IKE SOLUCIÓN.
20 años del huracán que solmenó les conciencies de Xixón
Na que participaron
• Ana Carpintero
Trabayadora d’ IKE
• Rubén Vega
Historiador y especialista nel procesu de reconversión industrial en Xixón y Asturies
• Guillermo Rendueles
Psiquiatra y coautor del llibru “IKE. Retales de la reconversión”. Ed. Ladinamo 2004
Presentó Dani Fernández
Buenes tardes a toes y toos. Gracies por venir a esti actu que celebra’l segundu aniversariu de la Tertulia Pachín de Melás. Güei facemos dos años de tertulia y nun pudimos tener meyor regalu que coincidir con otra fecha, que polo menos pa nós resulta mui importante, como ye’l venti aniversariu de la ocupación de la fábrica de camises IKE.
Güei en día, falar de tertulies paez raro cuanto too se fai al través de medios de comunicación masiva y d’internet. Ta perdiéndose absolutamente’l contautu humanu, paez qu’agora falamos dende trincheres, escaecemos que les persones tienen idees y argumentos propios, son diferentes y piensen diferente. Y pa danos cuenta d’esa realidá necesitamos ferramientes como esta tertulia. Tenemos que falar direutamente persona a persona, entrar en contautu con otres realidaes, con otres formes de pensar, y dende esti puntu de vista fue como les compañeres y compañeros d’UNA-Xixón plantegamos esta tertulia de la que cumplimos güei dos años.
Nes semeyes que teneis ehí vais dir viendo toles tertulies que llevamos, que son dieciocho si nun recuerdo mal. Falamos de temes como la prostitución, del sindicalismu, del software llibre, de la independencia de los medios de comunicación…
Y por exemplu, una tertulia que me prestaría destacar fue la que ficimos sobre discapacidá ya igualdá que titulamos “Carreres d’obstáculos”. Cuando participé como ún más nesa tertulia, pensaba que diba a topar a delles persones que teníen discapacidaes y que diben a esplicanos lo que podíemos facer nosotros p’ayudalos, y lo que m’alcontré realmente foron unes persones que lo que pedíen yera que nun-yos pusieren trabes pa que se pudieren desarrollar. Esi cambiu de visión que tuve sobre eses persones ye imposible tenelu al través de la televisión. Necesites un contautu direutu. Necesites conocelos, los sos problemes… ensin intermediarios.
Y poco a poco llegamos a dos años, y esi creo que ye’l meyor ésitu que pudimos tener. Aguantar dos años en dalgo que paez ya pasao de moda, como ye quedar pa falar ensin mayor pretensión.
Y pa culminar estos dos años cuntamos con Rubén Vega, que ye historiador y profesor de la Universidá d’Uviéu, espertu na reconversión industrial, tanto de Xixón como d’Asturies, con publicaciones como “La crisis industrial y conflictu social. Xixón 1975-1995” o “Clandestinidá, represión y llucha política. El movimientu obreru en Xixón baxo en franquismu (1937-1962)”. Más allá de la so trayectoria individual y como escritor, creo que lo más importante ye que tien una visión crítica que rompe cola versión dominante sobre ciertos temes, como la reconversión o la transición. Y esa versión crítica de so ye la que más nos va interesar na tertulia de güei.
Tamién cuntamos con Guillermo Rendueles, que ye psiquiatra, mui reconocíu en Xixón, pero qu’invitamos porque básicamente sabe que los sos conocimientos son importantes, pero ye tamién mui importante ponelos al serviciu de causes sociales, y esa forma de plantegar el so trabayu tiense reflexao nel llibru “IKE. Retales de la reconversión” del que ye coautor xunto con Carlos Prieto, César Rendueles y Carlos Muñiz; o en distintes obres como “Lliberalismu y Democracia” o “Los tiempos de la Llibertá” onde tamién destaca una visión claramente anticapitalista ya izquierdista.
A mi tamién me presta porque, siendo psiquiatra, tien tamién una visión bastante crítica de la so propia profesión, una cosa rara cuando normalmente solemos atopanos con bastante corporativismu. Fala siempre de la psiquiatrización masiva de la población, con una visión bastante diferente a la d’otros compañeros de so sobre lo que ye la psiquiatría.
Y finalmente cuntamos cola que, al menos pa min, ye la participante más importante de la charra, Ana Carpintero, básicamente porque fue trabayadora d’IKE y polo tanto puede cuntar la esperiencia en primer persona, polo que ye un referente de lo que ye l’arguyu de lluchar contra una inxusticia social y contra la invisibilidá d’esti conflictu, del que dempues de venti años, paez que nun recuerden nin instituciones, nin partíos políticos, nin sindicatos.
Y ensin allargame más, doi’l pasu a Rubén Vega.
Vamos facer un esfuerzu porque efectivamente seya una tertulia y espero nun cargar muncho con información nin ser mui estensu. Tengo tamién delles preguntes qu’en pricipiu-y pensaba plantegar a Ana, pero vistu l’auditoriu podría planteales a cualquiera de les muyeres presentes.
