Tertulia: A mi qué la crisis. Marxinación y polítiques de reinserción social

Resumen de la tertulia del 1 de xunetu de 2010


A mi qué la crisis.
Marxinación y polítiques de reinserción social.

Na que participaron

Rafael Piñera
Presidente de l'Asociación Profesional d'Educadores Sociales d'Asturies

Xosé Lluis Carmona
Presidente de Cruz Roxa d'Asturies

Minervino José de la Rasilla
Trabayador de la Cocina Económica



Presentación
Bono, entama la tertulia sobre marxinación y polítiques de reintegración social, pensada sobre too a la vista de la crisis que tamos sufriendo nestos tiempos. Ta con nós el presidente de Cruz Roxa, Xosé Lluis Carmona, Rafa Piñera, que ye presidente de l’Asociación Profesional d’Educadores Sociales y tuvo tamién nel patronatu de la Cocina Económica y Minervino de la Rasilla, que ta tamién trabayando na Cocina económica.

Bien, ya sabéis qu’equí la dinámica nun ye de ponentes, sinon simplemente de falar llibremente de los temes, y pa entamar pedimos-vos que nos deis un poco la visión xeneral de cómo ta la situación, cómo veis esto de la marxinación social, y sobre too cola crisis económica que tamos careciendo.


Xosé Lluis Carmona
Nesti tema, sobre too nel últimu añu, nosotros venimos observando una cosa. La Cruz Roxa trabaya siempre con colectivos vulnerables, que, como la mesma palabra indica, tan na llende de caer na marxinación más absoluta, pero que, por poco, tovía nun cayeron nella.

Hai un colectivu especialmente vulnerable col que trabaya la Cruz Roxa que ye’l de la población inmigrante, y tenemos un programa en munches partes d’España, y n’Asturies y en Xixón tamién, d’inserción llaboral de persones inmigrantes, que pasa por varies fases, una de formación n’habilidaes sociales, en llingua del pais, cultura y socialización de la xente, pa pasar dempués a un programa de formación profesional mui concisu y en coses mui concretes y llueu van a una bolsa de trabayu. Y esti personal, que, como digo, en principiu ye mui vulnerable y con munchos riesgos, puede entamar a tener, en principiu, autoestima, unes ciertes habilidaes profesionales y sociales y una cierta capacidá d’integración llaboral.

Pues bien, nel últimu añu, raru ye’l día que nun llega un español a informáse por esti tipu de polítiques d’ayuda. Dícente: “oye, tengo equí unos vecinos que son dominicanos y cubanos y tal, ¿nun puedo facer yo dalgo d’eso?”.

Y la respuesta siempre ye la mesma claro: Non. Primero, porque’l primer recorríu d’aprendizaxe de lo que ye la vida llaboral y social equí, nun-y fai falta, y segundo, porque tien otres víes.

Y casi siempre, esa petición d’información termina en mosqueo: “h.oder, o seya ¿qu’un marroquí tien derechu y yo non?”

Pues efectivamente ye asi, el programa ye pa eso, pero la pregunta ye bona y pertinente, pero ye qu'hasta va doce o catorce meses nun facía falta o nun se vía la necesidá.

Esi tipu de persones, contra lo que dalgún pué pensar, nun son un cabeza lloca, o xente metío na droga o la marxinalidá o la delincuencia, nin ye una persona que se dio al xuegu y perdió too, son persones absolutamente normales, son xente que nes so vides se dieron una serie de circunstancies que, añadíes a la crisis, ficieron pegar un reventón de vida absolutu, y caer na marxinalidá.

Voi poder dellos exemplos, si doi algún nome, ye inventáu: cuarenta y cinco años, estudios universitarios, aunque nunca se dedicó al trabayu relacionau colos sos estudios, pero sí a munches coses, hostelería, montaxes…, lleva diez años viviendo cola parexa, ensin papeles de pol medio, y prodúzse una situación de crisis, la parexa ruempe, nun hai vínculos económicos o familiares a los que garrase, colo cual, caída na más absoluta marxinalidá.

