Tertulia: La independencia nos medios de comunicación

Resumen de la tertulia del martes 6 d'ochobre de 2009

La independencia nos medios de comunicación


Participaron:

Xuan Cándano
Revista bimestral Atlántica XXII
Diego Díaz y Leticia Blas
Periódicu trimestral Diagonal Asturies



Xuan Cándano
Entamo por referime a un artículu que sacamos nel últimu númberu d’Atlántica, de Vicente Arnaldo de Quirós onde s’afonda na situación llaboral del periodismu, que ye una parte del problema, probablemente ye la consecuencia y non la causa de la falta d’independencia de los medios, y lo que pinta ye una situación desoladora, na que los mileuristes son privilexaos n’Asturies.
Tovía l’otru día me contaben que va sacar Europa Press unos contratos nuevos pa currantes con xornaes normales d’ocho hores y trabayando incluso fines de selmana y cobrando 300 euros, o seya, vamos a más.
Y si digo que ye la consecuencia y non la causa ye porque lo que me paez que-y pasa’l periodismu cuantayá, y pasa’n tol mundu, ye una pérdida de valores básicos, yo creo que casi irreparable. Los periodistes en xeneral dexamos d’exercer la nuestra propia responsabilidá, nun ya la crítica y la autocrítica, sinon respeutu a los valores básicos qu’espliquen que la nuestra seya una profesión de conteníu social y acabamos siendo unos esplotaos dende’l puntu de vista llaboral.
Creo que lo más grave ye esa crisis d’identidá del periodismu, que ye la que provoca llueu la llaboral.

Leticia Blas
A mi tócame de cerca un poco. Soi periodista y trabayo nos medios, y bueno, Diagonal surdió un poco por querer sacar otra visión de lo que ye’l periodismu n’Asturies. La situación ye mui mala, agora mesmo contábennos que al final van a echar a 25 persones de La Voz de Asturias. Na TPA tolos díes echen a alguien, tan contratando siempre con contratos temporales que lleguen al so fin y esos contratos, que deberíen ser contratos indefiníos, son encadenaos como temporales. Y en xeneral ye una cosa que ta ocurriendo’n tolos medios n’Asturies.

Y eso, claro, al final repercute tamién na calidá de les informaciones.

Xuan Cándano
Nel siguente númberu de la revista, que va salir agora, Miguel Ángel Rodríguez, (nun confundílu con aquel xefe de prensa con Aznar), que ye periodista d’equí de Xixón y ganó varios EMIs, y que agora ta’n Madrid, va escribir un artículu que creo que lu va titular La muerte del periodismu. Y hai tamién un llibru que salió hai varios años en Francia que se titula así, La muerte del periodismu.

Y esi titular ye más qu’una metáfora, a mi paezme que sí, que’l periodismu morrió.
Los valores esenciales del periodismu y de los periodistes tan desaparecíos cuantayá. Nun ya l’espíritu críticu, sinon la mesma inquietú, ya inclusu la curiosidá.

Y eso nótase inclusu nes redacciones, paez que la xente llega a les redacciones de la Facultá, como pudo tener salío de la Facultá d’Económiques o d’una escuela de negocios.
La mayoría de los periodistes que yo conozo nun tienen curiosidá, y si nun tienes curiosidá, dende llueu nun yes periodista por muncha titulación que tengas.
Y por supuestu caemos en manes de cualquier patrón, somos voceros, facemos una información oficial, al dictáu de los gabinetes de prensa y del comunicáu del políticu de turnu, faciendo fundamentalmente ruedes de prensa, y eso nun tien ná que ver col periodismu.

Sí que paez que l’aparición de medios nuevos como los que tamos equí representáos ye una tendencia alentadora. Hai muncha xente que ya tá fartuca, empezando por algunos de los propios periodistes, y probablemente esti sistema se xeneralice, yo al menos eso ye lo que deseo.

