después va ser mui difícil volver a llegar a lo que tenemos.
La xente ta mui aposentada nel so sitiu, en sin dase cuenta de que la realidá social, la realidá de la cai, ye diferente dafechu a la que nos pueden tar vendiendo pola tele.


Un asistente
Creo que nel fondu, el problema ye d’educación, de cultura, y nesi sentíu ye pa valorar les actividaes d’educación que tais desarrollando.


Mané Fernández
Pa nosotros la educación ye primordial, y non na mas la educación reglada, dir a institutos ya eso, si non tamién la educación social.
Eso ye esencial. Que la xente sepa lo que ye. Ye fundamental p’acabar cola homofobia, pero non solo la homofobia, si non pa ver d'onde vienen toles fobies sociales que se pueden dar a les minoríes. Toes tienen un puntu de partida que ye’l machismu.


Una asistente
Nesi sentíu, yo toi viendo un retrocesu. Veslo nos crios que ven normal que te peguen o que t'insulten...


Tino Brugos
Antes d’entrar neso, anque ya vos adelanto que la mio respuesta va ser que sí, qu’hai problemes, quería comentar que creo que, como colectivu, tenemos un trunfu que sorprendió n’Europa. ¿Cómo fue que la católica España té con esti tipu de coses? Bien.
¿Cómo y en qué contestu se dio? Pues diose cuando hubo un cambiu xeneracional nos grandes partíos estatales. Esos partíos tuvieron que decidir cómo forzaben una alternativa pa tornar a llegar al gobiernu na alternancia ya innovaron el programa. Y nesi contestu, cuando’l PSOE salió del poder dempues de quince años, nos que nun fizo nada, simplemente despenalizó, el partíu socialista plantégase renovar, y llega un líder nuevu. En Izquierda Unida hai tamién un líder nuevu. Eso ye un elementu a tener en cuenta.
Otru elementu a tener en cuenta ye, que nesi contestu, hai un cambiu xeneracional nel colectivu, nel movimientu. Hai una primera xeneración que ye a la que-y toca denunciar la llei de peligrosidá social, cronolóxicamente tamos falando de los años setenta, hai una xeneración a la que-y toca amoriar nos años ochenta, y ehí dase un retrocesu importante, y hai una recuperación del activismu nos años noventa. Y ye la xeneración de los años noventa la qu’impulsa una tercera oleada que ye la que consigue esto.
Creo que tamién se trabayó bien alrodiu de la política d’aliances. Esplicóse bien lo que nosotros tenemos como idega d’igualdá, y la preba ta en que les fuercies polítiques parlamentaries, que siempre ye más complicao, porque son más reacies a tomar decisiones fuertes, xunto con otres fuercies polítiques minoritaries, asumieron el nuestru discursu ensin mayor problema. Sólo faltaba que se diera l’alternancia política.
Y dióse nel añu 2004. Y sorprendentemente, caltuvieron lo que dixeron.
Y ehí lo que tenemos ye un llogru políticu, y agora lo que nos toca ye consolidalu no social. Y ye ehí onde nos tamos moviendo agora, porque, como dixísteis, la igualdá política o la igualdá llegal ye una cosa y la igualdá social ye otra. Tamos intentando que no social, lo que ye llei, se torne a una normalidá social.
Y ehí xuntámonos col tema de la muyer, nel que la igualdá llegal, que se constata cola Constitución del 78, trenta años dempués vemos munches llagunes… a niveles salariales, a niveles d’inserción nel mundu llaboral… Nós siempre utilizamos esa referencia, porque pensamos que vamos por detrás, lo que marca’l movimientu de muyeres anúncianos lo que va pasar.
Pensamos que tamos nuna etapa que va ser llarga en cuanto a normalizar esti fechu. ¿Por qué? porque hai suxetos sociales qu’ellaboren y reellaboren continuamente los argumentos de la homofobia.
Tenemos a una institución, como la xerarquía eclesiástica, y a dellos sectores políticos que lo asumen como propio, y tenemos enriba’l recursu d’inconstitucionalidá del Partíu Popular. Esto ye lo qu'hai, y a partir d’ehí ye onde tenemos que trabayar.
Antes comentábais del fútbol, pero nun sólo’l fútbol, tenemos que xugar tamién un papel importante n’educación… naquellos espacios nos que té una lesbiana, homosexual o transexual, tien de visibilizase, y si nun se visibiliza ante indivíduos si non ante una masa, la masa reacciona de manera hostil.
Quier dicir que si yo salgo a un campu fútbol despues de dicir que soi gai… bono… son miles los que van en contra. Cuando, hai años, cantaben aquello de “sal del armario Romario”, taben llamándolu maricón, y eso cantábenlo miles de persones nun campu.
¿Qué ye lo que pasa? Que’l buen discursu y lo políticamente correcto caló como políticamente correcto, pero en cuanto salimos un puquiñín de la corrección política, xorrecen les pulsiones de tola vida.
El conductor que diz lo de “muyer tinía que ser” cuando adelanta, eso sigue tando ehí. Y claro, lo de maricón o bollera o lo que seya, salen en cuanto se ruempe’l puntu de corrección política.
Entós naide nun programa de televisión, por exemplu, saldrá faciendo un programa con un discursu hostil, salvo cuando sal algún partíu d’estrema derecha, o cuando Mariano Rajoy sal diciendo que nos quier quitar derechos. Pero, eso sí, cuando hai un rollu masivu, ye muncho más fácil que torne a desempolvase’l discursu agresivu.


