Resumen de la tertulia del 26 d’abril de 2012
Ordenances
antisociales o espacios públicos de llibertá
Na que participaron
· Roberto Porras
Representante de la
Asociación contra la esclusión ALAMBIQUE
· José Manuel
González
Representante del Colectivu asturianu de lesbianes,
gais, transexuales y bisexuales
(LGTB) XEGA
Representante de Bloque por Asturies-Unidá Nacionalista Asturiana
Presentó: DaniFernández Blanco
Daniel Fernández
Blanco
Vamos a entamar cola tertulia de güei, que trata sol
proyeutu d’ordenanza de convivencia ciudadana que se ta plantegando en Xixón
por parte del gobiernu de Foro. Nun entamu taba orientau más bien hacia’l
botellón, l’ociu nocturnu y les molesties pa los vecinos, pero cuando se
presentó a la sociedá vemos que, nesti borrador, el botellón y l’ociu nocturnu
ye una parte mínima y hai otros apartaos, bastante más grandes, qu’axunten
otres coses qu’alerten de les pretensiones reales que puede tener el documentu.
Y la tertulia, lo que se plantegó ye, dexando un poco aparte
lo del ociu nocturnu, que vemos un poco anecdóticu, tratar el tema de los
derechos y llibertaes y la regulación y l’usu de los espacios públicos. Y pa
eso tenemos equí a Yolanda, que ye abogada y podrá danos una opinión.
Llueu vimos que pretende también regulase de forma esplícita
la prostitución, pero non p’ayudar o buscar soluciones, sinon p’acutar los
sitios onde nun se puede exercer, alloñar el problema del centru urbanu, y
también paez que se quieren regular les relaciones afectives nos espacios
públicos, y pa considerar toes estes coses contamos cola colaboración de José
Manuel, que ye de XEGA, colectivu que tien trataos esti tipu de temes tanto
n’otros alderiques como na so páxina web xega.org.
Y pa falar de la exclusión social, de mendicidá, de
restricciones a persones que nun tengan un perfil ‘idóneu’…, anque Foro ya dixo
que diba quitar estos temes del reglamentu, la verdá ye que tan ehí, y esa ye
la vocación del documentu, tenemos con
nosotros a Roberto, a Pablo y a David, que son xente del colectivu Alambique,
que van poder danos la so opinión al respeutu.
Y si vos paez, podemos entamar con Alambique, que ya tienen
trabayáu’l tema y tovía ayeri tuvieron faciendo una acción de visibilización onde
la cai Corrida.
Val, ta bien qu’empecemos porque vamos facer una reflexón
más bien xeneral. Nun vamos paranos nos puntos concretos de la ordenanza por nun
cayer na trampa de discutir muncho un documentu que ya de partida creyemos que
nin siquiera hai que valorar. Creyemos qu’hai qu’oponese a él claramente con
una entruga que deberíemos de contestanos. ¿Ye de verdá necesaria una ordenanza
cívica pa una ciudá como Xixón?
Entós vamos facer una reflexón xeneral parando nel tema de
la esclusión social. Lo primero, facer delles consideraciones previes. Estes
ordenances nun tienen color políticu. Equí ta promoviéndoles Foro, en Uviéu
promovioles el PP, en Barcelona promovioles el PSOE. Formen parte d’esi intentu
de control de les ciudaes, d’esi configurar l’entornu urbanu de les ciudades
dientro d’esi modelu social y económicu nel que tamos inmersos agora mesmo.
Y otra consideración previa, que la comentaba antes Dani, ye
qu’equí en Xixón yera difícil que surdiese de manera natural como n’otres ciudaes,
polo qu’intenten colalo col tema del botellón y l’ociu nocturnu que suponen
problemes en dellos barrios de la ciudá y ye la escusa perfecta pa introducir
una serie de cuestiones que veremos agora.
¿Con qué oxetivos se plantega esta ordenanza? Pues con tres
claros, por un llau un mayor control social. Son les nueves formes del control
social, que nun tien por qué facese cola represión pura y dura.
Otru ye la privatización del espaciu públicu, y col tema del
ociu, ye evidente. Tú non puedes facer nada na cai. Nun puedes comer na cai,
nun puedes beber na cai, siempre y cuando nun seya n’espacios d’hosteleríes.
L’espaciu públicu privatízase p’actividaes privaes.
Y un tercer oxetivu xira alredor de tolo que tien que ver
cola invisibilización y criminalización de la probeza y de la crítica social. Y
d’ehí vienen tolos artículos que tienen que ver cola mendicidá y tamién colos
colectivos. Como lo de que tienes que poner los carteles sólo nos espacios
habilitaos al efeutu, que, na ciudá de Xixón deben ser diez paneles verdes que
casi nin se ven, y cada vez qu’hai una obra, retírenlos, porque “pa qué vas
dexar un sitiu onde la xente pueda poner un cartel”.
Estos oxetivos xeneren varies consecuencies. Nosotros
creyemos que cuatro principalmente, anque llueu van xenerar munches más. Por un
llau mayor esclusión social. Cuando invisibilices, marques y criminalices,
pones el focu escontra unes persones, unos grupos y tas xenerando un discursu
contra eses persones.
Mayor racismu social, nun tanto racismu hacia les persones
inmigrantes, pero sí escontra les que menos tienen. Una estigmatización de la
probeza y la marxinalidá.
Y, por últimu, un afondar nes ciudaes escaparate. Y ehí vien
el tema de la prostitución, sacalo fuera, sacar fuera de les casi la mendicidá.
Equí lo importante ye ciudaes escaparate que nun perturben la paz del buen
consumidor.
