Tertulia: El coríu feu. Al rodiu de la lliteratura asturiana infantil y xuvenil

Resumen de la tertulia del 3 de mayu de 2011

El coríu feu.

Alrodiu de la lliteratura asturiana infantil y xuvenil

Na que participaron

· Vicente García Oliva

   Escritor

· Ángela Sánchez

   Editora, Pintar-Pintar Editorial

·  Mar Martín

    Responsable de la Biblioteca Virtual María Xosefa Canellada

Presentó: Iris Díaz Trancho

Iris Díaz Trancho

Esta tertulia pensóse con motivu de la Selmana de les Lletres Asturianes, qu’entamó ayeri, y pensamos en facela sobre lliterarura, pero plantegamos que, en llugar de facela sobre lliterarura en xenérico, falar de lliteratura infantil y xuvenil y n’asturianu, lo que ye’l guetu dientro’l guetu. De fechu, el títulu de la tertulia, “El coríu feu” pretende garrar esi espíritu.

Y pa ello, la xente que tenemos equí ye un poco representativo de too lo que ye lliteratura infantil y xuvenil n’asturiano. Ta Vicente García Oliva, que ye escritor, de los primeros qu’entamaron a escribir esti tipu de lliteratura nel “Surdimientu”, aparte ye miembru de númberu de l’Academia de la Llingua Asturiana amás de munches otres coses. Tenemos a Mari Mar Martín, que ye responsable de la Biblioteca Virtual María Xosefa Canellada, y por supuestu, esperta en lliteratura infantil y xuvenil, conoz a tolos autores y ta siempre al tantu de tolo que sal. Y a Ángela, que ye la responsable de la editorial Pintar-Pintar, una de les poques editoriales que tán especializaes nesti xéneru y, aparte, ye la Presidenta del Gremiu d’Editores d’Asturies.

Bono, ya sabéis la mecánica de la tertulia, iniciais los invitaos un turnu d’intervenciones y faláis de la vuestra esperiencia dientro de la lliterarura infantil y xuvenil, de lo que vos apeteza…, y dempués entamamos cola charra informal onde toos y toes podremos participar.

Vicente García Oliva

Primero davos les gracies por invitame a participar na tertulia y reñivos tamién por ponela cuando hai partíu, pero bono.

Creo que’l títulu qu’escoyísteis ye mui acertáu, ye mui propiu. Realmente la lliteratura infantil y xuvenil ye un poco la hermanina probe de la “Lliterarura” con mayúscules. Ye un xéneru que, hasta hai pocu tiempu, tuvo marxináu de la crítica y de les grandes publicidaes, quedó ehí, como nun requexín de lo que ye la llitetarura.

Tengo una anéudota onde se ve esto de manera bastante evidente, cuando publiqué’l primer llibru de lliteratura xuvenil, creo que yera Fontenebrosa, topé pola cai a un amigu del que nun voi dicir el nome, pero que ye un famosu intelectual asturianu, escritor y ensayista, y bono, felicitóme mui encesamente pol llibru, y díxome darréu: “¿y cuando vas escribir dalgo serio?”.

Esta idega de que la lliteratura infantil nun ye dalgo serio, sinón que ye una cosina pa entretenese, o pa la xente qu’entama, digamos que pa maurecer un poco, pa dir garrando tables, que se diz nel teatru, ta mui xeneralizada.

Digamos qu’agora, con munchu esfuerzu, ta consiguiéndose qu’esa lliteratura remonte un poco y qu’entre nos grandes canales de la lliteratura.

Pa nun allargame, voi dicir la idega que yo tengo de la lliteratura infantil y xuvenil asturiana. Agora ta mui de moda esa frase de que ye una cosa poliédrica, que tien munches cares. Yo creo que la lliteratura infantil y xuvenil asturiana, efectivamente, ye poliédrica, ye mui cebolla, tien munches capes. Delles d’eses capes creo que son bones y qu’hai que les aprovechar y potenciar, y otres creo que nun son tan bones y que son meyorables dafechamente, y algunes creo qu’habría que les meyorar muncho.

La primera d’eses capes pondríala nos creadores, na creación. A esi nivel, yo creo que tenemos una bona calidá d’escritores, quiciabis non mui numberosa, pero que puede homologase colo que s’escribe n’otros llaos del Estáu Español.

Lleo bastante lliteratura xuvenil, más qu’infantil, y paezque que los escritores asturianos tienen, o tenemos, un nivel más o menos aprosimáu al d’otres comunidaes.

Habría dellos datos que comentar a esti respective, como la incorporación de la muyer al mundu de la creación, lo que ye mui importante, incluso la incorporación d’escritores de lliteratura “seria”, digamos, que se pasaron al campu de la lliteratura infantil, como Miguel Rojo o Berta Piñán o… en fin, y eso tamién ye importante, vese que la cosa interesa. Y llueu ye mui importante la incorporación d’otru tipu de creadores, los del dibuxu, los artísticos. Esi ye un campu nel que tábamos mui ermos y que agora creo que ta dando munchu xuegu realmente y ya complementando muncho’l llibru, sobre too el llibru pa más pequeños, que ye’l que realmente necesita’l soporte del debuxu. Aunque creo que realmente eso nun ye un apoyu al testu, sinón que ye como un nuevu creador que trabaya nun mesmu testu, pero con una visión propia. Eso Ángela podrá comentalo con munchu más conocimientu que yo, pero veo que son xente con una gran cualificación profesional y artística y tan dando una aportación grande a la lliteratura.

Otra d’eses capes sería la que correspuende a l’alministración. L’alministración, na nuestra lliteratura, tien un papel mui importante, puesto qu’esta ye una lliteratura sovencionada. Y creo que la sovención ye imprescindible. Esta lliteratura nun se caltendría si nun ye gracies a la sovención. Eso nun tien por qué ponenos coloraos nin nada d’eso, eso pasa en munches actividaes. El cine español, si nun ye pola sovención, nun esistiría, el teatru…, etcétera. Lo único ye qu’hai que reconocelo, y esixir a l’alministración que siga apoyando a la lliteratura con eses sovenciones, y con otra cosa que tien creao, que ye’l premiu Xosefa Canellada, que ye mui importante porque por primera vegada hai un premiu ‘oficial’ del Principáu, qu’amás tien la mesma dotación económica que los demás premios, ye dicir, ta al mesmu nivel que’l premiu d’ensayu, que’l de poesía o que’l de novela. Bono, esa digamos que ye la parte positiva de l’alministración, la de les sovenciones y la del premiu, llueu ya, n’otra vuelta diré les partes negatives.

Y otra de les capes de la cebolla que yo creo que ye positiva ye la que fai mención a les editoriales. Les editoriales tán faciendo nesti momentu un productu con munchísima dignidá, un productu mui guapu, mui bien fechu, mui bien diseñáu, mui bien trabayáu. Y nesi sentíu paezme que tienen un méritu mui grande porque tán lluchando contra munches coses y tan sacándolo alantre.

En dellos casos hai falta de profesionalidá en dalgunes editoriales, anque nun son munches, pero neso nun entro nin salgo, será lo que pide’l mercáu. Pero conozo casos nos que se saquen llibros ensin contratu, nos que nun se paguen drechos d’autor y ensin siquier se menciona’l tema, etcétera. Eso hai que lo cuidar y si se puede, poner remediu. Porque a toos nos presta muncho publicar, y yá te sientes premiáu solo porque te publiquen un llibru, pero bono, les coses hai que faceles con seriedá, hai que facer un contratu, hai que pagar drechos d’autor, y si se venden cinco llibros, cinco llibros que te lliquiden.

Esa ye la banda de los aspeutos positivos, pero dempués hai una serie d’aspeutos negativos que son mui importantes y que tán torgando o estrangulando la posibilidá de qu’esi productu, que ye un productu mui dignu, llegue a onde tien que llegar, al lletor. Paezme que nun tien sentíu tol esfuerzu que se gasta en tiempu, en perres, en trabayu, en too, si llueu, eso queda nada más qu’ehí. Ye dicir, l’oxetivu de publicar un llibru nun ye solamente’l tener el llibru publicau, sinón qu’esi llibru llegue al so destinatariu, que ye’l rapaz, la rapaza, el que seya’l llector, y esi apartáu nun se ta algamando. ¿Por qué? Bono, pues porque me paez qu’hai un fallu d’eso que se llama los intermediarios culturales, que nun son capaces de “vender” esi productu bien fechu, y digo “vender” entre comilles, porque nun ye solo vender, sinón promocionar. Esi trabayu nun se ta faciendo. Y ehí hai responsabilidaes pa l’alministración, pa les propies editoriales, pa los maestros, pa los pas de los chavales… llueu, si queréis, paramos un puquiñín en caún d’ellos.

Y voi dexalo equí de momentu nesta primera intervención.

Mar Martín

A ver, lo que dices en cuanto a la illustración, yo creo que ye otra forma de narrar. El problema ta en que nun nos enseña naide a mirar. Siguimos lleendo’l testu, la pallabra, pero nun lleemos les imáxenes. Nun hai nadie que t’enseñe a descifrar esos códigos de les imáxenes.

Per otra parte, lo que dicíes de l’alministración, que los llibros nun lleguen a onde tienen que tar, ye una cosa que nun soi a esplicame tovía. De les llibreríes, agora mesmo cerraron Paraxuga, Trabe, Alborá Llibros, pero nun llego a entender por qué les editoriales, nun sé, Pintar-Pintar, Trabe, Ámbitu,  Enrique Carballeira… los llibros que saquen ¿por qué nun llegen a les novedaes de les llibreríes? Tán ehí, nun requexu escondíos que nun se ven. Y nes biblioteques municipales ¿ónde tán? Tampoco tán. Y nes biblioteques escolares ¿ónde? Nun hai. Y eso a min llámame l’atención, porque agora ta editándose d’una manera bastante digna, como dices, y nun lleguen a esos sitios ¿por qué?.

Y otra cosa que comenté l’otru día nel blogue de la Biblioteca, los mayestros, la mayoría, que siempre hai esceiciones, nun lleen, nin n’asturianu nin en castellano. ¿Cuántos llibros se saquen agora pa poder lleelos? Son cuatro. Date tiempu a lleer unos cuantos nun día. Y nun hai conocimientu. Yo, que voi cada poco peles escueles, pregunto “¿sabeis otru llibru de Miguel Rojo?” y nin idega. Rojo sacó últimamente “De qué tara fecha la lluna”,” El viaxe de Tin y Ton” y lo de la hestoria del dinosauriu [El dinosariu, el príncipe, la nena y la so ma], y cuando preguntes, nun saben dicite nin ún.

