Software llibre n'Asturies
Na que participaron
• Xabiel García Pañeda
Profesor del Departamentu d'Informática de la Universidá d'Uviéu y autor del llibru 'Dos visiones asturianes de les nueves tecnoloxíes'
• Xandru Armesto
Entamador de Softastur. Software llibre n'asturiano
• Daniel Vicente y Arsenio CotoDesarrolladores del traductor Eslema. Traductor automáticu al asturiano
Faciéndose cargu la presentación Poli Mencía
Podemos entamar colo que ye’l conceptu de software llibre. Anque lu conocéis toos, ye volver un puquiñín a lo que son los oríxenes de la informática. Tanto nos 70 como nos 60 nun existíen nengún tipu llimitaciones pa tolo que yera’l software y el conocimientu interaccionaba d’unos con otros. Pero a partir de principios de los 80 o finales de los 70 ye cuando IBM entama a dicir que’l software ye propiedá d’él y que nun-y dexa a nadie alteralu, modificalu, distribuílu nin facer absolutamente nada.
Un exemplu que se pon siempre pa ver a qué estremos llegaron ye’l d’una impresora qu’ellos cedieron al MIT [Institutu de Tecnoloxía de Masachusetts] y que necesitaba una modificación pa que pudiere funcionar. Resulta qu’ellos yeren a facer esa modificación, pero nun podíen porque yera illegal. Y tuvieron que llamar a la empresa que-yos la cedió pa qu’ellos mesmos la modificaren.
El software nun ye diferente de lo que ye cualquier otra área de conocimientu. Y munchos de los que tais equí teneislo comprobao. Cómo, por exemplu los d’Eslema, aprovechando conocimientos d’otres llíngües, pudistis modificar y crear un productu nuevu. O’l casu de la xente de Softastur, lo mesmo, símplemente una traducción ya ye una modificación del productu. Y eso col software privativu nun se puede facer.
Xabiel García Pañeda
De la introducción que ficisti, bien, pero falta dicir una cosa, que ye ¿por qué esi cambiu nel modelu de negociu? Esi cambiu vien porque al entamu de la informática lo importante yera’l hardware, l’ordenador. L’ordenador yera lo más caro, lo valioso. Pero’l harware pierde valor, ya tol mundu tien un ordenador. Alcordái-vos que n’España, los dos primeros ordenadores que llegaron foron, ún pa facer la facturación de Renfe y otru pa intentar consiguir la bomba atómica. Pero agora ya empiecen a tar per tolos llaos. Esti chigre de xuro que tien un ordenador. Entós pierde’l valor, y lo qu’entama a tener valor ye’l software. Y nesi momentu dizse ¡Ostia, hai que ganar perres con esto!
Entós el software privativu, como tu lu llames, sal como un modelu de negociu, y años después, como modelu contestatariu, intenta tornase al sofware llibre, nun creo que como modelu altruista xeneralizáu. Hai, sí, un modelu altruista, que ye puntual, pero nun ye xereralizáu porque la mayoría del sofware llibre que nosotros conocemos, anque tea fechu por indivíduos, detrás hai grandes empreses que tan apurriendo perres pa paga-yos el sueldu a esa xente, pa face-y la guerra a Microsoft, porque como ta tan implantáu, ye la única manera de baltálu d’esi entornu toupoderosu, porque prácticamente tuvo a puntu d’algamar el cien por cien del mercáu.
Xandru Armesto
Yo camiento que ye al revés, que yera llibre, convirtióse en privativu y tornó otra vez la llibertá.
Bueno, en parte tienes razón nel tema les empreses qu’invierten perres nel software llibre y que fundamentalmente lo que quieren ye una parte del mercáu. Y ye la forma d’entrái al xigante de Microsoft. Pero tamién ye verdá que, antes que llegaren les empreses, yera la xente la que lo facía, contestatariamente, y por razones de tipu cultural o étiques.
Sí, ye un modelu contestatariu, eso ta claro, ye un modelu rebelde que ye emburriáu por delles empreses.
Pero cuando te plantees instalar el software llibre nun entornu empresarial, resulta que ta fecho por xente que lo fai voluntario, y resulta qu’ún de los que fizo una parte, esto ye un casu que nos pasó a nosotros, de repente casóse y tuvo un fíu, y soltó’l fusil, y hasta qu’otru empieza a ponese con eso y empieza a garrar el puxu, pasen seis o siete meses, pero los mios clientes nun esperen. Y eso pasa de verdá nel entornu nel que la xente ye voluntaria.