Exemplos d’esi tipu de ciudá escaparate tenémoslos equí nel
barriu del Carmen. A naide-y esmolez que’l barriu té cerrau y nun pueda entrar
una ambulancia porque ta too privatizao por terraces d’hostelería. Claro que la
hostelería tien que dir bien y que tien que tener les sos terraces, porque nun
dexa de ser parte de la cadarma llocal, pero a naide-y preocupa si los
hosteleros te monten una fiesta privada nesos espacios públicos pa fumar y consumu d’alcohol. Eso nun esmolez. Pero
preocupen otres cuestiones que nun controlen.
Y ya pa terminar esta introducción, decir cómo ta la
situación del borrador. Por un llau topóse una oposición bastante radical por
parte de dellos colectivos sociales, por desgracia, mui pocos, que dixeron que
non, qu’esto va contra les llibertaes, contra los derechos, que criminaliza la
probeza, y demás. Una crítica bastante dura por parte de la federación d’asociaciones
de vecinos, que se tien opuesto al borredor de partida, en sin querer negociar,
aún teniendo en cuenta situaciones como les del barriu de Cimavilla o del
barriu de El Llano, que son un poco más particulares que’l restu la ciudá.
Tamién decir que los otros tres partíos que tan nel Ayuntamientu tamién
s’oponen a esi documentu, inclusu los asesores que llevaben a les meses de
discusión oponíense a esi documentu, y tan viviéndose situaciones totalmente
surrealistes de qu’asesores propuestos pol propiu equipu de gobiernu tan a la
contra d’esi documentu. Y eso xeneró que se vayan a echar p’atrás dellos
artículos. Y el tema de la mendicidá tan entamando a replantegáselu y dlgún
otru tema más por ehí sueltu. Pero eso nun quier decir que vaya a quedar meyor
nin nada parecío, porque eso da pena y dolor, pero polo menos xeneró una
oposición clara.
Y nesa llinia tan colectivos intentando facer daqué na cai,
nosotros, dende Alambique, intentamos visibilizar el tema, y ayeri mesmo
tuvimos una acción de denuncia na cai. Y, bono, así ta’l panorama nesti momentu.
Por parte de XEGA tenemos fechu un análisis nesti sen.
Asistimos nesti momentu a un fenómenu que responde tal vez, como dices, a la
privatización, pero que nel fondu, yo creo que ye un mieu a la llibertá. A la
llibertá hai que pone-y coto rápido, nun seya que se la tomen en serio.
Voi centrame en varios aspeutos d’esta ordenanza. En primer
llugar llámame l’atención que ye bastante estensa y tien unes disposiciones que
paecen xustificala y que me parecieron, cuando les lleí, como mui positives.
Ves que se fala de la Constitución, fálase precísamente de la llibertá,
d’asegurar y amparar derechos, y hai hasta apartaos onde se declara la ciudá
llibre d’homofobia, onde se diz específicamente que, dientro del fomentu de la
convivencia, quierse promover el respetu a la diversidá y poniendo énfasis
contra los comportamientos discriminatorios, especialmente los de naturaleza
xenófoba, racista, sexista u homófoba.
Bien, entós, hasta equí, yo diría que bien, paez que ye
positivo. Pero dempués, cuando escarbes un poco y vas a lo afectivo-sexual, que
ye lo que más tien que ver con nosotros, vemos que tou l’artículu ventiseis ta
en contradicción con tolo anterior. En contradicción manifiesta.
Por un llau dase caña a la prostitución. Y la nuestra asociación,
que tamos dientro de la federación estatal de lesbianes, gays, bisexuales y
transexuales, FELGTB, somos unos sesenta colectivos,
tamos claramente d’alcuerdu que, igual que les muyeres, el movimientu
feminista, tuvieron que entamar a decir que nin sumises, nin víctimes, equí la
prostitución continuamente ta victimizándose interesadamente, dizse que too son
mafies, bien, que pongan les mafies del serviciu domésticu, que ye más grave
tovía, que falen de la recoyía de trabayadores qu’hai en dellos sitios, na meyor
tradición del sieglu XIX, que los lleven nuna furgoneta y los dexen, y si se-y
corta un brazu a ún, como tien pasao, tíreslu na cuneta.
Y observamos que la prostitución prohíbese aún dientro d’esi
limbo xurídicu qu’hai n’España. Y de les víes que tenemos, la de penalizar al
cliente y la de penalizar a la propia prostituta, equí recuéyense les dos,
porque diz l’articulu ventiseis que tanto ufiertar, como negociar, como
aceutar. Y esto ye novedoso, porque equí paez que ciertu seutor de la izquierda
penaliza ante too al cliente, modelu que tamién tien algún país nórdicu. Y
nosotros creemos qu’esto ye grave, especialmente teniendo presente qu’hai tou
un seutor de persones LGTB, sobre too muyeres transexuales, pero tamién varones,
y tenemos xera ehí. Repartimos miles de preservativos al añu, ves venir a
rapazos d’estos que llamen “chaperos”, que nun ye que seyan nin meyor nin peor,
ye’l so trabayu, vienen muyeres transexuales, vienen muyeres heterosexuales…
Creyo que lo qu’habría que falar ye más bien de derechos, de llibertá. Igual
que ta’l discursu de “nosotres parimos, nosotres decidimos”, pues “nosotres nos
prostituímos”. Una relación sexual ye una relación sexual, y puede nun implicar
más que un ratu de disfrute.
Podría ser aceptable, a lo meyor, si se falase de centros
educativos, entos protexeríase a una parte de la sociedá que son los menores,
anque habría que ver tamién lo que tan viendo los menores nesi mundu de la
televisión...
Y otru campu que nos paez tamién grave y que nos extrañó ye
lo del artículu 26.3 qu’especifica que tan especialmente prohibídes les
relaciones sexuales nos espacios públicos. Nun sé. De la xente xixonesa creyo
que, nun porcentaxe altísimu, tenémonos iniciao nes relaciones sexuales nel
espaciu públicu, nos coches, nos parques…
Camiento que ya tenemos dos códigos pa eso, que son el
códigu civil y el códigu penal, así que toi d’alcuerdu contigo en qu’esto
sobra. Y si n’última instancia hai un ayuntamientu que se plantega facer unes
ordenances de convivencia, pues que seya pa favorecer precísamente a los
sectores más necesitaos de protección, non pa dar un pasu más d’esclusión.