Tán esperando la sovención de Cultura pa que’l director o la directora merque los llibros na Escuela pa poder ellos lleelos. Pero bono, qué te cuesta a ti mercar el llibru, tenelu na to casa, llevalu a la Escuela, lleelu a los guah.es, disfrutalu y trabayalu en clase, ¿ye tan difícil?.

Si tú, comu mayestru, nun llees ¿qué-y vas a tresmitir a esos guah.es?¿El llibru de testu d’asturianu?

A mi eso llámame muncho l’atención.

Veo qu’últimamente l’aturianu ta n’agonía. Non solo l’idioma, que nun se fala per ehí. Yo l’otru día nun cíber dixe “oye, imprímeme esto nuna fueya”, “¿nuna qué?” o pido, “ponme una llambionada” y nada.

Pero nun lo veo solamente neso, sinón tamién nel terrén cultural, educativu, en too.

Porque al final ¿por qué se mueven los mayestros? Porque al final “hai, la plaza d’interinidá nun me tocó esti añu”, y a les manifestaciones vamos cuatro, siempre vamos los mesmos.

Ángela Sánchez

Bono, yo voi dir tocando dellos de los puntos que dixo Vicente. Primero, dientro la lliteratura infantil y xuvenil hai una sub-sección que son los álbumes infantiles illustraos, que nun tienen muncho que ver cola lliteratura xuvenil, porque nesta lliteratura tovía podemos falar d’un pesu importante del testu frente a la gráfica, pero nos álbunes illustraos tenemos testu, d’otra banda tenemos gráfica, y dientro de la gráfica inclúyese’l diseñu gráficu, que ye cómo ye esi llibru y cómo ta maquetáu esi testu, y les illustraciones. Y eses tres coses, el diseñu, la illustración y el testu, qu’a veces ye cortísimu, xúntense y formen un ser diferente, un oxetu nuevu, y esi oxetu ta cuntando una hestoria con testu y con illustración. Y hai veces que, onde nun llega’l testu, llega la illustración, y tamién a veces pasa como nes películes, el guión del que fizo la película, nesti casu’l que fizo’l testu, al final nun concuerda colo que ta viendo nes illustraciones, porque al final la hestoria acaba yendo por otru llau.

Y eso hai que tenelo en cuenta. Los álbunes illustraos son una cosa distinta a la lliteratura. Ye daqué dististo onde participen tres creadores, el diseñador, l’illustrador y l’escritor.

Cuando nosotros entramos al tema de la edición, veníemos del diseñu gráficu y de la illustración, nun veníemos de la lliteratura, y eso notósenos. Conocíemos bastante’l llingüaxe gráficu, pero muncho menos el tema de la lliteratura, y teníemos, bono, tenemos que siguir yendo detrás de los escritores pa que nos den un testu.

Y cuando analizamos l’entornu en que nos díbemos mover, dábanos la sensación de que a los llibros que se facíen equí n’Asturies, que yeren casi toos n’asturianu, porque llibru infantil en castellán nun se facía nada prácticamente, faltába-yos esa parte. Entender qu’ehí tenía qu’esistir un direutor d’arte, qu’ehí tenía qu’esistir un diseñador, que tenía que tar ehí un illustrador profesional, pa que llueu saliera un productu homologable y que pudiera salir del Puertu Payares y llegar a Madrid y a Cataluña y a onde seya.

Y esa fue la nuestra idega, intentar facer eso.

Tamos falando de que nos movemos con otres riegles de xuegu diferentes a lo que ye la lliteratura tradicional. Nun val solo con que seya un testu bonu. Tien que ser un testu bonu, pero tien que tar tamién sofitau por un illustrador bonu. Porque un testu bonu con un mal illustrador, fastidia’l testu. Y un mal testu con un illustrador bonu puede ayudar munchísimo a esi testu.

Eso per una parte. Sobre’l tema les subvenciones que dicía Vicente tamién, apoyo la moción de que naide se tien que poner coloráu por dicir que ta trabayando con una subvención. Agora bien, ye distinto dicir que toi editando con una subvención a decir que vivo d’una subvención. Yo nun vivo d’una subvención. A min danme unes perres pa facer unos llibros y yo gasto hasta l’últimu céntimu que me dan en facer esos llibros, en facer una producción cuidada, en paga-y al illustrador los drechos que tengo que paga-y por adelantao porque sinón nadie con un determináu nivel pa querer coyer y ponese a facelo si nun-y garantizo unos honorarios.

 Ye dicir, gastamos tol dineru na edición d’esos llibros, y llueu vivimos de vender esos llibros. O seya, que si los facemos y nun los vendemos, nun solo nos los comemos sinón que nos vamos a la porra.

Ensin la subvención nun podríamos editar, porque los costes d’impresión…, porque amás caltenemos qu’hai qu’editar equí n’Asturies si tas recibiendo dineros públicos d’Asturies, y non dir a Taiwan a que te lo faigan pola metá de preciu.

Y al vivir de la venta de los llibros, ¿qué fue lo que nos dimos cuenta? que pese a sacar unos llibros cuidaos, con unos testos atractivos, la venta d’esos llibros nin siquier nos servía pa tener unos ingresos suficientes pa sobrevivir. Y vimos que lo que teníamos que facer yera editar n’asturianu pero editar tamién n’otros idiomes, pa que la tirada fuera mayor, pa que los costos d’impresión fueran menores y pa poder tener una opción d’un mercáu más global.

Y asina más o menos van saliendo los llibros.

El tema de les biblioteques públiques ye mui complicáu. Vimos nestos últimos años que depende de la voluntá política de quien tea na cúspide de la Conseyería de Cultura. Asina de cenciello. Cuando taba Encarna, l’anterior Conseyera, y cuando taba de Directora Xeneral Chelo había interés ya intención de que lo que s’editaba n’Asturies, si tenía la suficiente calidá, llegara. Y nesos tiempos los llibros llegaben. De tal manera que yo sacaba una novedá editorial y presentába-yla a les biblioteques, sabía que, polo menos, trenta o cuarenta llibros llegaben a la rede de biblioteques públiques. Bono la rede de biblioteques públiques son doscientes y picu. Inclusu en dalgún llibru podíen llegar setenta.

Pero llevamos dos años onde nada de nada. Yo falo colos bibliotecarios, tovía hai delles selmanes tuve faciendo-yos una rueda de llamades pel teléfonu y acabé faciéndo-yos yo a ellos el psicoanálisis en vez d’ellos a min, porque too yera: “ye que nun tenemos perres”,”ye que, porque son elecciones, quieren que gastemos tolo que tenemos agora y nosotros queremos aguantalo hasta final d’añu”,… y al final la conclusión: “col pocu dineru que tenemos la orde ye comprar lo que se sabe que se va sacar”, o seya, n’infantil Harry Potter, Kika Superbruxa, Gerónimo Stilton, y en xuvenil, “Amanecer”, “Crepúsculo” y toes estes hestories de los vampiros. Y nun va haber perres pa más.

Quieren dir a lo seguro, y que cuando’l críu vaya a pidir esi llibru, que lu tengan, porque, claro, probablemente nun vayan a pedir el que vamos a editar nosotros n’asturianu. Ye la pescadiella que se muerde la cola. “Nun los tengo porque nun me los van a pidir”, “pero nun me los van a pedir porque nun los enseño”.

Y “mutatis mutandis” que de dicía antes, nes llibreríes lo mesmo. “Nun lo tengo porque nun me lo van pedir, pero nun me lo van pedir, porque nun lo veo”.

Mar Martín

Entós lo que falla ye la demanda.

Ángela Sánchez

¿Falla la demanda? Y falla la ufierta tamién, porque si nun lo ves, nun lo compres.

Ensin embargu, nel Gremiu d’Editores la esperiencia que tenemos ye que cuando hai una feria del llibru, por exemplu’l Salón del llibru asturianu de Xixón, que ye n’agostu, el trenta y cincu o el cuarenta por cientu de les ventes de llibros son llibros n’asturianu, porque se ven y se compren.

Un asistente

Bono, mio madre tien una llibrería pequeña y manexa una distribuidora de les normales, y pa ella, el llibru n’asturianu nun esiste. Normalmente a ella mánden-y los llibros, tienlos en depósitu y véndelos. Pero nun-y lleguen llibros n’asturianu. Y ye que cuando lleguen, véndense. De recetes de la güela…, de prerrománicu…, véndense. Paez increyible. Lo que llega n’asturianu véndese. Nun ye un llibru que se vende peor.

Home, nun son los “top”, Harry Potter ya eso, pero quitando eso, son llibros que se venden.

Vicente García Oliva

Vamos ver. A min paezme qu’alguna solución tien qu’haber. ¿Cómo hai que facer llegar el productu al públicu? Ehí falaría de tres factores. El primeru tien que ser l’alministración. L’alministración gasta unes perres en facer un productu y ye d’una ineficacia total el qu’esi productu nun se promocione llueu pa vender. Ye como si te dediques a fabricar reloxes y llueu méteslos nun caxón. “¡Oiga non, usté fabricó’l reló, agora hai que vendelu!”. Entós hai que convencer a l’alministración de qu’eses perres que gastó nesi productu hai que rentabilizales. Nun pueden quedar nun caxón, yo se que na Conseyería tienen caxones de llibros asina de grandes ensin distribuyir.

Había qu’esixir qu’en toles biblioteques públiques y en toles biblioteques escolares haya polo menos un exemplar d’esi llibru que costó perres, esfuerzu, trabayu… Que l’alministración s’encargue de facelu llegar a tolos colexos, que tampoco va ser tan difícil.

Mar Martín

Pero ye que tamién son los enseñantes los que lu tienen que demandar.

Vicente García Oliva

Bono, en principiu tamos falando de l’alministración, llueu vamos a ello.

En segundu llugar, lo que dices, los profesores, los profesores de llingua asturiana, ye imposible que con venticinco mil o ventiocho mil alumnos qu’hai se vendan cien exemplares d’un llibru. Yo nun digo que cada chaval compre un llibru, que seríen venticinco mil llibros, pero bono, ¿ponemos un diez por cientu?, nun sé, ¿que de cada cien chavales, diez compren el llibru?, seríen dos mil quinientos llibros, ye una tirada mui bona.

