Toros. Saca tarxeta encarnada al maltratador
Na que participaron
• Antonio Coviella
Anadel. Asociación Nacional Animales con Derechos y Libertad
• Xicu Mata
Asociación Cultural y Medioambiental La Foz del Pielgu
• Santiago Artime
Moción contra'l maltratu animal del Conceyu Carreño
Vamos dar comienzu a la Tertulia Pachín de Melás, qu’esta vez quiximos dedicar a los toros, y como prácticamente tolos tertulianos y yo creo que toos los equí presentes tenemos una posición mui clara en contra de la “fiesta” de los toros, paeznos una barbaridá a toos, tanto pol maltratu que supón a los animales, esa tortura contínua hasta la muerte y esi escarniu que se-yos fai, como incluso culturalmente, puesto qu’equí, la tradición asturiana nun entiende cómo colos xatos o los gües, qu’equí foron siempre collacios, acompañantes de los paisanos hasta nel propiu llar, puedan dar llugar a esi espectáculu totalmente ayenu a la nuestra cultura.
Por eso nun planteamos el clásicu debate toros sí, toros non, y por eso tiramos de la imaxen futbolera que tien agora mesmo tirón mediáticu, que ye la que se usa contra la violencia de xéneru, lo de “saca la tarxeta encarnada al maltratador”. Nosotros quixímos estendela, ¿por qué non? al maltratu d’especie, d’especie animal. Entos trátase de sacar la mesma tarxeta encarnada al martratador, nesti casu de los toros.
Y pa falar y contar un pocu les sos esperiencies na defensa de los animales y en particular en contra del mundu taurín tenemos como invitaos a Antonio Coviella, de la asociación ANADEL, motor de la llucha polos derechos de los animales.
Ta tamién con nosotros Xicu Mata, que foi un responsable directu de la moción contra los toros y el martratu animal que se fizo en Corvera.
Y finalmente Santi Artime, que hasta hai bien pocu yera’l conceyal por Unidá Nacionalista Asturiana nel conceyu Carreño y precisamente baxo’l so mandatu tiense presentao otra moción antitaurina en Carreño.
Y entamamos, si hai daquien que quier tomar la palabra…
Tómola yo si queréis. Nós, lo que ficimos, enantes de presentar la moción, fuimos a sondiar les diferentes agrupaciones polítiques pa ver si tenía visos de poder prosperar o non. Ellí los partíos políticos con representación son el PSOE, Izquierda Unida y la USPC [Unión Social Progresista de Corvera], que ye una escisión del PSOE y el Partíu Popular. Y en principiu, tres de les cuatro agrupaciones accedieron a falar con nosotros, mientres que la USPC, que yera la que taba gobernando, simplemente pasó.
Entós, n’esos tres aconceyamientos que tuvimos, Izquierda Unida vió bien la posibilidá de declarar a Corvera d’Asturies como conceyu amigu de los animales y antitaurín.
Llueu, cuando fuimos a falar col PSOE, entamaron les diverxencies. Lo primero que nos entrugaron foi polo que tuviera dicho Izquierda Unida, a lo que nosotros respondimos-yos que tábamos entrugando qué yera lo que decíen ellos, non en función de lo que dixera Izquierda Unida. Ellos comentaron que n’un principiu ellos yeren favorables a declarar el conceyu amigu de los animales, y que diben apoyalo, pero tampoco lo dixeron convencíos al cien por cien.
Y cuando falamos col PP, pensábamos que sabíemos la rempuesta ya de mano, más o menos poles sos idees y la forma de facer política que tienen, y sorprendiónos que al falar col presidente, Luis Solares, díxonos que él taba en contra de la matanza los animales y que podría sofitalo. Pero siempre’n toes estes coses hai un pero, y el pero yera que teníemos que falar cola conceyala de cultura, y díxonos que yera andaluza, y que teníemos que convencela. Entos quedó la cosa así, un poco pa prau.
Y con too, valoramos la posibilidá de presentar la moción, y vimos que nun había les condiciones pa garantizar que fuera p’alantre como nel conceyu Castrillón, que se declarara conceyu amigu de los animales. Y así quedó la cosa.
Antonio Coviella
Así fue la hestoria, nun se daben les condiciones pa presentala, porque lo que tien pasáo n’otros municipios ye qu’eso rebota y llueu presenten otra moción con too lo contrario, mostrando la “fiesta” d’interés cultural, como tien pasáo’n Madrid.