Paez que nos dicen, ¿la prostitución?, pues a través de La
Nueva España. Ehí sí. Pagáis cada anunciu seis mil o tres mil o trescientos
euros al añu y entós nun hai dengún problema. O si non, tornais a la
marxinalidá.
Na cai, bono, prodría ser que se protexan determinaes árees
educatives o asina, pero, home, creyo qu’hai sitios en Xixón que son de
siempre, y creyemos que nun tamos nin dientro de la illegalidá. Tar en un coche
en determinaes zones, tar en un parque… Hai otros llugares onde se regulen, a
lo meyor horarios… pero que tes nel to coche manteniendo una relación sexual
cola to parexa y que la policía te pueda poner una multa por eso creyo que ye
un pasu hacia atrás brutal.
Céntrome nestos aspeutos porque creyo que son los que nos
lleven a tener esti posicionamientu en contra a pesar de qu’hai unes
disposiciones introductories que paez que son pa protexer de la homofobia.
Pero’l propiu testu desprende unes actitudes que nun son tan positives.
Hai otros aspeutos que, de momentu, nun voi metéme n’ellos
porque nun son tan ‘LGTB’, como’l tema de los espacios públicos, los animales,
el botellón, el consumu de drogues, anque por supuestu puedo dar tamién una
opinión.
Yo voi facer una reflexón un poco más xenérica sobre la
ordenanza. Bono, parte de lo que diba a decir ya lo dixísteis vosotros, pero
pienso qu’hai que rechazar el testu dafechu, en sin entrar a valorar aspeutos
concretos de la ordenanza. Y hai que rechazala por dos razones. Nosotros
venimos diciendo dende’l menutu unu qu’esta ordenanza lo que tien, lo que vien
nel testu, ye un recorte de llibertaes. Un recorte de llibertaes qu’abarca
inclusu el derechu de reunión, de manifestación y dalgún otru más.
Por otru llau tamién pretende implantar un modelu de ciudá
col que nosotros nun tamos d’alcuerdu. Y, de la que venía p’acá venía pensando
cómo describir esis modelu de ciudá que nun compartimos n’absolutu, y que ye lo
que se ve nesta ordenanza, y definístelo mui bien colo de la ciudá escaparate.
Paez que ye un mundu ideal, onde nun hai suciedá, onde nun
hai nada feo, nin siquier nada que nos pudiera poner tristes. Que naide venga a
pedinos a la puerta’l supermercáu nun vaya a ser que se nos revuelva’l
desayunu.
Entós hai que partir de que tenemos que rechazala de por sí.
Ye un error además entrar en debates como por exemplu’l del botellón, porque
eso lo que fai ye centrar el debate en ciertos aspeutos y facer que nos
escaezamos d’otros que son igualmente importantes.
La primera reflexón que me vino a la cabeza cuando lleí la
ordenanza ye si realmente en Xixón necesitamos una ordenanza d’esti tipu.
Cualquiera que la garre y vea tolos comportamientos que se describen… hai
dellos que nin siquier se me teníen ocurrío… y cualquiera que nun conoza esta
ciudá, y nun conoza l’ambiente en que nos movemos, pensará, nun sé, que
básicamente ye una ciudá en sin llei. Polo que creo qu’esta ordenanza en
concretu nun ye necesaria.
Y, por otru llau, nun me considero una persona incívica, más
bien al contrariu, pero llevo militando dende hai munchísimu tiempu actívamente
n’organizaciones de tou tipu, y si calculo les veces qu’infrinxí esta ordenanza
nun m’entraben nos deos de les manes. Y les veces que de xuru les voi volver a
infrinxir nun futuru prósimu, porque hai comportamientos equí que, dende llueu,
nun tienen nada que ver col incivismu, si non más bien col exerciciu de la
llibertá, col derechu a protestar, col derechu a decir les coses. Y eso vien
equí regulao pa que nun se pueda facer. Y nun ye que me tenga por exemplu de
nada, pero soi una persona que milita activamente nuna organización, nun
colectivu cívicu que sal nun determináu momentu a pegar carteles, a
manifestase, o a poner unes pegatines, cosa que ta criminalizao nesta
ordenanza, con sanciones que, por ciertu, son especialmente altes, inclusu les
leves.
Y otra reflexón, que tamién comentásteis anantes, ye lo de
convertir l’espaciu públicu n’espaciu patrocináu. Tantu recorte de conductes y
d’exerciciu de derechos… pero claro, si nun pagues. Nun hai espacios pa que les
organizaciones puedan colocar carteles, nin pa que puedan facese oyer, o pa
colocar un puestu, en sin embargu les terraces tan ehí. Tampoco lo critico, ye
verdá qu’hai que compatibilizalo, pero tán ehí, y les mupis tamién y les valles
publicitaries tamién, y al final, muncho me temo que, si nun pues pagar nun var
topar un sitiu onde poner la to voz.
Y esta ordenanza tamién llama la atención po lo inusual de
la so lliteratura. Tien una parte que ye como una declaración d’intenciones,
que ta mui bien, y fala amás en varios artículos de que l’Ayuntamientu va
promover, va facer, va llevar a cabu…, fala de campañes informatives, de
polítiques de fomentu de la convivencia, de fomentu del civismu, de
comportamientos solidarios, de respetu a la diversidá, de campañes de
sensibilización… y claro, supongo que toos taríemos encantáos de que too eso se
ficiera. Pero creo qu’eso ye precísamente una parte de la ordenanza que ye
papel moyao. Igual que otres coses non. Les sanciones non.
