Tertulia: Hai una llinia trazada. La rede ferroviaria asturiana

Resumen de la tertulia del 23 de setiembre de 2010

Hai una llinia trazada.
La rede ferroviaria asturiana


Na que participaron

Carlos García Alcalde
Colectivu Asturias al Tren.
Autor de ¿Un Feve para el siglo XXI? en La Nueva España

• José Luis Delgado

• Rubén Ardura
Autor de "AVE cantábricu, el mitu de la eficiencia" en la revista Atlántica XXII. núm.4


Presentación:
En principiu teníamos propuesto que fuese Laly García la presentadora d’esta tertulia, pero avisónos que nun diba a poder llegar a tiempu. La verdá ye qu’una maquinista profesional como ella yera la persona ideal pa introducir a los tertulianos, pero bono, va venir un poco más tarde, asi que lo que podemos dir faciendo ye dir entamando nosotros y cuando llegue que s'incorpore a participar.

La tertulia d’esti mes queremos dedicala’l ferrocarril n’Asturies. Nestes tertulies nunca nos preocupamos muncho pola actualidá, intentamos sólo que seyan d’interés, pero nesti casu concretu, curiosamente d’unes selmanes p’acá, paez que salió a la palestra. Dexó de falase del ‘superAve’ esi que diba atravesar tola cornisa cantábrica, y tornó a falase de lo que’l colectivu ‘Asturias al Tren’ tien propuesto va tiempu, de meyorar el ‘Feve’. Tamién tenemos el tema del ‘metrotrén’ y d’esos túneles que tan fechos por ehí abaxu, que nun se sabe si tan muertos o ta paráo o qué.
Creo que tema hai bastante como pa falar una hora y muncho más.

Tenemos con nosotros a Carlos García Alcalde, del colectivu ‘Asturias al Tren’, ta tamién con nosotros José Luis Delgado, Secretariu Xeneral del Sindicatu Ferroviariu n’Asturies y mecánicu del taller de Llanera, de Renfe, y Rubén Ardura, articulista, que va poco tuvo la oportunidá d’escribir na revista Atlántica XII, que veo que la traxo, un artículu relacionáu col Ave, y que foi un poco lo que nos inspiró al principiu esta tertulia.

Y por supuestu, los que vos animásteis a venir, sois tamién mui llibres de participar y entrar na conversación en cualquier momentu en sin dengún problema y d’aportar coses.

Si vos paez podemos arrancar con un pequeñu turnu de palabra cola vuestra visión particular de la situación ferroviaria n’Asturies, y a partir d’ehí, alantre.


Carlos García Alcalde
Nun m’importa a mi abrir la tertulia. Nosotros nun somos una asociación, somos un colectivu informal que se llama ‘Asturias al Tren’ y la nuestra defensa prioritaria ye la rede de cercaníes n’Asturies y la rede de servicios rexonales, seya de Feve o de Renfe.
Les nuestres mires nun tan tanto nin nel llargu recorríu, nin nel Ave, nun porque temos en contra del Ave radicalmente, si non que la nuestra idega fundamental ye que la mayoría de la masa ferroviaria que se mueve fáelo nuna rede de cercaníes.
Polo tanto, polo que tamos peleando fundamentalmente, ye por que se solucionen los problemes de les cercaníes. Ye decir, primero'l ferrocarril que s’usa más de cerca, y llueu ya falaremos del ferrocarril que s’usa más de lloñe.


José Luis Delgado
Una llinia trazada’, n’Asturies, entama a tener el so riesgu. Nun sé si sabéis qu’en Payares van empezar a cortar llinies, la rentabilidá va ser la que dirixa toles inversiones y van restrinxíse bastante les llínies en toa España, y n’Asturies tenemos delles en riesgu.
Equí tenemos una densidá bastante grande de llínies pa lo que ye una autonomía, pero hai un desaprovechamientu total. Porque claro, el ferrocarril agora tien que ser una apuesta mui importante pol tema del mediuambiente, pero equí, como ta apostándose na más que pol Ave y coses d’eses de munches perres, pero que nun son d’avanzar no que se llama la Renfe convencional, tamos alcontrándonos con eso, con un abandonu, que ves que los viaxeros, en vez d’aumentar, disminuyen, porque a la xente nun-yos das una fidelidá…

Y bono, esto ye p’abrir un poco esa parte polémica a la tertulia, porque agora lo de les llínies va ser casi como una llotería, sólo van aceutase ya, de les llínies que nun seyan rentables, les que tengan una subvención, ya seya de l’autonomía o del ayuntamientu. Tengo por ehí lo qu’esplicó Pepín Blanco, que va dir cortando, ye terrible. En concreto, ya sabéis que si faen el tercer carril, que nun sé si lu llegarán a facer, pa subir a Lleón, pues de Fierros p’allá, eso va quedar cerrao, va suprimise. Y llueu en riesgu ta L’Entregu. Y en Feve ya lo controlo menos, pero tamién hai problemes per ehí.


Rubén Ardura
Yo, evidentemente, nun soi un espertu nel tema aunque cuando escribí esti artículu AVE cantábricu, el mitu de la eficiencia, Atlántica XXII. núm.4 parecióme pertineresante y metíme nello, pero seguro que d’equí puedo aprender.

