Tertulia: Asturies en rede. CiberActivismu y Compromisu

Resumen de la tertulia del 22 de payares de 2011

Asturies en rede.
CiberActivismu y Compromisu


Na que participaron

· Mikel González
 Creador de la rede social XIMIELGAME

· Vítor Suárez
 Blogueru de FUEYA EN BLANCO

· Fernando de la Fuente
 Representante del diariu dixital ASTURIES.COM

Presentó: Rubén Ardura



Rubén Ardura
Bones tardes, na “Tertulia Pachín de Melás” d’esti mes vamos tocar un tema bastante ampliu y xenéricu, pero que toos aquellos que navegamos o facemos coses por internet tenémoslu bastante presente, ye “Compromisu y CiberActivismu”, dos pallabres mui venceyaes porque toes aquelles persones que tienen un compromisu con daqué, van buscar la manera de desarrollar esa defensa o esa promoción o esi “compromisu” al traviés de les ferramientes que tien, y una perimportante nos años que vivimos ye internet.
Va poco taba mirando una web mui vieya que recopila cómo yera internet hai diez o doce años y ves lo primitivo que yera aquello y cómo, a lo llargo de los años, la cantidá de ferramienta qu’hai, lo fácil que ye acceder a ella y les posibilidaes qu’ufierta pa cualquier persona.
El debate ta tamién en qué consecuencies tien too eso, aparte les positives de la posibilidá d’espardir un mensaxe que permite internet y algamar que la xente que nun ta venceyada a nada s’avere a reivindicaciones o a pidimientos d’una forma más cenciella que ponese na cai, o en cómo se puede tar cortando dende ciertes instituciones, munches veces públiques, cuando non privaes, esa llibertá que tien internet.
Y tamién les consecuencies que tien pa un movimientu de reivindicación o de compromisu que seya, el que seya. Cómo tien qu’usar les ferramientes, cómo tien que  variar y qué consecuencies internes tien. Porque tamién se fala qu’eso puede llevar a atomizar les propuestes, que la xente, en vez d’asociase, failo por si sola… en fin ye un debate que ta abiertu.
Y pa ello tenemos equí a varies persones qu’equí n’Asturies, tanto en compromisu como en ciberactivismu, tienen muncha esperiencia, como son Fernando de la Fuente, direutor del diariu Asturies.com, el primer diariu n’asturiano que surdió nesti país, el so compromisu col usu de la llingua, aparte d’otres iniciatives como Espaciu y Tiempu, lo d’infantil, radio y otres coses,  ye evidente y constante a lo llargo de casi quince años, lo que diz tamién qu’esto d’internet ya tien el so pasáu, inclusu n’Asturies.
Tenemos tamién a Mikel González, participante en varies iniciatives, tanto d’usu del asturiano como d’apuesta pol software llibre. Y a Vity, Vítor Suárez, Vity pa los amigos y pal blogue de Fueya en Blanco, que ye la principal actividá de desarrolla n’internet, qu’anque tien un cálter personal, tien munchu compromisu cola llingua asturiana y canalizando pidimientos y reivindicaciones a diversos estamentos, ya seyan públicos o privaos.
Bono, p’arranque, una idega que vos plantego pa entamar la tertulia ye que caún comentéis les idegues que vos surden alredor d’estos temes.

Vítor Suárez
Creo que’l fechu d’utilizar la llingua asturiana agora ye, en sí mesmu, un fechu de militancia, fáigaslo na cai, fáigaslo coles instituciones o n’internet. Cualquiera qu’usamos la llingua asturiana usámosla conscientemente, nun sólo porque seyamos falantes patrimoniales o neofalantes, si non como una ferramienta reivindicativa.
Entós, la mio esperiencia no que podemos llamar ciberactivismu usando la llingua asturiana básase principalmente en tres ferramientes.
Voi entamar pola que me paez que ta mas escaecida, que ye la wikipedia, la wikipedia ye un proyeutu global que nos ta allugando agora mesmu nel mundu, ye una ferramienta mui importante que nos visibiliza, y creo que ye lo que tenemos, agora mesmo más escaecío.

Rubén Ardura
¿Cuántos artículos hai, más o menos, nesti momentu?

Vítor Suárez
Sobre dieciseis mil artículos, ye una cifra modesta, pero pal nivel de collaboradores qu’hai, ta bastante bien y nun se tien muncho en cuenta.
Y bono, creo que ye una ferramienta pola que tendríamos que puxar y espardela, porque podemos usala en munchos ámbitos, por exemplu nel ámbitu educativu, que nun se ta usando. Y tamos xenerando conteníu na web, porque nun ye normal que busques ‘Les Arriondes’ y te salga cualquier cosa, si busques ‘Les Arriondes’ lo normal sería, como pasa en castellano, que la primer entrada seya un artículu n’asturiano sobre esa población.

L’otru ámbitu nel que tengo trabayao ye’l blogue, como mui bien dixisti. El blogue tamién fue evolucionando, igual que la mio propia militancia y nun entamu yera más bien divulgativu, de dir a les manifestaciones y grabales o esparder les convocatories, y llueu ya metime un poco con artículos d’opinión y agora mesmo centréme ya puramente nel ámbitu llingüísticu, porque tal y como tamos nestos momentos de crisis, creo que tien que ser prioritario.
A la xente entrai’l discursu de qu'hai que quitar política llingüística porque quita munches perres y nun val pa nada y ye cuando más tenemos que facer piñu y xuntanos y dicir que non, qu’esto además puede xenerar perres o bono, ye un bien cultural d’Asturies que tenemos que protexer, cueste perres o nun cueste perres.