Persona similar, cincuenta y picu años, trabayos mui esporádicos, vivía cola so madre nuna casa na que la madre pagaba una renta d’eses que nun pueden subir. La madre muerre, el propietariu diz que s’acabó’l contratu, y a la cai. Y vive nun coche.

Son esti tipu de persones les que, nuna situación de mala suerte xunía a la crisis pasen de ser normales a la marxinalidá. Y esa situación, en cuantes que dura más de dos meses, nun hai quien los saque d’ehí. Lo que ye terrible. Y esto pasa tolos díes. Raru ye’l día en que nun apaez un casu d’esos.

Y empieza a vese al inmigrante como una competencia nel accesu a ayudes. Y eso antes nun pasaba casi nunca.


Rafael Piñera
Coincido plenamente con Carmona na situación que tamos viviendo. Noto que cada vez ye más complicao acompañar a les persones coles que tamos trabayando. Trabayo sobre too con mozos menores inmigrantes, y lo que nun se vivía hai dos años, tamos entamando a vivílo. Dende empreses que ya nin tan siquiera nos reciben pa coyer un currículum, a dir pola cai y ver alguna actitud estraña.

Creo que tamos viviendo como nuna doble moral, na que vivimos nuna sociedá altruista pero siempre y cuando nun nos toquen la chaqueta, a mi faime muncha gracia dellos de los comentarios qu’escuchamos, sobre too nel entornu del comedor, cuando topes a les persones vulnerables pola cocina económica, entós, ‘probinos’, ‘qu’estampa más carnal’, pero en cambiu, cuando les topes na plaza, baxo la to puerta, o na to cai, son unos ‘cabrones’.

Paezme qu'algo no que tamos fallando, y tamos fallando les persones que trabayamos con estos colectivos ye na sensibilización de la sociedá. Polo menos na mio esperiencia, igual trabayamos muncho coles persones, pero a veces, igual hai que trabayar más na sensibilización de la sociedá.

Dempués, tamién percibo qu’hai como una falta de coordinación entre les diferentes alministraciones, entre les diferentes conseyeríes. Ta la de Bienestar social, llueu ta la de salud, llueu ta la d’Educación, pero nun hai una cooperación nin una política integral, colo cual ye como compartimentos estancos nos que tenemos poques posibilidaes.

Delles veces los profesionales de l’acción educativa tenemos que suplicar nel sistema sanitariu, cuando ye una realidá que nos atañe a toos.


Y, dexando’l tema de les instituciones, hai un puntu que creo que tamién ye importante, y que lu taréis viviendo, y ye’l tema de los menores cuando cumplen 18 años. Xeneralmente hai places pa los menores desprotexíos, pero una vez que cumplen los 18 años, hai mui poques estructures, o casi denguna, que los siga apoyando, colo cual, quizás hai un añu o dos, los mozos podíen salir con una formación y munchos d’ellos con un empléu, pero agora, cola situación na que tamos viviendo, non sólo los que teníen empléu tan perdiéndolu, sinon qu’además, los xóvenes que cumplen la mayoría d’edá, nun tienen a onde dir.


Y un llamamientu más, hai poco hubo unes declaraciones en prensa, nun voi decir de quien, que nos definía, al colectivu d’educadores como unos inoperantes, cuando al final, somos meros profesionales y podemos facer lo que nos dexen facer.

El gran problema col que nos topamos munches veces los profesionales ye’l gran intrusismu qu'hai. Dicen, si un programa nun funciona ye polos profesionales que tan ehí. Vamos ver, atendiendo a les funciones que se necesiten, habrá que contratar a persones cualificaes que puedan desendolcar eses funciones, y non porque tengamos la concencia de qu’esto son cuestiones caritatives, paez que cualquier persona con bona voluntá ye quien a desempeñar esti trabayu.