Un asistente
Si me permitís dexar una pregunta nel aire, ¿nun pensais qu’esta precariedá llaboral nun pué ser un mecanismu de control contra los propios periodistes? Ye dicir, equí el que se mueve va a la cai y ya meteré a otru qu’entre nos dictaos del “réxime”.

Diego Díaz
Pa mi nun lo piensen tanto. Dende arriba nun lo faen espresamente como mecanismu de control, que lo ye.

Creo más bien que tá vinculao a una cuestión económica, los poderes de la comunicación, güei por güei, dependen de la publicidá nun grau importante.
Na prensa por exemplu, l’euro que pagues pol periódicu nun te paga los costes. Entós sí que ye un mecanismu de control, pero nun se orixina por decir, -vamos a xenerar un trabayu’n precario pa tenelos controlaos-. Ye una consecuencia.


Por exemplu, na TPA, que yo conozo, la precariedá que hai ye absoluta, y yo creo que ahí sí que puede haber una estratexa d’esternalizar, de tener tropecientos trabayadores con tropecientos contratos distintos, porque eso impide la unidá d’acción, xenera competitividá ente productores y ente los mesmos trabayadores…


Nesi sentíu sí, pero a nivel global a mi cuéstame munchu imaxinar a esta xente faciendo esi encaxe de bolillos, porque entre otros aspectos tampoco-yos da la cabeza pa ello, pero al final, independientemente de que seya la so intención orixinaria o non, la precariedá llaboral furrula como un mecanismu de control.

Xuan Cándano
Yo nun veo ninguna diferencia entre la esplotación llaboral de la xente moza nel periodismu, porque ye la xente moza la que lo ta padeciendo, que la xente moza de cualquier otru sector profesional. Tan esplotaos igual y son menos que mileuristes en cualquier llau.
Y tamos esplotaos porque tamos vendíos. Yo hai treinta años, cuando taba na Facultá faciendo práctiques, cobraba cincuenta mil pesetes, ye decir, cobraba lo mesmo que al trabayador al que sustituía. Cuando m’echaron de La Voz de Asturias, después d’una censura a Gregorio Morán y un xaréu tremendu, hubo una movida y una campaña de solidaridá enorme con declaraciones de munchos compañeros del periódicu a favor míu, y eso sería algo insólito guei.


L’individualismu y la insolidaridá de toles capes sociales y de la xente moza’n concreto ye la qu’esplica en bona parte toos estos fenómenos, y la esplotación llaboral tamién y por eso creo que ye una consecuencia y non la causa.

Diego Díaz
Pero nun fai falta dir p’atrás treinta años pa eso, nel 98, yo, faciendo práctiques en La Voz de Asturias, cobraba cuarenta y cinco mil pesetes, y agora, la xente nun cobra pa ná, nes práctiques en La Nueva España la xente nun cobra, y La Nueva España saca pasta.
Realmente acórtense los tiempos en que se pervierte y se defenestra’l trabayu. Nel 2000 les condiciones de trabayu yeren meyores que nueve años más tarde. Degradáronse d’una forma brutal n’una década.
En TLG la peña taba trabayando diez hores diaries por 600 euros y a veces sin contratu.

Xuan Cándano
Y la tendencia ye imparable. Yo trabayo en Televisión Española y los que somos más veteranos tenemos bones condiciones salariales y llaborales, pero los que vienen detrás ya non, y nosotros sobramos, y cuando nos echen, van quedar toos con sueldos, nun de mileuristes, pero casi.

Un asistente
Y ¿nun vos paez que’l propiu periodista, la xeneración más moza, llega a asumir esto como normal? Non sólo lo normal que ye cobrar esto, que nadie va decir que ta bien, sinon tamíen esta forma de facer periodismu de garrar la nota de prensa, cambiar dos frases y tal y escupila.

¿Esi ye’l mio trabayu?

El periodista llega a asumir eso.