Santiago Artime
Voi falar de la esperiencia’n Carreño, ellí danse dos actividaes al rodiu’l mundu los toros, una ye, o yera, la conocía como los toros na mar, que se facía na dársena del puertu, y que la primera vez que se fizo fue antes de la república, y después, durante la dictadura garró un poco de puxu y celebróse unes seis u ocho veces, y fue a partir de los años setenta y sobre too nos ochenta cuando garró más fuerza y celebrábase ya tolos años. Yera una fiesta que taba declarada d’interés turísticu, la única que taba declarada’n Carreño d’interés turísticu hai dos años, y tovía a día de güei, si busques por internet toros na mar, tovía son munches les entraes qu’hai y sigue anunciándose como que sigue habiendo esa corrida.
Los toros de Candás yera una actividá onde la xente de Candás nun participaba mayoritariamente y yera sobre too pa xente forastero. Y yera mui deficitaria económicamente, les dos últimes qu’hubo foron nel añu 92 y 94, y costaben al rodiu de seis millones de pesetes cada añu, y nun se sacaba nin un millón y mediu en taquilla. Aparte que les entraes yeren cares d’aquella, nun sé si yeren a dos o tres mil pesetes.
Fue n’esos años cuando, yo creo qu’hubo les úniques movilizaciones, nel añu 92 fueron movilizaciones espontánees, nun hubo nada preparao detrás, nin una convocatoria oficial con carteles nin nada así, daquella garró a tol mundu un poco fuera xuegu, nun había policía nin guardia civil nin nadie pa controlar aquello qu’había ellí.
Fue mui gracioso, alcuérdome que-yos facíamos un pasiellu a los toreros, que salíen dende l’hotel Marsol y diben a la dársena del muelle, y salió un toreru con una navaya d’Albacete, yo nunca les viera, facía trac-trac-trac cuando abrió, y a por nosotros, la guardia civil nun sabía a quien parar, si al toreru o a nosotros…
Aquella vez mancó muncho’n Candás un cartel que punxímos con “Sofeca tortura”, Sofeca yera la sociedá de festexos de Candás, que yera la que facía los toros, y alcuérdome que la policía llocal reventónos el llocal y retiró la pancarta y d’aquella quixeren empapelanos porque decíen que yera mui grave, que cómo poníemos nun edificiu públicu esa pancarta, enfin, que lo de “Sofeca tortura” traxo cola.
Nel añu 94, que fue la segunda movilización, y la última vez qu’hubo los toros na mar, ya había más xente. La convocatoria fuera al traviés de fueyes Din A4 colgaes pol pueblu. Y esi día Candás taba tomáo pola policía nacional, yera acoyonante la cantidá de grilleres qu’había. Hubo tres o cuatro detenciones d’unos chavales de la CNT que quixeron colase na dársena onde se facía la corrida al traviés de la playa, pero creo que ehí quedó y nun hubo nin multa nin nada.
Los toros de Candás yera una actividá que taba morriendo por si sola, aparte de pol coste que tenía y la poca participación de la xente de Candás, los últimos años hubo auténtiques xatáes, con toros que s’afogaron nel agua.
Claro, ellí subía la marea. Hai una imaxen de la pala l’ayuntamientu sacando a un toru polos cuernos del agua. Hubo tamién una foto que corrió por Candás d’una espada saliéndo-y al toro por un costazu.
Y tamién porque había perres pa los toros pero nun había pa otres actividaes.
Y la mocedá de Candás empezó a movilizase, y la puntilla, nunca meyor dicho, punxéronla les movilizaciones estes, y ya nun hubo más toros a partir del añu 94.
Al final estes fiestes morrieron por si soles. Güei sería imposible volver a faceles una vez que reformaron el muelle de Candás, hai agua tol añu.
Aunque de vez en cuando sal algún vecín nel periódicu diciendo que si les fiestes del Cristo d’hai veinti o treinta años yeren la hostia, y qu’agora quedaron en nada, y ye verdá, pero nun ye polos toros, ye porque cambiaron otres coses.
Y agora’n Carreño y n’otres partes d’Asturies, dase otra actividá, que yo creo que ye hasta más peligrosa. Por exemplu’n Carreño faise n’Ambás y en Gozón faise’n Bocines, y ye la que ya denominen como “tradicional suelta de la vaquilla”, aunque yo entiendo que algo tradicional tien que ser algo más llargo nel tiempu ¿non?. Y digo qu’esta nueva moda ye más peligrosa porque tien munches “ventaxes”: ye una cosa que se fai de nueche, que participa la xente, que cuesta relativamente poco, que los gallos del pueblu demuestren ellí lo gallos que son toreando y saltando perriba del xatín… y creo que hai qu’intertar parálo tamién.