El tema del Ave ye bastante polémicu, nun sólo la llegada a través del cordal, si non lo que ye’l proyeutu del Ave del Cantábricu, que parte ya se ta faciendo, nun ye una quimera, una cosa que nunca se va facer. Y tien muncha importancia porque nun ye solo si se fai un Ave o non, si non qu’eso tamién determina que ye lo que se fai col restu les llínies, que ye lo que taba comentando Carlos agora. Porque, o hai perres pa una cosa o hailes pa otres, porque claro, la duplicidá de víes nun la va sofitar el ministeriu y va a apostar sólo por un tipu de movilidá.
Por eso naquel artículu paecióme importante quitar mitos, como por exemplu, les supuestes bondaes del Ave, eso de que ye tan bonu y de que cuanto más rápido meyor.
Tenemos que paranos a pensar a ver cómo determina l’Ave'l futuru de la cuestión ferroviaria n’Asturies, y tamién saber un poco qué opciones hai.
Bono, si nun facemos un Ave, entós ¿qué facemos?, porque ye evidente que les llínies dientro d’Asturies y pa con fuera d’Asturies, caltienen un trazáu claramente meyorable, como puede ser el Feve de la zona d’oriente, que lleva en sin tocar cien años, y lleva unes velocidaes…


Carlos García Alcalde
Nosotros en concreto dende’l nuestru colectivu, el planteamientu que facemos ye precisamente que se dupliquen les víes, fundamentalmente les de Feve. El Feve funciona prácticamente a vía única, tien mui pocu desdoblamientu de vía. Renfe non, Renfe tien polo menos hasta Pola L.lena desdoblamientu vía y ellí va facer l’entronque col famosu Ave.
El qu'haya vía única ye un problema seriu porque, por exemplu, cada vez qu’un tren s’avería, colapsa la llínia’l tren. Porque claro, lo habitual ye tener desdoblao nun apeaderu, pero poco más, pero, por exemplu, entre El Berrón y Lieres, como’l tren pare, nun sólo se para’l que s’estropia, si non que’l que torna nun puede pasar.

¿Por qué decimos qu'hai qu’invertir más na rede de cercaníes? Porque, na realidá, ye´l transporte de ferrocarril que más s’usa. L’Ave, por muncho que s’use, nun va ganar, nun puede ganar n’usuarios a la rede de cercaníes. Pero curiosamente, de los usuarios de cercaníes nun s’ocupa nadie, nin a los partíos políticos-yos interesa.
Tol mundu se centra nel Ave pa criticalu o defendélu, dame igual, pero lo curioso ye que nadie s’alcuerda de la rede de cercaníes. Y equí tenemos na menos que dos compañíes ferroviaries, un luxu asiáticu, bono, un luxu neoyorquín, hai provincies que nun tienen nin serviciu de cercaníes, y nos tenemos Feve y tenemos Renfe.

Teníemos que tener una meyora nel desdoblamientu de llínies, que ye evidente, y elliminación de cuellos de botella.
Un de los problemes que vemos, ye que Renfe, entre Uviéu y Avilés, nun puede entrar prácticamente a la ciudá, tien un cuellu botella, si nun recuerdo mal, na zona de Nubleo, lo que nun dexa dar un bon serviciu, porque siempre tan los trenes esperando, y nun pueden entrar al corazón d’Avilés.

Y llueu tenemos Feve, en concreto na llinia Xixón-Pola Sieru, Feve tien fecho una cosa que se llama un by-pass en El Berrón, pero curiosamente los ciudadanos que van de Xixón a Pola Sieru tienen que facer un transbordu absurdu en El Berrón, y eso que tien una llinia direuta ya, dende hai más de dos años, con fondos europeos.

Y esta ye la batalla, porque precísamente, pa ganar clientes, como decía'l compañeru José Luis, al cliente hai que dai una calidá, y si te tienes que baxar en El Berrón pa dir a Pola Sieru, que ta a cinco menutos, y tien ya vía, porque antes Feve, la respuesta que daba, ye que nun había vía. Y, por exemplu, el by-pass de Xixón a Uviéu ta ya funcionando, y paeznos mui bien.
Esta llinia de Xixón a Uviéu inicióse hai dos años sin paraes, nós comunicámos-y a Renfe nel so momentu que yera un fonderu error, qu’un tren de Xixón a Uviéu en sin una sola parada yera mui difícil que compitiera con Renfe y con Alsa, porque Renfe tien servicios cada media hora de llunes a vienres y Alsa cada quince o veinte menutos. Y ficieron una reforma de la llínia, estiéndenla, y agora ye Xixón-Uviéu-Trubia, nun hai transbordu, y solo fai tres o cuatro paraes.

Una filosofía que nosotros tamién caltenemos como usuarios ye mui clara. Tamos en contra que los apeaderos rurales monopolicen el serviciu, porque cuando hai vía única los trenes semi-directos nun pueden funcionar. La propuesta ye que los apeaderos tengan una espera d’una hora, nun más, pero tampoco menos. Nun somos partidarios de que tolos trenes paren en tolos sitios. Non, porque realmente'l ferrocarril, onde capta xente ye nos grandes núcleos. Por tanto, en sin dexar de dar serviciu al área rural, creemos qu’esa espera d’una hora ye razonable.
Y equí nun queremos ser políticamente correctos. Por exemplu, Feve fizo una modificación de servicios semi-directos entre Uviéu y Nava, y cuando se recoyeron firmes, nun sé si se coyeron tres o cuatro mil firmes, pa que se repusieren los servicios, nosotros opusímonos. Y diximos por qué. Lo que nun puede pedir l’área rural ye que quier un serviciu pa velu pasar y nun usálu. Eso nun ye razonable. Dexémos los servicios sí, pero fundamentalmente Renfe y Feve tienen que dar más serviciu a los núcleos medianos y grandes.
Esa ye un poco la nuestra idega de la calidá y d’atraer clientes.


