Tertulia: Nacionalismu asturianu na transición

Resumen de la tertulia
del
xueves 16 d'abril de 2009

Nacionalismu asturianu na transición

Participaron

Xosé Lluis Carmona
Fundador de Conceyu Nacionalista Astur
Ignaciu Llope
Escritor y militante d'Unidá Nacionalista Asturiana
Patrick W. Zimmerman
Historiador ya investigador

Presenta por Xelu Neira


Xelu Neira
Na tertulia de güei tenemos con nosotros a Xosé Lluis Carmona, un históricu nel nacionalismu asturianu, fue fundador del Conceyu Nacionalista Asturiana, tuvo na Xunta Nacionalista Asturiana y llueu fundó tamién la primer Unidá Nacionalista Astur, o seya que por esperiencia, nun podemos pedir más.

Tenemos tamién equí a Nacho Llope, que ye otru históricu d’esi tiempu que sigue militando activamente na nueva Unidá Nacionalista Asturiana y foi cabeza de cartel en varies elecciones.

Y finalmente a Patrick Zimmerman que ye historiador y ta trabayando precísamente col nacionalismu asturianu. Dispón de muncha documentación sol tema, quizás más que munchos de nosotros, ya que tuvo la posibilidá de recoyer de toles fontes y además puede tamién aportar una visión dende l’esterior que va ser mui enriquecedora.

Bueno, entamamos sin más. ¿Quién quier empezar a tomar la palabra?

Xosé Lluis Carmona
Bueno, yo siempre digo que cuando tocamos el tema de la transición y lo qu’esperábamos que yeren les coses, de toos aquellos movimientos que la oposición democrática al franquismu defendíen y yeren bandera precísamente de una sociedá nueva, de una sociedá democrática, como por exemplu’l movimientu feminista, el movimientu polos derechos y les llibertaes sexuales, el movimientu ecoloxista, los movimientos de participación ciudadana, la recuperación llingüística asturiana, esta última ye la única que 30 o 35 años más tarde, o nun tien acomodu na nueva sociedá democrática, o tien un acomodu estrámbóticu.

Tenía la mesma carga de ruptura col franquismu y de acomodu nuna nueva sociedá que les otres y sin embargu, ya nun digo la derecha oficial, sinon la izquierda oficial que ye la que-y daba más álitu y más impulsu a la opocición democrática´l franquismu, nunca quiso, nestos 30 años, colocar esa reivindicación, que ye una reivindicación llingüística, pero a la hora de la verdá tamién ye una reivindicación del nacionalismu al empar. Y digo más, hasta lo combaten, polo menos nel partíu socialista.
Y como n’Asturies el movimientu de reivindicación llingüística y el nacionalismu políticu fueron siempre mui de la man, en realidá el unu llastra al otru, hasta’l puntu que toos vivimos una sensación de fustración nacionalista y llingüística precísamente por esi fechu.

Nacho Llope
Home, no tocántenes a la transición, porque esi ye’l tema, hai delles cuestiones puramente práctiques y metodolóxiques.

Por consensu, situase la transición española dende la muerte de Franco a cuando Felipe González gana les elecciones nel 82, porque hai un cambiu de réximen. Ye decir, de alguna manera interprétase que la UCD yera la transformación del franquismu más aperturista y que aceptaba un marcu democráticu, pero esa transición nun corona hasta que hai un real cambiu de réxime.

N’Asturies la transición nun acabó. Nun hubo cambiu de réxime. Dende los primeros estertores del posfranquismu hasta agora, los que tan xestionando la cosa pública n’Asturies son les mesmes persones. Por tanto estirando l’argumentu, podemos decir que la transición n’Asturies nun finó, el réxime ye’l mesmu, nun hubo realmente cambiu nin de persones, nin de polítiques, nin de visualización social de lo diverso.

Lo que dices ye cierto, fuiste al megoyu del asuntu, ye asina, pero eso obedez a razones, nun ye un caprichu de la naturaleza, nin que’l destín de los asturianos tea fatalmente marcáu por unos diaños estraños y oscuros. Non.

Pa eso hai esplicaciones, delles estructurales, que tienen que ver cola demografía, cola cultura política asturiana heriede del franquismu, incluso causes que tienen que ver con movimientos mui fondos de la sociedá d’esti pais, y que d’alguna manera’l naciente nacionalismu asturianu nun foi quien a diagnosticar acordies. El diagnósticu fízolu erróneamente.
Aparte les tares que tovía arrecostinamos güei, organizatives, sectaries, y d’insuficiencia de los instrumentos políticos colos que se dotó esa corriente de la sociedá asturiana.

Patrick Zimmerman
Una de les preguntes más importantes que había que facer ye ¿por qué’l PSOE equí nunca camudo la so actitud, en comparación col PSOE de Cataluña por exemplu o de Galicia incluso?.

Una de les razones ye que’l PSOE nunca se sintió obligáu a tomar un riesgu políticu pol causa del nacionalismu, porque siempre tuvo’l gobiernu más o menos garantizáu cola fidelidá de los sindicatos equí.

La base del nacionalismu asturianu, con excepciones bastante importantes, nos años 70 fói del mundu de la educación, foron estudiantes, profesores y había una dificultá en entrar nel mundu de los sindicatos, entós nunca hubo un sindicatu nacionalista.

Lo más cercano fói SUATEA, que nunca foi esplícitamente nacionalista, y ya falamos de los años 80. Entós como nunca se vió obligáu a camudar la so postura, nunca lo fizo.

Y la pregunta pal futuru ye, cómo se puede obligar al PSOE a modificase ¿cómo partíos minoritarios con poca esperanza de tener mayoría absoluta pueden afectar a los partíos mayoritarios?. Bueno, si puede tener una cantidá de votos, aunque sea minoritariu, puede entrase en negociaciones polítiques, sobre todo cuando los grandes partios tan igualaos nos votos.
Esi ye´l modelu de Convergencia i Unió, que aunque foron minoritarios pudieron afectar inclusu nacionalmente y sólo con seis diputaos en Madrid. Nun se necesita mayoría p’afectar la política de los demás.

Xosé Lluis Carmona
Lo que siempre da buenos réditos na política ye “nun cambies aquello que te va bien”. A ellos va-yos bien, llueu nun van cambiar.
Alguien puede preguntase, ¿y por qué incorporaron el restu de los movimientos que yeren la base de la oposición democrática? Pues porque ningún d’ellos, ningún, se convirtió n’alternativa política, mientres que’l tema llingüísticu y asturianista sí. Convertímoslu n’alternativa política, una alternativa de competencia, y claro, infelices de nosotros, yéramos una pulga compitiendo con un elefante.

Nacho Llope
Y ¿por qué la pulga nun inoculó un virus que matara´l elefante?

Xosé Lluis Carmona
Ya, ya, nun supimos. Hubo momentos y coyuntures polítiques que lo impidieron, pero la izquierda gobernante incorporó aquellos otros movimientos a la so estructura. Hubo un partíu feminista, que duró tres años y incorporóse, tuvieron los verdes, y tan incorporaos.

Hai un momentu clave, que ye’l termómetru que marca la temperatura social, que son les primeres elecciones, hasta esi momentu nadie sabe con qué fuerza cuenta cada cual,
había una alternativa que se identificaba cola opción asturianista, que yera la Unidá Rexonalista que conoz un fracasu estrepitosu, vistu desde aquella época, claro, güei sabemos que aquello nun foi un fracasu, pudo ser precísamente’l xermen d’otres coses, pero nun se vio así, consideróse que yera un fracasu, y a partir d’esi momentu ye considerao algo prescindible completamente.

Nacho Llope
Esi fracasu ya anunciaba delles de les zunes que condenaron a la marxinalidá política al nacionalismu políticamente organizáu d’estos 30 años. Una d’elles yera la mala calidá de los dirixentes, la pésima calidá personal, política y ética de los dirixentes.

Eso foi algo terrorífico, porque, ya lo decía Marx, hai coyuntures históriques nes cuales, les decisiones de mui pocos influyen nel futuru de munchos, y el problema ye qu'eses coyuntures son mui poques a lo llargo de la vida biolóxica d’una persona, poquísimes, y hai xeneraciones que pasen sin qu'esa coyuntura se vea, pero cuando se da, ehí influye por desgracia l’azar, que ye que les poques persones que tean nesi momentu designaes poles circunstancies politiques de la época, tengan la calidá política, humana, ética y moral pa saber tomar les decisiones acordies.

Y nosotros n’eso foi un estrepitosísimu fracasu nes dos o tres coyuntures medianamente importantes, y eso foi una desgracia.
Y foi una desgracia porque les decisiones d’aquel momentu influyeron posteriormente y dramáticamente pa munchos años pa dempués.

Hai dos decisiones básicamente, y falo sólo de política. Una d’elles foi la de Unidá Rexonalista. Disolvela, nun facer una continuidá y estructurala pa xestionar aquel movimientu y aquellos votos. Por unos y por otros. Ahí el MCA tuvo la so responsabilidá, y el PSP tamién, aunque´l PSP ya había arrenunciao antes.

Y la segunda coyuntura, obviamente foi la de la Coalición Asturiana.

Eses dos coyuntures foron claves, y nes dos falló l’elementu humanu estrepitosamente.

Un asistente
Bueno, el PSP o el MCA captaron munchu votu d’asturianistes y fue creándose un movimientu social importante, pero’l PCE y el PSOE inicialmente na transición xugaron un papel mui importante, y tamién políticamente marcó munchísimo’l movimientu obreru, que taba venceyáu a lo que ye’l PCE y el PSOE. Y eso ye lo que marcó la historia del nacionalismu asturianu. Hubo munchu asturianista que nun dio’l pasu hacia’l nacionalismu, y que votó’n clave de partíu estatal.

Patrick Zimmerman
El MCA foi parte d’Unidá Rexonalista, y foi quién pagó la mayoría de la cuenta de gastos de la campaña electoral pero tamién, al entamu d’Unidá Rexonalista, el PSP tamién foi parte y marchóse poco dempués. Pero sumando los famosos 12.000 votos de Unidá Rexonalista colos 50.000 del PSP, daríen más que un diputáu. Si hubiera habido una coyuntura ehí…

Xosé Lluis Carmona
Tamos falando de siete meses antes de les primeres elecciones democrátiques, el PSPA, que Pedro de Silva siempre decía con mui buen criteriu que yera una franquicia, yera la DSA, la Democracia Socialista Asturiana, yera un partíu eminentemente asturianu y asturianista trabayando con una marca que lu pudiera impulsar d’otra manera, caltuvo varies reuniones que al final cuayaron pa la creación de una candidatura d’Unidá Rexonalista, y que contaba col MCA, con un pequeñu grupu políticu al que-y daba amparu la Unión Sindical Obrera, además d’un montón d’independientes y xente de Conceyu Bable con otros pequeños movimientos.

Eso yera lo que taba preparáo como candidatura d’Unidá Rexonalista. El PSP, pa sacar aquello adelante puso siempre una premisa, que llueu se repetiría n’otres ocasiones, puesto que somos el grupu más fuerte, el más asimilable pola población, acuérdome de la expresión de quien lo dixo, “nun somos comunistones de pistola’l cintu”, que foi Manolo de la Cera, podemos reclamanos el derechu a encabezar eso. Y el candidatu tendría que ser quien el PSP decidiera.

Desde’l MCA y USO nun había muncha conformidá, pero yo creo que se hubiera superao esa reticencia, pero la cosa túmbase cuando dende Madrid, Raúl Morodo, que yera´l númberu dos con Tierno Galván, convenció al PSP d’Asturies de que contaben con encuestes que aseguraben que’l PSP, de dir sólu nes elecciones, tendría dos diputaos.

Nacho Llope
Ya empezaben a fracasar les encuestes d’aquella.

Xosé Lluis Carmona
Bueno, con aquello, los sectores menos proclives a aliase con comunistas, -tenéi en cuenta que veníemos del franquismu absolutu-, consiguieron que se tomare la decisión de dir nuna candidatura independiente que tuvo cuarenta y siete mil y picu votos, mientres que’l restu tuvo doce mil y picu votos, que sumáos yeren pa un diputáu.
Sumar ye facer política ficción, pero ye una especulación razonable. Y ellí habría nacío una cosa bien distinta.

Bien ye verdá que vistu’l fracasu del PSP, y vistu’l fracasu desde aquella época d’Unidá Rexonalista, hubo movimientos pa que Unidá Rexonalista continuara, pero nun cuayó, porque la xente enseguida se buscó la vida, y el PSP nun tuvo más remediu qu’integrase nel Partíu Socialista Obreru, dende equí hubo una serie de persones que taben dispuestes a crear con un sector del PCE d’aquella el Partíu Socialista d’Asturies, esa operación pasaba por una persona que n’aquel momentu tomó la decisión incorrecta, que nunca m’esplicaré, paso-y lo mesmo que a Melquiades Álvarez al principiu de la República, republicanu de tola vida y nel momentu clave échase p’atrás.
Pues n’aquel momentu esi PSA que podía haber sido’l biltu de munches coses, échase p’atrás porque por quien pasaba aquello, que yera Sánchez Vicente, diz que non.
Él reconoz qu’eso fue una confusión.

Patrick Zimmerman
Bueno,él n’aquel momentu tuvo la oportunidá de ser conseyeru de cultura col PSOE.

Nacho Llope
Non, foi director de la diputación encargándose del tema de cultura, pero non de toa la cultura, de paisaxes, de patrimoniu, arquoloxía y too eso.

Xelu Neira
En sin querer salir del tema, ¿podríais valorar hasta qué puntu eses decisiones, cambios, momentos, podemos tar sufríendoles agora proyectaes a treinta años? ¿Tanta importancia tuvieron aquellos momentos?¿Llevaron a muncha xente pa casa o colocaron a otra?