Ángela Sánchez

Los d’Everest nun tienen dengún problema. ¿Por qué? Porque aparte de vender llibros de testu, imponen nel colexu el llibru de llectura obligatoria… bono, nun voi dicir qu’imponen, voi dicir que concierten colos Colexos, con munchos Colexos, llibros de llectura obligatoria, a cambiu d’ordenadores, de pizarres electróniques y delles otres coses, y aún así, como ye una editorial mui grande y tamos falando d’economíes d’escala, pueden entrar neses histories. Nosotros, editores d’asturianu, evidentemente, nun podemos entrar nesi negociu.

Voi dicir lo que pasa en dellos colexos, como tengo crios, regalo los llibros al Colexu y van y trabáyenlos, pero con fotocopies.

Vicente García Oliva

Pero eso ta prohibío. Nun puedes fotocopiar un llibru enteru.

Ángela Sánchez

Sí puedes. L’otru día una directora pidióme un llibru y tornó con fotocopies pa tola clase. Y yo quedé tan ablucada que nun fui capaz de deci-y nada.

Vicente García Oliva

Esi ye l’otru tema. Sería cosa de falar colos profesores y deci-yos qu’esto hai que promocionalo de dalguna manera, hai que falar colos pas de los neños, trabayar el llibru en clase, crear espectatives, llamar al autor pa que venga a clase a dar una charra, que los neños lu conozan, qu’eso siempre impresiona muncho, y bono, esi tipo de coses.

Y dempués queda’l tema de les llibreríes. Yo creo que les editoriales tamién podríais facer daqué per ehí. Nun sé, tener más presencia física nel mundu cultural, nel mundu educativu, inclusu nel mundu social.

Ángela Sánchez

Yá tenemos.

Vicente García Oliva

Nun sé, dir a la SER y decí-yos, mira-y, equí tenemos un llibru, vosotros sois una emisora asturiana, tenéis que poner esti llibru. Si queréis falo yo, si queréis traigo a l’autor…

Ángela Sánchez

A ver, a ver, la SER..., lliteratura infantil y xuvenil na SER…., el que lo lleva nun mete nin un llibru n’asturianu.

Vicente García Oliva

Bono, pa eso tamién hai que saber con quien falar, a qué tecles tocar. Fales con Xurde Morán, el d’Andarín, y métetelu nel programa d’él, que tien un programa diariu.

Ángela Sánchez

Ye difícil esto. Nos colexos, cuando faes llabor comercial, acabes colando llibros n’asturianu. Tando encima d’ellos contra vientu y marea. Faciendo coses estratosfériques como que “si me compres venti llibros, llévote l’autor gratis”. Regalamos esposiciones. En fin, coses d’estes que al final nun sal lo comío polo servío, pero ye una manera de semar y al añu siguiente ya tienes posibilidaes de llegar… Y asina vamos entrando, pero cuéstanos muncho, cuéstanos munchísimo.

Vicente García Oliva

Yá, pero eses coses fáenles toles editoriales.

Ángela Sánchez

Yá, pero nun acaben de conocenos. Y mira que salimos nel periódicu por activa y por pasiva, y mira que tamos n’Internet dando la tabarra, y nun se nos conoz.

Iris Díaz Trancho

De les llibreríes d’Asturies, tengo un trabayu entamáu sobre les estanteríes nes qu’asitien la lliteratura infantil y xuvenil. Hai una serie de parámetros, primero si tienen llibros n’asturianu, qu’eso nun ta asegurao siempre, fíxome en cómo lo tiene señalizao, a qué altura ta… y bono, toes eses coses, y lo que te das cuenta ye que, menos nes llibreríes especializaes, qu’acaben de zarrar prácticamente toes, el restu les llibreríes, o nun tienen, por exemplu la Casa del Libro nun tien lliteratura infantil ni xuvenil n’asturiano, paezme terrible que polo menos nun tengan cuatro títulos pa cumplir. Y del restu les llibreríes, tán nun requexu, nun tán nin a l’altura de los neños pa que puean velos. Pónenlos arriba del too, onde nun llego nin yo, que tampoco ye que seya muy alta, pero, en fin, soi una adulta.

Entós nun ye que nun se quiera, porque agora hai productu lo suficientemente apetecible como pa qu’apetezca comprar, sinón que nun se pon onde se tien que poner, nun se publicita de denguna manera.

¿Veis alguna propuesta pa meyorar esto?

Ángela Sánchez

Pues el que tenga alguna idega que la diga, pues yo nun sé qué se puede facer col tema de los llibreros. Les distribuidores tán encantaes de dexar llibros en depósitu nes llibreries, los míos queden en depósitu seis meses o lo que quieras con tal de que se vean.

Vicente García Oliva

Yo creo qu’ehí, la iniciativa tendría que partir tamién de l’alministración. L’alministración tendría qu’organizar un alcuentru nel que tuvieran toles partes interesaes y, bono, ver cómo se puede solucionar esti tema.

La nuentra alministración ye de la que dependen la nuestra cultura, la nuestra llingua, ye la que ta obligada colos nuestros impuestos, que pa eso los pagamos, a mover toos estos temes.

O seya, nosotros podemos facer la quexa, “equí, nes llibreríes, nun apaecen los llibros n’asturianu”, “queremos solucionar esti tema con toles partes implicaes: alministración, distribuidores, llibreros, editores, y si hai de dir a los autores, tamién”.

Estes llibreríes tán trabayando equí, n’Asturies, bono, pues algún compromisu tendrán que tener, digo yo ¿non?

Un asistente

Yo creo qu’un problema ye que se subvenciona la creación, pero nun se subvenciona la distribución. Una vez fechu’l llibru, ya s’acabó’l trabayu.

Y, nun sé, a lo meyor, como una idega, cada llibru que se lleve d’una editorial, anque seya’n depósitu, dar un euro. Y a lo meyor nun hai que gastar tanto na creación, anque ye importante, p’apostar tamién pola distribución.

Vicente García Oliva

Lo que pasa ye que si la distribución nun la das n’orixen, el llibru nun se fai.

L’autor nun cobra subvención, la que cobra subvención ye la editorial.

Hubo un tiempu en que sí, que se subvencionaba al que presentaba un proyeutu de llibru.

Ángela Sánchez

Non, eso sigue tamién.

Vicente García Oliva

¡Ah!, nun lo sabía. Yo, sinceramente, eses perres nun les daría pa eso. Pero sí, el llibru tien que tar subvencionau, porque si non nun se fai. Pero, sí, al llibru hai que segui-y un poco la trayectoria, porque si non son perres tiraes.

Iris Díaz Trancho

Como nos queda pocu tiempu, podíemos pasar al ámbitu de la escuela, que falábais agora. Ye verdá que los mayestros d’asturiano tán mui poco informaos, pero non muncho menos que’l restu los mayestros.

Tú pregúntes-y a un mayestru de llingua castellana qué novedaes editoriales hai y tampoco les conoz. Lo que pasa ye que como tamos nuna situación tan crítica, paez que focalizamos más, pero nun ye munchu peor de lo qu’hai nel restu.

Lo que noto ye que la xente, como nun llee lliteratura infantil y xuvenil n’asturianu, nun ta al tantu de les novedaes editoriales qu’hai. Eso solucionábase dende l’alministración mandando tolos años un catálogu de les novedaes pa que cuando a esi mayestru d’asturiano-y digan na biblioteca “¿qué llibros quies comprar?”, pueda coyer, nun sé “pues mira, esti que tien bona pinta, y esti otru…”. Porque ye que, de lliteratura en castellano, lléguente catálogos maraviyosos de les editoriales, y ye d’ehí d’ónde se saquen gran parte de les llectures del  cursu. Y evidentemente, col presupuestu que tienen les editoriales asturianes, eso nun lo pueden facer. Ya incluso puede que nun seya necesario, porque una editorial d’equí, pa un llibru o pa dos, nun-y compensa facer una cosa d’esti estilu, pero a lo meyor, pa los venti títulos que se saquen al añu, sí compensa.

Porque munches veces, creo que nun piden llibros por desconocimientu, porque nun saben qué pidir.

Mar Martín

Bono, tienen una ferramienta perimportante n’internet.

Yo creo qu’el problema parte siempre, siempre, de los mayestros, que nun son llectores. Y ehí empieza too, na escuela. El guah.e nun va solu a mercar un llibru. Los pas, munchos, nun conocen l’asturianu, a nun ser cuatro como nosotros, militantes.

Entós too parte de la escuela. Si el mayestru nun llee, nun puede tresmitir nada. Nun puede tresmitir esa pasión pola llectura. Esi dicir: “oye mamá, la mayestra lleóme tal cuentu y quiero tenélu en casa, o quiero regala-ylu a fulanito”.

Vicente García Oliva

Entos, nes escueles, ¿con qué materiales trabayen?

Mar Martín

Ye que pasa otra cosa, la situación de los mayestros d’asturianu ye mui mala, la interinidá ye terrible, nun hai places, nun hai oficialidá, falla too. Entós dicen “¿qué gano? ¿cuatro perres?, pa que me voi molestar trabayando”. Asina son la mayoría. “¿Encima voi tener que comprar el llibru?” “¿encima voi tener tener que lleer el llibru?”, ”¿encima preparar sobre’l llibru?” “non home non”.

Vicente García Oliva

Oye, que nun ye lleer el Quixote, ¿eh?. Ye un llibrín de nada.

Mar Martín

Por eso ye polo que yo nun me lo esplico. Pero al fallar eso, falla too na distribución. Si yo tuviera de mayestra y me dixera’l direutor que nun puede mercar un llibru, yo mesma mercaría’l llibru. ¿Qué me cuesta un llibru de los de Ángela? ¿Catorce, quince euros?.

Ángela Sánchez

Non home non, esos son los caros.

Mar Martín

Y los d’Enrique lo mesmo, y los de Trabe, y los d’Ámbitu.

Iris Díaz

Y llueu, lo que comentábeis, en realidá nun fai falta nin deci-yos a los neños que lu compren. Yo, los llibros que lleo en clase, sal de los propios neños el compralu. Vese. Si-yos presta sáquenlu de la biblioteca dempués. Y hai dellos que lu compren tamién.