Y ye polo que nosotros presentamos ya l’añu pasáu una moción solicitando que l’ayuntamientu lo parare. La moción pedía tres coses, el primer puntu yera que la casa conceyu nun sofite denguna actividá d’esti tipu, la segunda yera que nun de autorización pa facer estes actividaes y ta tercera yera declarar al conceyu de Carreño conceyu antitaurín como ficiera unos meses anantes Castrillón.
Nós teníamos la esperanza de que Izquierda Unida, viendo la esperiencia de Castrillón, tirare por ello tamién, pero la moción quedó con un votu a favor y dieciseis en contra. Votaron toos a la escontra. Hai que decir qu’en realidá UICA, que son los independientes de Carreño, consideraben que yera una moción oportunista, y que taben dimpuestos a tratar el tema a fondo y facer algo relacionao ya nun cola “vaquilla”, sinon col maltratu animal en xeneral, pero entiendo que fueron disculpes por parte d’ellos por nun apoyála. Y por parte del restu los grupos políticos, cayeron toos nos típicos tópicos de los toros. Izquierda Unida, por exemplu decía que ye una actividá llegal y que caún faiga lo que quiera, y venía con rollos técnicos diciendo que si pa esto l’ayuntamientu nun da llicencia, que quien la da ye la delegación del gobiernu, cuando ye mentira, l’ayuntamiento tamién tien que sofitar y firmar d’alguna manera.
Pero a pesar de que la moción nun fue aprobada, creo que fue un ésitu al final, porque nun hubo “vaquilla”.
Un asistente
Y agora n’Ambás ¿tenéis algún votu?
Santiago Artime
Sí, algún hai, y yo creo que además fue bono porque esti añu tovía nun sabemos si va a haber “vaquilla”, pero dientro l’asociación de vecinos ya surdió’l debate, y hai xente que nun-y gusta, y dizlo así, hai xente que nun tien ganes que haya polémiques nes fiestes del so pueblu y tampoco tan pola llabor de facelo, pero hai xente que ta tirando, y nun sabemos qué va pasar.
Tuvimos tamién valorando si dir a presentamos allí cuando la “fiesta” y facer una concentración, pero como dicía anantes ye peligroso pol alcohol, les hores de la nueche, y podría xenerase violencia.
Que tengamos constancia n’Anadel l’añu pasáu sólo s’intentaron celebrar tres festexos taurinos, les fiestes de Begoña’n Xixón, Ambás y Bocines. L’añu anterior sí qu’hubo una plaza portátil n’Infiestu, pero vistu’l pocu ésitu que tuvo y el movimientu contrariu a ello, elliminóse.
Respeutu a la “vaquillada” d’Ambás, cuando tuvimos constancia de qu’iba a facese, lo que ficimos fue presentar una denuncia ante la delegación de gobiernu, basándonos en que yera illegal porque nun reunía los requisitos qu’esixe’l reglamentu taurín que son ente ellos que se tenga un seguru de responsabilidá civil, qu’haya miembros del Seprona presentes…
Y tamién nos punximos en contautu col conceyal correspondiente, pero el llavóse les manes, venía a dicir que nun yera cosa d’ellos, que yera de la sociedá de festexos, pero sí que tienen que ver, porque son los que firmen l’autorización. Y preguntámos-yos si taben seguros que cumplíen la normativa. Ellos nun sabíen qu’hubiere una normativa pa ello y espunxímos-yos lo que teníen que cumplir y cual diba ser la so responsabilidá, y que nosotros díbamos a denunciar al ayuntamientu por permitir, con previu avisu, una celebración illegal.
Y finalmente comunicáronnos dende delegación de gobiernu que nun se celebrare la “vaquillada” o como se quiera llamar.
La de Bocines sí que se celebró, porque se nos pasó, fue antes que la de Carreño, pero esti añu taremos al tanto porque ye la mesma situación, son celebraciones que se faen espontáneamente pola comisión de festexos y que nun tienen dengún tipu de llegalidá, colo que dientro lo malo son fáciles d’impedir que se celebren.
Asturies destaca por ser de les comunidaes onde menos interés hai poles corrides de toros, démuéstrenlo les últimes encuestes, concretamente l’ochentaiseis por cientu los ciudadanos ta en contra. Ye la tercera comunidá, dempués de Cataluña y de Galicia, que ye más antitaurina.