Pa entamar decir que’l sector testil ye seguramente’l primeru y el más duramente afectáu polos procesos de globalización y de deslocalización. En realidá la crisis del testil entama enantes que la crisis del petróleu del 73. Yá dende finales de los 60 empieza a haber síntomes de crisis na industria testil en Cataluña y en xeneral en toa Europa occidental. Nos 80, cuando llega esa onda espansiva a IKE, la empresa más fuerte, más prestixosa y con más presencia nos mercaos fuera d’Asturies qu’había en tola industria testil asturiana, la más grande tamién, paecía que la fórmula pa resistir esos fenómenos de globalización y de deslocalización yera, nel casu européu’l diseñu. Y aquellos que yeren capaces d’anovar nel diseñu, yeren capaces de resistir. Y el textil italianu o francés, por exemplu, qu’aguantaben meyor, aguantaben gracies a eso, porque nel restu, los productos estándar, taben empezando a facese yá nes maquiles d’América del Sur o en tol sudeste asiáticu.
Y veíes les muyeres que facíen la ropa d’Adolfo Domínguez en Galicia, y yeren muyeres de la Galicia rural, de la Galicia profunda, vestíes de negro, que nun sabíen nada de lo de “la arruga es bella” ni de la moda, simplemente facíen la ropa d’Adolfo Domínguez. Bueno, pues yá nun la faen eses muyeres de Galicia, agora faise en Marruecos.
Y esi fenómeno, yo creo qu’arrasó con tola industria testil, dende llueu la nuestra, l’asturiana, y la española y la europea prácticamente. De lo poco que queda, n’Obrerol, por exemplu, nuna ocasión una trabayadora d’ellí comentaba que la fábrica que sigue funcionando en Somonte, en realidá sirve de tapadera pa vender ropa que ta siendo importada de China. Tán reduciendo plantiya, tán reduciendo la fabricación y por contra tán incrementando la venta, pero de ropa que ta trayéndose de la otra punta del mundu.
Yo nun sé de nenguna otra empresa del textil n’Asturies que s’acueya al plan de reconversión aparte d’IKE.
Ana Carpintero
Sí, Sincos. Sincos entró porque formaba parte de la fusión, yera del mesmu grupu d’empreses.
Y taba tamién Mantova, que yera la segunda en plantiya.
Sí, Mantova yera un casu interesante, taba n’Uviéu y facía, entre otres coses, traxes de bañu, y cerró ensin conflictu. Y eso a pesar de que’l comité d’empresa, que yera mayoritariamente de Comisiones Obreres, intentó movilizar a les muyeres, pero l’asamblea nun se decidió a salir a la cai.
Eso ye lo que tien de singular el casu d’IKE, que la xente sí se moviliza, nun se resignen a la perda del emplegu y apuesten pola llucha colectiva. Por facer lo que hasta entós viéramos facer a homes en Xixón, a los obreros del naval, a los obreros de talleres en Moreda, a xente de Fluoruros y d’otra serie d’empreses con plantilles casi exclusivamente masculines, y dende llueu los que quemaben barricaes na cai yeren toos paisanos.
Bono, pues elles entren nesa mesma dinámica de resistir, de negase al cierre de la empresa y a la pérdida del puestu de trabayu. Y además planteen el conflictu como lu plantearon la xente de Moreda o d’astilleros, como un conflictu de resistencia, d’aguantar, aguantar y aguantar.
Y eso ye de xuru lo que fai qu’agora temos alcordándonos d’elles, porque difícilmente va organizáse, nin equí nin n’Uviéu, una tertulia so les de Mantova. Pero les d’IKE tienen un llibru y 20 años dempues tamos tovía recordando aquello. Porque pelearon, porque se negaron a aceptar los designios inexorables del mercau, que decíen “qu’esto nun ye rentable y hai que cerrar”, o “tenemos que competir reduciendo drechos”, competir n’economía sumerxida, que fue como se siguió compitiendo nel testil durante un tiempu.
Anque agora, posiblemente nin la ecomomía sumerxida seya capaz de competir cola competencia de la globalización.
Esa negativa a perder el puestu de trabayu, amás, nel casu d’IKE, tien una peculiaridá, que ye que cuanto más se reduz la plantiya, más fuerte ye la resistencia. Al principiu había una plantiya, creo recordar de como 570 trabayadores, y les primeres reducciones de plantiya vienen pola vía de baxes incentivaes y voluntaries y xubilaciones anticipaes. La xente que taba dispuesto a perder el puestu de trabayu, que taba dispuesto a negociar a cambiu d’una cantidá de dineru, que nun taba dispuesto a pelear polos puestos de trabayu, -qu’a veces les mesmes trabayadores asumen que’l so puestu de trabayu ye una cosa subsidiaria, que lo importante son los sueldos de los varones y, bono, elles siempre tienen a daquién que les mantenga…-, vanse les primeres, y les que queden son les que nun tán dispuestes a negociar con eso. Les que saben que’l so puestu de trabayu ye tolo que tienen y van defendelu. De manera que son más fuertes cuando van siendo menos.
Llueu’l conflictu tien munches fases, l’empresariu esapaez, apaecen unos xestores de l’alministración autonómica que, como pasó en CRADY, cuando l’alministración se metió a xestionar empreses fue un completu desastre. Yera xente que nun sabía y probablemente tampoco tenía muncha voluntá de resolver el problema fundamental, que yera’l del emplegu, y eso desemboca nel cierre de la fabrica.
Y hai xente que nun se resigna a perder l’emplegu nin siquier cola fábrica cerrada, na obstinación de pedir lo imposible dicen “nun nos da la gana”, y probablemente ehí ta lo más almirable y lo más meritorio de tou esti conflicu.
