Tertulia: Emprendedores. ¿Emprenden o nun prenden les empreses n’Asturies?

Resumen de la tertulia del 23 de payares de 2010

Emprendedores.
¿Emprenden o nun prenden les empreses n’Asturies?


Na que participaron

Economista y emprendedor

Empresariu, editor y escritor

Tino Fernández
Emprendedor y empresariu


Presentación
Pa la tertulia de güei tenemos tres empresarios invitaos, Carlos Fernández Fuente, Inaciu Iglesias y Tino Fernández, que además de la so esperiencia relacionada con so llabor profesional axunten un bon conocimientu y esmolecimientu común pol fechu d’emprender equí n’Asturies.
Va poco qu’Inaciu Iglesias demostraba n’un artículu nel diariu El Comencio (20 de ochobre de 2010) que “n’Asturies necesitamos seis mil nueves vocaciones emprendedores para poder dar trabayu a los setenta y pico mil paraos que quieren trabayar equí y nun pueden”, creo que con esto ye suficiente presentación, así qu’entamamos en sin más.

Carlos Fernández Fuente
Asturies siempre foi un mercáu pequeñu, toos, más o menos sabemos lo qu’hai, dende qu’entamó’l gobiernu de Felipe González, desarrollóse un modelu basáu na construcción y nel turismu y los servicios. Nos setenta entamó un procesu de desindustrialización que s’aceleró cola entrada na Xunión Europea. Y agora mesmo vemos que vendemos servicios y que tenemos una industria mui feble.
Cola crisis la economía d’equí nun ta preparada. La nuestra industria nun puede competir colos chinos, que tan comprando les materies primes a unos precios que nosotros nun podemos pagar, y enriba vienden los bienes d’equipu a unos precios munchísimo más baxos que los que podemos vender nosotros. Y esto acaba de matar la industria asturiana.
A nivel d’emprendedores, les empreses nun prenden ni n’Asturies ni n’España ni, incluso hasta n’Europa. Los paises del este tienen ya dificultaes pa competir con Asia, y equí hai coles pa colar pa Canadá, Nueva Zelanda, Australia…
Y les empreses nun prenden porque nun se dan les condiciones. Uno pola situación económica, y a nivel social, porque munches veces ún ta más interesáu en cobrar un sueldu en sin facer nada, colo que la sociedá nun ye a avanzar. Si nun pensamos en facer daqué pola sociedá y nun en trabayar lo menos posible y en sin aportar nada, tenemos lo que tenemos.
Y pa terminar, prestaríame diferenciar entre emprendedor y empresariu. Pa mi emprendedor ye una persona a la que-y presta entamar proyeutos, y puede entamar proyeutos dende l’alministración pública, dende una asociación, dende una ONG, dende’l so barriu, dende la so familia, dende una empresa privada… ye decir, simplemente xente que-y presta entamar proyeutos, de cualquier tipu, hasta nel ámbitu políticu. Ye una persona que quier facer coses, y eso aporta a la sociedá.
L’empresariu ye, mas o menos, el que gana perres, o el que lo intenta, y nun ye malo ganar perres, aunque pa min, les perres nun son un fin, son un mediu, y una métrica pa saber si el proyeutu va bien o mal. Pero lo que se trata ye d’aportar a la sociedá. Y ehí, l’empresariu tien un papel, y el trabayador tien un papel, y la xente emprendedora, en tolos ámbitos, tienen el so papel.
Pero nun veo que la xente tenga ganes d’emprender coses, nin nel ámbitu políticu, la xente pasa de la política, nun nel ámbitu de les asociaciones, la xente nun quier implicase con nada, y nel ámbitu empresarial, la xente quier cobrar un sueldín y nun tener preocupaciones, y nun aportar nada a la sociedá. Y esi ye’l problema, si nun hai xente que aporte nada a la sociedá, la sociedá nun avanza, muerre.


Inaciu Iglesias
Hai munches coses… había un modelu nos años setenta ya incluso ochenta al que nos remitimos porque paez que ye l’Arcadia feliz. Cuando falamos de reindustrializar, lo que tamos diciendo ye volver a lo que teníamos primero, n’aquellos años en qu’Asturies taba ente les primeres posiciones d’España y paecía que too yera meyor.
Pero nun yera asina, n’aquellos años la población d’Asturies venía ser como la d’agora, un millón, nes últimes décades nun crecimos, y de población trabayadora yéremos más bien trescientos mil. Agora andamos polos cuatrocientos mil y la idega sería llegar a los quinientos mil. Hai ochenta mil paraos más o menos, pero la medición nun ye tanto’l númberu de paraos, si non el númberu de población que ta trabayando realmente, población activa. ¿Por qué entos agora siendo más xente que nunca trabayando pensamos que nun tamos meyor? Bono, de mano porque hai muncha más xente que quier trabayar, lo que ye bono. Y tamíen l’accesu de les muyeres al trabayu, porque d’aquella nun había la necesidá o la vocación de trabayar por parte les muyeres, lo cual considerábase que si había trescientos mil paisanos trabayando pues ya yera suficiente.

Esto quier decir varies coses. Una, nestos años de reconversión, sí ye verdá que, en númberos gruesos, perdiéronse aproximadamente cien mil empleos, la mayor parte d’ellos na empresa pública. Alcordái-vos que llegábamos a ser cincuenta y picu mil mineros, cuando agora nun llegamos nin a los cincu mil. Y lo mesmo con ENSIDESA, que baxó, y con otres más…
La diferencia ye qu’agora necesitamos crear esos ochenta mil empleos nuevos. Si calculamos que la media de trabayadores por empresa n’Asturies bien a ser, más o menos, de doce persones, eso quier decir que necesitamos miles d’emprendedores, en númberos redondos, seis mil emprendedores nuevos pa poder dar trabayu a toa esa xente que quier trabayar n’Asturies y nun ye quien a ello.