Y tien una redacción que, francamente, mete un pocu de miéu.
Ye más propia como d’un manual. Trata como d’aspeutos morales, lo que ye un
poco estraño pa lo que tenía que ser una ordenanza de la convivencia.
Y otru aspeutu que me llama especialmente l’atención, y que
creo que va dar munchos problemes y ye mui indicativu de hacia onde vamos. Y
nun ye sólo esta ordenanza. Tamos asistiendo a proyeutos de llei, tamos viendo
sanciones a xente bastante inusuales… falando ya dende un puntu de vista
colectivu. Prácticamente en tolos comportamientos, quitando casos mui
concretos, como pue ser el de la mendicidá o el de la prostitución, en tolos
demás siempre se fala d’organizadores d’actos públicos, tanto d’indole
deportiva o cultural o de lo que seya. Eso quier decir que cualquier persona
qu’organice cualquier tipu d’actividá, lo que diz la ordenanza ye, nin más nin
menos, que tien que velar y responder porque naide de los que tean participando
ellí faiga dengún d’esos ‘malos comportamientos’ que ya vemos que son
variadísimos. Nun sólo tien que responder de que nun se faigan, si non qu’amás
si hai indicios de que se faen, lo que tien que facer ye llamar a los axentes
de l’autoridá inmediatamente. Y si nun lo fai, ye una infracción grave, penada
polo menos con setecientos cincuenta euros.
Y lo que veo ye que verdaderamente eso ye lo que se va a
aplicar d’esta ordenanza. Y, tal y como vien redactada, muncho me temo que va
depender munchísimu del conteníu de los carteles que se pongan, de lo que digan
les pegatines, de la mesa que se monte na cai o de los gritos que se den.
Y eso ye lo verdaderamente preocupante. Y por eso hai
qu’oponese a esta ordenanza sí o sí.
Y una última reflexón. Y equí nun quiero ponéme mui
xurídica, pero ye verdá que qu’hai conceutos mui difíciles de determinar
xurídicamente, llámense asina, “conceutos indeterminaos”, pero quiero llamar
l’atención en qu’equí hai munchos aspeutos de conducta, no que se consideren conductes
razonables dientru l’usu del espaciu públicu, onde s’empleguen espresiones como
‘usu indebíu’, ‘usu impropiu’ y eso ye lo que se supón que se va usar a la hora
de calificar la conducta. Y eso ye tamién especialmente preocupante, porque va
depender del raseru de la persona que te esté midiendo.
Eso ye asina a nivel individual, pero tamién a nivel
colectivu. Y cualquier persona que milite en cualquier tipu de colectivu
debería tar mui preocupáda, porque dexa la puerta abierta a que, práuticamente,
nadie s’atreva a convocar, nun digo ya a una concentración, si non actividaes
como un conciertu, por exemplu’l qu’hai pasao mañana pola oficialidá, o nun sé,
cualquier otru tipu d’actu públicu.
Y too eso al marxén d’esi modelu de ciudá-escaparate que
tampoco compartimos.
Relacionao colo que diz Yolanda, si esti borrador s’aplicara
realmente, al Sporting fúndelsu tolos
domingos que xuegue en casa, porque andar pela carretera ye sancionable, y el
qu’organiza’l partíu ye’l Sporting. Nuna fiesta de prau, nel momentu que nun
tes tomando una botella sidra xusto nel prau, puen sancionar. Evidentemente eso
ye inaplicable, colo cual requier una voluntá sancionadora detrás y eso ye mui
preocupante pola arbitrariedá que supón.
Esto si s’aplicara a tolos ciudadanos de Xixón… vamos, y
tien qu’aplicalo l’autoridá, nun almite denuncia. Por exemplu, cuando vas pegar
un cartel en Xixón, anque seya un llocal que nun tien nada, en Xixón hai
llocales onde se peguen carteles de tola vida, y que a los dueños da-yos igual
que los peguen, pero llega l’autoridá pública y puede sancionate.
El gobiertu de turnu asume unes competencies que puede
aplicar discrecionalmente. Y eso mete bastante mieu. Asina pueden dificultar
hasta l’estremu cualquier actividá que seya crítica, o que cenciellamente seya
alternativa.
Y otra cosa trasversal ye lo del 15-M, porque que se
sancione dormir na cai nun solo ye polos transeúntes, si ocupes una plaza
pública y duermes ellí pueden sancionate. Porque cargar la policía queda mui
feo na tele. Pero los ayuntamientos sancionen alministrativamente, y l’estáu ta
convirtiendo lo que yera alministrativo en penal, el ministru del interior ta
intentando convertir lo que yeren sanciones alministratives en cuestiones
penales. De fechu ya reconoció que sanciones a CGT en Barcelona, a CSI y a CGT en Xixón suponíen forzar la llei, y por eso
yera menester cambiala pa poder aplicala en sin problemes, y en sin embargu,
eses sanciones alministratives tan aplicándose agora nun ámbitu llocal, d’eso
ya tan encargándose los ayuntamientos.
Y hai tamién un componente moral. La moralidá d’una parte de
la sociedá quier imponese a toos.
¿Ésto nun podría aplicase a les procesiones de selmana
santa? Sí, podría aplicase, tal como tá ye sancionable. Nun van facelo evidentemente.
Pero probablemente a una manifestación que proteste sí que-y apliquen el
reglamentu.
Y en xeneral quier escluyíse a les persones que conlleven
problemes sociales, eses persones nun esisten. Quier escluyíse cualquier cosa
relacionada col sexu, el sexu ye malo. Creo que más que ser homofobu, más
qu’evitar la prostitución, lo que se quier ye “en casa y cola lluz apagada”.
José Manuel González
Llámame l’atención que nun se recueyan otros aspeutos que
son como obsesiones dientru d’esti campu relacionáu col cuerpu, como’l nudismu,
la ropa, esibir el costazu… estráñame que nun s’incluyeran.