Nun fai falta ponelu obligatoriu. Hai una manera d’estimulalos, de llama-yos l’atención sobre determinaos títulos. Y llueu yá sal d’ellos.

Lo que pasa ye que claro, la televisión, l’entornu, estimula a Harry Potter, pero ye otru tipu d’estímulu, nosotros xugamos con esi tipu d’estimulación. Pero trabayando, nun fai falta obligalos.

Mar Martín

Pero eso ye porque los estimulaste. Ye asina. Y el guah.e diz “oye papá o mamá, llévame a la biblioteca que quiero volver a lleelu”, y entós, si van varios a la biblioteca a lleelu, la biblioteca, al final, tien que tener el llibru.

Ángela Sánchez

Yá casi pa terminar, quería dicir una cosa que siempre que la digo sorprende muncho, pero que ye cierta, y ye que nos cuesta muncho atopar bones histories n’asturianu. Lléguennos munches hestories al estilo “…la neñina… tal”, pero ensin nivel. Equí qué más da l’idioma, vamos contar una bona hestoria, n’asturianu, en bielorruso, si esiste, na llingua que seya, pero que seya una bona hestoria, y cuéstanos munchísimo, de verdá. Tamos faciendo agora una campaña pa intentar traer pa esti campu a xente qu’habitualmente nun ye de  “lliteratura infantil”, entre comilles, y l’últimu que pillamos fue Pepe Monteserín, que nos mandó dos testos preciosos, a ver si podemos tirar por ellos. Y como digo Monteserín, tamién otros autores qu’habitualmente nun trabayen esti tipu de lliteratura, pero tenemos que dir detrás d’ellos.

Vicente García Oliva

Lo que pasa que vosotros pedís mui pocu testu, y claro, en tan pocu testu ye difícil cuntar una hestoria.

Ángela Sánchez

Sí, ye mui complicao. De toes formes tamién vamos aprendiendo y vamos sacar tamién hestories un poco más grandes pa esti añu, pero eso va suponer que van ser llibros más caros. Nosotros queríemos movenos na banda de diez u once euros, y agora ya tamos na banda de trece o catorce.

Vicente García Oliva

Bono, el que paga diez u once por un llibru, paga catorce igual si’l llibru lo merez.

Y en cuanto a los álbumes, siempre digo que nun ye lo mesmo lliteratura infantil que llibros pa neños. Y los álbumes, igual son llibros pa neños pero nun son lliterarura infantil. Nun sé si m’esplico.

Lliterarura, la propia palabra lo diz, desixe un testu que tresmita daqué a un chaval, anque llueu lleve’l sofitu d’un testu paralelu con debuxos. Pero hai álbunes tan escasos de testu que nun te tresmiten absolutamente nada.

Ángela Sánchez

Sí, precísamente esi ye’l problema que tenemos.

Vicente García Oliva

Nun sé, garres el llibru d’Iris, por exemplu, el de “La Casa Malva”, ye un llibru monográficu, son cuatro trazos, y ensin embargu cuenta una historia, pero hai otros que “…l’osín nun sé qué…” con unos dibuxos preciosos, pero eso nun ye lliteratura, eso son llibros pa neños, mui guapos.

Ángela Sánchez

Bono sí, …nin siquiera…, pero sí. Pero eso ye lo qu’acabo de dicir. Ye’l problema que tenemos. Que necesitamos testos que cuenten. Porque en tres folios dígote yo que se puede contar.

Vicente García Oliva

Sí, y en mediu foliu tamién.

Un asistente

De lo que falábes al principiu de que te preguntaben dempues d’escribir un llibru d’estos que pa cuando dibes publicar un llibru en seriu, ¿qué ye que la lliterarura infantil y xuvenil nun ye seria?

Vicente García Oliva

Paez ser que non. Nun se tien por seriu el xéneru en sí.

L’asistente d’antes

Pero, eso que decíeis de la competencia con Harry Potter, ¿ye que nun se puede escribir un Harry Potter n’asturianu?

O ¿ye que Harry Potter ye tamién mala lliterarura? Y si ye mala lliteratura, ¿por qué vende tanto? que los neños d’equí compraben el llibru n’inglés antes de que saliera en castellano.

Vicente García Oliva

Eso ye márketing.

Iris Díaz Trancho

Pero equí, n’asturianu, la lliteratura infantil y xuvenil ye considerada con muncho un xéneru menor. Y una preba de que nun ye asina ye, como bien dicía Ángela, qu’hai autores de lliteratura p’adultos que tienen fecho lliteratura infantil y xuvenil, como Aurelio González Ovies, Berta Piñán, Miguel Rojo,… pero hubo otros nomadísimos escritores n’asturianu p’adultos que nun voi citar, pero que toos conocemos, que ficieron lliteratura infantil y xuvenil malísima, porque claro, tien otros rexistros, tien otros códigos, tien otru ritmu, ye diferente. Nun ye tan fácil.

Nun ye coyer una historia, simplificala, y entós yá ye pa neños. Non. Nun se trata d’eso.

Y ¿por qué nun hubo una selmana de les lletres asturianes dedicada a la lliteratura infantil y xuvenil?

El teatru qu’hai n’asturianu ye mui poco, y yá hubo una selmana de les lletres dedicada’ al teatru, y otra a la novela, y otra a la poesía, y otra a la música..

Vicente García Oliva

Y pa mas “inri”, too eso trabáyase amás nes escueles. Y munches veces a los neños nun-yos interesa n’absoluto.

Un asistente

Y la lliteratura infantil y xuvenil ye lo que más se vende ¿non?

Iris Díaz Trancho

Claro, véndese lo que más. Y lléese lo que más.

Vicente García Oliva

Pero nun da tantu prestixu como la poesía, que ye una cosa mui culta.

Mar Martín

Y ¿por qué tampoco nun ta na Universidá? Yo estudié filoloxía y nun ta. Nadie me faló de lliteratura infantil. Nun la tratamos.

Iris Díaz Trancho

Y yo, cuando estudié “l’espertu” pa ser maestra d’asturianu, tuvi dando a Marirreguera, que me paez fenomenal, que tienes que dalo, pero lo que vas a usar en clase, evidentemente, nun ye eso. Y de lliteratura infantil y xuvenil nun vimos nada. Y hai mui poco escrito. Y nun hai casi estudios sobre ello.

Agora pémeque yá nun ye asina, tán estudiando tamién la lliteratura infantil y xuvenil y cómo llevalo al aula. Hai coses que meyoren.

Ángela Sánchez

P’acabar, como Presidenta del Gremiu d’Editores d’Asturies, quería comentar que nel añu que llevo na presidencia, nun fui capaz de poder conversar y poder convencer al mio interlocutor na alministración del Principáu, que fue Jorge Fernández León, de la importancia y la necesidá d’invertir en Cultura Asturiana, en productu d’equí, y non solo como cuestión cultural sinón tamién como cuestión industrial, como cuestión de xenerar dineru que va quedase equí. Ye imposible.

Yá sabemos toos que tien que venir too de fuera y esa ye la hestoria.

Y tán mancándonos muncho. Yéremos ventiún editoriales cuando yo empecé y agora somos diez y seis. Y probablemente caiga dalguna más, porque cayeron distribuidores y los distribiudores arrástrennos a nosotros, porque quedámonos ensin llibros y nun paguen les lliquidaciones.

Y d’eso alvertimos a les alministraciones, “oye, esti añu nun nos cortéis les compres pa les biblioteques, porque vais a matanos”, y nun lo entendieron. Y tán cayendo editoriales. Y como caen editoriales, los escritores d’equí cada vez tienen menos espaciu onde publicar. Y cuando al final queden…, nun se cuantes van quedar… tres…, entrugarémosnos toos qué fue lo que pasó, quien fue’l culpable, y si “entre todos la matamos o ella sola se murió”.

Pero bono, yo yá lo dexo, habrá qu’esperar a les prósimes elecciones y ver quienes son y cómo funcionen.

Iris Díaz Trancho

Bono, yo creo que l’oxetivu ye tener cierta querencia polo nuestro. Nesti casu, col nivel d’edición que tenemos, dicir que siempre ye meyor lo de fuera…

Lo que comentábamos cuando la tertulia del teatru, les compañíes dicíen lo mesmo: “somos una compañía que tamos actuando fuera perfecto, y equí nun nos contraten porque prefieren una compañía de Madrid que amás nun conocen, nun saben nin como ye nin nada”.

Los complexos hai que superalos.

Vicente García Oliva

Non, pior tovía, porque munchos d’equí tampoco nun pueden trabayar fuera, porque ellí promocionen a lo d’ellos y equí tampoco porque equí traen compañíes de fuera. O seya, nin fuera nin dientro.

Pero mira-y, pa nun acabar de forma tan pesimista, quiero dicir que con toes eses dificultaes, siguen escribiéndose llibros y publicándose, lo que ye milagroso ¿non?

Ángela Sánchez

Yá, pero nun sé hasta cuando. Dígotelo de verdá. Nun sé hasta cuando. Siento quitate’l toque optimista, pero nun puede una pretender llevar seis años lluchando por esto, invirtiendo, intentando que salga p’alantre, pa llegar al final y nun tener nin siquiera un sueldu de mileuristes. Non, home, non.

Tertulia: La primavera avanza. Presente y posibilidaes de l'agricultura ecolóxica

Resumen de la tertulia del 5 d’abril de2011
La primavera avanza.
Presente y posibilidaes de l'agricultura ecolóxica

Na que participaron

• Alberto Buznego “Rizos”
Activista miembru de l’Asociación Picu Rabicu

• Gustavo Forcelledo
Productor de quesos. Quesu de Varé

• Aquilino González
Agricultor Ecolóxicu El Noceu

Presentador
Esta sesión de la Tertulia Pachín de Melás quisimos dedicala a l’agricultura ecolóxica, partiendo d’un llibru clásicu, “Primavera silenciosa”, de Rachel L. Carson editáu allá polos sesenta [Silent Spring 1960, reedición en Editorial Crítica 2005], del que me vais permitir que-vos llea unes llinies como introducción:

So crecientes estensiones d’Estaos Xuníos, llega agora la primavera en sin ser anunciada pol regresu de los páxaros, y los tempranos riscares tán estrañamente silenciosos ellí onde antes se llenaben de la guapura del canciu les aves. Esti silenciu repentín, esti tapecimientu del color, de la guapura y del interés que los páxaros confieren al nuestru mundu, tien venío a lo foíno, astutamente, y en sin ser notao.

