Regasificadora en Xixón, necesidá y peligros que comporta
Participaron
· Paco Ramos
d’Ecoloxistes n'Acción
· Tino Fernández
voceru de mediuambiente d’Unidá Nacionalista Asturiana
· Ramón González "Turón"
vecín afectáu
Dellos enllaces interesantes relacionaos col tema y los tertulianos:
·· Web del Movimientu ciudadanu escontra’l proyectu de planta refasificadora de GNL de Xixón
· Fin del modelo energético asturiano
· La información pública medioambiental, base de las libertades democráticas
· La liberalización de los mercados energéticos
Ladislao Martínez López
VIENTO SUR Número 89/Noviembre 2006
Tino Fernández
Por centrar un puquiñín la tertulia, básicamente teníemos que falar primero de lo que ye la regasificadora y de la importancia que tien nel plan enerxéticu estatal y de cómo ta evolucionando´l sector de la enerxía n’España y n’Europa y localizanos n’Asturies tamién. Entamamos, si vos paez.
Paco Ramos
Quería empezar diciendo delles coses qu’a lo meyor puen resultavos incluso chocantes, y pa que veais l’encaxe les feches, porque creo que si nun entendemos cómo llegamos equí, igual podemos equivocanos.
El primer plan enerxéticu que se fai n’Asturies, digamos que d’una forma completa y estructuráu, presentóse ya n’avientu del 96. Pero nun ye un plan ellaboráu pola alministración, por nengún departamentu de l’alministración, sinón que ye, digamos, un exerciciu intelectual, ye dicir, lo que fai’l departamentu d’enerxía de la Universidá d’Uviéu, na Escuela de Mines, ye dedicase a facer un estudiu íntegru de la situación enerxética actual d’Asturies y les previsiones futures.
Esi estudiu ye pagáu dientro d’un proyectu d’esos conxuntos que paga la Unión Europea. Ye dicir, una rexón española xúntase a una rexón alemana d’asemeyaes característiques de reconversión industrial, pero los estudios que faen nun se paecen en nada. L’estudiu alemán sigue unos oxetivos. Ellos dicen por exemplu, queremos saber qu’hai que facer pa disminuir la contaminación, y van a esi oxetivu.
Pero’l d’equí nun tien nada que ver con eso, más bien ye un estudiu de recopilación de datos. Recueyen absolutamente tolos datos de lo que tien que ver cola enerxía. Dende esi puntu de vista ta mui bien, pero a partir d’ehí lo que faen son gráficos, ye dicir, si vamos creciendo asina, qué pasaría del 95 al 2000 siguiendo un poco más o un poco menos eses tendencies.
Y ente les propuestes que tien, bueno, aparte de dicir qu’hai que fomentar les enerxíes renovables y d’afirmar que la producción pol carbón disminuye y la del gas aumenta, concluyen qu’hai que facer una axencia asturiana que xestione un poco too esto y créase l’ente asturianu de la enerxía, o seya, créalu’l departamento d’enerxía de la Universidá. Falamos yá del 97.
Nesa época pasen dos coses, que se fai la llei del sector eléctricu y que’l gobiernu fai un plan enerxéticu dende la propia alministración, pero dedicáu sólo a les enerxíes renovables, xunto al conocíu plan del carbón, que tamién ye de la mesma época.
Y tamién s’insistía muncho na necesidá de facer una axencia asturiana de la enerxía, con fondos d’un plan de la Unión Europea, creo que había trescientos millones d’ECUs d’aquella, pa tres años, o seya, cien milloninos pa cada añu.
Y créase esi ente, esi ente ye’l de la Universidá. Y durante unos años dedíquense a facer eso, cursos de renovables, xornaes, montar unes plaques solares p’agua caliente, y eso quedá ehí y tampoco ye qu’avance muncho más. En realidá cuando s’acaben les perres d’esos tres años, termínase por sí mesmu.
Bien, too esto faise cola situación política de que tanto n´Asturies como en Madrid gobierna’l PP, equí durante’l gobiernu de Marqués, y en Madrid gobierna Aznar, y a partir del 96 ye cuando lliberaliza tol sector eléctricu.