Esta necesidá, hai unes décades nun se sentía, inclusu agora sigue sintiéndose esi discursu: la necesidá de reindustrializar. O seya, que vengan grandes inversores que nun conocemos a montar grandes compañíes que den trabayu a toa esa xente del sector naval, la minería, la siderurxa, el campu y demás.
Bono, pues yo creo qu’eso nun va furrular asina, aunque nun se descarta… vieno DuPont y van venir otros, por supuestu, y eso ye bono, pero, con too y con ello, lo que necesitamos son emprendedores.

Y ehí topámonos col otru tema, ¿qué fai falta pa crear emprendedores?. Por supuestu unes condiciones oxetives. Claro, si el terrén industrial nun ye asumible, si los precios de los llocales tan desorbitáos… pues nun hai manera d’abrir una tienda… nun puedes poner una empresa que se dedique a cualquier estaya … si el personal nun ta cualificáu.
Pero siendo too eso cierto, la clave final ye crear esa cultura emprendedora: xente que se quiera arriesgar a facer empresa.

Y la cultura emprendedora, lo bono que tien ye que ye compartida. Hai tres tipos d’emprendedores básicamente, que son, los emprendedores en sentíu estrictu, los emprendedores empresariales, que son los qu’entamen un negociu propiu y dan trabayu a terceros, llueu tan los intra-emprendedores, que son xente que trabaya nuna organización o nuna empresa mayor pero dientro de la empresa siguen emprendiendo, nun s’acomoden, nun tienen esa mentalidá de funcionariu nel pior sentíu de la palabra, y tamién tan los llamaos emprendedores sociales, que son xente que nun tien mayor interés en facer negocios pola cuestión económica, sinon por facer emprendeduría social, bien política, bien nes ONGs o bien cualquier otra cosa.
Y cualquiera de les tres necesita la mesma cultura, y ye la que nos fai falta meyorar y que yo reivindico cada vez que tengo ocasión.
Asturies necesita más cultura emprendedora. ¿Por qué? Porque necesitamos crear trabayu.



Tino Fernández
Bueno, tando plenamente d’alcuerdu, quixera facer delles puntualizaciones. A día de güei, facese empresariu ye un atrevimientu, una valentía. Los apoyos institucionales tan bastante mal fechos, nun son pa que les empresen emprendedores puedan tirar p’alantre. Esos apoyos van casi amarraos al capital, ye dicir, “tu inviertes tanto, o tas xenerando tantos puestos de trabayu, y yo doite tanto”.
Falando por exemplu del sector que más conozo, Capgemini cuando entró equí, con unos sueldos, …pues bueno…, bastante malucos, recibió trescientos millones, falo de les antigues pesetes, un millón por cada trabayador que fizo. Y decíame un empresariu d’ otra compañía, “ye que yo llevo equí venti años, con seis puestos de trabayu, que me den los seis millones que me toquen, polo menos, ¿non?, que llevo tamién pagando impuestos venti años”.

Y ye tamién bastante complicao si nun tienes un capital inicial. Ye mui difícil tirar p’alantre con una idega. Ye bastante complicao, aunque la idega sea bona y estructurada, con un plan d’empresa y tal. Ehí, l’apoyu que recibes ye bastante baxu.

Y too esto xúnese a la falta de cultura emprendedora, nuestra, de la parte de los qu’emprendemos y tamién de la xente que nun se suma a un proyeutu si nun ye con seguridades. Ye bastante difícil qu’atopes a un sociu.
Y de los bancos ya nin falo, agora ya nun val nin que vaya detrás el ladrillu.Y too eso aparte de la coyuntura económica na que tamos, que ye h.odía pa toos, pa los emprendedores de nuevo y pa los que ya llevamos munchu tiempu.
Y esto ye lo que fai que les empreses n’Asturies nun prendan.

Y falando d’empresa pública o privada. Yo creo qu’esplica más el tamañu de la empresa respeuto a l’actitú que tien la xente pa con la empresa qu’el fechu de que saya pública o privada, y pa mí l’alministración pública ye una empresa enorme.
Y, pol trabayu que tengo, dedícome a facer auditoríes a les empreses, unes más grandes, otres más pequeñes, y cuando les empreses tienen ya un ciertu tamañu, encuentres arronchaos en toes partes. Y claro, eso ye una carga pa tola empresa que tienen qu’asumir el restu los sos compañeros.
Yo creo qu’esto, nuna empresa pequeña, incluso diría que nuna alministración pública pequeña, ye mui difícil que pase.
El tamañu de la empresa ye esplicativu del esfuerzu qu’echa la xente, de lo qu’emprende la xente. Ye muncho más fácil garrar al to xefe, que lu tienes al llau, y propone-y coses nuna empresa pequeña que nuna empresa más grande.


Inaciu Iglesias
Sí, ye verdá que tien que ver col tamañu, pero igual ye una cuestión d’estadística, nun sabría decite’l númberu, pero si ponemos que ye un diez por cientu, hasta que nun llegues a diez empleaos, nun te va tocar un arronchau. Y aumentando’l númberu de trabayadores, aumentes les posibilidaes de topalos escelentes, bonos, malos y desastres.