Un asistente
Ye qu’equí hai munchu fríu
José Manuel González
Pero n’otros sitios como Barcelona tiénenlo como una
obsesión. Pero, pel branu, vamos ver, ¿a quien-y puede molestar un costazu?
Otru asistente
Nun-yos des idegues...
Ya, pero paez qu’hai aspeutos que se-yos escaparon. Porque
en Xixón practícase’l nudismu na tira de sitios.
Y amás hai muncha xente que sal de la playa y va hasta casa
col bañador.
Y estes coses tan puestes notres ordenances y, como decís,
forma parte d’un too.
Too esto sobra. Ya ta suficientemente regulao.
Yolanda González
Huergo
Otra cosa que nun se comentó ye que les conductes incíviques
ya tan regulaes notres ordenances. Ehí ta’l códigu penal por exemplu.
Un asistente
Yo vivo en Fomento, enriba d’una zona de botellón de toa la
vida. Pero a min el botellón y los bares y la movida nocturna sólo me molesen
en époques d’elecciones, que ye cuando cierren los bares a les dos de la mañana
y entós hai cuatrocientes persones baxo la mio casa dando voces a la vez,
porque cuando van retirándose poco a poco, la verdá ye que resulten bien poco
molestes. Nun sé la xente que sufre más que yo’l botellón qué opinará de si esto
ye una llei que de verdá los va a protexer.
Pero ye qu’el reglamentu nun intenta evitar el botellón.
Sanciona ciertes actitudes, pero ná más. Si nun hai campañes de
sensibilización, si nun se dan alternatives… Por exemplu, ta atacándose y
reduciéndose económicamente lo de ‘abierto hasta el amanecer’, que paez que
yera una alternativa, inclusu llegó a dicir el conceyal de cultura que
fomentaba lo de salir pela nueche, y qu’eso yera malo. Ta torgándose cualquier
alternativa d’ociu distinta a salir a beber.
Y ye un engañu pa les asociaciones de vecinos, ta
vendiéndose como que se va quitar el problema del botellón, pero nun va quitar
dengún problema, nin el botellón nin l’ociu nocturnu, nin siquier contra los
que piquen a los timbres indiscriminadamente, que tamién recueye
específicamente’l reglamentu.
Ye qu’eso nun lo puede aplicar nin la Stasi de la Alemaña
del Este [órganu d’ intelixencia de la antigua República Democrática Alemana,
reconocía como’l más efectivu del mundu]. ¿Cómo vas controlar estes
actitudes?¿A cuanta policia tienes qu’echar un sábadu pela nueche a controlar
esto?
Nun merez la pena nin tratalo. Ta nidio que ye la escusa pa
meter tolo que vien detrás. Pero ye que nin se molestaron en facelo bien.
Porque, a lo meyor, si argumentes bien esi asuntu, si fales d’un conseyu
asesor, si das alternatives…
Eso yera lo que proponía’l PSOE . El PSOE nun taba’n contra
de la ordenanza cívica, el PSOE lo que quería yera promover una comisión y que
tol mundu tuviera representau… enfin, aprosimadamente lo mesmo pero intentando
lexitimalo con un procesu distintu, incorporando a xente, xenerando un debate y
entós, asina como que tien más lexitimidá. Como nun pudieron facer eso,
porque’l gobiernu que tenemos equí, el de Foro, tien bastante poca cintura, que
bono, ya lo aprenderán m’imaxino, porque pa estes coses ye cuestión de tiempu,
y nun entraron nesi xuegu, y entós xeneraron esto col asesoramientu de la
policía municipal. El so asesor fundamental ye la policía llocal de Xixón, que
ye’l que va a los conceyos de distritu a presentar la ordenanza.
Esto ye ridículo, ridículo too, nun ya solo’l documentu,
sinon tol procesu. Que defienda esti documentu la policía llocal ya te dexa
entrever qué ye lo qu’hai detrás, que lo que se quier ye actuar policialmente
en delles coses y con esi marxen d’arbitrariedá que tais comentando. Como ye
imposible d’aplicar tal cual, queda a l’arbitrariedá de quien va a aplicala. ¿Y
eso qué va suponer? Pues que recaiga sobre los de siempre y nos momentos de
siempre. Nun va cayer na “normalidá”
entre comilles, non. Va cayer a los colectivos críticos, nes prostitutes, na
xente en sin recursos, y siempre n’espacios que nun seyan mui visibles, porque
aplicalo n’espacios visibles tamién va suponer conflictu.
Yolanda González
Huergo
Si finalmente s’aprueba esto o daqué asemeyao, porque
insisto en que da igual que se meyore esta redacción, porque, al final, ye’l
mesmu sentíu, a lo que va dar llugar inevitablemente ye a una aplicación
selectiva, porque una ciudá nun va tener nunca medios pa controlar toes estes
conductes.
Hai amás un error de fondu pol que tenemos que tar
nidiamente a la contra, que ye esa obsesión por normativizalo too. Esti ye un
error pergrave que lo que fai ye romper les mínimes relaciones sociales. Había
que intentar plantegar les coses d’otra manera. Una vez qu’entres a
normativilizalo absolutamente too, les relaciones rómpense. Incluso los
aspeutos positivos, como les campañes de sensibilización… eso, ¿cómo se
concreta?, ¿Qué va venir daquien de fuera de les realidaes d’equí a xestionar
esa campaña, con carteles y publicidá y tal?
Eso, al final, ye negociu pal que fai esa campaña.
Tenemos qu’entamar a danos cuenta que hai coses pa trabayar
a mediu y llargu plazu, y que inclusu se pueden facer coses a cortu y que nun
tienen que ver con normativizanos la vida hasta llímites insospechaos.