Rubén Ardura
Lo que comentes, falando del centru d’Asturies, entronca un poco cola movilidá. Hai qu’apostar pol tren porque saca coches de la carretera. Por exemplu la y-griega ta completamente saturada, pero si te pones a mirar como se desendolca la rede de carreteres d’Asturies, los últimos dos proyeutos grandes foron l'AS-II a Uviéu y l'AS-I a Mieres y los dos, los años que lleven furrulando, tan bastate perbaxo d’una utilidá que xustificara de verdá’l faceles. L’autovía minera ta bastante perbaxo los miles de coches que tendría que tener, y na AS-II el concesionariu del portalgu na solombra dixo que quería más perres porque nun taben pasando coches, nun había movimientu.
Polo tanto, lo que de verdá sacaría coches de la carretera sería un serviciu de tren, que, ecolóxicamente sería lo más sostenible a día de güei y tamién lo más popular, y nun tá apostándose por ello.
Quitando’l casu del Feve de Xixón a Uviéu, que paez que ta funcionando bien, ¿non?


Carlos García Alcalde
Sí, hai que reconocer qu’agora ye un serviciu razonable.


Rubén Ardura
Pero, por exemplu, la llinia Renfe de Xixón a Uviéu, que son cuarenta menutos el viaxe, me paez…


Carlos García Alcalde
Si, esactamente 38, porque sólo fai parada en Noreña, El Berrón, Parque Principáu y Uviéu.


Rubén Ardura
Eso, bien, por exemplu, si en cuenta de planteganos meter la y-griega pa los coches y facer el tercer carril y tolo que quieren armar, que nun tienen por onde metélu, se planteara un trazáu nuevu qu’elliminara la curva de Serín, elliminando esa curva, elliminaríes bastante tiempu, podría dase un serviciu de venti o venticincu menutos entre Xixón y Uviéu, eso sería mui competitivo, y sacaría de verdá xente de la carretera.

En cambiu, tornando al Ave d’antes, lo que dicen que saca coches de la carretera, ye mentira. Tuve viendo los datos de la y-griega vasca y vese que nun quita coches de la carretera. Y equí pasa lo mesmo, la mayoría de los movimientos que se dan n’Asturies son na zona centru, Xixón, Uviéu, ya eso l’Ave nun lo va sacar.

Y ¿qué pasa? qu’agora llega l’Ave pol sur, y va facese un trazáu esclusivu pa él, entos tola inversión va dir p’allá, van dir toles perres, y acabáronse otros plantegamientos, como apostar poles comunicaciones en tren nel centru d’Asturies.

Eso ye esactamente dir en contra de lo que necesita realmente la xente, porque vamos, nun son servicios prácticos.


Un asistente
Bueno, son servicios diferentes, pienso que nun tienen que ver, nin en cuantu al usu que se fae d’ellos, nin al tipu de persones que lu van a utilizar. L’Ave ye pa llargu recorríu.
Y llueu hai servicios como’l de cercaníes. Caún tien la so especificidá.


Rubén Ardura
Sí, pero ye que cuando s’apuesta por ún, al otru nun se va apostar por él. Too nun va a facese. O una cosa o la otra. Y tien pinta d’apostase por una llínia d’Ave mas que por potenciar les llínies de cercaníes.


L’asistente d’antes
Sí, y ye lo qu'acaba de decir José Luis, que a partir de nun sé cuando, les llínies que seyan deficitaries van cerrales.


Rubén Ardura
Eso, ehí ta’l debate. ¿Cuál ye’l proyeutu de llinies ferroviaries que van cruzar esti país?.
Bueno ta’l mini-Ave esi que tan falando agora, qu'a mi paezme interesante.


Carlos García Alcalde
Nosotros nun tamos en contra, en principiu, del Ave de Payares hasta Pola L.lena, pero sí tenemos posicionáonos en contra de que l’Ave s’estienda más allá de Pola L.lena. Pescanciamos que l’Ave, debío a la gran cantidá de poblaciones xuntes que tenemos equí, nun va ser a desarrollar nunca una gran velocidá, colo cual, desde Pola L.lena paeznos razonable que l’Ave vaya por una vía convencional. Nun apostamos por una vía esclusiva, primero, porque aforres sólo quince menutos, y nun lo digo yo, dícenlo los téunicos, ye una millonada, una salvaxada de perres, y va afeutar a cuestiones mediuambientales, y la ganancia ye nada. Y nun ye que seyamos hipersensibles a la cuestión mediuambiental, entendemos que cuando se fai una obra de cualquier tipu, siempre afeuta daqué.


Un asistente
Equí, fagan lo que fagan, en calidá, el recorríu del Ave dientro d’Asturies nunca va ser d’Ave, porque poles sos característiques, nun hai distancia pa poder correr.