Pero tampoco tengo mui claro que la raya divisoria seya público o privao, pero sí tien que ver. O seya, nin grande nin pequeña, nin público o privao, ye más bien cultura d’empresa.
Claro, una empresa privada y pequeña nun tien falicidaes pa que la xente pueda agospiase allí y nun facer nada. Y una empresa grande y pública tienlo más fácil pa qu’un enchufau quede y se dilíe ente’l común.
Pero yo nun soi de los qu’enfrenten empresa privada y pública. La empresa pública aportó munchu conocimientu, munchu ‘savoir faire’. Mesmamente los procesos de selección de personal aprendieron muncho de la pública. El mesmu procesu d’oposiciones, ye más difícil entrar por enchufe nuna alministración que nuna empresa privada. Y munchos sistemes de calidá, munchos sistemes d’innovación vienen de la pública. La empresa privada aprendió muncho de la pública, y tien muncho que seguir aprendiendo.
Pero la empresa pública tien muncho qu’aprender de la privada. Y agora, una de les claves ye esa palabra tan políticamente incorrecta de la productividá. La productividá ye una cosa tan simple como la ecuación entre lo que vendemos y la xente que somos. Asina de simple. Entos, si tengo una empresa con cien trabayadores, tengo que vender… cien millones, pa ponelo en númberos claros… pero según tan los tiempos, nun señor, tengo que vender cien millones con ochenta persones, y si quiero seguir coles cien persones, pues tengo que vender ciento venticinco. Y ehí, la empresa pública, por esos sistemes de trabayu, en cierta manera, vitaliciu, tienlo más complicao. La prueba ye que mientres la empresa privada nun fizo otro que perder puestos nestos tres años, un millón y picu más de paraos n’España, unos trenta mil de paraos más n’Asturies, los trabayadores de la función pública nun solo nun disminuyeron, sinon qu’aumentaron incluso, colo cual ehí hai una contradicción qu’hai que resolver.


Carlos Fernández Fuente
Toi d’alcuerdu colo que diz Tino, pero ye que na empresa grande ye más fácil que la xente s’escuenda. Ye verdá. Pero lo que nun me presta de la tertulia ye que toos temos d’alcuerdu, así que voi dar un poco de caña.
Creo qu’hai que quitar les subvenciones a les empreses, porque pienso qu’el dineru públicu tien que dir meyor a correxir les desigualdaes sociales. Si non llegamos al estremu que ye que la xente trabayadora té dando perres a los bancos pa salvar a xente que tien perres de sobra.
Y el viciu que tien Asturies ye que tol mundu ta pola subvención. Yo nun recibo subvenciones. Toi tol día viaxando y vendiendo fuera d’Asturies. Puntu. Y nun pido denguna subvención.
Y equí n’Asturies, entre’l Cluster TIC, la asociación de nun sé qué… móntense’l chiringuito. Y eso ye vicioso.
Yo tuve de voluntariu’n Cáritas y vi que hai xente con munchísima necesidá que realmente lo necesita.
Lo qu’hai que crear son les condiciones, qu’eso ye otru tema. La xente tien que tar formada, hai que favorecer la esportación, hai que favorecer y premiar el talentu, hai que traer talentu de fuera, hai que falar idiomes, hai que saber vender, cuando montes una empresa de software nun ye sólo pa vender al que tienes enfrente, hai que vender en China y n’Estaos Xuníos, como faen los alemanes… hai que cambiar la mentalidá. Y eso nun se fai con subvenciones.
El prósimu añu, que van baxar munchísimo les subvenciones porque les alministraciones nun tienen perres, ya veréis la cantidá de xente que van a echar a la cai, por exemplu, les empreses TIC [Tecnoloxíes de la Información y Comunicaciones] n’Asturies. Si eso ye un modelu d’empresariu…


Tino Fernández
Val, neso vuelvo a tar d’alcuerdu. Les subvenciones, pa min, son un mecanismu pa un casu puntual. Nun sé, mañana’l fierro sube’l trescientos por cien y nun podemos permitir que quiebren toles empreses de fierro. Ye un tema social y de riqueza, pero completamente puntual.
¿Pero qué pasa n’Asturies? que ye una cosa endémica.

Cuénto-vos un casu real. Hai nun tanto fui a una empresa relacionada col mundu de la construcción, po lo que taben bastante mal, y pidiéronme que-yos ficiera una auditoría de rede, y pedí-y al empresariu ochocientos euros. Y quedóseme mirando con una cara como si yo fuera un estraterrestre. Cuando-y pregunté qué-y pasaba, enseñome un presupuestu d’otra empresa, precísamente d’un amigu míu, que-y dixo qu’eso costaba cero. Enfín, pensé que sería por una política comercial mui agresiva, nun sé, que fai l’auditoría gratis pero llueu espera seguir con otres coses...
Pero cuando-y pregunté al mio amigu cómo podía facer eso, díxome que por cada auditoría d’esi tipu que facía recibía cinco mil quinientos euros del Principáu.
Y claro, ¿qué ocurre? qu’eso impide la competitividá. L’empresariu nun te contrata porque lo faigas bien, sinon porque tas nel club de los seleccionaos pol Principau pa facelo. Si esi tio lleva diez empreses d’esi tipu, son cincuenta mil euros de mano d’obra, nun los facturo yo tolos meses, garantízotelo.
Esi tipu de subvenciones estropeen el mercáu. Falen los lliberales del llibre mercáu a tope, pero cuando-yos toquen el bolsu, interviénenlu hasta les tranques. Eso nun val. Eso ye trampa. Y eso ye un mal endémicu. Y son perres que salen de los nuestros bolsiellos.
Hai xente, empreses, que viven de les subvenciones. Nun necesiten ser competitives. Y el día que s’acaben les subvenciones, quinientos tios a la cai. Fuera.


Inaciu Iglesias
L’alministración capta perres de los nuestros impuestos y llueu tien que revertilos. Val. Y hai maneres de revertilos, una d’elles ye la cuestión directamente social, de necesidá, d’ayudar al que ta nuna situación na que nun puede trabayar polo que seya, por un problema de salú, porque ya tien una edá y ta retiráu, o porque ta puntualmente’n paro, y evidentemente eso ta mui bien. Lo que cotizó vuelve pa él. Yo creo qu’eso nadie lo pon en duda.
Y tamién creo que ye interesante crear esi texíu industrial o empresarial que ye necesariu pa crear puestos de trabayu, pa seguir allimentando a la propia alministración y a la propia sociedá. Y eso ye bono. Y una política de subvención, como tal, nun me paez malo.
Lo que pasa ye qu’ hai que facelo bien. Hai que saber onde s’invierte. Hai munches maneres d’invertir. Eso tamien pasa dientro d’una empresa. Nuna empresa tienes distintos productos. Hailos que tienen muncha rentabilidá nel futuru pero que tienen munchu coste agora. Y ehí inviertes.
Hailos en cambiu que ya se vienden solos, y d’otros tipos de los que nun voi estendeme equí. Entos ¿ónde tienes que invertir? Nos que ya tan dando de sí, nos que ya funcionen, nesos nun inviertas un duru. Si ya ves que van a morrer, mientres de de sí la vaca llechera sigues catándola y llueu acabóse.
Pero pon les perres nes que tienen futuru. Eso tien que ser una política de subvención.