Ye cola llegada del PSOE nel 99, cuando ve que la poca planificación enerxética qu’había, que tenía que ver sobre too col tresporte de gas y electricidá, tenía mui poco que ver col pasáu de la historia asturiana. Entós, pa renovar esos planes lo que faen ye que, cuando son consultaes les Autonomíes, va Urrutia, entós conseyeru d’indrustria, sindicalista y lligáu al carbón de tola vida y preséntase en Madrid, pero’l gobiernu del PP nun-y fai nin putu casu. El llóra-yos con coses como que si les alministraciones yá nun van poder incidir directamente na so planificación enerxética, que si nesi plan nun se fala prácticamente del carbón y polo tanto Asturies ehí nun se ve bien representada, y plantea qu’había d’apoyar la central de gas que FENOSA quería facer en Tinéu, que se abandonó, una central de carbón que quería facer la italiana ENEL, otra central de carbón que queríen facer los de Iberdrola, la central de carbón d’equí d’Aboño…
O seya, too pensando nel pasáu, y ye cuando plantea que debería facese equí en Xixón una regasificadora, que competiría en meyores condiciones cola de Galicia y cola de Bilbao.
Pero nun-y faen casu.
Tola planificación que se fai sigue na mesma llinia. Ye dicir, les centrales van construíse ellí onde haya demanda, hai que dir a otru modelu diferente. Y esa ye la realidá. Aunque nun yera obligatorio, les empreses nun son tontes y van allá onde políticamente van tener menos problemes.
Daivos cuenta que nestos cuatro o cinco años ficiéronse n’España cincuenta grupos térmicos nuevos de gas, ellí once taba previsto, n’Andalucía, Cataluña, Euskadi, Navarra, tamién en Huelva y Sagunto na costa mediterránea.
La cuestión ye que gana les elecciones el PSOE en Madrid, y esta xente preséntase a desixir que se faga una regasificadora en Xixón. Ye dicir, aunque haya xente que diga qu’esto ye colonialismou estatal, ye’l poder del PSOE asturianu’l que obliga al Estáu a que faga una cosa que nun quier. Y eso ensin xustificar nengún cambiu nel modelu, porque too sigue igual que taba. Ye dicir, por presión directa.
Y pa que veais la diferencia, nesa mesma época, n’Euskadi créase l’ente vascu de la enerxía. Nun ye una axencia de la Universidá, sinón que ye un ente públicu, con participación del gobiernu vascu. Y tán p’abandonar esa situación de dependencia que teníen y apuesten con unos presupuestos d’unos cien millones tolos años, y entren na construcción de la regasificadora de Bilbao y d’una central de gas.
Equí intetaron facer algo paecío, pero nun encontraron nenguna empresa, nin FENOSA nin naide, y sólo se fai la regasificadora porque intervién el gobiernu central, que presiona a Enagas, porque tovía tien un poco de participación pública, garantizando-y amás el retornu de la inversión. Sinón nun habría regasificadora.
Y esto supón un problema respecto a los argumentos xurídicos que se tán plantegando, y ye que la regasificadora nun tien que ver con Asturies, faila una empresa privada que la fai onde-y paez, Enagas, a la que-y pusieron a güevu que la faga equí. Y l’únicu que tien competencies equí ye l’estáu, polo tanto la planificación, l’autorización y tol procedimientu failu’l Ministeriu d’Industria, y el procesu ambiental failu’l Ministeriu de Mediu Ambiente, y lo único onde intervién la comunidá autónoma ye en si-y da o non l’autorización ambiental integrada, pero una regasificadora como nun tien nada que queme mierda en realidá nun necesita esa autorización.
Tino Fernández
Básicamente España llevaba un montón d’años siendo deficitaria enerxéticamente, importamos hasta hai cuatro años, pero agora hai superávit enerxéticu. Importamos menos electricidá de Francia de la qu’esportamos a Marruecos, Portugal y Andorra, colo que los argumentos de déficit enerxéticu dexen de tener sentíu.