¿Ónde nun pasa, o ónde nun se nota? Pues onde esa xente taba faciendo software llibre, pero pagao. Ye nesi entornu cuando’l software llibre ye responsable. Porque’l problema que se plantega ye qu’esto ta fecho por una comunidá, y ¿quién ye’l responsable delantre min de que, si yo uso esi software, nun va haber un problema?
Cuando hai una empresa, y pagues, si hai un problema y el defeutu ye del software, yo puedo dir por ellos, pero ¿qué pasa nuna comunidá?
Así, que, por posicioname, anque de xuro que me satanizaréis, tengo que dicir que’l software llibre ta mui bien, porque ye contestatariu, porque busca romper monopolios y tamién ye mui importante n’otru entornu, pa mi clave, que ye: bien, hai un software potente, bono, de pagu, pero yo quiero facer coses cencielles, nun necesito o nun pueo algamar eso tan potente, y nun momentu un grupu d’usuarios dedicó’l tiempu en facer una ferramientina interesante, y dala gratis, con fines llimitaos, pero que fai qu’eso espoxigue y se meyore esi productu.
Bueno, quería esclariar un par de cosines. El software llibre nun ye gratis o nun tien por qué selo. Les empreses que lu creen pueden cobrar perfectamente por esi tipu productos, exactamente igual que’l software privativu. La única diferencia ye que permiten qu’esi software seya modificáu o adaptáu o redistribuíu.
Estes empreses, en realidá, nun vienden software, sinón que lo que venden ye’l valor añedíu del conocimientu d’esi software.
Xabiel García Pañeda
Sí, pero eso tien el problema que dicía antes, que ruempes la cadena de responsabilidá. Si tu modifiques el software yo dexo de ser responsable de lo que tu distribuyes modificao. Y eso ye peligroso en dellos casos, anque n’otros ye mui productivo.
Hai que tener el cuenta el grau de dañu que pue causar esi software.
Xandru Armesto
Respeutu a la responsabilidá del software, en realidá cuando se viende’l software privativu, nun hai un modelu de llicencia establecíu llegalmente, y ente les condiciones que firmes, una d’elles ye que nun te dan garantía.
Quier dicir que si defragmentando, cárgueste’l discu, el problema, según la llicencia ye, o tuyu, o, en tou casu, del fabricante’l hardware.
Xabiel García Pañeda
Sí, munches de les cláusules que se ponen nes llicencies son fraude de llei, y llueu hai que peleales nos tribunales. Ye como dicir: oye, yo faigote una operación d’un güeyu y cortéte una pata, pero nun yera responsabilidá mía, alcuérdate que firmaste un papel. Pero bueno, eso tenemos que velo.
Xandru Armesto
Tu cuando compres un equipu y lu prendes, lo primero que te sal ye l’alcuerdu de llicencia. Pues tar en desalcuerdu con esa llicencia, formal y llegalmente. Pero d’ehí a que te vuelvan les perres d’esi software que nun aceptes la llicencia, que ye lo que tendríes derechu por llei…
Danse casos de dir a los tribunales porque nun aceutes la llicencia de Microsoft y nun ganar.
Xabiel García Pañeda
Ta claro que si ponen unes cláusules y son fraude de llei, son fraude de llei, y si vas a xuiciu tienes una posibilidá de ganálu, aunque lo firmares. Eso ye como dicir, voi trabayar nesta empresa y aceuto que, antes de llegar, voi baxar los pantalones. Eso ye una cláusula del contratu abusiva, ye un fraude.
Y ye verdá que la lexislación nel campu informáticu ye de pena. Aunque hai ciertes garantíes que sí se cumplen.
Nun niego que una gran multinacional seya capaz d’enfrentase a eses lleis y ganar nos tribunales, pero l’usuariu normal de la cai pierde. Y non solo nun-y vuelven les perres del programa por nun aceutar la llicencia, tien que quedase col equipu, col programa, tien que pagalo too, hasta les costes del xuiciu.
Afortunadamente, nesi campu’l software llibre establez claramente lo que se pue facer. Que vien ensin garantía, por supuestu, igual que l’otru en realidá, pero tienes claro qué sí puedes facer col programa.
Non como los contratos de llicencia de los programes privativos, onde al final, dempués de toles cláusules, al final nun te queda claro siquiera si’l trabayu que vas facer utilizando’l formatu d’esi programa en cuestión vas tenelu disponible nel futuru, dependiendo de si la empresa va desapaecer o non.