¿Y cómo cuadra eso con que ten subvencionando a la minería? Nun tien que ver con que pensemos que ye un sector de futuru. Tien más que ver con que temos enterrando nun pozu, y nunca meyor dicho, un montón de perres por cuestiones d’otru tipu. Por una cuestión social, aunque eso cada vez ye menos importantre, porque ya nun hai muncha xente que dependa d’eso. Otra cuestión ye la política, porque eso sigue siendo una cantera de votos, y yo creo qu’esa ye la clave. Y la tercera razón ye la estratéxica y militar. El carbón nació de tola vida como un sector estratéxicu, ye la única fonte d’enerxía que ye propia.
Pero toles perres qu’inviertes nel carbón nun son pa crear empleu. Entós igual merez más la pena nun invertir ehí ya invertir n’otru llau.

Y una de les cuestiones que nun solemos falar d’ella, ye que creo que la responsabilidá de l’alministración ye que tien que xenerar negociu. Y viénenme a la tiesta tres o cuatro exemplos de grandes inversiones públiques que, bono, más o menos son necesaries: l’hospital …, la televisión, …o la incineradora, que ye d’agora.


Un asistente
O la planta de captura de CO2. Doscientos millones d’euros.


Inaciu Iglesias
Ya, pero entendeisme ¿non? ¿ye necesariu un hospital? … home , cuanto meyor sanidá tengamos… tol mundu lo ve bien.
¿Una televisión? Bono, pues porque ye un sector importante, de futuru, y por cuestiones identitaries… paez interesante.
¿Lo de la incineradora?... bono, prefiero nun estendeme n’ello, creo qu’equí nun ye’l sitiu afayaízu… pero en cualquier casu, lo que ye un fechu ye qu’el nuestru gobiernu va invertir ellí unos cuantos millones d’euros.
Nos tres exemplos ¿ta favoreciéndose, ya nun digo obligar, a contratar a empreses asturianes?, ¿tan dando-yos facilidaes?
Nel casu de la TPA claramente non.
Nel casu del hospital non.
Nel casu de l’ampliación del Musel, en parte si y en parte non.
Y claro, eso ye fastidiao. Que nosotros paguemos impuestos pa que la nuestra alministración xenere negocios de los que s’aprovechen terceros...
Cuando nun tienes más remediu, porque nun hai equí nadie que pueda facelo, tovía lo puedes llegar a entender. Pero ehí si que veo una responsabilidá. Y ehí nun tamos falando de subvenciones.
Podía xenerase negociu por parte la nuestra alministración que podríamos aprovechar, en sin falta d’una política d’aranceles o de obligatoriedá.
¿Qué nos pasa a los empresarios asturianos? Que munches veces, cuando vamos a competir fuera, tenemos una barrera qu’entendemos, y que nun rechazamos, cosa que nun tenemos equí. Equí, el que vien de fuera, en ningún momentu va tener esi problema.

En definitiva, creo que les subvenciones tienen que seguir esistiendo, aunque ye mui importante canalizales bien, pero lo qu’echo en falta de la nuestra alministración ye el canalizar el negociu pa les empreses asturianes, presentes y futures.


Una asistente
Enllazando colo que dices, hai un exemplu que siempre me llamó munchísimo l’atención, cuando’l Principau contrata pa facer un catálogo de núcleos rurales, que necesita un bon conocimientu del territoriu, una gran comprensión de lo qu’esta tierra fue y ye, contrátase a una empresa madrileña. Nun sé por qué, pero non porque ye la que tien la meyor ofierta.


Inaciu Iglesias
Creo que ye en parte por complexos, por pensar “¿cómo esti lo va facer bien si lu conozo yo?... non, si lu conozo yo nun pue ser bono”.
Esto enllaza cola mentalidá poco emprendedora de los asturianos. Socialmente nun vemos bien eso d’emprender. Ser empresariu ta mal visto, y ta pior visto facer negocios colos amigos.


Un asistente
Eso ye nidiamente discriminatorio. Ta discriminándose lo asturiano.


Una asistente
Pero ye lo que n’otros sitios ye normal. Eso nun ye discriminar, ye priorizar.


Otru asistente
Yo creo que la xente d’Asturies ye mas emprendedor de lo que paez. Esplícome. Nel boom inmobiliariu, había cais nes qu’había más inmobiliaries que chigres. Y vi xente, prexubilaos de la mina que vivíen tranquilamente, que xuntábense con tres amigos y “construímos, vendemos y meyoramos”. Xente que na so vida invirtió en nada, de pronto garraben ya invertíen perres n’una cooperativa pa facer un edificiu, vendélu nun añu y ganar trenta o cincuenta kilos.
Ye dicir, al golor de les perres aquello salió.
Había xente con ganes de facer coses, pero yera una cosa mui primitiva, mui poco educada. Por tres razones, primero el nivel educativu, muncha de la xente que tien capacidá d’invertir tien unes edaes que conlleven un nivel educativu bastante baxu comparao con xente de trenta años. Munchos nun tienen educación secundaria.
Dos, porque n’Asturies, onde vivimos, nun se promueve a los sectores más imaxinativos, a los de más futuru a la hora d’emprender.
Y tres, y equí siéntolo, pero tengo que tornar a l’alministración, d’aquella había facilidaes, … desgravaciones… nun poníen impuestos soles segundes o les terceres residencies…, si consiguieramos qu’eses facilidaes tuvieren n’otros sectores de más llargu recorríu, de mayor productividá… nun creo que la xente, si se-y ufierta la posibilidá, seya tan refractaria a ello.