Y la Unión Europea lo que-y diz a España ye que tien que garantizar el suministru eléctricu, pero nun producir más, que ye lo que diz el gobiernu estatal, que quier aumentar la producción d’España un 10%.
España tien interés en producir más electricidá, agora mesmo ye rentable producir más electricidá, y tienen que producilo nun sitiu onde nun chillen, onde nun protesten, y n’Asturies alcontró’l caldu abonáu, con un gobiernu del PSOE tamién que nun patalea por nada.
Eso de fuera adentro. Y si miramos de dientro afuera, cuando Areces llegó al gobiernu, dixo qu’él, con una miopía política imperdonable, iba a apostar pol carbón sí o sí.
Nel sieglu XXI pue tar mui bien apostar pol carbón como sector estratéxicu pero non como sector productivu. Ye mui contaminante y estraelo equí mui caro. Colo qu’económicamente nun tenía sentíu.
Lo que se nos contó a los asturianos nel so momentu, y tán ehí los artículos d’Areces, yera que nun diba xenerase CO2, que básicamente yera una enerxía llimpia. La investigación nesi campu ye bastante primaria, eso de que vamos meter nes montañes tonelaes y tonelaes de dióxido de carbonu ta por ver. Y ehí’l gobiernu d’España presiona y diz que nun se puede seguir quemando carbón cuando tas importándolo. Si lo estraxeres podíemos negocialo, pero al tener qu’importalo suponnos un problema.
Pero como seguimos queriendo más enerxía vamos a metenos al sector del gas, y equí nun se si foi’l PSOE d’equí o el d’allá el que lo propón.
Pero eso equí n’Asturies en concreto ye un absurdu, porque Asturies produz ya’l doble, y dependiendo de cómo fagamos los números, casi’l triple de la enerxía que necesita, y sabemos que nel transporte y distribución de la enerxía d’equí a onde se consume piérdese un 20%.
Paco Ramos
La pérdida nes llínies d’alta tensión ye del 1,3% lo demás piérdese na distribución, y además págase na tarifa. Lo que nun ye que sea poco, ye tanto como produz la central de Soto de Ribera.
En realidá la rede española pierde un 15%, pero ye’l global de tola rede eléctrica, lo que ye la pérdida nel tresporte de les llinies d’alta tensión ye del 1,3.
Un asistente
De toes formes, según lo que tamos viendo equí, lo que ta claro ye que la regasificadora nun yera necesaria pa nada.
Tino Fernández
Tienes razón, dexando’l tema del texíu eléctricu y la demanda global, aunque ye mui interesante tamién, y centrándonos na regasificadora, inicialmente trató de xustificase pa suministrar gas a les cases, lo que sabemos que ye una grandísima mentira. Nosotros yá tenemos dos llinies de gas que cubren con escesu la demanda que tenemos actualmente. Nin nel casu de que previeramos un crecimientu del cien por cien, que nun se va a producir en varios años.
L´únicu argumentu pa tener una regasificadora ye usala pa xenerar corriente eléctrica con cieclos combinaos.
Paco Ramos
Eso ta bien claro. La cuestión ye que la regasificadora de Galicia tien capacidá p’atender diez o doce centrales de gas, colo que cubriría les necesidaes de toes les qu’esistieren en Galicia, Asturies y Castiella-Lleón ensin problema nengún. Y la d’Euskadi yá cubre les d’Euskadi, Navarra y tola cuenca del Ebru.
Llueu hai otra cosa que ye qu’Asturies yá ye escedentaria n’enerxía eléctrica pola so historia relacionada col carbón que nun podemos olvidar.
Pero si toles comunidaes autónomes apuesten pola suficiencia, ta claro que denguna va poder ser esportadora. Y Cantabria tien planes pa dos centrales, aunque una la pararon, la otra van facela, colo qu’en cualquier casu Asturies va tener que disminuir la so producción d’enerxía eléctrica nel cómputu global.