Y por exemplu, nel casu educativu, que ye’l mio campu, agora tan llegando les pizarres dixitales, y topámonos con programes qu’usen formatos propios, privativos, formatos onde nosotros vamos tener que facer los nuestros materiales. D’esta forma, estos materiales que facemos, que son nuestros, van tar cautivos d’un formatu, un formatu que ye propiu d’una empresa.
Xabiel García Pañeda
Pero ye qu’esi ye otru problema diferente. Trátase del software basáu n’estándares. Toi na W3C, que ye ún de los grandes facedores d’estándares, y ehí’l conceutu ye diferente, una cosa ye facer software llibre o privativu y otra cosa ye facer formatos privaos o basáse n’estándares. Tu puedes facer un software pol que cobres y que nun dexes qu’amplíen, nin reutilicen, nin viendan, y tar basáu n’estándares, y, aunque nun tien munchu sentíu, pues facer un software llibre nun formatu propiu, que nun tea basáu n’estandares. Los estándares son una clave.
Nun sé si se interpretó que criticaba’l software llibre, digo qu’hai veces que ye mui interesante y otres que nun ye tanto, y hai que lo combinar como un modelu de negociu más, contestatariu y mui bonu pa romper monopolios, y sobre too pa emburriar xente que nun tien posibilidaes d’algamar eses ferramientes, munches veces cares.
Ensin embargu soi un fanáticu del software d’estándares. Usar estándates ye bonísimo, porque utilicen un software privativu d’una marca A o de una marca B o un software llibre, esi trabayu, esi documentu, esi conocimientu que yo almaceno nesi formatu, llueu voi poder cambialu o reutilizalu. Y eso dame cierta llibertá, por dicilo asina. Güei toi contigo, pago, mañana toi con él, pago, pero mañana, si me da la gana, nun pago o fago lo que seya, y los datos, qu’esos sí que son míos y non de la empresa, puedo seguir calteniéndolos.
Tas poniendo un modelu mui real de lo que ye’l software llibre y el software privativu en cuantes qu’ún cuesta perres y l’otru non , pero creo que dientro España tenemos una situación un poco distinta, porque tovía ye mui complicao que la xente piense en software polo económico. Tola xente que conozo, cuando compra un ordenador nuevu o lo que seya, diz, “tengo que baxar l’Office pa instalalu” o “tengo que pidí-ylu a nun sé quien que me lu dexe”, pero nadie diz, “voi a usar ésto, que ye llibre y qu’amás funciona mui bien”.
Por exemplu, en cuestión d’ofimática, l’Open Office, pa min, polo menos, en función de lo que se pue facer con él, pa facer trabayinos, ta mui bien. Ye un programa mui competitivu.
Pero n’otes materies ye mui difícir competir. Por exemplu, trabayo en diseñu gráficu, y trabayar con Gimp ya Inkscape n’Ubuntu ye mui complicao comparao coles posibilidaes qu’ofrez el software d’Adobe, que ye’l gran dios de la so categoría. Aparte de problemes con otres munches incompatibilidaes derivaes d’ello, como son tipografíes y más coses.
Pero mui poca xente paga por usar esos programes, anque trabayen nel campu del diseñu gráficu y tengan empreses contundentes. El problema de base que tenemos nesti pais ye no económico, les perres nun son un factor diferencial a la hora d’escoyer ente trabayar con esti software o col otru.
Xabiel García Pañeda
Home, ye que si’l software que ye de pagu se piratea, entos el llibre ta al mesmu nivel.
Pa un usuariu común, non un téunicu, ¿cuála ye la diferencia?
Él nun va a reutilizar el códigu, nin lu va ampliar, eso ye pa una minoría, pero él, como usuariu, quier navegar por fueyes, quier ver películes, y la diferencia pa él ye que ye gratis o non-gratis.
Y resulta que pa él nun hai diferencia, ¿por qué? Porque lo pirateamos too, coño.
Pero esi ye otru tema. Si lo tamos faciendo bien o non, o si les empreses se dexen, porque toi seguru que les empreses déxense. Con que paguen les empreses va bien, y cuando non méten-yos un paquete que pa qué.
Eso funciona seriamente nos paises nórdicos, pero nosotros queramos o non, tamos ehí al borde, somos el norte del sur, y pirateamos muncho.