Xosé Lluis Carmona
Tovía se nota aquello, pero nun tuvo una especial importancia porque pese a ello'l movimientu asturianista, cultural, llingüísticu, políticu, etcétera, fue creciendo y creciendo hasta llegar a tener representación institucional. Y ahí volvió a fallar otra vez. Y ehí sí, esi fracasu, esi segundu fracasu fue la clave. A partir d’esi momentu, tolo que fue crecer y crecer, fue estancar y descender.
D’ehí salió xente que ya nun cree nello, que fue pa casa, xente que nin se mueve, y los años pasen.

Xelu Neira
¿Podéis ilustrar un pocu esi segundu fracasu?

Nacho Llope
Si, eso fue terrible, fue terrible por diferentes razones. Porque d’alguna manera, una vez firmáu l’acuerdu por parte de la UNA, mui xenerosu, dicho sea de pasu, los mesmos firmantes y tolos que tábemos ellí sabíemos qu’esi tipu diba facer lo que fizo.
Ye más, téngolo por casa, incluso ta escrito por xente de la organización, lo que diba facer el roxu casi cronolóxicamente. Hubo xente que lo vió, y sabiendo qu’eso diba a pasar, dimos una oportunidá un poco al destín.
Él desde’l principiu tenía na cabeza lo que fizo. Foi una sinvergonzonería desde’l puntu de vista políticu y esa sirvengonzonería tuvo un efeutu letal sobre’l nacionalismu políticu asturianu organizáu.

Y amás hai otra cosa, l’actitud sicológica de la xente que dio’l placet a algo nuevo. Nel panorama de partíos políticos de la dómina, ¿qué s’echaba de menos? Mas o menos lo mesmo que agora, un partíu políticu diferente, pero ya nun tanto, que tamién, nel aspeutu nacionalista, sinon nel de la ética, la moral y na forma d’intervenir públicamente. Porque una versión asturiana de más de lo mesmo nun tendría munchu sentíu.

Eso foi asina, foi asina. Y entos un montón de xente que yera tibiamente asturianista, que consideraba qu’Asturies necesitaba una visualización política, y puedo pone-y nomes y apellíos a toa esa suerte de persones, que por ciertu aportó la XNA a la UNA, nunca más volvieron a aparecer, ya non en política, sinon nos ámbitos culturales asturianistes,
Y agora hai algún que ta militando nel partíu de Rosa Díez, dicho sea de pasu.

El ver en qué quedó aquello, nun solo desmovilizó físicamente a la xente, sinon que baltó psicolóxicamente a toa una xeneración de militantes.

Un asistente
Cuando faláis d’Unidá Rexonalista, paez que-y tais atribuyendo una ideoloxía nacionalista, que nun me paez pa nada, yera una unión d’izquierdes.

Nacho Llope
Si pero yera un proto-asturianismu o un proto-nacionalismu. Y creo que ye lexítimo facelo tanto polos protagonistes como pol so allugamientu na sociedá.

Xosé Lluis Carmona
Yera la única candidatura que mencionaba Asturies y tenía Asturies nel logotipu.

Patrick Zimmerman
Inclusu por parte de xente de nun yera nacionalista pa nada, como Masip, reconocíen que un rexonalismu bastante fuerte lo tomaren como una táctica.

Un asistente
Por otra parte, falando de la UNA y el PAS, equí los contornos d’izquierdes apaecen como bastante desdibuxaos

Nacho Llope
Nun tanto, si vas al programa lliteral.

Otru asistente
Unidá Rexonalista Asturiana, si lo recuerdo, nun taba na izquierda, pa entendenos, la xente d’izquierdes nun votó a Unidá Rexonalista.

Xosé Lluis Carmona
Coalición Asturiana, ye verdá, puede tener el perfil de lo que ye la izquierda un tantu difusu, ye verdá, pero na mesma medida que lo puede tener tamién el BNG y Herri Batasuna d’aquella, que yeren agrupaciones de partíos, nunos casos, claramente de dereches y la extrema izquierda. Ye decir, ye una acción interclasista, lo que nun quier decir que sea de dereches.

Otru asistente
Bueno, la xente d’izquierdes taba mui marcada polos partíos del PCE y el PSOE, pero tamién había xente de dereches, como Inaciu Iglesias.

Patrick Zimmerman
Viendo los periódicos de la época, Coalición Asturiana fue uno de los pocos fenómenos en que una agrupación asturianista fue tomada más o menos en serio. Y eso fue un llogru bastante importante.

Un asistente
Pero nun creeis que d’haber evolucionáo nun hubiera habido un ciertu enfrentamientu entre seutores que podríen ser más d’izquierdes, con xente que ubicala na izquierda yera como de ciencia ficción.

Nacho Llope
El casu ye que’l conflictu nun estalló por ná ideolóxico. Oxalá se hubiese dáo, eso significaría que Coalición Asturiana consolidábase como alternativa política y que tenía la suficiente masa crítica como pa dar llugar a esi debate. El problema ye que nun dio tiempu, nun dio tiempu porque aquello implotó, nun por un problema políticu, sinon pola zafiedá personal d’un suxetu. Eso ye lo dramático del asuntu.

Otru asistente
Bueno, el xen del asturianismu, faciendo mecigaya entre rexonalismu y nacionalismu, diríase que tiende más a la izquierda, ye dicir, ¿pensais que dende la transición el movimimentu ta venceyáu más o menos a la izquierda?

Patrick Zimmerman
Sí, si lo ta, y esi ye un cálter marcable que lu diferencia de los demás del Estáu Español. Nos últimos 30 años nunca hubo un asturianismu fuerte de dereches, salvo delles persones, casos aislaos.

Xosé Lluis Carmona
Hai una cosa que me prestaría que tuviéremos en cuenta. Si ye verdá que’l PSPA yera un partíu bastante numerosu de xente mui comprometía con Asturies y asturianista, ¿qué fue d’ella?, ¿a onde fue?.

Yo creo que xugó un papel. Y una vez que’l PSPA s’integra dientro’l PSOE, el PSOE diseña tres grandes bloques d’especialización.

Una serie de xente que vien del PSOE más hestóricu dedícase a llevar el partíu, la FSA, el movimientu obreru, el sindicatu, la UGT, y aquellos que veníen del PSP, que se ocupen d’esto de la autonomía. Eso que nos cayó encima, con Pedro de Silva y demás, estes coses, que se dediquen a elles.

Y dedicáronse, solo que baxo la bota dura y potente de José Ángel Fernández Villa, que yera’l que al final alministraba y manexaba too aquello, colo cual fue de nuevo un asturianismu fustráu, fustráu dentro’l PSOE.

Patrick Zimmerman
Dellos marcharon, el bloque más asturianista marchó, Xuan Xosé, Chus Cañedo, Carlos Rubiera, incluso Pedro de Silva.

Xosé Lluis Carmona
Una bona parte del primer gobiernu de Pedro de Silva son militantes del PSP, nun sólo del PSP, sinon de Democracia Socialista Asturiana. Y nel segundu gobiernu tovía hai unos cuantos. Y llueu ya ye cuando too eso desaparez, incluso Pedro de Silva marcha, desesperáu.

Mira que-y dimos, llamámoslu de too, pero nunca hubo un Presidente del Principáu que tuviera una idea d’Asturies tan clara y tan perfilada como entidá hestórica, como suxetu políticu. Fue un prisioneru de la so organización, nin más nin menos.

Xelu Neira
Respeutu a Villa y el SOMA que apuntásteis antes, ¿cual fue’l so papel na transición?

Nacho Llope
Villa ye’l gran hermanu d’Asturies na dómina aquella.

Xosé Lluis Carmona
Y algo más allá. Villa ye’l home del guerrismu n’Asturies, ye l’home de la izquierda ortodoxa del Partíu Socialista n’Asturies. Esa izquierda ortodoxa siempre tuvo una idea que ye que hai una serie de problemes nacionales que ya se nos fueren de les manes y nun hai más remediu que aguantalos y negociar, pero nun se nos va ún más.
Entós nel tema d’Asturies, ehí nun puede nacer otru problema como el de Galicia, el d’Euskadi o el de Cataluña de ningún mou, y hai que combatilo.
Yo nun digo que Villa se dedicara tolos díes, de la que se llevantaba, a combatir l’asturiano, pero a nada que se-y pusiera esi problema encima la mesa, teníalo mui claro.

Nacho Llope
Ya incrustóse nel ADN de la Federación Socialista Asturiana hasta güei. Ye constitutivu del so núcleu duru ideolóxicu.
En Les Noticies, na so primera época, publicóse en dos o tres entregues, nel ochentaimunchos o noventaypocos, nun m’alcuerdo bien, una filtración d'unos documentos de trabayu de la FSA, del núcleu de Xixón, que fizo Jorge Fernández León y l’entos presidente del Atenéu de la Calzada.

Xosé Lluis Carmona
Que por ciertu, tuvo afiliau a la UNA. ¿qué coses, non?

Nacho Llope
Pues bien, el resumen d’aquello yera que la incorporación a la modernidá d’Asturies pasaba pola terminación de les señes d’identidá que la llastraben col sieglu XIX, y d’ehí la doctrina del escesu identitariu de Javier Fernández.
¿Qué ye un escesu identitariu?. La mera existencia d’Asturies ye un escesu identitariu.
Y eso nun ye negociable. Lo único que puede doblar a la FSA ye una coyuntura electoral pola que tengan que negociar a la fuerza. Nun hai otra.

Patrick Zimmerman
Una cosa que ye pa notase na transición con Unidá Rexonalista o del CNA, ye que, por exemplu’l BNG fala en galego sobre coses como la economía o los campesinos, pero quizás un de los errores tácticos del asturianismu, que venía probablemente de la so procedencia universitaria, fue que la llingua fue central, lo que ye entendible, claro, pero a veces foi una obsesión.

La llingüa ye bastante importante, claro, pero pa normalizala, hai que usála normalmente, falando d’otres coses incluso.
Quizás eso venía del sector de la Academia de la Llingüa, que siempre falen de la llingüa, que ye lo que conocen ellos, son toos llingüistes menos ún o dos, pero ye bastante evidente que políticamente la xente nun vota pola llingüa sólo, aunque tien afección a la llingüa, tien simpatía por ella.

Y tamién, la llingüa nos años setenta y na transición, taba vinculada a otros conceutos como democracia, autonomía, modernismu o llibertá. Había una vinculación bastante fuerte entre estos conceutos, igual que pasaba en Galicia, en Cataluña o el Pais Vascu.

Falar pola llingüa asturiana foi falar pola democracia. Pero ya nos años ochenta nun había esa vinculación tan fuerte, y eso foi por causa de los políticos ya asentáos, que ficieron por quitar esa vinculación pa evitar el nacionalismu.

Nacho Llope
Eso definíalo’l roxu mui bien con aquello de que´l bable nun da votos.

Xosé Lluis Carmona
Otru que xugó un papel mui importante, mui importante na transición, nun sabemos hasta qué puntu, foi el Partíu Comunista d’España, que yera, hasta que hubo elecciones y se vio la fuerza de ca ún, el partíu hexemónicu de la izquierda n’España. Esi PCE, que tien una capacidá de convicción, una credibilidá y una lexitimación ante tola izquierda militante y simpatizante por haber entregáo munchu dolor, muncha sangre y munchu sufrimientu durante años cuando los demás nun apaecíen en dengún llau, nunca esi partíu dexó’l centralismu y nunca apostó por ello.
Habíen de pasar unos cuantos años pa que’l PCE cambie.

Un asistente
Nun suelo asistir a esti tipu de llamentos colectivos de, en qué nos equivocamos, qué fue lo que falló, pero conozco un poco lo de los peceros o filopeceros, y tienen un mosqueo ya nun tanto porque nun ganaron les elecciones sinon porque’l PSOE los triplicó’n votos.

Y rápidamente comiencen les cascades d’acusaciones personales, de señalar a los traidores, d’obsesionase con microdetalles como el color rosa de los carteles, y les razones poles que fracasa una fuerza política creo que son mas profundes que porque Masip era un cabrón o que Carrillo era un traidor.

Si queremos distancianos un poco y facer un análisis seriu, lo que habría que preguntase yo creo que ye, ¿qué razón existía pa que´l PCE tuviese que ganar les elecciones o tener munchos más votos?, y yo creo que vosotros tendríais que preguntavos algo así, ¿existió alguna razón pa que l’asturianismu tuviese que ser una fuerza importante na transición?

Otru asistente
Yo creo que había una razón mui poderosa que ye que los asturianistes votaron izquierdes. Eso que falábais enantes de que’l nacionalismu asturianu ye de izquierdes, ahí, na transición, los asturianistes nun yeren tovía nacionalistes, yeren xente que votaba izquierdes y eso marcó munches coses pal futuru.

Patrick Zimmerman
Y el PSOE tenía la idea esplícita d’ocupar tol espaciu a la izquierda de la UCD, polo que munches de les maniobres que se tienen visto como antiasturianistes, fueron, probablemente, más bien anticomunistes.

Xosé Lluis Carmona
Yendo al primer plantiamientu, ye verdá que’l asturianismu somos un movimientu llorón, igual que’l primer comunismu español ye un movimientu llorón.

Los dos son movimientos que lloren una pérdida. El partíu comunista de los años setenta pierde y nun ye capaz de comprender que siendo l’unicu movimientu organizáu, teniendo a los meyores, habiendo entregáo sangre sudor y llárimes, eso nun se traduzca’n votos y pierda la so hexemonia del antifranquismu frente a un partíu que nun existía en ningún sitiu, sólo unes sigles y munchu dineru.

Pero al movimientu asturianista, naquel momentu ye imposible que-y pueda pasar eso porque yera una fuerza absolutamente imberbe, pero tien el so momentu de dolor nel añu noventa y un, cuando después de haber trabayáo y creao de la nada una alternativa, de poder ser receptivu a los medios de comunicación y llegar a parte de la sociedá, échalo too pola borda pol caprichu d’una persona.