José Luis Delgado
Y lo que ye verdá ye que va llevar tol presupuestu. Tamos falando de cerrar, nun d’abrir, si non de cerrar.


Rubén Ardura
Pero la llinia hasta Lleón ta fecha, asi que paezme que lo más razonable ye seguir hasta Pola L.lena, y a partir d’ehí tirar cola vía qu'hai.

Pero’l proyeutu d’Ave del Cantábricu nun lu veo totalmente ellimináu. Esi proyeutu sacólu’l PP col plan Galicia, y morrió, uno, porque nun hai perres pa ello, evidentemente, y dos, porque agora ta’l PSOE y nun ye’l proyeutu d’ellos. Agora bien, como vuelva'l PP, cuidadín, porque tanto en Galicia Feijoo, como Revilla en Cantabria, como n’Euskadi, que ya se ta faciendo, eso vuelve, toi xuru que va tornar tarde o temprano. El discursu esi de comunicanos con Francia y col mundu, va tornar.


Un asistente
El tema del Ave del Cantábricu ye una cosa a la que la sociedá civil asturiana tien qu’oponése totalmente. Nun ye dengún beneficiu p’Asturies. Y tien un costu económicu y mediuambiental acoyonante.

Si mires por exemplu l’autovía del Cantábricu, que ye una autovía y tien una cierta capacidá d’adaptación al terrenu, y aun con eso, la cantidá de viaductos y túneles qu’hai ye acoyonante, una vía d’Ave tien que ser muncho más recta, y los niveles d’inclinación tienen que ser mínimos, colo que la cantidá de túneles, viaductos, terraplenes que tengan que facer diba ser monstruosa.


Rubén Ardura
Claro, ye qu’eso arrasa, lo que ye una llinia recta en mediu d’un monte…


Carlos García Alcalde
Hai una cuestión tamién, que ye qu’antes criticábase’l faraonismu de les obres de Franco, del franquismu, y h.oder, ye que tamos faciendo equí nun obres faraóniques, tamos faciendo obres hiperfaraóniques. Voi dar un exemplu, el xeneral Sánchez Vigón foi ministru na época de Franco nos años cincuenta, y ellí plantegábase lo que diba facese na cornisa norte. Apostábase por una carretera o por facer un tren, nun se falaba del Ave porque d’aquella nun esistía, y d’aquella ya se xeneró un debate. Como la cornisa norte ye mui estrecha y tien estos problemes que toos sabemos, y díxose, apostemos pola autovía, porque l’autovía nun va incomunicar a L.luarca, a La Caridá, a Navia, etcétera. Pero si falamos d’una especie d’Ave, que d’aquella facíenlo los xaponeses los primeros, esi Ave podía salir de Santiago de Compostela y pararía en Xixón y de Xixón hasta Bilbao, y acabóse.
Y la franxa costera ye tan estrecha que tien problemes serios por exemplu na zona de Llanes, que tien un embudu ellí que nun hai por onde metélu, vamos.
Pero hai una cuestión, aunque esta obra nun ye lóxica, los medios de comunicación, por exemplu La Nueva España, nun paren con esti tema, tan constantemente presionando cola agonía de que nun tenemos infraestructures.
Nosotros, na asociación, sí qu’apostamos por esi mini-Ave, que puede ser Feve, o pueden aprovechase parte de les so infraestructures, nun tola plataforma, pero sí grandes partes.
Pero, vamos, si ya se tien xeneráo l’autovía, que tamién tenemos la nuestra opinión sobre l’autovía, lo que decimos ye que, ya que Blanco tien que decidir entre la parte occidental y la oriental, como a la parte occidental fálten-y cuatro cachos y a la oriental solo-y falta ún, pues equí tamién nos moyamos, nun somos políticamente correctos, y apostamos porque Blanco garre toles perres y les meta en Llanes, ¿por qué?, porque al menos la parte oriental tará terminada.
Un Ave ye absurdo, pero pensar qu'aunque equí podamos tar convencíos, si Cascos se presenta como candidatu pol partíu popular, y creo que va presentáse, esa va ser una de les so propuestes estrella.


Rubén Ardura
Sí, lo mesmo que'l metrotrén, dixo, yo afuraco Xixón, y afuracólo.


Un asistente
Hai tiempu que tengo lleío nun periódicu que l' actual Feve, que fai'l recorríu Xixón-Ferrol, ye un proyeutu d’un antepasáu de Cascos, y nun ye de la época de Franco, eso vien ya del sieglu diecinueve.
Yo alcuérdome que cuando Cascos yera ministru de fomento, y garró’l tema del Ave del Cantábrico, lo que quier ye facer algo, de dalguna manera, pa superar al so tíu-güelu. Y toi convencíu de que si Cascos ta nel parlamentu asturianu, lo del Ave del Cantábricu va ser una constante.
Y pienso que, aparte del costu ambiental, p’Asturies nun tien dengún sentíu. Sólo va a haber una sola parada, que va ser Uviéu o Xixón, la que seya, y entos, ¿pa qué?. Porque pa los gallegos ye ridículo, porque puen dir pol otru llau del cordal, va ser un pocu más de tiempu, pero tampoco ye tanto. En Galicia ya van a facer un Ave de La Coruña, a Lugo y Ponferrada. O seya, ya van tener llinia d’Ave, nun van tener dengún problema.