Y creo que la propia llucha tresforma la conciencia de muncha xente, fai que cambien de manera de pensar, de concebir la vida, de concebir el mundu, nesi procesu que probablemente ye mui llargu y que tien que marcar muncho.
Alcuérdome de les poques veces que fui per ellí, pela nueche aquello yera una tertulia, ellí siempre había xente que venía a dar aliendu moral, que munchos yera lo único que podíamos facer. Y ellí topábeste a mineros de La Camocha, que seguramente yeren machistes hasta la médula, pero yeren tan solidarios como machistes, sinón más. La fábrica conviértese nun llugar de convivencia, hai guah.es que se crien ellí. Hai un sitiu seguru pa xente que ta viviendo problemes que son mui h.odidos, que tán viviendo esperiencies dures, de salir a la cai, d’enfrentase a la policía, de sufrir les agresiones verbales y l’acosu del entornu. Ellí tienen un arrope que les fai fuertes. Y failes fuertes porque tán xuntes y porque lo que faen, fáenlo colectivamente.
Aprenden a non fiase de nenguna promesa, nin siquier de nengún acuerdu, a desconfiar de too. Y desconfíen y acierten. Porque normalmente les promeses tán mui mediatizaes pola urxencia de quítase’l muertu d’encima, de sofocar el conflictu.
Y yo creo qu’hai una conciencia clara pola vuestra parte de que si dexais de pelear, nun hai nada que facer. Toles promeses van tornase papel moyao si nun hai un arma de presión.
Y hai una dimensión del conflictu que ye la de que ye un conflictu de muyeres. Dende posiciones feministes recuerdo tener sentío: “a los del naval apoyábalos muncha xente y a les d’IKE, como yeren muyeres, nun les apoyaba nadie”.
Eso nun ye correcto por dos razones, una porque les d’IKE tamién recibieron apoyos, y non pocos. El que pelea acaba recibiendo apoyos, y el que non recibe apoyos ye’l que nun pelea. Y elles pelearon, y pelearon muncho.
Y dos porque ye inxusta la comparación colos del naval. Los del naval recibieron munchos apoyos, pero tamién dieron munchos apoyos. Los del naval repartieron muncha solidaridá con muncha xente, y polo tanto lo que recibíen teníenlo currao y muncho. Polo tanto son casos que nun son comparables.
Pero sí hai otres dimensiones de xéneru, como se diz agora, que son interesantes. Nun ye un conflictu feminista, ye un conflictu de muyeres, pero’l propiu cursu del conflictu da la posibilidá d’esplotar tamién esa dimensión, d’organizar unos alcuentros feministes na propia fábrica, o d’entrar en contautu con otres muyeres en llucha como les de Charpo, en Galicia, de concitar apoyos del movimientu feminista, que seguramente non tendríen llegao si nun s’hubiera trabayao esa vertiente.
Y hai otru aspectu, los conflictos de muyeres, inevitablemente, tienen especificidaes, les muyeres y los homes tamos na sociedá d’una manera diferente, mal que nos pese a dalgunos, pero asina son les coses, y polo tanto, muyeres saliendo a la cai, poniendo barricaes, movilizándose, enfrentándose a la policía, tienen que vencer otru tipu de barreres. Barreres sicolóxiques propies, d’una educación interiorizada que diz qu’esi nun ye papel pa muyeres, prexuicios sociales del entornu, de la familia, de los vecinos, de los medios de comunicación, de los ciudadanos en xeneral, estraños que cuando sales a la cai y cortes en tráfico te dicen “meyor tabes fregando”, o coses pol estilu.
Tamién obliga a alteriar les relaciones familiares. Yo recuerdo decir alguna vez a Ana “cuando taba quemando una barricada, taba pensando tamién en qué diba poner pa comer esi día”, y cuando Morala quemaba barricaes, nun tenía la preocupación de qué diba a poner pa comer. Ye decir, hai un ámbitu, el familiar, el domésticu, que nel casu les muyeres ye más complicáu, porque la casa, la educación de los guah.es, descansa total o mayoritariamente sobre elles, y hai, de dalguna manera, una especie de pesu de mala conciencia, de que “nun toi atendiendo otres obligaciones porque toi nesto”. Y polo tanto hai que superar eso, topar apoyos, o enfrentase al propiu ámbitu domésticu.
Y eso ye fundamental pa caltener un conflictu llargu, porque, al final, l’arrope que tengas nel to ámbitu más inmediatu ye decisivu.
Hai qu’afirmar rotundamente que los emplegos de les muyeres nun son subsidiarios, nun son prescincibles, que da igual si’l maríu tien o dexa de tener trabayu. El puestu de trabayu tuyu val tanto como’l de cualquier home, y eso nun lo entiende tol mundu.
Y hai qu’enfrentase na cai a los mesmos insultos a los que s’enfrenten los homes y a otros específicos de muyeres. A los insultos sexistes, aparte d’enfrentase a los antidisturbios, que son como castiellos de grandes.
Pero gustaríame saber lo que piensen elles, que a lo meyor nun tengo nin idega de lo que toi falando...
Pensando en referencies cinematográfiques, acabo de pasa-y a Ana un par de documentales sobre un conflictu nuna empresa mayoritariamente femenina en Cataluña durante la transición, toi pensando tamién nuna película, que ye un clásicu y que-y la pongo a los mios alumnos, “La sal de la tierra”. “La sal de la tierra” ye una película interesantísima onde se ve cómo la llucha cambia les relaciones de xéneru ente homes y muyeres y cómo en xeneral cambia la vida y la conciencia.