Un periodista tendría que garrar una información, contestualizála, buscar los distintos ámbitos y enfoques que se pudieren plantear, contrastala y demás.
A veces ye verdá que nun hai tiempu pa ello, pero el problema ye que los propios periodistes lleguen a asumir que esto ye así, y que la so profesión ye asina. Entós digamos que tienen ya metíu na cabeza’l síndrome d’Estocolmo.
Y entós ya nun tienes qué facer, ya nun tienes a un grupu de trabayadores que se lo planteen pa revolvese, ya nun solo llaboralmente, sinon na calidá de lo que faen.
¿Cuánta xente que ta trabayando percibe que nun ye pa eso pa lo qu’estudiaron periodismu?
Pa mi esi ye´l mayor drama, porque integróse na mentalidá del profesional.


Y otra consecuencia que veo d’ello ye la falta de cultura de bastante xente. Tengo visto a becarios que ya llevaben tiempu trabayando y que nun sabíen como se llamaba’l presidente del principáu. Y bono, preguntar por conseyeros y tal, eso ya yera cum laude.
Entos claro, pasando ya del tema llaboral, si nun tienes interés, qué queremos.


Diego Díaz
De lo que tais falando y cuando Xuan taba con esa crónica tan negra de la muerte del periodismu, corremos tamién el riesgu de creer que hubo una edá de oro del periodismu, la de los años 70, en comparación colo que tenemos agora.

Pero los periódicos siempre fueron lo que son, voceros de los intereses dominantes, lo que pasa ye que agora faenlo muncho más abiertamente.


Trabayando con El Pais de los años 70, ves que yera de luxo al llau de El Pais qu’hai güei, y nótase que, de ser una empresa capitalista editora d’un periódicu, que tampoco yera ningún proyeutu revolucionariu, pasa a ser algo que forma parte d’un gran grupu, que lo mesmo t’educa a los crios, que te vende televisión, que fútbol, que too, lo que apaez pal receptor como una multiplicación de focos que t’emiten noticies.

Pienso que podemos observar una realidá contradictoria: al mesmu tiempu que se produz una centralización y concentración de los medios de comunicación, xenérase la esplosión d’ internet y otros medios y eso ye una realidá que se percibe.
Vese tamién na televisión, antes, les audiencies de los años 70 y 80 yeren millonaries porque nun esistíen apenes canales y güei eso ye imposible, lo que un programador llama una bona cuota de pantalla ye munchísimo menos de lo que yera antes.

¿Cómo podemos manexar eso?

Esa ye la clave, pero a lo meyor tenemos que dexar de tar obsesionaos por si la nuestra concentración o manifestación X nun sal en La Nueva España, porque eso nun significa que la xente nun se pueda enterar por otros canales.

Por supuestu que los grandes medios de comunicación siguen siendo los que estructuren y vertebren lo que piensa la sociedá, pero, nesi sentíu hai cierta esperanza de qu’eso cada vez va dir a menos.

A lo meyor en temes más políticos sigue pesando muncho más lo qu’estructuren los grandes medios, pero nel tema de la música, por exemplu, creo que ta bastante claro. Grupos sin apenes distribución y que, sin embargo, a través de los My Space o de You Tube llogren convocar a multitudes.

Y cuando nun determináu momentu a la sociedá sí que-y interese informase sobre un determináu tema, munches veces sabe a onde recurrir, eso tamién tenemos que pensalo.

Por exemplu, cuando los atentaos del 11-M, la reacción del 13-M ye impensable sin la esistencia d’internet, porque tolos medios de comunicación taben suscribiendo la versión oficial del gobiernu, entamando por El Pais. Alcordareis-vos qu’El Pais saca una edición de tarde diciendo “Foi ETA”, muncho más papistes qu’el papa. El Pais dio muncho antes la versión oficial del gobiernu que El Mundo, La Razón, o seya, los sos medios afines, cuando The Guardian daba dudes y esi mesmu día la CNN ya decía que nun había dudes que yera Al Qaeda.