Un asistente
Tengo dos preguntes, la primera va un puquiñín no que decía Rafa, veo una dexación de funciones por parte l’alministración pública brutal, creo que ta tirándose de les asociaciones, d’organizaciones en sin ánimu de llucru pa cumplir funciones que tendría que tar asumiendo l’estáu de mena directa, profesionales que deberíen tar contrataos y cobrando un bon sueldu, tan siendo suplíos por voluntarios, y lo que me paez tamién especialmente grave, ye que lleguen a facese hasta funciones de mélicu por persones en sin formación médica denguna.

Y paez que se xustifica porque actualmente, pagar a los profesionales que realmente tan trabayando como los profesionales que son sería inasumible pol estáu, polo menos como ta agora la situación. Y nun se ta trabayando en serio nello, deleguen, dan subvenciones, además subvenciones ridícules pa lo qu'hai que facer, y llueu critícase que nun salgan bien.


Otru asistente
Eso ye una cosa xeneral, la subcontratación ta xeneralizada. Nel ámbitu de cultura, por exemplu, coses qu’anantes yeren municipales, agora son empresa mista, y llueu subcontratu. “Doi la pasta que faga falta, pero nun me vinculo más de lo necesario”. Y pasa a una entidá privada cola que se fai un conveniu, pero poniendo una distancia de por medio.


Minervino de la Rasilla
Esa ye la mio esperiencia, y cada vez más, sobre too nel ámbitu de la xusticia y la sanidá. Por exemplu Cáritas va tener que cerrar ún de los proyectos más grandes que tienen, que ye la Clínica de La Santina pa l’alcoholismu. Lleven diciéndolo ya hai dos años y agora mesmo ye ya una realidá, van tener que cerrar. Y xente que ta recibiendo agora tratamientu, igual cien o doscientes persones a lo llargo del añu, nun van seguir con esi tratamientu, y nun hai otra clínica, nin otru centru, nin públicu nin priváu que lo asuma.


Una asistente
¿Y por qué la cierren?


Minervino de la Rasilla
Por falta perres


Xosé Lluis Carmona
Falta de dineru. Tamos falando de crisis. Esi ye un exemplu sangrante. Pero hai otros munchos. Por exemplu cola Conseyería de Bienestar Social tenemos un programa pol que podemos contratar a una persona, tamos a 1 de xunetu y hai unos díes la conseyería avisó que'l conveniu que da sofitu a esi programa, que ta firmáu hasta que termine l’añu, rómpenlu unillateralmente a día de güei. Y dixímos, “pero cómo se caltien lo que tenemos…, pero si hai una persona contratada…”, y nada, a rompélu por falta perres, pol artículu 33, mandes a esa persona contratada pal paru, les persones a les qu'atendía dexen de tar atendíes...


Un asistente
En teoría, lo que se plantegaba dende la Conseyería de Bienestar Social yera qu’eses perres nun se tocaben, que podía haber un cataclismu, pero eso nun se toca.


Xosé Lluis Carmona
Ya, y si se va a los tribunales seguramente se gane, lo que pasa ye que, ¿quién va a facelo? Nadie, aguantes el tirón.


Y hai un asuntu especialmente sangrín, terrible, a veces les alministraciones nun reaccionen porque nun taben preparaes pa prevenir esti tipu de coses. Nuna escala de 1 a cien, hai una gran mayoría de persones que tan, purriba del cincuenta, que tienen un trabayu estable, normal, nun tan en riesgu, y según vamos cayendo del cincuenta van teniendo situaciones más o menos difíciles, podemos suponer que del veinte pa baxo ya son persones probes, a les que-yos cuesta muncho caltenese nel día a día, si nun ye con ayudes d’equí y d’allá nun lo consiguen, y hai organizaciones non-gubernamentales y a veces les alministraciones que les ayuden a salir a flote. Pero hai un espaciu entre veinte y treinta que naide cubre. Son persones que tienen munches dificultaes pero nun acceden a determinaes ayudes porque nun tan por debaxu d’un nivel, pero a la vez, la situación va afogándolos y nun lleguen a tar purriba de cuarenta o cuarenta y cinco que ye lo que debía de dar la salida. Y pa eses persones nun mira nadie, cuando son, efectivamente, les que tan nun riesgu de marxinación más absoluta. Son los que podemos ver mañana durmiendo entre cartones, y h.oder, son persones normales absolutamente que pueden vese en males situaciones por distintes circunstancies de la vida. Y a eses nun les toca nadie.