Eso ya pasó esti añu, les centrales de gas taben funcionando por baxo’l 30% de la so capacidá, porque nun les poníen a producir más p’amortizar les centrales de carbón. Pero a nada que variare un poco’l preciu, o por cuestiones ambientales, y se pongan a producir les centrales de gas a un réximen más o menos normal…
Asturies l’añu pasáu disminuyó un 34% la producción de les sos centrales de carbón y eso supunxo, por exemplu ambientalmente, que les emisiones de CO2 disminuyeren a los niveles de los 90 na menos.
Penche, que dirixía la fundación asturiana de la enerxía, falaba que poner tres centrales de gas n’Asturies sería una cosa razonable, por munches otres propuestes qu’hubiere enriba la mesa, y por eso lu echaron, y agora esa fundación diríxela un funcionariu de l’alministración, polo mismo qu’obligaron a que publicaran la famosa estrategia contemplando tolo qu’ellos teníen enriba la mesa.
Tino Fernandez
Nun s’acabaron nengún de los planes que se ficieron, vamos nin el del 73 s’acabó, nin se cumplieron los oxetivos d’aforru enerxéticu. El plan d’aforru enerxéticu ye una especie de broma escrita nun papel onde nun se cumple absolutamente nada de lo que se diz. Bueno, sí, regaláronnos una bombilla de baxu consumu.
Y paralelamente n’Asturies tenemos una política de producir casi’l doble de la enerxía que yá tenemos, y aquí sí que falo d’enerxía eléctrica.
Eso ye criminal, primero porque esa enerxía debería producise onde se consume. El propiu plan estatal diz que l’interés pa xeneración d’enerxía ye mínimu p’Asturies y ye de les poquísimes comunidaes que tienen el mínimu, y tamién el mínimu interés n’esportación d’enerxía, non solo en producción, sinón tamién n’esportación, tien Asturies un interés mínimu.
Pese a qu’el plan diz eso, la política que se sigue equí ye la contraria.
Tienen amás dos directives europees que-yos impiden concentrar los focos de polución y concentrar tamién los focos de producción.
La producción enerxética debería ser xenerada cerca d’ónde se necesite.
Paco Ramos
Y por cierto, esa directiva ta cumpliéndose. Ves la evolución de los intercambios ente autonomíes de los últimos cinco o siete años, y según ves que se tán instalando centrales de gas, vas viendo que si enantes había delles comunidaes mui esportadores y el restu yeren importadores, va corriéndose la llinia porque cada vez son más les que tán equilibraes.
Ye decir, el plan enerxéticu asturianu non sólo ye un desastre sinón qu’amás la realidá va en contra.
Tino Fernández
¿Qué sentíu tien qu’haya una planificación enerxética con diez grupos de ciclu combináu previstos, amás del que yá ta funcionando?
Paco Ramos
La planificación en toa España tenía’l doble de lo másimo que podía prevese. Ye decir, les propies compañíes saben qu’esos diez proyectos seguramente nun van dir alantre. Lo que ficieron son apuestes pa ver onde colaba.
Como se propusieron tantes y nun se podía tener a tolos ministerios tramitando proyectos que nun diben llegar a nengún sitiu, hubo una instrucción del conseyu nacional de la enerxía, fundamentalmente pa quitar el papeleo, y entamaron a pidir un aval. En cuantes pidieron esi aval, la metá de los proyectos de gas previstos pal estáu español retiráronse. Pero como hai llibertá de proposición per parte les empreses, nun hai nengún problema pa qu’en Llangréu, por exemplu, haya tres propuestes, porque como nun hai planificación, una faila Iberdrola, otra Fenosa y la otra ACN y hai tres proyectos.
Tino Fernández
Aparte habrá que ver si cola lliberalización del mercáu enerxéticu podríen ponese les diez centrales nel mesmu pueblu. A ver si van acabar metiéndonos toles centrales n’Asturies.
Paco Ramos
La realidá ye que nestos siete años ficiéronles en tolos sitios menos equí. Incluso Hidrocantábrico, que tamién apostó pol gas, con tola so asturianía que diz, como nun ye tonta, la primer central que fizo, tampoco la fizo equí, fízola en Castejón, en Navarra.
Yo nun creo que vayan faceles toes equí, pero podría ser.