Nacho Llope
Eso ye lo dramático, y hai otra razón. No tocántenes al PCE, el franquismu o el tardofranquismu necesitaba un interlocutor na izquierda, y escoyó al interlocutor que más-y convenía, y el que más-y convenía nun yera’l PCE, sinon que yera dalgo socialdemócrata que s’adaptaba pertectamente al modelu de democracia occidental, y que además tenía a Alemania detrás dando pasta y a sectores del partíu demócrata d’Estaos Xuníos.

O seya l’interlocutor válidu del momentu yera Felipe González. De fechu la campaña electoral del 79 fízola la televisión española franquista y la prensa franquista y gratis. Y eso nun ye que pese, eso determina.
Daime a mi agora una televisión y un periódicu y tenemos un diputáu nacionalista.

Xelu Neira
Bueno, ya va siendo la hora, creo que fueron saliendo equí bastantes coses y conclusiones, pero, buscando que puedan ser aplicables agora, lo que propondría ye un últimu turnu de participación, y quería espuntar dos o tres opiniones por si consideráis que pueda ser inteserante tocáles.

Una ta en relación colos errores y les males decisiones tomáes n’aquellos momentos y que motivaron a muncha xente a dexálo y esapaecer. Y la pregunta ye ¿esa xente será recuperable?, ¿habría forma de que volvieren a participar?

La segunda vien xunida a esta, ¿hai posibilidá de que surda un movimientu nacionalista a día de güei, visto lo visto?

Y la tercera cuestión que tamién me prestaba que se comentase ta n’invertir un poco la posición. Tamos falando de que si nun llega’l mensaxe, de que si con un periódicu íbamos a sacar daqué, y entos, la pregunta al revés ye ¿y por qué nun hai grupos de ganaderos por Asturies, o grupos de montañeros polo asturiano? ¿por qué nun hai un movimientu del pueblu, de grupos normales de cai, d’asociaciones de vecinos, que tengan un calter nacionalista y que seríen los que daríen cuerpu a un movimientu nacionalista potente?

Nacho Llope
Respondiendo a la primera, recuperables hailos que non, de dempués del 91 y la coyuntura aquella ye imposible, porque rompieron sicolóxicamente la so vinculación con una historia asina y además desde’l puntu de vista individual y personal.

Respeuto a un movimientu nacionaliegu, home si, hailu, pequeñu pero hailu, de fechu continúa, y tien una incidencia social y electoral mayor inclusu de la que supón la so materia militante.

Y no tocántenes al por qué, hai un problema estructural n’Asturies, que ye’l demográficu. Normalmente los movimientos que impugnen l’estáu actual de coses, onde medren ye n’una franxa d’edá que ye na que se va formando la conciencia y la forma de mirar el mundu.

Esa franxa d’edá n’Asturies nun existe prácticamente, o existe fuera d’Asturies. Ye decir, la franxa d’edá que sería la base social d’un movimientu de tipu nacionalista o asturianista na pirámide poblacional tien dos bocaos tanto n’homes como en muyeres, y esos dos bocaos determinen fatalmente la masa crítica que un movimientu asina pué llegar a tener, y eso ye dalgo que vien determinao pola propia estructura sociodemográfica d’Asturies y nun ye modificable pola actividá política nacionalista.

Ye un fechu dau onde lo único que pués facer ye adaptate ya intentar sacá-y partíu, pero eso ye una dificultá estructural terrible.

Nun hai mozos, que son precísamente la base social de un movimientu asina de mano. Y a partir d’ehí puedes llegar a otros sectores sociales, pero ye imposible plantear que un ganaderu de cincuenta y tantos años modifique la so forma de ver el mundu a través de lo asturiano. Podría ser a través del nietu, una vez que’l buelu vea cómo’l nietu actúa, puede camudar la so forma de ver el mundu, pero’l buelu solu nun ye socialmente posible, y non sólo n’Asturies, sinon en ningún llugar del mundu.

Polo tanto, ¿por qué vamos pedir que pasen n’Asturies coses que nun puen pasar pola propia naturaleza de la situación? Nun ye posible. Y eso ye lo que nos condena’n parte a la marxinalidá social.

Patrick Zimmerman
Otru problema ye que tenemos equí los mesmos dirixentes de los años setenta. Tolos entonces fueren mui mozos. Eso ye causa demográfica tamién.

Nacho Llope
Si, si, decialo al principiu cuando comentaba qu’equí la transición nun acabó. Sigue´l mesmu réxime. El réxime que s’implantó na preautonomía ye’l vixente a día de güei.

Patrick Zimmerman
L’únicu que se fue foi Rafael Fernández, claro, la bioloxía a veces ye inesorable.
Xosé Lluis Carmona
Pola mio parte sólo una conclusión, porque les más negatives guárdomeles, aunque nun me lo toméis demasiao’n serio.

Va dos o tres años, ún paseaba por Xixón, polos patios de los colexos, polos parques, y vía munchos guah.es xugango al fútbol con camisetes del Madrí o del Barcelona. Llueu el Sporting subió a primera división y agora los mesmos güah.es ya tienen les camisetes roxiblanques, y nel Molinón, en vez de haber doce mil, hai ventitres mil persones.

La xente va col ganador. Si'l movimientu asturianista ye capaz de colocase n’algún sitiu, el que coló tornará, y el que nun tuvo, tará.

Un asistente
Bueno, nun ye por fundir la to argumentación, pero yo soi carbayón y ellí los güah.es van cola camisera del Uviéu. L'Uviéu ye un ganador.

Tertulia: ¿Qué facer cola prostitución?. Encruciyaes y propuestes

El pasáu xueves 12 de marzu de 2009 la tertulia cultural Pachín de Melás axuntóse como d’avezu pa falar sobre’l tema

¿QUÉ FACER COLA PROSTITUCIÓN?. ENCRUCIYAES Y PROPUESTES

a la que taben invitaes

Ana Luisa Ordóñez, autora del llibru Feminismu y Prostitución. Fundamentos del debate actual en España, Ed. Trabe. 2007

Marisa Cuesta vocera de la Estaya d’Igualdá d’Unidá Nacionalista Asturiana y

Yolanda Huergo, abogada feminista.

Finalmente nun pudimos cuntar cola presencia de Marisa Cuesta por imposibilidá imprevista d’última hora pero fue sustituida por dos tertulianes qu’asistieron a la xipla, Sonia ya Iris.


Ana Luisa
Voi a cuntavos un poco cómo m’acerqué yo a esti tema. Empezó cuando a través de la Escuela de Trabayu Social, tuve la oportunidá de participar con un proyeutu que trabaya con muyeres rellacionaes con contestos de prostitución. Esto cambióme tola visión que tenía sobre esti asuntu.
Bueno, hai diez años tampoco se falaba muncho d’estes cuestiones, y cuando empecé a reunime con un grupu formáu poles profesionales, por profesores de la Escuela y por muyeres que taben siendo apoyaes por SICAR, que yeren como diez muyeres o asina, lo que m’encontré rompióme un poco los estereotipos que tenía previamente.

La imaxen que tenía de la prostitución taba rellacionada con imáxenes de películes y la lliteratura. Mui relacionao cola violencia, con situaciones siniestres, con muyeres diferentes al restu, y alcuérdome que na primer reunión, vi muyeres de lo más variaes, y les sos histories tamién yeren distintes. Había xente que viviera situaciones de trata claramente, mui chungues, y otres que non, que teníen un proyeutu mui claru, de cuanto diben a tar trabayando na prostitución y pa qué lo queríen. Lo que teníen en común yera que yeren toes muyeres inmigrantes y buscábense la vida equí, entraren ensin papeles o con un visáu de turista que dempués caducó, y en xeneral yeren muyeres mui echaes p’alantre, pero d’edades y procedencia xeográfica variaes. Toes llatinoamericanes eso sí, el perfil migratoriu más común de les muyeres que pasen por la entidá. Además, suelen llegar les muyeres que tán en peor situación. A les que-yos va meyor puen nun pasar por ninguna.

Y a partir d’ehí empecé a interesame y a lleer lo que se dicía dende’l feminismu, y lo primero que t’encuentres ye’l debate xurídicu.
Hai básicamente tres postures que son les qu’agora mesmo se discuten. La primer d’elles ye la más abolicionista, que sería penalizar a los clientes, que ye’l modelu suecu y de Noruega. Llueu ta la reglamentación, que intenta acotar espacios y locales pero ensin derechos llaborales. Equí tán por exemplu les multes, que conocereis por Cataluña, que multen a los clientes y a les prostitutes pero sólo de calle. Y llueu taría la postura de dar derechos llaborales.

Con too, cuando vas afondando nel tema, decáteste de que, penriba d’estes distinciones, sobre too dende’l feminismu, que ta teniendo muncha fuerza como interlocutor nesti debate, ves qu’hai muncho de fondu, que realmente lo que se ta discutiendo tamién son maneres d’entender lo que ye la subordinación de les muyeres, la sexualidá masculina y femenina, les migraciones, cómo entender el tema de la trata, y claro, ahí ye onde empieza a complicase la cosa porque pues sentir falar d’esplotación pero con sentíos diferentes, o manexar cifres que son totalmente distintes, hai un baille de númberos que nun parecen corresponder cola realidá.

Nesti tema suel dicise que nun se tienen les idees clases pero llueu siempre hai una posición que ye bastante visceral col asuntu.

Sonia
Si, tol mundu tien prexuicios

Yolanda
Yo creo qu’hai que regular, dar derechos llaborales.

Sonia
El mio puntu de vista aprosímase más al modelu suecu qu’a cualquier otru, eso nun quier dicir que s’escluya la posibilidá de que la xente tenga derechos llaborales.
Nun sé a nivel xurídicu cómo puede facese, pero tien d’haber modelos. Igual qu’hai quien pue facese autónomu, si alguien quier exercer la prostitución, pue constituíse como la so propia empresa, eso escluiría que determinaos sátrapas se beneficiaren d’una regularización xeneralizada, que ye un riesgu que se puede correr. Ye dicir, les terceres partes, que les hai, constituiríense como empresarios llegales, y eso, yo nun sé hasta que puntu repercutiría nun beneficiu de les trabayadores.

Yolanda
Bueno, agora ya son empresarios llegales, porque agora la prostitución exércese abiertamente nos clubs, tán abiertos pa eso y tol mundu lo sabe.

Sonia
Sí pero non, depende de cómo s’interprete la llei, hai un colectivu qu’exerce la prostitución de calle, y mui poques trabayen pa elles mesmes. Y esa magaya ta explotándoles clarísimamente. Y si llegalices esa situación, llegalíceslos a ellos directamente. Eso ye un problema dende’l mio puntu de vista. Yo intentaría atayar dende la sanción al cliente. Asina evites munchos problemas de mano. Y llueu sí, tener la opción de llegalización como empresa privada. Que nun sea dalgo indigno. Ser autónoma con un réximen específicu, igual qu’hai un réximen especial pa les empleaes del hogar.

Eso podría valorase. A lo meyor tengo prexuicios, pero nun me gustaría que se regulara too, tengo una percepción mui negativa de la prostitición pola esplotación que conlleva.

Yolanda
Ya Sonia, pero yo nun falo de llegalizar que les esploten, falo de dignificar lo que faen elles.

Sonia
Ya, ye que yo eso nun lo considero indigno, sinón que lo faen indigno los ‘xefes’, por dicilo asina y los clientes, xeneralmente, salvo unos niveles mui altos. Tamién ye verdá que toi centrándome na prostitución de más baxu nivel. La prostitución d’altu standing nun tien esi problema, nun se ven esplotaes por naide, o en mui pocos casos. Elles cobren una pasta y autoxestiónense na mayor parte de los casos.

Ana Luisa
Equí hai un problema. Intentar casar elementos de les dos partes ye mui difícil porque son incompatibles. Partes de supuestos mui diferentes. Por exemplu, partiendo del modelu suecu, voi contra clientes y contra prosenetes, anque habría que ver cómo definimos prosenetes, pero claro, eso repercute a la escontra del negociu, polo que a la vez nun puedes llegalizar, y, de fechu, les sueques nun reconocen derechos llaborales, cómo vas reconocer derechos a un negociu pol que llueu multen. Nun tien xacíu.

Pero llueu tamién sorrayes el procedimientu pa dar derechos llaborales, que ye importante. Nun tolos modelos son lo mesmo. Nun ye lo mesmo lo que pide ANELA que ye un colectivu d’empresarios que lo que pide HETAIRA que ye un colectivu de defensa de los derechos de les trabayadores.
Entós, que se trabaye de forma autónoma o en cooperatives ye un tema mui interesante. Pero lo que plantees del tema de la calle, pola mio percepción, nun ye del todo exacto. Nun creo que se pueda dicir qu’hai xente que se lucra más de les que faen la calle que otres. Sí qu’hai casos, el chulu de tola vida, pue haber redes criminales, pero hai otres munches muyeres que tan na calle y son independientes y precisamente tán na calle por eso, porque ye la manera de que nun rindan cuentes a naide. Tamién hai muyeres que prefieren los clubs, que-yos parecen más seguros. Si partes d’una postura mas abolicionista vas a bloque, toos son prosenetes, toes tienen chulu, si vas más hacia pro-derechos, empieces a facer matizaciones.

Por exemplu en Francia teníen problemas porque hubo casos en que se reconocía como prosenetismu a les compañeres que-yos alquilaben el pisu a les otres. Porque la llei diz que ye proseneta el que se lucre de la esplotación sexual d’una tercera persona. Pero qué entendemos por esplotación sexual, tola prostitución o esplotar ye cuando tienes unes condiciones abusives, hai coacción…, vuelve a ser too dependiendo de cómo lo analicemos.