Nós tamos intentando, por un llau, sensibilizar a la población, porque creemos qu’hai muncha indiferencia, muncha xente diz “soi contrariu” pero da-y un poco igual, y hai qu’intentar que se movilicen más.
Y por otru llau incitar dende’l puntu de vista políticu, afalar a los políticos a que se mueyen más, sobre too a Izquierda Unida, porque lo llevaba nel so programa electoral. Tamos intentando esixir que cumplan el so programa electoral, porque resulta “gracioso” que voten en contra en casos como’l de Carreño cuando yera una promesa d’ellos.
Y la declaración de Castrillón como municipiu antitaurín sí que salió alantre colos votos favorables d’Izquierda Unida y del PSOE y l’abstención del PP. Tamos intentándolo’n más municipios, n’Illas ya nos dieron el vistu bonu, falta presentálo y poco más. En Pola L.lena al final nun salió p’alantre según la conceyal de mediu ambiente, que ye de Los Verdes aunque se presentó como independiente pol Bloque, porque l’alcalde nun quier y nun dexa presentálo.
En Cataluña ya hai 68 municipios declaraos antitaurinos.
Un asistente
Y ¿cómo ta la cosa’n Xixón? Equí tamién se presentó una moción nel 2008 que nin siquier salió a la lluz pública, nin fue debatida, nin se notificó la so tramitación a quien la propuso, que fue l’agrupación llocal d’Unidá. ¿Fáise dalguna actividá pa cola feria taurina de Begoña?
En Xixón nosotros convocamos siempre una manifestación coincidiendo cola feria, que aunque nun ye multitudinaria, va sumando ciudadanos d’añu’n añu.
Y lo que ficimos l’añu pasáu fue una campaña de presión al ayuntamientu col envíu d’unes postales. Enviáronse sobre 3.500 postales al ayuntamientu firmaes por ciudadanos. Y lo que nun pudimos tovía que tener ninguna conversación con ningún conceyal, nun quixeron reuníse con nosotros nunca.
Ellos lo que dicen dende l’ayuntamientu ye que nun dan denguna subvención, que símplemente saquen la plaza a concursu, y que mientres qu’haya una empresa que lo quiera xestionar…
Un asistente
Peso si eso siempre fue deficitario.
Otru asistente
Cuando se renovó esti añu, la empresa que lo llevaba, que fue la que lo volvió a ganar, decía que yera deficitario. Entos la pregunta ye, cómo una empresa monta algo que ye deficitario y vuelve a coyer la concesión cuando nun se cambiaron les condiciones.
Esti ye un tema qu’aborrezco sobremanera. Los toros probablemente ye l’actividá más subencionada a nivel de festexos. Nun se trata solo que una cuestión de maltratu, que ye evidente, ye tamién una cuestión d’imposición cultural. Onde meyor se ve ye na Monumental de Barcelona. La Monumental de Barcelona ye deficitaria, nun se llena, tienen que facer campañes a nivel estatal pa que vaya xente de fuera de Barcelona. Absolutamente’n toles lleis estatales sol maltratu animal s’escepciona que s’apliquen a los toros. Por exemplu agora, cuando ta falándose de poner un impuestu sol alcohol, nun se pue falar que la sidra nun entre porque ye impensable, porque sería facer reinos de taifas, porque sería dir contra la Xunión Europea… pero colos toros sáltenselo absolútamente too.
Y resulta que les empreses son deficitaries, y que tolos ganaderos pierden perres, pero ehí tan, y son xente que gana munchu dineru. ¿De onde salen toes eses perres?
En Xixón habría que facer una estratexa mui específica porque probablemente ye l’únicu sitiu d’Asturies onde se tien la percepción de que los toros nun ye una cosa tan ayena. Equi hai un sector de población, de xente de Xixón de tola vida que te diz qu’equí siempre hubo toros, eso vilo na mio familia, nun-yos gusta a nungunu los toros, pero siempre te dicen qu’equí siempre los hubo. Bono, sabemos que los hubo dende que se fizo la plaza, pero eso foi de cara’l turismu.
Pero tenemos un arma de destrucción masiva que ye Xovellanos, que ye intocable’n Xixón, ta por enriba de cualquier otra cosa, Xovellanos ye dios. Y tenemos la gran suerte de que Xovellanos ye una figura antitaurina brutal, y ye d’eso de lo que tenemos que tirar.