José Manuel González
Ye algo característico d’estos años. Ye como si-yos diera
mieu la transición. Los ayuntamientos paez que son parlamentos y tan encantaos
faciendo lleis. Sevilla con Izquierda Unida sofitando tamién contra la
prostitución. Ye increible. Y tan saliendo como hongos.
Roberto Porras
Y hai dos fases, porque hai ayuntamientos que corrieron
muncho y aprobáronles primero, como’l de Valladolid y el de Barcelona, y agora,
cuando vieron que nun se taba aplicando abondo, dixeron qu’hai más cuestiones
pa normativizar, y apliquen la segunda oleada.
En Valladolid van facer un cambiu muncho más drásticu a tolo
que tien que ver cola mendicidá, y en Barcelona cola prostitución.
Tan agora mesmo precísamente les prostitutes de Barcelona
protestando nel Raval.
¿Y nun creeis que con esto tan creándose guetos, mandando pa
la periferia los llugares onde puede haber venta de droga, prostitución,
relaciones sexuales más esplícites…?
Ye como si se xenerara una clase A, la que nomásteis como
ciudá escaparate, y otra de xente a la que tan persiguiendo, relacionada cola
esclusión social, que se van xuntando, poco a poco, protexiéndose… y que van tolerándose
en ciertos espacios periféricos porque nun los pueden eliminar, claro. Porque
les prostitutes de Xixón siempre tuvieron, entre comilles, “nel centru” y lo
que busquen, probablemente, ye sacales a un barriu, porque eliminar, naide va
poder eliminar la prostitución.
José Manuel González
Na práctica saldrá eso, pero lo que diz ye que queda
prohibido. La visión ye más global realmente, porque podíen dicir que les
movíen a espacios averaos a centros, o a zones urbanes de gran tránsitu, pero
non, equí dio-yos pol tema de les relaciones sexuales y n’otros sitios ye por
dir en camiseta, y nun país como esti, col calor que tenemos, y que siempre se
fizo. Pues non. Son como pasos atrás.
En Canadá discutióse que les muyeres que trabayen na
construcción puedan tar tamién en top-less, mientres qu’equí… na reforma del
PSOE creo que yera castigar al cliente, y a la prostituta dáben-y una palmadina
y sacaben-y una foto.
Too esto sobra, pero nun ye un islote, ye daqué se ta
xeneralizándose n’España n’estos momentos y creo que ye mieu a la llibertá.
Toi d’alcuerdu con que, al final, van crease guetos. Cuando
penalices daqué, y penalíceslo vía policial, al final la policía nun va igual
al centru que a otros llaos, y nun tan el mesmu númberu de policíes destinaos a
un sitiu que a otru. Entós, tarde o temprano, habrá llugares más fáciles pa
facer eses coses que se consideren amorales o lo que seya, porque,
evidentemente tienen un componente moral. Polo tanto la xente que quier facer
eses acciones, va desplazase ellí, símplemente porque ye más cómodo.
Yolanda González
Huergo
Tas falando de prostitución, y sí, les zones, en vez de tar
onde tan, van tar un poco más allá, pero, ¿y el restu de comportamientos
“incívicos”?
Si vas colocar folletos, colóqueslos onde la xente va velos,
y la pancarta pónesla onde va vese, y la “mani” farasla onde tengas que facela,
y dirás a dar les voces delantre de onde tengas que dales.
Y ¿quién ye’l que utiliza mal un bancu de los de sentase?
Hai munches conductes reflexaes equí que nun son
transladables a otros llaos.
Ye una penalización de too. Agora ya hai áries onde tas col
coche, o quedes con nun sé quien y dientru d’un contestu de discrección, podíes
facer llibremente. Pero n’esta llinia autoritaria y puritana de querer
controlar too, de nun dexar flecos… ye como una nueva edá media, ye facer que
nun haya nada del ser humanu que nun té regulao.
Por exemplu, nel campu de lo que son les relaciones
sexuales, agora ye que ya nun hai guetos, antes, tabes cola tu novia o col tu
noviu y nun molestabes a nadie… pero agora, con esti reglamentu, ye que tas
cometiendo una infracción, y que puede llegar a una multa.
Tas na playa, apartáu, ye de nueche, dime tu a quien molesta
eso, pero viente ún cola llinterna a decite que tas cometiendo nun se qué
delitu. Pero ¿qué delitu? Siempre se faló de los requisitos pa les relaciones
sexuales: llibres, persones adultes y llibremente consentíes. Ye lo que se dixo
siempre. Pues non, amás, en nun sé qu’espaciu. Ye que ye querer poner puertes
al campu.
Ye que son mui cínicos, porque ye lo que la mayoría tenemos
fecho, y ¿a quien molestes?
A ellos.
Ye la nueva llinia puritana y casposa, anque estrañaríame
qu’el PSOE la modifique, pondrála un centímetru más arriba o más abaxo tolo
más.
Un asistente
Lo que fai l’Ayuntamientu ye guardase un as na man. Ya lo
decís vosotros que ye mui arbitrario, bien, pues a ver cuando lo aplica. Cuando
haya colectivos que protesten, manifestaciones, carteles, o lo que seya…
inclusu dirá el PSOE agora mesmo, “bono, esto podrá paeceme mal o non, pero si
torno a l’alcaldía, igual colo de Cándido y Morala… taría encantáu de mete-yos
esto, o lo del conciertu pola oficialidá, esos nun ponen un cartel, porque yo
toi en contra d’eso”.
Así qu’agora pueden caltener la apariencia de dir a la
contra, pero van guardar esi as por si lu pueden utilizar más p’alantre.
Cuando lo del Naval taba Xixón enlleno pintaes, d’arriba
abaxu, taba la ciudá tomada, si eso torna a pasar, ya tienen un papel equí
bonísimu, la escusa perfeuta pa torgar lo que nun-y interese.
Ye una ferramienta, una ferramienta que igual nun usen, pero
que inclusu pueden amenaciar con ella.