Si toles persones que se lucren d’elles, entendío como que ganen indirectamente perres de la so actividá, fueren prosenetes, entós nun van poder exercer, porque siempre habrá xente que-yos alquile los pisos, incluso como se vió n’Italia, de novios que vivíen d’elles porque taben nel paru nesi momentu y que tamién los empapelaron, o el serviciu domésticu que teníen pa trabayar pa elles, hasta los tasistes podemos considerar que tamién se lucren…, claro realmente son munches les terceres persones que indirectamente ganen perres d’esti negociu, pero ye que la industria del sexu ye mui amplia.

Iris
Esti ye un tema que desconozo, y prestaríame, tú que lo conoces más, que nos contases más coses d’elles, ¿qué piensen?, ¿cómo lo ven?.

Ana Luisa
Bueno, si quereis conocer d’investigación de campu podeis falar con Maria Jesús Ollero, que fizo l’estudiu sobre prostitución n’Asturies, un estudiu encargáu desde’l gobiernu del Principáu pero que nun llegó a publicase. Ella recorrió clubs y pisos. Y sacó conclusiones como que los casos de trata nun son lo más frecuente. Claro que cuando vas a entrevistar entres nos clubs y pisos que te dexen, pero hai otros nos que nun pues entrar, y ehí pue ser onde tan peor les coses. Sí, sábese que hai casos de trata que lleguen a les entidaes asistenciales y d’apoyu, a veces a través de la policía, incluso a veces, gracies a los propios clientes.

Sonia
El que te recibe ye porque quier recibite, pero si nun quies que nadie s’entere de lo que faes, en cualquier cosa, cierres.

Ana Luisa
El tema ye cuando se toma la prostitución como si fuera l’esponente de la mayor opresión de les muyeres. Hai que ver qué implica eso, porque implica a un feminismu d’un tipu determináu. Por exemplu, dientro del plan abolicionista lo siguiente sería censurar la pornografía.
Nun ye sólo que nun-yos guste’l sexo de pagu, sinón cómo ta repartíu por xéneru, que los clientes sean cuasi siempre homes y sean les muyeres les que ofrezan servicios sexuales.
Prostitución pa muyeres nun ye mui frecuente, pero haila. Que la prostitución nun sea un tema desigual ¿implica que desapaeza? ¿por qué nun se concibe que la muyer puea consumir tamién? Nel fondu del debate ta’l tema de la sexualidá masculina y femenina y cómo tienen qu’entendese.

Yolanda
Ye una rellación de poder ente’l que paga, y dame igual que sea home o muyer. Yo Quiero esto y esto y esto. A mi cuéstame entendelo como una pura rellación de serviciu, será una cuestión d’educación o que tengo munchos prexuicios, pero equí veo unos condicionantes sociales mui fuertes.

Ana Luisa
Ta claro que’l dineru da privilexos, pero les trabayadores del sexu tamién puen tener d’algún poder na relación con el cliente. En munchos casos puen negociar: el preciu, los tiempos, les practiques sexuales que se van a facer, les condiciones, usar preservativu, por exemplu. Lo interesante ye que les condiciones de trabayu permitan que les muyeres ten lo más empoderaes posibles nesa relación.

Un asistente
Los paisanos compren sexu, y, sí, usen a la muyer. Pero en sexu y en too. Y esa actitú machista tien que dir variando cola educación. Pero al fin y al cabu, venceyar esto a facer un cambiu total y absolutu na percepción énte la sexualidá y la dominación ente home y muyer ye dalgo que tien de ser l’oxetivu final.
Pero agora mesmo, a lo que tienes qu’enfrentate ye que se necesita sacar a la lluz lo que sabemos que tenemos realmente. Eso nun quier dicir que tea bien, habrá munchos casos, supongo en que munches muyeres tán prostituyéndose porque nun hai otra. Hai que comer y lo único que puedo vender ye esto. Pero yá sería’l siguiente pasu, el primeru sería sacar a la lluz una estructura de negociu de miles de millones. Y llueu actuar sobre trata de blanques o lo que seya. Pero ¿venceyar directamente la trata de blanques cola prostitución? La trata de blanques ye un delitu, pero ¿ye delitu vender sexu?

Ana Luisa
Bueno, la trata de persones, qu’eso de blanques... Equí ta tol mundu d’alcuerdu, el tema ye cómo entender la trata. Porque seguramente que sentisteis dalguna vez eso de que’l 90% de les muyeres de la prostitución son víctimes de trata. Realmente esa cifra nun vien en nengún llau. Ye una cifra ideolóxica. Nun hai un estudiu sobre esa cifra n’España.
Lo que sí se sabe ye que ’l 90% de lo que se detecta na mayor parte d’estudios implica a muyeres inmigrantes. Entos ¿qué pasa? Que cuando se definió’l términu de trata, nel protocolu de Palermo, nes Naciones Xuníes yá hubo debate ente abolicionistes y pro-derechos. Y ¿cómo se definió? Ye’l treslláu d’una persona d’un pais a otru pa esplotala llaboralmente, o esplotación sexual o esclavitú, y ¿en qué condiciones? Pues qu’haya coacción, amenaza, engañu o usu de la fuerza…abusu de una situación de vulnerabilidá.
Esta cuña de la vulnerabilidá metiéronla les abolicionistes, planteando que si ta presente nun ye necesario tener en cuenta’l consentimientu. Y entós, claro, la propia definición ye elástica, ambigua. Ye mui fácil tresponer, claro, si’l 90% son inmigrantes, y la mayoría de les inmigrantes tienen necesidaes económiques, la pobreza ye vulnerabilidá, entós, el 90% son víctimes de trata.

Esto llévanos al llímite de considerar que toa inmigración llaboral o económica ye trata. Y tendríes qu’aplicalo al trabayu domésticu, al de la güerta, y a los paisanos, que tamién son vulnerables. Porque la definición de Palermo ye pa homes y pa muyeres. Too ye trata.

Ye verdá que tolo que tien que ver cola prostitución pa esti feminismu abolicionista ye el summun. Ye la máxima expresión de la violencia de xéneru, de la desigualá... Como si la prostitución fuera una opresión muncho mayor qu’otres.

Yolanda
Con too, la peor de les opciones posibles ¿nun ye que temos nel llimbu que tamos agora? Agora tenemos una posición nun illegal, sinón alegal. Y nun asumilo ye una postura mui hipócrita. Elles tán ehí y tán sufriendo muncho. Nun tienen seguridá social, nun tienen derechu a baxa, nun pueden pidir un créditu al bancu…Y esa situación por negala nun va desapaecer.

Un asistente
Bueno sí, nel supuestu de llegalizar la prostitución, ¿qué condiciones plantea’l movimientu llegalista?

Ana Luisa
Si vos metéis a rebuscar na páxina web de HETAIRA podéis ver los comunicaos reivindicativos que saquen, coles medíes que proponen, recoyendo les voces de les propies trabayadores del sexu lligaes a HETARIA. Básicamente piden derechos llaborales, tanto como autónomes como per cuenta ayena, y que-yos permitan siguir trabayando na calle, seguridá y unes condiciones sanitaries mínimes, poder facelo en sitios que nun molesten al vecindariu, en sitios negociaos, intentar que nun se vea la prostitición como dalgo estigmatizao. Tamién hay algunes líderes, como Justin Abellán, que taben intentando impulsar la creación de un sindicatu. Además, podéis encontrar detalláu na prensa’l proyeutu de regulación qu’intentaron puxar va unos años en Cataluña dende la Conseyería de Montserrat Tura,

Iris
Yo plantéome, si una muyer se fai autónoma, entamando a cotizar, el día de mañana si se pon mala puede coyer una baxa o puede xubilase, pero ye qu’aparte, esa persona ta cotizando, y al restu la xente eso ta beneficiándonos pues d’otra manera ta xenerando una especie d’economía negra que nos perxudicaba a toos. Son unos cientos de millones, son unes perres que tán nel llimbu y si ta cotizando, supón-y un beneficiu social a ella que repercute tamién nel restu de la sociedá.

Ana Luisa
Agora los clubs y los negocios puen campar a les sos anches, aunque tamién ye verdá que cada dos por tres la policía tá nos llocales, xeneralmente pa facer redaes d’estranxería. Tamién s’apliquen lleis contra la trata y por delitos contra los trabayadores, pero a la vez, como nun se reconocen derechos llaborales y la llei d’estranxería ta ahí, les muyeres que anden sin papeles nun quieren saber na de la policía, porque tienen mieu a que les echen del país. Hai un poco de marabayu llegal entre les lleis, les sentencies que s’apliquen, y además tan los reglamentos autonómicos y llocales.

Yolanda
Y la postura feminista abolicionista, ¿de verdá piensa que prohibiéndolo s’acaba cola prostitución?.

Ana Luisa
Ye que aunque nun acabe, lo importante pa elles ye nun aceptala. Pensai un pocu nel feminismu institucional, que ye’l qu’agora ta marcando la llinia política a siguir nel gobiernu. Tien la llucha contra la violencia de xéneru como obxetivo prioritariu, y pon munchu pesu’n medíes llegales. Per otru llau’l feminismu institucional que tenemos equí ye illustráu, nel sentíu de que usa una categoría de muyer unitaria. Plantéase eliminar la desigualdá de la muyer, entendiendo que toles muyeres tienen los mesmos intereses. Entós, si desde’l feminismu institucional s’adopta’l discursu abolicionista, que parte de que tola prostitución ye violencia y desigualdá, paez-yos que regular la prostitución fomentaría eses dos coses. A veces esplíquenlo diciendo que tampoco s’acaba colos robos, y sin embargu, hai lleis en contra.

El problema ye que mientres tantu, hai muyeres que siguen sin derechos... Les muyeres somos diverses, y hai qu’empezar a ver les diferentes formes d’opresión que nos afecten y cómo puen facelo de forma distinta, nun ye sólo’l xéneru, ye la etnia, ye la clase social. Por exemplu, paez que la solución pa la conciliación de la vida llaboral y familiar, ye que’l trabayu domésticu y de cuidau se pague a otres muyeres, que por cierto, son tamién inmigrantes en gran númeru, y tamién sufren esplotaciones, abusos y trata. Pero eso nun llama tanto la atención. Hai que preguntase por qué.

Lo que piden les muyeres en situación irregular son papeles, ye la so prioridá. Nun s’identifiquen cola prostitución tanto como con ser inmigrantes. Lo otro ye la forma de ganase la vida, y gracies que la tienen, porque si non nun diben poder tar equí.


Ana Luisa
Desde algunes corrientes del feminismu lo que se propón ye facer aliances con eses muyeres que normalmente nun tienen voz política y que tán más estigmatizáes.
Vamos tener en cuenta el puntu de vista d’elles.
Lo que plantea’l feminismu pro-derechos ye qu’intercambiar sexu por perres o, en xeneral, intercambiar sexu por bienes materiales nun ye dalgo esclusivo de la prostitución, sinón que ye un intercambiu que se da tamién n’otres rellaciones como’l noviazgu, el matrimoniu tradicional… Nel sieglu XIX hai tou un dispositivu moral, sanitariu y xurídicu que-y da forma a eso y da llugar a la prostitución que conocemos güei día.
Tanto’l matrimoniu como la prostitución puen analizase como instituciones patriarcales, pero sólo ta mal vista la segunda. Esti estigma ye tamién una forma de controlar a les muyeres. Lo de la “puta” ye dalgo que nos pue caer a cualquiera de nosotres cuando nos salimos del tiestu, de lo que se espera de les moces “decentes”.
Entós cabe la posibilidá de facer aliances pa poder desestigmatizar, pa que nun haya divisiones entre muyeres buenes y males. Tamién ye una manera d’opresión de la muyer que nun podamos facer colos cuerpos y la sexualidad lo que queramos, incluso intercambiala por dinero buscando, nun la gratificación sexual en sí, sinon una gratificación monetaria.

Iris
Lo ideal sería que caún pudiera tener una vida sexual plena.
Pero la prostitución esiste y yá qu’esiste, vamos intentar reguralizalo y non condenar a eses muyeres al obstracismu.

Ana Luisa
Y ye esa la palabra, muy bien escogía. Por exemplu lo que-y pasó en Galicia a Valeri Tasso, qu’escribió Diariu d’una ninfómana, una escritora que tuvo exerciendo la prostitución de luxu varios meses y llueu contó les so correríes sexuales nun llibru, escribió agora otru llibru que se llama El manual del antisexu, sola sexualidá’n xeneral. Pues invitáronla a unes xornaes sobre la sexualidá de los xóvenes en Vigo, onde diba a falar d’esti últimu llibru, pero una de les asociaciones abolicionista de Galicia denunció a ll Dirección Xeral de Xuventude por organizalo, argumentando que taba faciendo apoloxía de la prostitución. Denunciaronlo sólo porque diba ella, porque yera un mal modelu pa los xóvenes, porque mostraba la prostitución como una salida.

Sonia
Eso ye violar el drechu a la espresión. Ye dalgo mui heavy.

Iris
Que sean les propies muyeres les que condenen eso ye’l colmo.


Ana Luisa
Los modelos de regulación llaboral n’Holanda, n’Alemaña, Nueva Zelanda, Australia tampoco son la panacéa porque obviamente nun se resuelven toles inxusticies sociales regulando la prostitución. Pa eso faen falta munchos otros cambios. Pero sí se puen mejorar les condiciones de vida de algunes muyeres, que nun ye poco.

Iris
Yo creo que la desigualá por supuestu qu’esiste, pero esiste en munchos ámbitos. Y l’home que se prostituye, anque sea nun porcentaxe menor, ¿a esi nun-y afecta?, ¿nun ta subordináu o alienáu?