Un asistente
Bono, equí tamién hai que tener en cuenta qu’el gobiernu llidiaba la so guerra con ETA y la CNN llibiábala con Al Qaeda. L’enemigu de la CNN y a lo meyor del planeta enteru yera Al Qaeda y en El Pais y nel gobiernu l’enemigu nun yera Al Qaeda o a lo menos nun yera hasta el 11-M, yera ETA.

Diego Díaz
Sí, sí, pero ehí tenemos el primer exemplu de cómo, ante un fechu que polariza la opinión pública, la xente puede rebelase y la prueba ye que mogollón de peña que habitualmente nun consulta ni Rebelión ni otros sitios, cuando llega a esta situación, sabe a qué medios acudir.

Otru asistente
Hubo otru mediu masivu y decisivu que temién reaccionó nesos díes, que fue la Ser.
La Ser yera La Radio y n’aquella época yera bastante más escuchada, y en cuanto hubo la más mínima duda, al día siguiente ya taba con qu’equí hai problemes, equí hai dudes, equí hai unos suicides, equí hai nun sé qué, y yo alcuérdode de dir en coche escuchando y la Ser prácticamente “taba convocando” (entre comilles) les concentraciones.
Lo que tú dices d’internet ye verdá, pero tamién hubo esi otru mediu masivu que, poles razones que toos sabemos dio-y por ahí, y foi el que arrastró.

Xuan Cándano
Sí, esi mesmu día, hasta n’Asturies, sociedá periférica, ya sabíamos que nun yera ETA pola nueche.
Lo que quies decir ye que nun podemos mitificar a los medios tradicionales y pensar qu’ellos tienen la hexemonía absoluta y el poder, porque efectivamente’l panorama informativu ya ye diferente, pero bueno, tamién hai un mitu de la modernidá que consiste en, por exemplu, agora mesmo, profetizar la muerte del papel, del periodícu, que tampoco tien que ver cola realidá, porque’l papel en concreto sigue siendo imprescindible y los medios convencionales siguen teniendo una influencia tovía mayor que la que tien internet.
L’exemplu agora ye Italia, n’Italia lo que-y preocupa a Berlusconi son los periódicos, son les grandes cabeceres, que son les que lu tan poniendo n’aprietos.

Un asistente
Hai dos diarios, ún d’humor que pasó a la web y agora va poco volvió al papel, y l’otru ye un periódicu centroeuropéu o inglés, nun m’alcuerdo, que tamién decidió sacar la so versión web y acaba de tornar al papel otra vez tamién. Nun sé si ye cuestión de la publicidá o de la pasta qu’entra o non entra finalmente.
Internet nel so momentu tenía mui pocos medios, sin embargo agora hai un bombardeo, lo complicao ya nun ta n’alcontrar la información, sinon n’alcontrar la información válida, en seleccionala.

Otru asistente
Bueno, como’l papel tamién

Un Asistente
Non, nun ye esactamente igual. ¿Nun creeis que va a haber un efeutu rebote?

Diego Díaz
Él diz que como’l papel, y yo creo que ye al contrario, en papel disminuyeron. La sensación que tengo ye que, cuando mires p’atrás, montábense la de dios de publicaciones, con mui poca pasta, o incluso poniendo pasta del bolsu.
El tema paezme interesante, yo nun acabo de creeme los datos de ventes que se dan. Nun me creo que La Nueva España siga creciendo cuando se multipliquen día a día les visites n’internet a La Nueva España. Toi convencíu qu’eso tuvo que costa-yos ya non sólo lletores de papel, sinon compres.
Agora que tamién reconozo que la xente que vuelve al papel ye porque’l papel da un prestixu que nun lu tien internet y credibilidá.
El papel tovía tien la capacidá digamos que pa influir muncho más na clase política que un portal d’internet. Ye mui dificil qu’escuchemos na radio o nun periódicu que se cite a un portal d’internet con una noticia bomba.
El papel tien tovía una puxanza, un prestixu y una credibilidá que tovía nun tienen otros llugares.