Rubén Ardura
Tocántenes a eso, yo creo que tol debate ta viciau por una idega que ye la del “progresu”: cuanto más rápido, cuanto antes, meyor. Si tamos n’hora y media en vez d'hora y treinta y cincu, ye lo qu'avanzamos.
Que lo mesmo pasa colos aviones, qu’escuches a la xente: “¿cuánto pagaste pol billete a Londres?””ciento cincuenta” … a Londres, que vas n’avión, que tien que llevantar, que tien qu’aterrizar… querémoslo too rápido, fácil y barato. Y eso perviértelo too.
Nun sé, facer un sistema, yo que sé, pa poder llegar a Burdeos en tres hores. Val, pero vamos ver, tú ¿cuántes veces vas a Burdeos na to vida?, y ¿cuántes veces vas a Llanes?... hostia, espera…
Bueno, ye un poco simplificar ¿non? Pero ta too pervertío por esi debate, esa idega que la usa muncho La Nueva España. Perder el tren, perder los enganches coles exes de desarrollu, y sacó d’eso un par d’editoriales nun va muncho.


Carlos García Alcalde
Sí, sí, y artículos cada poco. Chema Ordóñez tien un montón d’ellos.


Un asistente
Toos sabemos que'l sitiu onde más complicao de facer esi Ave ye n’oriente, lo que tien un gran impautu ambiental, y de cara’l turismu, que ye fundamental pal oriente, eso puede ser tremendo, eso d’entrada. Colo que ye falso eso que mos dicen. Una vez que té fecho lo de Payares hasta Uviéu, una vez n’Uviéu, pueden programase Aves que vayan dende ellí a Bilbao y a la frontera, simplemente qu’en vez de dir por oriente, van por Lleón.


Carlos García Alcalde
Que quede claro que sobre Cascos, cuando fue ministru, delles coses sí que les vimos positives, nosotros nun tenemos afiliación política, caún el carné que tenga que lu guarde na cartera, pero igual que criticamos la so insistencia col Ave pola cornisa, reconocemos que'l xermen del consorciu del transporte, el CTA que ye agora, creólu él col metrotrén. Y fue la manera de simplificar tarifariamente tolos servicios.

Y fizo tamién un desdoblamientu dende El Berrón hasta cerca de La Carrera. Y eso vamos reconocé-ylo. Aunque haya otres coses que non, como esto que tamos diciendo.

A nosotros nun nos duelen prendes. Si un políticu fai una actuación que nos paez bona, o una compañía, como Feve, que tien fecho servicios, vamos decílo tamién.

Pero no básico nun nos gusta Cascos, porque tamos nel faraonismu. Ye lo que dices tú, quier seguir la estela del so güelu.


Laly García
Perdona-y que llegara tarde y nun sé hasta que puntu tenéis faláo de cómo tan les infraestructures n’Asturies. Toi escuchando’l tema Ave, pero’l problema ye que la infraestructura, tal y como tá agora mesmo, nun puede caltenese. Lo que nun ye normal ye que trenes qu’en determinaes partes de Castiella pueden dir a cientu sesenta nuna vía convencional, n’Asturies nin de coña. En denguna vía d’Asturies puede dise a cientu sesenta. Nel puertu, incluso los trenes d’alta velocidá, creo que tienen la másima en setenta. Bono, yo, aunque soi maquinista, nun toi trabayando n’Asturies. Pero vamos, n’Asturies, hasta Puente Los Fierros los trenes güei van a setenta por hora.
Entos, toes eses perres que quieren meter nel Ave, si se metieren na igüa de les víes, en camudales, en meyorar trazaos, conseguiríase que se pudieren meyorar eses velocidaes, incluso parando onde se quiera.
Nun se necesitaría un Ave, hai que meyorar lo que ya esiste.
Y por supuestu l’impautu ambiental sería más pequeñu.


Una asistente
Por ciertu, como usuaria, a veces tengo la sensación de que nun sé quien planifica, nun se sabe quien pon los horarios… Si quies que la xente use’l tren, los polígonos industriales deberíen tener un serviciu. Y si la peña entra a trabayar a les ocho la mañana, debíen tener la llegada a les ochu menos diez.

Y otra cosa nun se concibe. Nun concibo como, por exemplu, un polígonu industrial como’l de Bobes, que se va facer en Sieru, d’un millón de metros cuadraos, nun ta previsto que tenga un serviciu de tren.


Un asistente
Voi contavos una anéudota. Mira, hai un serviciu a los polígonos direutu de Renfe, direutu porque pares en Llanera y ellí subes a los autobuses pa los polígonos. Ellí, a la hora que llega’l tren, hai tres autobuses puestos. Van vacíos. Marchen vacíos. Faen el recorríu vacíos. Y tornen vacíos. Puen tener un cliente o dos, pero coches así.


L’asistente d’antes
Colo cual nun ye un problema de planificación entos ¿non?


Otru asistente
Pienso que ye un poco la pescadiella que se muerde’l rau. Nun sabemos esactamente qué ye lo que pasa. La xente nun viaxa en tren. Si los lleves hasta ellí ¿van dir en tren? O realmente nun van dir y entos los otros van decir que ye deficitario...
Porque eso mesmo pasó con Feve nel tren que tenía a Navia. Feve tenía un tren qu’iba d’Uviéu a Navia y quitólu. Yo viaxé nél algunes vegaes. Si te pones a mirar lo qu’ellos decíen, ye verdá, esi tren yera deficitariu, porque había veces que díbamos seis persones nesi tren. Entos, ¿realmente trae cuenta tener un tren hasta Navia pa seis persones?
Pero, claro, ta la otra cuestión. Ye que l’horariu que tien ye mui malu. Y tamién ye verdá.