Inaciu Iglesias
Si, creo que la xente tien inquietú. Y efectivamente, como comentes, neso de les ayudes hai una evolución. Hai unos años a lo que se daben facilidaes yera a les empreses de fuera que se veníen a instalar equí, o a les empreses de nueva creación mui innovadores, en definitiva, a coses que nun esistíen equí, pero nun se ayudaba a los que ya taben, cosa que ye discriminatoria.
Ye un poco como la parábola del fiu pródigu, un fiu marcha y cuando vuelve too son parabienes, y l’otru, que quedó en casa trabayando como un desgraciau diz, “ostra, y yo que fice lo que tenía que facer, qué pasa conmigo?”
Bono, algo d’eso hai.

Y d’otra manera, les ayudes y subvenciones teníen esa mentalidá, que nun sé si llamala social, que venía a dicir “cuanto peor lo té pasando usté, cuanto más duru seya’l so sector y cuanto más me demuestre que ta perdiendo, más lu voi a ayudar”. Y entos, cuando entruga l’inspector que cómo va’l negociu, la respuesta ye: “fatal” “¡fatal!, porque entre los gastos y los impuestos…”; “¿y vende usté muncho?” “¡qué va! si esto ye un desastre… nun sé a onde vamos dir a llegar… voi necesitar una subvención”.
Y asina funcionaba hasta hai cuatro díes.

¿Qué pasa agora? qu’agora ye tolo contrario. Agora, de lo que tienes que convencer cuando solicites una subvención nun ye que te va fatal sinon que ye la bomba. Que se va a facer esto… que en cincu años… que se va crear emplegu… pero con una variante, si hasta hai pocu por cada puestu de trabayu que dibes crear te daben cincu mil euros o seis mil, agora igual eso ya nun ye necesario, porque igual la inversión que necesito facer ye p’aumentar la productividá, pero nun pa contratar a más xente. O incluso voi a reducir, y eso xenera nel que da les ayudes una paradoxa: “¿o seya que ta usté diciéndome que tien una empresa d’hai munchos años, y que va reducir personal y qu’enriba tengo qu’ayudalu?”. “Pues bono, si, porque a llargu plazu eso ye lo que nos va a garantizar a tol mundu qu’esistamos”.

Eso ta cambiando dafechu. Y por eso agora la mentalidá emprendedora tien qu’enseñase d’otra manera. Ya nun val quexase, ya nun val protestar.

Nun sé si sabéis el chiste del caballu: ye unu que va vender un caballu prometiendo-y de too…, que ye un caballu estupendu…, qu’esto y lo otro…. Y cuando al final-y lu vende y l’otru lu garra, ve que ye un desastre de caballu. Entós van los dos a una reunión d’amigos y diz-y “oye, esi caballu que me vendiste, vaya desastre”. Y l’otru va y llévalu a un aparte y diz-y: “oye, nun seyas tontu, sigue falando así del caballu y la veras como non lu vendes”.
Pues con esto de les ayudes, pasa un poco lo mesmo, si seguimos llorando y diciendo qu’esto ye un desastre, la profecía va autocumplise. Entós, bono, tampoco hai qu’engañase, pero hai qu’emprender. Ye que nun tenemos otro.


Carlos Fernández Fuente
Toi d’alcuerdu colo de que l’asturianu fuera d’Asturies ye mui emprendedor, fízolo n’América, y en Madrid cada vez conozco a más xente de Xixón… d’Uviéu… que tan montando empreses. El porcentaxe d’asturianos en Madrid, nel sector d’internet montando empreses, ye más del 2,7 por cientu de la población.
Pero quería facer una reflexión, ¿creeis qu’un google o un facebook podría tener nacío a base de subvenciones?


Una asistente
Pues equí vos fago otra pregunta. Faláis del asturianu, pero ¿l’asturianu ye tan distintu del restu la xente?
Entiendo que cuando se dan les condiciones oxetives pa que la xente pueda llanzase, cuando esiste una alministración que funciona, que caltien una rede de subvenciones potentes, o nun necesariamente subvenciones… ayudes que puedan potenciar… y tando n’igualdá de condiciones, ¿de verdá vos paez qu’el asturianu ye tan distintu del restu?


Inaciu Iglesias
Yo diría que por cultura, si pudiéramos facer una escala de unu a diez del nivel d’emprendeduría, tamos bien posicionaos. Comparaos col entornu nuestru, sí somos emprendedores. ¿Por qué? porque tenemos una tradición industrial, porque tenemos una mentalidá de trabayu responsable…


Un asistente
Bono, bono, precisamente si lo quies ver dende un puntu de vista históricu, ye onde más cai esi argumentu. La industrialización asturiana del sieglu XIX faise con perres de fuera.


Inaciu Iglesias
Vamos ver, eso tampoco ye del too cierto. Tamien ye una cuestión de condiciones oxetives. Cuando entama la industrialización, precisábense unos niveles de capital y de medios que n’una sociedá como yera l’asturiana, que yera una sociedá miserable. A nosotros sacónos de la fame’l maiz, qu’aportó l’otru día como quien diz, y la industrialización.
Y eso nótase inclusu nel patrimoniu artísticu. ¿Ú tan los grandes palacios? Nun hai. Como muncho los ricos vivíen en casones, pero nun muncho más.
Por poner un exemplu, Xovellanos, que yera un patriciu y noble, nun vivía nun palaciu con paredes de mármol, como podía pasar notres xeografíes, vivía nuna casona.
Polo que creo qu’esi espíritu emprendendor ta un poco achapláu, un poco tapecíu, y torno a los datos que aporté al principiu, n’aquellos años tremendos de la reconversión industrial, perdiéronse prácticamente unu de cada tres puestos de trabayu, cien mil puestos de trabayu. Bono, pues nesa mesma época, creáronse cien mil puestos de trabayu por iniciativa privada. Pero, claro, nun rescampla tanto porque como al final quedes igual, nun se nota. Si naquellos años nun llegamos a perder tantos puestos, igual agora tábamos sacando pechu. Pero como los perdimos, quédanos esa mentalidá cansina de qu’esto ye un desastre y que nun tiramos p’arriba.