Y por último, les redes sociales, que ye un tema que me paez tamién perimportante nel ciberactivismu. Mesmamente Twitter, Facebook o You Tube son tres ámbitos mui distintos de trabayu.
Twiter paezme una bona ferramienta, anque ye un poco más política, Facebook tamién pol ‘feedback’ que recibes de los collacios y amás ye una bona manera de contautar con xente. Y tamién paezme mui interesante qu'en Twitter y Facebook la xente firma lo que diz, o suel firmar lo que diz, nun ye como los comentarios de los anteriores foros qu’había o nes páxines web, onde la xente ye anónimo y diz lo que-y peta y nun ye mui constructivo, mientres qu’en Twitter y Facebook pueden facese alderiques mui interesantes y como la xente firma lo que diz, piensa un poco más.
Y You Tube ye una bona manera de divulgar, subes los vídeos y la xente comenta, anque como ye más anónimo, prima lo irracional y los insultos, pero bono, yo cuando subí a You Tube vídeos n’asturiano, contauté con muncha xente, emigrantes, fíos d’asturianos…, o mesmamente surden alderiques mui interesantes sobre la oficialidá del asturiano y les otres llingües del Estáu Español.
Y. bono, eses tres ferramientes paécenme los más importante agora mesmo no que podemos llamar ciberactivismu pola rede o esparder l’asturiano n’internet.

Mikel González
Bono, realmente les redes sociales creo que ficieron munchu dañu a los blogues, porque hai unos años que foi’l despegar de los blogues n’asturiano, por dicilo de dalguna manera. Porque’l ciberactivismu podemos entendelu como una manera de divulgar la reivindicación de los temes llingüísticos, pero tamién como una forma de normalizar. Y nesi sentíu yeren mui importantes los blogues temáticos, como tapaponga, por poner un exemplu cercanu del que soi collaborador, que ta enfotáu únicamente en software llibre y más concretamente n’Ubuntu y nel que tamos faciendo usu de la llingua asturiana pa esparder algo universal, como puede ser el sistema operativu ubuntu. Y esa normalización ye lo que considero tamién que ye ciberactivismu.

Nes redes sociales ye diferente, porque tienes contautu con xente de tou tipu. Tienes conocíos agregaos a la to cuenta d’usuariu na to rede social que nun tienen nada que ver col tema del asturianismu y que son inclusu de fuera, y lléga-yos tou esti tipu de coses, anque seya de refilón, polo que tas dando una visibilidá, una presencia qu’antes nun había.
Pa esto tamién ye mui importante’l tema d’utilizar software llibre. El fechu d’utilizar un restolador o un navegador, como queráis llamalu, n’asturianu, nun ye solo importante a la hora de tener un interfaz n’asturiano, y poder disfrutar tu d’ello, si non de cara a les estadístiques de les diferentes páxines web, porque esi restolador va dir a la gueta siempre primero de la versión n’asturiano d'una páxina web multillíngüe. Y eso, en páxines como google, van rexistrándolo, y entós, anque ellos nun tengan una versión n’asturianu, ven la demanda qu’hai, entós, cuanto más s’utilice esi tipu de software, más evidencia va a haber, dientro los alministradores de sistemes, de que ye necesario tener una páxina o un portal n’asturiano.
Anque llueu hai páxines que nun funcionen mui bien, como la del Gobiernu del Principáu, onde da igual qu’entres con un restolador n'asturianu, porque va cargáte la páxina en castellanu, anque te ponen un enllaz bien escondíu pa que puedas visitala n’asturianu.

Asina, que'l cibertactivismu nun ye sólo l’acción direuta, como puede ser lo de Vity col so blogue, que ye necesario y que daquien lo tien que facer, y realmente lo fai bastante bien, si non tamién ye’l normalizar y falar de coses como lo que punxi nel mio blogue hai pocu, ‘andar en bici en Copenage’. Tocar tolos aspeutos nesi sentíu creo que ye positivo y necesario.

Fernando de la Fuente
Yo, más que ciberactivista, soi ciberpasivu más bien, porque suelo tener la mínima relación colos demás seres humanos, lo imprescindible.
Bono, entrando a la tertulia, veo’l ciberactivismu como daqué más complexo, más importante y dientro d’una estratexa global. Falando de la recuperación del asturiano, ciberactivismu igual sería la creación o'l desarrollu d’una serie de campañes, con unos oxetivos claros y nun tener, por exemplu un diariu dixital n’asturiano. Eso, pa min, nun ye ciberactivismu, ye una cosa que faigo y puntu.
El ciberactivismu tien que ser daqué más importante qu’eso, porque tien munchísima más utilidá. El ciberactivismu dota a movimientos con poques capacidaes económiques d’unes ferramientes mui importantes y que pueden xenerar grandes llogros. Exemplos que podamos ver agora mesmu, anque nun tengan muncha relación col asturianu, ye la famosa campaña dende varios blogues pa que se retirasen los anuncios de La Noria.
Otru exemplu d’hai munchos años yera’l famosu ‘soc.culture.asturies’, tamos falando del añu 96 o 97, cuando d’aquella nun esistía la web 2.0 y demás, entós nun esistía Asturies nos grupos de news, y hubo un grupu de xente qu’orquestó una campaña y xeneró un movimientu pa la so reconocencia nos organismos internacionales, y nació aquello de ‘soc.culture.asturies’.
Y otra campaña mui importante fue aquello de ‘Doi la cara’.