El planteamientu que faigo, obviamente, ye’l d’un informáticu que cree que pa que la informática se desarrolle tien que mover negociu, porque si non, los que somos informáticos, los que vienden productos informáticos, nun ganamos perres, y a la hora la verdá, manducamos, y los que tienen fios, van a escuela y compren llibros, y como los llibros nun son llibres, hai que pagálos, y los zapatos tampoco son llibres…
Xandru Armesto
Ye que tas plantegando la idega de negociu de cobrar por productu, y el modelu nel software llibre camudó muncho. Yo cobro pol sofitu técnicu.
Tas diciendo: ye que cobro polos zapatos, bien, pues yo cobro por llimpialos.
Tas n’otru modelu de negociu distintu.
Pero’l modelu de negociu de la industria informática española ye’l cobrar polo que te viendo. Porque pa que’l modelu de negociu del mantenimientu seya lo bastante voluminosu, teo qu’instalar esi productu en munchos sitios.
El modelu de negociu del mantenimientu ta bien n’entornos grandes, tamién depende de qué productos. Y güeyu, el mantenimientu en software llibre ye muncho más grande porque, al facese de forma comunitaria, xenera munchos problemes, d’actualización, de paquetes que nun casen bien unos con otros… y esi mantenimientu ye productivu. Ye un bon negociu.
Incluso pa un informáticu, va a una empresa y diz, “mira, tienes que pagame un millón de pesetes”, y nun tien futuru. Pero si diz, “mira, doitelo gratis” pero va col mantenimientu. Ye un buen modelu.
El software llibre nun ye mas qu’otru modelu de negociu más. Y ye interesante y además necesariu, pero nun pué ser l’únicu modelu.
Un asistente
Nel momentu en que’l modelu económicu del software llibre pueda enfrentase con empreses habrá manera de que se ruempa’l monopoliu, pero mientres, nun dexamos de tar a nivel domésticu, que nun dexa de ser un primer pasu.
Tamos tratando muncho’l software llibre dende’l modelu de negociu, y ye una parte importante y mui interesante, anque a min, personalmente nun me da muncho más. En sin embargu tamos escaeciendo un puquiñín la parte que tien que ver coles implicaciones sociales.
Cada vez que se crea un artefactu tecnolóxicu y se mete nuna sociedá, va tener unos efeutos. Pero lo importante nun ye l’artefautu teunolóxicu en sí, sinon les construcciones sociales que se faen alredor.
Y nesi sentíu, tolo que tien que ver col software privativu propón un modelu social, mientres que’l software llibre propón otru modelu social bien distintu.
Per un llau ta’l modelu del ‘yo soi’l que sé’, ‘yo soi’l que tien el conocimientu y tu nun lu pues tener, ye míu y yo nun te lu voi dexar’, ‘tu nun pues compartir esto que tu compres, esto que tu tienes’. Ye como si tu comprares un coche y llega un amigu y dizte ‘oye, ¿déxesme’l coche?, y tu dices ‘non, nun te lu pueo dexar, porque llegalmente, cuando firmé’l contratu dixi que yo soi l’únicu conductor’.
Mientres que nel software llibre ye xusto lo contrario, ye la construcción de la comunidá alredor del artefactu. Una comunidá que comparte, qu’intercambia conocimientu y que construye na dirección que decide la propia comunidá. Non na dirección que decide un xefe metíu nuna oficina.
Ye verdá que munches veces les comunidaes nun funcionen como deben, pero polo menos hai una comunidá de persones, de xente normal, decidiendo.
Por exemplu, nosotros, cuando queremos llocalizar el sofware, simplemente ponémonos en contautu cola xente que lu tien y vemos cómo facemos la traducción. Y ellí, nadie te diz ‘non, non, ye que nun puedes’ ‘non, non, ye qu’esto ye nuestro’. Sinon ‘venga, alantre, les ferramientes son éstes’, ‘puedes tirar per equí o per ellí’’ si tienes alguna idea de meyora, pónnosla, igual lo facemos’.
Y, claro, metete dientro una comunidá d’esi estilu, ye tamién aprender cómo funcionen, y participar dientro un esquema de llibertá.
Pero tas falando d’una comunidá de desarrolladores, non d’una comunidá d’usuarios.
Y el usuariu sí participa, porque si l’usuariu nun lo ve, nun lo compra, y si nun lo compra, la empresa va a tomar pol sacu.
La cuestión ye que l’usuariu siempre tien la última palabra, nel software llibre y nel software propietariu.