Pa toos nosotros, tanto como pal raitán de Míchigan, o pal salmón del Miramichi, esti ye un problema d’ecoloxía, d’ interdependencia. Envelenamos a los mosquitos d’un ríu y los bancos de salmones queden afectaos y muerren. Envelenamos les larves de les mosques d’un llagu y la ponzoña pasa d’eslabón n’eslabón, pola cadena d’alimentos, y pronto conviértense en víctimes los páxaros de les orielles. Rociamos les nuestres llameres y les siguientes primaveres quédense silencioses, en sin el canciu de los raitanes, nun porque los tengamos rociao direutamente, si non porque’l velenu viaxó, pasu tres pasu, a traviés del cieclu constituyíu poles fueyes d’esi árbol, los merucos de tierra y el raitán que los come. Esos son casos rexistraos, fácilmente observables, que formen parte del mundu que nos arrodia. Reflexos del texíu de la vida –o de la muerte- que los científicos conocen como ecoloxía.

Atopámonos agora nuna encruciyada. Pero al aviesu de los caminos del poema de Robert Frost, dambos nun son igualmente guapos. El que tuvimos siguiendo ye d'una facilidá que deceiciona, una carretera de primerísimu orde pola que progresamos a gran velocidá, pero a que’l so fin ta'l desastre. La otra vuelta –el camín “menos frecuentau”- ofrez al final la nuestra única oportunidá p’algamar una meta qu’ asegure la conservación de la nuestra tierra.
Depués de too, la elección tenemos que facela nosotros. Si, depués de tener aguantao muncho, aseguramos el nuestru “derechu de saber” y si, sabiendo, llegamos a la conclusión de que se nos pide qu’aceptemos riesgos temibles y disparataos, nun debemos continuar siguiendo'l conseyu de los que nos dicen que llenemos el nuestru mundu de productos químicos velenosos; tenemos la obligación de mirar al nuestru alredor y ver qué otra sienda s’abre ante nós.

Y frente a esi envelenamientu sistemáticu que se fai na agricultura “convencional” descritu maxistralmente nesi llibru de la Primavera Silenciosa, quiximos poné-y a la nuestra tertulia “La primavera avanza”, y aprovechando la cita anterior al poeta Rober Frost, garramos nosotros, como símbolu d’esperanza, el poema d’Ángel González

        La vida en xuegu

Onde pongo la vida pongo'l fueu
de la mio pasión volcada y ensin salida.
Onde tengo l'amor, toco la ferida.
Onde pongo la fe, póngome en xuegu.
Pongo en xuegu la mio vida, y pierdo, y llueu
torno entamar, ensin vida, otra partida.
Perdida la d'ayeri, la de güei perdida,
nun me doi por vencíu, y sigo, y xuego
lo que me queda: un restu d'esperanza.
Al siempres va. Caltengo la mio postura.
Si sal nunca, la esperanza ye muerte.
Si sal amor, la primavera avanza.

Falamos d’esperanza, porque tamos viendo qu’equí n’Asturies ta medrando l’agricultura ecolóxica, y cada vez hai más productores y paez tamién que’l so consumu ta espoxigando.

Y pa falar d’ello tenemos a tres invitaos, Aquilino González, agricultor ecolóxicu de la finca El Noceu, equí cerca, en Sariegu, a Gustavo Forcelledo, que ye’l primer ellaborador de quesu ecolóxicu d’Asturies, el famosu Quesu de Varé, y a Alberto Buznego, al que tol mundu conoz como “Rizos”, que ye un activista, quiciavis el que más se ta moviendo agora mesmo nesti mundu de l'agroecoloxía y que pertenez a l’Asociación Picu Rabicu, y que va ser meyor que nos cuente él mesmu de qué va.

Ya sabéis, esta tertulia ta abierta y que toos, igual que los invitaos, toos podemos intervenir. Y p’alantre. Si quies entamar tu mesmu, Gustavo… venga, tienes la palabra.

Gustavo Forcelledo
Voi cuntavos la mio esperiencia col quesu. D’entrada, al ser los pioneros neso del quesu ecolóxicu, topabes col primer problema que yera esplica-y a la xente qué yera eso d’ecolóxico, porque sonaba mui artificial esi términu. Equí lo que tien munchu prestixu ye’l tema de lo de casa. Les coses caseres, de casa, tienen un valor añadíu mui grande. Pero respeutu a lo d’ecolóxico, taben fartucos de la propaganda de les grandes empreses, eso del bio-nun-se-qué, sonaba un poco a falso, y nun principiu hubo que dar munches esplicaciones pa informar a la xente.
Tamién hai más conciencia agora de l’alimentación. Hai munchos temes d’alerxes, de reacciones a productos químicos, y la xente entama agora a querer alimentase sano.

Aquilino González
Yo voi entamar por presentame. Vengo del movimientu obreru, principalmente na cuenca minera. Ellí, bono, vas implicándote y llueu vas enllazando col movimientu pacifista, aquello d’OTAN NON, ecoloxista, les campañes antinucleares… y too eso llévate a una toma de conciencia no que tamos. Y coincide que los padres de la muyer son agricultores y que teníamos ganes y les tierres y planteamos un proyeutu alternativu, que ye’l proyeutu Nocéu, de diversificación agroecolóxica sostenible, que plantea tamién ser una alternativa anticapitalista, pola forma de producir, de distribuir, y pol estilu de vida un poco tamién.
Y ellí planteamos cambiar el modelu de lo que ye l’agricultura tradicional, lo de tener vaques y cuatro coses, y diximos que necesitábamos ser autosuficientes na midida que podamos, y vimos que podíemos producir tou esti tipu d’hortaliza, tou esti tipu de fruta… tolo que podemos tener equí n’Asturies en sin forzar nada.
Somos conscientes que la industria agroalimentaria, conxuntamente cola industria enerxética, son les principales causantes del cambiu climáticu, del consumu de recursos ecolóxicos cada día más escasos y que tan agotándose, y eso ta propiciando que cada día haya más problemes, nun solo a nivel de mediu ambiente, si non a nivel de salú.
Pa poner el proyeutu en marcha vas implicándote en munches coses, como la semiente, recuperación de grana autóctono, trabayamos con una rede de semientes, y llueu trabayamos col SERIDA [SErviciu Rexonal d’Investigación y Desarrollu Agroalimentariu], porque queremos que los organismos oficiales, que tienen un dineru públicu, s’impliquen nestes coses.
Y tamién vamos faciendo trabayos d’investigación en temes de sidra, de frutos… porque hai munches variedaes perdíes, nun sé, más del ochenta por cientu de les semientes tan desaniciaies, y llueu, alcontramos que la manzana de mesa yera una manzana que tuvo trabayándose y tamién ta perdío. Pa poner la plantación de manzana que ficimos de diecisiete variedaes, tuvimos qu’esperar un añu, pa encargalo a los viveros. Porque nun hai demanda.
Hai demanda de sidra, eso ta trabayándose, hai ventidos variedaes de manzana de sidra.
Tamién queríamos diversificar nozales, pero tampoco hai investigación sobre eso.

Tamién tamos cola comercialización, ehí enseguida te cortexen les grandes superficies, como El Corte Inglés, pero ellos son los principales culpables de que güei l’agricultura te como te, entós plantegamos como alternativa la venta direuta, en sin intermediarios y a mui corta distancia. Tenemos una tiendina pa vender y tamién vendemos nel mercáu de Pola Siero los martes. Eso, al principiu costónos un poco de trabayu, porque nun lo conocíamos, pero siguimos aprendiendo. La comercialización nun ye fácil, tienes que dar muncha confianza a la xente, y dir con un productu bonu. Nun val dir con unes lechugues llenes de cascoxos. Bono, eso llega a los amigos ya eso, pero nosotros queríamos llegar a más xente. Home sí, había grupos de consumu, pero esos taben concienciaos ya, y quiximos entrar no que yeren les places de siempre, y qu’ellí, la xente normal pueda tamién conocer esto.
Quiximos apostar por eso tamién, y llevónos a facer alcuentros, nun sé, na época de los magüestos, cola disculpa de les castañes y la sidra dulce, poníamos cosines asina n’ecolóxico, y en mayu facíamos otru, y asina, y eso dio llugar a que la xente nos fuese conociendo y garrando confianza no que tábamos faciendo, y ellos mesmos foron tresmitiendo la voz de que funcionaba esto.
Y, agora mesmo tamos desbordaos, tenémoslo too vendío. Y hai xente que sigue viniendo a pidir coses, como una cooperativa de consumu d’Arriondes d’unes trenta persones, que quieren que-yos suministremos productos de temporada ecolóxicos durante tol añu. Yera un poco compromisu y pensamos n’aumentar, pero creemos que tenía qu’haber otra xente. Y coincide que Chupa-chups cierra y hai una pareya d’Infiestu, que tienen tamién tierres de los padres, y entamamos a trabayar con ellos.
Y ya-yos pasamos esti grupu pa que puedan trabayar pa ellos.
Y creo que cada día hai más demanda de productos ecolóxicos. Cada día la xente ta concienciándose más. Pero eso sí, hai que da-yos muncha confianza. Nun val: “güei nun vengo, pasao tampoco…”, tienes que ser seriu.
Y de los precios, plantegamos que nun foren precios pa ricos. Porque l’agricultura ecolóxica suena como pa ricos. Pero pa que l’agricultura ecolóxica seya una alternativa, tien que demandalo la sociedá, y pa eso, hai qu’axustar precios, pa que puedan llegar toos a ello y-yos vaiga gustando.
Y val ya, ya si eso siguimos llueu.