Polo tando, dende la mio visión ‘ciberpasiva’ por dicilo asina, tamos utilizando poco esa potencia de la rede, qu'igual tamos faciendo munches guerres particulares, pero falta crear esa gran rede que permita apuntar toos nuna mesma dirección y facer cibercampañes con un ciertu éxitu.

Rubén Ardura
¿Qué coses considerais que se podríen facer, nel ámbitu del asturianismu, agora mesmo?¿Qué ye lo que nun se ta faciendo o que se podría variar na forma d’usalo pa sacai muncho más rendimientu?

Mikel González
Nun creo qu’haya una necesidá de buscar otres ferramientes o buscar una meyora d'algo, porque realmente tan ehí y tan usándose. El tema ye qu’hai que ser realistes, somos pocos. Nun ye lo mesmo la visibilidá que puede tener una campaña que llegue a los cuatrocientos millones de xente que fala español que lo que se pueda desendolcar n’asturiano. Ye un pocu tamién lo que pasa con Wikipedia, tenemos dieciseismil artículos, y claro, pa muncha xente son pocos, pero ye que, bono, hai que ver la cantidá de xente que fala asturiano y depués la cantidá de xente que collabora. Tas llimitau por eso, y siempre vas tar.
Falábais tamién de la campaña “Doi la cara”, son campañes mui cencielles, onde la xente nun requier un esfuerzu tremendu por participar y por demostrar la visibilidá, pero en cambiu, proyeutos como Softastur o Wikipedia sí los considero ciberactivismu, nel sentíu de que tas xenerando un conteníu que d’otra forma sería imposible, y eso requier d’un trabayu y un esfuerzu que tol mundu nin puede nin quier dedicase a ello d’esa manera.
Entos, realmente les ferramientes tan ehí, lo que pasa ye que somos pocos, nun somos una gran cantidá de xente que pueda movilizase pa llegar a facer campañes con una gran repercusión internacional, que realmente ye lo qu’interesaría.

Un asistente
Pues yo, ye de los pocos sitios onde flipo por tolo contrario, vosotros, como trabayais nello, a lo meyor tenéis una visión distinta, pero viéndolo dende fuera, a mi paezme que la presencia del asturianu na rede ye brutal. Y por exemplu, n’ubuntu, nes llíngües que tan n’ubuntu, ta l’asturianu nun nivel peraltu. Y, sin ser l’ubuntu, comparando l’asturianu col catalán o'l gallegu, hai que pensar en toles perres qu’hai metíes ehí por parte de los gobiernos, en facer conteníos en catalán, en vasco, el gallego... Y, n’Asturies ves qu’hai mui poques perres y que, realmente ye custión de voluntá de les persones que lo faen.

Mikel González
Sí, en proporción sí, y precisamente por eso, cuando hai una situación d’afuegue, fai a la xente rebeláse más y movése por ello.

L’asistente d’antes
Y aparte, cuando se diz qu’hai un millón, como muncho, de falantes, internet xenera una cosa que, pa min, ye perinteresante, que ye la solidaridá. Nun se necesita ser asturianu, ser asturfalante, pa poder mostrar solidaridá, nun sé, dende la emigración, o dende onde seya pa ciertes coses.
Veolo básicamente nes redes sociales, Facebook, Twiter… veo pola xente que me sigue, y nun son asturianos especialmente, aparte de los que tienes rellaciones personales, hai muncha xente que me contacta de fuera d’Asturies que tien interés, bien por afinidá idiolóxica, porque tien los mesmos intereses… Y claro, que xente de fuera d’Asturies s’entere qu’hai una realidá llingüística n’Asturies, o de los conflictos sociales qu’hai n’Asturies, ye un avance, porque muncha xente de fuera d’equí, en xeneral, nun sabe nin la metá de lo que pasa. Eso pa min tien una fuerza grande, porque, lo que falabais, entamar una campaña con xente d’Asturies y de fuera d’Asturies pidiendo toos lo mesmo, puede tener un pesu muncho más fuerte.

Fernando de la Fuente
Ya, tu imaxínate una campaña potente pa respetar la toponimia oficial, la toponimia n’asturiano, y mandar el mensaxe de “nun venir a Asturies”. Esa nun sería ya una campaña sólo pa nosotros, sería tamién p’afuera. Sería pidir que dixeren “nun vamos dir a Asturies hasta que nun respetéis la toponimia”. Pidiendo-yos inclusu que faigan reserves y dempués cancelándoles… eso bien organizao y bien montáo puede tener cierta sonadía.

Vítor Suárez
Yo creo que'l ciberactivismu dase, pero dase siempre a la defensiva. Por exemplu, a nivel llingüísticu, siempre qu’hai un ataque, como lo de Diana Navarro o lo de Juan Echanove, que contó un chiste contra l’asturiano, o en radio nacional, con Juan Ramón Lucas, a eso la xente respondió. Pero siempre a la defensiva, nunca en coses en positivo, como pudo ser la campaña de “Doi la cara” o lo que tu plantegues.