Y otra cosa ye que’l xixonés tien la percepción de ser mui cosmopolita, y desgraciadamente los toros vense como parte d’esi cosmopolitismu. Dizse, “bono, equí ta, ye pa los turistes que vienen de fuera, eso da munchu movimientu…”. Claro, falo d’un sector mui concretu, pero que tien una presencia importante por exemplu nos medios de comunicación. Pues velo na cadena Ser, pues velo en La Nueva España, pues velo en El Comercio… aparte de ser un negociu, porque da publicidá. En fin, que vese como una de les coses que tenemos equí, y eso probablemente n’Uvieu nun pase, porque ye algo tan marciano que ye imposible de meter, pero equí sí.
Y tamién tan persones concretes, tienes por exemplu a comunicadores como a Manfredo, que ye una persona mui conocida’n Xixón, y ta tol día colos toros, los toros, los toros. Y agora tienes a Paloma Llanos que ta tol día na cadena Ser colos toros, los toros, y eso va creando ambiente.
Polo que creo que los que tamos en contra teníamos que trabayar pensando mui específicamente y teniendo’n cuenta la sicoloxía del xixonés. Y decir por exemplu, “nun, señores, equí la plaza montóse pal turismu va unos cien años, y eso ta les hemeroteques, y tien cien años, nun tien más.
Otra cosa increyible ye que se vende muncho que los toros ye una tradición española y ye mentira. Nun lo ye. El propiu Xovellanos, cuando ataca a los toros, ún de los motivos que pon ye qu’eso namás se ve’n cuatro provincies, y que nun ta xeneralizáo ente la población.
Así que nun ye una tradición realmente, y agora tien una clara intención d’imposición cultural, porque aparte, los toros nun son solo toros, el cartel de Begoña, por exemplu, tien una andaluza, nun ye una asturiana.
Nun ye solo una cuestión de maltratu, qu’eso nun ye discutible, porque martratar a un bichu y llueu aplaudir, eso ya nun ye solo maltratu, ye disfrutar col maltratu animal, eso tol mundo lo asume.
Pero la forma en qu’ellos faen pa enganchar ye polo cultural, y eso ye mentira, nun hai nada cultural detrás de los toros, nun hai tradición nin siquiera a nivel estatal, qu’Europa nun ye Estaos Xuníos, ellí probablemente una tradición de trescientos años, por exemplu, sería la tradición más importante que tuvieran, pero equí les tradiciones tienen munchos más años.
Un asistente
Equí, por suerte, como nun hai esa tradición, la xente ye mui sensible a lo del maltratu, “nun se puede andar matando a los animales d’esa manera”. Y tendríamos que tirar tamién de la tradición antitaurina de Xixón. Por exemplu, nel añu 1914 hubo un mitin antitaurín nel que hubo cuatro o cinco mil persones convocau polos ateneos obreros. Había d’aquella un intentu porque España se modernizare, que fuera Europea, y nun podemos andar matanto toros nin tirar de navaya. Creo que hai que apelar tamién a la tradición antitaurina de la izquierda de tola vida. Y en Xixón, antes de la Guerra Civil el movimientu antitaurín xuntaba a miles y miles de persones. Y eso habría que rescatalo y ponelo nel discursu tamién de forma mui potente y mui simple: “Esto nun ye d’aquí, siempre se tuvo’n contra y Xovellanos combatiólo, y montose hai cien años p’atraer el turismu” igual qu’agora montamos l’acuario que nun va nin dios.
A mi lo que me llama l’atención de lo qu’espusísteis ye que paez que nun conceyu, que prospere una moción antitaurina nun tien que ver cola fuerza política sinon coles persones. O seya que polo que contásteis, la conceyala de nun se qué ye andaluza y entós ellí nun s’aprueba, el d’Izquierda Unida de nun sé onde ta por ello y entós apóyalo. Nun se ve coherencia política n’eses mociones ni na postura que tienen los conceyales. Da la sensación que ye una cuestión de gustos personales, y eso paezme mui grave.
Aparte ye un tema que xenera controversia. Ye un d’estos temes que, o tas a favor o tas en contra. Y esa decisión de tar a favor o en contra, a veces nun son los partíos políticos la que la tomen, si non les propies persones. Toi xuru que si nun llegamos a falar col PSOE directamente pa que diesen la cara d’alguna manera, ellos nun tendríen problema’n posicionase’n contra y fuera. O como lo que ficieron en Carreño, que como nun hubo un seguimientu, a la mínima aprovecharon y votaron toos en contra y puntu, y quedaron tan anchos, aunque como diz Antonio, el programa políticu d’Izquierda Unida diz que tan en contra de los toros.