Alberto Buznego “Rizos”
Yo quería entamar por esto último que dicíes.
La gran diferencia entre los que ven na agricultura ecolóxica y el comerciu xustu, un nichu de negociu y los que vemos otra cosa ye si consideramos esto como una opción o como un derechu
Pa Picu Rabicu l’agricultura ecolóxica, el comerciu xustu, la soberanía alimentaria, son consideraos como métodos de llucha pa cambiar les coses. Nun son una opción, son un derechu.
Ye un derechu que tien que llegar a tola xente, nun ye una opción pal que se la pueda pagar. El comer sano, de calidá, calteniendo l’entornu, ye un derechu pa toos.
Nun tien problemes naide pa producir asina, nun tien problemes nin Carrefour nin Bayer. Bayer produz fitosanitarios ecolóxicos en sin dengún problema. La Dupont equí tamién lo viende en sin dengún problema. Ves los anuncios del Carrefour y tan mui preocupaos pol mediu ambiente, tienen yogures ecolóxicos y tan mui orgullosos.
Pero nun ye eso. Eso ye una parte. Eso tien un márketing y ye p’aquellos que quieren morrer un puquiñín más tarde y puen pagáselo.
Pero l’acceder a una alimentación de calidá hai que consideralo como un derechu ciudadanu. Porque, falando claro, l’alimentación a la qu’accede la xente ye una mierda. Ye una mercancía total y mala y… tósica.
Y equí enllazo colo que ye Picu Rabicu. Ye un colectivu de xente que veníemos de dellos movimientos sociales, fundamentalmente sindicales y d’insumisión, qu’entamamos a enrollanos cola comercialización d’alimentos xustos, al principiu había daqué d’artesanía, pero agora prácticamente ye too d’alimentos.
Un problema fundamental na comercialización de los alimentos ye’l de los intermediarios. Y nosotros intentamos averar, de la manera más direuta, los productores al consumidor. Bono, una tienda nun ye la manera más direuta, la manera más direuta ye la venta direuta, pero esto tamién hai que dir trabayándolo. Tenemos tamién un grupu de consumu, y ehí ye muncho más direuto, porque en realidá, la tienda nun intervien. Nun grupu de consumu, los agricultores lleven ellí los pidíos selmanales de la xente.

Pa nosotros lo llocal ye una prioridá cada vez mayor, anque casi toos venimos más bien del internacionalismu, lo llocal vémoslo como una necesidá clara, pero tampoco nun nos podemos escaecer de los países del sur, bono, falemos meyor de los países colonizaos, ye una definición meyor, porque lo del sur ye un accidente xeográficu y lo del tercer mundu ya ye patético, porque tenemos una responsabilidá con ellos, porque, querámoslo o non, nosotros somos parte de los colonizadores. Asina qu'agora, por mui interesante que seya lo llocal, llevamos varios sieglos imponiendo a aquella xente que cultive determinaes coses como p’agora dicir que lo güai ye nun tomar café porque vien de mui lloñe y nun ye ecolóxico.
Esto ye como un procesu, caun entama nun sitiu determináu y va recorriendo un camín, a vegaes los caminos van paralelos, a vegaes alcuéntreste nun sitiu, sepárteste, pero, básicamente nesa hestoria ye la que tamos, n’establecer canales de comercialización cada vez más direutos entre productores y consumidores, teniendo en cuenta qu’eso ye un derechu, intentando que los agricultores accedan a unos precios dignos.
Los canales de comercialización son un de los problemes fundamentales. Los canales que teníen los campesinos cortáronse casi toos, los mercaos, les places…, tan mui arrequexaos. Un datu, el setenta y cincu por cientu de los alimentos que consumimos n’Asturies viéndenlos cincu empreses. Quier dicir qu'al restu la humanidá quédanos el venti cincu por cientu. Y dientro d’eses cincu empreses nun ta El Arco, o El Árbol, colo qu'al final, los alimentos, fuera de lo que son les grandes superficies, son un cincu o un diez por cientu. Y ye ehí a onde puede acceder un artesanu o un productor ecolóxicu. Entós, la comercialización ye un cuellu de botella totalmente. Entre miles y miles de campesinos nel mundu, y millones de consumidores, ta too controlao por un grupu d’empreses.

Ye tar contra lo que podemos llamar la revolución verde. Nesi sentíu, nosotros definímosnos como contrarrevolucinarios. Porque la revolución verde ye la única revolución negativa que conozo na hestoria. La revolución verde nun tien nada que ver colo ecolóxico, tien que ver con tolo contrario. Dempués de la segunda guerra mundial intensifícase la industrialización de l'agricultura. Apaez la mecanización agraria, la biotecnoloxía… etc. Bono, agora, nes producciones agraries, fales casi en términos industriales. Ye dir contra esa industrialización de l'agricultura y de la transformación, porque eso tamién ye básico, tampoco podemos ver a los agricultores, a los campesinos y campesines, como productores de materies primes esclusivamente. Ye mui importante que participen tamién nesa transformación dalgún mou.
Y frutu tamién d’eso, llevamos como un par d'años no que ye la evolución lóxica, que ye metese na producción. Y tenemos una güerta y una pequeña, mui pequeña ganadería d’oveyes xaldes y tamos en procesu d’espansión, acabamos d’espandenos a otru conceyu. Bono, tenemos una pequeña esplotación colectiva y autoxestionada d’ocho persones, que nos xuntamos pa intentar meyorar la nuestra alimentación y la nuestra soberanía alimentania, llámase La Vecera.
Ye posible facelo, mui difícil, porque l’accesu a la tierra n’Asturies ye mui, mui difícil, pero ye posible. Nun hai falta montar Falcon Crest. Pues entamar con poco. Vas deprendiendo. Va llevándote a otros rollos…

Y tampoco nun ye fácil tornar a los métodos tradicionales d’esplotación. Ye mui difícil llegar al paisanu d’una cuadra, que costó lo que costó, nuna nave de la hostia, y dici-y: “non, lo que tienes que facer ye soltar les vaques pel prau”.
El ganaderu ye la persona que trabaya pa más xente, trabaya pa los bancos, pa los que vienden y arreglen tractores, pa los que faen piensos, pa los veterinarios, pa un montón de funcionarios… y too eso a base de trenta y tres céntimos el llitru llechi. Eso ye mui h.odío.

Vamos, los pilares fundamentales son, la soberanía alimentaria, el derechu de tolos pueblos a decidir sola so alimentación y a producir alimentos con calidá suficiente p’atender al so pueblu, y articular mecanismos de resistencia que seyan económicamente viables.
Bono, lo de que Picu Rabicu seya económicamente viable ya ye…, de momentu sí, sostenémonos, pero con munchu trabayu voluntariu, bono, voluntariu non, militante, nosotros somos militantes.

Un asistente
Comentabeis al principiu que lo faceis como lo de casa, o que les coses que son de casa son meyor valoraes. ¿Nun ye facer como realmente se fizo equí tola vida?¿Nun tais conectando col pasáu?

Gustavo Forcelledo
Sí, ye un poco la vuelta a la manera de trabayar d’antes, ye tornar a garrar la semiente propia…, pero eso tovía nun morrió.

Aquilino González
Nun morrió, pero agoniza.

Otru asistente
Amás, eso que te vienden por ehí de casa… la paisana sulfata los tomates en sin denguna conciencia de la dosis que ta echando, echa un puñáu… y ye de casa, de la güerta d'al llau, pero nun sabes qué ta faciendo esa paisana.
Y munches vegades esos productos tienen más peligru que los otros tovía.

Alberto Buznego “Rizos”
Sí, ves a la xente comprar velenos y dices… ¡madre mía!. Quieren matalo too. Y dicen…” non, si ye pa los mis ñetos”, bono, será que son unos pesaos.
Lo que pasa que llueu tamién los métodos de control y certificación tienen la so tela.

Un asistente
Nun toi na d’alcuerdo col tema de la certificación. Cola confianza d’un productor con un grupu de xente que lu conoza y sabe que lo ta faciendo perfectamente… nun tien por qué tar ehí en mediu’l COPAE [Conseyu de la Producción Agraria Ecolóxica del Principáu d’Asturies] nin dengún sellu.
Hai que buscar la venta direuta, creo yo.
Pagar pa que certifiquen que'l mi productu ye ecolóxicu…, nun lo veo.
Si, además de facer una venta direuta, invito a que conozcan la mi esplotación… nun tengo por qué tener una certificación.
Nun sé quien dixo eso de que'l sellu quedaba mui bien pa carrefour, … depende d'a onde quieras llegar.

Una asistente
Lo que pasa que, d’estes coses, hai de too. Hai xente qu’entramos por conciencia, y que lo tenemos superclaro, pero claro, siempre hai otra xente que nun entra igual… ¿entiéndesme?. Siempre tien qu’haber un pocu de control.
Porque yo toi nel Conseyu y veo qu’hai xente que vien porque hai un poco más de subvención.
Alcuérdome que coincidí con una señora na feria de Llanera, y vi qu’aquello, d’ecolóxico nada.
Hai xente a la que tienen que controlar un poco, porque si non, puede ser un fraude.

Otra asistente
Bono, yo soi universitaria, toi equí nel Campus de Viesques, y toi nuna asignatura que se llama Cooperación pal Desarrollu, y un de los proyeutos que tenemos que facer esti añu ye intentar modificar los Estatutos de la Universidá pa los “vending” y pa cafetería y tamién pa la fotocopiadora, ya introducir papel reciclau y productos de comerciu xustu, entre otres actividaes. Y sí que consuminos nos llocales d’Inxeniería en sin Fronteres café de comerciu xustu, y pa conseguilu, necesites que tenga un sellu, y eso acredita a que los beneficios repercutan en tola comunidá.

Alberto Buznego “Rizos”
Los sellos tienen una utilidá mui grande, que ye pa mandar cartes. Equí, n’Asturies nun hai grandes productores, pero pregúnta-yos pol sellu n’Andalucía, porque ellí, la duquesa d'Alba tien productos ecolóxicos.
Entós equí les discusiones son otres.
Nel casu del sellu de comerciu xustu, lo único que certifica esi sellu ye que'l preciu ta pagáu a tanto'l kilo. Hai un preciu xustu que s’establez con tolo que pueda suponer un preciu únicu del café pa tol mundu. Porque nun ye lo mesmo producir café de solombra en Nicaragua que café de plantación en Vietnam o n’Uganda y una cierta prefinanciación de la collecha y nun va muncho más allá. Mira que nun haya una esplotación mui evidente y eso.
Pero ye un sellu priváu, y claro, ye mui fácil, si yo cumplo eso, págenme más el productu, colo cual… hai denuncies de los cafecultores del Caribe diciendo que'l sellu ta comprando café a finqueros… entós lo de los sellos ye mui complexo.
Ye verdá qu’hai veces que puede ser una puerta d’entrada, pero los sellos hai que controlalos. Tienen que ser muncho más participativos. Nun puede ser que símplemente cuatro se xunten y marquen. Nosotros somos mui críticos colos sellos.
Nosotros nun trabayamos col sellu FLO [Fairtrade Labeling Organizations], nosotros nun lo vendemos… porque ya lo viende'l Carrefour, ye que suena hasta mal, ya suena a comercial.
Lo de los sellos tien una utilidá fundamental, que ye que, nuna estantería, un consumidor que nun sepa, identifique un productu. Nuna tienda, nuna venta directa, nun necesita un sellu. Un grupu de consumu nun necesita un sellu.