Yo que sé, porque tienen un pisu, que ye nel que viven, pero que-yos sube nel baremu pa pedir determinaes ayudes y nun tienen derechu a nada. Pero que tan fatal, porque a lo meyor nun pueden pagar la hipoteca, o nun tienen hipoteca pero tienen cargues familiares que nun pueden atender…, padres mayores…

Esi ye otru problema. Nós tenemos hospitales y a veces llamen porque: “oye, qu'a mio padre danlu d’alta nel hospital y tien un problema de movilidá ¿qué fago con él?” Porque taba en casa y agora nun se puede mover, y vive nun quintu en sin ascensor…

Pues nada, nun hai na que facer, “vas tener que paga-y a alguien pa qu'atienda’l to padre”.” Pero si nun tengo nin pa min” dizme él.


Y bueno, la casuística ye enorme, y agrávase nos últimos doce meses, cola desaparición de programes, la falta perres, la situación llaboral de la xente...


Un asistente
Además, ellí na Cruz Roxa sois unos privilexaos, nun hospital, por exemplu, la enfermera ye enfermera, el mélicu ye mélicu… pero en munches otres organizaciones tan faciendo funciones xente que nun tien que faceles. Y en munchos casos el voluntariao ta faciendo funciones que nun tien que facer. Son persones que tendríen que ser profesionales y son voluntarios en sin la preparación necesaria en dellos casos. Pero nun hai perres pa contratar a esos profesionales.Y hai que tener unos recursos que permitan atender bien a les persones.


Rafael Piñera
Ye verdá. Tan vulnerándose los derechos de los ciudadanos. Cuando ye impensable que lleves al to neñu a poner una vacuna y-y la ponga l’ausiliar alministrativu, debía tamién ser impensable qu’a una d’estes persones, que dices ‘normales’, ye decir, persones, los atienda un ausiliar alministrativu, con tol respetu polos ausiliares alministrativos.

Y llueu decimos, “ye que los programes nun funcionen”. Ya, claro, nun funcionen porque nun hai personal cualificáu, o’l personal ‘cualicáu’ que tamos, tamos munches veces por baxo los mil euros, tamos con turnos, tamos con nocturnidá de diez hores… hai munchu queme profesional, y tan vulnerándose los derechos de les persones coles que tenemos que trabayar.


Un asistente
Igual ye introducir una variable tanxencial nesto, pero quiero falar de la educación, nesti casu, la educación reglada. Los centros educativos nun tan informaos d’eso que falabes. Los nenos evidentemente hasta los dieciseis años nun pueden abandonar el sistema educativu, los que tan dientro d’esi 30 por cientu que decía Carmona, bono, pues repetirán, aguantarán, sacaranlo o non lo sacarán, y los que tan na zona más desfavorecía, esos abandonen dafechu pa ponese a trabayar, pero nun hai malpenes información nesos centros educativos acerca de les opciones que tienen esos rapazos.

Puedo falate por exemplu de xente que tenía derechu a ayuda dende los doce años y nunca lo supieron, y acabaron en sin sabelo, puede ser tamién quizás por falta d’interés de los padres, pero eso nun ye culpa de los nenos.

Y hai xente tamién que ta nuna situación familiar terrorífica, nun sé, con padres drogadictos, y nun sabemos qué facer. Y llames al trabayador social, bueno, nesti casu, trabayadora y sácate un tochu así de xente que resulta que ta peor.

Y evidentemente eso va acabar siendo un desastre.


Xosé Lluis Carmona
Ya, munches veces los centros educativos ya bastante tienen con cumplir colos sos oxetivos, como pa derivar a lo otro que depende más bien de la sensibilidá social de tutores y directores. Ye complicao. Pero son les otres alministraciones les que tienen que tar n’eso. Sanidá, Bienestar Social, les propies alministraciones municipales…


Un asistente
Agora que tamos nuna situación de crisis ¿hai diferencia? ¿puede ser que tamos a la defensiva?