Y toi pensando tamién nun documental que se titula “Compañeres del textil” nel que falen sindicalistes de Comisiones Obreres, toes de Madrid, Ramona Parra, Begoña San José, Nati Camacho…, que son xente mui interesante que tienen un discursu mui ellaboráu y que se ficieron feministes pola vía del movimientu obreru y les vindicaciones de les muyeres dientro del movimientu obreru, ensin renegar del movimientu obreru, como pasó con otra parte del movimientu feminista, que nun momentu determináu pensó que la dimensión de clase y la dimensión de xéneru yeren incompatibles y rompió. Estes apostaron poles dos, por ser obreres y feministes al mesmu tiempu.
A mi prestábame matizar la diferencia qu’hai ente memoria ya historia. Rubén fizo una esposición espléndida de lo que sería la historia del conflictu, cómo fue, qué significó, lo que pasa ye que la historia siempre tien esi aire de lo oficial, ye como los monumentos, que siempre acaben con “siendo Carolus Rex” o “inauguróse siendo Tini Areces Presidente”. La historia tien eso.
Pero lo importante sería ¿qué quedó na memoria?, que tamién lo planteaba Rubén. ¿Qué nos dexó esi conflictu? a toos, a los que participaron pero tamién a los que nun participaron, a los que lu criticaron, a los que lu traicionaron, a los que ficieron falses promeses.
Eso que decíais na presentación, ¿Por qué nun se fai nada ellí?¿Por qué nun se puso una placa?¿Por qué nun van ellí con tachín, tachán?... Sería importante que lo pensáremos.
Lo que nun queda na historia, o queda mui poco, tendría que ser recoyío pola memoria. Si falla la memoria adios, porque entós, nun queda nada.
Si a la vuestra tertulia nun se-y ocurre esti actu, seguramente esto quedaría disuelto como tantes otres coses. Pensaba yo en CRADY o en delles otres histories de llucha d’entós, que nun quedó nada na memoria. Quedó sólo una experiencia de sufrimientu.
Entós, como dicía Rubén, yera importante tener memoria de les derrotes, porque anque seya una derrota, rompe esa sensación de naturalidá de lo que pasó, porque paez que tola desapaición de la industria en Xixón fue un procesu natural, como qu’hai tormenta o que ta enfriando’l planeta o lo que seya. Recordar les coses fainos quitar esa naturalidá a la historia. La historia fue una pelea na que unos ganaron, otros perdieron, pero nun fue algo natural, algo lóxico, algo que tuvo que ser así.
Volver a pensar no que pasó permite otra visión, porque sería la historia de la resistencia. Tola historia de los últimos años son contínues derrotes del movimientu obreru, de les idees d’izquierda, pero tener memoria de la resistencia permite ver que nun ye lo natural sinón el resultau d’una llucha y a lo meyor d’esi recuerdu podemos recoyer eses cites que dexó esa resistencia y rearticular otru tipu de resistencies.
Munches veces la nuestra propia biografía, si nun l’articulamos con esa memoria colectiva, ye como que nun sabemos nada, perdemos de vista incluso les nuestres propies vides.
Romper esa historia de los grandes fechos históricos, de los monumentos, de lo que se conmemora oficialmente tamién sería a lo qu’hai qu’oponer la memoria. Memoria frente a historia, derrota frente a la naturalización, la normalidá o’l trunfu de la evidencia, de lo que debía ser.
Acontecimientos-verdá d’estos hai unos cuantos na vida de cada persona, lo difícil ye sacar la consecuencia. Cómo podemos ceganos a estos acontecimientos y que vayan mal, pa la gran mayoria de les organizaciones y del pueblu de Xixón sirvió-y esi acontecimientu pa convertise al cinismu, que ye esi momentu nel que ves que les coses son como son y non como te les cuntaron, pero en llugar de pelear, de tirar p’alantre a pola verdá, de tratar de colectivizar lo que descubriste, empieces a pensar lo contrario, empieces a pensar que s’abre la brecha ente les palabres y les coses. Una cosa ye lo que dicen los políticos, los sindicalistes… y otra cosa ye la verdá. Y hai qu’aceptar que la verdá ye la del que se somete, la verdá ye la del que camina per caminos de servidumes, y dexa de creese nes fuerces polítiques qu’empiecen a dexar de creer en sí mesmes.
A bastantes de los movimientos políticos de Xixón d’aquel tiempu y a una parte mui importante del movimientu feminista, lo d’IKE y otros conflictos fueron unos d’esos momentos de cinismu, d’asumir el cinismu como ideoloxía, d’aumentar esa brecha ente lo que se diz y lo que se fai, de pensar que lo que se diz nun tien demasiada importancia, que ye un instrumentu pa ganar les siguientes elecciones, pa ganar un poco de poder onde se ta. Y que, anguaño, paezme que ye una de les ideoloxíes centrales en tol mundu, y esi cinismu ye parte de tolo que nos pasa. Y ya nadie se toma en serio lo que dicen los políticos o los sindicalistes nin nada pol estilo.
Y los acontecimientos pueden facenos espabilar, ver cómo ye la realidá y a partir d’ello, de forma colectiva, empezar a confiar unos en otros y tratar de pelear y sacar les coses alantre, o lo contrario, entrar nesi procesu de cinismu y pasar de los grupos y convertise al individualismu, que ye otru de los problemes centrales.