Un asistente
Ya, pero ye significativo qu’Asturies nunca tuvo un bancu poderosu. El bancu mayor que tuvo fue´l bancu Herrero, que non fue nunca un bancu propiu y acabó siendo absorbíu. Agora los bancos son el Santander, el Bilbao y Madrid.


Inaciu Iglesias
Ya, pero pasó lo mesmo nel Pais Vascu, hubo un tiempu en que la banca española yera vasca y agora ya nun ye.


Carlos Fernández Fuente
Sí, ye verdá, dende qu’entró Ángel Cano, lleven nos últimos meses cortando cabeces nel BBVA. Y en Madrid ya lo vasco nun vende.


Una asistente
Centrándonos n’Asturies, hai una problemática mui grande na zona rural, hasta hai pocu vivía de la ganadería, pero eso va a pique de manera nidia. ¿Nun vos paez que hai una falta d’apueste por parte les alministraciones por otres alternatives que tan funcionando notres zones d’Europa?, nun sé, de pequeñes empreses...

Inaciu Iglesias
Yo ye que soi optimista por naturaleza, pero creo que nun ye conveniente tener una visión tan negativa porque además ye irreal. El campu, tal como lo conocíemos, nun puede sobrevivir. Hai un par de seutores que me vienen agora a la cabeza, que sí tienen ciertu futuru y presente. Un ye’l turismu rural. Hai, nun sé, cientos de cases rurales, d’iniciatives… y ye una fonte importante d’ingresos, paezme que supón el diez por cientu del PIB, cuando hai cuatro díes alcuérdome de la primer vez que vi unos turistes alemanes n’Uviéu, que pensamos: “¿qué fará esta xente si equí nun hai nada que ver…nun sé… la catedral…”.

Y l’otru sector ye l’agroalimentariu. Muncho dicir que somos un desastre, pero carai, vamos ver, nel sector lecheru somos líderes n’España.
Y el sector sidreru tamién ye interesante. Ta ehí y crea unos cuantos puestos de trabayu y un movimientu económicu real.
¿Qué podía ser más? Por supuestu.
Pero iniciatives como Crivencar o Tierra Astur, son mui interesantes. Ye una iniciativa emprendedora evidente. Y xenera un circuitu, y ayuda a los productores, a los que tamién obliga a producir non como y cuando-yos dé pola gana, sinon garantizando tanto al añu. Nun val eso de que “el xenru púnxose malu, o marchó…”, y habrálos que nun puedan competir neso, pero ¿qué ye lo que salva a la oveya xalda? pues que se coma nes xornaes gastronómiques de Tierra Astur.

Y equí enllazamos colo anterior, porque nun fai falta poner barreres, pero, si queremos ayudar a los llagareros, o a los propuctores de carne, y a tou esti circuitu, ya nun necesitamos dicir que seyan asturianos, ye que van selo.


Un asistente
Falando del sector agroalimentatiu, la apuesta que tien que facer esti sector n’Asturies ye hacia’l productu diferenciau.


Carlos Fernández Fuente
Y esportar.


L’asistente d’antes
Y esportar. Y hai empreses, llagares, que tan espabilando, tienen márketing, y tan faciéndolo mui bien, pero tienen problemes pa poner la etiqueta a la botella.


Una asistente
Nel mesmu sector de la sidra, por exemplu en Villaviciosa fízose un buen trabayu, pero mínimu. Determinada xente que tenía praos dedicaos pa la ganadería, pero que nun rentaben, dedicáronse a plantar pumares.


Inaciu Iglesias
¿Sabéis quien va ser el mayor productor de manzanes pa sidra d’equí a los prósimos años? La familia Masavéu y Trabanco. Si tienes unos llagares, ye importante tener organizao l’acopiu de materia prima.
Nel mundu del vino, que ye un referente porque tan más avanzaos, nun somos a imaxinar que cualquier bodega nun tenga los viñedos alredor. Pero equí, vas a un llagar y dices ¿y les manzanes?¿onde tan les pumaraes?
Equí, dende hai munchos años, dedicáronse a comprar la manzana a les families, por cuatro duros. Y cuando’l paisanu nun tenía otra cosa que facer, diba y pañaba manzana. Y había esa mentalidá de qu’el paisanu pañábalo más que nada pa que nun quedara en suelu, pa que nun se perdiera. Pero cuando’l paisanu ya ye mayor, o nun tien esa mentalidá, o ta’l fiu, que tien otru trabayu y diz “non home non, pa los cuatro duros que me dais non”, y entos acópiase manzana de fuera, de Galicia o de Checoslovaquia.
Pero eso tien que cambiar pola so propia dinámica. Agora tienen que formase pumaraes con una concepción seria, industrial. Y nun val invertir cuatro duros, hai que invertir muncho. ¿Y quien lo fai? Capital asturianu. Masavéu. Bueno, yo considero a Masavéu una empresa asturiana, aunque sé que muncha xente nun los considera “de los nuestros”. Ellos considérense asturianos y sonlo. Hai que contar con ellos tamien.
Y colos años, una gran parte de la producción de sidra dependerá de los Masavéu. Y entos renegaremos. Pero ta ehí. Haber aprovechao. Pero nun tol mundu ta dispuestu.


Una asitente
O nun puede, home.