Antonio Coviella
Yo creo que si Izquierda Unida lo llevaba nel programa elleutoral fue porque-y lo colaron Los Verdes, pero nun yeren conscientes realmente de lo qu’eso podía suponer. Y cuando tan votando’n contra en munchos municipios ye porque quizá ni sepan que lo tienen nel programa.
Si, nosotros la postura d’Izquierda Unida’n Carreño nun la entendimos y así-yos lo diximos nel plenu. Y les palabres testuales con que respondieron, tengo equí l’acta decíen “entendemos l’afición a la tauromaquia como algo personal, perteneciendo al ámbitu priváu”. Pero claro, nosotros con esta moción lo que pretendemos ye sacálo d’ehí, esto nun ye un ámbitu priválu de les persones, esto ye una actividá que fai la sociedá, y al final reflexa lo que ye la sociedá que permite esti tipu d’actos. Y reflexa que nin ye moderna, nin ye europea, nin tien un mínimu de sensibilidá.
Un asistente
Toi seguru que si mañana axunto a diez mil persones, garro un perru y tiro-y dardos hasta matálu, dirán toos que soi un salvaxe. Polo que falar del ámbitu priváu nun dexa de ser una falacia más.
Otru asistente
Y lo que ye increíble ye l’argumentación pa seguir matanto toros que ye que si non piérdense los toros de lidia.
Antonio Coviella
Eso ye absurdo, el toro de lidia ye esactamente’l mesmu toro que’l que venden nes carniceríes. Xenéticamente, como especie, el toro de lidia nun esiste.
Nel fondu, aparte d’un interés económicu, porque la tauromaquia mueve munchos millones, hai un interés nel puntu de vista cultural d’un determinau nacionalismu, n’esti casu español, d’intentar imponer d’alguna manera unes costumbres qu’adoptaron como d’ellos, pero que nun son d’ellos, porque’l estáu español ye un conglomeráu de diferentes naciones.
Ye una forma d’imponer, de decir “equí tamos nosotros”.
Pero esto, aunque s’entiende perfectamente nel mundu asturianista o nacionalista, la sociedá nun lo ve. Pero lo que se ve dafechu ye’l tema de la protección de los animales, lo que falámamos antes, sal na prensa d’un perrín al que-y cortaron les pates y ya tol mundu “¡madre mía!, ¡cómo puede ser!, ¡asesinos!” y llueu resulta que ye fiesta d’interés nacional matar un animal y encima festexalo públicamente. Esto ye una inconcruencia en sin sentíu.
Ye más, aprobóse nel 2003 una llei, la llei de protección d’animales del Principáu, y poníen que taba prohibío maltratar a los animales a esceición de les corrides de toros. ¿Qué ye, que nes corrides nun se mata a los animales?
Santiago Artime
Bono, na parroquia d’El Valle, hasta los años setenta lo que facíen yera enterrar a un pitu nuna caxa cola cabeza por fuera y dende nun se qué distancia dáben-y pedraes a ver quien-y la rompía.
Nun sé, yo nun veo la diferencia, ¿por qué la xente s’escandaliza agora d’eso y nun s’escandaliza del escarniu a una “vaquilla”.
Y en Candás facíase lo que se fai en Lekeitio colos coríos, lo de garrar al coríu y mete-y la cabeza baxo’l sobacu y mangáte cola cuerda p’arriba y gana’l que quede cola cabeza’l coríu.
Yo creo que a nadie se-y ocurre plantear eso’n Candás agora, porque non, porque la sociedá avanzó.
Un asistente
Y nesti casu da igual que la tradición fora milenaria. Les tradiciones nun son bones por definición.
Una asistente
Pero lo terrible de too esto nun ye tanto la muerte, ye que además paez que presta lo del maltratu, porque la xente va velo, paga una entrada, disfruten con ello.
Xicu Mata
Pero la verdá ye que n’Asturies nun ta nada arraigao. Tenemos equí un estudiu de Gallup, una empresa independiente, que diz que sólo’l 4,6 por cientu los asturianos tienen asistío alguna vez a algún espectáculu d’estos.
Una asistente
Pero da la sensación qu’equí’n Xixón ta subiendo l’afición, nun sé si será por traer xente famoso o pol bombardéu’n prensa.
Home, la plaza toros de Xixón ye de tamañu mediu y una plaza d’eses característiques pa la población de Xixón, y pa toa Asturies, porque nun hai otra plaza activa, y con una figura tan importante y mediática como pudo ser José Tomás, tendría que tener tenío reventa y pelees por entrar, eso pasaría en cualquier otru sitiu, pero’n Xixón nun se llegó a completar la plaza.