Carlos García Alcalde
Equí había que facer una matización. El problema ye que movese en coche n’España quizás ye barato. Porque ye que, como daquién me comentó un día, los daneses son toos mui ecoloxistes, porque van toos en bici. Pero ¿sabes por qué van en bici? ¿tu sabes lo caro que ye mover el coche pola ciudá? Allí abrásente. Y eso n’España nun ocurre.

Ayer mesmo vímoslo nel telediariu, día 22, día en sin coche. Atentos. Siéntase ún, méten-y el micro… “¿y usté qu'opina de dexar el coche en casa?”... “ye verdá, ye que l' atascu ye tremendu”… y el coche diba vacíu, diba él y nadie más.

Entrevisten a otru… “¿y a usté que-y paez esto del atascu en Madrid?”… “sí, sí, claro, ye que, la verdá, nun teníamos qu'usar el coche”… y nun digo más. Creo que ta too dicho.

Somos el país del coche. Nun s’apuesta realmente por incentivar el transporte públicu. Equí lo que s’incentiva ye que'lcoche rule por tolos llaos. Lo de los polígonos que dices ye l’exemplu vivu y claru. Hai un serviciu coyonudu, mui bonu, porque cuando te baxes nun esperes nin tres segundos, l’autobús siempre ta ellí. Y ye un fracasu. ¿Por qué? Porque dir a los polígonos en coche ye mui fácil.

Y podemos ver otru exemplu estremu, l’hospital de Cabueñes. Nel hospital de Cabueñes ta la xente glayando, pero allaríos verdaderos, porque amplíen l’aparcamientu. Aquello ye como un caos tremendu.

Nosotros, como colectivu, aunque nun nos dedicamos al transporte urbanu, tamos diciendo lo contrario, que se quite aparcamientu a los coches y que se refuerze’l transporte públicu.

Pero como’l coche ye como un estatus, “yo voi nel mio coche”, y remárcolo, “voi nel mio coche”, non “tu vas nel mio coche”. “Yo voi nel mio coche, tu vas nel to coche y él va nel so coche”.



Una asistente
Tamién, como usuaria, hai que facer daqué tamién col Feve que va a Santander. ¿Nun podría meyorase’l transporte qu’hai?. Lo que nun pue ser ye que pa llegar a Santander pare n’ochocientes paraes.

Ye un trayeutu que fago bastante a menudu, casi cada quince díes y ye que nin me planteaba garrar el tren. Ye daqué totalmente inviable.


Un asistente
Pero ¿sabes cual ye’l problema? El problema ye qu’esos trenes paren en tolos apeaderos, absolutamente en toos, porque ye la única comunicación que tienen esos pueblos entre sí. Porque si hubiera trenes de cercaníes, digamos d’Uviéu a Llanes o más allá… pero ye qu’esos trenes nun los hai, y por eso empleguen los que van a Cantabria. Y por eso van parando en tolos apeaderos, y ellí sube ún cuando sube, pero la mayoría’l tiempu nun sube nadie.


Rubén Ardura
En teoría eso ye’l proyeutu esi del mini-Ave, remozando les víes pa facelu más eficiente y conseguir meyores velocidaes.

Eso ya se fai n’Alemaña y Suecia. Ellí tiren más por un modelu de tren más rápidu, non un alta-velocidá, creo que'l másimu anda polos doscientos kilómetros o algo así, pero pensáu pa comunicar “intra”. Equí, por exemplu sería dientro d’Asturies.

Pero nun se puede atender too. Eso de que pare en tolos sitios…

Y Pepe Blanco ye lo que plantea. Facer una reforma de la llinia de Feve pa facelu un poco más rápidu y que de verdá valga.


José Luis Delgado
Pero nun te vas fiar de los políticos agora. Pepe Blanco ta colándonosla, lo del Ave del Cantábricu ye una mentira prácticamente dende qu’entamó. Y agora vendrá l’otru y contaráte otra mentira. Agora nun hai perres nin pa eso nin pa nada.

Podrá meyorase la infraestructura de Feve, pero ye que Feve ta en ciertos sitios tercermundista. Tienen que dir los maquinistes controlando ellos la velocidá, porque nun tienen llimitaciones, y con tolos accidentes qu’hubo por ehí.


Carlos García Alcalde
La llinia de cercaníes ta bastante bien controlada informáticamente col CTC, el Centru de Tráficu y Control, pero en cuantes s’alloña muncho más p’allá d’Arriondes, lo que dices tú, nun tienen nada, el maquinista tien que facelo too manual.


José Luis Delgado
Y tovía pa ehí… pero si tires pal occidente ye brutal. Como garren a más de setenta ya te puedes garrar a los sillones o a algún sitiu, y con ellos equí, porque pienses “esto salse de la vía en cualquier momentu”.


Un asistente
Sí, yo soi usuariu d’esi tramu, de Xixón a Galicia, y ye tremendo, pavoroso. Ya fui de cuando fui a la mili, y ta igual, nun cambió ná. Bono, quitando Infiestu.