Otru asistente
El papel date prestixu, pero internet date la inmediatez. Y nun siempre les dos coses van xuntes. Cuando lleo El Pais o El Mundo en papel, onde me detengo ye nos suplementos, nos artículos de fondo. Nun los compro pola inmediatez, pa eso lléolos n’internet.

Un asistente
Agora mesmo hai un portal que se llama confidencial.com que lleva años trabayando y que conoceréis de sobra y son innumerables los blogs que faen referencia a él. Confidencial.com gano’l prestixu colos años, y mira que tien publicao coses que son pa entrar nel servidor con un hachu, pero consiguiolo, y ya lo que sal en confidencial nun ye cualquier pijada.
Ye verdá que cualquiera abre un blog, maqueta un poco, un poco de wordpress y ya tien un diariu n’internet, nun ye mui complicao.

Diego Díaz
Yo creo que los periódicos, y nun falo de Diagonal ni d’Atlántica, los periódicos convencionales, ya vieron hai tiempu qu’el tema de la inmediatez nun tenía sentíu, y nun se podía competir contra la radio o la televisión por eso. Ven que la so función tien más que ver cola opinión y la ellaboración de la noticia. Ya veis que los periódicos nun se maten por tar hasta la una la mañana por dar una noticia, ni pal fútbol, porque hai partíos qu’empiecen a les diez de la nueche y ya nun te meten la crónica. Entre otro porque ya tienen la páxina web pa dalo.
Y por otra parte méteste na web de cualquier periódicu y ves que tienes noticies del día subíes dende les cinco la tarde. Realmente la inmediatez dátela la web.

Al final equí tamos dos propuestes bastante “clásiques”, tanto Atlántica como Diagonal, nel sentíu de que proponemos facer pensamientu d’izquierdes, axitación y tal, dende un mediu clásicu como ye’l papel, aunque tenemos ambos edición n’internet, pero de momento les webs son algo secundario, aunque’n Diagonal-Madrid tan apostando un poco más por internet.

Hai cuatro años, cuando salió Diagonal, tábamos ya nel momentu en que ya nun yeres un raru por tener internet, y la xente taba acostumbrándose a lleer Rebelión y otres coses, y preguntábennos por qué’n papel.
Güei paez como que la comunicación alternativa va pola vía de la web. Y entós decíemos algo paecío a lo que venimos diciendo equí, lo de ser consideráu, del prestixu, de tar nos kioskos, de tar na cai en definitiva. Yera una batalla que tamién había que dar. Y quizás Atlántica va un poco por esi sentíu.

Xuan Cándano
N’Atlántica usamos la web de forma complementaria, ponemos el sumariu colos artículos que salen nel númberu que ta na cai, y volcamos n’internet los números anteriores, lo que ye imprescindible. Nun se puede tar agora nel mundu sin tar n’internet.


Yo trabayé’n tolos medios, en prensa escrita’n varios periódicos, n’axencies de noticies, na Ser y tamién n’internet, y controlo bien les diferencies, y sé por qué esixe más disciplina, más responsabilidá y tien más credibilidá un mediu escritu’n papel que l’audiovisual o la radio.
Yo digo una mentira non intencionada o cometo un error en televisión y nun pasa ná, al día siguiente olvídase. Incluso teniendo una audiencia de la virxen, na radio, les palabres llévales el viento, y eso pasóme por esperiencia. Pero cometes un error equí na revista y hai la de dios.


El papel esixe más reflesión, al autor y al lletor claro. Los otros medios son más efímeros. Y nun quiero decir con ello que seyan meyores o peores.
Y efectivamente internet ye’l colmo de la inmediatez. Ye la radio grandona. La radiona.

Y el papel non. A veces les crítiques que nos faen ye que ye demasiao sesuda. Hai quien me diz que sal un númberu y nun-y dio tiempu a lleer l’anterior. Y eso qu’intento que los artículos sean de dos páxines y non de tres, cosa que paez que ye tremendo, imposible pa los autores, y equí tais varios. Pero eso a mi paezme una virtú, d’eso se trata, de sacar una publicación que la xente necesite tiempu pa poder lleela.