Esa fue una de les consecuencies más importantes a nivel llaboral, pasar del conceptu colectivu al conceptu individual, el sálvese quien pueda en cada conflictu. Y hai una especie d’ indefensión, fagan lo que nos fagan, naide sabe como defendese… xubilación a los sesenta y siete, como si ye a los sesenta y nueve. Paez que tol mundu se siente yá derrotáu enantes de pelear.
Una de les coses que deberíamos pensar ye si esi cinismu al ver les coses como son lleva a esa autoderrota, a esa incapacidá pa ver salides per otru llau, non sólo nel mundu del trabayu, sinón si tien pasao nel conxuntu de la sociedá. Si la derrota nun fue sólo nel movimientu obreru, sinón a nivel de grupu popular. Si esiste dalgo asemeyao a nosotros na sociedá. Si podemos decir “nosotros los trabayadores”, “nosotros, les clases populares”, “nosotros los xixoneses”, o por contra eso acabóse, sólo hai una colección de “yos”, qu’a veces xuntámonos, a veces separámonos, pero que la derrota fue tan fondera que lo que llogró fue un procesu d’individuación absolutu de la población
Y entós, ante cualquier crisis, esi “sálvese quien pueda” fai mui difícil articular les vieyes resistencies.
Y lo contrario, cualquier grupu qu’articule un “nosotros”, aunque seya mui reaccionariu, en principiu, sería un factor de resistencia.
Estremándolo muncho, yo nun diverxiría de la estrema, estrema derecha, el Tea Party por exemplu, más que no fundamental, qu’ellos son fascistes y yo, obviamente, non. Pero toa esa articulación, ye dicir, frente a los politicastros, reunímonos ames de casa, xente del pueblu, xente de los d’abaxu, y ponemos a los nuestros candidatos, y toos esos que tan ehí d’enchufaos al carayu.
El fascismu y el comunismu, la estrema derecha y la estrema izquierda tienen un sentimientu común, que sería l’horror énte cómo empieza’l capitalismu, que ye dalgo que va disolver la vieya sociedá y va a producir individuos que se mueven esclusivamente.
Otra de les descripciones que dan los sociólogos sería la de sociedá de riesgu, que ye qu’hai qu’aceptar los riesgos de que te despidan o que te pase lo que te pase, y que cada persona tien qu’asumir los sos propios riesgos, y qu'en sin riesgos nun se vive. Y cualquier colectivización d’esos riesgos en llugar de disminuilos, auméntalos.
Les muyeres d’un ciertu feminismu conservaben tovía lo que se llama la ética del cuidao, esi “nosotros”, o “nosotres” meyor dicho. Aquella imaxen d’Antígona, que nun siguía la llei de la ciudá, siguía otres lleis que nun yeren les de los homes. Esi colectivismu desapaeció absolutamente y fixóse n’imitar la cultura del capitalismu avanzáu. Ente la familia y la carrera, la carrera. Imitar a los homes en “unu rápidu na oficina”. Y toa esa ética que sal nos llibros esos d’autoayuda. Too diría en función d’imitar. Imitar la cultura masculina, imitar la cultura del individualismu, la cultura del éxitu profesional.
Pero esi “nosotros”, esa cultura del cuidao dientro casa que s’estendía al cuidao fuera esapaeció. Y eso fue una cierta derrota, una derrota a nivel xeneral en Xixón, y n’Asturies tamién se reflexa.
Esa falta d’atención, por exemplu a esos temes clásicos del feminismu na diferencia: “nun queremos ser competitives, executives, guardies civiles”.
La crisis tien una interpelación global, los millones de paraos, la miseria… too eso ¿qué pasa?¿por qué nun resuena?¿por qué queda ehí fuera?
Cualquier acontecimientu que nos pueda remover por dientro necesita una cierta apertura, dexanos conmover, que cuando te mira un d’esos probes, que la so cara seya lo que te remueva por dientro.
Y facelo, non a nivel individual, pa dar una llimosna, sinón facelo a nivel colectivo.
¿queda algo d’eso? ¿d’esos colectivos a los que conmueve la miseria o la maldá del mundu?
A mi paezme clave que dellos de los grupos que sacaron daquella carteles apoyando lo d’IKE, lo qu’antes yera’l MCA que llueu fue Lliberación, acaba de disolvese, el mes pasáu ficieron una espicha p’autodisolvese.
Asina que, desgraciadamente, nun puedo ser mui optimista, y que pa esta crisis, esos colectivos que nos pueden abrir los güeyos a la verdá nun ten ehí mui activos.
Sí fue una derrota, pero la derrota de la crisis na que tamos metíos ye tan global qu'oxalá tuviéremos naquella.
Y a la mesma vegada lo contrario, la historia nun ta escrita n’absoluto, los problemes, los conflictos, la miseria del mundu ta ehí, convocándonos, dalguna forma la historia del mundu ta interpelándonos, ta llamándonos a qu'intervengamos. Y que nos abramos o nos cerremos a eses interpelaciones va calificanos como cínicos, como dalguien que se va zarrar no de so, nel so yo individual, o dalguien que, dalguna forma, va coyer eses cites que la historia nos da y va intentar cambiala na midida de lo posible.
Bono, yo voi dar unes pincelaines anque nun voi a abundar en más detalles.