Un asistente
Y tá’l peligru de la regresión, d’echar p’atrás. Hai coses qu’asusten, como un canal de televisión, intereconomía, que nun podríes creer qu’esistiera hai años, polo que dicíes de la corrección política. Equí lu tienes, raca raca, en direutu tolos díes, y tovía se corten.


Mané Fernández
Ye verdá, paez qu’esiste una corrección política hasta un momentu determináu, pero agora tá frañéndose esa corrección política.


Una asistente
Y toes estes figures, como los presentadores de la tele más conocíos, nos programes del corazón y too eso, ¿ye bono o ye malo? ¿Creyeis que normalicen?


Tino Brugos
Creo qu’exercer la visibilidá ye la única posibilidá de romper con esos discursos ‘políticamente correctos’ que te faciliten mostrate nunos espacios pero n’otros nun puedes o nun debes. Mientres esista esa segmentación na sociedá que diz que nunos sitios sí y n’otros non, lo que tenemos que facer ye forzar la visibilidá en tolos sitios. Hai qu’avezar a la sociedá a que vea que tamos en tolos sitios, tamién nos campos de fútbol. Puntu.
Entós cuando sal en Cataluña un equipu de fútbol de xente que son gais, cuando ves a una peña del barça que son gais, cuando… esi tipu de coses, ye entrar a romper un espaciu que ye hostil.
¿Cuantu tiempu va durar? Dependerá de circunstancies polítiques y sociales. L’estáu
d’ánimu de les mases fluctúa por coses que son mui difíciles de saber y de midir…, que-yos lo digan a los de Túnez, de repente la cosa cambia. Eso ye asina, pero entre que se da y nun se da, lo qu’hai que facer ye exercer la visibilidá en tolos sitios.
Y hai que siguir faciéndolo porque hai espacios y sectores que nos tan vedaos y tenemos qu’entrar.
Y al mesmu tiempu, y esto nun lo tenemos que facer solos como colectivu LGTB, hai que facer una política d’aliances con otros sectores interesaos, tamos nello, hai que trabayar en tolo que tien que ver con niveles d’igualdá, o seya, muyeres, y definir una forma nueva d’afrontar el tema de la igualdá.
¿Cómo podemos ayudar a que la igualdá avance? Ya llevamos faciendo actividaes nesti sen dende hai años, hai que trabayar tolo que tien que ver con un nuevu modelu de masculinidá, el problema son los varones, los varones siguimos siendo ‘mu’ brutos, y l’adolescente tien una percepción de ser varón errónea dafechu. Cuanto más agresivu, cuanto más machirulu, cuanto más burru, cuanto más glaye, cuanto más toquetee a les compañeres que tien al llau, cuanto más alardee de ligues riales o virtuales, cuanto más… esi modelu de masculinidá nun s’adapta al finxu de futuru al que queremos dirixinos.
Y si tenemos eso delimitao nidiamente, lo qu’hai que facer ye trabayar n’educación, trabayar con elles pa que defiendan con uñes y dientes la igualdá. ¿Por qué? porque del mesmu mou que lo nuestro puede peligrar, ta peligrando, elles tamién, quiciavis con menos peligru, pero ye verdá que, por exemplu, delantre una situación de crisis nuna empresa, lo más fácil ye dicir “quitamos a les tíes”.
Esti tipu de discursos, por vieyos que paezan, pueden tornar en sin mayor problema.
Entós, defender la igualdá ye defender lo qu’hai de muyeres, ye defender lo que tenemos nosotros, y sabemos quien ye l’enemigu, por dicilo asina, l’enemigu ye una concepción del mundu de la masculinidá. Ehí ye onde hai qu’entrar y lo qu’hai que modificar.