Tino Fernández
Agora mesmo hai seis proyectos en trámite col estudiu integráu mediuambiental, lo que yá supón un costu pa la empresa mui razonable como pa echase atrás.
Paco Ramos
Ye lo que tien la lliberalización, tu nun tienes control, elles tiren p’alantre onde alcuentren menos oposición. Equí alcontrámonos con una cosa mui curiosa, naquellos sitios onde podíemos entender que sería más interesante que se ficieren centrales, por exemplu Madrid, ye onde nun se tan faciendo. ¿Por qué? Porque ye más fácil pa un ayuntamientu de los del corredor de Madrid, que nun tien central, que se pongan toos d’alcuerdu en que nun se ponga, que n’otru sitiu onde, como yá too ta tan mal y yá ye tan desastroso, poner otra…
Un asistente
Somos el basureru d’España. Güei comentábase nel diariu El Comercio que se ta estudiando que la mina La Camocha seya un almacén de CO2. N’algún llau hai que metelo y la xente de la política a nivel nacional sabe como ta la situación d’Asturies. El gobiernu d’equí ye un pelele del gobiernu central. Equí toles propuestes son aceptables industrialmente.
Paco Ramos
Toes. Incluso les que son inviables. Güei colaríennos el petromocho, güei pondríennos la refinería.
Otru asistente
¿Y por qué n’Asturies se puede? Si equí ye posible plantear too esto, ye pola so debilidá política. Yá non sólo la debilidá de la sociedá, que ta un poco más cansada o acostumbrada a ciertos desmanes, sinón que’l propiu PSOE, que digamos que tien llinia directa con Madrid, ye de los que menos personalidá tien dientro l’estáu español. Viose claramente nel tema de la financiación. Equí nun se movió nada, nun hubo problema nengún. ¿Qué nun hubo datos hasta última hora? Nun se dixo nada. Yo, lo que me den, trago con ello.
Yo creo que´l principal problema ye que nun hai una personalidá política que pueda poner en peligru al PSOE d’equí. Por eso son capaces de metenos la llinia d’alta tensión tal o cual, o tantes térmiques, o la regasificadora o’l banzáu de Caliao.
Nun hai equí capacidá de rempuesta política articulada, aunque pueda haber una sociedá que s’enfrente en determinaos momentos o que s’enfade, pero eso nun se tresmite políticamente.
Y otru ye l’argumentu de los puestos de trabayu que van xererase cola regasificadora, les térmiques y demás. Evidentemente esto son burbuxes llaborales. Xénerense puestos de trabayu cuando se tán faciendo, pero llueu non. Por exemplu, la central de cieclu combináu de Soto de la Barca, cuando tea a plenu rendimientu, nun va llegar a los cien puestos de trabayu.
Tino Fernández
Entre los 60 y 80 puestos ye lo que se ta manexando pa los nuevos ciclos combinaos.
Otru asistente
Entós, tu faes la cuenta, yá independientemente que nun nos faiga falta enerxéticamente, o’l problema mediuambiental que tien, si se divide’l costu de facer un ciclu combináu colos puestos de trabayu que se xeneren, si s’abre un chigre acabamos antes.
L’otru día qu’abrió Tierra Astur, debió dar tantos puestos de trabayu como una regasificadora. Entiéndaseme la comparanza. Pueden xenerase puestos de trabayu ensin tener que condicionar tanta inversión.
Y esi ye’l principal argumentu que usa’l gobiernu, que ye´l progresu, igual que col AVE del cantábricu. ¿Qué ye, que vamos quedar atrás? ¿queréis quedavos viviendo na cabaña de nun se onde? Dicen.
Y ye un argumentu que manca. Porque en cualquier otru sitiu, dirán qu’eso nun va dar trabayu, qu’económicamente nun tien sentíu, que llaboralmente nun hai por onde garralo.
Un asistente
El problema ye que llevamos munchos años nos que los puestos políticos que nos representen son ineficaces. Nun tán puestos dende la normalidá o la rentabilidá, sinón que tán puestos a deu. L’alministación asturiana ta enllena d’esto, porque durante treinta años tiense desarrollao un texíu de clientes, por dicilo asina, y, en consecuencia, tamos maniataos. Danse sovenciones pero nun se piden esplicaciones, nun se xentionen les coses.