Y además creo que por ehí van dir les tendencies. Como hai tanta lixereza, tanta inmediatez, tanta frivolidá, tendrá qu’haber tamién medios muncho más reflesivos qu’esixan tiempu pa ellaborar y tiempu pa lleer, pero desde llueu, tienen que ser complementarios con internet.

Un asistente
Tamién tenemos que ver un poco a quien van dirixíes les publicaciones. Nel casu concretu de Diagonal y Atlántica, van dirixíes a un públicu ampliu, d’izquierdes y tal, que sí tien la costumbre de comprar papel, y eso hai que tenélo’n cuenta pa la so viabilidá.

Diego Díaz
Llevando un poco’l debate a l’ambitu de la izquierda, lo que nós tamos proponiendo mui humildemente’n Diagonal-Asturies ye sacar cinco mil exemplares. Y cinco mil exemplares nun son pa cinco mil militantes.
L’otru día tuvimos repartiendo na puerta de los alsas y de renfe y el retu, lo que tenemos que tratar de facer, ye ver qu’aparte de la red y del ciberespaciu, hai otru focu d’información agora mesmo que ye la prensa gratuita, que ye además lo que llee la peña de nivel económicu más baxo, y ehí hai que dar la batalla.

Tamién collaboro n’Atlántica y ellí lo que m’encanta ye más escribir artículos d’ellaboración, onde me lo paso meyor escribiendo, y onde toi dirixéndome a un públicu que ye más paecíu a mi. Pero lo que m’illusiona de Diagonal-Asturies ye intentar facer una prensa popular d’izquierdes, cosa que tal vez tovía nun tenemos llograo, pero tamos n’ello.

Ye un problema que tenemos na izquierda, lo d’aprender a dexar de falar pa nosotros y pa los que son paecíos a nosotros y metenos humildemente a tratar de competir col 20 Minutos o el Qué o el ADN, aunque tovía tamos mui lloñe d’ello.
Pero tenemos qu’entamar a foguearnos y a curtinos en facer una prensa que llea muncha xente y seya popular pero que tenga conteníos d’izquierda. Son cinco mil exemplares gratuitos.


Un asistente
Polo que se vé, n’estes iniciatives la xente pon el so trabayu, pon el so esfuerzu, pon les so perres, pero ¿ye viable xenerar un mercáu alternativu, autosuficiente y autoxestionáu que lu caltenga?
¿Qué llínies habría que seguir pa que se faga una prensa, como diz el títulu de la tertulia, realmente independiente? Porque pa ser independiente, evidentemente tien que ser autónoma y autosuficiente, que xenere los son propios recursos.

Diego Díaz
Equí n’España, supongo que tendrá que ver col franquismu, nun se llogra construir un mediu de referencia de tola izquierda, y quedamos a merced de El Pais. Y eso explica, yo creo que’n gran parte, la miseria intelectual y política de la izquierda española.

Pero en paises como n’Italia tienen llograo sobrevivir esperimentos como puede ser Il Manifesto, n’Alemania ta’l Tag, creo que se llama, en México ta La Jornada. Enfin, hai paises diferentes nos que, mal que bien, con munchos problemes, tienen llograo sobrevivir medios que nun son de partíu y nos que se puede sentir a gusto un montón de xente.
Y n’España eso fracasó, hubo un intentu nos 80 de facer un periódicu diariu que se llamó Lliberación, pero fue a tomar pol culo en menos d’un añu.

Un asistente
El problema ye que ¿de onde saca los recursos un periódicu? El primeru ye la publicidá, el segundu, polo que tuve lliendo, son les promociones, por eso agora mesmo tolos periódicos saquen de too, el radiocassete, les cadenes pal coche pa la nieve y lo que seya, y dempués vien la venta.

Otru asistente
Bueno, yo creo que antes que la venta, n’Asturies, en dellos medios de comunicación asturianos, tan les subvenciones del Principáu.