Xosé Lluis Carmona
Vamos dir a peor. Va a haber menos recursos y más xente en situación de vulnerabilidá y d’esclusión social.


Rafael Piñera
Creo que lo que vamos ye parcheando. Podríen facese munchos programes, nos centros educativos… pero ye que somos una de les poques comunidaes autónomes nes que nun hai educadores sociales nos centros d’educación secundaria. En delles comunidaes confúndese, y son los que ponen pa cuidar los comedores, los patios, el transporte escolar y demás, y n’otres, en coordinación colos equipos educativos, l’educador sí que trabaya con estos chavales que pueden tener algún problema.

Pienso que tamos garrando los problemes cuando ya nun tienen solución, cuando podría prevenise. Toes estes persones que tan nel umbral, que son los verdaderamente vulnerables, nun tan atendiéndose. Y llueu ye tarde, y ye más caro después sacar a una persona que baxó que coyela nel momentu.

Y tamién hai ayudes mui estrañes. L’ayuda pa los chavales cuando cumplen la mayoría d’edá. El Principáu retiróla l’añu pasáu, creo. Pues yera una ayuda que se daba a los chavales que taben tutelaos, que cuando-yos llegaba, con suerte seis meses después de tener colao del centru, con una cuantía d’unos tres mil euros. ¿Y nesos seis meses que fai el rapaz? Y de repente un mozu, que quizás munches veces nun sepa alministrase muncho, recibe tres mil euros… Enfin, creo que son medíes que nun tan bien planificaes. Ya incluso pueden afalar al chaval a seguir na marxinación.

Hai munches ayudes que son perverses porque creen una dependencia nes persones.

Ahí habría que reflesionar y nun gastar recursos en sin una planificación integral.


Minervino de la Rasilla
Nel bancu d’alimentos hai un cartel que pon: “Tan perxudicial ye nun ayudar como ayudar demasiao”.

Y ye verdá qu'hai xente que ta viviendo d’ayudes, pero son un grupúsculu que caerá pol so propiu pesu.


Sólo hai qu’echar una güeyada a los albergues pa ver lo que decíes, el cambiu de perfil. Ya nun ye xente con problemes de drogadicción, alcoholismu… ya nun ye eso. Hai unos años toos teníamos clarísimo quien yera’l probe. El probe yera’l yonqui que taba tiráu na cuneta. Eso ya nun ye asina, nun ye asina porque dio pasu a otru perfil de xente d’entre treinta y cincuenta años, que xeneralmente son d’otra comunidá y entós nun tienen una familia directa que pudiera ocupase d’ellos nun momentu determináu, que, como dices, pasáron-y un par de coses seguíes y… ¿qué tienen? Nada. Cayen. Y eso ye terrorífico. Xente que lleva venti picu d’años cotizaos y tá na rede d’albergues.


Xosé Lluis Carmona
Esti últimu añu cambiaron munches coses. Y más que van cambiar el prósimu. Porque hasta agora tovía calteníen un poco la cara. Pero casos como esti de romper unillateralmente un conveniu… tan metiendo tixera por tolos llaos, por onde seya, purriba del llímite.

Años p’atrás l’enfoque de munches de les ayudes taba destináu al marxinal, al alcohólicu, drogadictu, demenciáu, étnies con dificultá d’inserción… y dibes tirando, y como decíes, dibes parcheando, pero agora ye que nin siquiera parchees, y empiecen a españar venti mil casos. Y nun hai forma de salir d’ehí. Y nun hai nada previsto.


Minervino de la Rasilla
Ye tan cenciello como…, imaxínate, quedes nel paru, acabáronse les ayudes, perdiste la casa’n propiedá, y tas nun albergue. Agora vete a pedir trabayu y da la dirección d’un albergue a que te llamen ellí, porque claro, nun vas tener teléfonu móvil. Y cuando llames, nun sé, a la cocina económica y preguntes por fulanu, si'l que contesta tien cierta sensibilidá y esperiencia puede intentar …tal, pero imaxínate que contesta: “asociacion xixonesa de caridá, dígame”. ¿Vas contratar a esi paisanu?