Ana Luisa
La prostitución masculina ta muncho menos teorizá, eso debería danos tamién pa pensar... L’análisis de la subordinación tiénenlu tanto les feministes pro-derechos como les abolicionistes, lo que pasa ye que pal abolicionismu la prostitución ye la másima subordinación y por tanto hai qu’erradicalo, mientres que a otros ámbitos onde tamién hai subordinación, nun s’aplica el mesmu tratamientu: el matrimoniu o’l trabayu domésticu.
Pal feminismu pro-derechos, tratar a la prostitución como algo diferente de otres instituciones sociales, ye lo sospechoso. En tou casu, pue dase tamién subordinación pero nun más que n’otros ámbitos. Igual que meyoraron les condiciones de la muyer nel matrimoniu, puen meyorase na prostitución.

Iris
Y respeuto a los anuncios publicitarios de prostitución nos periódicos. Ye un tema tamién pa debatir. Eso yo nun lo veo tan claro. Nun se revisa que ye lo que hai detrás d’esos anuncios. Si realmente hai una persona llibre que ta ejerciendo.

Ana Luisa
Sobre esi tema, puedo dicite que los anuncios tamién los usen muyeres y homes que trabayen pola su cuenta. El tema ta en que si interesa que dependan lo menos posible de terceres persones, pero quítes-yos la calle, que ye una manera de poder trabayar pela so cuenta con facilidá y quites-yos los anuncios de prensa… Con un móvil y un anunciu de prensa yá pues montar un negociu, sin tener que pasar por un club.


Más información sobre’l tema:

• El trabajo sexual en la mira. Polémicas y estereotipos. Dolores Juliano.
Cadernos Pagu. versionPrint ISSN 0104-8333 Cad. Pagu no.25 Campinas July/Dec. 2005
• Prostitutas con licencia; clientes clandestinos. María R. Sahuquillo www.elpais.com. Febrero de 2009
• Por un análisis feminista sobre la prostitución.
Rosario Carracedo Bullido. Portavoz de la Plataforma Estatal de Organizaciones de Mujeres por la abolición de la Prostitución. Junio de 2005.
En Mujeres en la periferia : algunos debates sobre género y exclusión social / coord. por Teresa Susinos Rada, Adelina Calvo Salvador, Marta García Lastra, 2006, ISBN 84-7426-886-9, pags. 57-74
• Comunicado de la Plataforma Estatal por los Derechos en el Trabajo Sexual
En gloobal net y COGAM

Tertulia: Normalización de la Llingua Asturiana

Resumen de la tertulia del xueves 26 de febreru de 2009

NORMALIZACIÓN DE LA LLINGUA ASTURIANA

Cola participación de

· Ramón d'Andrés

· David Guardado

· Mónica R. Riesgo

Presentó y moderó
Pablo R. Alonso

Pablo R. Alonso
Bueno, tamos na tertulia cultural Pachín de Melás, y tenemos a la mio manzorga a Ramón d’Andrés, profesor de la Facultá de Filoloxía de Universidá d’Uvieu, que lleva munchísimu tiempu trabayando nel campu de la llingüística y la sociollingüística. Collaboró nel diccionariu de l'Academia de la Llingua y na gramática, tien bastantes llibros sobre estos temes, el llibru Llingua y xuiciu, que fue premiu Fuertes Acevedo, traducíu y ampliáu depués col títulu Juicios sobre la lengua asturiana, y fue’l responsable de la Oficina de Política Llingüistica del Principáu, colo que tien muncho qu'aportar a esti debate sobre la normalización del asturianu.

Na mio derecha más alloñada ta Mónica Rodríguez Riesgo, que ye filóloga y trabayó nel Serviciu de Normalización de la Llingua nel Conceyu de Xixón. Tamién recoyó la toponimia en Tinéu pa la Xunta Asesora de Toponimia, na que tamién ta Ramón d’Andrés, y anguaño ye la responsable del Serviciu de Normalización Llingüística del Conceyu de Cangas.

Y equí, más averáu a mi, ta David Guardado, que ye filólogu y autor del llibru que tenemos equí, Llingua estándar y normalización llingüística, que salió hai poco n’Araz Llibros, y nun solo conoz el procesu asturianu, como persona comprometida col idioma, sinón que tamién conoz otros procesos asemeyaos, particularmente’l casu galés.

Feches estes presentaciones, por asitiar la tertulia de lo más xeneral a lo más particular, faríavos dos primeres cuestiones:

una: ¿qué entendéis pola normalización?

y dos, que ye la más importante: ¿realmente existe un procesu de normalización llíngüistica n’Asturies?


Mónica R. Riesgo
Pa mi la normalización ye la capacidá d’implicar a la xente nel procesu de resituación del asturianu. Nesi sentíu, dende un puntu de vista prácticu, que ye’l que yo más o menos trabayo, socialmente tamos dando los primeros pasos, y anque sí qu'a nivel social hai bastantes avances, la xente organízase, l’asturianu va recuperando un estatus, pero a nivel social nun hai una implicación.


Ramón d’Andrés
Bueno, lo que hai n’Asturies ye un procesu de normalización truncáu pola situación política, frustráu o medio frustráu por una falta de voluntá política de los poderes públicos, porque a los sectores asturianistes, a los sectores que lleven alantre la normalización de la llingua, correspuénde-yos una serie de llabores que yá tán bastante acabaes no que se refier a la normativización y a la normalización del corpus. Les blimes coles que se fai la parte técnica y llingüística ta más o menos cubierta, pero claro, falta lo fundamental, que ye poner eso en funcionamientu, fálta-y la funcionalidá pública y social que depende d'una voluntá política y una voluntá social, especialmente la voluntá política, y ehí comparto lo qu’espón David nel so llibru. Y ye una cosa constatable qu'hai una axenda clara pa torgar y tornar el procesu de normalización social.


David Guardado
Toi totalmente d’alcuerdu colo que acaba de dicir Ramón: n’Asturies entamóse nos 80 un procesu de normalización, la normativización, o codificación, o como queramos llamalo per un llau, que ye la ferramienta de la estructura de la llingua pa preparala pa unos usos y depués, la otra parte de la normalización, la planificación llingüística, ye da-y una funcionalidá a eso que se prepara. ¿Qué ye lo que pasa? Que n’Asturies lo qu'en principiu paecía que yera un procesu de normalización real, que quiciabes diba un poco más lentu porque n’Asturies la situación nun daba pa que fuera igual de rápidu que n’otros sitios onde tamién había otres llingües minoritaries, hubo un puntu, que nun sé cuál ye nin en qué momentu, nel que –nun ye una teoría de la conspiración– decídese qu’esto nun puede dir más p’alantre, y esi procesu, que paecía un procesu lentu, conviértese nun procesu frustráu.
Y a partir d’esi momentu lo que se fai ye que los procesos de lo que se llama normalización derívense hacia una serie de coses que tán mui bien, pero que nun lleven a la normalización real, que ye la implantación de la llingua na sociedá y a que la xente la adopte como una llingua vehicular pa la vida diaria.
Yo creo que se da a finales de los 90, que ye cuando, anque paecía qu'hubo avances, pero detrás, nel fondu, hubo un momentu nel que se decidió que l'asturianu nun podía ser una llingua útil pa la sociedá. Pue ser una llingua pa la xente que-y guste o que se quiera dedicar a ello, pero nun puede ser una llingua viable y socialmente útil. Y ellí ye onde se fai la resquiebra coles llingües oficiales, ye dicir, les llingües que sí son pa eso, y yo creo que dende esa p’acá tamos nun procesu constante nel que tamos perdiendo la batalla de la propaganda, y poco a poco va calando interesadamente la idea de que l’asturianu nun ye una llingua como lo ye’l vascu, el catalán y el gallegu.


Pablo R. Alonso
Paez que tais todos d’alcuerdu en que’l procesu de normalización llingüística ta parao.
Puede qu’existan tres sectores, el sector asturianista, que, colos matices que queramos, básicamente apuesta pol procesu y la cooficialidá; otru sector, que ye la sociedá asturiana, que nun s’implica, y ta un poco como al marxe, y quizás seya esi'l gran problema; y llueu ta otru sector, el político-mediáticu, que ye’l que realmente ta torgando. ¿Existe esa realidá?


Ramón d’Andrés
Lo que me paez ye que’l frenu más importante detectable ye l’establishment político-cultural, que ye verdaderamente onde tán los centros de decisión. Y si hubiere una predisposición d’otru tipu –y la predisposición ye dende va años absolutamente negativa–, daríense pasos importantes, pero eso nun existe.
Lo que pasa ye que, y esto ya como elementu de reflexón, nes sociedaes nuestres el cuerpu políticu nun sal del deu del Caudillo. Nos rexímenes dictatoriales hai una distorsión absoluta entre'l poder y la sociedá. Nes sociedaes formaes sobre referentes democráticos como la nuestra, el poder políticu, aunque non totalmente, tien una ósmosis cola sociedá, puesto qu'existe un réxime d’elecciones y llibertá d’opinión, de partíos, etc.
Con esto quiero decir, y nesto enllazo colo que Mónica diz, qu'a la sociedá asturiana cábe-y un migayu de responsabilidá, nun digo que la sociedá asturiana seya responsable o co-responsable, pero cábe-y un poquiñín de responsabilidá en cuanto al estáu de la cuestión.
Ye claro que los partíos políticos mayoritarios son mayoritarios porque en reiteraes ocasiones la xente los vota. Ye verdá que los vota por miles de coses y l’asuntu de la llingua debe tar nel númberu 18 ó 20. Pero ye claro que la xente nun pue alegar inorancia nesta cuestión.
Tol mundu ta enteráu más o menos de qué ye lo que se xuega cola llingua, anque hai grandes bolses de desconocencia, eso ye verdá, pero yo creo qu'ahí hai un feed-back que ye mui negativu, y que ye verdá que bastaría con qu'un gobiernu predispuestu ficiera otres coses pa que prendiere la chispa socialmente tamién. Pero l’apatía de la sociedá asturiana nesti asuntu, igual que n’otros, ye vital.


Mónica R. Riesgo
Yo tamién pienso eso que dices, qu'aparte del factor políticu, que ye mui importante, y alministrativu, que nun pon nengún tipu de midíes pa dignificar, dientro del propiu movimientu de reivindicación asturianista'l fracasu que tenemos ye’l de nun implicar tamién socialmente a la xente.
Nun somos capaces d’alcontranos cola xente y a veces faise’l movimientu dalgo sectariu. Sí, hai munches asociaciones, como yo qué sé, Xuristes pol Asturianu, por exemplu, pero nun veo otres como Ganaderos pol Asturianu, o tal.
Hai estratos de la sociedá, qu'al final son los más importantes, a los que nun llega esti tipu d’iniciatives.
Yo creo que’l fracasu ye en cierta midida nuesu, y que debíamos replanteanos les coses que podíamos facer.


David Guardado
Supuestamente’l cambiu ye posible, siempre ye posible: la cuestión ye convencer a la xente y utilizar los mecanismos democráticos pa que cambien les actitúes o pa que cambien los dirixentes.
Ye verdá lo que dicía Ramón, qu'hai una élite política y cultural que ye nesti momentu la que n’Asturies condiciona esi discursu antinormalizador. Y eso, ¿por qué ye?
Supongo que ye porque se ven amenazaos, por exemplu, porque si los escritores asturianos entamen a tener reconocimientu social, los escritores castellanos pueden vese en ciertu mou desplazaos. El retu nuesu ye facer ver a la sociedá qu'esto ye una cosa integradora, que nun se trata d’escluir a naide, nin munchísimo menos, que ye una cosa que va enriquecer a la sociedá asturiana.

Pero tamién hai que ser conscientes de que fai falta condicionar a les élites del poder. Realmente hai que cambiar una de dos, o los que manden, o los discursos de los que manden. Y esi ye’l debate. ¿Cómo se fai eso? Igual ye mui complicao, pero tien que poder facese.

Una de les batalles fundamentales que tamos perdiendo nos últimos años, porque los que tán en contra tán apertando muncho, ye la batalla de la propaganda sobre la bondá del procesu. A finales de los 80 la xente vía mui bien lo de la normalización y la oficialidá, y agora –habría que velo con encuestes– probablemente tamos perdiendo esa ventaxa que teníemos porque’l discursu antinormalizador ye mui duru, mui radical.
Antes yera incluso más per parte de dellos sectores, pero agora vien directamente de la xente que realmente manda. Y el discursu d’esa xente, de Lastra, de Javier Fernández, de Migoya, ye obligatoriedá, obligatoriedá, obligatoriedá, y eso va calando socialmente.

Siempre que nuna sociedá democrática hai dos discursos contrapuestos y que confronten, lo que s’intenta ye dir poco a poco llimando a la parte más “razonable” o más moderada del otru llau.
Y equí había una parte mui importante, xente de los partíos que supuestamente taben en contra de la oficialidá, casu de Trevín, casu de decenes de cargos del PSOE, que públicamente dicíen sin nengún problema que tenía qu'haber oficialidá, anque’l partíu dixera otra cosa, y agora eso yá nun pasa, yá nun pasa nunca.
Y, al revés, anque nun quiero ponelo al mesmu nivel, hai xente dientro de los que defendemos l’asturianu qu'empiecen a dicir yá que la oficialidá igual tampoco ye tan importante, que tán relativizando la importancia de la oficialidá.
Y pa mi eso ye una batalla argumental que nos tán ganando, una cesión de discursu polo menos que nun lleva a nada.