Un asistente
Claro, y, pa mi, eso implica dos coses, por un llau, los grandes gastadores, como Caxastur, echen munches perres en publicidá, y entós, si ataques a Caxastur, retiren les perres. Alsa tienlo dicho, y Alsa nun apaez nes fotos d’un autobus que tuviera un accidente. Pero más dramático tovía son les perres que salen institucionalmente del Principáu o del Ayuntamientu de Xixón.
Y yo sé d’un tío al que lu llamaron por una hestoria bastante gorda, alvirtiendo-y que como siga rascando por esi tema, quitaben les perres. Y son millones y millones. Y claro, ehí tas amordazáu.
Diego Díaz
Agora tamos nún momentu de refluxu de la izquierda deprimente, pero hai que pensar qu’esta situación va cambiar n’algún momentu. Nel casu de Diagonal, surdió al final d’un cieclu de movilizaciones bastante importantes, que van dende’l Prestige hasta la guerra d’Irak. Movilizaciones como nun pasaben n’España dende los tiempos de la Fuelga Xeneral del 88 y OTAN NON.
Agora Diagonal ta llogrando sobrevivir y resistir nesti momentu baxu, y pienso que cuando vuelva a haber otru momentu de politización dientro unos años, porque la sociedá ye así, lo bono ye que vamos tener montada una cierta infraestructura comunicativa que, por exemplu, nun tuvimos durante les movilizaciones del final d’Aznar.

Leticia Blas
La idega de Diagonal ye que va llegar el momentu nel que los que tan ehí currando nun lo faigan sólo porque-yos gusta, sinon que sea rentable.

Agora, si s’analiza, ye un exerciciu de trapecismu, salnos el númberu a quinientos y picu euros y sacamos publicidá pa quinientos y picu euros el númberu.

Con eso lo que faes ye cumplir col gastu que tienes, y tampoco hai munchu espaciu pa meter más publicidá. Con eso nun te plantees que haya un trabayador contratáu y con seguridá social. Necesitaríamos mil y picu euros pa contratalu. Nun tenemos páxines pa tanta publicidá.

Diego Díaz
El problema ye la falta d’una demanda social, y sobre too de que nel momentu’n qu’esistía esa demanda social pa facer una infraestructura, que podía haber sido cuando la transición, nun se fizo. Ocúrrese’l casu de Egin y Gara como exemplu, non d’un periodismu alternativu que me caiga demasiao simpáticu, pero que teniendo una llínia editorial absolutamente a contracorriente, llogren sobrevivir.
Lo que pasa ye que tienen dos coses, por un llau tienen una demanda social, u por otru, llograron sentar les bases nel momentu y llugar oportunu. Probablemente güei esos medios nun se podríen echar a andar.

Xuan Cándano
Entrugábais que si pueden ser viables los medios alternativos. Contesto rápidamente, porque nun quiero que quede pa prau.

Ye que, como nun seyan viables nun tienen sentíu. Y ehí hai que derribar un de los mitos de la izquierda, que ye que les empreses que seyan viables son sospechoses de ser capitalistes.

Non.

Atlántica tien una filosofía diferente, aunque coincidente’n munches coses con Diagonal, y dende llueu esti ye un ensayu que ta saliendo bien.
Tratábase de probar si había demanda social, aunque esa ye una palabra horrible. Si había n’Asturies una masa crítica que pudiera sustentar un mediu de comunicación como esti.

O seya, si había una masa de cabreaos suficiente, críticos, nun ya d’izquierdes, ye decir, de xente que piensa por si mesma. A mí encantaríame qu’hubiese tamién xente de dereches, lliberales, xente independiente que fueren conservadores, que ye difícil de dar con ellos.

Un asistente
Botín, ¿nun crees que Botín piensa por si mesmu?

Xuan Cándano
Non, piensa’l dineru por él.

Y l’ensayu salió bien. Efectivamente hai esa masa crítica. Vende mil y picu exemplares, que ta mui bien. Tien quinientos suscritores y cada vez tien más. Esto hai que convertilo n’una Pyme.