Mané Fernández
Y por enllazar colo tuyo, nos medios de comunicación sigue calteniéndose al colectivu LGTB nun guetu: “podéis salir del armariu nesti tipu de programes, pero equí non”. Nun veréis a xente d’informativos o de tertulies polítiques, pero sí en programes con una connotación… de maruxéu, nun sé, más frívolos. O seya, de tema “muyer” nel so pior sentíu…, de cotilléu, y eso tamién tien que ver col machismu.
Nun puedes entrar nel “mundu del home”.


Tino Brugos
Pero ta la parte de la visibilidá. Nun sé, por poner un exemplu, Boris Izaguirre ¿ayuda o nun ayuda? .
Pero tamién ta'l cine, les series de televisión onde se trata’l tema con normalidá… esi tipu de coses ayuden no global.
Otru exemplu: qu’apaeza Jesús Vázquez. Jesús Vázquez ye un individuu que fai un discursu que se correspuende col movimientu. Pero munches veces tendemos a meter nun mesmu cestu a Jesús Vázquez, a Boris Izaguirre… a discursos que nun son iguales.
Pero ye preferible siempre que salgan a que nun salgan, porque cuando salgan, si tengo posibilidá, a min tocaráme dicir que m’allegro de qu’haya ehí un gai o una lesbiana diciendo coses, anque convién que sepáis que'lnuestru mundu ye lo bastante diversu como pa que conozáis qu’además de personaxes frívolos, hai individuos serios.

Llevamos tiempu intentando falar de la diversidá del colectivu, y la preba ye que primero yéremos gais, llueu gais y lesbianes, llueu incorporóse la transexualidá y la bisexualidá, xente metía nel mundu del activismu políticu, activistes sociales…
Pero’l problema qu’hai colos medios de comunicación ye que quédeste colo que ves, y claro, sal el “Jorge Javier” me paez que se llama, y madre de dios. Ya verdá ye que me cargaría esi programa, pero bono, dientro del espaciu “bazofia”, hai de too. Y toos tenemos daqué de bazofia nes nuestres cases. Nosotros tamién tenemos.
Hai poco descubrimos un gai que tien un blog n’internet que diz que ye gai d’estrema derecha. Bono, estes coses pasen.
Tamos na época del “frikismu” ¿non?, pues bono, frikis a calderaos.


Mané Fernández
Hai qu’entender que somos tan diversos y plurales como’l restu la sociedá.