La frase que repiten varies veces de que “los organizadores
de cualquier índole velarán pa que nun se produzcan estes conductes” que se
describen, “y si con motivu de los actos se realizaren, deberán comunicalo
inmediatamente a los axentes de l’autoridá” y si non cálquente una multa de
setecientos cincuenta euros, que a la segunda ya nun van ser sólo los
setecientos cincuenta, claro, eso lleva detrás una carga de profundidá.
Y amás, ya digo, repítenlo varies veces. Eso nun ye
casualidá. Tan alvirtiéndo: “güeyu colo que faes”. Agora, cualquier persona que
quiera organizar cualquier cosa, el que va pedir un permisu al Ayuntamientu pa
una concentración o pa lo que seya, tendrá qu’empezar a pensalo dos veces.
Ye que ye por cualquier cosa, cualquier comportamientu
qu’ellos consideren, nun sé, increpar a daquien… eso ye especialmente
preocupante.
José Manuel González
Les ciudaes ya nun tienen muralles pero tienen balices.
Quero decir que los espacios tan controlaos dafechu. Solo falta que nos acaben
cobrando la entrada, l’accesu al aria A, al aria B…
Yolanda González
Huergo
Ye lo que pienso cuando entro nel barriu del Carmen. Ye una
utilización del espaciu públicu tan abusiva… ye que nun yes quien a evacuar a
un enfermu con camilla, nun entra l’ambulancia, nun entra nada.
José Manuel González
Na manifestación que ficimos el 28 de xunu [Día Internacional
del Orgullu LGTB] como venía una carrocina de nada, un camionetu, pues tienes
que pedir un permisu específicu. Alucinabes. Y eso n’época del PSOE.
Y lluegu viente la SGAE a dicite que pusiste nun se qué
canción.
Dende llueu, quien nos viera y quien nos ve.
Pero ¿cómo ye posible que lo redacten asina?
Y llueu vendrá un policia, al estilu del puritanismu de los
años cincuenta nos Estáos Xuníos, cola llinternuca: “vustedes, ¿qué taben
faciendo? Sexo. Pues setecientos euros.”
Y tu dices “ pero, oiga, que son les tres de la mañana, que
nun hai nadie, que nun se ve nada”. Pues non. Agora eso ye un delitu.
Ya ye’l mínimu nes llibertaes. Ye que nun ye nin protestar.
Entren ya nel ámbitu de lo más personal.
Un asistente
Pero, ¿tenemos de verdá un problema en Xixón como pa facer
eso? ¿Cuál ye’l problema?
Nun sé. Dende llueu nadie ta pola cai Corrida. Hai delles
zones tradicionales, onde vas con coche, quedes pa ligar, nun molestes a nadie,
persones mayores, adultos…
Non. Eso acabóse.
Y nun vamos metenos na protesta, claro que la protesta van
controlala, claro que nun la quieren, eso ye evidente. Pero ye que lleguen ya a
lo cotidiano, aspertos que nun son protesta, actos cenciellos como quitate la
camiseta si fai calor.
Un asistente
Pasásteis toos del tema del botellón, plantegábais que taba
ellí como escusa pa otres coses, pero creo que lo del botellón tien tamién
muncha tela. Porque, por exemplu, nun de los artículos diz que l’Ayuntamientu
de Xixón velará pa que nun se consuman bebides alcohóliques nos espácios
públicos, prohibiendo espresamente la práctica del botellón. Pero, lo que dicía
antes Yolanda, vas pol barriu del Carmen y la xente ta n’espacios públicos
tomando alcohol, entós nun ye l’alcohol, les bebides que se permiten son les
compraes nos bares de la zona, pero non nes tiendes.
Y otro, ¿por qué se prohibe tomar bebides alcohóliques? Un
grupu de chavales, que seyan mayores d’edá, ponemos el llímite llegal de los
dieciocho años, si ta permitío y ye llegal tomar alcohol, ¿por qué nun van
poder tomar alcohol xuntos, entre amigos, nun espaciu públicu?
José Manuel González
Creo que la clave ye que lo que nun gusta ye qu’haya
actividaes que nun pasen por caxa.
L’asistente d’antes
Pasa lo contrario col tabaco. Pa fumar, faente salir de los
bares al espaciu públicu. Pero nel espaciu públicu nun puedes beber alcohol. Ye
una contradicción.
José Manuel González
Y qué pasa nes áries recreatives, nos paseos, nes siendes
que van pela costa, onde hai meses y pues parar y merendar o xintar. Si ellí
tomes una botellina vino… tampoco. Entós, qué ye lo que busquen, el control
absolutu. Tienen mieu a que se-yos vaya de les manes.
Nel tema de la protesta, los que ponemos carteles ya sabemos
que va servir pa fastidianos, y pa la xente que s’alcuentra nun estáu
d’esclusión nun ye nada nuevo, porque a la xente que ta na prostitución y la
xente que ta na cai nun facía falta denguna ordenanza nueva pa que la policía
los controlara o los echara pa otru llau. Pero lo más perverso probablemente ye
la manera en que t’espropien l’espaciu públicu.
A la xente corriente, nun solo a la que pega carteles o ta
na cai durmiendo o trabayando como trabayadora sexual, l’ayuntamientu tien la
capacidá de deci-yos lo que pueden o nun pueden facer nun espaciu que ye de
toos.
Y eso nun tien que ver cola policía, sinon que ye dexar
parte de la nuestra responsabilidá y autonomía a otros. Y pa eso nun se
necesita de policía, llimitase asina porque la xente dexa de facer coses,
porque ta regulao. Y ye lo más perverso de too porque ye lo que más desmoviliza
a la llarga.