Nos años 80 había un discursu «moderáu» de la reivindicación llingüística, incluso dende’l PSOE había un discursu bastante modernu: aquelles campañes de promoción del asturianu que se facíen, del asturianu como tal, «falar asturianu ta mui bien», «el to nome ponlu n’asturianu, porque ye la nuestra identidá», eso sacábalo’l PSOE nel añu 85-86.
La vuelta de tuerca de la que falo que se ta dando agora ye esa, el discursu antinormalizador sofisticóse y llegó a unes conclusiones clares: l’asturianu pa esto non, pa esto otro tampoco. L’asturianu ye pa que saquen llibros, que fagan grupos, pero cualquier cosa que tenga que ver cola identidá o cola utilidá social ye peligroso y eso córtase.


Un asistente
Pero tamién hai que tener en cuenta que naquel momentu había unes persones concretes: tuvo Pedro de Silva, que tien una actitú muncho más positiva que la que puede tener Areces o la Conseyera de Cultura agora mesmo. Entós podemos poner nomes y apellíos a quién ye'l motor dientro d'un gobiernu pa fomentar unes actitúes o otres.


Ramón d’Andrés
L’estancamientu en que tamos débese a eso, l’establishment políticu y cultural, que son tanto’l PSOE como’l PP, nun hai que s'engañar: yá nos contaron va tiempu. Agora yá ta too posao y saben perfectamente que somos débiles, y polo tanto nun tienen ningún problema. Ellos tienen un proyectu políticu con respecto al asturianu mui claru, y espónenlu con una claridá tremenda.
Les víes son les que diz David, claro, pero vamos ver: quitalos del poder, que gane o que tenga una influencia decisiva un partíu asturianista o nacionalista nun se ta dando. Cambiar el discursu, tamién s'intenta; camiento yo que son dos llabores perfectamente compatibles, pero lo que pasa ye que, la verdá, nun se consigue. El cerramientu absolutu qu'hai nun permite avanzar les coses.
Yo creo que la solución ye insistir, nun hai otra, nun podemos cruzanos de brazos, caún nel so sitiu, hai qu'insistir, siguir, dar la coña, y ye la única manera que tenemos de dir cambiando les coses.

Sobre les cesiones asturianistes, yo nun me dexaría llevar por esos mieos. Yo nun tengo constancia de que persones relevantes o corrientes dientro l’asturianismu ficieren cesión de nada. Puede haber dalguna individualidá, nun lo sé, pero nun veo per nengún llau persones relevantes que cedieren a la defensa del asturianu o a la oficialidá. Nun veo cesiones per nengún llau, paezme perder el tiempu pensar eso.
La situación na que tamos débese a otres razones.

Y dempués hai otra cosa na que tampoco s’entra, que ye determinaes actitúes dientro del asturianismu. Nun ye la cuestión central de la situación na que tamos, pero ye verdá que delles actitúes nun contribuyen migaya a tener una situación un poco más tranquila.
Por exemplu, David recuerda con prestosidá nel so llibru cuando una coalición política asturianista colocó un diputáu nel añu 90. Pero hai que recordar qu'esi diputáu fue absolutamente crucificáu poles files más conspicues del asturianismu. Y yo yera partícipe d’eso, y llamento agora muncho tener sío comparsa d’esi tipu de situaciones, más cuando depués tocóme a mi tamién.
Quiero dicir qu'hai actitúes que nun s’entienden, que tán alloñaes absolutamente de ciertu pragmatismu de les coses. Y esti tipu de situaciones van repitiéndose dende los años 80.
Manolo de la Cera fue crucificáu tamién, Antón García, cuando entamó cola Oficina de Política Llingüística, fue crucificáu tamién. Y lo molesto del tema qu'estes actitúes persisten, como si fuera un valor cotizáu nel asturianismu.
Ye dicir, el fechu de tar Antón o yo mesmu na Oficina de Política Llingüística, puedes contemplalu de dos maneres: «esti ye ún de los nuestros que ta dientro'l monstruu», y entós aplausos, «mira qué puntu más esforzáu». Pero puede adoptase otra visión, que ye: «esi, por tal dientro'l monstruu, yá nun ye de los nuestros».
Y estes dos opciones escuéyense a discreción, dependiendo de per ónde tire l’aire o según convenga, y eso ye una actitú francamente negativa y que tresmitimos a la sociedá. Y nun s’entiende. Nun puedo entender qu'un asturianista se dedique a torpediar el llabor d’otru asturianista, teniendo además la situación que tenemos. Ye increíble.


David Guardado
¿Por qué recuerdo con señardá aquella época? Porque eso ye un factor clave: d’aquella había dos partíos o una coalición, y esi asturianismu o nacionalismu, como queramos llamalu, tenía una forma política definida, y eso condicionaba claramente’l restu los discursos políticos sobre la llingua, y pa mi esa ye una de les carencies de lo que pasa agora, que nun hai una fuerza política con presencia institucional.
Y respecto al tema del diputáu, de Xuan Xosé, ahí hai otru factor, aparte d'esa tendencia a fusilar que dices, y ye ún de los pecaos orixinales qu'hai dientro l’asturianismu, que ye l’enfrentamientu claru entre una xente que tiró per una estaya namás cultural y una xente que tiró per una vía política.
Yo creo qu'esi ye ún de los fechos diferenciales qu'hai col asturianu respecto a otros tipos de procesos.
De repente hai una xente que quier poner nel panorama políticu una idea nacionalista, y ta radicalmente enfrentada a los que son los referentes más claros del movimientu asturianista cultural. Y yo creo que ye parte de la causa del gran desastre que vieno después.
Y eso nun quier dicir que’l movimientu cultural tenga que ser subsidiariu del políticu, nin muncho menos, ni al revés, pero lo mínimo ye precisamente qu'haya un xuegu llimpiu, que nun se vea como una cosa contrapuesta. Ye más, normalmente y analizándolo oxetivamente, una cosa suel crecer al par de la otra.

Agora eso igual ta cambiando, pero nos años 80 había un enfrentamientu claru entre ciertes persones, y desde gran parte del asturianismu cultural demonizóse al asturianismu políticu. Víase como una vía que lo que facía ye restar apoyos a lo llimpio que yera lo estrictamente cultural. Y hai xente que sigue nesa dinámica. Sería interesante documentar qué ye lo que pasó, non pa culpabilizar a naide nin nada, pero saber ónde tuvieron aquellos puntos de fricción, el papel d’unos y d’otros.


Un asistente
Volviendo al tema de la normalización, agora mesmo ta dándose una paradoxa: hai una Dirección Xeneral de Política Llingüística, perres en dalgunos Conceyos como en Xixón a mamplén, pero a la vez, y neso tabais d’alcuerdu, tamos nun procesu de normalización totalmente paráu. Tamos peor qu'en momentos en qu'había menos capacidá.


Ramón d’Andrés
Home, por poco que fuera avanzóse dalgo a lo llargo de los años. Nun tamos como nos años 80, hubo coses qu’avanzaron, y lo que tamos agora ye nun frenazu, con peligru de retrocesu.


Mónica R. Riesgo
Pienso qu'anque paez que s'avanzara a pedazos, políticamente, realmente sigue siendo igual, eso nun repercute socialmente.


Ramón d’Andrés
Na normalización avanzóse, siguen siendo coses escases, nun satisfaen. Pero hai una confusión interesada que s'alministra desde focos del asturianismu, que ye poner l’oxetivu máximu como oxetivu inmediatu cuando convién. Tu pues dicir «oyi, esi pasín de mierda ta bien, ye un pasiquín y nun hai qu'olvidar que l'oxetivu en realidá ye más ambiciosu». Y ye perfectamente compatible uno y otro. Y de fechu faise. Pero cuando nun convién, nun se fai. Dizse: «bueno, esi oxetivu parcial, d’agora, inmediatu, ye inalmisible porque lo que ta ye ocultando l’oxetivu máximu». Y esto ye una absoluta ceguera.
Un exemplu claru y reciente ye lo que pasó na Facultá de Filoloxía: los mesmos qu’antes cerraben la boca o yeren hostiles a la reivindicación del Minor d'Asturianu, resulta qu'agora mátense por defender una cosa, la Mención de Maxisteriu, que tien menos pesu (30 creitos namás).


David Guardado
Yo creo qu’eso son guerres mui internes de grupos o de grupúsculos dientro l’asturianismu, y ye una de les coses qu’habría que desfacer precisamente.


Ramón d’Andrés
Bueno, les coses nun podíen tar más clares: o consiguíes eso, o l’asturianu diba a la miseria directamente, y a ver cuándo lu recuperábamos. Pero resulta que teníes que facer non sólo l’esfuerzu de contrarrestar la emienda de Félix Fernández de Castro, sinón que teníes además que facer un sobreesfuerzu (como siempre), porque había un sector asturianista al que nun-y gustaba aquello. ¿Y qué alternativa daba? Nenguna.

Si'l movimientu asturianista fuere fuerte, eses actitúes tovía podíen tener sentíu, pero debío a la debilidá que tenemos, nun conducen a nengún sitiu. Conducen namás a la mala lleche, a empeorar el tema, sin escaecer que mayoritariamente les culpes tán onde tán. Pero eses actitúes asturianistes nun ayuden nada.


Mónica R. Riesgo
Yo pienso que la oficialidá ye’l fin de too esto, pero tamién pienso que nos discursos asturianistes perdémonos cola oficialidá, pero a la hora de la verdá nun exercemos derechos que ya tenemos: yo qué sé, nun vamos a presentar reclamaciones porque nun se respeta la toponimia, y eso ye lo que falta, activismu real.


David Guardado
L’asturianismu, hasta ciertu puntu, ye un movimientu a tiempu parcial, esi ye ún de los problemes graves. Al final acaba siendo una especie de tribu urbana o d’entrenenimientu. Yo creo qu'ente los falantes d’asturianu y ente los miembros del movimientu fáltanos un compromisu y una identificación col procesu, d’análisis del fondu: ¿qué ye lo que queremos? ¿A ónde vamos? ¿Qué fai falta pa llegar a los nuesos oxetivos?
Por exemplu, que nunca naide planteara facer una escuela o actividaes estrascolares pa que los crios, después de la otra escuela, puedan dir con otros rapacinos a falar asturianu. Trabayar na tresmisión xeneracional. Esi tipu de coses qu'hai n’otros sitios, equí falten realmente.
Fáltanos ser autoconscientes como comunidá con una identidá específica que tien que pervivir. Equí neso tamos raspiando l’aprobáu, más bien tamos nel suspensu. Y eso ye clave pa dempués un compromisu más grande n’otru tipu de coses y p’algamar avances.

La mentalidá de los políticos cámbiesla tamién cuando hai una base de realidá evidente y palpable, non solo en votos, tamién neses coses.
Como Mónica dicía, si en Tinéu hai una asociación de ganaderos, otra d'unos que xueguen a fútbol sala y otra de lo que seya, y faen les coses n’asturianu, eso ye crear una rede que ye mui difícil de destexer después. El problema ye que si l’únicu movimientu nel que la llingua tea presente ye’l meramente llingüísticu, al final ye una cosa bastante débil realmente.

Esi ye ún de los problemes. Poniendo’l focu desde fuera, creo tamién que la meyor manera de cambiar el discursu de los políticos ye poniendo’l tema na axenda política, como se fizo nel añu 91 o nos 80. Facer ver qu’hai otros que tienen esto por bandera real y como prioridá y que pueden quitanos votos.
El pasu definitivu d’Izquierda Xunida col tema de la llingua vieno cola emerxencia del nacionalismu políticu nos 80, que de repente disputaba un campu claramente fronterizu con Izquierda Xunida. Y esa bolsa de votos que se disputaben fizo que se posicionaren claramente, y anque yá taben a favor de la oficialidá, pasaron a convertise n’abanderaos del tema. Otra cosa ye en qué quedó aquello.


Ramón d’Andrés
Bueno, nos últimos tiempos la Fundación Caveda y Nava entrevistóse con xente hasta del PSOE. Pero la sordera que tienen... Ye que nos midieron yá, saben que somos pocos y somos débiles. Recíbente, hai postures mui abiertes, les mesmes qu’había...


David Guardado
Hai una páxina entera na prensa de va 10 años que diz 100 cargos del PSOE, y ta Trevín allí sentáu.


Ramón d’Andrés
Si, si, sal Trevín y cantidá d’ellos, qu’agora nun gorguten públicamente y además tienen la consigna de nun gorgutar, y cumplen a la perfección. El PSOE nun será otra cosa, pero ye disciplináu como un exércitu, y allí nun se mueve una mosca.

Tenemos un grave problema que ye la falta de consensu básicu n’Asturies entre les fuerces polítiques sobre lo que ye la llingua, l’estáu en que ta la llingua y qué ye lo que hai que facer con ella. Si hubiera esi consensu mínimu, les discrepancies taríen simplemente en normalizar d’esta manera o d’esta otra.
Pero nun llegamos a esto. Falta un consensu mínimu consistente n'almitir que l'asturianu ye una llingua que ta en peligru y que ye necesario normalizala y oficializala.
Esi consenso hailu en Galicia, hailu nel País Vascu, hailu en Navarra, hailu en Cataluña, hailu en Valencia y en Baleares. Equí nun lu hai.


Un asisteste
La Conseyera de Cultura actual nun considera l’asturianu como una llingua.


Ramón d’Andrés
Claro, y eso ta na axenda que diz David, que nun ye oculta, cada vez ye menos oculta.


Un asistente
Y esa decisión de la Conseyera, que nun ta tomada ella por sí sola, vien derivada de ciertos intereses políticos del PSOE. Al PSOE nun-y interesa considerar al asturianu como llingua con tolo que supondría, y eso cambió, y nel so momentu, nos años 80 yera como yera y agora cambió así.


David Guardado
El tema de la vinculación política ye interesante, porque ye malo que l’asturianu se vincule políticamente con dalgo, porque ye reduccionista, y puede paecer una cosa sectaria. Pero a la vez, eso, si nun lo hai, pierde la fuerza que tien como referente social con pesu. Porque eso yá nun pesa en votos, y entós yá nun val absolutamente nada.
Ye un ten con ten qu'hai que tener. Si vincules la llingua a una opción política, acabes con ella, pero si una llingua nun tien una opción política que la lleve de bandera claramente, el pesu qu'acabará teniendo ye mui relativu.