Rafael Piñera
Na sociedá percibimos los servicios sociales como daqué destináo al mundu la marxinalidá, y nun lo vemos como un serviciu normalizáu.

Yo mesmu, si quedara nel paru, si me vinieren dos tortes mal daes, y viviera nuna situación de marxinalidá, pola mio formación, sentiría como una humillación dir a los servicios sociales. Porque tenemos deprendío, asumío, que los servicios sociales namás son pa les persones mui marxinales, cuando ye un serviciu que los ciudadanos tenemos a la nuestra disposición.

Creo qu’equí tamién tendríamos que trabayar pa elliminar esi estigma social.


Xosé Lluis Carmona
Eso lleva al probe vergonzante qu’esiste muncho. Persones que tan pasándolo mal dafechu pero qu’oculten esa situación a tolos demás quitando’l primer entornu de más allegáos. Siguen cola so corbata per ehí, como’l Lazarillo de Tormes, echando migues por ehí pa que se noten y paeza como si comieron. Porque nel momentu que’l so circulu d’amigos los perciban como marxinales, quédense. Ye una situación perversa esa.


Un asistente
Cáritas tien dao unos datos que falaben de, antes de la crisis, unos ocho millones de persones per baxo del umbral de la probitú. Claro hai cantidá de casos que tienen unes redes sociales y familiares qu’ayuden, pero ocho millones ye tela.

Y ante esa realidá de toa esa cantidá de xente, polo que decís, l’acción o reacción de les entidaes públiques, ye bastante probe y arbitraria o mui dispersa.


Minervino de la Rasilla
Nun hai nada que nun se renueve d’añu’n añu. Nun sé si vosotros teneis algún otru tipu de conveniu, dende llueu nosotros, na Cocina Económica, creo qu’eso nun pasa. Tenemos la suerte de que la sociedá xixonesa siéntese mui cercana a la Cocina Económica, son cientu diez años d’historia, tien munchísima solera… ye curioso pero hai munchísimes más ayudes del pequeñu comercio que del ayuntamientu. Ta la pescadería nun se qué que tolos díes del añu da un caxón de pescáo, y nunes condiciones perfeutes. Tolos díes del añu da un caxón de pescáo. Y hai muncha cultura popular de…, si se fizo una fiesta y sobraron, pues venti tortielles…, vamos llevales a la Cocina Económica. Y muncha xente que colabora con donaciones económiques, puntual, selmanal o mensualmente. Tenemos esa suerte.

Porque hasta la TPA vien a grabar a la xente que ta na cola pa entrar nel comedor. Vese, ta ehí, “coño, ¿y esta cola que ta na calle Mieres de qué ye?”. Tolos díes. Una cola del copón de xente que va comer. Y xente normal. Ye increible.


Al bancu d’alimentos hai cincuenta o cincuenta y cuatro asociaciones que van a recoyer comida n’Asturies, na Cocina Económica de Xixón tan comiendo trescientes persones tolos díes, y eso en Xixón, que ye un pueblín.


Xosé Lluis Carmona
Faríen falta otres polítiques. Un sitiu con cuatro millones y mediu de paraos o más, vamos facelo esaxerao, casi cinco millones de paraos, necesitaría una política de solidaridá, tanto gubernamental como de los ciudadanos. Sería: “usté que trabaya ocho hores, va pasar a trabayar seis hores, o cincu, y a cobrar en función, porque d’esa manera abrimos un espaciu pa otru. Val más que toos estemos col agua por equí [nivel mediu-altu], a qu'haya munchos col agua por equí [nivel altu] y munchos col agua por equí [nivel mediu]. Pero sólo con que se plantee eso de forma seria… el gobiernu que lo planteara cayería al día siguiente.


Un asistente
Esa ye la verdadera solidaridá. Nun ye dar la ropa que te sobra. Igual ye que tú, esa camiseta que vas comprar que cuesta cincuenta y tres euros, cómpresla de treinta, y los otros venti dedíqueslos a eso. Ye que renuncies a algo, y que seya una renuncia de verdá, nun dai un euro a alguien.