Carlos García Alcalde
Voi contavos una anéudota del Feve, el que diba pa Galicia. Alcuérdome que garré la bici y diba ver la playa de les catedrales, y nel tren, siéntase un inglés enfrente de mio y, al dir a xintar, sacamos los dos el bocadiellu, y de repente yo digo, “esti qué fai”, peligru, diba abrir una lata de moxones. Chiss, gárro-y la mano y dígo-y “Non, Non, Dangereux” y dixe-y que fuera’l baño. Y quies creer que dio’l tren un bandazu… bono como aquella escena primera d’Instintu básicu, de la sangre y el semen… así. Mira, ves al inglés aquel salir del baño tou embadurnáu, y dices tu, “equi tuvo l’asesín esi de Sharon Stone…


Bueno, al final, el gran problema que veo que tenemos, ye que tamos obsesionaos cola obra faraónica del Ave, y lo demás nun cuenta.

Propongo garrar una encuesta de la rede de cercaníes de Madrid o de Barcelona, que tienen redes que mueven miles y miles de pasaxeros al día. Pues equí, non señor, equí nun s’arregla nada, equí nun s’invierte nin un duru, y toos tamos na obcecación del Ave.

Y lo que decíes, l’Ave ye que nun lu vamos a usar tolos díes, y por muncho que lu uses, pásalu mil veces l’usu que tien cercaníes.


Un asistente
Habría que falar, más que de tren d’alta velocidá, d’un tren de velocidá alta. Ye decir, un tren que circule efectivamente a cientu sesenta kilómetros por hora sobre víes convencionales, y sal muncho más barato.

Y al respectu de lo que decíais de los polígonos industriales, hai una forma muncho más cenciella d’adecualo, si la montaña nun vien, vamos a la montaña. A les empreses importa-yos un bledo que se vaya a trabayar a les ocho o a les ocho y cinco, podría dase flesibilidá d’horarios. N’Euskadi aplícase. Porque mover un tren cinco menutos paez mui cenciello en teoría, pero nun puedes, porque esi tren tien que llegar al so destín, tien que tornar, tien que salir el siguiente… y mover eso cinco menutos ye munchísimo más complicao de lo que paez sobre’l papel.

Entos una solución podría ser “señores, el trabayu del ferrocarril tien que facese nel momentu y a la hora esacta”, en sin embargu, el trabayu nun polígonu industrial, con qu’entame cinco menutos más pronto, o cinco menutos más tarde, digamos que tampoco-y diba a producir un dañu tan grande.

Eso uno, y dos, el día qu’empiecen a cobrar nos polígonos industriales por aparcar…

Porque en Londres, símplemente meter el coche en la city val ocho llibres.

Dexemos de ser tan vagos y usar el coche. O usar el coche pa dir hasta una estación de cercaníes y ellí garrar un tren.

En Madríd, onde les estaciones, hai unos aparcamientos enormes, y ellí dexen el coche y utilicen el tren.


Rubén Ardura
Pero lo que se fai ye fomentar l’usu del coche. Hai un exemplu en Xixón colos aparcamientos. Tan obcecaos colos aparcamientos nel centru la ciudá. Y lo que nos tan diciendo ye “trai’l coche hasta’l centru, qu’ellí vas tener onde dexálu”. En vez de facer aparcamientos disuasorios por fuera.

Y venga autovíes, agora la d’Avilés-Llangréu, que ta en proyeutu. Tenemos el centru d’Asturies estráu d’autovíes. Y h.oder, nun somos tantos. Al final nun se-yos da usu.

Y el tema del petróleu, cuidadín, porque’l petróleu sigue y sigue subiendo. Y va llegar el momentu en que sí vamos tener que dexar el coche, porque nun va quedar otru remediu.


Carlos García Alcalde
Pero coincidirás conmigo en que la gasolina ta barata. En España la gasolina ta barata.

El coche sigue usándose. Y sigues usándolu tu solu. Los coches van vacíos. La cultura de compartir el coche nun esiste.


Un asistente
En Madrid hai un follón de tráficu espantosu, pero cada vez que s’organiza una güelga de cercaníes, cenciellamente párase. Ye imposible, en cualquier gran ciudá, y en cualquier ciudá mediana, absorber tol fluxu de persones que vienen hacia’l centro, al serviciu d’oficines.


Rubén Ardura
Y lo curioso ye que l’Ave fomenta eso. Fomenta les concentraciones en grandes núcleos de población.


Un asistente
L’Ave, en realidá ye un competidor del avión en distancies medies.


Otru asistente
Y lo que fizo l’Ave con Ciudad Real, lo que fizo con Toledo. Punxo a precios astronómicos les viviendes neses zones, porque plantó a Toledo a cuarenta y cinco menutos del centro de Madrid. Permite a una persona, con pagar cinco euros cincuenta, salir de la so casa, montáse nun tren y plantáse en cuarenta y cinco menutos nel so trabayu, y compráse una vivienda a una cuarta parte o a una quinta parte del preciu que tien en Madrid.


José Luis Delgado
El presidente de Renfe, falando colos sindicatos del futuru y de les llinies que quier mantener pola rentabilidá diz: “con respeutu al serviciu de media distancia n’alta velocidá”, lo que tamos falando, “nun ye de recibu caltener les tarifes actuales”, afirma que “nun ye una obligación del serviciu públicu'l poner trenes con precios baxos pa que la xente pueda vivir nun chalé de doscientos metros en Puertollano, por exemplu”.