Una asistente
Polo que tais comentando, paezme especialmente problemáticu y difícil l’ámbitu educativu. Soi maestra y pienso qu'hai pocos temes que pueda plantear en clase que llueu puedan venir los padres a pidir cuentes, y esti, probablemente ye ún d’ellos.
Ye un tema que nun s’aborda de manera direuta nos currículos, trátase bastante por encima, ye como una “coletilla” que se pon nos términos de la diversidá, la igualdá, “iguales de raza, relixón y condición sexual”.


Tino Brugos
Nin siquiera’l “bulling” y fíxate qu’acosu por orientación sexual hai en tolos cursos, ellí onde puede haber un neñu con pluma o una neña con martiellu. Vamos, ehí van. Pues nin siquiera nel “bulling”, en toles disposiciones que tienen que ver cola conseyería o'l ministeriu, eso se visibiliza.


Isabel Solís
Esi ye un conceutu que se tinía que trabayar ya dende educación infantil. Nosotros nun tendríamos que llegar a dar estes charles si dende la educación infantil s’entamara a educar neso, na diversidá sexual, na diversidá familiar... con naturalidá.


Una asistente
Ehí ye onde quería llegar. Creo que vosotros facéis un llabor mui interesante cuando vais a los institutos y dais charres y tal, pero creo qu'eso tendría realmente munchísimu más fondu si hubiera un trabayu previu, si nun lo vieran como una cosa totalmente ayena al mundu d’ellos, como algo estraterrestre.


Tino Brugos
¿Cómo pensais que s’organicen toles charles que vamos dando polos centros? Esti ye’l nuestru cuartu añu. L’añu pasau recorrimos casi cuatro mil kilómetros, que ya son kilómetros pa una comunidá de diez mil kilómetros cuadraos.


Mané Fernández
Bono, llevamos cincu años ufiertando charles n’Asturies, y tres dientro d’un programa institucional, de los pocos qu’hai.


Tino Brugos
Sí, y ¿cómo se fai eso? Pues a traviés de la Conseyería de Salú. Nun ye la d’Educación.
Educación nun quier esa patata caliente.
Y en sin embargu, pa lo que falamos de trabayar un nuevu modelu de masculinidá, entendemos que ye básico, porque les charles nun les damos p’aquelles alumnes o alumnos que tengan una orientación sexual distinta, que sí, que ya me prestaría a min que me les hubieren dao cuando taba colos mio catorce años allá colos xesuítes, sí, facémoslo pa ellos, pero facémoslo básicamente pa tolos otros. Porque lo qu’ hai que facer ye prevenir les agresiones nesi alumnau presuntamente heterosexual y mayoritariu, y eso hai que facelo dende la base.


Isabel Solís
Además agora los neños y neñes de families homomaternales o homoparentales tan entrando na escuela, entós hai qu’entamar a educar na diversidá familiar dende ehí.
Hai que tratalo con tola naturalidá, como cualquier cosa.


Mané Fernández
Con estes charles y con esti programa lo que queremos nun ye que la xente dientro l’institutu, como se diz, salga del armariu, non. Lo que más interesa, a min polo menos, ye trabayar col restu de la población que nun ye LGTB, pa poder terminar cola homofobia d’una vez por toes, anque ye difícil. De fechu, la base de la nuestra charla ye erradicar la homofobia, educar en valores.

Y ye triste, pero tenemos notao un retrocesu de cuando entamamos a agora, veslo nos comentarios de los crios, no que te dicen, y tamos falando d’institutos que lleven tres años nel programa, onde debería d’haber una evolución, porque además, nun tamos solos nesi programa, supuestamente ellos deberíen facer un trabayu transversal.


Una asistente
Sí, pero veslo tamién na televisión, tamos tornando al “macho ibérico”. Ta tamién na manera de relacionase, de comportase coles compañeres. Ye terrible ver encuestes de guah.es de catorce años y la idega que tienen de relación... Hai una crisis de valores.
Y nel casu concretu de la violencia machista hai tamién un retrocesu clarísimu.