Nosotros, como bien dicía Rubén, tábemos nuna fábrica onde, en xeneral, yéramos esquirolones a tope, mui poco solidaries, y entre nosotres mesmes, tela marinera, por diversos conflictos que vivíamos dientro la empresa. Pero tuvimos que facer esi tránsitu.
Con ello quiero dicir que nun yéramos muyeres que tuviéremos una trayectoria de llucha especialmente, en sin embargu, parte de les muyeres qu’intentamos aniciar ehí’l movimientu sindical, construímos los embriones de tolos sindicatos, de Comisiones Obreres, Bernardina de la USO…
Lluchamos y formamos les rames na época de la semiclandestinidá, anque nun yera la época más dura. Alcuérdome de reuniones nes pasteleríes, onde nun se podíen facer les coses abiertamente. Y tocónos formar l’embrión de les Comisiones Obreres d’aquella hasta que nos espulsaron nel 82, xusto cuando empezó’l nuestru calvariu de la reconversión. Estrozaron la rama del testil y de la executiva xusto cuando taba dándose’l conflictu de Sincos.
Tuvimos que facer esi aprendizaxe de ser una empresa d’esquirolones y d’aquella manera, a buque insignia del testil. Yo alcuérdome que díbamos a la comunión de los fíos del xefe, teníamos la comida de tolos años de cristo rei, y en fin, un llargu etcétera.
O lo qu'antes comentábeis, que diba al bancu y tenía que firmar el to padre, nosotres igual, trabayábamos, ganábamos el salariu, pero yera una cosa asina.
Tamién se daba lo de la dote matrimonial, que fue cuando s’empezó a reducir muncha plantiya. Cuando nos casábamos, dábennos una indemnización por parte la empresa, que ya recoyíen los convenios del testil, primábasenos por dexar el puestu de trabayu y pasar a ocupar el papel d’ama de casa, d’esposa y de madre.
Tábamos influyíes y mediatizaes pol nuestru entornu, poles nuestres madres que yera lo que nos dieron de mamar. Y tuvimos que xenerar esi cambiu, que tamién xeneró munches tensiones a lo llargo del conflictu, y contradicciones dientro de nosotres mesmes tamién.
Nel testil falaben de qu’había que pega-y un cambiu al sector, inyectáben-yos una serie de millones a les empreses pa que se modernizaren, la maquinaria, el diseñu, … pa poder competir a un nivel más altu, cola moda, y non por onde nos taben dando, que yera colos trabayos que se facíen en Corea, en Taiwán, y nosotres mesmes na economía sumerxida. Vi películes d’aquellos pueblos d’Italia onde sacaben la máquina a la cai, a la puerta casa, y hai pasaxes nuestros d’ello tamién. Danse tamién lo que llamábemos empreses maquileres, mal llamao cooperatives. Alcuérdome de pueblos d’Asturies onde llamaba’l cura y entrugaba “a ver, ¿quién quier trabayar?”, y montábanos una cooperativa que consistía en qu’apañaba unes cuantes moces y Samperio ponía les máquines y daba’l trabayu. Y la xente taba ellí trabayando por poca cosa. Eso fue lo qu’entamó a destruyir a les empreses del testil constituyíes como tales.
Y a nosotres metiéronnos de cabeza nesa reconversión.
Resumiéndolo en dos puntos, al nuestru empresariu, que yera Enrique López, lliberáronlu de tolos sos bienes y quedó llimpiu, o seya, él quedó cola pensión de xubilación, que pa eso cotizaba a la seguridá social y además lliberaos tolos sos bienes personales que tenía avalando créditos. A la par, poco a poco, fue entrando nel ruedu l’alministración. Quien recuerde’l conflictu d’aquella época, paez que tábamos más qu’empecinaes na rexonalización de la empresa.
Ye dicir ¿quién ye’l mio empresariu?, el que dirixe la empresa y el que pon la pela ¿non?, y nesos momentos, quien ponía la pela yera l’alministración rexonal y el que dirixía yera l’alministración rexonal.
Y por eso teníamos esa llucha tan testerona contra Mari Paz Fernández Felgueroso, que fue conseyera d’industria y agora alcaldesa, y contra Tini Areces, que fue alcalde de Xixón. Por esa razón cenciellamente, porque yera l’alministración la que taba dientro d’IKE.
Tengo datos equí mesmo onde pue vese qu’una de les salíes que se diba a dar nel añu 88 pa IKE consistía en qu’IKE tenía ya un furacu d’unos mil ochocientos millones de perdes, y tratábase de llavar el pasáu y buscar una salida. Primero propunxéronnos sociedaes anónimes llaborales, llueu cribáronnos a toes les trabayadores, ya nun yéramos quinientes y picu, yéremos doscientes setenta y siete, perdimos plumes, desemplegu, de too. Y nel 88 fue cuando fizo esi crak, esa ruptura y la propuesta yera llavar el pasivu de Confecciones Gijón d’esos mil ochocientos millones y crear una empresa, Distribución de formas y modas, me paez qu’era, que diba a quedase con tolos clientes d’IKE y quedase col diseñu, patronaxe y demás. Y a esa yera a la que-y inyectó’l dineru l’alministración. Y a la par diba a existir otra empresa a la que díbamos pasar los trabayadores cuando llaváramos el pasivu de Confecciones Gijón. Porque díbamos dir a una subasta, porque tolos bienes taben embargaos pol bancu de créditu industrial. Nesa subasta, díbamos facenos nosotros colos activos y colos llocales de la empresa y díbamos a pasar, ya en sin la deuda, a la plantiya. Y bueno, yera una salida.