Un asistente
Ye mui interesante lo que comentes de la Wikipedia, anque son coses distintes a lo que tais falando agora, lleven a la mesma reflexón, la de qu’hai mui poca xente. Podía falase de tolos movimientos, pero'l del asturianismu ye paradigmáticu, en trenta años, tolo que se consiguió, ya inclusu nos momentos nos que paicía que se taben consiguiendo coses y qu’había muncha xente funcionando, siempre se fizo mui poco en crear estructures que pudiesen caltenese nel tiempu, y siempre s’afitaron en xente que trabayó de forma desinteresada y brutal, echando toles hores del mundu durante un tiempu. Y eso, al final, ye una cosa qu’acaba provocando muncha más fustración, porque al final nun queda. Algames a crear una bola pero que, nel fondu, ye un espeyismu.
Nun ye por desmoralizar a la xente que ta trabayando, como vosotros, que tais trabayando la hostia, y sois un exemplu pa muncha xente, pero lo que puede pasar, y lo qu’acaba pasando, pola esperiencia de los que tenemos algún añu más, anque tampoco ye que seyamos vieyos, ye qu’esi nivel de compromisu ye imposible de caltener por cuestiones vitales. Bono, puede haber una persona que sí, que se dedica a ello tola vida, pero en xeneral eso nun pasa.
Y hai miles d’exemplos, ún ye’l de la xente que trabayamos na Xunta pola Defensa de la Llingua. Lo que-y pasa a la Xunta ye qu’hubo, durante equis años un garrapiellu de persones que trabayaron como animales, y agora ún ta na India, otru nun sé onde… y esi ye un de los problemes, qu'igual nun tien solución.
El tema ye cómo se puede, l’activismu en xeneral, y el ciberactivismu como casu particular, sofitalu n’estructures que puedan autoreproducise y caltenese nel tiempu.

Rubén Ardura
Ye lo que comentaba al principiu, el peligru qu’esiste n’internet n’atomizar movimientos y que nun tengan conesión entre ellos. Tu puedes consiguir facer una cosa mui bona, pero cómo se puede sumar esa ‘sinerxa’ como dicía Areces, pa crear esa base que permita que lo fagas tu cuando yo nun puedo, o que lo faga yo cuando tu nun puedes o que podamos facelo los dos.

L’asistente d’antes
Sí, pero voi más allá, lo qu’entrugo ye cómo puedes facer coses estables, que puedan caltenese nel tiempu.

Otru asistente
Lo bono que tien trabayar na rede ye que lo que faes, la mayor parte d’ello, va quedar ehí, va sirvir pal que venga detrás. Si canses, tolo que tengas trabayao va siguir ehí. Ubuntu va siguir coles traducciones que tien feches inclusu si lo dexáramos la xente que tamos nello agora, en toles siguientes versiones diba a siguir, anque nun quedaría tan actualizao.

L’asistente d’antes
Esi ye un datu bien interesante, porque, vamos ver, ¿quien s’alcuerda de lo que se fizo nos noventa?  Polo menos lo que ta na rede ta na rede.

Mikel González
Yo nun me fio demasiao de lo que ta n’internet pol tema de la censura, que cada vez ta poniéndose más de moda. Agora n’Estaos Xuníos quieren aprobar una llei que ye similar a la d’ Irán, o seya, una supuesta democracia, pero que quier utilizar la escusa de la propiedá intelectual pa censurar internet.
Lo que sí ye importante, y ye un tema del que nunca se fala cuando tratamos de ciberactivismu, ye lo de crear una rede ciudadana alternativa a internet al traviés de puntos wifi. Ye daqué complexo, pero ye la única manera real de garantizar que los conteníos van tar siempre a disposición de toos, porque ye una rede totalmente ayena a empreses, a gobiernos, etcétera, porque ta caltenida polos propios ciudadanos nes sos propies cases.
Nel casu concretu de la Wikipedia y de Softastur, muncha xente que taba en Wikipedia pasó a Softastur plantegándose la cosa d'una forma, y ye que Wikipedia nun va a acabase nunca, ye una enciclopedia de tol saber humanu, o pretende selo, y ehí, claro, puedes tar faciendo artículos tola to vida, porque nunca va a acabase, y amás ye una cosa na que ye mui fácil contribuir. En cambiu, el software llibre, como ye’l casu de Softastur, tampoco acaba, porque cada vegada que sal una versión nueva, salen nueves cadenes de testu, pero sí que llegues a tener una traducción más o menos completa a un ciertu nivel, en munches aplicaciones tamos encima del castellanu, porque’l castellanu lleva años en sin caltenese, y en dellos casos, ves el software en castellanu, pero cuando calques en determinada ventanina, salte un mensaxe n’inglés.
Y esa ye la diferencia, si paramos de trabayar los que tamos agora en Softastur, que llevamos cuatro o cinco años, esi proyeutu va siguir ehí y va siguir usándose, y afortunadamante, nel casu de Softastur, tamos teniendo relevu xeneracional, ta entrando xente mozo, por exemplu unos rapazos de Piloña de dieciseis o diecisiere años que tan entamando a trabayar con munches ganes. Y eso lo qu’hai que buscar siempre, en toles asociaciones, lo que normalmente ye mui complicao, qu’entre xente mozo. Nosotros, n’esto tamos teniendo muncha suerte, igual porque a la xente mozo-y llama l’atención eso de los ordenadores, como se suel dicir, son xente que ya nacieron coles teunoloxíes.