Tino Brugos
Sí, les estadístiques de violencia muestren qu’hai una franxa d’edá mui xoven que reproduz lo qu’ocurre nes franxes elevaes. Tenemos que ver que ye lo que ta pasando cualitativamente pa qu’eso se té reproduciendo asina.
Un par de claves.
Unu, el deterioru del sistema educativu, que nun dexa de ser el reflexu de los valores sociales, y dos, inmigración.
De la primera, yo creo que vivimos nuna época na que la xente aspira a tener fíos y-yos los mantenga l’estáu. Ye asina, “que me subvencionen too” y llueu tamién van pidir qu'a ver si los puede atender l’estáu. Tamos nuna xeneración onde trabayen los dos componentes de la familia y hai una serie de llendes que tienen relaxao. El rol que cumplía la familia a la hora d’integrar a los sos fios nel modelu social, agora la familia ta ocupada n'otres coses y dexa esi rol a la escuela. Pero la escuela nun tien lexitimidá, porque llueu, si tu na escuela intentes marcar les llínies roxes de por onde tienen que ser determinaes coses, hai families que te lo cuestionen, y lleguen ya incluso te peguen. Bono, nun ye lo xeneral, pero sal nel periódicu.
Y entós, lo que pasa ye que determinaes coses que ya taben pautaes, y había instituciones, la escuela, la familia, que, por dicilo asina, marcaben el camín a esos menores, … nun sé…, de cómo facer nel procesu de socialización, como comportame, como aceutar esto y trabayar lo otro …, agora ye más difuso, y como ye más difuso, ocurren coses.
Toi ablucáu de les coses que pueden ocurrir, acabo d’incorporame a un centru urbanu, y ves crios de quince años en fase de desintosicación, lo que quier dicir que lleven años intosicándose con sustancies. Nunos casos les families vienen siendo un desastre, pero tamién m’atopo con alumnos de “primero de la ESO” que tan denunciaos poles sos madres ante la fiscalía porque-yos peguen a les madres. Y entós ehí, ¿qué podemos facer dende l’ámbitu escolar?¿cómo podemos correxir eso?.
Si nun hai llendes en casa y yo atrévome a pegar a mio madre, ¿qué puedo regular dende l’ámbitu educativu?. Absolutamente nada.
Y equí lo que tenemos ye un deterioru del modelu educativu que tien que ver con un modelu social, cola LOGSE, que, na mio opinión, fracasó. ¿Podemos empeñanos en tener a los mozos hasta los dieciseis años, y, como fracasen, un añu más pa ver si se recuperen, diecisiete nel centru educativu a quienes nun quieren tar? Pero como tienen que tar obligatoriamente y nun quieren tar, salta polos aires too. Ehí tenemos que plantanos y cambiar.

Y dos. Inmigración. Falar d’inmigración ye un tema delicáu. Una bona parte del alumnau procedente de la inmigración que tenemos ye d’orixen llatinuamericanu, y los llatinuamericanos nun son machistes por ser llatinuamericanos, si non que, cenciellamente, hai una cultura dominante llatinuamericana que tien unos comportamientos machistes que nos obliguen a tener que retomar tolo que tien que ver cola igualdá nel casu les muyeres, y tolo que tien que ver con unes pautes de comportamientu p’aceutar la diversidá.
Hai una cultura xuvenil ente estos fios de la inmigración que defienden valores que son inaceptables pal sistema educativu.
La cultura de les bandes xuveniles, la cultura de la relación, del tratu ente neños y neñes, la cultura que tien que ver col respetu al discursu diferente… too eso, pa ellos ye daqué que nun pescancien y , na mio opinión, requier un tratamientu específicu. Y hai qu’abordalo, nel conxuntu del aula, pero tamién con ellos, n’actividaes estraescolares…, onde seya, pero hai que trabayalo, y mientres nun se faga, esa cultura, que defiende unos valores que choquen colo que ye la rialidá llegal va siguir tando ehí.
Tenemos por delantre un trabayu complicáu, pero hai qu’abordalu.