Una asistente
Yo tamién toi nun grupu de consumu, y sí, básicamente compramos coses, como les d’agricultura ecolóxica, que nun necesiten sellu, pero pa ciertes coses que vienen de lloñe, necesítase algo.
Y anque solo seya por concienciación, ye bono pa que la xente d’equí lo demande, y qu’esixa más precisión nos sellos.


Alberto Buznego “Rizos”
Voi dicite una cosa sol sellu FLO que yo creo que ye suficientemente esclarecedora: Nestlé tien un café de comerciu xustu selláu por FLO, y si Nestlé tien un café de comerciu xustu, esi sellu ye una mierda.
Nosotros taríamos d’alcuerdo con un sellu que certificara a la organización, non al productu. Y nel casu de los agricultores ecolóxicos tamién, certificar al agricultor, non al productu. Certificar a un métodu de facer, a unes maneres. Pero eso, a ver cómo lo certifiques, ye mui complexo.

Entós la confianza ye muncho más importante que'l sellu. Pero’l negociu, polo que tira ye pol sellu. Y claro, pa un agricultor, dicir “yo paso del sellu”, tamién ye complicao. Ye lo de siempre, al final, los agricultores tan siempre pillaos por tolos caprichos de les multinacionales, de los intermediarios, de los consumidores…

Aquilino González
A ver, yo equí tengo munches dudes, pero hai una cosa que tengo clara, hai varios tipos d’agricultura ecolóxica, hai una agricultura ecolóxica que pa min ta bien fecha, que ye un poco marxinal pero que ye una alternativa posible y bona, hai otru tipu d’agricultura, que ye pola que se ta apostando n’Europa que ye la que yo llamo de les grandes superficies y del gran capital, y ye símplemente facer una agricultura ecolóxica pero productiva a tope, qu’entra nes grandes superficies y tien sellu y una normativa europea, y eso ya ta ehí, funcionando, y tenemos por exemplu ya a la DuPont faciendo productos ecolóxicos, y hai una tercera agricultura, que ye la que planteamos nosotros, que ye más de fondu, que ye nun solo cambiar el tema del abonu, del cuchu, si non que lleva tamién una diversificación, rotación de cultivos, recuperación de grana…

Y cuando nos planteamos esto diximos “nun queremos entrar na mesma industria capitalista que nos va producir los abonos y lo demás", si non que planteamos alternatives a eso, lo que nun ye fácil, porque tamién queríamos apostar por llegar mayoritariamente a la población.
Y la normativa europea, dientro de lo malo, ye lo más seguro qu'hai pal consumidor, nel sentíu que controla más rigurosamente que denguna otra, col sellu, con inspecciones…, porque nun tamos nuna sociedá perfeuta, concienciada, … hai dudes, hai especulación, nun toos lo facemos en conciencia, eso nun esiste, y mientres que nun esista, pa min, tien qu’haber algún sistema de control.
Porque yo nun sólo quiero llegar a la xente cola que tengo confianza, quiero llegar a la xente que nun conozo de nada, y a esos, ¿cómo-yos certifico los productos?.
Hai una xente que consume productos ecolóxicos por conciencia, hai otra xente que ye por salú, y hai otra xente que ye por moda, a esos, igual que los ves venir, veslos marchar, eso funciona asina, porque’l sistema funciona asina.
Y entos, dientro les contradicciones, mientres eso seya asina, eso ye lo menos malo, necesitamos esa normativa pa, de momentu, siguir funcionando.
Anque tenemos que siguir con esti debate pa dir reflexonando, pa dir viendo otros mecanismos, pero hai que dar seguridá a la xente.

Y, por exemplu, en Sariegu, hai vecinos que dicen: “la carne ta en crisis, nun viendo bien la carne convencional, pero la ecolóxica tien subvención y viéndese meyor, porque hai campañes y ayudes”, y della xente, en sin conciencia denguna, métese a producir carne ecolóxica, pero dicen: “hostia, el piensu ecolóxicu que traigo cuéstame más”, porque quieras o non, l’agricultura ecolóxica va ser siempre más costosa, porque esi esfuerzu tenemos que facelu, porque tamos cuidando'l mediu ambiente, tamos cuidando la salú, y tamos creando puestos de trabayu, y esi ganaderu del exemplu diz: “si equí naide me ve, meto piensu del convencional, que me sal muncho más baratu, y viendo’l xatu polo ecolóxico”, y asina lo fai, y vien una inspección, mira l'asuntu y ve que nun gasta dengún piensu, y salen tantos quilos de carne… ¿cómo ye esto?, y abre la cuadra, y al paisanu faltó-y la escopeta pa echalos a tiros. Y va él y denúncialos porque-y entren na so finca a facer una inspección, y que lu roben encima, y tuvieron xuiciu, y pa echalu costó trabayu.
Entós claro, si nun hai tovía una conciencia na sociedá, a nivel del productor y del consumidor…, necesitamos mecanismos llegales y que funcionen y que seyan bien vistos.
Y pa min, tolos controles qu’haya…, que me vengan a controlar la sidra, que me vengan a controlar el tomate…, ta bien, ye más, esixo que me vengan, y que fagan tolos estudios que tengan que facer.

Un asistente
Yo crieme nuna d’eses güertes tan “ecolóxiques”, nes que se sulfataba tanto qu’había más sulfatu que tomate. Y además, vendíamoslo a un supermercáu del que se puede dicir el nome porque ya cerró, Oblanca, y nun sé cómo nun matamos a daquién. D’aquella Babosil vilo echar por kilos, y toos tan felices, nun pasaba nada. Y llueu, na mio vida llaboral, tocóme trabayar en control de calidá de sellos alimentarios. Y equí veo una doble moral. Por un llau, si nun te quies adaptar a les nueves tecnoloxíes y quies tar con temes artesanales, ye prácticamente imposible que'l proyeutu seya viable económicamente y que llegue a la xente que nun tenga una capacidá económica alta, porque los precios son mui altos.
Pero por otru llau, al final, un sellu de calidá son una serie de parámetros, y por definición, esa serie de parámetros son trampeables. Eso ta clarísimo, porque durante dos años dediquéme a facer trampes, porque la mio empresa dedicábase a eso, y si nun lo facía, echábenme.
O seya, eso trampéase. Y esa empresa certificadora suel ser, con tola probabilidá, privada. Yo nun conozo denguna empresa certificadora grande que seya pública.

Alberto Buznego “Rizos”
El COPAE n’Asturies ye públicu. Y esiste una gran producción con sellu regulador. Pero n’Andalucía, la certificadora ye privada. Y equí ye pública porque nun hai pal asuntu, pero nel momentu que lo puedan privatizar van dir por ehí.
Pero eses aparentes contradicciones nun son tales, son puntos de vista, él ta viéndolo de la manera del agricultor y yo toi viéndolo dende’l puntu de vista de la xente que facemos más llucha política. Nosotros somos mui ríxidos con determinaos principios políticos y éticos, pero somos mui poco ríxidos colos campesinos, porque ya ye tol mundu ríxidu con ellos.
Y claro, topes con grupos de consumu que dicen. “non, yo, a esti nun-y compro porque vendió pa les cestes del corte inglés”, pero dígo-y yo, “coño, pero si tu acabes de venir nun renault, echasti gasolina en repsol, pages-y la factura a iberdrola…”.
O seya, habrá qu’establecer otra serie de parámetros, porque ye qu'él vive d’eso, y si tu nun-y puedes garantizar unos ingresos…
Algunos grupos de consumu tienen abrasaos a criterios a los campesinos, pero llueu preguntes-yos, “pero vosotros café… ¿con qué criteriu lu mercais?”, “non, non, nosotros café non, que vien de mui lloñe”, “pero’l debate nun ye si se viende o nun se viende, ye si lo tomáis o nun lo tomáis”, porque, claro, tómenlo, pero ¿onde lo merquen?¿en carrefour?¿y esi ye un criteriu pa un grupu de consumu? Eso ye escaquease del problema.
Nosotros lo que tamos diciendo ye que'l campesín tien que manexase nel terrén de xuegu qu’hai, pero polo menos hai que tener claro que los sellos tienen unos llímites, y nun son la garantía p’algamar l'agricultura ecolóxica que queremos, pero ye un instrumentu que ta ehí y puede usáse… o non.

Un asistente
Ye un poco como si yo, por exemplu, agora, póngome a producir en sin conocer a xente, pero llueu, ya cuando conoza y tenga la mio producción vendía, puedo dicir que me doi de baxa nel COPAE, porque ya sabéis como trabayo y esto ye lo qu’hai.

Alberto Buznego “Rizos”
Y los grupos de consumu tienen los sos llímites. Too tien el so llímite. Porque de lo que tamos falando ye d’un cambiu mui grande. Pero bono, hai instrumentos, y caún tendrá que dir usándolos, pero hai que ser conscientes de los llímites d’esos instrumentos. Y en dellos casos tan apaeciendo problemes precisamente pol usu d’esos instrumentos.
Nosotros dicimos que los sellos tienen que se transformar, que la comercialización d’alimentos nun pue ser un negociu, tien qu’haber una ética social, tamos falando de la salú de la xente.