Creo que como nun vayas medrando, y dando pasos, y pasar del voluntarismu a la profesionalidá. Bueno, esto tien profesionalidá porque ta bien fecho. Equí nun s’almite cualquier orixinal nin cualquier autor. Vamos, y nun se discrimina por razones d’edá, sexu, relixón ni renta, sinon de calidá.
Entós, hai que dar esi pasu del voluntarismu a la profesionalidá y convertilo n’una Pyme y tener asalariaos, que nun los tien agora. Agora páguense a los collaboradores y mui mal. Pagá-yos bien a los collaboradores, que tenga una redacción pequeña pero lliberada, un director lliberáu, que nun puedo ser yo, un xerente, y que furrule como una Pyme, que tenga rentabilidá y de beneficios.
Eso nun quier decir que pierda’l so espíritu.

Un asistente
Paezme interesante esa visión y toi d’alcuerdu con ello, pero tamién tien la so razón de ser un mediu alternativu que nun sea viable como una Pyme. Yo taría encantáu, como periodista, en trabayar n’un mediu alternativu y tar cómodu y trabayar por un sueldu. Pero entiendo que tien razón de ser un mediu de comunicación, como Diagonal, que nun ye viable dende una perspectiva de xenerar sueldos, pero conseguir dir tirando en sin tener que palmar pasta.

Otru asistente
Un mediu alternativu tien que tener un recorríu, tien que ganase’l pretixu. Medios alternativos conozo munchos, y webs, cincuentamil, y ves cada barbaridá…Ya nun porque nun desarrollen, sinon tamién porque desarrollen cada cosa…
Si quies conseguir algo que de verdá tenga recorríu, que consiga estabilizase, y falo de igual seis años, que xenere corrientes d’opinión, necesita d’una independencia económica que te permita sacar algo de bastante calidá, que gane prestixu y que consiga que la xente se fíe al lleelo.

Y pa mi ye esencial, pa un mediu independiente que nazca n’Asturies, que rompa cola idea sucursalista que hai de la información sola situación asturiana. Y así, en cada tema que se toque tien que plantease la visión de nosotros como asturianos, de cuales son los nuestros intereses.

Eso ye de lo que tamos huérfanos, porque evidentemente tanto La Nueva, como El Comercio, los mayores en papel toi falando, son heriedes de quien son y tan controláos por quien tan.
Un mediu independiente que nun tenga eso, va quedar coxu, porque va tar reproduciendo los modelos informativos que tamos sufriendo nos medios mayoritarios.

Diego Díaz
Taba interesante lo que decía Xuan de la Pyme, toi d’alcuerdu, yo polo menos nun tengo esi tabú, pero como decíais tamíen, evidentemente nosotros pa montar una Pyme habríamos tardáo lo que tardó Atlántica.
Atlántica tardó unos dos años en montáse y Diagonal-Asturies montóse’n tres meses. Montóse’n tres meses porque nos urxía, y nun podíemos esperar a montar una Pyme. Si col tiempu terminamos faciéndolo, a mi nun me xenera ninguna contradicción interna.

Y con respeutu a lo de los medios d’equí, por supuestu, ye fundamental el crear un espaciu públicu asturianu, y que se debata. Vamos, yo creo que ye un problema a veces de la izquierda que tá pensando más n’estratosferes que’n coses d’equí.

Lo que ya nun entiendo ye lo de en qué consiste una visión asturiana. Entiendo que los redactores de La Nueva España sí que tienen una visión asturiana, son asturianos, pero yo siéntome muncho más cercanu a los compas de Madrid de Diagonal, porque comparto con ellos una visión d’izquierdes y ecolóxica y eses coses.

Con too, yo soi lletor de Diagonal, soi collaborador de Diagonal, incluso soi distribuidor de Diagonal n’Uviéu, y si vi la necesidá de montar Diagonal-Asturies ye porque veía na necesidá de crear un mediu independiente asturianu.