Vi grandes empreses que se dieron grandes hostiazos, y falamos equí d’IBM, que fue’l qu’inventó too esto, pero col software diose grandes hostiazos. Y cambió la so filosofía de negociu totalmente. Y apuesta muncho pol software llibre porque ye una de les qu’apurre perres col conglomeráu Sun pa que Linux espoxigue. Y tamién cambió la so filosofía de sacar paquetes y ta puxando por proyeutos a medida.
Davos cuenta, ‘yo faigo un productu a midida pa un paisanu, y doi’l códigu, códigu abiertu, y además dexo que faiga con ello un panderu’. Y en munchos casos compártese beneficios, o revéndese.
Nun ye un modelu de software llibre. Yo cobro-y y retengo cierta parte los derechos. Pero sí m’aproximo. Nun ye una comunidá, ye tamién una alternativa de negociu.
Xandru Armesto
Pero la construcción social que se fai alredor ye bien distinta.
Yo puedo envia-y un informe d’errores a Microsoft que va ayudar a meyorar el productu, pero nel momentu nel que doi a enviar, esi informe d’errores conviértese en propiedá esclusiva de Microsoft, y la mio aportación van utilizala pa facer esa meyora y pa vendéla otra vez. Mientres que nel otru modelu non. Nun oculten esi informe d’errores, ye vistu por cualquiera y con él constrúyese’l siguiente pasu.
Una cosa que me prestaria enllazar agora con esto ye’l tema de l’Alministración. Hasta agora tuvimos falando del tema de grandes empreses, y la gran empresa n’Asturies ye l’Alministración.
Falando del tema del conocimientu, del que faló antes Xandru, si apuestes pol software propietariu basau en determinaes empreses, el conocimientu nun revierte nel texíu de la zona. Mientres que s’inviertes nun software que ye llibre si puedes xeneral, en dalguna manera, un texíu alredor.
Esti ye’l casu d’Eslema, por exemplu, simplemente, ¿cuantes persones contratastis? ¿Cinco, non? Non, cuatro. Bueno, cuatro persones, ye dicir, gracies a utilizar software llibre creáronse cuatro puestos de trabayu. ¿Puede contase un poco la esperiencia?
Un asistente (Xulio Viejo)
Bueno, el procesu pol que preguntes foi un poco na llinia de lo que comentaba antes Xandru. Nun ye un procesu orientáu a l’Alministración o a empreses, ye simplemente un procesu que naz d’un impulsu más o menos natural de búsqueda de conocimientu. Nun ye un proyectu orientáu a financiase pa desembocar nun productu concretu, como puede ser el ‘gran traductor’ sinon simplemente como una ferramienta d’análisis de datos llingüísticos, de mano, por un interés puramente filolóxicu.
Pero incluso’l segundu pasu tampoco respuende a una voluntá, digamos mercantil, nin muncho menos, o política si quies, sinon simplemente desarrollar una ferramienta que tien una aplicación cultural y polo tanto, de tipu social. Y l’Alministración recibiólo nesi plan.
Y bueno, si me permitís rematar l’argumentu, aunque toi asistiendo a esta tertulia un poco de ‘outsider’, al final, el problema esti del software llibre, y del so potencial aprovechamientu social o comercial, nun ye mui distintu del que puede representar la escritura, por exemplu, como ferramienta facilitadora del conocimientu.
La escritura, si lo pensamos un poco, ye’l primer software de la humanidá ¿non?, el primer mecanismu de computación formal de conocimientu. A partir d’ehí, ¿hasta qué puntu eso, l’accesu a la escritura y les posibilidaes qu’abre la escritura, debe contemplase l’interés social, cultural, de cohesionar comunidaes, d’avanzar hacia oxetivos comunes? ¿y en qué momentu da el saltu a productos ya concretos de tipu privativu?, que me paez un saltu lexítimu, eh.
Xabiel García Pañeda
Yo lo que defendo equí, fundamentalmente, anque pueda paecer que toi a favor d’otres temes, más que nada por facer d’abogáu del diablu, y porque haya salsa na tertulia, ye qu’en cada momentu y en cada entornu hai un modelu de negociu que ye meyor qu’otru.
Si viendes poques unidaes, y de productos mui específicos, dende’l puntu vista nuestru, de profesionales del sector, el software llibre paez que nun ye mui interesante. Si vas a otru tipu de modelos, puede ser interesante un modelu intermediu. Y si vas a grandes distribuciones, incluso onde se reunen conxuntos d’empreses, o que haya otros intereses comerciales pa destruir un monopoliu, el software llibre ye perfeutu.
Y en temes del entornu cultural, y sobre tou en zones perifériques abandonaes de la mano de dios, como ye la nuestra, entós ye la única solución que nos queda pa munches coses.