Inaciu Iglesias
Efectivamente, pero ehí enllazamos colo anterior. Yo tengo un pequeñu capital. Aunque sean diez mil euros. Y puedo facer munches coses con ello. Puedo dar la entrada de un pisu pal chaval. O puedo gastálos en facer un máster, y seguramente eso será la inversión más rentable. Pero tamién puedo ponelos nuna empresa d’un compañeru y ser sociu. Pero eso ya nun nos presta nada. Porque, claro, facer negocios con un amigu… ¿y si sal mal? Pues claro, tien un riesgu, y si sal mal piérdeslos, pero si sal bien…
Esa mentalidá tovía nos falta. Yo nun la veo.


Carlos Fernández Fuente
Toi d’alcuerdu con Inaciu. Tamos invirtiendo n’empreses en Madrid, y la nuestra empresa base llámase “Inxeniu”, y ellí en Madrid sin problemes, y en Valladolid igual, pero vengo p’Asturies y dícenme: “h.oder vaya nome…, estos asturianistes…”. Avergonzámonos de lo que somos. Y fuera valórennos más. Y así mal vamos. Y enriba cuando realmente lo asturiano vende.
Nun tamos potenciando los nuestros puntos fuertes. Lo que decíais. Si tenemos ehí un sector bonu ¿por qué nun salimos a esportar? Ye cuestión de vendélo. Ye cuestión de márketing. Ye cuestión de mover el culo.


Un asistente
Doite la razón, pero n’Asturies tenemos un hándicap, que ye la edá. Tenemos una población con una edá media mui vieya. Ye más fácil pa una persona de venti pico o trenta y pico años, aunque sólo seya porque tien que buscase la vida.
Pero una persona de cuarenta o cincuenta años que probablemente tuvo una vida llaboral más tranquila ye más difícil qu’emprenda. Y además criáronse n’otra mentalidá. Vienen de lo posáo, de nun cambiar nada, nin siquiera la estructura política, nin incluso la social asturiana en munchos años, y eso lleva a que hai mieu a movése.


Inaciu Iglesias
Y somos hipercríticos. Pa cualquier iniciativa que fagas necesites de la complicidá de los clientes, de los veceros, de los compradores. Somos mui repunantes pa colo nuestro. Si esti señor pon un restaurante, entós toos somos entendíos en pote. Pero si ye de comida china, como nun entendemos, entós nun opinamos.
Y en parte ye normal, pero por eso hai qu’abrir un poco más les ventanes. Abrise al esterior.
Por poner un exemplu. Nun conseyu d’alministración hai tres temes a discutir, el primeru ye pa facer una gran inversión nunos altos fornos de nun sé cuanto, y como nadie tien nin idega de nada, pues aquello, aunque son trenta millones d’euros d’inversión, pasa, tol mundu lo aprueba en quince menutos. Depués llega la segunda discusión pa cambiar los vehículos, y equí ya opina tol mundu, “porque yo tuve un Renault y fueme mal, y el mio cuñau tien unos camiones que son Pegaso y van bastante bien…” y entós la discusión ya lleva tres cuartos d’hora. Y finalmente fálase de que hai que cambiar la máquina del café, y equí ya son dos hores de discusión.

Y otra anécdota que veo ye que cuando siento falar a empresarios y presumir de lo que ficimos, nueve de cada diez veces la xente suel falar de lo bien que compra, y na más qu’una de cada diez veces alguien presume de lo bien que vendió.
Y tenía que ser al revés, el noventa por ciento del tiempu había que dedicalo a vender más, que ye lo que fai negociu, y muncho menos a xestionar internamente.

Y nun val que, cuando ves al vecín que tien un negociu d’inmobiliaria y-y va bien, pues entós yo voi y abro otru. Non. La iniciativa emprendedora pasa por inventar coses nueves. ¿Qué puedo aportar yo a la sociedá que nadie tenga fecho primero? Coses totalmente novedoses, incluso absurdes, como pueda ser facer un selmanariu n’asturiano.
Como nunca se fizo, vamos a intentalo.

Tenemos tamién que ser cómplices unos con otros, y tenemos qu’entender que si al otru-y van bien los negocios, ye bono, y si gana perres, estupendo, y si Masavéu ye ricu, estupendo, que lo seya y qu’invierta equí.


Un asistente
Una cosina más p’acabar. Vivimos nun entornu llegal, económicu y social que básicamente machaca al autónomu. L’autónomu nun ye un trabayador y nun ye un empresariu. Pal empresariu ye un trabayador y pa los trabayadores ye un empresariu.
Y nel mio sector, tenemos problemes a veces tan absurdos como lo de la llei de protección de datos, que si la cumplimos nun podemos trabayar, porque como alministrador de finques nun-y puedo dar dengún datu a dengún vecín. Así que si cumplo la llei tengo de cerrar, y si nun la cumplo y m’enganchen, tengo que cerrar.
¿Cómo va a fomentar eso qu’alguien trabaye? Nun queremos subvenciones, lo que queremos ye que nun nos toquen los pies.
Y, na mio oficina, si nun tengo un cartel que ponga salida, pueden poneme una multa, pero hai empreses enormes que nun cumplen absolutamente nada. Alsa tuvo cayéndose a trozos doce años en Xixón, y nadie fizo nada.

¿Pero qué ecomomía puede furrular así. Tenía qu’entamase por poner unes normes que se puedan cumplir, xenerar un entornu empresarial onde la xente quiera trabayar. Tenemos un entornu que machaca a la xente qu’intenta facer coses.
Toi intentando montar una oficina y pido un créditu ICO y esíxenme una hipoteca del cincuenta por cientu del llocal. El cincuenta por cientu y además avalao. O seya, tengo que demostrar que nun necesito les perres pa que me les den.


Otru asistente
Esi ye´l principiu básicu de la banca.


L’asistente d’antes
Si, claro.
Y otro, los horarios comerciales. Teníen que ponese pa que la xente que monte una tienda pueda asumilos. Si pa que una tienda seya rentable tienes que trabayar diez y ocho hores diaries antes de poder contratar a un empleau, ¿cómo vas montar esa tienda?