Dani Fernández Blanco
Anque nun ye lo mesmo, eso recuérdame al señor Fraga, que
presumía de mui democráticu porque cambiara la llei de censura. Pero ye que
diose cuenta que cuando censuraba, llueu nun te podía sancionar si se-y
escababa daqué, polo que yera muncho meyor poder sancionate cuando-y apeteciera,
y ye cuando salió’l conceutu de l’autocensura. Y eso Fraga vendiolo nel so
momentu como una meyora de les llibertaes.
Al final ye eso, ye l’autocensura. Nun voi a echar un polvu
nel Cerru, nun voi a pegar un cartel, nun voi a tal… ¿por qué? porque tengo
mieu.
Un asistente
Y eso en sin tener en cuenta lo ridículo que ye multar a un
mendigu, a un indixente, con un montón de dineru.
Otru asistente
Ya, pero verás cuando entamen a multar con que nun puedes
acceder a los recursos municipales pa los transeuntes.
Eso ye barrer.
Asina ya nun tendremos probes na ciudá.
Cómo entró la denegación na nuestra vida. Cómo coses que
yeren mui normales, como apropianos del espaciu públicu de manera natural, nun
dende la protesta nin nada, sinon por exemplu facer una actividá nun barriu con
unos chavales.
Eso que yera absolutamente normal, y que nun pasaba por
dengún filtru alministrativu nin burocráticu, agora ya nun lo fai nadie. Agora
ya nun va nadie colos chavales del so grupu de tiempu llibre a asar unes
castañes a la plaza del so barriu. Non. Non. Ya, los propios qu’organicen
empiecen a pensar si pedir el permisu, si nun sé qué… y lo que te faen ye
cascate ochenta euros en Xixón pol usu del espaciu públicu.
Y neso tenemos parte de responsabilidá, la xente y los
colectivos sociales, qu’entramos nesa dinámica, nun sé si pol mieu, o por
pensar que nun nos supón muncho pidir, comunicar…
Y creo que ye importante qu’intentásemos entamar a subvertir
un poco eso de manera natural. Ocupando los espacios públicos, que se supón que
son públicos, que son nuestros, con pequeñes acciones na cai, anque tengamos
esi reglamentu ehí.
Hai veces que pueden desbordase les coses en sin munchu
problema.
Y llueu, tenemos que mirar tamién la realidá. En Xixón pasó
una cosa mui curiosa nos últimos meses, y creo que ye l’indicativu de hacia
onde quier dir esti ayuntamientu.
De repente entamen a surdir plataformes d’hosteleros en
tolos barrios, nun ya l’asociación d’hostelería, sinon que tan entamando a
agrupase los hosteleros de Poniente, los hosteleros de La Calzada, los
hosteleros del Carmen que van pasar a ser los interlocutores col Ayuntamientu
pal espaciu públicu.
Hai que tar atentos, porque si los interlocutores son esos,
la xestión del espaciu públicu va ser claramente privada. Los ciudadanos, los
vecinos, dientro de dos díes nun se comen un “colín”, ya se comen poco, pero
vamos, dientro d’unos díes nun van pregunta-yos absulutamente nada, porque ya
tienen a los que van “dinamizar” les zones, y van “dinamizalos” claro, colos
sos intereses, privadamente.
Y esa tendencia ta ehí, y ta pasando relativamente
desapercibida, ya incluso se vende como una cosa positiva.
Tenemos qu’intentar reapropianos del espaciu públicu y
desbordar cuestiones como esta ordenanza, claro sin que tampoco nos suponga un
costu escesivu, en sin que nos abrasen a multes.
José Manuel González
Pola mio parte, como conclusión ya qu’hai que dir acabando,
dicir que me paez innecesaria dafechu esta ordenanza y que supón, na práctica,
un retrocesu de la llibertá.
Ye verdá que llevamos años de retrocesu, ye verdá qu’agora
tenemos que pidir permisu pa too, y creo que ya nos avezamos un poco a eso.
Y ye verdá tamién lo de la mercantilización del espaciu
públicu. Al final va a haber que pagar pa too. L’espaciu ye de too menos
públicu. Ye de quien paga. D’una manera o d’otra. Pa poner una siella o pa
poner un cartel.
Creo qu’hai qu’oponese a la ordenanza por too, poles razones
que venimos manifestando, pol retrocesu de les llibertaes públiques y d’un
montón de derechos colectivos.
Pero quédome güei tamién colo que tien que ver col recorte
de la llibertá individual. L’agresión a lo más íntimo, a lo que nun molesta,
que tamién ye susceptible de ser sancionao pola ordenanza. Y ye quiciavis lo
más preocupante.
Colo que yo dedaríame con qu’esta ordenanza non. Y non anque
se meyore, anque se discuta, incluso anque se pase pol barniz, que va pasar pol
barniz, d’eso nun me queda denguna duda, pero va ser igual de rechazable.
Roberto Porras
Xúnome a lo que comentasteis y sólo aportar la visión del
Colectivu contra la esclusión Alambique: ser probe nun ye delitu.
Y con too esto de la ordenanza nun tenemos que cayer en que
normativicen la nuestra vida, ye’l momentu de reapropianos de los espacios y de
la nuestra propia vida y de la xentión de les coses que tienen que ver cola
nuestra vida y la convivencia.
Y por supuestu, llega´l momentu publicitariu, agradecer a la
tertulia que trate estos temes, que a pesar de que son tan importantes y
fonderos, nun tan teniendo suficiente espaciu de debate y de contestación
pública.
Bono, cerrau l’espaciu publicitariu, pero gratuitu, de momentu, qu’en vista l’ésitu igual
entamamos a patrocinar…, agradecemos tamién la vuestra presencia.
Salieron munches visiones y aspeutos distintos,
complementarios y enriquecedores, dende distintos ámbitos, pero que confluyeron
toos no mesmo.
Y acabo espresando’l deseu de qu’el propósitu d’esta xente nun
se cumpla y podamos seguir esfrutando del espaciu públicu como lo que ye, un
espaciu de toes y de toos.