Rubén Ardura
Nesi sentíu, esa nueva xeneración que naz cola blackberry na mano, pala que l’usu de les redes sociales ya interner ye mui importante, como se tien demostrao, nun solo nel asturianismu, si non nel 15-M tamién, cómo veis que choca con esa otra xeneración más vieya cola so forma de reivindicar de los años 95 por poner un añu.

Fernando de la Fuente
Por definición, el movimientu asturianista ta fechu d’organizaciones que nacieron a principios de los ochenta y que, organizativamente, siguen anclaes nos ochenta.
Ye la mio opinión, y como tan anclaes, lóxicamente, nun evolucionen, nun evolucionaron colos tiempos, y asina llegamos a como tamos agora, onde la “iniciativa privada”, que nun se cómo llamalo, superó a la “iniciativa colectiva”.

Vítor Suárez
El problema de centralo sólo nel ciberactivismu ye l’alfabetización dixital, ya que falais del puente entre xeneraciones, hai muncha xente mayor que igual ta interesao no que ye Twiter y les reivindicaciones del 15-M, pero nun se puede enterar, porque nun sabe, nin utilizar el Twiter, nin tien un móvil intelixente, ya inclusu hai un tema de perres, porque nun tien perres nin p’acceder a interner dende casa nin pa tener el móvil intelixente.

Un asistente
Pa min, lo del Ubuntu n’asturiano fue una de les meyores idegues que se podía facer. Yo trabayo en coses relacionales cola informática y una de les coses que más me llegó a prestar na vida fue montar el controlador de visores y de máquines n’asturiano y ver la pila de peña qu’entra y nun se da cuenta, como si eso fuera lo normal. Entos vese que nun tien por qué ser tan estraño qu’Ubuntu te n’asturiano, cuando trabayadores, clientes míos, entren y venlo n’asturiano en sin dengún problema.
Eso, pa min, supón un fitu na normalización llingüistica, sobre todo sabiendo quien son munchos de los mi clientes, en dellos casos españolistes, por exemplu, y nun pasa nada.

Mikel González
Sí, falamos d’alfabetización dixital y a min costóme un infiernu llograr que mi padre usara un ordenador con un entornu gráficu. Cuando-y puse por primera vegada un ordenador con un escritoriu díxome, “¿y yo, onde escribo?”, porque él esperaba un ‘prompter’ onde poner comandos y coses rares, que ye a lo que taba avezáu, porque él trabayaba con unix en equipos con versiones del añu la pera. Y hasta que nun tuvo Ubuntu n’asturiano, nun entamó a movese con soltura. Porque había términos que nun llegaba a garralos, porque les traducciones castellanes son mui males, tan basaes casi toes nes traducciones de microsoft, y l’Ubuntu sintiolu más cercanu.
Asina que, a la hora de facer alfabetización dixital, pa determinaes persones que vivieron n’asturiano gran parte de la so vida, facelo nesa llingua ye daqué imprescindible. Tovía hai muncha xente que-y cuesta movese en castellano, paez raro, porque la televisión inflúyenos un montón, pero nesti sentíu sí, ye una ferramienta necesaria. Y por eso digo qu’esti tipu de coses son parte tamién del ciberactivismu, anque nun seyan d’acción directa como pueda ser convocar una concentración a través de Twiter. Y además, son un tipu de coses que queden ehí nel tiempu. Y la Wikipedia ye tamién otru exemplu clarísimu nesti sentíu.

Rubén Ardura
No de que queda nel tiempu, soi un poco más críticu. Facer una versión d’un programa o d’una aplicación ta bien, pero mirai a ‘Second Life’, hai tiempu tol mundu taba ehí y, agora mesmu ¿quien s’alcuerda?. La presencia n’internet implica y pide una actualización permanente, y si agora sal una nueva rede social, pues hai que tar ehí, y, por exemplu, agora mesmo hai que crear sitios n’asturiano en ‘foursquare’. Y eso implica a una comunidá comprometida y que tea mui activa. Y ye más fácil acceder a ello, nun ye como anantes que ún saca un llibru y tienlu el que lu merca.
De toes maneres, la presencia d’una llingua n’internet o d’una reivindicación, vamos a venceyar los dos términos, ye un termómetru de qué ta pasando. Por exemplu, ¿cuánta xente metió daqué por Twiter cuando pasó tal cosa? ¿Cuánta xente accede a una páxina web?¿Cuanta xente se manifiesta na rede por daqué? Eso ye un pulsu permanente, ye una forma de ver cuánta xente ta preocupada y cuanta xente ta activa con esa causa. Home, probablemente ye muncho mas fácil conseguir “me gusta” a que diga que va dir a una manifestación, pero les dos coses son mui importantes.
Y la entruga ye tamién ¿cómo aprovechamos eso pa la presencia na cai?

Fernando de la Fuente
¿Cuál ye la presencia na cai? El movimientu 15-M, por exemplu, fue montáu al traviés de la rede. Si nun llegara a esistir esi ciberactivismu, eses redes sociales que lo montaron, nunca nun hubiere existío. Y al final, ellos tiníen la cai, pero’l problema d’ellos nun yera que ya tiníen la cai, y en consecuencia ya ganaren, non, el problema yera que nun yeren visibles. Teníen la cai, pero eso hai que velo, y ¿onde se ve?, pues notros medios. O seya, ganar la cai ‘per se’ nun ye solo, ye tamién facese visible pal restu la sociedá.