Y a eso hai que xugar, con dos oxetivos, primero, dar el meyor serviciu al usuariu, al ciudadanu, pa que la sociedá espoxigue y segundo, consiguir el meyor modelu de negociu pal profesional, que ye’l qu’emburria.
Porque quiero dexar clara una cosa, ye diferente’l profesional de la informática, que’l brico-informáticu. Lo mesmo que ye diferente el que ve Bricomanía y fai unos chorrios como faigo yo, que’l que quier vivir d’ello. Tienen oxetivos diferentes.
Y eso pasa na informática, y tovía nun tamos lo suficientemente maduros pa diferenciar eso. Munches veces piénsase que cualquiera fai un sistema, y nun ye lo mesmo facer una fueya web fácil, que la fai cualquiera, a facer un gran sistema. Y entós, entren los brico-informáticos y los profesionales traten de facer otres coses.
Quisiera retomar delles coses que comentasti enantes.
Per un llau’l tema del usuariu. Dicíes que al usuariu nun-y importa tener accesu al códigu porque nun lu va a modificar. Pero creo que tamos olvidando cuestiones importantes como’l tema de la privacidá. Una de les llibertaes del software ye utilizalu pa lo que a ti te de la gana.
Nel software privativu lleven años desarrollándose, y empezarán a implantase seguramente en breve, sistemes de reducción de derechos. Ellos llámenlos d’otra forma pero’n realidá son restricciones de derechos. Programes ente los cuales el fabricante, el dueñu del software, que nun yes tu que lu pagasti, ye él que lu tien llicenciáu, podrá acceder al to equipu pa comprobar que lo que tienes ye llegal. O seya, puede acceder al to equipu pa borrate un ficheru, como pasó colos llibros eléctrónicos. Va poco, cola novela de George Orwell, xente que compró a través d’internet la novela de 1984, si nun m’enquivoco, y de repente llegaron un día, prendieron l’aparatu pela mañana, punxéronse a lleer a partir de la páxina 53, porque yera onde taben, y nun taba. Nun taba porque’l dueñu borrólu. Si, efectivamente, devolvieron les perres, pero nun yes dueñu de lo que tienes dientro’l to equipu. Un equipu y una llicencia que tu pagasti, y nun yes dueñu.
Entós al usuariu sí que-y importa’l tema l’accesu.
Y per otru llau, comentasti’l tema de l’Alministración. Hai gran cantidá de proyeutos de software que se desarrollen porque l’alministración pon pasta. Y nun necesariamente son toos software llibre. Dellos son software privativu.
Entós, curiosamente, col dineru los tos impuestos tan desarrollando un software pol que te van cobrar después. Ye acoyonante, van cobrate dos veces, por desarrollalu y encima vas tener que paga-yos por esi software cuando lu quieras usar.
Un asistente (Xelu Neira)
Una cosa que me prestaría que se tocase un puquiñín ye’l tema del software llibre n’Asturies y que dalguién comentase sobre coses que se tan faciendo equí’n software llibre. Por exemplu l’otru día presentóse Astúrix, una distribución de Linux fecha equí y por asturianos y hai xente equí tamién que trabaya con interfaces y desarrollos n’asturiano.
¿Cuál sería l’interés que puede tener p’Asturies el software llibre?
Xabiel García Pañeda
Bueno, como naide fala, en cuanto’l tema del software llibre n’Asturies, yo asistí a la presentación del Eslema, y paezme mui adecuáu’l modelu de negociu que se utilizó, partiendo de la xente que ta trabayando nello, sobre too los d’Alicante. Y teniendo en cuenta que quizá l’interés comercial yera nulu, y consiguiéronse unes perres de l’alministración, y va dar un serviciu mui bonu.
Y cuando vi’l productu final tuvi que decir: quedó mui bien. Y felicítovos dende equí.
Por embargu la distribución d’Astúrix nun la vi, pero creo que ye mui bono. Y tamién puede xenerar negociu.
En cuanto al tema de que l’Alministración trabaye pol software llibre, tien una cosa bona y una cosa mala. La cosa mala ye que los elementos que se tan usando pa facer esos sistemes, munches veces son menos desarrollaos y más primitivos que los que se compren, y al final lleva a que l’esfuerzu y el tiempu de desarrollu ye muncho más grande que comprar un paquete.
Y tien una cosa bona, que tienes el control, y vas ser tu’l que tienes que consiguir que funcione o que nun funcione, y mañana tamién puedes modificálo o correxir dalgún defeutu.