Tien qu’haber un marcu llegal que te de marxen. Si yo, que soi autónomu, mañana me quedo en sin trabayu, nun cobro paro.
A lo meyor nun ye tanto subvencionar, nun ye tanto incentivar, como nun poner trabes. Yo, cada vez que intento dar un pasu, atópome con trabes pa dalu. Trabes nel sector públicu y nel sector priváu.
Ye evidente qu’hai ciertes normes que nun tan bien pensaes. Lo de facienda y lo de la seguridá social ye kafkiano.


Carlos Fernández Fuente
Ye verdá. Nel casu d’Idealista, tuvieron que facer una ampliación de capital porque tardaron munchísimo en devolve-yos l’IVA. Y enriba, faes una ampliación de capital y l’unu por cientu va pa impuestos.

Y además resulta que la mayor parte del trabayu ye trabayu autónomu. Ye’l sector que más trabayu xenera.


Un asistente
Otru tema. El probe emprendedor, empresariu, sufridor, del que tamos falando tanto, ¿cómo trata al so capital humanu?. Ves a xente con una formación grande que tan cobrando de risa. Ta la concepción de que se puede invertir n’una máquina, nun llocal pergrande, nel coche d’empresa, pero “el chaval, que me trabaye por novecientos euros… y ya-y doi trabayu… tien que agradecelo… tien qu’entregase a mi”.


Inaciu Iglesias
Tienes razón, pero eso ye una consecuencia d’un mercáu totalmente desequilibrau.
Ye una utopía, pero imaxínate que nun hubiera esos ochenta mil paraos, que técnicamente tuviéramos un paro cero, ¿qué pasaría? que cambieríen les tornes. Habría necesidá de captar esi capital humanu.


Carlos Fernández Fuente
Tengo un exemplu d’un collaciu que yera emprendedor, tenía una empresa de programación n’Uviéu y quebró, y fue a una empresa del cluster TIC de les principales a pedir trabayu. Díxo-yos “soi emprendedor, empresariu, tengo esperiencia, iniciativa, domino de too, xestión d’equipos, programación…” y dáben-y quince mil euros.
Y claro, pasó, fue pa Madrid y agora trabaya por tres veces más de sueldu.


Un asistente
Ye’l modelu d’empresa asturianu. Nun tien que producir. Venturo XXI nun tenía que producir, garró les subvenciones y cuanto menos pagara al trabayador, más ganaba. Y llueu cerró.


Un asistente
La capacidá de negociación d’un trabayador y la situación na que s’alcuentra tuvo una evolución negativa nos últimos venti años. Y nesos venti años hubo más y menos paro, pero la evolución fue negativa.


Tino Fernández
Pero deberíamos tener un Estao que fuera garante del mercao. Nin a ti tengo por qué pagate diez mil millones d’euros, porque tas chantaxeándome, nin yo tengo que trabayar por ochocientos euros al mes. Y pa eso tenía qu’haber unos mecanismos.


Inaciu Iglesias
Tienes parte de razón, l’Estáu debería mediar entre la oferta y la demanda, pero eso nun lo esplica too, hai más variables, otra ye los valores o la bonhomía del empresariu, hailos que son unos cafres que creen qu’el so deber ye esi, tenelos descontentos, y tamién ta la creación de valor, si yo entiendo qu’el talentu tiénenlu les persones, y esa ye la mio apuesta, puedo facelo, pero si lo que tengo ye una empresa que da igual que seya xuan que pepe, voi acabar pagando lo mínimo, porque me da igual.


Tino Fernández
Pero eso ye un condicionante brutal contra la competitividá. Esi tio que paga lo que paga, funde a les empreses que faen lo correuto, que paguen lo que marca’l conveniu.


Una asistente
Pero esi nun ye’l modelu d’empresa.
Y falando de competitividá, ¿Qué tipu de competitividá se puede tener contra la producción de los chinos, que tan tirando’l mercau.


Un asistente
Ye qu’a lo meyor hai que renunciar a facer el productu final y caltener el diseñu y la tecnoloxía. El mercau de los zapatos italianos forróse diseñando los italianos, que lo faen bien, y produciendo los chinos más barato, y espandióse por tol mundu y machacó al mercáu español, que nun negoció colos chinos.
Hai dificultaes, ye verdá, pero hai que tener una mentalidá muncho más abierta. Y nun hai que producir lo mesmo que los chinos, sinon coses con mayor valor añadíu.


Tino Fernández
Eso ya lo decía Peters, el mundu ta evolucionando, con Australia que va hacia ser el gran mercáu agroalimentariu, Estaos Xuníos va ser el gran mercáu tecnolóxicu, y Asia’l gran mercáu manufactureru, y África nun queda en denguna parte, porque nun tien producción, y Europa tampoco nun ta en denguna parte, porque ta en toes pero nun ye especialista en denguna.
Decíen con coña qu’Europa va ser el gran eurodisney, onde hai historia y castiellos, y los americanos, como nun tienen, vendrán equí a velo.


Una asistente
Salió ayer pola televisión un reportaxe de cómo producíen en China. Son ciudaes enteres de moces de venti años trabayando na bisutería. Yera alienante, terrible, inmoral. Entós claro, así crecen como economía, l’ochu por cientu anual.


Inaciu Iglesias
El comunismu tien eses paradoxes. Pero supongo que será hasta que los chinos quieran toos una tele y…
Tenemos que acabar ¿non?


Carlos Fernández Fuente
Bono, pues munchísimes gracies pola invitación.


El presentador
Gracies a vosotros, a los tres, que sabemos l’esfuerzu que tuvísteis que facer pa venir, toos cola axenda a tope. Tenemos que cortar pero hai que seguir col tema pa otra, que ye lo que suel pasar siempre nesta tertulia.