Un asistente
Sí, eso ye un círculu, y hai que saber trabayalo mui bien, pero ye mui complicao.
Por exemplu, el tema de la diputada de Foro que dixo nun se qué en contra de los asturianos por Twiter. Y esa mañana había cientos de persones en Twiter respondiendo, y de repente, pola tarde, ya lo teníen en El Comercio y en La Nueva España na portada, y entós, claro, eso ya yera la hostia.
La cosa ye saber trabayar eso, tener una estratexa…
Pero pa min les redes sociales son claramente’l futuru pa esti tipu de coses y sobre too viendo la naturalidá cola que se mueve la xente más mozo per ehí.

Mikel González
A mi paezme que’l fechu de tener que definir una estratexa ye un plantegamientu enquivocáu, porque tou esti tipu de coses, al final, acaben saliendo de forma espontánia. Puedes facer campañes concretes, como’l casu de “Doi la cara”, que son necesaries y son tou un aciertu, pero nun casu como esti de les declaraciones de la muyer esa de Foro, surden les respuestes de forma espontánia y natural y acaba saliendo na prensa porque agora paez los periodistes descubrieron Twiter, aunque nun hai tanto, hai cosa de seis meses, y ye daqué nuevo pa ellos.

Un asistente
Sí, pero ya tabén ehí los ‘trolls’ de los grupos políticos, que tan pagaos pa eso.

Fernando de la Fuente
Y eso ye tamién ciberactivismu. El setenta por cientu de les notes yeren del PSOE. El PSOE tien, como munches organicaciones polítiques, xente ehí cola orden de participar y comentar en tolos foros de El Comercio, La Nueva, etcétera. Ta organizao. Y ye síntoma de la importancia que tienen estos foros.

Mikel González
Pero eso a min paezme hasta ofensivo. Ye facer política. Y yo nun fago política nel momentu que nun formo parte d’una organización política.

Fernando de la Fuente
Pero ye tamién una forma de política. Nel momentu que, por exemplu, tas trabayando por Ubuntu, ya ye facer política.

Mikel González
Pero nun lo fago dende una organización, que ye a lo que me refiero. Nel momentu que tas nuna organización política, ya tienes que facer de “troll”, y eso ye asqueroso. Identifíquense inmediatamente los comentarios d’esi tipu de xente, ya inórolos, lo que nun fai tol mundu.

Y cambiando un pocu, quería comentar una cosa que me paez importante. Decimos que la xente qu’usa internet con más naturalidá ye la xente más mozo, y a medida que sube la edá baxa l’usu d’internet.  Y vivimos nun país mui vieyu. Entós claro, que salga una cosa a la cai cuando la mayoría de la población tien más de cuarenta años ye mui difícil. Polo que ver n’internet la panacea pa intentar movilizar y conseguir l’acción na cai ye mui complicao. Hai que salir nos medios tradicionales.

Un asistente
Anque tampoco puedes renunciar a ello. Lo del 15-M ye al traviés de la rede…

Mikel González
Sí, pero tuvo repercusión nos grandes medios. Si nun hubiera salido en televisión…

L’asistente d’antes
Pero cuando la manifestación de Mieres, ¿quién s’enteró polos medios? Nun había dengún periódicu que lo anunciara, nun había dengún cartel. Y ellí había munchísima xente.

Otru asistente
Pero al día siguiente sí salió nel periodicu. Nuna páxina entera.

Vítor Suárez
Tornando a lo que dicía Mikel, que falaba que les protestes contra la diputada de Foro salíen d’una forma natural, si falamos de comunidá llingüistica, como somos pocos, d’una forma natural nunca va llegar a ser relevante.
Y amás los medios saquen lo que quieren, porque por exemplo, alcuérdome de la última selmana de les lletres, qu’intentamos facer “treding topic” [nome que reciben les palabres o frases más emplegaes nun momentu concretu en Twitter] con ‘asturiano’ y ‘oficialidá’ y al final conseguímoslo y eso nun salió en dengún sitiu.
Quedó pa nós como un ésitu, pero al final, nun valió pa nada.

Un asistente
Pero eso ye pa otra reflesión distinta, que ye la de ¿a quien-y interesa qu’esista esto?, mientres que ¿a quien-y interesaba que saliera lo de Foro?. Pues hai una xente, poderosa, a la que-y interesa h.oder a Foro. Pero ¿a quien-y interesa que’l asturianismu funcione?

Mikel González
Ye verdá eso que comentes, si sal lo de Foro y nun sal la reivindicación del asturiano, a pesar de que salió na selmana onde se supón que’l asturianu tien más repercusión, cuando los periódicos faen separates especiales y hai una manifestación y tal, ye porque, evidentemente, los grupos mediáticos saquen lo que-yos interesa a ellos sacar.