Y ye verdá lo que dices, equí lo que hai que facer ye pedir rentabilidaes. Los partíos políticos que gobiernen nun miren pa los ciudadanos, miren única y exclusivamente pa los sos intereses personales, pa caltenese nel gobiernu otros años más, a costa de lo que seya.
Paco Ramos
Tornando a lo de la regasificadora. Faceivos cuenta que se modifica tres veces el plan enerxéticu, nes redes de transporte, y nun entra la regasificadora equí. Fue´l cambiu de gobiernu lo que fizo que se modificara, y como nun se modificó nada de les necesidaes, ye falso absolutamente que´l gas equí, n’Asturies, vaya ser más barato.
El preciu del gas nun tien rellación nenguna cola distancia. Les regasificadores furrulen a maquila, como los molinos de tola vida.
Elles tienen unos depósitos, tol mundu que quier traer gas mételo nesos depósitos y paga a tantu al día, y tol mundu que quiera sacar gas, tantos metros cúbicos se regasifiquen y tantu pagues. Teas onde teas. Nun hai peaxe por distancia.
Una central eléctrica asturiana lo mesmo va pagar pol gas si lo garra a la regasificadora del Musel que si lo garra a la regasificadora de Sagunto.
Pero como metes una regasificadora nun sistema onde yá nun fai falta, y garantices qu’Enagás va cobrar la inversión, esi costu va dividise a tantu’l metru cúbicu a tantos años y sumalo al restu’l sistema. Ye dicir, lo que van facer les empreses ye pagar más caro, nun más barato’l gas, por esi gastu innecesariu.
Tino Fernández
Respecto a lo que tais diciendo de la rentabilidá, podemos encontranos perfectamente nuna situación enerxética na que los picos de producción sean d’un 10 o un 20% y ehí sea onde tengan qu’entrar les centrales de gas porque xube’l preciu.
Cola lliberalización yá sabéis que’l preciu va tasáu cada media hora. Pero tamién podemos topanos con que nun faiga falta qu’empiecen a funcionar. Y tendremos fecho una inversión brutal, tanto na parte d’impactu ambiental como en infraestructures, que nun va pagar la regasificadora.
Vamos tener que pagala los asturianos, pudiéndose dar el casu que nun seya necesaria nin la regasificadora, nin los ciclos combinaos que se fairán pa ella, porque se cumpla con otru tipo d’enerxía más barata o renovable.
Agora tamos viendo una baxada del consumu enerxéticu, bueno, un poco pola crisis, y nosotros tamos construyendo, pero les infraestructuras pagámosles nosotros.
Paco Ramos
Yo creo que lo que va a haber de momentu ye una ralentización na creación de centrales de gas, porque cualquiera que s’añada nueva va costar amortizala. Y la paradoxa ye qu’Asturies tien previsto facer nun sé cuantes.
Tino Fernández
Ye a lo que me refería yo, quier gastase nes centrales una barbaridá y nes infraestructuras una barbaridá y prácticamente nun van ser operatives.
Paco Ramos
Efectivamente, si seguimos asina, van ser poco operatives.
Tino Fernández
Y volviendo a lo que faláramos de los puestos de trabayu, hubo dos empreses que marcharon, una de paneles solares, con trescientos empleos directos, y una cantidá considerable d’empleos indirectos, lo que amás yera mui bono pa la zona, al ser del sector secundariu, y la otra, de reparación de maquinaria industrial. Les dos empreses colaron. Nun s’apostó por elles.
Un asistente
Por nun falar del sector naval. Nun se xestiona, nun s’abren mercaos. La xente siéntase nel so sillón ensin más.
Otru asistente
Too eso forma parte d’una filosofia. El proyeutu económicu d’Asturies dende va unos diez años ye como polu d’inversión. Y ye lo que nos van vendiendo dende Areces a Juan Velarde cuando vien per aquí. Y d’ehí se deriva que marchen empreses asina o que cierre’l naval.