Ramón d’Andrés
Teóricamente, el PSOE o'l PP, con un migayu d’ingrediente asturianista que tuvieren, podíen llegar perfectamente a facer eso, pero’l cerramientu ideolóxicu actual ye una cosa tremenda, nun hai con quién falar.


David Guardado
Y eliminar la Llei 1/98 del asturianu ye otru de los puntos de l’axenda oculta.


Ramón d’Andrés
Esa llei, vamos recordalo, fue crucificada pol asturianismu en masa: consideróse la tapadera qu’evitaba la oficialidá. Pasaos diez años o más, esa llei ye la única agarradera xurídica que tenemos. Si esa llei esistiere nos Estaos Xuníos, que tien una tradición civilista mui importante, tendríen pleitos a mamplén.


David Guardado
Yá que recordamos, vamos recordar tamién qu'esa llei fue crucificada pol asturianismu en masa, y como brazu executor d’esa postura tuvo la xente d’Izquierda Xunida que taba daquella nel Pautu pol Autogobiernu y la Oficialidá. Curiosamente, foron los mesmos que depués tuvieron nel Gobiernu y nun consiguieron poner la llei en marcha, a pesar de que firmaron el pautu de gobiernu del 2003, que dicía que diba haber un desarrollu normativu d’esa llei.
Y agora, nel que firmaron nel 2008, nin siquiera se menciona la llei. Eso ye que se ta trabayando pa qu’esa llei dexe d’esistir.


Ramón d’Andrés
Ye qu'Areces ya se dio cuenta de qu’esa llei, como apuntó’l xurista José Manuel Pérez,
tien elementos d’oficialidá. Y l’oxetivu que agora ye tumbar esa llei, y ye posible que lo consigan.

Pa más información

Entrevista con David Guardado:
Parte I "La estandarización ye la unificación d'un idioma y la so diferenciación frente a otres llingües"

Parte II "Nel sieglu XIX la llingua asturiana taba reconocida como una llingua más"

David Guardado: Llingua estándar y normalización llingüística. La revitalización de les llingües subordinaes. Araz Llibros 2008

Mónica R. Riesgo: Asume la Oficina de Normalización Lingüística en Cangas del Narcea
Noticia en La Nueva España, El Comercio y La Voz de Asturias

Mónica R. Riesgo: “El Plan de Normalización nun trai nada nuevu con respectu a la Llei d’Usu, así que nun veo’l problema”

Ramón d'Andrés: Normalización social del astur-leones

Ramón d'Andrés: L'asturianu que vien. Observaciones y suxerencies sobre l'asturianu normativu y el so usu. Publicaciones Ámbitu, 2008.

Tertulia: ¿ LA ZALIA CONTRA ASTURIES ?

¿ LA ZALIA CONTRA ASTURIES ?

El martes 16 d’avientu de 2008, na cervecería Astuera de Xixón celebróse la primer tertulia abierta organizada pol grupu cultural “Pachín de Melás”.

Tuvieron participando unes diez persones que falaron al rodiu de la ZALIA (Zona d’Actividaes Loxístiques ya Industriales d’Asturies) que l’Ayuntamientu de Xixón, gobernáu pol PSOE xunto a IU-BA-LV, en connivencia col Gobiernu del Principáu d’Asturies, también rexíu pol PSOE con IU-BA-LV, pretende colocar a toa costa en San Andrés de los Tacones y que cuenta con rechazu unánime de vecinos, grupos ecoloxistes, y organizaciones polítiques nacionalistes.


Como invitaos especiales a la tertulia tuvieron presentes Jesús Casona, de l’Asociación de Vecinos de San Andrés de los Tacones, Germán Abad, miembru de l’Asociación cultural Peña Tú y collaborador de los vecinos y Roberto Roces, abogáu de los vecinos.


Pa información sola ZALIA puede calcase nos enllaces que vienen darréu:

· Reportaxe de Pablo Rodríguez Alonso publicáu en Les Noticies el 10 d’avientu de 2006
· Informe de l’Asociación de Vecinos de San Andrés de los Tacones
· Comunicáu y resume de les alegaciones al proyeutu presentaes por Unidá Nacionalista Asturiana
· Delles de indicaciones de la Confederación Hidrográfica a propósitu del proyeutu.
· Páxina web de la sociedad Zona de Actividades Logísticas e Industriales de Asturias S.A.

Ponemos darréu un pequeñu resume con delles de les intervenciones más interesantes de la sesión.

Germán Abad:
Si llees la prensa da la impresión de que ya falta poco p’acabar.


Jesus Casona:
La ZALIA ta agora igual qu’hai cuarenta años. Nun ficieron absolutamente nada más qu’acosar y asustar a los vecinos. Ya amenazaron a dalgún con que tenía que marchar n’agostu del añu pasáu de casa, cuando nun llegaren tovía a nengún alcuerdu. Y a día de hoy nun llegaron a nengún acuerdu tovía. Y eso nun tendría que permitise. Tendría que ponese frenu a esos desmanes.


Roberto Roces:
La caxa ta vacía. Vacía por dos motivos. Porque agora nun se recauda ya que nun hai llicencies de construcción y l’otru motivu ye que los conceyales tienen sueldos millonarios.


Jesús Casona:
Enrique Álvarez fue’l primer director de la ZALIA y agora, como tuvieron que dar a Izquierda Unida les competencies de la vivienda agora hai que dai un cargu. Vuelve Enrique a la ZALIA como´l turrón, que vuelve a casa por navidá. Y agora hai dos directores, Enrique y Daniel Yuste, que yera’l que lu sustituyó y hai un dichu que diz que cuando un barcu tien dos capitanes, el barcu fúndese, a ver si ye verdá.



Jesús Casona:
Pero la cosa nun avanza, conmigo nun falaron tovía nunca y toi na primer fase. Falaron por vez primera la selmana pasada. Llamáronme al teléfonu. Tuvimos unes pallabres y nun llegó a más. Dixe qu’ hai una cosa que tengo mui clara, lo mio nun ta en venta. Primero, si tú quies comprámelo tienes de dir ellí a comprámelo. Segundo, como nun nos vamos a poner d’alcuerdu porque ya te repito que nun quiero vender y hai que comprame la gana, y la gana nun la vendo, o sea que ye imposible. Y tengo como un deber moral de nun vendelo, porque yera de los mios padres, y a mio padre, que en paz descanse, gustába-y muncho, o sea que tengo un deber de nun vender. Claro que vais a echame d’ellí, pero la mio conciencia quedará tranquila, y van ser los tribunales los que digan cuanto hai que pagame por ello y será la guardia civil la que me va a sacar de casa por orden del xuez.
Y nun volvieron a llamar. Ya veré lo que faigo cuando vuelva a llamar. Dalgo tengo que facer, porque fizo de rabiar a muncha xente, xente mayor, hubo verdaderos escándalos, sobre manera al principiu.
Hubo un casu mui significativu, que son dos persones mayores, d’ochenta y tantos años, que teníen una finca ellí, mui llana. Y un día aparecen dos individuos por casa y dicen que-yos compren la finca y pregunten que cuanto quieren por ella, y ellos pidieron-yos una insignificancia, porque esa xente nun taba al loro de cómo taben los precios, pero los otros tovía dixeron que non, que yera mui caro, que tenien que quitar algo, y dempués de vueltes, quitaron-y nun se cuanto y quedaron en dir al día siguiente al notariu. Y claro, en cuantes marcharon llamaron al fiu, porque tenien mieu que los engañasen. Y el fíu llámame a mi y yo púselu al día de cómo taben les coses, y que taben pagando como cinco o seis veces más y eso ofreciendo ellos. Y al día siguiente cuando fueron en plan mafioso con un taxi pa llevalos a la notaría, ya taba ellí’l fíu que-yos dixo que nun había nada que falar, que marchasen. Yera un robu claru.
Hubo otra anécdota, que nun conozo de primer mano, pero que paez ser que cuando taba otru na notaría pa vender tamién, oye comentar a los compredores que, a esti preciu, escriturámosla a nome nuestru , y claro, volviose atrás.
Hubo munches anécdotes, y otres que nun se saben, toes col fin d’engañar, y l’alcasdesa sábelo perfectamente porque yo-y lo dixe infinidá de veces.
Y llueu vienen cola expropiación a tres y a seis euros dependiendo que sea núcleo rural edificable y non edificable por interés paisaxísticu, y eso redondeando al alza,
Y ¡oh! Sorpresa, agora cuando lleguen les notificaciones del catastru, que sabeis que tienen que ser ente’l 40% y el 60% del valor del mercáu, y qu’utilizaron el 40%, tasáronlo a 19 euros.
Y concretamente lo mío, cuando mide la ZALIA pa comprámelo mide menos metros, y cuando mide’l catastru salen más metros. ¿cómo ye ésto?


Germán Abad:
Pero paez que la cosa va pa llargo, porque yo creo que nun deben tener perres nin pa espropiaciones. Como lo de Caliao, que va parase porque nun hai perres pa ello. Pero equi ta la noticia de que’l Principáu invertirá 132 millones nos tres accesos a la ZALIA, y “los accesos a la ZALIA serán mediante el sistema conocido como peaje en la sombra, y serán en El Montico, en La Peñona y en la AS-2”.
Yo creo que nel centru d’Asturies ya nun queda nin sitiu pa facer mas carreteres nin más enllaces.

Amás, hai un informe demoledor de la Confederación Hidrográfica sobre la falta de previsiones d’abastecimientu d’agua na ZALIA, que va tener un consumu descomanáo, lo que ye una preba más de pa qué quieren facer realmente’l banzáu de Caliao.


Roberto Roces:
Y llueu pa los accesos de los vecinos dicíen na prensa que iba a necesitase un carné, como la tarxeta ciudadana. Vien a ser como l’aparheid de los sudafricanos, que teníen que dir col pase pa dir a la so casa. Ye como´l réximen de la Unión Soviética, que necesiten pasaporte pa circular nel so propiu pais.

Jesús Casona:
Pues cuando tu quieras dir a San Andrés de los Tacones, tengo que lleváte yo, porque tú nun puedes entrar.


Germán Abad:
Ye’l resultáu de planificar dende los despachos, ensin tener en cuenta nin a la zona rural, nin a la xente que vive na zona rural. Sinón sólo con una idea fixa, la de facer otru mazacote más ehí, qu’amás nun se tien xustificao la so necesidá.


Jesús Casona:
Y tamién ta lo de los horros. A propósitu del catastrazu que tan metiendo agora, que nos quieren facer pagar polos horros como si fueren inmuebles. Los tiempos cambiaron. El destín de los horros ya nun ye’l que yera, guardar el granu, los tocinos del gochu que se colgaben ellí a secar, el llacón coles fabes y les riestres de maiz colgaes polos corredores. Eso ya desapaeció, ya nin hai maiz, el gochu ya lu meten nel conxelador, etc. Entos qué va pasar..como ya nun tien esi cometíu, si agora tienen que pagar por ellos, pues mui fácil, das col tractor p’atrás y cae l’horru. Claro, si lo que te va facer ye una carga financiera tolos años bastante importante por dalgo que nun te da ná.
Por otra parte, por modificar o conservar un horru, les subvenciones que te dan son mui complicaes de conseguir, condiciónate munchísimo los materiales a utilizar, si pa enrrima tienes que pagar por ellos, un dia col tractor, equivóqueste y cayó’l tractor abaxo, ¿y quien lu llevanta? Naide.
Y eso ye lo que va a pasar colos horros. De toes maneres al Principáu, a la Conseyería de Cultura, que ye la que tien que preocupase polos horros, nun-y da más.

En San Andrés de los Tacones fízose una denuncia porque llevaron los horros de la ZALIA y quedaron trozos de madera per ellí, la subidoria, que ye un todo col hórreo ellí quedo, porque claro, hai que desmontalo y normalmente ye de piedra, y ellí tán, y nun nos contestaron. Y así ye todo. Da igual.


Roberto Roces:
El casu xurídicu de la ZALIA tenémoslu abordáu col recursu contenciosu alministrativu y tamién énte la Unión Europea. Y dientro de poco, d’alcuerdu con Hammerstein, l’eurodiputáu de Los Verdes, van recibinos en Bruselas pa que lu acelere.
Tamién vamos interponer una querella criminal por maquinación p’alterar el preciu de les coses, ya que compraben les propiedaes a veinte o treinta euros el metro cuadráu y agora quieren espropiales a tres y a seis euros, consecuentemente, acuéyense al procedimientu espropiatoriu p’alterar esi preciu de les coses que ellos reconocieron comprando primero. Esto ta tipificao nel códigu penal. Y amás son coacciones.


Germán Abad:
Munches veces más que’l resultáu final d’un procesu xudicial, ye lo que va quedando nel camín. Agora naide s’alcuerda ya de los xuicios que hubo nel tramu Unquera-Llanes, y por embargu ganóse pol desgaste que tuvieron los políticos por una cadena interminable d’actuaciones xudiciales. Aquello fue gordísimo.


Roberto Roces:
Nel casu de la ZALIA, en cuanto a la desaparición progresiva de la zona rural, esa nun ye la mio batalla, aunque sería’l primeru a defendelo si hubiese dalgo que facer por esi camín. El primer llugar la mio batalla ye que nun s’implante la ZALIA en San Andrés de los Tacones, y el mio argumentu esencial ye qu’afecta a una ZEPA (Zona Especial de Protección de Aves) y punto. Ye incompatible la presencia d’una actividá industrial cola ZEPA del embalse San Andrés.