Nun hai un retrocesu porque haya inmigrantes, si non porque a esos fíos de la inmigración naide los prepara que s’integren nos valores qu’esta sociedá quier construir. Y eso requier programes específicos. Y habrá que ver cómo se fai.

Lo que nun puede ser ye que vayan pola cai tocando’l culo a les moces, y que cuando dices “¡oye!”, “tamos xugando”, dicen, y cuando-yos entrugues, “pero ¿tu tienes-yos entrugao a elles si quieren xugar?”, “¡Ahhh!”. Eso ye lo que nun puede ser.


Mané Fernández
Tornamos a la educación reglada, pero nun t’escaezas que los crios vienen col discursu de casa. Habría que trabayar n’actividaes estraescolares, faría falta una escuela de formación de padres… el tema ye complexu.
Ye lo que dicimos siempre en XEGA, la base tien que venir d’una educación social, y por eso son importantes los convenios que se puedan facer, porque tienen que cambiar munches coses de la sociedá, porque l’horizonte al que nos diriximos ye global, pa tola sociedá.


Tino Brugos
Yo creo que'lretrocesu tien que ver cola crisis económica, ye un sálvese quien pueda en munches coses, y tamién porque la xente ta descreyía. Porque, a estes altures, ¿quien se cree'l discursu d’izquierdes tradicional?.


Mané Fernández
Ye lo que tamos falando de la tele, diciamos d’esi canal d'intereconomía, pero ¿por qué nun esiste un contra-canal?
Qu’esista xente como’l señor Berlusconi que diga coses como les que diz, y que nun salga naide a nivel europeu a contradecilu…
Y toa esa peña qu’escribe nos periódicos… vamos, eso hai unos años nun se dicía, polo políticamente incorrecto seguramente, pero güei eso ye lo fuerte, a esta xente tan dexándolos dicir.


Tino Brugos
Bono, eso siempre tuvo ehí. Si fuéramos agora a mirar na hemeroteca lo que salió nel añu 2005, que fue l'añu en qu’empezó a tramitase la reforma llegal que permite’l matrimoniu, recuerdo que los primeros meses guardaba too y llevaba nel coche una cosa así, yera increyíble, yera pa facer un trabayu solos argumentos y barbaridaes que se dixeron.
Pero d’aquella, había contraargumentos, o había otra posición. Lo qu’echo en falta agora mesmo ye la otra posición. ¿Onde ta la izquierda? ¿Onde ta’l so discursu? Nun lu hai.
Tamos falando del copagu, pero, ¿Quién faló del copagu por primera vegada? La derecha.
Tamos falando de la inseguridá, pero, ¿Quién faló de la inseguridá primero? La derecha.
Tamos falando de la llibertá d’espresión en televisión, pero tolo que discutimos son iniciatives de la derecha
Y, ¿qué hai nel otru llau? Yo creo que lo que tenemos nestos momentos en términos sociales ye un desiertu terrible. Terrible. Y les encuestes ya nos dicen lo que se nos vien encima. Vamos tener Berlusconi pa llargo. Tenemos entrao nuna dinámica onde la xente nun se cree nada, nun se moviliza por nada, y na midía que se baxe la guardia dende’l discursu d’izquierda, posibilita que se puedan ver más otros discursos que d’otra manera quedaríen más tapecíos.


Mané Fernández
Sí, ye porque los tan dexando, “yo toi encendiendo un puquiñín, si naide me diz nada, sigo encendiendo”, esi ye’l problema, que nun hai naide que-yos ponga’l contra-discursu.


Tino Brugos
Hai que dir a los clásicos, Gramsci ya lo dicía, ¿Quién ye’l que tien güei la hexemonía? La derecha. La derecha neo-lliberal además, nun la derecha civilizada. Ellos son los que planteen los temes de discusión, y xugamos nel terrén d’ellos.