Aquilino González
Una de les coses que planteamos nosotros ye llegar a otra xente, nun sólo a esa xente que ya ta mui concienciada, y eso ye más complicao. Queremos llegar a onde te tol mundu, a esa plaza, y que la xente sepia lo que ye un productu ecolóxicu, porque pa min, esa xente ye la ferramienta principal, porque son ellos los que lo tienen que demandar, y son la mayoría, nun somos nosotros, y queremos llegar a esa mayoría. Y tenemos que dar una garantía, en too. Y nel COPAE, tenemos que pagar por too, y eso sube, pagamos por güerta y pagamos por transformaos.
Y si tengo confianza con xente que ya ta concienciada, digo-yos: “la sidra ecolóxica, con etiqueta val tanto, sin etiqueta val dos euros menos”, digo-yoslo a ellos, y nun lo pago al COPAE, y amás trabayamos menos porque nun tengo que colocar la etiqueta, ya inclusu ye un aforru enerxéticu'l nun ponéla, …quitála, volver a llavar…
Y el que me conoz, que conoz la mio casa, sabe que nun lu toi engañando, doilo a elexir, y la sidra ye la mesma. Nesa confianza ye lo que trabayamos. Pero nun-y lo viendas a un paisanu que vien de nun sé onde y que te diz que quier sidra ecolóxica. Nun te conoz, nun confía…

Y llueu hai otro. Cuando tamos plantegando una agricultura ecolóxica nun tan industrializada, más artesanal, más pequeña, más familiar, alcontrámonos con munches dificultaes. Una ye la transformación y la comercialización.
Cuando vamos a tranformar sidra, dícente que tienes que poner que contién sulfitos, y eso danlo pa tol mundu, pero yo nun meto sulfitos.
Y el vinagre, quiero llegalizalo, con rexistru sanitariu y con too porque, pa min, toi faciéndolo bien, pero non, dícente que non, que tengo qu’entrar na industria del vinagre, cuando toi faciendo venti llitros a la selmana, y na industria del vinagre tengo que pagar lo que ye imposible. Tien que pagar igual el que produz un millón de llitros de vinagre que’l que produz venti llitros de vinagre.
Y ehí tenemos otra llucha cola alministración. Hai que regular mecanismos pa que los pequeños agricultores puedan transformar en pequeño y vender direutamente, d’ una manera cenciella, y en sin esos costos, y que si queremos, que tengamos inspecciones en riegla.

Alberto Buznego “Rizos”
Eso, en Francia y n’Austria, que ya tan mui metíos nello, les normatives tienenles adaptaes. En Francia hai un rexistru sanitariu artesanal.
Esi ye un de los plantegamientos que llevamos defendiendo p’Asturies como daqué necesario.
Porque lo primero ye ya'l conceutu de quien pon lo del apellíu, porque l’apellíu siempre lu ponemos nosotros: ye artesano, ecolóxico… pero nun dicen de lo otro que ye industrial, químico… o lo que seya.
Y lo artesano… por exemplu, colos requisitos del rexistru sanitariu'l Gamonéu nun se puede facer. Eso de facer quesu nuna cabaña nel monte, en sin lluz nin agua nin na…. Y eso que montaron agora ye un paripé, porque ellí nun fai naide’l quesu. Van catar coles garrafes de “La Giralda”… y eso ye lo qu’hai.
Pero siendo serios, porque hai que ser seriu, lo que digo, en Francia hai un rexistru sanitariu artesanu, y n’Austria tamién, y eso permite facer delles coses.

Conozo a un rapaz, Cristian, que taba faciendo una envasadora de miel. Y esixíen-y lo mesmo a él qu'a la “Granja San Francisco”, y non, el tamañu yera distintu. Y decíen-y: “non, tien que tener bañu d’homes y de muyeres”…, y tien la so casa al llau.
Y hai coses que… y dependes del funcionariu de turnu, del veterinariu…, y hai que poner duches y yacusi pa los trabayadores que nun vas tener… pa envasar cien kilos de miel a la selmana.
Y eso ye lo aneudótico, pero’l rexistru sanitariu ye mui importante pa los artesanos.
Y tamién tan los canales de comercialización, porque con esi rexistru sanitariu puede comercializar direuta ya indireutamente, porque un campesín, na so casa, puede vender lo que quiera, pero a tres metros ya non. Y en Francia tamién hai un marxen de kilómetros de comercialización direuta, y bono, too eso son coses práctiques que tan ehí y que se pueden facer.

Un asistente
Tengo una última entruga. Faciendo un poco d’abogáu del diablu, antes comentábais que queríais llegar a muncha xente, pero realmente, en sin facer una producción industrial, ¿puede llegase a tol mundu? Por exemplu, les pites eses que tan tola so vida nunes xaules pequeñes y que-yos corten el picu, dicen que ye pa qu’haya güevos baratos pa tol mundu. Entós, ¿podría llegar a ser l’agricultura ecolóxica realmente alternativa?

Aquilino González
Ye un tema mui complicáu y ta enllenu de contradicciones. Soi de los qu’apuesten por una agricultura que seya alternativa y que llegue a la mayoría del mundu. Y hai xente como Rose Reisman y otros que tienen estudiao y demostrao que cola producción ecolóxica puede llegase igual que cola convencional o inclusu meyor.
Tuvi hai poco nuna charla sol llibru “Asturias Agropolitana”, de Jaime Izquierdo, que plantea que n’Asturies ande les poblaciones son pequeñes podríen facese munchos güertos alredor. Y amás agora que se ta planteando lo del aforru enerxéticu, podríen plantegase cantidá de soluciones p’aprovechar esos terrenos. Y eso tamién evitaría especulaciones urbanístiques. Y muncha xente podría dedicase a l'agricultura y relativamente cerca.

Otra cosa, si vos dais cuenta, l’añu pasáu hubo unes foles de calor con munchos incendios en Rusia, y perdiéronse más del cincuenta por cientu les colleches. Eso, fecho quiciavis pol cambiu climáticu, ta produciendo problemes mui graves na agricultura industrializada, pero nun tanto na ecolóxica, porque la grana ecolóxica ta más adaptada, tien más capacidá p’aguantar problemes y crisis. Y amás tamos contribuyendo a frenar esi cambiu climáticu. Ye l'agricultura industrial la que ta alimentando esi cambiu climáticu y la crisis ecolóxica.
Y toes estes revueltes o revoluciones d’Exiptu, de Túnez, salten precísamente porqué ellí, principalmente l’alimentu vien de Rusia, y coles pérdides de colleches, subieron los precios enormemente. Triplicose’l preciu de la barra de pan. Nun podíen comprar el pan.

Y lo de los gochos contaminaos n’Alemaña, la información que te dan nun te diz nada. Pero investigando, ves que de los desfechos de los biocombustibles de Brasil, de México o de nun sé onde, lo que ya nun sirve pa los coches, métenlo pa los piensos de les industries de los gochos esos. Y too eso ta supercontaminao bestialmente de yerbicides y de pesticides, y eso trai consecuencies.

Nun podemos dicir allegremente que somos una alternativa a l’alimentación industrializada, pero sí queremos apostar por ello. Y nun va ser fácil. Y en sin un sofitu por parte l’alministración, nun se va poder. Nun pue ser cosa namás de cuatro chiflaos.
Porque la idega esa de Jaime Izquierdo ye mui guapa, facer güertos, crear cientu cincuenta mil puestos de trabayu nes zones rurales, pa da-yos vida, cultura…pero ¿y les tierres? ¿En manes que quien tan? Too eso hai que cambialo.
Y por eso ye mui importante que’l consumidor, la población, tome conciencia del tema y que reivindique la necesidá d’esa agricultura. Porque l’alministración, nel momentu qu’haya presión, tien que cambiar el chip. Si hai muncha presión social, que nun l'hai tovía, tamos empezando, l’alministración tien que comprometese y dai otru enfoque a los territorios.

Un asistente
Pero eso nun ye lo que se fai na Xunión Europea. Si Alemaña tien una superproducción d’azúcar, pa que’l productor nun pierda dineru, ta mandando l’azúcar subvencionao a un país del tercer mundu, que nun ta dexando que lo produzcan ellí, porque nun pueden competir con esi productor que ta primáu, ta subvencionau.

Alberto Buznego “Rizos”
Pera, pera, la política de subvenciones de la Xunión Europea ye muncho más complicada que too eso. L’ochenta por cientu del dineru recíbenlo'l venti por cientu de los productores. Y nun confundamos productores con campesinos. La política de la Xunión Europea ye mui mala pa los campesinos del sur y pa los campesinos del norte.
Ye precisamente la política de subvenciones de la Xunión Europea y de los Estaos Xuníos lo que ta llevando a la ruina a los campesinos, a toos, a los del sur y a los del norte.

Hai un mitu que ye que too esto de la biotecnoloxía, la industrialización de l’agricultura, ye p’alimentar el mundu, que ye necesario, pero ye mentira. Ye absolutamente falso. La producción d’alimentos creció más que la población nos últimos trenta años, y cada vez hai más xente que pasa fame.
O seya, ye un problema de distribución, de repartu. Ye un problema de xusticia social. Nun ye un problema de producción.

Equí n’Asturies nunca hubo tan pocos campesinos y tan poca producción agraria. Esti añu ye l'añu onde menos producción agraria hai.

Un asistente
Y cuanto más s’especule cola tierra peor.

Alberto Buznego “Rizos”
Y lo que diz Aquilino. Al final hai que tener cambios políticos. Porque toes estes lluches individuales, lo importante ye que vayan convirtiendose en colectives y que vayan puxando a la gueta d’un cambiu políticu.

Aquilino González
Un datu, Haití, hai venti años o menos, yera autosuficiente prácticamente.Teníen arroz, azúcar, munches coses. La mayoría yeren agricultores que vivíen d’eso. Y cuando Carter y el Fondu Monetariu alcuerden introducir toos esos productos, miles d’agricultores tuvieron qu’afuxir, emigrar a los grandes suburbios de les ciudaes a mendigar y a morrer de fame ellí.

Güei sábese más que nunca qu'a los agricultores pequeños del mal llamáu tercer mundu tiénenlos morriendo de fame por polítiques internacionales d’esti tipu.
Entos, sí fai falta ayudar, pero dando ferramientes pa que puedan tener autonomía, llibertá. Porque si non tan dependiendo.
Y na India, una de les producciones de llechi mayores del mundu, la Nestlé introduz llechi supersubvencionada de los escedentes de llechi qu’hai n’Europa.
Y la llechi ellí, que yera’l sostén de millones de xente que vivía d’eso, con esos precios tan baxos, fai que se muerran millones y millones de vaques y millones d’indios probes tienen que marchar a sobrevivir o morrer de fame. Y agora la llechi… una vez fecho eso…, el que nun tenga perres a tomar pol sacu.
Eso ye lo que ta pasando cola política industrializada agroalimentaria.
Esto nun puede ser asina. L’agricultura ecolóxica tien que llevar consigo tamién unos plantegamientos éticos, morales, de xusticia social.
Eso ye lo que queremos. Y que llegue a una mayoría. Pero pa llegar a eso, tamos en pañales tovía.