Los del naval yá dicíen hai años que podíen marchar pal Musel, que ye verdá qu’agora mesmo tán ehí en medio y que los camiones nun entren. Pero’l muselón nun se pensó pa esi tipu d’industries xeneradores, pensóse pa graneles sólidos y pa una regasificadora.
El proyeutu económicu de los últimos años, nel que prácticamente tolos grupos que tán na Xunta Xeneral tán d’alcuerdu con él, con ciertos matices, pero d’alcuerdu, ye convertir esto nuna pila, coles sos consecuencias sociales y económiques yá inclusu culturales.
Paco Ramos
Y amás nun va poder ser, porque yá nun hai onde gastar la pila. Eso yera cuando sólo había una forma de producir enerxía, que yera col carbón y l’agua. Castiella tenía pantanos y nosotros carbón y centrales. Y como eso s’acabó, aunque quisiéramos selo, aunque fagamos 17 centrales más, nun va poder ser. Porque ye que nun hai a onde mandalo.
De los primeros que propusieron centrales de gas nesti pais fui yo, nel añu 95. Dientro d’una campaña d’aforru enerxéticu y eficiencia. Y nun me ficieron nin putu casu. Dientro d’un plan de cierre de nucleares, disminución de combustibles fósiles y aforru enerxéticu del 50%, y en transición, centrales de gas de ciclu combináu. Y nin casu.
Y resulta qu’agora les compañíes, forraes de perres, y con tolo que-yos pagamos pola moratoria, les nucleares y la transición, ¿qué faen? Centrales de gas que se monten en dos años. Ya lleven feches cincuenta, en cuatro años.
Tino Fernández
Ye patético. Baxamos la dependencia del petróleo del 75 al 50%, pero nun baxamos la importación, lo que ficimos fue aumentar el consumu. Ye ridículo entó falar del famosu plan d’aforru enerxéticu. Nun se llevó a cabu.
Paco Ramos
Nun d’esos planes qu’ellos decíen de pasar de 100 a 130, y nós dicíemos que se podía arreglar con muncho menos de 100. La realidá ye que s’enquivocó’l gobiernu y nós más, porque´l pais pasó a 150.
Turón
Enantes preguntábase sobre los intereses qu’había pol mediu. Bien, del montón de dineru que metieron pa l’ampliación del puertu del Musel, podéis dir un día a sentavos a la Campa Torres y veréis los barcos qu’entren.
¿Qué misión tien esa obra faraónica? Col montón de dineru que se lleva enterrao ellí. ¿Alcordáivos d’esos 600.000 quilos de fierro qu’esapaecieron?¿Volvió a falase dalgo más d’ellos? Entraben per Aboño, pesábenlos, salíen pela Osa, volvíen dar la vuelta’l puertu, volvíen a pesalos, pero nun descargaben.
Paco Ramos
Como cuando la piedra la Llaboral.
Turón
Entós ¿qué intereses son los qu’hai? Pues la maraña montada y l’amiguismu que ta emplegando un montón de dineru p’alimentar a los so secuaces.
Un asistente
Y ¿cómo ta esactamente’l tema de la regasificadora?
Paco Ramos
Agora na regasificadora ta too aprobao y en marcha. Tán pendientes de los contenciosos alministrativos escontra la resolución de l’autorización del ministeriu.
Turón
Pero si nos escondemos detrás del proyeutu d’echar la regasificadora abaxu, nun facemos nada. Hai que dir a tumbar el plan enerxéticu a nivel rexonal.
Paco Ramos
Pero volvemos a lo que dixe al principiu, el plan enerxéticu ye una cosa, pero la regasificadora nun tien que ver con Asturies. La estratexa energética ye la que sustenta ideolóxicamente too lo que tamos falando, eso ye indiscutible. Porque una cosa ye clara, cualquier procesu industrial, del tipu que seya, a los del PSOE val-yos. Tán a favor de too.
Turón
Y los d’Izquierda Unida tamién, na última tramitación de la estratexa enerxética IU taba nel gobiernu, y asumieron l’alcuerdu del conseyu de gobiernu, y nun avisaron a la opinión pública.