Un asistente
Quería entruga-vos sol tema del orguyu, lo de la manifestación en Madrid y cómo se ta vendiendo, el so tonu festivu…¿qué opinión tenéis vosotros?


Tino Brugos
L’añu pasáu, n’Asturies salió por primera vez con una carroza na manifestación. Polo tanto, nun tenemos mayor problema.
Hai una argumentación que tolos años intenta plantear lo mesmo: “¿por qué se tienen que manifestar?¿por qué tienen que facese visibles?” y, no fondero lo que quieren ye que nun haya manifestación de visibilidá y d'orguyu.
Y si salimos vistíos, porque salimos vistíos, qu'ónde vamos con trenta y cincu graos a la solombra, y si salimos desnudos, qu'ónde vamos desnudos, y si llevamos una carroza, porque llevamos una carroza, pero si vamos, yo qué sé, vistíos toos de sufridores flaxelantes como los chiítas, …¡menudu espectáculu que tamos dando!.
Pero lo cierto ye que cuando se toca esti tema, naide se plantega reproducir lo que diz la pancarta qu’abre la manifestación.
Ye dicir, tenemos un modelu de movilización que respuende a lo que’l movimientu social se plantega, y asina foi nos últimos quince años. A día de güei, si alguien quier cambialu…, que convoque una manifestación diferente.
Frente a quienes planteen que la visibilidá nun tien sentíu,, que ye un xolgoriu, que nun se qué…, lo que plantegamos ye que nun ye un problema de “fiesta”, si non que ye un problema de reivindicación. ¿Por qué los periódicos, al día siguiente, nunca saquen una semeya de la pancarta de cabeza, o referencies al manifiestu?
Non, siempre la semeya tien que ser “d’otra cosa”, y nun fuimos capaces de romper eso. Y porque eso vende más, claro. Y ye otra vuelta de tuerca alredor de que nun somos un movimientu social.

Otra cosa ye si, dientro de lo que se mueve, hai unanimidá. Nun tien por qué habela.
Nos últimos años, nos alcuentros estatales, hubo sectores que plantegaron la so disconformidá, el so rechazu con respeutu a delles coses.
Los qu’organicen, dan esplicaciones de por qué se fai asina o d’otra manera. Nós nun participamos nel grupu que lo mueve en Madrid. Pero lo cierto ye que tamos falando d’una manifestación que, nos últimos años, mueve un millón o un millón y mediu de persones.
Y nun tamos falando d’ayeri. Alcuérdome que, na época d’Aznar, la única manifestación que movía miles y miles de persones, yera esta. Llueu, cuando lo del Prestige, la fuelga xeneral, la guerra…, eso cambió, pero, na primera llexislatura, yéramos la única movilización de mases qu’había.
Y nunca, nunca, hubo un solu apoyu institucional. Y cuando falo d’un apoyu institucional…, nun sé si sabéis lo que ye atravesar Gran Vía en sin naide que mire porque la xente s’abra y pueda pasar la manifestación, y n’ocasiones ráspiase’l peligru y l’agresión, porque la xente, lliteralmente, invade l’espaciu.
Y nosotros sólo pidimos qu’alguien ponga unes valles pa que pueda pasar la manifestación, y niéguennoslo, niégennos el pan y niégennos la sal.


Mané Fernández
Tenemos que facelo nosotros, col riesgu de que la xente se t’enfrente.


Tino Brugos
Cerróse Chueca, a les dos y media la mañana…, si nel 2005 fue la llei, nel 2006 había cerca de dos millones de persones na cai aquella nueche. Y con dos millones puede haber de too. Y nun pasó nada. Pero podría pasar daqué.