Insisto, en tou esti trasiegu, nel dineru, taba implicada l’alministración rexonal cola caxa d’aforros, y en Confecciones Gijón nun se llevantaba un pelu en sin la decisión del alministración rexonal. Esi yera’l mi empresariu. Y por eso esa llucha tan testerona contra les autoridaes, contra Mari Paz Fernández Felgueroso.
Bono, nosotres aquello nun lo veíamos mui seguro. L’alternativa que dábamos a aquello yera: “val más facer la campaña de la temporada de camises que tenemos que facer”, -porque siempre nel testil funcionamos a palu cambiáu, nel iviernu facemos lo del branu y nel branu lo d’iviernu-, “que va aseguranos el cobru de salarios”, -llegaron a debenos siete mensualidaes, tela marinera-, “y mientres tanto, nun gastamos desemplegu, porque, mira tu, tamos trabayando, y búsquesnos al comprador”.
Nosotres contentes.
El problema taba en que la solución pa ellos nun pasaba per ehí, taba nel cierre puru y duru de la empresa. Y creo qu’esi fue l’engañu.
Porque ellos, p’afogate nun conflictu, tienen munchos caminos, el primeru ye afogate económicamente, porque ellos tienen tol tiempu del mundu, son como utres, planeen y deciden a llargu plazu. Y tu necesites comer, necesites vivir.
Y fue polo que procuramos siempre que nun nos afogaren económicamente, intentando buscar salíes, inxeniándonosles como pudimos. Lo que nun quier dicir que nun les pasábamos puñeteres.
Siempre pensamos tamién que la salida que pensaben danos pasaba polos llocales de la empresa. Teneis que pescanciar que ye una esquina de privilexu nel Coto, y la preba ye qu’agora ta edificao, como yera de suponer. Yera goloso, yera un caramelu. Y la solución diba pasar por ehí.
Volvieron a prometenos l’oru y el moru, que diben a recolocanos a cientu diez nun famosu proyeutu testil. Después prometiéronnos qu’otres tantes diríen pa Pryca, pa Los Fresnos, etcétera, etcétera. Y de too eso, nun se cumplió absolutamente nada.
Después, a midida qu’ellos xiraben y daben la vuelta nesa incomprensión, nesi machacanos y nun danos tregua, nun danos salida, pues fuimos faciendo un poco de tou. Llueu atrevímonos con cortar el tráficu. Alcuérdome que, daquella, garrábamos los retales que salíen del corte de les camises y tirábamoslos pola cai, ocupábamos edificios, y pocu a pocu fuimos aprendiendo.
Y tuvimos que facer otres coses, tuvimos qu’aprender a facer barricaes. Y siempre, dalguien prendíales y dalguien defendíales. dalguien poníase detrás y dicía “esto ye mío”.
El conflictu marcó’l fin d’una época. Fue’l final d’una empresa, d’una fabricona de les que conocíemos al usu. Y el final de les sirenes, de los pitos que nos dicíen cuándo teníamos qu’empezar a trabayar, cuándo teníamos que comer y cuándo s’acababa la xornada.
Y eso acabóse.
Y nel camín tuvimos que facer esi aprendizaxe, que pa nosotres, a nivel personal, tuvo un costu pergrande. Por exemplu Charo, que tuvo que dai'l fíu con tres meses a la so madre y cuando tornó a casa tenía cinco o seis años, y comentó que-y dixo’l fíu, “ya va siendo hora de tener una madre”. Y como’l de Charo, tan la cantidá de nenos que nacieron nel conflictu. Y teníamos meses enriba d’embarazu y participábamos en movíes. Y llueu les compañeres…, chapó por elles, siempre procuraben protexenos, alcuérdome qu’ocupamos un recintu d’equí del ayuntamientu, reventaron la puerta, que teníamos protexía con muebles, y aquello fue tremendo, y varies de nosotres tábamos embarazaes.
Fue una época de compartir, compartíamos los críos, … aquelles tardes, aquellos parchises… yera una forma de vivir d’otra manera.
Dani Fernández
Vamos dir pasando les fotos de lo que tabes cuntando, cuando ocupasteis el barcu…
Y tengo una pregunta, ¿cómo disteis el pasu d’enfrentaros abiertamente colos antidisturbios? Imaxino que, como muyeres, pol físicu, tien un problema evidente, pero ellos llegaron a tenevos mieu, dicíen que los pinchabeis… anque tamién vos daben lo vuestro, pero nun ye esa sensación de dir a por unes débiles muyeres en sin defensa.
La policía reprime por igual tanto a homes como a muyeres, anque quiciabes les formes yeren otres. A nosotres dábennos col tolete por enriba, y rara vez nos daben perbaxo. Siempre díbamos marcaes…, renegrones… y tuvimos otres lesiones, na cara, na nariz…, a Rosi, a Marta y otres.
Yera una resistencia pasiva, nun tabes faciendo nada, tas ellí y nun quies movete. Cuando tas pensando que lo que pides ye xusto y que tas onde tienes que tar, el resto vien por añadidura, el show móntenlu ellos.
Una asistente
Ellos dicíen que nosotres yéramos como más impredecibles. Con ellos llegaben a un alcuerdu, y con nosotres nun había manera.