Porque qué pasa, que resulta qu’esi serviciu ta subvencionáu, por eso los precios baxos, y hasta’l propiu presidente de la empresa lo critica.


Carlos García Alcalde
La Comisión Europea tienlo dicho tamién, y ya dio un toque al Gobiernu d’España diciendo qu’eso de subvencionar les llinies d’Ave que lo quite. Les empreses de transporte por carretera tan que trinen, y tienen razón. De fechu, si nun cambió la normativa, creo que la Comisión nun ve con malos güeyos la subvención a les llinies de cercaníes, pero a les llinies de llargu recorríu con llupa, y eso incluye a les d’Ave. Y Alsa tien razón cuando diz que-yos tan faciendo una competencia deslleal.


Rubén Ardura
Tengo equí los papeles que dicen que denguna de les llinies de la y-griega vasca, en tolos escenarios posibles que tienen estudiaos, ye financieramente sostenible. Denguna. Nin p’amortizar la obra, por supuestu, nin pa mantenela. Hai que meter perres. Tien que tar subvencionada.


Carlos García Alcalde
Si me permitís una pregunta a los ferroviarios. Yo sé que ye más caro caltener una llinia d’Ave qu’una llinia convencional. Pero ¿cuál podrá ser la diferencia?


José Luis Delgado
Esos datos nun los tengo, pero sí qu’hai diferencia, sobre too en temes de seguridá lleven muncho más. El problema ye qu'agora, al separtar el tema económicu d'infraestructura de la esplotación, resulta qu'Ave recauda munchísimu dineru de billetes. Y con ello, lo que diz fomentu ye que les llinies d’Ave son rentables, pero ye porque nun tienen qu’amortizar la inversión. Nun tan considerándose esos gastos.

Y llueu hai munches llinies convencionales que tan abandonaes prácticamente. Nun tienen caltenimientu. Y la posibilidá esa que comenta Pepe Blanco de reformar les víes, eso ye un bluf. Eso, a lo meyor nun futuru, cuando vuelva a haber dineru, dicen qu'hai que cambiar la Feve. Pero ye que prácticamente tienen que cambiala del too. Tene-y en cuenta que Feve tien una caxa mui estrecha pa meter doble vía, pa poder dir a cientu sesenta…


Rubén Ardura
Sí, esa obra ye tremenda, pero hostia, ¿y lo del Ave?. Porque’l presupuestu pa lo del Cantábrico, y sólo n’Asturies, calcúlase en cuatro mil quinientos millones d'euros, y equí los sobrecostes ya sabemos como son.


Un asistente
Lo que tendríen que facer, si ye que faen algo, sería una llinia ferroviaria pol Cantábricu que fuera operativa, tanto pa viaxeros como pa mercancíes, y, como acabes de decir, tendría que prescindir prácticamente de tol trazáu qu’hai agora, porque ye un desastre, un desastre, que ye que paez el tren de la bruxa.

Yo que soi usuariu de la llinia del occidente, aquello ye increíble, aparte que tien apeaderos pa morir, llueu, yo que sé, tien parada en Cuideiru…, si, en Ciudeiru…, pero ta a nun sé cuantos kilómetros, y en Tapia, buah.. en Tapia otro tanto, en Puertu Vega, igual.


José Luis Delgado
Sí, en Tapia báxase la xente del tren y quédase mirando, porque además nun hai nin un putu cartel, nun hai nada, ta’l pueblu a seis kilómetros. Nun sé porque llamaron a la estación Tapia, porque nun ta en Tapia, aquello ye La Roda.

Y d’equí a Ribadeo tárdase cuatro hores.

El modelu de lo qu'hai que facer ye bien cenciellu, Trubia-Infiestu. Eso tienes qu’estendélo hacia los dos estremos. Ellí hai inversión, electricidá, muncho más ecolóxico. Pero claro, llueu tan les dificultaes del paisaxe, pa llegar al oriente sobre too.

Y eso nun sé como van poder solucionalo.

Cuando entamaron colo del Ave, falaben de qu'había curves que yeren mil veces mayores de lo que podía soportar una llinia d’Ave.


L’asistente d’antes
N’Asturies, ¿qué necesitamos nel Cantábricu?¿un Ave o un tren convencional en bones condiciones? L’Ave del Cantábrico p’Asturies nun sirve pa nada. Va pasar de llargo.


Rubén Ardura
Y nun ye que seya económicamente más barato. Ye que tamién ye más rentable y da más serviciu. Pues ya ta.



Carlos García Alcalde
Bono, como resumen, dende ‘Asturias al Tren’ resumiríamoslo en tres puntos. Pescanciamos que la prioridá ye la rede de cercaníes, que ye lo que mueve xente. Ye lo primero qu'hai que desdoblar la vía. Nada d'Ave.

Segundo, más creación de servicios semi-direutos.

Y tercero, más adaptao al horariu llaboral de la xente. Sobre too a les hores punta. Que ye lo que nun ta nin Renfe nin Feve.


Presentador
Creo que quedó reonda la tertulia. Con conclusiones y too. Munches gracies a toos por participar, y como decíamos nel títulu, que garramos d’una perguapa tonada asturiana: tenemos la llinia trazada.