Pero esi ye un valor que nun ye prioritariu entre les preferencies de les persones y en consecuencia tampoco ye prioritariu a la hora d’esixir a quien tien obligación de facelo. Porque si de verdá tuviéramos una preocupación fuerte pola marxinación social que se ve, y el gobiernu qu’ hai, el que seya, nun responde a eso, tendría que sufrir un castigu, en cuanto se sufre un castigu electoral les coses entamen a cambiar, pero nun hai esa preocupación, esta ye una sociedá mui individualista.


Xosé Lluis Carmona
Pero esa solución ye inviable, aparte de que nun diba ser socialmente aceptada, ye inviable, la vida de la xente ta enfocada n’atender obligaciones en función de lo que se cobra, pagar una hipoteca, caltener nun se qué…y si nun se puede afrontar eso, tola cadena tien qu’axustase. Ye inviable, lo que fai a la sociedá tovía más egoísta.


Y por otra parte da-vos cuenta de que puede ser que'l mesmu qu’ingresa nuna cuenta venti euros p’Haití, mire malamente a aquel qu’alcontró durmiendo nel portal de casa.


Un asistente
Qu'a lo meyor ye tamién d’Haití.


Otru asistente
Tolos impuestos que pagamos, que son escesivos, el cincuenta por cientu la gasolina que compramos son impuestos… ¿pa qué? Too eso va al estáu, ¿qué ta faciendo l’estáu con eso?


Xosé Lluis Carmona
Pagá-y perres a los bancos.


Otru asistente más
Eso ye verdá. L’usu de los fondos públicos ye verdá. En gastu social, España, por muncho que nos vendan la moto, tamos a la cola d’Europa, bastante a la cola.

En gastu social somos heriedes del franquismu, tamos mui por baxo de lo que tenía qu’haber.


Un asistente
Falásteis antes d’esi paisanu de cuarenta años al que se-y acabaron les salides, pero, ¿hai diferencia real entre homes y muyeres?¿Cómo afeuta esti tema en cuestiones de xéneru?


Xosé Lluis Carmona
Home, nun sabría decite. Si tuviera qu’improvisar una contestación casi podría decite que ye más vulnerable l’home que la muyer, porque ye más inútil, o seya, porque tien desarrollaes menos habilidaes.

Nun escaezamos que l'ochenta por cientu de los casos d’atención a xente dependiente tan llevándolo muyeres. Siempre. La fía, la nuera, la sobrina…


Un asistente
Equí ta dándose una situación mui curiosa, ye bastante evidente que tamos viviendo nuna sociedá na que tien más cargues, en xeneral, la muyer que l’home, y sin embargu, aunque nun duldo que los homes seyan más inútiles, nun ye la mesma situación la d'una muyer separada que ya nun recibe la pensión y que tien dos güah.es que la d’un home nel mesmu casu. Ye más común la primera situación que la otra, ye más común, nun digo que nun los haya. La situación de la muyer ye la más normal, y ta pasándolo bien mal, y sin embargu nun recurre tan fácilmente a les ayudes.


Minervino de la Rasilla
Ye que, además, por exemplu na Cocina Económica, nel algergue, nun pueden entrar muyeres, sólo ye pa homes. Y el pisu nel que yo trabayo, tamién ye sólo d’homes. Siempre hubo más homes que muyeres nesto de la marxinalidá.

Ye triste decilo, pero por fortuna o por desfortuna una muyer podía buscase la vida d’otra manera que la d'un paisano. L’home robaba, la muyer prostituyíase. La muyer xeneralmente siempre tenía un sitiu onde dormir y l´home non. Esto, históricamente fue así, agora, con tou esti cambiu que ta pasando, evidentemente hai ya casi'l mesmu númberu d’homes que de muyeres en toes estes coses, colo que les estructures van tener que cambiar.


Un asistente
Pero ye qu’eso plantega una discriminación de base realmente. Vase a pol home que paez que ye drogadictu, pero nun tamos preocupándonos de la muyer que ta prostituyéndose pa dar de comer a los fíos, que ye mui duro.