Y vien xente de fuera d’Asturies, en autobuses. Que hai xente que lu sigue tola temporada.
Un asistente
Aparte los toros tien un componente ya nun sólo cultural, sinon tamién social. A los toros va un perfil social mui determináu. Eso ye algo que viví. Va xente a los toros a la que se-y la pela los toros. Como otra xente va a la ópera n’Uviéu o equí al hípico, xente que nun entiende absolutamente nada de caballos, pero hai que dir al hípico. Ye como elitista. Lo principal ye comprar la entrada más cara.
Ye lo que decíamos, ye un modelu cultural, que inclusu da un ciertu prestixu social.
Si, si, eso tienénnoslo dicho: “non, si a mi nun me gusta los toros, nun me gusta ver cómo maten al animal, de fechu yo nun miro, pero bono, gústame l’ambiente, el “mundillo” que hai alredor de los toros”.
Un asistente
Y el sofitu de los medios de comunicación ta claro, una cosa que dura una selmana y en Xixón lleva portaes o la segunda fueya de El Comercio.
Antonio Coviella
L’apoyu de El Comercio ye evidente, el so director ye ún de los accionistes de la empresa que xestiona la plaza.
En El Comercio enxamás salió nin el más mínimu renglón coles campañes antitaurines.
Ta claro que ta vetáo, tanto en El Comercio como na so televisión, Canal 10.
El asistente d’antes
Pero en La Nueva España ye asemeyáo. El pesu que tien en prensa nun se relaciona absolutamente’n nada col pesu social que tien. Y eso ye mui raro. Nun ye casual.
Y otra cosa curiosa ye lo de Cataluña, véndesenos que si Cataluña prohibe agora los toros ye como la ruptura, y resulta que’n Canaries ta prohibío dende cuanta ya y nun pasó absolutamente nada.
Y ¿qué me decis del guah.e esti español que diba a torear a hispanoamérica y decíen que por qué nun podía torear equí. Yera un menor de catorce. Y eso salió’n televisión, el debate sobre si toreaba equí.
Un asistente
Ya, y que lu maten. Faltaba que lu garraren y lu destrozaren n’una plaza al probe.
Mirá-y, acaba de sali-y a un torero una cornada pola boca. Que ya nun solo ye lo de matar al bichu. Tamién los paisanos sufren daños. Y aunque me caigan mal, nun dexen de ser persones, aunque lo disimulen. Y lo del pitón saliéndo-y pola cara yera una imaxen brutal. Y eso salió tamién en televisión. Lo que ye cusiosísimo, porque nun ponen toros a les cinco de la tarde, porque ta n’horariu infantil, pero eso sí puedes velo en tolos noticiarios.
Antonio Coviella
Un problema ye que cada comunidá autónoma tien una llei de protección, y munches veces incluso contradictories entre sí.
En Canaries, que falábais, tan prohíbies les corrides de toros, pero en sin embargu tan permitíes les pelees de gallos, y nel restu comunidaes ye lo contrario.
Quiciavis tendría qu’haber una llei marcu.
A lo meyor agora cola comunidá europea… home, yo creo que si algún día se llega a la abolición va ser precísamente gracies a la normativa europea.
Ya tan intentando agora recortar y quitando subvenciones.
Si quiten les subvenciones esto cai pol so propiu pesu, ta claro, nun ya les subvenciones directes, sinon les indirectes. Quiten la subvención a les ganaderíes de toros de lidia y acabóse.
Ye mui fácil. Si quisieran yera mui fácil.
¿Y qué opines de lo que hai en dellos paises, que nun hai muerte nes corrides?
Antonio Coviella
Dende’l nuestru puntu de vista, nós tamos en contra de cualquier utilización d’animales. Ya nun ye solo que los torturen físicamente. Cualquier otru espectáculu, como circos con animales y demás, tolo que implique la utilización de los animales pa diversión, nun lo vamos ver bien.
Al fin y al cabu l’animal nun ta nes sos condiciones habituales. Da igual que al final-y claven la “puntilla” o que lu ten mareando o faciendo’l tonto.
Por eso decía qu’esto de les “vaquilles” ye peligroso, porque vese como algo más “light”, nun maten al animal, ye barato…lo conozo como ye’n Bocines. Ellos en navidá baxen a Salamanca y compren un xatín, ¿un xatín qué costará?, ¿venti mil presetes?, ¿trenta mil pesetes? Y críenlu en casa y cuando llega’l branu ya ye una “vaquilla”. Ye algo mui barato y sáquen-y muncha rentabilidá nes romeríes.