Como'l Tini Areces, cuando fuimos a reivindica-y que lo que queríamos yera facer la campaña y que nun se cerrara la empresa, que mandara media plantiya al paru y media plantiya trabayando, y non a tola plantiya al paro, porque yera la única manera que la empresa nun cerrare, y p’aquello necesitábense cuarenta millones. Y Comisiones y UXT nun apostaron por ello, taben cola alministración, y entós, daquella ficimos una movida que coincidió colo del “Eulogio del Horizonte”, y tan pendientes taben de les de Confecciones Gijón qu’había un señor al confundieron y que-y cayeron unes hosties que, vamos, ye’l día de güei que tovía les recuerda.
Y anécdotes asina hai munches.
Y ye verdá que cuando llegaben a casa, teníen qu’oyer la bronca del maríu, a lo meyor porque nun tenía la cena fecha, y la bronca de los padres, que taben colos fíos. Eso marcó muncho.
Y alcuérdome que cuando lo del barcu, preguntáronme los de la prensa que cómo se llamaba, y nosotres, que tábemos fuera, na cubierta, fumando, miramos pa un cartel y diximos “no smoking”.
Y la verdá que que nos ficieron bien de h.udiades. Quixeron quedase cola empresa. Ficiéronnos facer cursiellos de formación, y aquellos cursiellos, consentíos por Comisiones y UXT, ¿sabéis pa que yeren? Trabayu encubiertu pal Corte Inglés. La xente que mandaron, los sos afines, echaben hores estraordinaries. Trabayando sábados y domingos. Denunciámoslo a la Comisión Europea. Bono, espulsaron al que taba daquella en Nueves Tecnoloxíes. ¿Cómo se llamaba? Lombardero.
El Pedro de Silva teníanos un mieu de pánicu. Un domingo, ¿alcuérdeste? Diba marchar de viaxe y nun salió de casa por mieu.
Fue mui duro, compaxinar la movida, compaxinar la casa, compaxinar la familia, y además sentíeste culpable.
Y llueu tuvo lo de la especulación, invirtieron millones, a nosotres nun nos dieron los cuarenta millones p’acabar la campaña, pero ellí inyectaron una cantidá de millones terrible. Coyeron les meyores tiendes d’Uviéu, los meyores llocales, talmente nel centru, gastaron dineru en sin control, porque facíen les promociones n’hoteles de luxu, pero les trabayadores nun sé si cobramos dos meses, porque al poco volvimos a quedar en sin cobrar. Y d’estocaxe… yo entiendo que, cuando nun hai perres, vas comprando pa la campaña ¿non?, pues non, compraron un estocaxe de caxes y de teles que…, bono, gracies a dios, fue lo que nos valió después pa subsistir.
Y fíxate como yera la cosa que nos años setenta y tantos o l’ochenta, nes asamblees qu’había de toles empreses del testil que taben cayendo, en xeneral interveníen los maríos más que les muyeres. Los maríos yeren los que diben a les asamblees. Yera asina la cosa. En sin embargu, la xente d’IKE teníamos un calter distintu, teníamos cuadros un pelín formaos. Y a nivel sindical, el secretariu xeneral diba, pero col criteriu nuestru, y na negociación siempre díbemos nosotres. Tanto na USO como na Corriente.
Nun sé si m’esplico, nun conflictu, antes venía l’ilumináu de turnu, el dirixente sindical, quien fuera, y yera’l que llevaba’l conflictu. Pero en nosotres eso nunca pasó. Siempre fuimos nosotres.
Nun puedo dicir que si volviese a vivir lo que ya viví, lo ficiera too de la mesma manera, pero yo entiendo que volvería a facer lo mesmo. Fairía la mesma apuesta.
A lo meyor hubiera movido dalgún peón d’otra manera, pero sigo pensando que les salíes individuales nun les hai, les salíes tienen que ser colectives.
Una asistente
Y nun hai cosa mas dura que perder el puestu de trabayu. Cuando te dan la carta de despidu y tienes que dir al paru, ye un drama. Pensar que pases de ser una persona útil, válida pa la sociedá, a ser nada al momentu. Porque si nun tienes trabayu, si nun tienes un sueldu, tas marxináu pa la sociedá. Y esa fue la imaxen que nos llevó a lluchar por caltener los puestos de trabayu. Y ehí si que fue una derrota, porque nun llegamos a consiguilo, nin les que nos vendieron, nin les que quedamos. Pero polo menos, la dignidá nun nos la quitaron, y defender, defendímonos como pudimos.
Y siempre que lluches siempre queda algo.
Creo qu’esto hai qu’enllazalo colo que dicía Guillermo de cómo conservar la memoria, cómo tresmitir esa esperiencia de llucha. Y después, les derrotes, aparte de la subversión de les palabres pola clase política, llamando reconversión a lo que ye desmantelamientu, les derrotes nunca son derrotes al cien por cien. Tienen tamién la so parte de victoria que perdura. Y dixo ella la parte de victoria: “caltenemos la dignidá”, caltenemos el recuerdu. Y pa mi ye lo más importante.
Por desgracia’l tiempu ye llimitáu. Munches gracies a toes y toos por venir. Creo que’l casu d’IKE, pa les xeneraciones más moces, viendo lo que se nos vien encima, ye l'exemplu que tenemos que siguir. Porque si antes d’entamar ya lo damos por perdío, mal futuru nos espera. Munches gracies pol exemplu que nos disteis pa les lluches que nos toca facer a nosotros agora.