Minervino de la Rasilla
Sí, pero ye que la muyer tamién se droga. Evidentemente les asociaciones que se dediquen a esto van tener que cambiar. Bueno, ya tan camudando poco a poco. Por exemplu, n’Avilés, Cáritas tien un pisu onde entren homes y muyeres…


Y como decíes, paez qu'una muyer tien más habilidaes. Siempre puede curiar guah.es, siempre puede curiar vieyos, va a llimpiar portales… y eso un paisanu raramente va facelo.


Un asistente
Pero eso demuestra qu’hai un machismu per detrás. Al home nun-y cai dengún aniellu por dir a llimpiar portales.


Minervino de la Rasilla
Ya, pero tamién na cárcel hai diez módulos y nueve son de paisanos y ún de muyeres. Creo que la cuestión de xéneru ta tan enraigonada na cultura… que si ves a un paisano fregando un portal…


Xosé Lluis Carmona
Ye más, ye que’l presidente de la comunidá ya non lu contrata. Vien alguien de confianza per ehí diciendo: “oye, hai una moza per ehí que tien dos fíos y lo necesita y nun sé cuanto…” y contrátala. Pero si dicen: “ye que ye un paisanu que ta pasándolo mal y tien que curiar a los padres…” y míralu, y ye ún de barba, y diz “quita p’allá, non, non”.

Reís-vos, pero ye así, esa ye la reacción. Hasta agora, el que taba baxo los llímites de la vulnerabilidá, el marxinal, yera por ‘cabeza lloca’, por tener cayío nes drogues, nel alcohol, nel xuegu…

Pero agora cola crisis, llega otra xente, y eso oblíganos a toos a reaccionar d’otra manera. A toos, a les alministraciones publiques, que nun taben preparaes y a los ciudadanos. Y esta situación ye p’aumentar.


Un asistente
Y si siguen quitando recursos…¿nun puede llegar a romper?


Minervino de la Rasilla
Pero qué ye romper. Pa mi ya ta roto dende hai munchu tiempu. Vas poniendo parches y parches y parches, pero esa familia de tres miembros cobrando cuatrocientos cincuenta euros, pa mi ya ta rota, ta destrozada d’arriba abaxu.

Y que más de trescientes persones tan yendo tolos díes a la cocina económica a xintar… pa mi ta roto.


Un asistente
Y ¿esta xente ye receptiva?¿tan por trabayar onde seya?


Xosé Lluis Carmona
Si, claro, los que cayeron quieren tornar a la normalidá.


Rafael Piñera
Independientemente de cómo nós veamos a eses persones agora, y de la imaxen que tengamos d’ellos, son persones. Y fixa-yvos, na pregunta, ye una esaxeración, pero tamos criminalizando a eses persones.

O seya, en realidá son víctimes d’esta sociedá. Porque nadie ta na marxinación porque quier. Bien seya porque nun tuvo los sofitos que debería na so infancia o adolescencia,o bien seya porque yera vulnerable y cayó nes drogues.

Nadie quier tar ehí porque sí, lo que pasa que munches veces lleven tantu tiempu na marxinación que ya se perciben como marxinales, y piensen que too ye una puta mierda, o que la sociedá ta contra ellos. Pero si vamos al raigañu, a la familia, a los neños, nun sé, igual esos neños noten ya una diferencia col restu los compañeros, van marxinándose, quiciavis son los más retraídos en clase, o llamen l’atención y ya entamamos a machacálos.

Vamos, nadie quier ser marxinal, hai siempre una serie de circunstancies que los tienen llevao a ello.


Un asistente
Ye verdá. Munches veces, la xente que llega a esos llímites, llega porque la sociedá lu emburrió al puñeteru abismu.


Presentador
Bueno, ya tamos pásandonos de la hora y tenemos que cortar, nun sé, si daquién quier decir lo último...


Xosé Lluis Carmona
Bono, nun sé vosotros, pero quiero decir pa finar que tamos mal y que vamos pa pior.