Obligáronnos a llevar la fiesta que facemos depués de la manifestación a La Casa de Campo. ¿Cómo translades a dos millones… o a un millón de persones a La Casa de Campo?
Era una flota contínua d’autobuses en sin parar, un detrás d’otru, pero nun había manera. Hubo que renunciar a la fiesta en La Casa de Campo.

Ye dicir, nunca hubo dengún tipu de sofitu. Siempre hubo problemes pa poder llevar esa actividá alantre.
Entós, en momentos determinaos tiénense aliao con una asociación d’empresarios gai-lésbicos qu’hai nel barriu de Chueca. Y eso fue cuestionao por algún sector disidente. Pero pienso qu’ehí hai un discursu disfrazáu d’izquierdista. Porque yo nun me siento manipuláu porque, por un día, haya una barra d’un bar que represente o que ye d’esa comunidá gai-lésbica, frente a una non-institución, nin naide que t’apoye.
Bono, un bar nun ye una ONG, ellí venden les sos copes y demás, pero denunciar eses coses, na mio opinión, ye garrar argumentos izquierdistes polos pelos. Lo que se fai’l restu l’añu nun ye una venta a la derecha, al capital, … una mercantilización.
Home, si m’obligaren a facer una interrupción, nun sé, pa facer propaganda del corte inglés, ehí nun entro, pero, vamos, eso nun ye lo qu’hai.
Pa min, quienes intenten cuestionanos, por un llau, quieren cargase l’orguyu, y pa eso siempre hai argumentos, y por otru, el sector que ye como más alternativu, tien los argumentos garraos polos pelos.


Un asistente
Otra acusación que se fai a gais y lesbianes ye eso del capitalismu rosa. El so consumismu, la so estética… ¿eso ye asina?¿tien relevancia dientru del movimientu?


Tino Brugos
Ya, eso nun ye nuevo. Hai quienes saquen datos a partir de númberos, y los númberos siempre son manipulables. Si veis, cuando hai unes elecciones, nun hai naide que pierde, toos tienen ganao. Eso ye asina. Y equí, xugando colos númberos, hai xente que llega a determinaes conclusiones.
Por exemplu, anque ye un tema polémicu, damos por fecho qu’hai un diez por cientu de varones, d’esos varones homosexuales, damos por fecho que toos trabayen, y damos por fecho que son dos sueldos masculinos con una base salarial superior al que tienen les muyeres…, como nun tienen neños…, como tol mundu sabe que son una banda promíscuos que salen de doblete de les diez de la nueche hasta les siete la mañana, que tienen un nivel de consumu de la hostia… el resultau ye que si sumamos aritméticamente too eso… claro, descubrimos un “nichu de mercáu”.
Cuando descubrí esa palabra flipé. ¡Toma!. ¡Somos un nichu de mercáu!.
O seya, ser “gai ye güai” porque compres ropa, tienes pasta, sales de marcha y la fundes, y, vamos, que vives como dios.
Pero eso son sólo datos lliniales. Nun se correspuenden cola realidá.
Dientro los gais, habrálos que ten en paro…, con cuatro millones, habrá unos cuantos, imaxino. Y habrá quienes ten trabayando. Habrá los que tengan un cargu de responsabilidá nuna empresa y tengan unos salarios terribles, pero, si tenemos a miles y miles y miles de mileuristes nesti país, habrá tamién miles de gais que son mileuristes.
Pero non, resulta que los gais tenemos la de dios de poder alquisitivu, gastamos, nun aforramos. Y somos un nichu de mercáu. Y eso forma parte d’esa burbulla que si lo repites muncho, puede terminar cuayando.


Presentador
Bono, tenemos qu’acabar, salieron equí un montón de coses interesantísimes, munches gracies por participar y en cuanto podamos, subiremos el resumen al nuestru blog, porque de xuru que vosotros tareis fartos de falar d’estos temes, pero pa munchos otros, esta charra puede ser tamién un granín de sable más pa, como comentárais anantes, poder terminar cola homofobia d’una vez por toes, o, como dixo Mané, educar en valores.