Rubén Ardura
Creo que a la conclusión que llegamos ye que tenemos los mesmos problemes que puedes tener a la hora de conseguir salir nel periódicu por una concentración, por exemplu. Y, nel casu d’una campaña como “Doi la cara”, alcuerdóme cuando Quini apoyó al CAO [Conceyu Abiertu pola Oficialidá], que tampoco salió, o salió, pero en piquiñín, y en cambiu, cuando Quini diba colos “amigos de la bellota”, en casa su madre, aparecía al día siguiente la foto en portada y bien grande.
Y esos mesmos problemes de visibilidá tradúcense al tema d’internet.
Probablemente internet sí te permite llegar a más xente o que te vea más xente, y puedes llegar a conseguir movilizar a más xente, pero’l trunfu suel ser pasar al papel. Por exemplu, yo creo que’l trunfu del 15-M fue pasar de tar en Twiter o en Facebook a tar na portada de El País un domingu.

Un asistente
Non, pa min el trunfu real ye qu’haya venti mil persones en Sol en Madrid. Y salió en El País porque hubo venti mil persones ellí.
Lo que marca un poco la diferencia ye que, con eso, puedes saltar la parede.

Fernando de la Fuente
Sí ye verdá que conseguir eso en sin salir nel periódicu o notros medios ye un trunfu, pero la repercusión que puede tener pa la gran mayoría de la sociedá ye pequeña. Yo conozo xente que participó nel 15-M que nun tien Twiter nin blackberry, y bastantes, ye dicir, l’españíu dase cuando das el saltu a los medios.

L’asistente d’antes
Val, pero tarás d’alcuerdu que xeneracionalmente eso ta cambiando, y va vese cada vez más. Y, nesi sentíu soi bastante optimista pa col asturianismu, siempre qu’haya una masa crítica que lu defienda claro.
Si realmente se consigue una base potente, puede frañer esa barrera mediática qu’hubo siempre.

Otru asistente
Como la propia palabra lo diz, el ciberactivismu ta fechu por persones que son activistes, colo cual ye xente más implicada, y esto ye daqué que distorsiona tamién les coses, como cuando tas nuna organización política y solo te bases no que te diz la xente d’esa organización política, y en xeneral cuando te cierres nun cículu.
Y les persones que caciplen por internet, la xente qu’usa les redes sociales, los que s’informen más por internet, tienen un perfil concretu y más si lo faen n’asturiano. Y ye un perfil mui implicau.
Y el problema ta cuando ciertes reivindicaciones o ciertes cuestiones entamen a dexase llevar polo que sal neses redes sociales, polo qu’opina cierta xente, que fai que se desvíen d’un discursu más xeneral, d’un discursu muncho más abiertu, que puede llegar a muncha más xente.
Y, por exemplu, entamen a aparecen noticies nos periódicos  porque lo dixo Facebook.

Un asistente
Ye acertao eso que dices, porque, tal como salía na prensa parecía que lo del 15-M diba a ganar les elecciones, cuando en realidá el movimientu qu’había yera’l que garraba’l partíu popular. Lo qu’había na cai en verdá yera’l vuelcu hacia’l partíu popular.
La xente que se mueve en Facebook tien un perfil concretu, y votantes del partíu popular paezme que son minoritarios en Facebook y, claro, nun tan representaos ehí.

Mikel González
Sí, ganaron por mayoría absoluta, pero ¿cuántos votos tienen?. El movimientu del 15-M, o nun vota, o vota a partíos minoritarios que nun salen… nun tienes un reflexu real.

Rubén Ardura
Respeuto a lo que dices de “cocese na so propia salsa”. Igual hai que cambiar la mentalidá, porque esto nun ye l’internet d’hai diez años, antes nun había Facebook nin otres redes sociales, y blogues yeren mui pocos, solo llistes de correu prácticamente. Y agora lo que hai sí me paez que ye d’una representación bastante xeneral. Falamos d’una xeneración, si queréis, pero güei n’internet, veo de too, ta mui xeneralizao, creo que ya pasó la barrera de cuando lo usaba xente mui mozo, atrevío pa usar coses nueves.
Agora ya nun ye asina y si nun ye agora mesmo, va selo.
Mio padre tien Facebook.

Un asistente
Y la mio suegra, que tien sesenta y picu años, y ta con Facebook tol día.

Otru asistente
Un par de consideraciones, por un llau, si vas mirar la xente que-y gusta la páxina d’Equo y la xente que-y gusta la del PSOE, nun hai tanta diferencia, mirélo va tiempu, y ya veis quien ye’l PSOE y quien ye Equo.
Y dos, pal espardimientu d’una idega, la que seya, una campaña colos sos oxetivos o lo que queráis, nun esiste’l mediu de comunicación. Nun val nin el ciberactivismu, nin el periódicu, nin la radio, nin la televisión, lo único que te val realmente ye una combinación de toes elles, y nun hai otro. Si nun tienes presencia nel periódicu, nin mio padre, nin mio madre, nin la mitá de los mios amigos, y tengo cuarenta años, saben qu’esistes, y ya puedes tener la presencia en Facebook que te de la gana, nun esistes. Y si solo tienes presencia nel periódicu, hai muncha xente tamién que nun s’entera, porque nun llee’l periódicu. Polo que necesites una combinación de too pa poder esparder una idega.

Un asistente
Ya pero cuando fales pola radio, tas mandando un mensaxe al que lu recibe, al receptor, pero internet lo que fai ye que’l receptor más afín a esi mensaxe tien un ‘feedback’, ‘feedback’ que, de momentu, nun tienes cola radio, nin cola prensa, nin cola televisión, y esi ‘feedback’, munches veces, distorsiona’l propiu mensaxe, porque puede facer que s’atienda más a esos comentarios, eses demandes de la xente más implicada y dexes de llau a otra xente menos implicada pero que munches veces representen una mayoría social.