Y encima vas formar xente equí, n’Asturies, vas dar trabayu, y eso ta bien tamién. Anque pol contrario va costáte más perres.
Nun se si vos dais cuenta, pero imaxino que sois toos informáticos y faláis como tales. Yo soi l’únicu reconvertíu a la informática, colo cual d’informática sé bastante poco. Pero sin embargu antes falabes de modelos de negociu y de cuando los proyeutos son pequeños y yo creo que al final eso ye una visión que lo que vas facer col to modelu de negociu, non del modelu en sí.
Por exemplu dicíes que’l software llibre funciona mui bien pa coses pequeñes, pero Open Bravo ye software llibre. El tema ye que’l modelu de negociu de Open Bravo nun ye’l productu, ye básicamente’l formate a ti, el serviciu que te pueden dar, la consultoría, que val un güevu, y por mui llibre que seya, nun intentes parametrizalo tu.
Sé dalgo d’informatica y en dos años nun fui capaz de dar d’alta un almacen tovía.
Conclusión, el modelu de negociu, ¿énde ta?, ¿na llicencia del productu? o ¿nos servicios que vas desarrollar después?
Y un modelu de software llibre permíteme formar al tío. Y cuidao ¿eh? Que val una pastísima. Toi falando de 15.000 euros pa entamar con un grau decente.
Y p’acabar, ¿daisvos cuenta lo casi imposible que ye montar una empresa media, d’usuarios medios, con software llibre?
Hasta que nun seyamos capaces de qu’un puntu se siente y pueda facer un TC, daqué que faen toles empreses - toles empreses tienen nómines más o menos, con software llibre- la batalla contra Microsoft tenémosla perdía.
Otru asistente
Ya, pero por exemplu’l navegador Firefox ya entama a vese bastante xeneralizáu nes empreses. Yá nun ye una cosa qu’usábamos cuatro frikis.
Ye perder el miéu. Una empresa siempre ye conservadora, nun va arriesgase a dar un pasu, a facer una cosa que después puede costái munches perres.
Pero si ve que furrula, y que va hasta meyor…
Nesi sentíu ye mui interesante’l tema la formación. Y engánchome col tema míu, que yo esperaba una tertulia menos centrada nos modelos de negociu.
Nel tema la educación hai un discursu xeneralizáu so les nueves tecnoloxíes. Tienen que tar en tolos llaos, y coño, na escuela tamién.
Pues nada, compramos ordenadores y metémoslos na escuela. Prácticamente en toles escueles d’Asturies tenemos un aula de venti ordenadores, con un servidor y una impresora láser de la de so madre, y prácticamente nadie fai nada con ellos. ¿Por qué? Primero porque la xente nun ta formada, y segundo porque’l sistema falla continuamente.
Por exempu, tenemos una conexón a Internet que ye de cliente normal, cola diferencia que na escuela conectamos venticinco equipos a la vez, intentando entrar toos en PuertuAsturies a la vez, y claro, ye daqué imposible.
Y agora colos portátiles estos, ye una cuestión mui curiosa, porque al final quieren convertinos en comerciales, yo nun quería falar de modelu de negociu pero al final quieren convertime nun comercial, quieren que-yos enseñe a usar Windows a los neños, y bono, ye como enseñálos a fumar, nun sé …
Ye dicir, ¿cuál ye l’oxetivu de formar nuna escuela con ordenadores? Pues una alfabetización dixital, que llamen, que ye saber desenvolvese nesti mundu de les nueves tecnoloxíes, de les redes, del accesu a los dispositivos, ¿non?
Sí, sí, pero con Windows ¿eh?
Y la entruga ye, ¿por qué Windows?¿por qué non otru?
Primera, bueno porque Windows ye más barato…, ye lo qu’usa la xente…, ye nun sé qué… son coses que se suelen decir.
Bono, ye lo qu’usa la xente… ye verdá…, los neños tamién usen videoconsoles y nun les tenemos na escuela, nun los enseñamos a utilizar videoconsoles… de momentu…, hasta que nun haya otru pautu electoralista per ehí.
Lo que s’enseña a los neños con Windows, nel mio cole estudien tres llingües, inglés, castellanu y asturianu, sólo lu pueden usar nuna llingüa, sólo lu pueden usar en castellán, porque sinon tendríen que pagar la llicencia otra vez, n’inglés, porque por supuestu nun lu van poder utilizar n’asturianu a nun ser que pague una burrada’l gobiernu d’esti pais, que nun lo va facer.