Yo toi convencíu que la ZALIA nun se va facer nunca en San Andrés de los Tacones. Hai un informe de la Confederación Hidrográfica onde se diz que l’informe de sostenibilidá ambiental fechu ta amañáu por cuanto que l’emplazamientu taba ya predetermináu. Desestímense les otres dos alternatives porque nun teníen los metros necesarios, lo que de mano ya nun son una alternativa.


Germán Abad:
Yo veo munches similitudes col plan de Llanes. Por exemplu, na memoria xustificativa nun esiste prácticamente, y esa fue una de les razones principales poles que se anuló´l plan de Llanes. Y aquí tampoco esiste l’informe económicu, como tamién pasó en Llanes, y ye obligatorio porque tien que cumplir col Plan Xeneral d’Ordenación Urbana de Xixón.

ZALIA: Resumen del informe de la Confederación Hidrográfica

Sobre la documentación aportada

• Introduz breves especulaciones simplistes sobre posibles impactos sectoriales



• Nun s’afonda nos aspectos mediuambientales



• Nun cumple los requisitos mínimos establecíos nel Anexu I de la Llei 9/2006 de 29 d’abril sobre evaluación de los efectos de determinaos planes y programes nel mediu ambiente.



• Resulta difícil considerar qu’esti documentu constituya l’Informe de Sostenibilidá que l’artículu 8 de dicha Llei señala como iniciu del procedimientu de tramitación ambiental.

Dende’l puntu de vista del ámbitu competencial de la Confederación

Suxérese al muérganu ambiental que solicite al promotor la inclusión nel Informe de Sostenibilidá de:

1. Un apartáu específicu relativu al abastecimientu de agua, cuantificando, como consecuencia de la implantación de la ZALIA
   - l’aumentu previsible de la demanda
   - la capacidá actual d’atender esta demanda
   - les previsiones d’infraestructures pa complementala, si nun fuera suficiente.



2. Un apartáu relativu a la capacidá actual de depuración d’agues residuales, con indicación de les previsiones en casu de que quedase sobrepasada tres la implantación.
   
   
   

Sería recomendable solicitar la inclusión d’un apartáu nel que se trate con rigor la corrección de los posibles efectos sola ZEPA AS-13 (Zona Especial de Protección d’Aves, “Banzáu del Centru”), ya que l’afirmación de que la presencia d’una autovía ente ella y la ZALIA representa un efeutu amortiguador carez de fundamentu y, en determinaes circunstancies, podría dar llugar a un efeutu multiplicador.

ZALIA: Informe de l’Asociación de Vecinos de San Andrés de los Tacones

· L’entamu oficial

N’avientu de 2003 l’Ayuntamientu Xixón abre un periodu d’información pública previa de l’Adaptación del PXOU (Plan Xeneral d’Ordenación Urbana) de Xixón a la llei autonómica del suelu. Nun lo fai por altruismu o xenerosidá. Si fuera asina, el plantegamientu sería de total tresparencia, como lo fue, por exemplu, la ellaboración del primer PXOU de la democracia en 1982, durante’l mandatu del Alcalde Palacios. Plan ésti que, dicho seya de pasu pola so exemplaridá, desarrolló’l planeamiento urbanu y consiguió suelu pa viviendes ya infraestructures ensin una sola espropiación.
El trámite d’información pública previa realízase pa tratar d’evitar l’escándalu inminente delantre les desaxeraes dimensiones que taba alquiriendo la marea d’información privilexada que ya circulaba sobre’l mesmu.
Esta actuación oscurantista y perversa tapecía, ente otres actuaciones, la pretensión d’espropiar, en sólo una unidá d’actuación, más de 4 millones de metros cuadraos de tierres de pequeños propietarios particulares. La mayoría alquiríes de recién dempués de trabayales durante tola vida y durante varies xeneraciones d’antepasaos.

· Perversión institucional (contuberniu y perversión)

De perversa pue considerase l’actuación de la empresa mesta SOGEPSA, simultáneamente pública y privada. Pública pa espropiar. Dempués de la recalificación, los descomanaos beneficios que se producen pasen a engrosar les arques de los socios privaos (ASPROCON y les empreses privaes los Álamos, CEYD y C.Principado).

De “contuberniu” pue calificase’l ADECE (Alcuerdu pal Desarrollu Económicu, la Competitividá y l’Empléu) robláu’l 30 d’avientu de 2003 pol Gobiernu del Principáu y los axentes sociales y económicos UGT, CCOO y FADE, establecíos como “una fuerza paralela al Parlamentu y a les urnes, a mou d’un gobiernu na solombra”, que como ya s’anunciaba convirtióse nuna forma de tapecer intereses espurios.
Nel ADECE, el Gobiernu del Principáu comprométese a la implantación d’una ZALI (Zona d’Actividaes Loxístiques ya Industriales) de los puertos asturianos de Xixón y Avilés. Esta ZALI tenía ya un allugamientu predetermináu en San Andrés de los Tacones na Documentación de l’Adautación del PXOU de Xixón.

Con 31.760 firmes de ciudadanos de Xixón pídese exercer el drechu a la iniciativa popular na ellaboración de l’Adaptación del PXOU nun Plenu Estraordinariu nel que s’alderique sobr les propuestes que defienden los vecinos de la zona rural. Nesta revisión inclúyese la creación de la ZALI en San Andrés de los Tacones.
Son rechazaes pol Gobiernu municipal con razonamientos torticeros. Y, por el contra a les crítiques, fai posteriormente una convocatoria nunes condiciones coles que “pervierte” la iniciativa popular.

· Mentires institucionales

Cuando’l Gobiernu Municipal de Xixón anuncia la retirada de la ZALI de l’Adaptación del PXOU miente diciendo a la prensa que lo fai porque nun quier torgar antes de tiempu y de manera innecesaria les actividaes agropecuaries en San Andrés y Serín.
Esto ye mentira, puesto que con anterioridá contestara per escrito al requerimientu de la Dirección Xeneral de Mediu Ambiente de la Comisión Europea que dicha “decisión básase na consideración de que l’actuación en cuestión tovía nun ta suficientemente concretada polos sos principales impulsores no que se refier a aspeutos clave como son les sos dimensiones esactes, el plan d’etapes, financiación y sistema de xestión.”

El Conseyeru de Mediu Ambiente y Urbanismu miente cuando diz que la ZALIA nun esiste, que nun ta definíu nin el so allugamientu, nin los accesos, porque éstos son pal puertu d’El Musel, non pa una hipotética ZALIA. Esto ye mentira puesto que’l mes anterior el Principáu y Fomentu firmaron l’acuerdu pa la realización de los accesos a EL Musel y la ZALIA.


· Incumplimientu de les lleis comunitaries

La infracción per parte l’Ayuntamientu de Xixón de la Directiva Comunitaria del Conseyu 85/337/CEE obligó-y a tener que retirar de la revisión del PXOU la ZALI de San Andrés de los Tacones.

El Gobiernu del Principáu tamién tien intención d’incumplir les lleis comunitaries cola creación de la ZALIA en San Andrés de los Tacones. En concretu la Directiva del Parllamentu Européu y del Conseyu 2001/42/CE, al nun realizar la preventiva evaluación mediuambiental previa, na que s’estudien varies alternatives d’ubicación “razonables”.


· Acosu, coacción ya intimidación

Funcionarios de la Brigada d’Información de la comisaría d’El Natahoyo detienen, na so casa, a Francisco Javier Simón Junquera, el nuestru Vicepresidente, acusándolu, ensin fundamentu, de desorden públicu.

José Hevia Corte, empresariu rellacionáu col Gobiernu del Principáu y con SOGEPSA, demanda a Francisco Javier Simón Junquera, el nuestru Vicepresidente, y a Roberto Roces, el nuestru abogáu, pidiendo pa ellos una indemnización de 100.000 € por aludir, nunes declaraciones en Teleasturias, a la especulación urbanística en Castiello como consecuencia de l’adaptación del PXOU. Nun dicen nada que nun fuera ya publicao delles veces nos medios.

Los vecinos de San Andrés de los Tacones denuncien coacciones y amenaces per parte de representantes de la ZALIA pa obligalos a vender les sos finques en contra la so voluntá.


· Espropiación de propiedaes pa vendeles a particulares

L’Ayuntamientu de Xixón ya tenía previsto nel Proyeutu d’Adaptación del PXOU la unidá d’actuación UZN-I.3(NS) pa crear pol procedimientu d’espropiación de 4.207.640 m2 una ZALI en San Andrés de los Tacones.

Desbarataos pola Unión Europea, a propuesta de la nuestra Asociación, los planes del Ayuntamientu, el Principáu crea la ZALIA, sociedá pa promover la creación de la ZALIA en San Andrés de los Tacones y anuncia que “les parceles podrán vendese o bien ser de concesión alministrativa”.


· Censura d’información

Durante’l periodu d’información pública de l’Adaptación del PXOU a la Llei del Suelu, nun apaecía espuestu, xunto colos demás planos, el de nome MODELU TERRITORIAL PROPUESTU, que realizáu a escala 1:30.000 apaez chiscáu, como de viruela, d’innumerables manches prietes, rellacionaes coles zones loxístiques.

En marzu de 2004, San Andrés de los Tacones fue la única parroquia onde nun se desplazó l’equipu técnicu qu’adaptaba’l PXOU pa informar en qué-y afectaba la propuesta.

Como colectivu d’afectaos polos planes d’espropiación de la ZALIA, realizamos 30 preguntes al Presidente del Gobiernu del Principáu, a l’Alcaldesa de Xixón y al Conseyeru d’Industria y Empléu. Con elles pretendíemos enteranos de les necesidaes reales de zones loxístiques estraportuaries. Nun tuvimos rempuesta nenguna.


· Marches verdes

Xunto coles parroquies rurales de l’Ayuntamientu de Xixón convocamos tres marches verdes de protesta en contra de la forma de tramitación abusiva de l’Adaptación del PXOU que siguió’l Gobiernu Municipal (falta de tresparencia ya información, incumplimientos de la llegalidá, denegación del drechu a la iniciativa popular, etc.).
Na Primer Marcha Verde, y, cosa totalmente insólita en Xixón, con total corrección y falta d’incidentes, manifestáronse aproximadamente 6.000 ciudadanos.
Na Segunda Marcha Verde son 10.000 ciudadanos los que, otra vuelta, dan exemplu de civismu.
Na Tercer Marcha Verde, de manera exemplar, participen aproximadamente 8.000 ciudadanos portando una bandera verde de 4.170 metros de largor, qu’estableció un record Guinness.


· Desamparu institucional

Pídese al Conseyeru de Mediu Ambiente suspender la execución de la Adaptación del PXOU de Xixón, por incumplir directives comunitaries al asitiar la ZALI en San Andrés de los Tacones. La Conseyería inhíbese.

Más tarde pídese a la Ministra de Mediu Ambiente que alvierta a l’Ayuntamientu de Xixón que debe someter la creación de la ZALI a un estudiu d’impactu ambiental o suspender la creación de la ZALI. Nun recibimos contestación.

En xunu de 2005, a preguntes realizaes nel Congresu los Diputaos, el Gobiernu del Reinu d’España inhíbese nel tema de la ZALIA a favor del Principáu.

Na Comisión de Mediu Ambiente de les Cortes, treslláda-y a la Ministra de Mediu Ambiente l’incumplimientu de la Directiva 2001/42/CE pol Gobiernu del Principáu, nel so intentu de crear la ZALIA en San Andrés de los Tacones ensin el preceptivu estudiu mediuambiental previu. Tovía nun recibimos noticies y la ZALIA sigue’l so calce.


· San Andrés de los Tacones defiéndese viaxando

Pa defender los nuestros drechos énte l’actuación abusiva de los gobiernos Municipal y Autonómicu y el desamparu de les instituciones españoles, la nuestra Asociación realizó distintos viaxes.

Primer viaxe. Avientu de 2004. La nuestra Asociación desplazóse a Estrasburgo pa entrevistase con parlamentarios europeos y denunciar l’incumplimientu de la Directiva comunitaria 85/337/CEE per parte l’Ayuntamientu de Xixón na so pretensión d’incluyir nel PXOU la creación d’una zona d’actividaes loxístiques ya industriales en San Andrés de los Tacones, ensin tener fechu’l preceptivu estudiu mediuambiental previu. Resultáu: retírase la ZALIA del PXOU.

Segundu viaxe. Ochobre de 2005. Viaxamos a Álava pa conocer, de primer mano y en directo toles característiques técniques de Arasur, zona loxística estra-portuaria qu’utiliza’l puertu de Bilbao, un puertu secu de primer orde, como la ZALIA que se pretende crear en San Andrés de los Tacones, situada a 65 km. del puertu de Bilbao, a 120 km. del puertu de Pasajes y a 160 km. del de Santander. La ZALIA ta a unos escasos 10 km. D’El Musel.

Tercer viaxe. En payares vamos a la sede’l Congresu los Diputaos en Madrid. Recíbenos como miembru de la Comisión de Mediu Ambiente por Esquerra Republicana, Rosa Bonás, pa treslladar a la Ministra de Mediu Ambiente l’incumplimientu de la Directiva comunitaria 2001/42/CE per parte del Gobiernu del Principáu nel so intentu de crear la ZALIA en San Andrés de los Tacones ensin tener fecho’l preceptivu estudiu mediuambiental previu. Resultáu: nun se sabe nada.

Cuartu viaxe. En marzu nuevu viaxe a Europa. Esta vez a Bruseles. De nuevo entrevistes con parlamentarios europeos y denuncia del incumplimientu de la Directiva comunitaria 2001/42/CE pola parte del Gobiernu del Principáu nel so intentu de crear la ZALIA en San Andrés de los Tacones ensin tener fecho’l preceptivu estudiu mediuambiental previu. Resultáu: reábrese l’espediente y sigue´l so calce.