Tino Fernández
Y tovía más grave. Izquierda Unida aprobó, col PSOE, la planificación enerxética estatal, y posteriormente, cuando yá nun taba Izquierda Unida nel gobiernu, el PSOE fízola pública y entós Izquierda Unida tuvo en contra.
Turón
Fue la prepotencia qu’emplegaron en tou esti asuntu lo que los perdió. Si fueren un puquiñín intelixente nos la huebieren colao hasta les oreyes.
Paco Ramos
Tengo qu’insistir no que decía antes. La regasificadora ye un proyeutu estatal, de competencia estatal, tramitáu pol ministeriu d’industria y aprobáu pol ministeriu de mediuambiente y ensin necesidá de facer autorización ambiental integrada que ye onde intervién el Principáu.
Si vamos al xuez, vamos a la llei y a la razón, non a la xusticia. Nel recursu que nosotros presentamos tovía nun respondieron, pa nun decinos cuales son les debilidaes d’ellos.
Turón
Ellos mesmos califiquen nos sos estudios, na revista que edita puertos del estáu, a la regasificadora y los metaneros que lleguen al puertu como oxetivu terrorista grave.
Tino Fernández
Paez que tamos nun debate xurídicu, tamos obligaos a facelo, pero eso nun nos puede amarrar. Vemos que políticamente va ser tamién mui difícil de parar esto. Pa llegar a facer algo teníamos que tener la capacidá de llegar a una movilización ciudadana suficientemente importante como p’asustar a los que tán dirixendo esto ensin cabeza. Pero tampoco la tenemos. Daivos cuenta que se ficieron coses, movióse un poco too esto, pero la movilización global…
Turón
Tenemos que ser serios. Dientro’l conxuntu les organizaciones que tamos teóricamente arropando a la Plataforma contra la regasificadora, en mui poques se discutió qué facer y cuántos nos xuntamos a ello.
Un asistente
Tamién había que tener en cuenta la respuesta de la xente. Esto vilo de cuando tuvimos na selmana negra informando y repartiendo bonos. La xente d’ellí, los vecinos del Natahoyo y de la Calzada, cuando-yos lo comentes, dicen: bueno, qué más da, si yá tenemos les bombones de butano y los tanques de Repsol. Entos, ye difícil llegar a esta xente.
Turón
Les asociaciones de vecinos, por exemplu la de La Calzada, que fue una organización bastante puntera na so trayectoria, dende que “la izquierda plural” la tomó, niéguense a facer hasta una asamblea colos socios, pa ver qué opinamos. Y posiblemente perdamos nel debate, pero ye que se nieguen hasta a discutir.
Paco Ramos
Ye impresentable que los partíos de Xixón nun se presentaran tampoco a un debate, porque, amás, podríen ganalu fácilmente. Xueguen en casa.
Turón
Entos, ¿qué facer?. Tenemos que tomar la iniciativa. Tenemos que volver a recurrir a los cures si fai falta. Si en Xove l’asociación de vecinos se niega tamién a facer una asamblea, igual tenemos que recurrir al cura de Xove, y dir un domingu pela mañana que llena la Iglesia y convocalos ellí mesmo.
Porque la xente, cola regasificadora, tampoco sabe l’efeuto dominó que puede facer una avería. Puede acabar col paro de la zona oeste.
Otru asistente
Acaba col paro y col empléu. Va quedar too llimpio.
Tino Fernández
Tamos pasándonos ampliamente de la hora que solemos dedicar pa estes tertulies. Pa final prestaríame facer sólo un pequeñu comentariu.
La regasificadora ye una pieza estratéxica nel plan enerxéticu. Sería perimportante xuntar les fuerces que pueda haber pa facer que esa regasificadora tuviera una contestación ciudadana importante.
Agora mesmo, que xudicialmente vémoslo difícil, ensin entrar en detalles de lleis, que podemos dexales pa los técnicos, tenemos un oxetivu claru: esto nun ta bien, y tenemos que lluchar por ello.
Y agora mesmo tamos en condiciones razonables. Nun ye imposible.