Ye’l problema qu’ hai cola decadencia de les romeríes. Les romeríes son cada vez más cutres. La sidra perronera, la música pesada, los controles d’alcoholemia… y hai xente que ta tirando por ehí, tan buscando actividaes d’esi tipu qu’atraigan xente.
Y por eso creo que hai que intentar parálo de raiz. Ambás ye fácil de parar porque lleva tres años. Bocínes ye más difícil porque lleva doce o trece.
Un asistente
Ya va siendo la hora y prestaríame que se comentara si a partir de les esperiencies cola presentación de les mociones podríen intentar facése más coses.
A lo queyor equí’n Xixón ye más dificil pero pienso que nel restu d’Asturies, onde nunca hubo nada de toros, esto de les mociones contra’l mantratu animal tenía que prender como la pólvora.
De Castrillón tenía qu’haber seguío a Corvera y d’ellí a tol occidente. ¿Qué falta pa qu’eso garre puxu?
Antonio Coviella
Creo que ye cosa de sensibilización ciudadana, según los estudios que ficimos, vemos que la xente ta’n contra, pero a la hora la verdá da-yos igual.
Un asistente
Y otro ye la sensibilidá política. ¿Pa qué’l PSOE o el PP en Pesoz va metése n’esti fregao?¿Pa qué van sacálo cuando nin-yos va nin-yos vien? Aunque ten en contra del maltratu. Nun ye una prioridá.
Aunque eso también engancha colo de la sensibilidá ciudadana. Va uno con l’otro.
Otru asistente
Ya, nun sé cuanta xente cambiará’l votu porque esti partíu seya taurín o antitaurín, cuando nun pinten ná los toros ellí.
Un asistente
Pero mira’n Cataluña.
Otru asistente
Ya pero Cataluña ye quizá la esceición. Ye de los primeros sitios onde entamó un movimientu antitaurín fuerte. Coles recoyíes de firmes, en Barcelona…Cataluña tien cierta tradición taurina, pero’n cuerta midía tien tamién tradición antitaurina ¿non?
Antonio Coviella
Si, en Cataluña ye onde más sensibilización animalista hai. Ya nun solo nel aspeutu antitaurín. En Cataluña, por exemplu, ya ye mui raro que s’almitan circos con animales, ye l’unicu sitiu onde ta prohibida la esposición d’animales n’escaparates. Les rambles, que teníen los puestos d’animales, y taba considerao como tradicional, agora ya queda sólo un puestu y var retirálu nun plazu, nun sé si de tres meses.
Ye un sitiu onde hai muncha más sensibilización al respeutu.
Fue la primera comunidá onde hubo una llei de protección animal. Y Asturies fue la penúltima’n tenéla. Sólo tuvo por detrás nuestro Extremadura.
Un asistente
Ta claro que ye un problema de sensibilización de la xente, porque equí n’Asturies siempre se tuvo a favor de los animales. El maltratu poques veces.
Una asistente
A lo meyor esa ye la clave, equí, como tampoco había tradición, ye como si a la xente-y resbalara. Y si preguntes, l’ochenta y cincu por cientu dícente que tan con ello, pero como tampoco ye una cosa te tengamos sufrío equí muncho… nun ye una prioridá pa nadie.
Sí, pero creo que tamién hai cierta ignorancia. Nós, cuando fuimos a falar colos del PSOE dixímos-yos: “oye, mirái, queremos que Corvera seya conceyu amigu los animales” y dixéronnos: “sí, sí, mui bien, si ya somos”, y nosotros seguimos: “sí , sí, conceyu amigu los animales y antitaurín”, ya ellos entamaron a dar vueltes: “bono, home, tal… si los d’Izquierda tan a favor…”, pero más tovía, cuando-yos falamos de los circos con animales, que tampoco podríen tar nel conceyu, ehí fueron más contradictorios tovía, dixeron un non rotundu: “ye que los circos con animales son de tola vida…”, y nosotros: “sí, pero ye que ehí tamién esiste maltratu, y el cuidáu que-yos faen, y hai munchos casos en qu’incluso muerren los animales… y el trastornu los viaxes…”.
Pero nada, yeren roceanos. Al principiu sí, tol mundu encantáu qu’el conceyu fuere amigu los animales, pero a la hora de ser consecuentes y ser antitaurinos y los circos… Ye como si tuvieren ehí un estigma cultural arraigáu. Y venlo como algo normal.
Ye un problema de sensibilización ciudadana. Hai que ser quien a llanzar un mensaxe que cale na sociedá.