L’asistente d’antes
Sí, pero ye lo mesmo qu’ocurre nuna asociación colos asociaos, o nun partíu políticu colos afiliaos… o inclusu nun chigre tomando cerveza.

Mikel González
Facebook ye un chigre grande.

Fernando de la Fuente
Precísamente n’Asturies.com, cuando se montó, había una sección que yera “El Chigre”, yera un adelantu de la web 2.0, que taba por venir.

Mikel González
Y la comunidá de wikipedia tamién yera “El Chigre”.

Un asistente
Nes redes sociales hai xente bastante implicada, mui activista, pero hai tamién lo que podíemos nomar como un activismu difusu, que lu forma la xente a la que-y caes bien, o cai bien lo que digas, y va retransmitítelo. Sirven como de repetidor.
Agora mesmo ya ta perdiéndose la direccionalidá del mensaxe, ya nun ye que’l mensaxe va d’ arriba abaxu y te torna d’abaxu arriba, si non qu’esi mensaxe tórnate por circuitu que menos tas esperando.
Bono, eso si caes bien, porque si caes mal lliástela.

Fernando de la Fuente
Por eso creo que teníemos que centrar un puquiñín lo que ye’l ciberactivismu. Creo que onde tien qu’actuar el ciberactivismu nun ye en coses xenerales pa que la xente comparta, si non en definir campañes concretes y crear eses redes sociales pa que un grupu mui grande de xente…, porque sal barato, ye fácil, ye cenciedo dar al “me gusta”, ye fácil mandar un email, como por exemplu se fai na plataforma “actuable”.
Ehí ye onde hai que trabayar, y eso de que salga fuera de la rede, bien, igual nun interesa, o nun pasa nada, porque nun tien por qué ser esi l’oxetivu.
Por exemplu, si queremos que alsa utilice la toponimia oficial, qué más me da a min que salga o non na prensa.

Vítor Suárez
El tema d’alsa consiguiose, más que nada, por ser pesáu y por dexálos mal en Twiter. Les empreses agora usen Twiter, y lo que hai que facer ye machacalos a mensaxes del tipu: “oye, ¿por qué nun iguais esto?”, “oye, ¿por qué nun me respondéis?”, “oye, vaya mal que lo tais faciendo”…

Fernando de la Fuente
Y eso ficístelo tu solu insistiendo, siendo pesáu, pero si hai una rede montada, y en vez de ún son venti o trenta…

Vítor Suárez
Bono, tamién hubo una campaña previa qu’ayudó, creo que se llamaba “doce causes pol asturiano”, y mandáronse correos de muncha xente. Y unes selmanes después entamé yo a da-yos la chapa.

Fernando de la Fuente
Conozo yo una cibercampaña mui particular d’unu con una compañía telefónica, que nun lu atendíen, llamaba, mandaba emails… y nun lu atendíen. Y ¿qué fixo? Val. Pues creó una cuenta en Twiter y entamó a mandar coses cada poco, fue creando una bola, diba buscando mensaxes positivos d’esa compañía y el retrucábalos con coses como “pues a min saliome mui mal”, “pues a min nun m’atendieron”, y a les venti cuatro hores ya-y taben contestando, y arregláron-y el problema a les cuarenta y ocho hores, y regaláron-y nun sé cuanto más. Y, por ciertu, salió tamién na prensa y too.

Bono, como tenemos que dir acabando, vese entos que’l ciberactivismu ye una ferramienta que tenemos o que disponemos la xente que tamos nos distintos movimientos de reivindicación, que puede ser mui potente, siempre y cuando haya una bona organización, una bona estratexa y unos oxetivos claros.

Mikel González
Yo, en principiu, nun soi partidariu d’eso de buscar estructures antigües d’organizase. Camiento que, a traviés de la rede, los usuarios saben ponese y coordinase pa llevar acciones concretes.

Fernando de la Fuente
Igual nun m’espliqué bien, nun toi falando de montar estructures, nun sé, con un presidente, tres vocales y eso, non, puede montase una rede social d’unos pocos y…

Mikel González
Eso, realmente eso ye mui cenciello, y puede facelo cualquiera.

Fernando de la Fuente
Ya, pero ye que nun se ta faciendo.

Mikel González
Esi ye’l tema, lo pocos que somos, y dientru los que somos, xente con conocimientu pa poder facer eso, igual nun somos tantos.
Esi ye un de los problemes básicu que tenemos.

Fernando de la Fuente
Con too, exemplos como’l de Softastur y otros ye un exemplu claru de cómo hai  que facer les coses.

Mikel González
Y una cosa que nun podemos pasar por altu ye’l tema de les redes ciudadanes, orientándolo tamién hacia el hardware.  Ye complexo llegar a ello, pero ye importantísimo, porque la censura d’internet ta ehí. Y dientro d’unos años va ser un fechu.

Rubén Ardura
Bono, ye’l tiempu. Gracies a Fernando, a  Mikel, a Vity por venir y echar una charra equí. Ya sabéis que la idega ye publicala nel blogue de la Tertulia en cuantes que podamos, y tamién sabéis que tamos equí más o menos una vez al mes, asina que tais convidaos pa la prósima col tema que seya. Sorpresa, sorpresa.