Si lo que se-yos enseña con esi software nun val pa utilizar otru, nun merez la pena. Nun merez la pena enseñálo. ¿Pa qué lo vas facer?
Los que tan en sestu de primaria, cuando acaben nel institutu, el sistema operativu col que se van enfrentar nun va ser ya’l Windows xp que ye’l que tenemos, o’l siete o lo que seya, colo cual van tener que readaptase otra vez.
Si lo que-yos enseñamos agora con Windows val pa los siguientes, entós ye que los escritorios son más o menos asemeyaos, entós ¿por qué nun utilizamos l’otru, el llibre? Que además sí que podemos facer que los neños, cuando accedan al ordenador lu vean n’inglés nes clases d’inglés, lu vean en castellán nes clases de castellán y lu vean n’asturianu nes clases d’asturianu, y s’enfrenten a una intezfaz n’asturianu nes clases d’asturianu, que ye una de les coses nes que Softastur tamos metíos.
Y curiosamente los paquetes educativos del software llibre son infinitamente más potentes que los paquetes privativos. Por exemplu pa llectura utilízase el programa Pipo va a nun sé onde, y resulta que la personalización que puedes facer d’esi programa ye mínima. En sin embargu, si vas al software llibre puedes editar, y personalizar la clase. El maestru puede utilizar esos programes como quiera, cortar y pegar, como se fizo tola vida coles fiches.
Y nel casu d’Asturies el software llibre na educación ye mui importante, ye la única manera d’averase a les nueves tecnoloxíes que falen n’asturianu.
Un asistente
Ye la canal pa la normalización del asturianu, que la mocedá pueda acceder a les nueves tecnoloxíes n’asturianu ye, probablemente, más importante qu’otros elementos como la lliteratura, por exemplu.
En sin embargu ehí alcontramos de frente a l’alministracuón del Principáu. Yo llevo’l mantenimientu de dalgún institutu, y en dellos convencí al director pa usar el software llibre, porque nun costaba la llicencia. Y llegó a ponese, pero cuando ya taben más o menos, el Principáu d’Asturies compró pa cada ordenador de tolos colexos una llicencia de Xp. Y nada, por orden del director, evidentemente, quité Llinux.
Si ehí hubiérase respetao’l fechu de pagar la llicencia…, y Microsoft nun fuera mui llistu, que sabe que onde primero tien qu’actuar ye na educación, y prácticamente les regala, porque lo que ta faciendo ye, evidentemente, garantizase’l futuru.
Xandru Armesto
Y eso ye enseñar a fumar.
Poli Mencía
Yo nun sé si ye lícito que l’Alministración contrate software priváu.
Un asistente
Yo lo que veo ye que ye acoyonante l’estáu nel que tamos agora mesmo, con una blogosfera con una calidá ablucante, con un sistema operativu n’asturianu, col Eslema, col que puedes ver cualquier web n’asturianu.
Tamos nun momentu qu’hai años nun soñáramos.
L’otru día hasta provocaba’l mio compañeru de trabayu diciendo-y: mira, punxeron La Nueva España n’asturiano, ¡méca! y El Comercio tamién.
Otru asistente
Ónde vamos a parar. L’acabóse ye ésto.
Poli Mencía
Tenemos que cortar yá. Creo que la tertulia fue un éxitu, tamos equí hasta de pie. Nun cabemos.
Bueno, pa concluir, lo importante ye que la educación adopte modelos de software llibre, o polo menos dar alernatives a la xente. Porque no que ye’l marcu, digamos de negociu, pueden combinase les dos alternatives. Y que pa la llingua asturiana paez que’l camín n’esti momentu ye’l del software llibre, como pa cualquier llingua que seya pequeña.
Porque, por exemplu, comentabeis antes el tema de la traducción, el costu de poner el gallego en Microsoft paezme que fue d’un millón d’euros, y en Cataluña dalgo pol estilu. Más el caltenimientu, porque pa cada versión nueva tienes que volver a pagar. Vamos, pa quien s’encarga de facer eses coses ye un negociu redondu.
Y dende’l puntu de vista míu l’Alministración sí que debería apostar claramente por modelos de negociu llibre, porque, como decíais, nun ye solo’l tema les perres, sinon que ye tamién el conocimientu.
Y nada, agradecevos a toos la presencia equí. Y anunciar que la prósima charra va ser el mes que bien, sobre la incineradora. Hasta más ver.
